عاجل: القبض على النشطاء المسافرين لنجع حمادي للعزاء

تحديث:

خلاااااااااااااااااااااااااااااااااااااااص كلهم في البيييييييت الحمد لله، باكلم ماك طبعا تلاقيه بيشخر وفي سابع نومة، وكلمت اميرة الطحاوي الاستاذة في الشغل

!!!!!!!!!!!!!

حنفي مطبق ورديتين 

ما نزلوهمش في اقسام ولا حاجة الحمد لله نزلوهم في القاهرة على طول كده

حمد الله على السلامة

تحديث:
طبعا عرفتوا ان الشباب اخدوا اخلاء سبيل وهم دلوقت في ميكروباصات راجعين القاهرة لسه بقى مش عارفين ح يسيبوهم على طول وللا ايه؟
دعواتكوا

تحديث:

البنات ح تبات في مستشفى قنا والولاد ح يباتوا في الحجز

تحديث بالاسماء كلها:

1-اسراء عبد الفتاح
2– وائل عباس
3- باسم سمير عوض
4- باسم فتحى محمد
5- احمد بدوى عبد الحميد
6– شريف عبد العزيز محمود
7- ماريان ناجى حنا
8- مصطفى أحمد محمد النجار
9- رؤى ابراهيم غريب
10- ناصر فتحى على
11- خالد محمود محمد
12-طلعت الصاوى
13- نادية الزينى بارونى "فرنسية"
14- أميرة الطحاوى اسماعيل
15-سلمى علاء الدين عقل
16- أحمد محمود مصطفى
17- اسماعيل سيد عمر
18- منى فؤاد أحمد
19- أحمد فتحى محمد
20- بولا عبده أمين
21-حسام صابر على
22- حمادة عبد الفتاح محمد
23-جمال فريد
24-محمد خلف محمد
25- الحسينى سيد أحمد
26-محمد حمدى حسن
27-محمد عبدالله محمد
28- حشمت محمد عبدالله
29- طارق صبرى عبد الله
30- شاهيناز محمد صلاح


تحديث:
الانتهاء من التحقيق مع سبع بنات وتأجيل التحقيق مع الشباب للغد
كلهم ح يباتوا
انا ما كنتش متوقعة كده ابدا، ابدا، ابداااااااا، ليه؟ ليه؟ هم عملوا ايه؟ ما عملوش حاجة، ما عملوش حاجة خالص، ايه اللي حصل لده كله؟ ايه لازمة النيابة اصلا؟ دول ما عملوش حاجة، دول اخدوهم من محطة القطر يا ناس، انا مش مصدقة نفسي
مش ممكن اللي بيحصل ده، مش معقول، دول بيعزوا، كانوا رايحين يعزوا
بكرة فيه وقفة احتجاجية عند النائب العام ان شاء الله الساعة 12 لتقديم بلاغ للنائب العام بخصوص القبض على ناس رايحة تعزي


توضيح:
كل التهم الموجهة الى النشطاء تنطبق تماما على علاء مبارك اثناء واقعة الجزائر

ارجو ان اللي سرى على الشباب دول يسري على علاء مبارك في دولة القانون

مش هو قال انه مواطن مصري عادي زي سواقين التاكسي؟

تحديث: من عند كريم البحيري
انتهت النيابة الكلية بقنا حتى الان من التحقيق مع ثلاث فتيات من اصل ثمانية وهم شهيناز عبد السلام وسلمى عقل ومنى فؤاد طبيبة من سوهاج ووجهت النيابة لهم ثلاث اتهامات وهى 1- الانضمام الى جماعة الغرض منها الدعوة الى تعطيل القوانين ومنع أحدى السلطات العامة من ممارسة عملها والإضرار بالوحدة الوطنية وكان ذلك بالترويج بالقول 2- الجهر بالصياح لأثارة الفتن 3- الأشتراك مع أخرين فى تجمهر مؤلف من أكثر من خمس أشخاص بغرض التأثير على السلطات العامة فى أداء عملها وبغرض تعطيل تنفيذ القوانين واللوائح مع العلم بالغرض من التجمهر وأرتكاب تلك الجرائم نفاذا لهذا الغرض
وفى سياق متصل مازال استمرار عرض الفتيات على وكلاء النيابة بالأضافة الى الشباب الذى علمت المدونة انهم موجه لهم تهمتين الأولى هى ترديد شعارات معادية وثانيا التحريض على التظاهر
تلك هى المعلومات المتوفرة حتى الان وسيتم عرض باقى المعلومات حال توفرها

توضيح:
نادية ما طلبتش اننا نتصل بالسفارة الفرنسية، ولا اقترحت الاتصال بيها، ولا حتى تعرف اننا بلغنا السفارة الفرنسية من اساسه
ده كان اقتراح حد على التويتر عشان من الاخر كده نتحامى في جنسيتها الفرنسية
يعني لما السفارة تعرف ان لها مواطنة اهو العيال المصريين ينوبهم من الحب جانب
ده الغرض يعني
احسن واحد عمالة افهمه على الفيس بوك وهو عمال يقول لي: يعني هي ما افتكرتش انها فرنساوية غير دلوقت؟ واعيد الكلام ومافيش فايدة


هي ما تعرفش اساسااااااااااااااا اننا اقترحنا ابلاغ السفارة من اصله، هي دلوقت بتتعرض على النيابة ومافيش اتصال بينا وبينها، ولا حتى استشرناها ولا بلغناها

ملحوظة:

كلنا قاعدين دلوقت ندعي ان نادية تطلع فرنسية بس وما عندهاش جنسية مصري عشان ربنا ينجيها

حبيت بس الطش قلمين كده وانا في السكة: قعدنا نعاير الجزائريين ونقول لهم يا احفاد نابليون.. ودلوقت بنتمناها، انا قلت لكوا الجزائريين دعوا علينا وربنا استجاب

تحديث:
السفارة الفرنسية قالت للناشطة ان لو نادية معاها جنسية مصرية مع الجنسية الفرنسية مش ح يقدروا يعملوا لها حاجة وانهم ح يتصلوا بالقنصل عشان يتأكدوا انها معاها جنسية فرنسية بس مش مصرية عشان يقدروا ينقذوها
عرفتوا بقى؟ لما تهاجروا شد السيفون على الجنسية المصرية في اقرب تلاويت
الجزيرة نشرت خبر زيارة شيخ الازهر لاهالي ضحايا نجع حمادي وتجاهلت خبر اعتقال النشطاء
القبيحة ست جيرانها يا مصر


تحديث:
يتم الان ابلاغ السفارة الفرنسية باحتجاز السلطات المصرية لناشطة فرنسية
الآن يعرض الناشطون على النيابة

تحديث:
انا خايفة.. هم عايزين ايه؟ عايزين منهم ايه؟ المقبوض عليهم اتقبض عليهم وهم نازلين من القطر، ودلوقت واحد على التويتر بيقول ان جرايد بكرة بتدعي انهم اتقبض عليهم وهم بيتظاهروا قدام الكتدرائية.. هم عايزين منهم ايه؟

تحديث:
الان يتم ترحيل النشطاء الى نيابة قنا الكلية بتهمة اثارة الشغب والتجمهر مع انهم قابضين عليهم وهم نازلين من القطر
فيه ناشطة فرنسية اسمها نادية زناني، انا حاولت اكلم السفارة الفرنسية بس النهاردة اجازتهم
بس اكيد فيه حد في السفارة، وللا ايه؟
نعمل ايه؟ على رأي فنون، نتحامى في الاجانب


تحديث:
اهالي نجع حمادي ليس لديهم ادنى فكرة عما يحدث للنشطاء... ما يحدث الآن هو اعلان رسمي من النظام المصري عن انه هو المسئول الاول والاوحد عن عزل اقباط مصر
تحديث:
المحتجزون يعلنون الاضراب عن الطعام
الامن مصر على نقلهم بسيارة الترحيلات وتخوف من نقلهم من قنا الى لاظوغلي
بعد المفاوضات، الامن يزعم انه سيفرج عنهم في العاشرة مساء

تحديث:
مديرية امن قنا تنكر وجود الناشطين لديها
بالطبع هم بالداخل، لكن اصرار المديرية على انكار وجودهم مؤشر غير مطمئن

تحديث:
بتوع القافلة رجعوا القاهرة.. هو انا كنت قلت عليهم هنا على المدونة؟ اه، كان فيه قافلة طالعة غزة اتقبض عليهم من الاسماعيلية بس رجعوا كلهم القاهرة الحمد لله
بتوع نجع حمادي لسه مافيش اخبار عنهم والبنات في حالة صحية سيئة جدا

تحديث:
الاكل اللي دخلته هالة المصري لسه ما وصلش، المفروض يخرجوا دلوقت، فيه تلات بنات اغمى عليهم، وفيه بنات كتير تعبانة
هم لازالوا في حجز الترحيلات مش في عربية الترحيلات
اسامة الغزالي حرب معتصم امام المديرية
فيه خمسة وعشرين ناشط معتصمين امام الصحفيين

تحديث:
نحن في انتظار الافراج عن المحتجزين وترحيلهم الى القاهرة عبر القطار
تحديث:
هنا كل اسماء المحتجزين وكلهم 23 واحد فقط ومعظمهم مش من حزب الغد ولا حاجة
فيه لغط في حجز البنات لانهم وعدوهم يفرجوا عنهم من ساعة ومش بيفتحوا لهم دلوقت
تحديث:
الامن مصر ينقل المحتجزين بعربية الترحيلات من قنا للقاهرة ومحامو هشام مبارك بيتفاوضوا على الافراج من مديرية ام قنا
هالة المصري دخلت لهم اكل بس ما شافتهمش
الا ان الاكل لحد دلوقت ما وصلهمش وفيه ناس ضغطها واطي وما اكلوش من الصبح


تحديث:
المحتجزون في الحجز، ماحدش بيكلمهم، المحامين قدام المديرية ومش عارفين يوصلوا لهم
اخدوا منهم كل متعلقاتهم الشخصية وحطوها في اظرف وحطوا الاظرف في كراتين
الحريق اتضح انه حرق بلاستيك
بيسألوا المحتجزين اذا كان حد عنده امتحانات او مراقبة على الامتحانات بكرة او بعده


تحديث:
انباء عن حريق في مديرية امن قنا والمحتجزين يطرقون الباب ولا مجيب
محامو هشام مبارك امام المديرية
---------

اتصل بيا هاني جورج دلوقت صحاني على الخبر ده، هو قال لي كلهم، قلت له كلهم مين (لاني مش عارفة مين اللي رايح يعزي في نجع حمادي) هو عارف صحابه مريان ناجي وشريف عبد العزيز واحمد بدوي بس فيه ناس تانية كتير راحت وكاتبين الستيتوس على الفيس بوك

اول ما نزلوا من القطر اتقبض عليهم وتليفوناتهم اتقفلت

هم دلوقت هناك ومقبوض عليهم هناك
تحديث:
لقيت الاسماء من التويتر

1-اسراء عبد الفتاح
2– وائل عباس
3- باسم سمير عوض
4- باسم فتحى محمد
5- احمد بدوى عبد الحميد
6– شريف عبد العزيز محمود
7- ماريان ناجى حنا
8- مصطفى أحمد محمد النجار
9- رؤى ابراهيم غريب
10- ناصر فتحى على
11- خالد محمود محمد
12-طلعت الصاوى
13- نادية الزينى بارونى "فرنسية"
14- أميرة الطحاوى اسماعيل
15-سلمى علاء الدين عقل
16- أحمد محمود مصطفى
17- اسماعيل سيد عمر
18- منى فؤاد أحمد
19- أحمد فتحى محمد
20- بولا عبده أمين
21-حسام صابر على
22- حمادة عبد الفتاح محمد
23-جمال فريد
24-محمد خلف محمد
25- الحسينى سيد أحمد
26-محمد حمدى حسن
27-محمد عبدالله محمد
28- حشمت محمد عبدالله
29- طارق صبرى عبد الله
30- شاهيناز محمد صلاح

------------
ولا عارفة هم اتقبض عليهم ليه؟ ناس رايحة تعزي
-------
تحديث:
لقيت ايمن نور بيقول ان الامن اعتقل تلاتين شاب وشابة من حزب الغد ومن ضمن الاسماء..إلخ
يارب يكون بعت لهم محامي لان هشام مبارك انا بعت لهم رسالة لانهم نايمين دلوقت

ولو فيه اسامي جديدة ح اقول لكوا