Monday 23 February 2009

حاج اوباما....مش طالبة غباوة الله لا يسيئك

الى السيد الرئيس، رئيس محور الخير في مقابل محور الشر
هل تسمعني
حووووووووول
وحياتك فيه حتة في محور الخير اللي هي احنا حاصل فيها شوية لبش، وانت كنت عايز تقطع المعونة
باقول لك ايه يا حاج اوباما
مش طالبة غباوة الله لا يسيئك، دلوقت انت بتقول لهم يلغوا قانون الطوارئ، واذا اردت ان تطاع فامر بالمستطاع، قلت لهم يطلعوا لك ايمن نور واهو طلعوه، قلت لهم سعد الدين براهين يطلع نضيف واهو طلع نضيف
بتحط لهم العقدة في المنشار وتقول لهم يلغوا قانون الطوارئ ليه؟ انت كده بتضحي بتمانين مليون عشان اودة العمليات تعيش
يعني ح يموتونا واحد واحد في ستميت انفجار وح يلبسوا حماس المصيبة ومش بعيد يلبسوها لايران وحزب الله وطالبان وباكستان والقاعدة في نفس واحد
ويمكن الأي أر إيه بالمرة
(اه والله حيدر بغدادي بتخلفه طلع يقول ايران وطلبان، يعني حتى ما بيقراش الجرايد عشان يعرف ان ايران وطالبان لا يمكن يجتمعوا ابدا في مكان)
انت كده ح تولع لنا الدنيا
بتتلكك عشان تقطع المعونة صح؟
احب على رجلك اقطعها وخلصنا واختصر على نفسك وعلينا تلتميت تفجير في خمس ايام الله لا يسيئك
دول ممكن يعملوا حرب اقليمية عشان ما يشيلوش قانون الطوارئ
قال في الاول قالوا واحد رمى قنبلة من الشباك! انا مش فاهمة رماها من الشباك ازاي يعني؟ كان هو ومراته بيهزروا وبيحدفوا على بعض قنابل وواحدة منهم وقعت من الشباك؟
وبعدين رجعوا قالوا لك لا دي كانت تحت كرسي
تحت كرسي في الحسين! الحسين اللي لو ناموسة قعدت تحت كرسي كل الناس ح تشوفها
يا عم سيبنا في حالنا يا عم، يا عم ابوس ايدك انت ما انتاش دريان باللي احنا فيه
خلاص، ده قسمة ونصيب، يا جدعان سيبونا في حالنا لو فيه حاجة تتعمل كنا عملناها، خلاص بقى ده قضاء الله ح نعمل ايه؟ اكتر من كده وبيزيح ربنا
انت في ايدك تقطع المعونة؟ اقطعها يا عم انت لازم تذلنا قبلها؟
بدل كل التلاكيك دي، قول لهم والله بنمر بازمة اقتصادية ومحتاجين الفلوس، ما اعطلكوش
وما تخافش على قمل اسرائيل، هم اصلا مكرهين الناس فيهم ومش ح يساعدوا حد ابدا من اللي بالك فيهم لو قطعت عنهم المعونة هم عارفين يساعدوا نفسهم؟
ولا في ايدهم اي حاجة يعملوها غير يولعوا فينا احنا بس وما بيتشطروش غير علينا
طب احنا ذنبا ايه بقى في الليلة السودا دي؟ يا جدعان هو احنا مالناش حد ابدا في الدنيا دي؟ قاعدين في النص احنا زي سرحان عبد البصير؟
خلص في الكلااااااام انت ح تنقطنا؟ انجز وغلاوة الحاج حسين عندك، احنا عارفين انك مش بتطيق النظام المصري حتى كاتب في الرواية بتاعتك بتوصف البطل المخنوق: "وكأنه كان في أحد سجون مصر"، خلاص وصلت، وحياتك ولا احنا، بس ادي الله وادي حكمته، سيبنا بقى في حالنا نواجه مصيرنا لوحدنا ويا نحلة لا تقرصيني ولا عايز عسل منك، يا سيدي متشكرين كتر خيرك مش عايزين خدمات منك تيجي على دماغنا احنا في الاخر، انت مش عارف حاجة شكلك كده، دي المنوفية...المنوفيييية

30 comments:

رحلتنا في الحياة said...

قال عايزهم يلغوا قانون الطوارق قال، ده عند امه يا ادهم

ههههههههههههه عجبتنى دى اوى
بخصوص المعونة هواحنا نشوف من وش امهم حجاة المعونة اللى زلنا دى مش بتتصرف على شعب دى فى بطن النصابين اللى ماسكين البلد

رحلتنا في الحياة said...

ايه ده يانوراة فى الرابط ده ناس بتعلق وتقول الاخوان هما اللى بيفجروا مصر ايه قمة الغباء والاستهبال ده والله انا مش ناقصة حرق دم على الليل كده

حـنــّا السكران said...

هم لبّسوها لحماس دغري من دون أي مقدمات أو موسيقى تصويرية ؟؟

كنا عارفين طبعا , بس كنا متوقعين احتراما لعقل المشاهد إنه يكون فيه مقدمة مننوع ما ..أغنية مثلا .

هو من السيناريست اللي بيكتب للحكومة عندكم ؟؟

Unknown said...

ههههههههههههههههه
تقريبا جوز خالة عوكل

كان له طموحات سنيمائية بس العيلة رفضت

Unknown said...

عموما
السينما بتعاني من ازمة بقالها فترة في مصر

فيييييييين انور وجدي وللا حتى حسن الامام
كان ظبط لهم السيناريو الساقط ده
انشالله كان جاب نعيمة عاكف ترقص ياما القمر ع الباب

حـنــّا السكران said...

و رفاعى الطهطاوي .. و زكي جمعة ..

الله يرحم أيام الفن الجميل

ـ أنا قبل فترة قريت مذكرات النبوي اسماعيل

تقريبا طريقة الكتابة لسه ما تغيّرت

و لا الإخراج .. هي بس الألوان اللي دخلت على المشاهد .. و زادت الرقابة على لبس الممثلين .. يعني صار الزي موحّد تقريبا .. ما فيه أحمر زي زمان ( شيوعي ).. بس أخضر و اسود . يميل إلى النزعة الدينية المحافظة .. يبدو أن المخرج و المؤلف قد تبعوا طريق قافلة أبو سفيان

رحلتنا في الحياة said...

انا عرفت مين اللى اكل الجبنة هههههههه قصدى مين اللى عملها اكيد جوز عمة منى ذكى فى فيلم ابو على :)

مواطن مصري said...

طيب لو كان المعبر مفتوح كان اية هوا الحال الان

Unknown said...

نعم؟
نعم يابني؟
نعم؟
اقوم ارمي نفسي من الشباك دلوقت وتاخد الذنب انت؟

mido said...

لا بس التعليقات بتوحى بوعى عند الناس

و انهم مش مصدقين

mido said...

مافيش كتب تانية نازلة لك في السكة و حفلات توقيع و كده ؟ :))

أكون أو لا أكون said...

هذه اول بشائر ابو انتماء صهيوني...
قبل ... كانوا يعملوا السيناريوهات الغبيه وعلينا إنا نسكت... مانقولش ده كذب... المصيبه إنهم دلقوت بيفرضوا علينا إننا نصدق الحماقه الرعناء ...

أنا عاوز اشوف فين العرب اللي احتفلوا بفوز اوباما ابو انتماء صهيوني... وأعطيهم صفعه بجزمه قديمه...على وشهم...

Anonymous said...

اولا موش أوباما اللي غبي، الأغبياء هم اللي بيقتوا الأبرياء علشان يجدوا ذريعة لمد قانون الطوارئ... ثانيا أميركا دفعت لمصر معونات تقرب قيمتها الي 33 مليار دولار وده مبلغ خرافي... وبعد ما شبعتوا جايين تقولوا أقطع المعونه يا عم أوباما!!!
الحق علي أوباما انه بيضغط علي الحكومه الدكتاتوريه بتاعتكم علشان تعاملكم كبني أدمين... لا بد انك تفهمي ان الحق محتاج القوه والمصريين المغلوب علي أمرهم موش ممكن يتحرروا لو ميعرفوش يعني ايه حريه!! لأنهم ببساطة عمرهم ما جربوها أو مارسوها... ممكن تبطلي غباء لو سمحتي... وتفهمي ان في بعض الأحيان الشعب المصري محتاج في بعض الأحيان ضغوط أمريكية تمارس علي حكومته وإلا الحكومة هتدوس علي رقبته بالجزمه؟
تخيلي وضع زيمبابوي ... البلد متدمره ووباء الكوليرا متفشي والعمله أصبحت شديدة السخف ولا تساوي ثمن الورق المطبوعه عليه والرئيس بتاعهم متمسك بالحكم ولم يستجب الا بعد ضغوط أوروبيه وأميريكية بتقاسم السلطه.... تخيلي هيبقي الوضع ايه لو مفيش حد بيسأل موجابي عما يفعل؟؟! كان شعبه هيتفشخ أكتر وأكثر.... فكك بقي من السياده و النظره لأميركا علي انها الشيطان والشر الأعظم!

Empress appy said...

يا نواره التفجير كان جنب كابينه من اللى بيقعد فيها رتبه ما هو ده برضه يحير انا مش فاهمه ايه الغرض من الوساخه اللى بتحصل
كل الاصابات هبله وخفيفه مفيش غير سليسيا السائحه الفرنسيه اللى توفت كله طلع من مستشفى الحسين مفيش غير حالتين اللى جامدين
والوفاه دى بس
برضه مش عارفه بس هما مش محتاجين تفجيرات هبله زى دى علشان قانون الزفت يعنى الله يخرب بيوتهم

masrawy ala tool said...

الواد معتز الدمرداش مظبط معاهم.. قبل التفجير بيوم عمل حلقه عن الأنفاق وقالك ده أمن قومى.. قوم بعديها بيوم حصل انفجار.. قوم بيلسن ويقول مش قولنا ده أمن قومى.. السؤال أجبارى:وصل مابين الأعمده

masrawy ala tool said...

بيقولك يانواره أخلوا المتحف المصرى من الزوار .. وبيدوروا على واحده محجبه ههههههههههههههه

الخوجة said...

دول عباقرة يابنتى

دى توابل اللقاء

هو الاكل ينفع من غير توابل


مش عارف المنوفيه عملت لييكم اييه حاشرينها فى كل حاجه

انتى بينك وبين المنوفية تار بايت قولى لى بس


لا واللى عمل كده نقى واختار علشان السكة تفتح على كلة


تفتح على جميع السكك معقولة المخ ده


طيب القوات اللى موجودة كلها بالموقع اساسا كانت نايمة لما كل ده حصل

Anonymous said...

إيه ده
أوباما كاتب رواية...؟
زميل يعني :D
طب اللينك وحياتك يا نوارة لو عندك

بسمـــة مســـــلّم said...

والله مهزلة هههههههههه الحاج اوباما بشايروا بانت افرحوا يا عرب وانا اقول هوا يعنى حيعدى كده من غير الصهاينة ههههه سلامى نوارة واكيد منتظرة تعليقك والدعوة عامة

Unknown said...

رواية اوباما اوديو اهي
http://www.mininova.org/tor/1205826

بس بالانجليزي
مش عارفة اذا كانت مترجمة عربي وللا لا

Unknown said...

معلش يا شباب فيه واحد عايزة اقول له كلمة قبيحة من كلمتين اولها ظرف مكان وتانيها اسم من الاسماء الخمسة

وطبعا اللي هو
samehrocks

ليه بقى عشان جاهل ومتعافي

ومش ضروري يقرا تاريخ عشان يعرف اننا مش طول عمرنا كده

بس ضروري يشغل مخه اذا كان عنده مخ لاني اراهن انه
brand new

اسمع يا زفت الطين ياللي داخل تشتم في المصريين وانا ما اعرفش جنسيتك ايه بس غالبا مصري وغالبا عيل كمان

ما تسحبش بؤسك وعجزك ورخاوتك على كل الناس

المعونة اتعملت في الدنيا دي عشان تتسبب في العجز

اي معونة في الدنيا على فكرة

سواء المعونة لضعفاء الداخل او الخارج

الانسان اخترعها عشان يزيد من ضعف الضعيف ويزيد من عجز العاجز ويخليه دايما معتمد عليه

الناس كلها سواسية يا عم الكتكوت

ومافيش انسان احسن من انسان عشان شعب يعتمد على شعب

اللي عايز ينهض ويتقدم لازم يقطع كل المعونات اللي جاية له من برة ويتحمل المصاعب ويعالجها زي اي شعب في الدنيا

الافرو امريكا في الولايات المتحدة طالبوا بقطع المعونة اللي بتديها لهم الدولة عشان ده بيزيد من تخلفهم وجهلهم وعجزهم وضعفهم

وصرف المعونات دي مش احسان ولا طيبة قلب
صرف المعونات دي هدفها السيطرة والتعجيز والتعويق

واحنا مش محتاجين حد يضغط على حسني مبارك عشان يشيل قانون الطوارئ

لان اصلا اصلا حسني مبارك ما كانش ح يقعد تلاتين سنة لولا المعونة الامريكية اللي بتوصله بانتظام

احنا اللي محتاجينه ان المعركة تبقى عادلة

هو بيستقوى علينا بالخارج
واحنا عندنا القدرة والامكانية اننا نفرض عليه شروطنا ونعمل اللي احنا عايزينه في بلدنا لو امريكا توقفت عن دعمه وصرف المعونة له

ومافيش حل لتقدمنا ونهضتنا غير ان المعونة تتقطع خالص

خاااااااااااالص

Unknown said...

وبالمناسبة والنبي

دلاديل امريكا يقدروا يهاجروا ويروحوا يعيشوا فيها ويبقوا مواطنين امريكان وينسونا والله

حلوا عنا بقى

احنا عايزين نبقى بني ادمين محترمين وعندنا كرامة

مش عايزين نبقى متسولين وشحاتين وتابعين

مواطن مصري said...

نوارة انا يمكن مع او بختلف مع اوزبما في حاجات انما انا ضد المعونات و يا ريت تيجي منهم و يلغوها


سواء كانت ناس بتاخد معونات من امريكا يلغوها و يلغو بردو المعونات الي بتيجي عن طريق السعودية و ايران

Unknown said...

ايه المعونات اللي في مصر اللي بتيجي عن طريق السعودية وايران يا مواطن؟
مين بياخد معونات من السعودية وايران؟
الحكومة بتاخد من السعودية ساعات مش دايما
وايران؟ مين بياخد من ايران يا مواطن؟
الطم على وشي يا مواطن؟
الطم
يا عم انت بتجيب الكلام ده منين؟

وايوة انا مش عايزة معونات من حد
كحك يعني
نبيع غازنا وبترولنا ببلاش لاسرائيل ونشحت
ليه يعني؟

حسن على said...

قمل الدولة - الفاشل الغبى - سيثبت من خلال التحقيقات وجود بصمات للسيد حسن نصراللة على شظايا القنبلة وان احمدى نجاد شخصيا قام بالدعم الفنى بأن ظبت المنبة على ميعاد التفجير. كما انة عثر على بصمات ابو الاعلى المودودى( رغم وفاتة) على كوب شاى فى المقهى المجاور كذلك عثر غلى اتر لشعرة من كل من بلادن والظواهرى وتعرفت الكلاب البوليسية على رائحة حماس واخذت تقول "حماس حماس" بدلا من نباحها المعتاد"هو هو" كما انة يوجد تسجيلات تثبت قيام مجدى احمد حسين بتقديم الدعم اللوجيستى من محبسة ... فألى نوارة وباقى الحسادين الحاقدين -امثالى- اقول اختشوا على دمكوا القمل مستتب والدليل كل البصمات والادلة الدامغة اللى لقيناها...... وليخرس الجمبع قبل ان يصدر قرار من محكمة جنوب بمنعهم عن الكلام

هرطقة said...

ايه الكلمة القبيحة اللى أولها ظرف مكان دى

مهندس مصري بيحب مصر said...

مواطن مصري
===========
يارب تفهم يا ابني يارب
أيمن نور ما كانش طرف في اي صفقة
لكن الإفراج عنه تم بصفقة بين مبارك و أوباما
لكن ايمن نور ما كانش يعرف و ما كانش طرف و محدش خد رأيه

و علشان كده محدش بيتهم ايمن نور بحاجة خصوصاً انه من شرفاء البلد دي
او على الاقل ده رأيي

و بالنسبة للتفجيرات الهابلة اللي ميعادها مضبوط دايماً على مواعيد تجديد قانون الطوارئ فاللي ما يشوفش من الغربال أظن الناس كلها عارفة يبقى ايه

مواطن مصري said...

نوارة ب العقل الدولة مش من مصلحتها تعمل عملية عبيطة عشان تمرر قانون و عاوزة تمرر قانون الارهاب كانو عملو عمليات من بتوع القاعدة في الجزائر ساعتها كان يتمرر ب السهولة و بعدين مش من مصلحة الدولة انها تدمر السياحة عشان عارفة اننا في ازمة

tamer.sala7 said...

لا بس ملعوبة صح بصراحة

يعني التفجير يوم الاحد يعني معظم المحلات مقفولة ومفيش رجل كتير في السوق

والرتب كلها كانت جنب الدكة الطوب يعني لو مش الامن اللي عاملها يبقي علي الاقل علي دراية بالتفجير

M.A.M.M.G said...

والله انا كنت فاكر انى انا اتجننت لكن الحمد لله فيه ناس كتير شايفة اللى انا شايفه