Wednesday 4 February 2009

انصار الشعب اليهودي

بصوا يا شباب احنا محتاجين نعرف من اين نؤتى، يعني مش مهم ابدا كلمة بيريز مثلا في دافوس، المهم انه استشهد بعباس ومبارك، مش مهم ابدا تسيبي ليفني، المهم اسماء الناس اللي هي نشرت اساميهم، واسماء الناس اللي ما نشرتش اساميهم
بالنوسبة لمخاطبة العالم، الحمد لله لحد دلوقت بتجيب نتائج معقولة وان شاء الله ربنا يوفقنا ونجيب نتائج احسن، بالنسبة لمخاطبة الداخل
انا مش شايفة اي مخاطبة
الواحد لما ما يبقاش عارف، يبقى مش عارف، لما حد يعرفه يبقى عرف
الواحد لما يبقى عارف ويقول كلام اللي مش عارف بشكل الحاحي يبقى فيه حاجة غلط، يا اما هو مخه على قده وعنده هزيمة نفسية، يا اما هو قابض يا اما هو ممسوك عليه ذلة (فيه تلاتة على الاقل انا عارفة ان ممسوك عليهم ذلة وعارفة الذلة كمان) طيب
بالنوسبة للتسول وكسرة عين، الواحد ممكن يتعاطف شوية مع كسرة العين، لكن اللي عينه مكسورة ده مالوش حل، ربنا بقى يتولاه برحمته، بالنسبة للمتسول، لا انا مش باتعاطف مع المتسول خصوصا لما يبقى له سقف وعنده في التلاجة عيش وجبنة وزتون، لما يبقى نايم في الشارع وللا بياكل من الزبالة يبقى يتسول وللا حتى يسرق وان شاء الله ربنا يعذره
بالنسبة للي مخه على قده، ربنا ان شاء الله يفتحهوله
ليه باقول كده مع انه كلام قديم، والناس اللي بتصمم تقول كلام اسرائيل بالحرف معروفين ومشهورين بالحاحهم مما يثير الشكوك حواليهم
وانا مش شايفة مشكلة في الموقع، اقصد مش شايفة فيه خطورة، بيتكلم عن الهولوكوست وجايب صور شبه بالظبط الصور اللي بنشوفها للفلسطينيين
وبعدين جايب ده
اه
طب واحنا قلنا حاجة؟ وبعدين هو ده بقى جزاءنا؟ مش الالبان بس اللي ساعدوهم، دول كانوا بيهربوا افواجا افواجا عندنا ويتعاملوا زي البشوات هنا وشيلناهم في عنينا، عشان كده بيعاقبونا احنا
اذن المثل السوري بتاع: خير ما عملنا شر يجينا منين؟ طلع صح وللا ايه؟
على اي حال الموقع ده عليه ناس عرب، اللي بيعلن عن نفسه كتر خيره، اللي ما بيعلنش عن نفسه اظن احنا مش عايزين غباوة بقى ومش عايزين شغل كلاوي هنا، كلام البني ادم بيدل عليه، مش حتى الحاج سؤراط قال كدهون؟ اللي بيقول كلام ليفني يبقى بيقول كلام ليفني، محتاجة نباهة دي؟
اللي بيروج للفكر الصهيوني بيروج للفكر الصهيوني محتاجة ذكاوة دي؟
واللي بيعمل كده بالحاح واصرار وبيتجنن لما يلاقي حد مخالف لرايه له تأثير يبقى ده بيعبر عن رايه المحض غير مدفوع الاجر ازاي؟ حد يديني عقله ويمشي حافي
واحد عربي (عارف كل حاجة زي ما احنا عارفين) بيقول الكلام ده وبيحاول انه ينتشر ويتوغل (فيه ناس بتركن عربياتها وتركب تاكسي عشان تنشر كلامها ده بين سواقين التاكسي، ومش ح اقول اسامي ولا نيلة عشان الموضوع مش محتاج، وامبارح واحد منهم بنتكلم عادي يقول لي: انتوا بتشتمونا وبتهاجمونا! انتوا مين ونا مين؟ مافيش غيري انا وهو كنا قاعدين) يبقى ده يا مريض في مخه ربنا يشفيه يا حاجة تانية ربنا بقى ياخده، دول مش غرضهم يقنعونا دول غرضهم يسوقوا في حتة تانية عشان يحللو القرش.
جات لي معلومات من مصادر موسوءة ان مخاطبتنا للعالم وخاصة الباشمهندز اوباما عملت قلق لشوية ناس كدهون وحط لهم شطة في... ودانهم، خير خير خير. احنا ناس في حالنا وشغلنا كله لوجه الله تعالى ان شاء الله، نتمنى ذلك يعني يارب، وربنا يتقبل منا وكل شوية اخ عزيز اسمه مصري بالغربة يدخل يفكرني بتجديد النية، وفعلا ساعات بانساها وربنا يجعلها في ميزان حسناته انه بيفكرني
على اي حال الغرض من هاذوها البوست هو التنبيه والتحذير الى ان العمل بدأ على قدم وساق في الجانب الاخر من النهر، وانهم بالفعل بيشغلوا ناس من عندنا، مش مهم هم مين، مش مهم اساميهم ايه، ويارب يكون المقابل مجزي عشان ما ينفعش الواحد يبيع اخرته واحترامه لنفسه ويلغوص ايده في دم الابرياء باجر زهيد
المهم انهم مش مخلصين، والمهم اننا يارب يارب يارب يدينا الاخلاص من عنده لاننا لا بناخد ابيض ولا اسود، ومستنيين من ربنا الاجر واللي بيحركنا اننا بنحب البني ادمين
بس لازم نبقى عارفين ان الناس شادة حيلها وعايزين نشد حيلنا احنا كمان

19 comments:

مواطن مصري said...

nاهم حاجة للنية و انا ضد جرائم الحرب و الابادة الجماعية

و دة اقل شىءنقدمة لفلسطين اينعم بنختلف مع حماس في سياستها انما مع الفلسطينين


شوفتي كلمة الريس النهاردة قال كلام عين العقل


http://videohat.masrawy.com/view_video.php?viewkey=845bf489b9b09ad69ea3


يا نوارة الفرنسين دول ممكن يكونو معانا ما تشوفي كدة اي حد يترجم الهولوكوست ب الفرنسي

مهندس مصري بيحب مصر said...

الواحد مستعد يعمل كتير بس محتاج اللي يوجهه
خصوصاص اللي معندوش اي خبرة في مخاطبة العالم الخارجي و لا يعرف من اين تؤكل الكتف
إحنا نخلص نيتنا لله و نعمل اللي علينا و ربنا يوفقنا

Unknown said...

ادي احنا بنتعكز على بعض يا شباب

باقول ايه

لو عندكوا وقت من آن لآخر تابعوا السي ان ان والبي بي سي وورلد

وانا بادخل على اليوتيوب اشوف فيديوهات الصهاينة بيعملوا ايه وبيتكلموا بانهي منطق

بس كمان باشوف تعليقات الناس

الشهادة لله اللي عملوه اخر مرة مقرف كل الناس في العالم منهم

مافيش غير الاوساخ اللي عندنا هم الوحيدين اللي معجبين بالصهاينة

على فكرة

التاريخ فعلا بيعيد نفسه
بس الخوف انه يعيد نفسه للاخر

يعني مثلا ايام الهولوكوست كان الفقرا من اليهود هم اللي بيتحرقوا

وماحدش كان بيساعد النازي على التفنن في اضطهاد اليهود غير اليهود الاغنيا قوي
وكانوا مقربين منه جدا ومستفيدين منه

وفيه يهود من اغنياء العالم معروفين انهم عملوا فلوسهم من النازي لانهم تآمروا على اليهود الغلابة اللي ماتوا

ايه بقى بقية التاريخ اللي نأمل انه ما يعيدش نفسه


اليهود الاغنيا دول، اللي هم اساس الهلولوكوست وهم اللي تآمروا على اليهود الفقرا واللي عملوا فلوسهم من النازي


هم بقى بعد كده اللي دعموا الحركة الصهيونية وصرفوا عليها لحد ما عملوا الدولة النازية الجديدة بتاعتهم دي

والضحايا واهاليهم اتاجر بدمهم

يعني تخيل سين وصاد وعين

بعد ما نكون احنا متنا
يبقى هم رؤساء دولة فلسطين المحررة

!!!!!

عموما زي ما كلنا عارفين

الشر هو اللي بينتصر في الاخر

:))

Unknown said...

يا شباب بهيج بيقول ان عوكل عيان وبيجيلهم امريكا يتعالج

وبقية التعليق شتيمة في الشعب المصري

بس انا مش مصدقة انه عيان ولا حاجة
لاني شفته النهاردة مش قاعد دايما زي ما بهيج بيقول وكمان شكله بسم الله ما شاء الله

حسين فهمي في فيفا زلاطا يا اخواتي

Empress appy said...

ليه يا نواره هو ممكن حد يقول على اللى احنا بنعمله بنقبض قدامه لا بجد يتهزري النبى اجيب امعائه اعملها ممبار ده ايه الخيبه دي بس لا هتحبطينى ليه بقى ان شاء الله

Unknown said...

لا يا حبيبتي
فشر
ماحدش يقدر يقول كده والا انشر لسانه بالمنشار

انا باقرر واقع بس

Empress appy said...

اااااااااه طيب الحمد لله طمنتينى شوفى ميلك باقى الحاجه وصلت علشانن نكمل انا صاحيه اهو وعاوزه ابدا

Anonymous said...

لا يا نوارة
ميغركيش المنظر
هو فعلا عيان قوى
بس قبل ما يطلع فى لقاء
ولا قمة
بيهروه منشطات
علشان الفولت يعلى
ويعرف يمشى ويتكلم
ولما يروح
بيكيح تانى

ادعى ربنا يكرمة كدة زى ما كرم موسولينى


احمد سعيد

Anonymous said...

تحية طيبة
هذا عنوان عريضة تم إنشاؤها على الإنترنت موجهة إلى رئيس وأعضاء الجمعية العامة للأمم المتحدة من أجل إنشاء محكمة خاصة بجرائم إسرائيل المرتكبة في حق الفلسطينيين
http://www.petitiononline.com/EAFORD09/petition.html


يرجى النشر و التعميم

تامر علي said...

الكتاب العرب اللي بيكتبوا لصالح اسرائيل وسياستها معروفين بالاسم وموجودين على موقع وزارة الخارجية الاسرائيلي بالاسم
http://www.altawasul.com/mfaar/opp%20eds/op%20eds-%20arab%20writers
ومنهم من مصر حازم عبدالرحمن وانيس منصور وطارق حجي وعلى سالم ومن السعودية مأمون فندي وطارق الحميد وتركي الحمد ومن الكويت احمد الجارالله وحسن على كرم واحمد البغدادي وغيرهم كتير . دول النخبة من الكتاب العرب وهم دول المسيطرين على الواجهات الصحفية وهم دول المرشحين لأعلى وسام في اسرائيل على حد قول اولمرت ولا عزاء للشعوب... ولا للمغيبين .

Unknown said...

خطاب معقول جدا و مصلحة مصر لابد ان تبقي فوق كل اعتبار و علي المزايدين من الفلسطينيين ان يوحدوا مواقفهم و ينبذوا خلافاتهم بدلا من الفرقة و الانقسام الذي سيضيع قضيتهم

مواطن مصري said...

نوارة الريس النهاردة قال خطاب كويس و رائع و قال جيش مصر للمصرين و ليس للقتال الي اخر جندي مصري لمصلحة العرب

Unknown said...

هو ده الخطاب الرائع؟

الحقيقة جيش مصر للامريكان
لما الامريكان امرونا نحرر الكويت من العراق الجيش سافر وفيه ناس كتير اتقدمت للمحكامة عشان رفضوا يدخلوا في الحرب دي

وفيه عدد كبير ماتوا والله اعلم بمصيرهم بقى راحوا فين وللا ربنا ح يحسبهم ايه

ربنا يخليهولك حسني مبارك مدام عاجبك
عموما هو قاعد
مع ان بهيج بيقول عليه عنده سرطان بروستاتا

انا ما اعتقدش ابدا انه يجيله سرطان هو عمره لا دخن ولا شرب وبيحافظ على صحته ومش بياكل اكل محفوظ زينا ده بيجيله الاكل بالطيارة
ايه اللي ح يعييه

الا قول لي يا بهيج
بدل الرط بتاعك ده بما انك هناك، اوباما عامل معاك ايه؟ انا كل ما افتح السي ان ان الاقيهم عاملين زي العروسة اللي متجوزة جديد وطايرة من الفرح وكل شوية تقول جوزي جوزي
ما بيبطلوش مجايب في سيرته ولا كأنه نجم سيما
كويس يعني وللا طلع نصاب؟

Fatma said...

ههههههههههههههههههههه

هما لحقوا يا نوارة

بس عموما اللي اعرفه من ناس عايشين هناك انهم زي ال سي ان ان كدا

جوزي جوزي

فرحانين ياختي طايرين من الفرحة ومتفشخرين ع الاخر ان دا رئيسهم

جاتنا البلا

Ahmed Fawzi said...

معلهش بس ما يصحش نحقد على الأمريكان علشان ريسهم شاب و بصحته و بيفكر و عنده كاريزما و همه على مصلحة بلده ( بغض النظر عن إختلافنا معاه ) و إحنا ..... ولا بلاش

TAFATEFO said...

سكت دهراً ونطق كفراً أنا عارف

بس مش الوضع اختلف خلاص والعمليه بقت محسومه؟؟ بعيداً عن تقسيم أمير قطر (المحسبن) لكن الوضع فعلاً انقسم بين مؤيد لاستمرار مبادرة الاستسلام العربية )بحجج قديمه من عينة محناش قدهم وهي أمريكا هتسكتلنا) وبين مؤيد لمقاومة وحل مسلح لصراع لم يفلح التفاوض في تحريكه للأمام ولكنه حركه للخلف آلاف الخطوات منذ ترك ياسر عرفات بندقيته من اليد الأخرى (على حد تعبيره) وأثبتت المقاومة في 2000 و 2006 وفي غزة الوهن الشديد لآلة الحرب الإسرائيلية وكشفت كل من يزعمون الرعب منها وإيثار السلامة حفظاً لدماء شعوبهم وخوفاً من هزيمة من جيش أثبت السلاح البدائي (نسبياً ومقارنة بسلاح الجيش الإسرائيلي* قدرته على النصر في أيدي المقاومين وقدرته على هزيمة اليش الإسرائيلي المرة تلو الأخرى

الوضع الآن أصبح فعلاً معسكر ممانعة (مؤيد للمقاومة ورافض لخيار السلام أو الاستسلام) ومعسكر مؤيد لمبادرة الاستسلام وما زال يتبنى خيار التفاوض الانهزامي الفاشل

خلاص .. زمن فضح إسرائيل المفتريه .. مبقاش في أمل أو طائل لـ يا شعوب العالم ويا مجتمع دولي .. وثقنا في خسران الرهان عليكم .. وفي عدم جدوى مخاطبتكم .. وأصبح لا بد مما ليس منه بد .. تجاهلكم التام وحسم الصراع بالسواعد .. والنصر للصامدين

وأول الفصول هو صراع داخلي بين معسكر الممانعة ومعسكر الاستسلام .. ومفيش أمل بدون إنتصار معسكر الممانعة على معسكر الاستسلام

أنا لا بشوف كلمة في جرنال .. ولا خبر في قناة .. ولا بسأل حد .. أنا عاوز أفهم .. أفهم ايه اللي حصل قبل كده .. وايه اللي هيحصل بعدين

كتر خير ليفني انها وضعت لست بأخلص عملاءهم .. لكن فعلاً المعركة الأولى الحقيقة هي انتصار معسكر المقاومة واسترداد الحق بالقوة على المستسلمين

دمت ودمتم بود

Unknown said...

و هذا مثال لتأثير المقاطعة الشعبية .. سلاح الشعوب مضمون النتائج و الغير خاضع لاي اعتبارات سياسية

http://www.starbucks.com/aboutus/pressdesc.asp?id=976

Unknown said...

طفاطيفو رجع يا شباب

سكت دهرا

ونطق لآلئ
:))
الف حمد الله بالسلامة يا عم ما تغيبش علينا
كل ما نشوف بورنامج نقول فينك يا طفطف

Unknown said...

نسيت اقول لكوا
بهيج سايب تعليق كان بيقول اوباما لحد دلوقت كويس والناس بتحاول تقنع نفسها ان الحال ح يتحسن وحاطة عليه امل

انا مش قلت لكوا عاملين زي العروسة اللي عمالة تقول جوزي جوزي؟