Wednesday 18 February 2009

لا اتحبسنا ولا اتعذبنا

الموضوع وما فيه اني زعلت على كرامتي، سايقة جنب النيل هيلتون من ناحية المتحف والمطبات جبال لقيت شخص ما لابس كحلى وبيريه كحلي وواقف في الكشك بتاع الامن ده اللي جنب الجراج بتاع النيل هيلتون باقول له بابتسامة: المطبات عالية قوي
واذ بي اوفوجأ انه بيكلمني كأنه ظبطني في اثناء الاعداد للجريمة واحبط المخطط يافندم: عشان اللي بيفجروا المتاحف ماهو كلهم بيلبسوا زيك كده (وراح مشاور على الحجاب) انا طبعا في الاول ما صدقتش قلت ينكن بيهزر فاوسعت الابتسامة: ح ابقى اخد بالي وانا بافجر المرة الجاية قام بمنتهى العجرفة قال لي: ما انا عرفت عربيتك خلاص
الشهادة لله انا زعلت على روحي قوي حودت شمال عشان اطلع على الكورنيش لقيت واحد تاني لابس كحلي وبيريه بس عنده شرط على كتفه قلت له: فيه واحد قدام الفندق قال لي كذا كذا قوم يقول لي: لا مش كل المحجبات كده يعني
قلت له: انا على فكرة صحفية ومش ح اسكت وح اكتب في الموضوع ده يعني ما اعرفش امشي في بلدي، معدية اقوم اتهان ده انا لو كنت في اوروبا وللا امريكا يبقى دي اسمها عبارات عنصرية وكنت اشتكيته فقال لي: لااا هو قال لك ايه يعني
قوم انا فجأة لقيت الدموع نازلة لوحدها
احمد مهنا كلمني يبارك لي على الكتاب لقاني باعيط فقال لي طب خليكي مكانك انا جاي لك
جالي احمد مهنا ومحمد غزالي وقالوا لي ح نعمل محضر بالواقعة
مها سكوت ح نصوت كلمتني في التليفون وقالت لي: ما تروحيش يا نوارة القسم ح تعطلي نفسك وتوجعي دماغك على الفاضي
مش اسمع الكلام بقى؟ لا محمد الغزالي قال لي: لازم نثبت حقنا هو انتوا ما تلبسوش حجاب يتحرشوا بيكوا ويقولوا لكوا تستاهلوا تلبسوا حجاب تبقوا ارهابيين؟ طب تعملوا ايه يعني؟ مش ح تعرفوا تمشوا في البلد؟
وطبعا بما اني مؤمنة بالقانون وسيادة القانون فضلت قاعدة في قسم قصر النيل من الساعة خمسة لتمانية ونص، تروح الناس وتيجي الناس يعملوا محاضر ويمشوا لدرجة ان فيه واحد عمل محضر بقتل مراته ومشي واحنا لسة قاعدين
- ايه الحكاية؟
الحكاية كذا كذا
الامين يبص لي باندهاش ويقول لي: طيب طيب...الباشا ح يغسل ايده بس ويشوفكوا اصله كان بيتغدا
الشهادة لله المعاملة ما كانش فيها اي قلة ذوق خالص لحد قبل الاخر، قبل الاخر ح اقول لكوا ايه اللي حصل، 
الباشا يقول لي ايه الحكاية اقول له...يتنح شوية وبعدين يقول لي: هو انت ح تعملي عقلك بعقل واحد خريج ابتدائية؟ ما اخدتهاش ليه بروح الدعابة؟ عموما ح اعمل لك محضر
انسحبت من لساني وقلت له: يا فندم انا بادفع ضرايب وهو بياخد مرتبه من ضرايبي مش عشان يهزأني وانا ماشية في الشارع
الظابط: الاربعين جنيه؟
انا: طب يعني هو خواجة؟ مالوش ام وللا اخت وللا خالة لابسة زيي؟
الظابط: طب ح اشوف لك حد يعمل لك المحضر!
يبدو والله اعلم انه لقى فيا مادة خصبة عشان ينادي كل الناس تيجي تبص عليا انا والاتنين اللي معايا اللي بقوا بعد كده اربعة
لان محمد مفيد جه ومعاه مصور صحفي، ومحمد مفيد عنده لا مؤاخذة دقن راحوا على الباب شافوا بطاقته وموبايله
بعد شوية جه ملازم كده بص لي وكل شوية واحد يدخل ماسك في ايده ورق قال يعني ح يعمل المحضر عشان يسألني فيه ايه عشان يضحك الظاهر وللا ايه؟ وانا راخرة قعدت اقول كلام بتاع الضرايب والاهانة ولو كنت في بلد تانية كانت بقت عبارة عنصرية، هو محمد غزالي حاول يغلوش على كلامي شوية عشان يقتصد في ضحكهم عليا وهم يقولوا: مافيش ظابط بيلبس كحلي
قلت له ايا كان حتى لو بياع ترمس ده واحد اهاني في الشارع وانا عايزة اشتكيه
ورايحين جايين، الظابط وصحابه اللي ناداهم، يتكلموا في التليفون: يافندم بتقول انها صحفية وعايزة تشتكي ظابط
وبعدين الظابط ابو تلات نجوم قال لي ح ابعت معاكي حد يعاين مكان الواقعة! بس هو ح ييجي من قسم الجزيرة
هم العيال قالوا لي هو بيحاول يعطلك يعني جايب واحد من قسم الجزيرة ليه؟ بس انا حاسة انه كان بيجيب صحابه يتفرجوا عليا
جه ظابط ما شفتش النجوم على كتفه وتقريبا ميت على روحه من الضحك ومحمد مفيد بيحاول يقنعه اننا عايزين يبقى لنا كرامة وهو يضحك اكتر ومحمد مفيد يقول له يعني وانا داخل القسم ليه يتشاف بطاقتي وموبايلي دونا عن كل الناس عشان مربي دقني والراجل برضه مش فاهم ايه الحكاية ويضحك تاني وبعدين راح معانا لموقع الحدث
اني الاقي اي حاجة كحلي هناك
كل اللي موجودين امناء شرطة وعساكري وكلهم شكلهم كانوا مستنيينا عمالين يبصوا لنا ويزغدوا بعض
انا لازم انزل دلوقت حالا ح اكمل لكوا الحكاية لما ارجع ان شاء الله واقول لكوا على مفاجأة مش ح تصدقوها

18 comments:

Fatma said...

بيضحكوا !!!!!

ان الواحد يطالب بمعاملة ادمية بقت حاجة تضحك!

مع كامل احترامي لو كانت اللي مكانك واحدةمسيحية والراجل اداها جملة فيها عنصرية دينية كانت هتسكت ولا الظباط هيضحكوا !!!!!؟

أحمد (زوج مخنوق ). said...

اللي بيلبسوا كحلي دول بتوع شرطة الانضباط
زي الشرطة العسكرية بتاعت الجيش كده

إسراء الطويل said...


الحمدلله.. احنا قلقنا اوي امبارح عليكي يا أستاذة نوارة
المهم توقيع الكتاب تم ؟؟
وبعدين عايزين نسخ للسعودية ملناش دعوة
بالتوفيق يارب وربنا يحفظك دايما
..بس صحيح الظابط معاه حق في حتة خريج ابتدائية دي .. العساكر النفر اللي بيحطوهم دول خرفانين اوي

مهندس مصري بيحب مصر said...

أما نشوف مفاجأتك

مواطن مصري said...

نوارة انا اذ بفتح المدونة امبارح ملقتش ولا بوست جربت كذا مرة نفس الحكاية بس على بليل لقتهم رجعو



معرفش السبب اية


بصي يا نوارة الموضوع و ما فية انا مع حرية لبس الحجاب و اظن انو مش ممنوع


انما لو الناقاب اة دي يبقى فيها كلام

ل الاسف فية رجالة بتستخبى في نقاب الله اعلم يكونو مطلوبين امنيا او ارهابين

و ايضا في بعض بعض بعض الستات بيكونو كذالك
و يرفضو لما الامن يطالب بهوييتهم
او الكارنية او النظر الي الوجهة ل التاكد

عشان كدة ان فية اماكن النقاب ممنوع فيها زي الجيش و انا مع دة
و اماكن السياحية الي محدش فينا بيروحها


بس موضوع النقاب انا اتفق انة موضوع امني و لكن انا بحتر بنات متنقبات بس فية بعض بيستغلو النقاب ككقناع


بس لو منعك عشان الحجاب اشتكيلة او ارفعي علية قضية سب و قذف
او روحي لنبية الوحش هو بيحب القضايا دي

مواطن مصري said...

نواررررة شفتي امير قطر مع ليفني و هو بيسلم عليها


اشمعنى الناس هاجت و مااجت على وزير خارجية مصر و محدش هاج على امير قطر
http://www.youtube.com/watch?v=ZBL3NfZUgNE

فاروق عادل said...

اية التعليقة دى عاوزين نعرف اية اللى حصل

الخوجة said...

ودموعك الغالية التى تنم عن نقاء سريرةلنمسكها زلة لييهم

نوار ة نجم تقول ..... لا اتحبسنا ولا اتعذبنا http://alkoga.blogspot.com/2009/02/blog-post_7984.html

حسام غانم said...

أعلق أقول إيه بس

مفيش حد له حق بياخده في البلد دي

احمد سعيد said...

نوارة
معلش سؤال
الصخص دة كان لابس ايه بالظبط؟؟؟
بالتفصيل يعنى؟؟

dr.lecter said...

كويس انهم ماقلوش ادبهم

في انتظار المفاجاه وتتابع الاحداث

Rania Lelah said...

يلا حصل الخير و الف حمدلله على السلامه

Unknown said...

نوارة

انتى مش قلتى قبل كده انك بعتى العربية وبتركبى تاكسيات؟
جبتى عربية جديدة؟ نوعها ايه؟

و أحمد مهنا ده مش اللى كتب بوست قبل كده انه ساب واحدة مغتصبة فى المترو ومارضيش يساعدها عشان مسيحية ومتبرجة؟

أنا مش فاهم

Anonymous said...

كدة تبقواعالم فاضبة سكوت حنصوت بتفهم

عاشــــــ النقاب ـقــــة"نونو" said...

يبقى انت اكيد اكيد هنا
منتظرة الباقي ولو اني متخيلة احساسك وقتها
معلش والله يا نوارة انا حاسة بيكي جدا لاني بتعرض للمواقف دي كتير جدااااااااا للاسف الشديد حتى على صفحات المدونات كمان حتى ابقي ادخلي كدة على صفحة التعليقات في موضوع دعوة ودعاء عندي وانتي هتلاقي اكتر من كدة وللاسف من انثى برضه لا لشيء الا لاني منتقبة والحمد لله على النعمة
في ميزان حسناتك باذن الله

Anonymous said...

بسرعة طييييب لااازم أعرف إيه المفاجأة

على فكرة أحلى لابلز هى الاسمها أنا

:)

Empress appy said...

اولا الف سلامه على ماما
ثانيا وحمد لله على سلامتك
واديكي شوفتى ابو سحلول وجها لوجه
وبعدين العيب مش عليك العيب على الحجاب
معلش يا نونا
اذا كان فيه ناس عادي وبتهاجم الحجاب يبقى مش عاوزه جاهل زي د يقول كده
انا مش فاهمه فيه ايه ولا حجاب نافع ولا غيره طيب نعمل ايه بس فى البلد دي
غير كده الواد ده ممكن يكون فعلا مش ظابط او دوريه ركبه هما اللى بيلبسوا اللى بتقوليه ممكن يبقى نفر هو اسم كده او من الامن الخاص يعنى الشركات الخاصه عالم جهله صحيح
المهم كل فتره عدي وابقى شوفيه واخبطيه صوره وتبقى اثبات

Anonymous said...

كس امين أمه
أقسم بالله أنا لو معاكي ولا محضر ولا خره كان أنضرب وطلع ميتيين أمه وبعد كده لما نخش القسم يبقى يحلها ربنا
هو ولاد الوسخه عايزين أيه مننا

بصي ي نوارة أي وقت تعدي من هناك تاني وتلاقي ابن اللبوة ده تصوريه وتحطي صوره على النت ووحيات أمه مكان ما أقابله لأكون ضاربه

واحد مبضووووووووووووووووون من كل الميري