Sunday 22 February 2009

النكتة دييييي قديمة

اتصل بيا ساندمانكي من قطر، هو ايام غزة اتصل بيا عشان يطمن اني لسة عايشة ويغيظني شوية كالعادة، بس المرة دي اتصل بيا وهو مصدوم، وساندمانكي مش من عادته انه يتصدم لانه مؤمن بالنظريات الفلسفية اللي بتقول ان الانسان اصله واطي والمفروض انه مش بيتصدم، وانا بدوري مصدومة انه مصدوم، ليه؟ لان هلبت ساندمانكي مصدوم ان عمرو خالد اخد تسعة مليون دولار معونة امريكية! حد يشيلني من هنا
مبدئيا ساندمانكي في قطر مش عشان يشحت ويتسول، عشان يشتغل ويكدح ويكوم نفسه، وح يجيله او جاله اكتئاب من القعدة هناك، ييجي واحد يقول لي ازاي ساندمانكي صاحبك بينما انتوا الاتنين لا ممكن ابدا تتفقوا في تنتوفة رأي قد كده، اقول له عشان اختلاف الدماغ ده يرجع الى اختلاف التربية واختلاف التعليم واختلاف القرايات، لكن مافيش اختلاف على الاخلاق، يعني مثلا ساندمانكي مش نصاب، مش شحات، مش بيلعب على الحبال، مش مدعي بطولات، مش كداب (وزي ما انتوا عارفين يا اصدقائي الصغار ان اللي بيكدب بيروح النار) ثم ان اراءه دي طالعة من دماغه، ماحدش بيدوس على بطنه يقوم مصقف وعلى حسب القبضية جاية منين النهاردة، له اراء تنقط وتشل ومش باقرا معظمها عشان ما اتخانقش معاه، خصوصا في فترة ضرب غزة اللي كوابيسها لسة بتهاجمني لدرجة اني من كام يوم حلمت بتسيبي ليفني وانا باقول لها:
It is not hamas, it is you who has to know that enough is enough
شفتوا الثقافة؟ كوابيس بالعنجليزي
بس انا عارفة ان دي دماغه، مش شاحتها من الجيران عشان اكلوه فتة بالهبر، وعمره ما عاش في دور المضحي المتفاني ولما حب يكسب فلوس راح زي اي انسان محترم شاف له شغلانة واتغرب عشان ياكل عيش من عرق جبينه
المهم ما علينا
ايه الجديد بقى في ان عمرو خالد بياخد معونة من امريكا؟ عشان ايه ساندمانكي يتصدم يعني؟ مش فاهمة، امال احنا عمالين نهاتي في ايه من الصبح وسيب عليا عياله يسبوا لي الدين ويشتموني بالاب والام والدين والميتين بمنتهى التقوى والورع؟
ماهو قبل كده راح الدنمارك ايام ما كل الناس كانت مقاطعاها وقال على موقعه انا رايح عشان اخد تموين لمشروع صناع الحياة
وواحدة صاحبتي صاحبة جمعية قالت لي ان بتوع صناع الحياة طلبوا منها الانضمام لمشروع ممول من المعونة الامريكية لتنمية العشوائيات، ثم ان ساندمانكي بيقول لي ان المؤتمر الاخراني اللي حدف عليهم عاصفة الصحراء دي في قطر كله كان ميغة وكله رايح يعبي عبي شيل شيل
ايه بقى؟ فين وجه الصدمة؟ على فكرة صدمة ساندمانكي يؤرخ لها، يعني نبتدي نقول: خمس سنين ما قبل صدمة ساندمانكي السنة الثالثة ما بعد صدمة ساندمانكي
طيب بقى قبل ما هاموش عمرو خالد يعف عليا ويدخل يسب لي الدين بكل التقوى والورع كما هو المعتاد احب اقول لكوا
اولا: الفلوس دي حرام، دي فلوس تعاملاتها كلها بالربا، ومصدرها الاساسي شركات صناعة السلاح، وشركات صناعة السلاح، هي اللي عملت قنبلة الدايم اللي عمالة تقطع في لحم الغزاوية لحد دلوقت حيث انها لما بتصيب مش بتسكت، بتفضل تسرح في الدم وتقطع الشرايين، هم بقى دولم الناس اللي بيغطوا فلوس المعونة الامريكية والمؤسسات الخيرية الامريكية اللي بتصرف على الداخل والخارج الامريكي
نفسي الاقي بقى الحلقة بتاعة عمرو خالد اللي كان بيقول فيها: لما تشرب ازازة بيبسي يبقى كأنك بتشرب دم طفل فلسطيني
اه، ماهو كان عامل حملة مقاطعة زمان وانا قصير كنت باحلم ابقى طويل
ثانيا: الفلوس دي سرقة، ناس بتشتغل في اليوم تمن ساعات ومش لاقية تأمين صحي وحضرتك بتقلبهم في الفلوس وتضربها في جيبك، ومش عشان هم امريكان يحل لك انك تاكل شقاهم
ثالثا: مافيش بني ادم محترم يبقى شحات، بجد والله العظيم، ده حتى الشحاتة بتيجي يوم القيامة نقطة سودا في جبين الشحات
يعني كل اللي بيمد ايده في المعونة ده ح ييجي على وشه بلاعة سودا قد كده يوم القيامة
رابعا: "انا عايز اعمل نهضة لبلدنا"، اه، ونهضة ايه دي اللي بتتعمل بالتسول؟ فيه حد بيشحت وينهض؟ ده الافرو امريكان في امريكا ذات نفسيتها طالبوا بان الدولة تقطع الاعانات اللي بتصرفها لفقراء السود في امريكا لانها بتعوقهم وبتخليهم يخلفوا كتير لان كل عيل بياخدوا عليه فلوس وبتخليهم ما يشتغلوش وما يتعلموش
خامسا: ما الدولة بتاخد معونة من امريكا، ما عملتش نهضة ليه؟ عشان بتسرقها؟ طيب ما اسرائيل بتاخد اكبر معونة في العالم من امريكا، ما شفناش على وشها نهضة ولا نيلة، وبعدين الدولة بتاخد بصفتها دولة، شحاتة بقى متسولة، اهي بتاخد بصفتها دولة، لكن المؤسسات الاهلية والافراد والدعاة والصحفيين والمدونين وحنفي ابو دقة وغير ابو دقة بياخدوا معونة بصفتهم ايه؟ ولاد مين في مصر يعني عشان ياكلوا معونة؟
سادسا: مين في الدنيا اللي ح يديلك فلوس ويسيبك تعمل اللي انت عايزه غير المواطن المصري اللي بيدي الحكومة ضرايب ويسيبها تعمل اللي هي عايزاه؟ مين غيرنا بيعمل كده؟ الامريكان دول تجار، من اول حرب الاستقلال وهم تجار، والحرب دي لا كانت عشان كرامة ولا استقلال دي كانت عشان البسبس لا مؤاخذة، يعني لا ممكن ابدا يصرفوا ملين من غير ما يحطوه على وشها تنور على كتفها تنور على كل حتة تنور
يعني مثلا لو دخل لعمرو خالد واحد على الموقع واستشاره في انه مثلي على سبيل المثال والحصر، وقال له انه مش قادر يقاوم ميوله المثلية وانه بيصلي ويصوم وبيحب ابن الجيران، هلبت ح يقدر عمرو خالد يقول ايه عن المثلية الجنسية على موقع ممون من المعونة الامريكية؟ طبعا المثلية الجنسية عليها خلاف داخل امريكا لكن مش خارجها، يعني السياسة الخارجية الامريكية في عز عز فترة بوش كانت بتهاجم ايران لانها ضد المثليين لان دعم المثليين خارجيا دي سياسة مالهاش دعوة بقى برايهم الحقيقي في المثلية
هلبت عمرو خالد ح يقدر يقول ايه عن اسرائيل؟ هل ح يقدر يعمل حملات المليون دعاء بتاعته لنصرة اهلنا في غزة؟ وبالمناسبة هو في الحرب الاخيرة ما عملش حملة المليون دعاء بتاعته اللي متعود يعملها
يا ترى ليه؟
هو عمرو خالد ده ما عندوش حد ينصحه لوجه الله تعالى ويقول له اللي انت بتعمله ده حرام عليك؟ كل اللي حواليه كده بياخدوه على قد عقله؟ مافيش حد يتقي ربنا فيه وينصحه نصيحة تنفعه في اخرته؟ يعني انت بتعمل ايه في الناس؟ تعلمهم الصلاة والحجاب والمعونة الامريكية؟ يعني ده تشريع جديد ده؟ معلش مع احترامي لكلام سيادتكم وليكن ما يكون، الواحد لما يبقى مقطع البطاقة زي سعد الدين براهين كده، اهو الناس ح تقول واحد بيشتغل بالاجرة عند الامريكان وخلاص
لكن واحد عمال يقول للناس قال الله وقال الرسول ويمشيهم وراه والناس بتقتنع بيه فعلا، ويروح ياخد معونة امريكية وهو اصبح، للاسف، مرجعية عند شباب كتير يبقى ده بيخرب اكتر من سعد الدين ابراهيم اللي ما بيخلطش المرمطة عند امريكا بالدين
لكن عمرو خالد بقى تأثيره على العيال اللي ماسحة عقلها وماشية وراه ح يبقى ازاي؟ دول ممكن يتهيالهم ان العمالة عند امريكا والشحاتة منها فرض عين على كل مسلم
وماحدش يقول لي بلاش تخوين احسن ارميه من الشباك، امال يعني امريكا ح تدي فلوس لاي حد في الدنيا ليه؟ في حب الله والوطن؟ لو انت ترضى تدي فلوسك لواحد يشتغل ضد مصلحتك يبقى امريكا تعملها، ومصلحة امريكا اظن واضحة يعني، وللا محتاجة شرح دي كمان

69 comments:

TAFATEFO said...

لا حول ولا قوة إلا بالله .. الناس بتشمشم من الصبح على خناقه .. وأنا من الناس دي

أنا ممكن أرد على حضرتك رد طويل أفند فيه كلام حضرتك سطر سطر (حسب وجهة نظري اللي ممكن تكون متوقعه) .. لكن الموضوع مش مستاهل .. رغم رفضي لتمويل مشروعات "عمرو خالد" ولي كل مشروعات الجمعيات الأهلية من معونات أو تمويل أجنبي

لكن معظم كلام حضرتك غلط .. ومغالطات

Anonymous said...

Basha..saba7 el foll 3ala a7lah nass :D

Ana 3andy bass e3terad soghayar qad kedah. Ana 3omry ma khadt agr men 7ad 3ala shoghl men el modawanah. Mawdoo3 tabara3oh lel2omamrah el amrekeyah el yahodeya el mesee7eyah el sohoyoneya el neoconeyah el qebteyah dah tahreeg fe tahreeg men 3andy, we makontosh mesada2 en 7ad 7aybe3at feloos assasan. Bass ahoh 7asal kaza marrah, we mawqefsh sa3et makont bashtem fel yahood aww fel amrikan (3omrek shofty el post elly esmoh "Fuck you mr Riccardionne"? 3amal waga3 demagh lelkoll el selk el seyasay fel safarah. 7attah kalemoony we qalooly "howa eih elly 7asal? da7nah ben7ebak wallahy!" el sharameet. he3 he3 eh3), fa 3omroh madaya2eny khalqeyan aww 7assessny enny molzem bera2y ma.

Haza tawdee7 la aksar.

Amma 3an Amr, wallahy kan lazem teshoofeih we howa beysh7at belengeleezy. 7agah fel maskharah. 3ala fekrah..magabsh seeret el islam aww saydnah mo7amed wallah marrah 3ala madarr kalam lemodet noss sa3ah fe mo2tamar islamy assasan. Rabena yezzedoh ya rab we yerzoqoh men 7ayss la nadry, 3alashan ma nefda7oosh kedah tany. ;)

Unknown said...

مصطفى
اوكيه


ساندمانكي

ههههههههههههههههه
يمكن الناس اتبرعت عشان ضحكت على العنوان

ح اشيلها من اصل البوست
انا كنت فاكرة انك بتعمل شغل على المدونة

Unknown said...

محمود

الا صحيح
بذمتك ودينك يا شيخ ما جابش سيرة الاسلام ولا سيدنا محمد عليه الصلاة والسلام؟

طيب ده غير الكرير بقى يا محمود
ما بقاش داعية ولا حاجة
تغيير الكرير مسموح بيه خليتني ظلمت الراجل، بس يا ترى غير كريره وبقى بيشتغل ايه غير انه بياخد معونة؟

معتزعادل said...

نواره انت متأكده من المعلومات الخطيره دي ده لو فعلا خد المعونه دي تبقي كارثه
متعرفيش ايه المصادر

TAFATEFO said...

بعيداً عن المقدمة عن ساند مانكي .. وطبعاً مش محتاج أقول اني مش من بتوع عمرو خالد (اللي محترمين .. واللي مبيسبوش الدين لحد والتعميم ده عيب في حق حضرتك قبل أي حد تاني وفيه تجني على عمرو خالد نفسه وعلى شباب صناع الحياه مثلاً اللي محترمين جداً ومبيسبوش الدين وبيشتغلوا لوجه الله تعالى -بعيداً بقى عن عمرو خالد-

أولاً: حضرتك بتفتي ليه؟؟ جبتي حرمانية الفلوس دي منين بقى ان شاء الله؟؟ يعني حضرتك حللتي مصدر الفلوس وانها ربا وصناعة سلاح .. وبعدين طبعاً التهكم على عمرو خالد طال حملة المقاطعة اللي كان عاملها زمان -أنا ضد اتصال عمرو خالد بالسفارة الأمريكية وبأمريكا عموماً .. وضد محاورته للدانمارك وزيارته -اللي مكنتش علشان يلم فلوس ولا حاجه ودي من تجنيات حضرتك اللي ليس عليها دليل واحد ولا تعقل طبعاً- مش لحرمانية ده .. ولكن لأنه لا يليق بيه ولأن أموال مصر قبل الخليج تكفي وزياده وهي ليست بقليلة أبداً ولا يحتاج عمرو خالد في مشروعات تنموية لأموال الولايات المتحده أو غيرها

ومعنى اني ضد اتصال عمرو خالد بالسفارة الأمريكية وحضوره الاحتفال ولقاؤه بسكوبي .. ومعنى اني ضد زيارته للدانمارك .. اني غير مؤيد ولا مقتنع .. انما مش معناها انه خاين ولا عميل ولا بوشين ولا بتاع فلوس ولا مصلحته ولا كل الكلام الفاضي ده

منظمات المجتمع المدني قد تسعى لنيل تمويل من هيئة المعونة الأمريكية في تمويل برامج تنمويه .. ولا أرى في لك عيباً

الطلاب قد يسعوا لنيل منح أمريكيه أو بريطانيه أوو غيرها للدراسه أو تمويل دراستهم .. ومفيش في كده عيب

=-=-=-=-=-=-=-=-=-=-=-=-=-=-=-=-=

على جنب .. مع كامل احترامي لحضرتك (المعروف قطعاً) أنا مش مصدق انساندمانكي اتخض واتصدم علشان عمرو خالد المعونة الأمريكية هتدخل في تمويل حملته الجديدة .. البر اللي بايت وحمض أصلاً -واللي زعلني جداً- بس أميد ساند ماكي مش من عشاق عمرو خالد واتصدم فيه

تاني على جنب .. سعد الدين إبراهيم موضوع أنا مش فاهمه أصلاً كويس .. أنا بحترم كل كلام الرجل عن النظام المصري .. لكن علاقته بأمريكا معتقدش أنها عمالة كما يروج النظام المصري .. لكنها بالنسبة لي مش مفهومه

Unknown said...

معتز

بص انا متأكدة مليون المية من مشروع تنمية العشوائيات الممول من المعونة الامريكية
لان صاحبتي غادة جبر مديرة جمعية صحبة خير بتوع صناع الحياة طلبوا منها تشارك في المشروع وهي ما راحتش معاهم وهم اللي قالوا لها ان المشروع ممول من اليو اس ايد

التسعة مليون دولار بقى يقول لك عليهم ساندمانكي لانه هو اللي حضر المؤتمر اللي عمرو خالد اخد فيه المعونة التانية دي
هو يحكي لك بالتفصيل

بس المشروع الاولاني انا متأكدة منه تماما لان بتوع صناع الحياة بنفسهم هم اللي قالوا كده
وتقدر تسألهم
ومش ح يقدروا ينكروا

حاجة كمان
ممكن تشوف على الموقع بتاعه
مش عارفة بقى ح ينزل الخبر ده وللا لا

معتزعادل said...

المحكمه اتنورت يا نواره انا هدعبس كده ولو وصلت لحاجه هقولك اصل اعرف ناس كتير من صناع الحياه

واعرف ناس من كبار اللجه المركزيه وربنا يسهل واعرف اشوف لان بجد كارثه

TAFATEFO said...

ثانياً .. حضرتك انتقلتي من التخوين لما هو أكثر بيع المة والدين من أجل المال (في مسألة صاحب الميول المثلية اللي حضرتك افترضتيها) .. بتاع ايه بقى عايز أفهم؟؟ يعني ليه حضرتك بتقولي كده اصلاً؟؟

وبرضه مع رفضي وعدم اقتناعي لحاجة عمرو خالد لفلوس المعونة الأمركية في تمويل أحد مشاريعه (وأنا متأكد انه مش بيحط الفلوس دي في جيبه مثلاً) فمعتقدش ان لما ساند بك مانكي يتكلم عن عمرو خالد المفروض اني أأمن على كلامه (مع كامل احترامي لساند بك مانكي)


مش علشان مبنحبش عمرو خالد .. يبقة نستبيح دمه .. وان كان استبيح في بوست حضرتك ما هو أكثر من دمه

TAFATEFO said...

أيوه مشروع تنمية العشوائيات أعلنوا انه داخل في تمويله 9 مليون دولار من هيئة المعونة الأمريكية من زمان

هو الرجل أنكر .. ده هو اللي أعلن .. نختلف أو نتفق ده محدش يحجر على الحق ده

أنا مختلف مع ده

انما لا هو خاين .. ولا دي سبوبة .. ولا هيضربهم .. ولا كل الكلام الفاضي ده

كتير من المشروعات اللي بتقوم بيها منظمات المجتمع المدني داخل في تمويلها المعونة الأمريكية وشركات أمريكية زي بروكتر آند جامبل وحاجات تانيه كتير

Unknown said...

مصطفى
لا معلش
حضرتك محتاج تقرا شوية عن المعونة الامريكية عشان تعرف مصادر تمويلها منين غير ضرايب المواطنين
هات كتاب اعترافات قرصان اقتصادي وهات كتب ناعوم تشومسكي واقرا بالتفصيل عن المعونة الامريكية عشان تعرف مصادرها منين
ودي حاجة معروفة جدا يا مصطفى مش ذنبي انك ما تعرفش ان المعونة الامريكية جزء منها ضرايب والجزء الاكبر منها شركات السلاح
دي معلومة بتذكر في الكتب كتحصيل حاصل زي حار جاف صيفا دفيء ممطر شتاء كده
وفلوس تجارة السلاح حرام يا مصطفى
متهيالي يعني
وخصوصا لما يبقى سلاح امريكاني ما بيروحش غير للي بيموت الابرياء

ساندمانكي مش بيحب عمرو خالد
بس مش بيحبه لاسباب تانية خالص ما كانش متوقع يعني انه ياخد معونة من امريكا

حملة المقاطعة دي يستاهل يتفضح عليها
عشان منين شرب ازازة بيبسي يبقى زي شرب دم طفل فلسطيني
والمعونة الامريكية مش شرب دم كل الابرياء بما فيهم اهالي نيكاراجوا يا اخي

باقول لك ايه
انا ما باحبش الاستعباط
اللي انت بتقوله ده استعباط لا مؤاخذة
يقابل السفيرة الامريكية وياخد منها فلوس ويروح الدنمارك في تحد للمقاطعة العامة اللي التزم بيها كل الناس حتى انا اللي كنت شايفة ان الناس مكبرة الموضوع زيادة عن اللزوم
انما مش معنى كده انه خاين ولا عميل ولا الكلام الفاضي ده
معلش ده بقى الكلام الفاضي بعينه
كده بقى دخلنا على كلاوي واحنا مش في مجال اننا نعيش في دور كلاوي في البرد ده
الدنيا عفرة بقالها يومين
واحد زائد واحد ما يساويش خمسمية تلاتة وخمسين ونص

بالنوسبة للي دخلوا سبوا لي الدين وقالوا لي يا عاهرة يا فاجرة فتقدر تراجع التعليقات بنفسك

باقول لك ايه

فيه واحد اسمه موشى شاريت
ابقى اقرا مذكراته

Unknown said...

ايه ده ايه ده؟
ايه الفيلم الهندي اللي انت عامله ده يا مصطفى؟
هو انا قلت لك ظبطه مع صباح؟
استبحت دمه في ايه؟
انت مش تجمع كده وتركز وللا بس بتقول اي كلام؟
منين بتقول انه هو ما انكرش انه اخد معونة
ومنين لما اقول اخد معونة تقول لي بتستبيحي اكتر من دمه
هو فين دمه ده؟
هو عنده دم؟
هو اللي يشحت من الناس يبقى عنده دم؟
دي اسمها شحاتة وللا مش شحاتة؟
رد
دي شحاتة وللا مش شحاتة؟
ثم انا ما قلتش انه ضربهم في جيبه
انت بتكلم مين؟
انت الظاهر مش نايم كويس
جمع والنبي مش طالبة يونس شلبي كمان

TAFATEFO said...

قريت البوست تاني

حضرتك غلطانه ميت مليون غلطه في السطر

الرجل منذ بدأ حصار غزة وهو يحث المسلمين على نصرة أهل غزة .. ويناشد أهل غزة الثبات .. ومع بداية الحملة أطلق حملة تبرهع بالمال والدم

http://www.islamonline.net/servlet/Satellite?c=ArticleA_C&cid=1230650269287&pagename=Zone-Arabic-News/NWALayout

تاني .. مش من حق حضرتك تخوني حد .. ولا تطعنيه في شرفه .. ومش معنى انه عمل حاجه مش متفقه معاها .. انها فرصه للنيل منه .. أنا مش متفق مع دخول أموال المعونة الأمريكية في تمويل مشروعه لتنمية العشوائيات .. وأنا ضد المعونة الأمريكية أصلاً .. لكن مش معنى كده انه باع وطنه وعروبته ودينه

Unknown said...

مصطفى
معلش اسمح لي
انت بتخرف

TAFATEFO said...

استعباط مش مشكله

مقاطعة مين فرضها والتزم بيها كل الناس .. هو شاف ان التجاور مع الحكومة الدانماركية والمجتمع الدانماركي أجدى (ومش هو لوحده وده من حقه) .. انتوا ليه بتلزموا الناس بدماغكم انتم؟؟!! شئ غريب فعلاً على رأي هاني نظيم

ثم منين بتحرمي وتحللي .. مهما كان مصدر المال فهو مال حكومه بالنهاية .. والمال ده هيدخل مصر في صورة مشروعات تنمية سواء لعمرو خالد أو لغيره .. وده مش عيب .. وأكيد أكيد حضرتك عارفه ان المعونة الأمريكية بتمول كثير من مشروعات منظمات المجتمع المدني والجمعيات الأهليه .. ودي مش فلوس حرام ولا حاجه

واللي بقوله استعباط

شحاتة ايه بقى ان شاء الله؟؟ هو أنا لما أقدم على منحة أمريكية .. أبقى بشحت

أنا عندي مشروع محتاج تمويل .. وفي فلوس هتدخل مصر لتمويل المشروعات دي .. طلبت معونة (رغم اختلافي مع ان عمرو خالد بالات ياخد من فلوس المعونة الأمريكية) لكن مش معناها لا بيع دين ولا وطن ولا خيانة ولا عمالة ولا كلللللللللللللللل ده

TAFATEFO said...

أسمحلك طبعاً .. فيل فري

وايه الجديد .. طول عمري بخرف

لكن برضه ده اللي أفهمه .. واللي أنكره من بوست حضرتك

TAFATEFO said...

:D:D:D

اللي بيقولوا يا عاهرة يا فاجرة دول أكيد كفار قريش

يا نواره هانم .. أكيد أكيد أكيد يعني شباب مصري (معظمه) ما بين 15 و30 سنه مش هيدخلوا علشان يشتموا حضرتك ويقولوا الكلام ده .. يعني هو أنا معرفش منهم بدل الواحد 100

Unknown said...

مال حكومة؟
مال حكومة محتلة الخليج وافغانستان وبتقتل الاطفال وبتسلح اسرائيل والاولى في تصنيع السلاح المحرم دوليا

ايه مال حكومة يعني مش فاهمة؟

يعني لما اسرائيل تديك معونة ح تاخدها عشان ده مال حكومة؟

ايه مال حكومة دي مش فاهماها تاني يعني؟

نازلة في احل لكم مال الحكومات؟ انهي اية دي يعني؟ ايه داخل بشكل مشروع

مش باقول لك بتخرف؟
بتخرف وفوق البيعة عمال ترد على كلام ما باقولهوش

انت اتناقشت في الموضوع ده مع حد قبلي؟ اصل شكلك بتكمل خناقة مع حد تاني وانا ما كنتش حاضراها

ياريت ترد على الكلام اللي باقوله ما تكملش خناقاتك معايا

Unknown said...

شفت اللنك

بس دي مش حملة المليون دعاء
:)

الا ايه حملة المليون دعاء دي؟

TAFATEFO said...

لا يا فندم مش نازله في أحل لكم مال الحكومات

الفلوس دي وغيرها خرجت من الملكية الفردية أصلاً .. يعني اني آخد مرتبي من الحكومة المصرية الي فيها بنوك ربوية (مثلاً) مش حرام

وبعدين أنا مختلف مع تحريم حضرتك للأموال دي .. يعني المعونة الأمريكية اللي هي دقيق حرام هي كمان؟؟ دي فلوس الحكومة الأمريكية داخلة في مشروع تنمية .. يعني ايه حرام .. ايه هو اللي حرام بالظبط؟؟

يعني لما المعونة الأمريكية تبني مدرسه تبقى المدرسه دي حرام؟؟ ولا لما أمريكا تهدينا مدرسه ولا جامعه ولا أجهزه أو غيره تبقى حرام؟؟ لما أقدم على منحه أمريكيه يبقى حرام؟؟

بتحرمي حضرتك بناء على ايه؟؟

TAFATEFO said...

حملة الميون دعاء دي من الخيال العلمي

:D:D:D

وأنا بقول لك أهو .. وقد أعذر من أنذر .. متحرميش وتحللي .. محنش في قناة الناس

وإلا هستعدي عليكي آمون والمسلة الناقصه

TAFATEFO said...

مصطفى لا يتخانق مع حد غير حضرتك .. ومبيكملش خناقات مع حد .. احنا لما بندخلوا خناقه بنخلصوا علطول

وبعدين هو كل شويه بتخرف .. أنا أقر وأعترف .. أنا بخرف

قوليلي بقى حرمتي ازاي؟؟ فلوس المعونة والمنح الأمريكية حرام يعني ايه؟؟

وبعدين كارير ايه اللي الرجل غيره؟؟ ومعناه ايه الموقف الافتراضي بتاع صاحب الميول المثلية ده؟؟ ورد حضرتك على افتراض انه مفتحش بقه في أحداث غزة؟؟

مين اللي المفروض يرد أصلاً

Unknown said...

لاااااااا
من المعضلات توضيح الواضحات

هو احنا المفروض ناخد من امريكا معونة وهي بتموت الناس وتدينا معونة عشان تعجزنا وتعوقنا ونفضل متخلفين وتملي علينا شروطها واساسا حاكمةالعالم بالاسلحة المحرمة دوليا؟
انت قضيت على اخر شعرتين كانوا فاضلين في راسي
شديتهم خلاص
ايه المقارنة ما بين فلوس الحكومة المصرية اللي احنا بنصرف عليها زي ما الرقاصة بتصرف على البلطجي وما بين فلوس دولة محتلة بتصرف على اللي بيشحتوا منها من اموال السلاح وضرايب ناس تانية؟ وتفتكر ح يدولك المعونة دي ليه؟
انت مستحل المعونة عليك انت حر
بس انا حد الله ما بيني وبين الحرام
قال معونة امريكاني قال
وبتصرف على الدعوة الى الله كمان؟
اهو ده اللي ناقص
اللهم قوي ايمانهم طلبتها ونلتها يا حاج

Unknown said...

انا زهقت يا مصطفى
وانت لما بتشغل الغباية وتقرر تتربس مخك بتبقى عامل زي القطر

بالمختصر المفيد عشان نخلص
اه فلوس المعونة الامريكية حرام وبتتصرف على الناس من دم ناس تانية وشقى ناس تالتة وهدفها تقويضنا وتعويق تقدمنا مش العكس

وفلوس المعونة الامريكية مش ح تخليك تعمل اللي انت عايزه وح تفرض عليك شروطها
ح يتكلم ازاي بحرية وهو واخد فلوس المعونة الامريكية
اكيد ح يفرضوا عليه شروط
انت عمرك شفت شروط المعونات؟ حتى بتاعة الاتحاد الاوروبي: نشر ثقافة السلام ومساندة الحقوق المدنيةوالسياسية للاقليات والفئات المستضعفة
وبالمناسبة الفئات الضعيفة في المجتمع وفقا للتعريف الدولي الحديث: النساء والاطفال والمثليين جنسيا دخلوهم اخيرا
وده مثال على حاجات وفيه حاجات تانية اخطر
وهو مش ح ياخد الشحاتة اللي واخدها وينفذ خطة تانية غير خطتهم
وطبعا انا ما اخدش منحة من امريكا هي دي كمان عايزة سؤال؟
واذا كان الدولار ضروري قوي
مافيه مسلمين وعرب في امريكا
وماحدش بيعبر قرعتهم بمليم وهم مواطنين وبيدفعوا ضرايب ومع ذلك بيشتكوا من قلة الموارد
اشمعنى دول بقى امريكا مش بتديهم معونة وبيغزلوا برجل حمار
وحل عني بقى عشان الظاهر طلبت معاك غباوة النهاردة

Unknown said...

يارب مواطن مصري يدخل يشتم لك في الاسلاميين
تستاهل
:)

Anonymous said...

والله يا شيخة انتي فظيعة بتحلمي بليفني؟بس ليفني بتتكلم عربي وانتي عارفة في الحقيقة انها بتتكلم عربي يبقي ليه بتحلمي بيها وبتكلميها امريكاوي؟

Anonymous said...

اه نسيت انا شوفت حكاية المعونة دي عند التويتر بتاع احدهم يعني النكتة قديمة اوي اوي,,,,,بس الاجدد ان عمرو خالد بيقول انه ضد ضرب المدنيين الاسرائليين,,,ممكن نوارة باشا تقوليلي يعني ايه مدني واسرائيلي في نفس ذات الوقت؟هه ممكن؟؟؟

muslima said...

السلام عليكم

أنا مصدمة من الكلام المكتوب

عموما

اختى الجريئة جدا اللى سايقة علطول القطار الاكسبرس نوارة الانتصار

اذا سمحتى عايزين مصدر المعلومة بتاعة المعونة الامريكية والحفلة اللى الاخ " اللى مش عارفة انطق اسمه " اللى حضرها وقال الكلام ده ياريت يبعتلنا اللينك بتاعها او المواقع اللى كتبت عنها

وبالنسبة للحرام والحلال

مع الاخ مصطفى

بصرف النظر عن أى شىء
بنقول ايه بنعمل ايه
مين سوى مين راح مين جه

احنا مش مفتيين

خلى اللى يقول بالحلال والحرام اولى الامر من اهل الفتوى

ليه توقعى نفسك فى الغلط

انتى مش بتحبيه واحنا عارفين وكتير وانا منهم متعرضين على بعض حاجات هو بيعملها

لكن ندخل فى موضوع الفتوى نوقع نفسنا فى الغلط

ده علشان مصلحتك علشان متروحيش النار

وشكرا للاخ المصدوم اللى مش عارفة انطق اسمه

خيرالدين said...

نواره
تقريبا احنا هنقضيها جوابات شكر يا باز افندى
جلاوى كان السبب فى فتح الحدود المغلقه بين الجزائر والمغرب وقال فى مقابله رايت فىا لجزيره طفله -يقصد دلال-ذهبت لبيتها بعد القصف فلم تجد اهلها جئت لاخبرها اننا اهلها
...
عاوزين نشكر الرجل ده او نخرج نستقبله لما يوصل مصر

Heba said...

تانى يا ست نوارة, مش حتبطلى شتيمة فى خلق الله, انا بحبك والله العظيم وخايفة عليكى, كدة حرام

فاكرة الكلام اللى قولتيه على هشام طلعت مصطفى, ودلوقتى على عمرو خالد, وانتى برده مش متاكدة

حسن مدني said...

أستاذة نوارة

أنا أتفق معك في رفض المعونة الأمريكية بالمطلق، لأنها في البداية والنهاية قيد على حرياتنا، ومحاولة لشراء ضمائرنا والسيطرة على إرادتنا. وإذا كانت الحكومة تأخذ معونات أجنبية، فهذا من باب أن للحكومات ضروراتها. أما أن يترك الباب للجميع ليحصل على معونات أجنبية بدون ضابط فهذا باب كبير لمفاسد لا يعلم أبعادها إلا الله.

لكن أختلف معك في بعض النقط الفرعية

أسباب تحريمك لهذه الأموال.
كون مصدر الأموال حرام – للمانح – مثل ربا أو سرقة أو تجارة سلاح أو مخدرات، فهذا لا يؤدي لأن تكون محرمة عليّ. بمعنى أنني إذا قمت بعمل مشروع، وأخذت عليه أجر فهذا الأجر حلال ولو كان الذي يدفع حصل على ماله من أي مصدر.

كون الحكومة الأمريكية تسرق شعبها وتسرق الشعوب الأخرى، لا يؤثر على تحليل أو تحريم الأموال بالنسبة لي. لأن هي التي تسرق وليس أنا. يعني إذا جاءتني معونة من اليابان غدا، فسوف أقبلها إذا كانت تحقق مصلحة مشتركة لي ولليابان، ولن أسأل إذا كان أهل اليابان مكتفين أم أنهم بحاجة إلى هذا المال. هم يحاسبون حكومتهم، أما أنا فأسعى لتحقيق مصالحي.
ولو قررت غدا جمعية خيرية من السعودية أن تتبرع لأهالي مصر بمساكن، فسوف نقبلها شاكرين. برغم اعتراضاتنا على كثير من المواقف الر سمية للسعودية. ولا يمكن لأحد أن يقول إن الثروات في السعودية موزعة بشكل عادل. ومع ذلك سوف نقبلها، ولن نتهم من يقبلها بالعمالة إلا إذا بدا منه ذلك بوضوح.

الوجه الذي يمكن أن نعترض به على المعونة، هو أنه لا أحد يعطيك معونة بدون مقابل يحقق له مصالحه.
ومصالح أمريكا بالضرورة تناقض مصالحنا.

أنت افترضت أن عمرو خالد لن يستطيع أن يحرم الشذوذ بسبب هذه المعونة. وهذا افتراض لا دليل عليه حتى الآن. إذا قال ذلك فأنا أول من يهاجم مثل هذا القول. ولكن إذا ظهر غدا بموقف ضد الشذوذ، هل يجعلك هذا تغيرين تقديرك؟

ياريتك قلتي التعليق الأخير – حول شروط المعونة بتاعة الاتحاد الأوروبي - في صلب الموضوع، كان وفر كثير من اللبس والخلط.

نشر ثقافة السلام ومساندة الحقوق المدنية والسياسية للأقليات والفئات المستضعفة

كذلك أتفق معك مرة أخرى حول مشكلة الكثيرين مع عمرو خالد..
المصيبة الأكبر في قضية عمرو خالد، هي أنه أصبح مرجعية، فالرجل في أفضل حالته داعية. لكنه لا يصل إلى درجة عالم فما بالك بمرجعية؟ المشكل أننا أكفاء جدا في تشويه صورة مرجعياتنا الحقيقية، والتقليل من شأنهم، فأصبح أمثال عمرو خالد مرجعية للشباب.

تحياتي

TAFATEFO said...

هو حد قال انه المعونة الأمريكية داخلة في تمويل مشوع الدعوة الإسلامية؟؟ ما أعلن انه مشروع تنمية العشوائيات

حرام وحلال ده بقى مش بتاع حضرتك .. لكن يغلب على ظني ان تحريم حضرتك ده غلط .. مستحل ومستحرم !! حضرتك فرضتي فرضيات واتخذتي أحكام وحاسبتي الرجل كمان .. حضرتك حره تشوفيها حرام .. انما تاني وتالت وعاشر حضرتك عارفه ان في دعم من هيئة المعونة الأمريكية لكثير جداً من منظمات المجتمع المدني وان شركات أمريكية تدعم أيضاً .. وان كثير من الطلاب بيسعوا لنيل المنح الأمريكية للدراسة على نفقة الولايات المتحدة (وغيرها) .. وان أكيد أحمد زويل مثلاً وغيره خارجين كده .. متحرميش على الناس

mido said...

لا مواطن مصرى بيحب عمرو خالد
:)

Unknown said...

اي حد عايز يبرر المعونة الامريكية هو حر
بس وحياة النبي يعرف بس ايه هي المعونة الامريكية
كأن مش كفاية تعرفوا انها جاية من دولة استعمارية

طيب هاتوا كتاب اسمه اعترافات قرصان اقتصادي لواحد اسمه جون بركينز عشان تعرفوا مصادر المعونة ومصارفها


لكن اي حد بيشكك في ان عمرو خالد اخد معونة

انا بقى مش مسئولة عن اللي عايشين في الاحلام

الراجل نفسه ما انكرش انه اخد معونة امريكية في مشروع تنمية العشوائيات

يعني اللي معاه تليفونه يبعت يسأله بنفسه

والكلام ده من قبل ما يسافر قطر


مش معنى ان فيه حاجة الواحد مش عارفها انها ما حصلتش

واخدين بالكوا

قبل الفتي بس في موضوع المعونة
ممكن تقروا كتاب اعترافات قرصان اقتصادي وبعدين نتكلم؟

وانا برضه مصممة انه مال حرام

Unknown said...

حسن مدني

هي المعونة عمل مشروع؟

انت بتقول لي لو مصدرها مش عارفة ايه وانا قمت بعمل مشروع يبقى مالي حلال
صح يا حسن

بس لما تبقى بتاخد الفلوس دي عشان تخدم تجار السلاح وتخدم الرأسماليين الربويين وتعطل بلدك وتقوضها وتحطمها وتخربها وتحكم سيطرة دولة استعمارية عليها

هو انت كده قمت بعمل
بس العمل مش حلال والفلوس مش حلال ومافيش معونة امريكية بتتصرف في غير اللي انا ذكرته انفا يا حسن
والله يا حسن ما فيه معونة امريكية بتتصرف في غير كده حد بقى يقول لي منحة ناس بقى تستعبط وتدفن راسها في الرمل هم احرار ما هم اصلا بيصطادوا العبط واللي بيستعبطوا عشان يخدموا عليهم
لكن مافيش مليم بيطلع في المعونة الا وبيتعرف رايح فين وبيخدم على ايه بالظبط سواء في اطار مشروع كبير او مشروع صغير سواء اللي بياخد المعونة عارف المطلوب منه او عارف وبيستعبط
لان دلوقت مابقاش فيه حد مش عارف
تبقى دي بقى فلوس حلال ازاي؟
اللي بيقول لك زويل ده
ما يعرفش ان زويل زار اسرائيل؟ ما يعرفش ان تلميع زويل الزايد عن حده ده وراه سر؟ ما يعرفش اننا كمصريين عندنا علماء عظماء وماحدش بيسمع عنهم؟ ما بيشغلش مخه؟ اسرائيل اللي قتلت المشد ح تستضيف زويل ليه؟
لا
مافيش حد بياخد مليم من المعونة ويبقى بيخدم بلده ابدا
اللي بياخد المعونة بيخدم صاحب المعونة
وخدمة صاحب المعونة حلال بلال طبعا
وتاني الفلوس دي حرام
وانا مش مفتي ولا حاجة
بس معرفة الفلوس الحرام مش محتاجة مفتي
محتاجة حد ما بيستعبطش بس

Unknown said...

انونيمس
هي ليفني بتتكلم عربي؟
ما اعرفش الحكاية دي
ولا ما سمعتش حكاية المدنيين الاسرائيليين دي خالص يا انونيمس
بس الغريبة انك بتقول لي ان فيه ناس على التويتر بتتكلم في الموضوع ده
!!!!!!!
يا جدعان الموضوع قديم قوي
اقدم من سفريته لقطر
طيب يعني اللي عاملين بيحبوه وبيدافعوا عنه دول مش بيدخلوا موقعه؟
كان فيه مشروع تنمية العشوائيات وكان داخل في مشروع محاربة المخضروات
على اساس يعني ان العشوائيات هي اللي بتطلع الناس الشمامة الوحشة وبعدين طلبوا من صحبة خير انها تنضم ليهم عشان بقالهم سنين في العشوائيات ولما غادة قالت لي قلت لها يا زي ما باقول لكوا كده:
يا غادة فلوس المعونة الامريكية حرام والله طيب لا يقبل الا الطيب
يعني تنقذي كام اسرة وتخربي بلدك زيادة ماهي مخروبة
قالت لي ما انا بارضه كنت باقول كده
وما دخلتش في المشروع
ودي حاجة قديمة
موضوع انه اخد فلوس تاني في قطر ده دي رواية اللي حضر المؤتمر
بس ماهياش رواية غريبة
لانه متعود ياخد تمويل اجنبي
ووالله العظيم تلاتة فلوس المعونة الامريكية حرام مش ناس قاعدة تطرقع في صوابعها ومش مكلفة نفسها تقرا مصارف المعونة الامريكية واللوائح اللي هي بتخدمها وقاعدة تقول لي ما تحرميش ع الناس عيشتها؟
هي المعونة الامريكية عيشتنا؟

بالنوسبة لهبة
ربنا يخلي لك عمرو خالد وهشام طلعت الاتنين
:))
بس ياريت تقولي لي انا ظلمت هشام طلعت في ايه بالظبط وباعمل زيه دلوقت في عمرو خالد؟

mido said...

محمد حمدى اتكام معاك فى موضوع عمرو خالد وانت فى المعرض على أساس ايه ؟

mido said...

تنبيه هاااام

Unknown said...

لا انا كنت باقول لمحمد شفت عمرو خالد اخد تسعة مليون دولار تانيين

استنى اما اشوف التنبيه

Rateb said...

يعنى مش من حقها تقول ده حرام وده حلال من حق اى حد انه يحرم او يحلل طالما معاه دليل والصراحة هى معاها دليل ، تانيا مفيش عاقل ممكن يتخيل ان امريكا بتسعى لخدمة الاسلام او المسلمين وفى الغالب مصالح امريكا متضاربه معاهم فيعنى فى الحالة دى عمرو خالد هيقدر يشتم امريكا زينا كده ولا هيخاف على المعونه وكله لمساعدة الغلابة وعلى رأى المثل اطعم الفم تستحى العين
غير ده كله انا مقدرش اثق فى اى حد حاطط ايده فى ايد امريكا

Unknown said...

يا راتب
ودي محتاجة دليل؟
يعني انا لما اجي اقول لك انا ح اشتغل رقاصة وفتاحة للزباين ما شاء الله ما شاء الله تقوم تقول لي يا بنتي حرام عليكي
اقول لك انت مين انت عشان تحرم وتحلل هات لي اية تقول ان الرقص حرام انا ح ارقص بشرفي
ح ترد عليا تقول لي ايه؟
مش ح تعرف ترد طبعا لان كلامي مسكت
السؤال
حد من اللي بيدافع عن المعونة الامريكية يستحل معونة اسرائيلية؟
اللي ياخد معونة من اسرائيل فلوسه حلال وللا حرام؟
طيب اسرائيل من غير امريكا ما تسواش تلاتة نكلة في سوق الحمير

يا جدعان حد يكلف نفسه ويقرا تقارير الدراسات الاستراتيجية الامريكية والاسرائيلية
دول بيتكلموا بالمفتشر كده زي محمود المليجي وزكي رستم: وح نخلص عليه هع هع هعععععع

فيه كتاب اسمه: قطع رؤوس الهيدرا وكيفية اضعاف حزب الله

ده تقرير لمركز استراتيجي اسرائيلي
وبيتكلم عن دور المعونة والاستثمارات الاجنبية في اضعاف حزب الله
يا ناس حرام عليكوا
اي يا شعري شعري كفاية كفاية شعري

tamer.sala7 said...

ده كلام محمد حمدي مفعوله زي السحر

Unknown said...

ملحوظة تانية

العرب والمسلمين في امريكا بيحاولوا يكونوا نشطين جدا
والحقيقة بيعملوا شغل كويس

بس مشكلتهم نقص الموارد

ودول بقى من حقهم ياخدوا معونة امريكية وما تبقاش حرام عليهم
لانهم مواطنين بيشتغلوا زي كل المواطنين الامريكان زي الكلاب لاكتر من تمن ساعات يوميا وتمن ساعات في امريكا يعني تمن ساعات
مافيش ثانية فاضية
ممكن تعمل بيبي على روحك من كتر ما انت مش قادر تسيب الشغل
ده فيه ناس كانت طالبة فتوى انها تجمع الضهر والعصر من كتر ماهم مفحوتين في الشغل

وبيدفعوا ضاريب قد دماغهم
وعاملين مؤسسات خيرية واهلية كويسة
ومن حقهم ياخدوا دعم من حكومتهم ومع ذلك مافيش مليم من المعونة بيتصرف عليهم

ممكن اعرف ليه؟
ماحدش بيسال نفسه طبعا

حاجة كمان
الحكومة المصرية بتاخد معونة وعشان كده ما عرفتش تفتح بقها لما اتفاقية كامب ديفيد خرقت اكتر من مرة في حرب غزة الاخيرة

اذا الحكومة اللي عندها جيش مش قادرة تفتح عينها عشان المعونة
امال الافراد والمؤسسات الخيرية ح تعمل ايه؟

حاجة تالتة
ممكن حد يكلف نفسه ويقرا لائحة المعونة ويشوف الشروط بتاعتها
ممكن؟

رابعا
عمرو خالد محتاج المعونة في ايه؟
محتاجها في ايه؟
ايه وجه الحاجة الشديدة جدا اللي يدفعه لكده؟
ليه؟
ما الخليج مليان فلوس
ما مصر نفسها مليانة رجال اعمال
واللي خلاه يعرف ياخد من امريكا يبقى اولى انه يقدر ياخد من اي رجل اعمال
ما الشيخ صالح اللي هو طلع يقول ما تاخدوش وصلة لقنواته عشان دي سرقة ما يموله
هو الشيخ صالح فقير؟
هي تسعة مليون دولار دي حاجة؟
ده اي رجل اعمال مصري او عربي يدفعهم بصباع رجله الصغير

عين فى الجنة said...

والله يا نوارة عمرو خالد ده عمره ما نزل لى من زور ولا باطيق اشوفه او اسمعه
ياخد فلوس بقى او ما ياخدش انا اتأكدت انه نصاب لما كان بيبع الدعاء بتاعه رنات موبايل
ده حتى ما بيعرفش يقول كلمتين فصحى على بعض

Unknown said...

تامر

ايه دخل محمد حمدي في الموضوع؟

راجي

ههههههههههههههههههههههه
والله لما يبيع الدعا احسن ما ياخد فلوس من المعونة الامريكية

mido said...

@tamer.sala7

لا محمد حمدى كان بيدافع عن عمرو خالد
:)

Unknown said...

هو محمد حمدي كان بيدافع عن عمرو خالد؟

هو ايه اللي حشر محمد حمدي في الموضوع؟
لما كنا في المعرض قلت له عمرو خالد عمل كذا كذا وهو كان بيسمع وما علقش

Fatma said...

عمرو خالد له وعليه
مافيش ما يمنع النقد بس لو بتشتميه وبتشككي في نواياه التي لا يعلمها الا الله و شرفه حطي في بالك انه ممكن ولو واحد في المليون تكوني غلطانه وانه هيقف قدامك يوم القيامة يقتص منك

انا بقولك كدا عشان بحبك انتي مش عشان بحب عمرو خالد على فكرة

عمرو خالد لا يعني لي الكثير زي ماقلت له وعليه وربه ادرى بيه

Unknown said...

هو ايه موضوع شرفه ده؟
انت تقولي لي شرفه
ومصطفى يقول لي شرفه
هو انا كتبت اني ظبطه مع بنت الجيران في بير السلم؟

mido said...

ايوة لما اتكلمتوا عن الزرقاوى هو أعترض عليك و اتكلم على عمرو خالد برده

على العموم مش مهم انا بوضح لتامر المشهد كان عامل ازاى لأنه مكانش موجود لحظتها

Unknown said...

وبمناسبة شرفه
انا عمالة تجيلي تعليقات من انونيمسات بيخوضوا في عرض عمرو خالد وانا باعمل لها ريجكت لان الخوض في الاعراض ده اسهل حاجة واوطى حاجة ومش هي الموضوع
انا باتكلم في معونة امريكية واضحة المعالم والاهداف
مافيهاش نوايا لا يعملها الا الله ولا حاجة
واعترافه المعلن انه اخد معونة امريكية

فين بقى النوايا اللي لا يعلمها الا الله؟
وفين شرفه ده؟
اما عجايب والله

طب انا عايزة بس اسأل سؤال
لو نفس المعونة دي في نفس الظروف اخدتها جمعية اهلية عادية ونفس الكلام ده كتبته
(وسبق وكتبته عن ناس تانية يعني)
كنتي ح تقولي لي شرفه؟

انا مش عارفة حاسة ان فيه حلقة مفقودة
السادة المعلقين مش عارفين المعونة الامريكية ولا لوايحها ولا شروطها

طيب ابوس ايديكوا تقروا لوائحها وشروطها ومواردها ومصارفها

مش صعبة على فكرة
كتاب واحد كفاية

بلاش
افتحوا موقع ناعوم تشومسكي
او افتحوا موقع جون بيركنز
john perkins

وشوفوا المعونة جاية منين وبتتصرف في ايه

لا كده ولا كده

اسألوا بياع لبن امريكاني عن رأيه في المعونة ومنفقها والمنفقة عليه والجالس في مجالسها

ايه علاقة النوايا بالموضوع؟

فين النوايا الخفية اللي لا يعلمها الا الله
ماهو
ماهو

طب ما كمان نوايا تسيبي ليفني لا يعلمها الا الله
ويمكن تكون بتموت العيال بنية سليمة

انا تاني باسأل سؤال واحد ماحدش بيرد عليه

ينفع تاخد معونة من اسرائيل؟

حلال؟

ينفع؟

ينفع؟

فيها نوايا دي؟

طب المعونة الامريكية اوسخ من المعونة الاسرائيلي

لان الفلوس اللي ح تاخدها من اسرائيل دي فلوس امريكاني

اسرائيل ما عندهاش فلوس
ولا عندها دولة اصلا
بس امريكا لمدة ثانيتين تشيل ايدها من ضهر اسرائيل ومش ح نلاقي اسرائيل دي خالص

وده مش كلامي

ده كلام كل المسئولين الاسرائيليين من اول موشى شاريت لحد تسيبي ليفني

TAFATEFO said...

معلش بقى .. واضح ان حضرتك مقريتيش البوست اللي كاتباه كويس .. ومقريتيش التعليقات اللي حضرتك كاتباها برضه

على رأي نواره نجم "من المعضلات توضيح الواضحات" .. حضرتك بتغالطي

Fatma said...

الشرف مش جنس وبس

نوايا ليفني لما تقتل اطفال مش فارقة لانها في الاخر بتقتل اطفال

نوايا عمرو خالد عشان يعالج مدمنين ويعمل مشروع لوقف التسرب من التعليم وعمل مشروعات لمساعدة الاسر المعدمة ممكن ناس تختلف فيها لان العمل ظاهره خير
حملةالتسرب من التعليم ومشاريع للاسر المعدمة كان تمويلها كالآتي

اليونيسكو ..

اليونيسيف ..

المركز الثقافى البريطانى ..

المركز الثقافى الكندى ..

مؤسسة فونديشن رايت ستارت ..

برايس وتر هاوس لأدارة المنح الدولية

أسلاميكـ ريليف .. منظمة مسلمى أوربا

واتمنعت في مصر والحمد لله وما تعملتش ولا هتتعمل واتعملت في دول تانية ونجحت جدا

اما مشروع علاج المدمنيين والمشروعين بالمناسبة مالهمش علاقة ببعض لانك في رد سابق ليكي بتقولي كأن سكان العشوائيات هما اللي شمامين او حاجة زي كدا لا المشروعين مالهمش علاقة ببعض
حملة حمياة بتاعت الادمان كانت السنة اللي فاتت وخلصت من بدري
والحملة الجديدة ابتدت اخر 2008 ولسه مكملة بس زي ماقلت مصر رفضت الحملةومنعتها

في حالة ان الانسان يكون بيعمل حاجة كويسة يبقى نواياه الله وحده اعلم بيها
انما لو بيعمل حاجة وحشة يبقى واضحة

يعني ليفني حاجة وعمروخالد حاجة تانية

Unknown said...

فنون
ههههههههه
كتر خيرك انك قلتي كل اسامي المؤسسات دي
انا الحقيقة ما كنتش اعرف من كل ده غير المعونة الامريكية ومنظمات القلل المنتحرة

بالنسبة لمسلمين وعرب اوروبا وامريكا وضعهم خاص لان لهم ظروف خاصة ولان الدور اللي بيعملوه مهم جدا والخسائر اللي بيدفعوها قدام الدور ده تساوي


المشاريع القومية لعلاج المدمنين او تنمية العشوائيات لما تترمي على القوى الاستعمارية ما تبقاش حاجة كويسة يا فنون
تبقى حاجة وحشة
ومافيش مجال للنوايا هنا خالص يا حبيبتي

انا باسألك عاشر

ينفع المشاريع دي تتمول من اسرائيل؟
طيب اسرائيل ما عندهاش تمويل
اي تمويل ح تدفعه ح يبقى من امريكا
والمعونة الامريكية لو عالجت المدمنين مش ح تعالجهم لوجه الله
انت شفتي الموضوع بتاع البنت اللي في الصعيد اللي صرفوا عليها الفين دولار وبتحتفل دلوقت مع اسرتها بعيد الشكر؟

يابنتي هو انا اقول تور تقولي لي احلبيه؟

يا بنتي المعونة الامريكية مخصصة لـ"ضمان اعتماد دول العالم الثالث على الولايات المتحدة الأمريكية، ومن ثم خدمة مصالحها في المنطقة والسيطرة على القوى الارهابية وحماية أمن إسرائيل كحليف استراتيجي للولايات المتحدة" يا بنتي مش باقول لك افتحي موقع جون بركينز؟

Unknown said...

فنون

اقري البوست اللي بعد ده اللي هو عنوانه مصارف الزكاة الامريكية

Fatma said...

والله يا نوارة انا ليا اللي شايفاه على ارض الواقع

انا اعرف مدمنين ربنا جعل عمرو خالد وحملته سبب في انهم اتعالجوا وماحدش استغلهم مقابل علاجهم

اتعالجوا ببلاش وخرجوا ناس تانية بعد ما ربنا انعم عليهم بالشفا

علاجهم كان بيتكلف 15 الف في الشهر كان ولاد الحلال ( عرب ومسلمين على فكرة) متكفلين بعلاجهم على نفقتهم الخاصة

الموضوع في ملابسات كتير يمكن
هي وجهات نظر

انا شايفة الراجل بيحاول يعمل حاجة كويسة ومش شايفة على ارض الواقع اي نتايج سلبية لمشاريعه بالعكس
ومش شايفة حد ولائه راح لامريكا او لأي جهة تانية عشان بيساعدوا عمرو خالد في التمويل
ومش شايفة ان في حد مستفيد من مشاريع عمرو خالد غير اللي بيتعملهم المشاريع دي من معدمين اومدمنيين او غيره

يمكن تكون نظرتي ضيقة
بي انا بزعل لما الاقي حد بيحاول يعمل حاجة كويسة ويتهاجم من كل الاطراف

البنت بتاعت الالفين دولار دي مالهاش علاقة بعمرو خالد

انا بتكلم على عمرو خالد تحديدا مش على المعونة الامريكية بشكل عام

Unknown said...

انا حطيت صوابعي في الشق

يا حبيبتي قولي رد على السؤال

لو الشباب دول اتعالجوا بدعم اسرائيلي ح يكون لك نفس وجهة النظر؟
لو اخد فلوس من اسرائيل وعالج بيها مدمنين وعمل مؤسسات لدعم العشوائيات
ح تحسي انه بيعمل حاجة كويسة؟

بالنسبة للبنت
ماهي مالهاش دعوة بعمرو خالد
بس بتاخد من نفس الماعون اللي هو بياخد منه

يا حبيبتي ليه الرسول عليه الصلاة والسلام قال ان الله طيب لا يقبل الا الطيب؟

ليه الرسول قال ان المال الحرام لا يجوز انفاقه في الصدقة او الزكاة ولا يجوز قبوله في مصارف الزكاة يا حبيبتي؟

ليه زكاة المال لو طالعة من خمارة او كباريه لا يجوز تنفق على الفقراء بينما انا لو شيال وشلت شنطة لصاحب الكباريه واداني اجري اخده لان ده اجر على عملي؟

ليه؟
فكري كده شوية في الموضوع ده وقولي لي وصلتي لايه؟

سافا؟

بالفرنصاوي يعني
:)

Fatma said...

لا مش سافا :)

فاهمةوجهة نظرك والله
بس مش شايفة اللي انت شايفاه

يمكن قصور مني في الفهم

مش شايفة ان معونات الامريكان على اطلاقها كدا حرام ولا شايفه ان مصادرها كلها حرام ولا اهدافها كلها حرام

ولا شايفة ان في استغلال للمستفيدين من المشروعات اللي بيعملها عمروخالد

ولا شايفة ان عمروخالد يستاهل الشتيمة حتى وان اختلفنا معاه

في الاخر هو عمل حاجة كويسة

سافا كومسا ولا ايه ؟

TAFATEFO said...

محمود عزب من أسبوع وشويه كان بيقلد ملكه زرار

بس
:D:D:D

احمد سعيد said...

بصوا يا جماعه
واحدة واحده كدة
معلش يعنى
اصلى عايش فى ميه اللفت
وماعرفش حاجه من اللى بتتكلموا عليها دى

بس
من الاول
من اول السطر
رجال السياسه والاقتصاد الامريكان
كلهم يهود
او على الاقل من اتباعهم
وانتوا عارفين اليهود
مبيعملوش حاجه لوجه الله
وعمرهم ما يطلعوا من صفقه خاسرانين
فلما حضرتك
تقول انك طلعت منهم كسبان
فسيادتك مع الاسف
حماااااااار
لانهم عمرهم ما بيخسروا
المعونه الامريكيه
مرفوضه من حيث المبدأ
ومش هتكلم فى حلال ولا حرام
لان دى مش شغلتى
ولا انا واخد توكيل
اكفر واحلل واحرم على كيفى


بس
من المؤكد
ان الناس دى لما تديلك قرش
بتكون متأكدة مليون فى الميه
انها هتاخد من وراك جنيه
او على الاقل ما يوازيه
من مصالح اقليميه ودوليه
فيه خلاف على كدة؟؟؟؟؟

يبقى لما انا اروح اخد منهم معونه
فاانا ياما
خاين
او عبيط وعلى نياتى
او منافق وبتاع تلات ورقات
فيها خلاف دى؟؟؟؟؟

انا كل دة بتكلم على مبادىء
ماليش دعوة بعمرو خالد
ولا اعرف موضوعه دة ولا سمعت عنه


زى المتخلفين اللى قالوا ان السادات ضحك على اليهود فى كامب ديفيد
فاكرينهم؟؟؟؟؟؟


دى حاجه


تانى حاجه

معلش يعنى
هو الدين بقى سبوبه؟؟؟؟؟
يعنى يرضى ربنا انى ابقى على قد حالى
وعلى حس الدعوة
ابقى صاحب عربيات وشقق؟؟؟
انا مش بتكلم على عمرو خالد
انا بتكلم عموما

طيب لو كده كان اولى بيها الصحابه
وهم علم الامه بالدين
ماكانوش اشتغلو
اللى نجار
واللى حطاب
واللى تاجر
وعاشوا على قد حالهم
كانوا مثلا خدو اجرة على الدعوة ونشر
الدين
مش عيب انك تبقى غنى
دى مافيهاش حاجه
بس ميبقاش على حس دينك


مش كدة برضه؟؟؟؟

عموما انا من اكتر من اسبوعين
عايز اتكلم فى الموضوع دة
بس اللى كان حايشنى
ان الموضوع فرعياته كتير
ومحتاج دش اكتر

عموما شكرا يا نوارة عالتحفيز

Unknown said...

فنون

طيب ممكن يا حبيبتي تيجيبي الكتابين اللي قلت لك عليهم قبل ما تقولي شايفة وسامعة؟

الكتاب الاول صادر عن مركز دراسات استراتيجي اسرائيلي
والكتاب التاني كاتبه واحد امريكي كان قرصان اقتصادي
ح اعيد لك اسامي الكتب تاني

الكتاب الاول: هل يمكن قطع رؤوس الهيدرا عركة اضعاف حزب الله تأليف داني بركوفيتش تقديم ومراجعة ابراهيم البيومي غانم

صادر عن الشروق الدولية
الشروق الدولية موجودة في شارع البورصة

الكتاب التاني: اعترافات قرصان اقتصادي تأليف جون بركنز ومترجم وصادر عن دار الطناني

موجود في مكتبة مدبولي

ارجوكي تقريهم عشان خاطري
من فضل
اتوسل اليك
السيدة في ضهرك
وحياة حبيبك النبي
والعشرة دول لتقريهم
والنار دي وللا تحرقني زي السوجارة تقريهم
انشالله تعدميني وتفرمني الكهربا لو ما قريتهمش

احب على رجليكي تقريهم



احمد سعيد

لا فض فوك يابني

يساري مصري said...

هههههههههههههههه
ساند مانكي يتصدم :D
ساند مانكي بيعمل مصدوم عشان ينقطك بس :D
هههههههههههه
و سمعني اغنية "لو مكنتش انت تموّلني مييين هيمولني لو مكنتش انت هتدعمني مين هايدعمني :D"

مواطن مصري said...

معلش يا نوارة ام الكونكش ام المصرية ل الاتصلات

يا نوارة عمرو خالد هو صوت المعتدلين في مصر يعني مش كفاية المتطرفين بيفتو بمزاجهم و يعملو فتاوي تكفير و تحريض على الارهاب و بعد كدة نزعل لما الدنمارك يعملو افلام مسيئة نتيجة ليشوخ الظلامين دول

انا مع عمرو خالد و كمان كان لية مشروع مكافحة الفقر و الامن المصري منعو

Rateb said...

عشان موضوع الشرف ده طول اوى لو فى غلط فى شرف عمرو خالد ياريت نشوف الجمل او الكلام اللى فيه الغلط واهو البلوج موجودة والتعليقات كمان غير كده يا جماعة بلاش تقديس الاشخاص ده عمرو خالد انا حاسس ان كل نواياه طيبة وصعب عليا انى اتخيل حتى انه جزء من مؤامرة امريكية صهيونية والبتنجان ده لكن مش معنى كده انى لو لقيته بيعمل حاجة انا شايفها غلط اسكت

Anonymous said...

يا أساتذه

بالعقل كده
الراجل بيقول نقاطع مكدونالدز يبقى منين هياخد منهم فلوس بس ؟؟
يا جماعه هو اي حد اهبل نفسه تهفه فى كلمتين يروح زاغد واحد من المحترمين عندنا
يا جماعه اذا جاءكم فاسق بنبأ فتبينوا
حادثة الافك ما علمتناش حاجه لسه؟
احسنوا الظن باخوانكم
شكرا

Unknown said...

يا استاذ احمد

مشروع تنمية العشوائيات هو اللي قال عليه انه مدعوم من المعونة الامريكية

ومصدرنا في النبأ هو عمرو خالد نفسه

اذا كنت شايفه فاسق دي مشكلتك انت بقى

لكن الخبر من عمرو خالد نفسه

وعمرو خالد متصور مع السفيرة الامريكاني بالمناسبة الانسة سكوبي دو

وصلاته بالسفارة الامريكية معروفة وفي احتفال عيد الاستقلال بيروح وبيتصور وهو المصدر في الاخبار دي


منين بيقول قاطعوا ماك دونالدز ومنين بياخد معونة امريكية؟

تقدر تسأله هو والله

بس واحد هو بذات نفسه بيقول باخد معونة امريكية

احسن الظن بيه ازاي؟
لا
ما تقولش لا
بس
ما تقولش بس
مش
ما تقولش مش ما تقولش مش ما تقولش مش؟

مش عارفة اقول لك ايه؟

دي مراية الحب عميا فعلا

muslima said...

الله لا يسيئك بلاش تفتى

انقدى زى مانتى عايزة

انتى تعرفى ايه عن القواعد الفقهية وكيفية اخضاعها فى التعاملات والعبادات
وبعدين انتى بتقولى مصدر الفلوس وأن الله طيب لا يقبل الا طيبا

طبعا لا اعتراض على كلام المعصوم صلى الله عليه وسلم

ولكن عايزاكى تجاوبينى على شوية حاجات كده

تقولى ايه لكل المسلمين المتدينيين اللى بيشتغلوا بقع فى أمريكا مش بياخوا فلوسهم برضه من امريكا

ولا المفروض نفتى ونقول بقه ان سفرهم لامريكا حرام وشغلهم هناك حرام لان ا لفلوس اللى بياخدوها دى مصدرها مش كويس

وتقولى ايه للى اصلا بيشتغلوا فى بلدك

والحكومة اساسا تعاملها ربوى
وبتاخد ضرائب من بتوع الخمارات والكباريهات

مش الفلوس دى بترجعلك تانى برضه ولا ايه

وياترى مصدر الفلوس دى ايه اللى جاية من الكبارية والخمارات

مصدرها حلال

يا أختى الحبيبة

أنا مش عايزاكى توقعى نفسك فى الغلط

خصوصا جزئية الدين دى الله يسعدك

وياريتتتقبلى النقد والرأى الاخر

وخلى عندك شوية مرونة وبدل ما ندخل فى جدال

كنتى فعلا رحتى سألتى شيخ ذو ثقة يعتد برأيه قبل ما تكتبى الكلام ده وتعملى اجتهاد وانتى لستى من اهل الاختصاص فى الامر

انا احبك فى الله

ولا اريد لك الا الخير

Anonymous said...

حضرتك المؤتمر. للأمانة وشهادة لله. في إحدى الجلسات العلنية للمؤتمر، عمرو خالد قال إن ما أعلنه أوباما بشأن طريق جديد للتعامل مع العالم الإسلامي يعتمد على المصلحة المشتركة والاحترام المتبادل هو عين ما يريده الشباب المسلم. وبعدين اتكلم شوية على مشروعاته وفي آخر جلسة للمؤتمر قال إنه يشعر بالأمل فيما يتعلق طبعا بالعلاقة بين أمريكا والعالم الإسلامي. إجمالا كان كلامه فيه إشادة قوية بالإدارة الأمريكية الجديدة. وبأهمية أن تتشارك المؤسسات في العالم الإسلامي في مشاريعها التنموية مع مؤسسات غربية مثل المجلس الثقافي البريطاني. لكن كان فيه ورش عمل مغلقة لا يحضرها الجمهور ولا وسائل الإعلام وطبعا حضر بعضها عمرو خالد. الله أعلم إيه اللي دار فيها. والاخ ساند مانكي أكيد محضرش هذه الورش إلا لو كان من المشاركين الأساسيين في المنتدى سواء من الجانب المسلم او الجانب الأمريكي وهو ما لا أعتقده.
صحفي مصري مقيم في الدوحة

M.A.M.M.G said...

لولاش بس حتة الفيمنيست المتشدد اللى حسيتها وانا بتابع كل اللى بتكتبيه كنت قلت انت الصوت المعبر عن عقول آلاف من البشر مثلى والنبي وحياة والدك بلاش شتيمة انا كل اللى عاوز أقوله انا متفق مع كلامك الف في 100 وكنت من زمان بقول كده واللى حواليا برضه بيسبوا لى الدين بمنتهي التقوي والورع تعبير جميل تحيه ليك على التعبير ده أول مرة أقراه يسب الدين بمنتهى التدين :)