Saturday 28 February 2009

طيب اما اشوف اخباركوا انتوا ايه

الاستفتاء ده انا عاملاه على ماي سبيس وح اسيبه لمدة تلات ايام ان شاء الله وبعدين احلله معاهم
وعايزة نفس ذات الاستفتاء اعمله معاكوا ونقارن مع بعض الردود
شروط الاستفتاء:
1- حرر عقلك واستخدم الخيال والتأمل
2- ربنا هو اللي شايفك، حاول تكون كأصدق ما يكون
3- حاول تستشعر الموقف وكأنه حقيقي وحي قدامك
4- ما تحملش الموقف اراءك وخلفياتك السياسية، اتعامل معاه على انه موقف حقيقي وبسيط
تخيل الموقف الآتي:
واحد جارك كل ما تمشي يحدف عليك طوب، وساعات يكسر لك ازاز البيت
في يوم قررت انك تخلص من جارك ده، اخدت بندقية وصوبتها ناحيته
اول ما شافك بتصوب البندقية ناحيته استخبى ورا طفلين وست
علق على الموقف وقول لي ح تعمل ايه؟
انا برضه ح اسيب الاستفتاء ده تلات ايام زي عندهم ومش ح اعلق وح انزل التعليقات بتاعتكوا
زي ما قلنا، اتعامل معاه على انه موقف بسيط وطبيعي وحاول تكون صادق

Friday 27 February 2009

أنا هديت دلوقت واعرف اتكلم بخصوص الوثيقة

خلاص مش ح اقول اخص ولا حاجة :)
طبعا انا عارفة ان فيه حالة يأس مسيطرة على البشريات، وفيه ناس بتقول: وايه الفايدة، يعني افرض مليون واحد وقعوا على الوثيقة دي، افرض خمسين مليون، ميت مليون، مليار واحد وقعوا
خلاص؟ كده اسرائيل ح تتفكك بكرة الصبح؟ وللا حتى كمان سنة وللا باين لها تفكيك اصلا؟
هو من حيث باين لها تفكيك، باين، وباين قوي، مافيش دولة توصل الى هذا المستوى من اللا اخلاقية والفساد لدرجة تدمير الافراد اللي فيها نفسيا واخلاقيا بالطريقة دي الا وبتنهار، دي اسرائيل دي حتة فسلة، مش اجدع يعني من الامبراطورية الرومانية اللي ما وقعهاش غير الفساد والدموية لدرجة انهم وصلوا لدرجة من الدموية انهم بقوا يستمتعوا بمنظر العبيد وهم بيموتوا بعض والوحوش وهي بتلتهم البني ادمين ويتضايقوا من العبد لو موت العبد التاني على طول ويفضلوا يصرخوا عشان يعذب فيه شوية واللي ادى لسقوطهم مش الافعال المشينة دي، ولكن استمتاع المواطن العادي اللي مفروض انه زيي وزيك بالافعال دي واعتبارها حاجة لذيذة
انظر الشكل
نيجي بقى للازمة الوثيقة ولازمة التوقيع عليها
اسرائيل دلوقت تحولت الى ثابت من ثوابت المجتمع الدولي وبناء عليه بيتم تبرير كل المذابح اللي بتحصل في فلسطين عشان حماس تعهدت بمسح اسرائيل من على الخريطة
وعليه بيتم حصار ومقاطعة كل الدول اللي مش عايزة تعترف بما يمسمى "حق" اسرائيل في الوجود
طيب زي ما سبق وقلت مش عيب انك تتعلم من اعدائك اذا كانوا ناجحين وانت لا مؤاخذة فاشل، العيب انك تفضل فاشل وترضى بالفشل وتسلم لهم باللي سرقوه منك، صح؟
طيب فكرة الدولة اليهودية دي كانت مش على بال حد خالص، وطرحها في حد ذاته ما كانش مقبول بتاتا، الدنيا كلها كانت بتكره اليهود ما عدا احنا (اه والله العظيم عمرنا ما عملنا لهم اي حاجة وحشة دول كانوا متدلعين عندنا اخر دلع)، زي ما كل الدنيا كلها بتكرهنا دلوقت بما فيهم احنا، وزي ما انا مش عارفة هي الناس بتكرهنا ليه انا برضه مش عارفة هي الناس كانت بتكرههم ليه لما كانوا ما بيعملوش حاجة ولما بدوا يقتلوا في الناس الدنيا بقت تحبهم!!!!! عجايب والله
المهم ما علينا، اول حاجة اتعملت انهم ابتدوا يطرحوا فكرة الدولة اليهودية علنا، وهرتزل كتب كتاب الدولة اليهودية يقنع فيه اوروبا ان فكرة الدولة اليهودية دي فكرة مغذية ومفيدة لكل الاطفال الحلوين اللي بيسمعوا الكلام وبيشربوا اللبن، طرحها بجرأة ونشرها وبعدين ابتدا يشتغل، ليه كتبها بالجرأة دي عشان يعمل اهتزاز في الرأي العام اللي كان مجمع على عدم قبول الدولة اليهودية، بحيث ان يحصل انقسام وسط الناس، ناس تقول ممكن وناس تقول مش ممكن ويتحول الثابت الى مسألة خلافية (في كتابه الدولة اليهودية حمل هرتزل بشدة على اليهود المعارضين لفكرة الدولة اليهودية وقال بالرغم من كثرة عددهم بين اليهود الا ان شعبنا مسيرة يقتنع بجدوى الدولة اليهودية...اسمع علك تستفيد)، لحد ما دلوقت بقى الثابت ان اسرائيل موجودة ومافيش خلاف عالمي على ما يسمى "بحقها" في الوجود، اللهم الا احنا واحمدي نجاد، وحتى الناس اللي متضايقة من وجودها بتتعامل معاها على انها بقت امر واقع وهي بتلعب على فكرة ان الوقت في صالحها وكل سنة بتعدي عليها وهي موجودة بيخلي الناس تقبل بوجودها وخلاص بقى ادي الله وادي حكمته
فهمتوا مني وللا اشرح تاني؟
تاني مرة عشان البيه
لما تكتب وثيقة بعنوان: تفكيك اسرائيل ويتجمع عليها توقيعات كتير قوي ده ح يلفت النظر للوثيقة ام عنوان غريب دي
زي مثلا ما العالم كله التفت للوثيقة التركية اللي اتجمع عليها مليون توقيع عشان الاعتذار للارمن
كده انت اولا كسرت تابو فكرة ان اسرائيل لازم تبقى موجودة وان ماحدش معترض على وجودها غير محور الشر اللي بديول وقرون
وده ح يدفع للخطوة التانية ان الناس تقرا الوثيقة
لما تقرا الوثيقة وتلاقيها معتمدة على القوانين الدولية اللي الرأي العام العالمي بيلجأ ليها عشان يبرر جرايم اسرائيل ده ح يحرج الرأي العام العالمي ويخليه يفكر
على فكرة فيه واحدة على ماي سبيس قالت لي انتوا مش محترمين، عايزين الناس تعمل لكوا كل حاجة وانتوا قاعدين على المؤخرة
وده جزء من كراهية الراي العام العالمي لينا، اننا مش محترمين، يعني انا مش ح اقولها اه احنا مش محترمين انا دافعت وجبت مصارينها بالادب، بس بيني وبينكوا
احنا بالطريقة دي مش محترمين خالص، الكلام ده من اسرار العيلة يعني، اللي يقول لنا انتوا مش محترمين نقول له لا احنا محترمين وكدهون يعني، مش تروح تقول لهم اه والله احنا ناس رمة
المشكلة مش في الحكومات يا جدعان والله العظيم، لان الحكومات دي بتبقى من اختيار الشعوب، وعلى فكرة  مش صحيح ان الحكومات العربية لا تمثل الشعوب العربية، احنا صحيح ما انتخبنهاش، بس مبارك مثلا يائس ومتخاذل زينا، حكومات الخليج همها تكويم الفلوس زي شعوبها حتى حكومة لبنان منقسمة زي ما اللبنانيين منقسمين...إلخ، مش عايزة اخبط في الباقيين عشان التخبيط ح يبقى جامد قوي خلينا في الخفيف خفيف
يعني المشكلة الحقيقة في الرأي العام العالمي، وسيبكوا من ناتورا كارتا وتشومسكي وسليتر والناس القليلة اللي صوتها عالي
هم بس صوتهم عالي، لكن استطلاعات الرأي كلها بتقول ان الرأي العام العالمي كله داعم لاسرائيل وان المتضررين من الصراع ماهماش ضد اسرائيل ولا حاجة، هم بس مش عايزين مشاكل
فيه تابوهين اساسيين لازم يتكسروا مرة والى الابد: فكرة حق اسرائيل في الوجود
لازم تبقى مسألة خلافية، مش ممكن ابدا تفضل كده من الثوابت، وماحدش يقدر يعمل كده غيرنا، على قد ما نسيط لفكرة تفكيك اسرائيل على قد ما ده يهز الرأي العام العالمي
التابو التاني فكرة ان المقاومة ارهاب، يعني حتى اللي بيدافعوا عن المقاومة بيقولوا: ماهي اسرائيل اللي بتدفعهم انهم يعملوا كده
!!!!!!!!!!!!
لا
الطريقة دي في الكلام لازم تتغير، او على الاقل تبقى مسألة خلافية
لما عملت المقارنة ما بين جورج واشنطن وحزب الله وحماس (انا عارفة ان المقارنة دي تنطوي على تنازل من جانبي بس التنازل لازم يتوزن بميزان حساس شوية) ونشرتها على كل حتة بما فيها ماي سبيس وموقع اوباما، في الاول ناس دخلت وقالت لي: انت بتهزري؟ ازاي تتكلمي كده
بعد شوية ناس دخلت تقول ايوة ماهو جورج واشنطن كان في نظر الانجليز ارهابي
بعد شوية ناس تانية ما صدقت (امريكان سود وامريكان اصليين) وكأن البوست ده جالهم نجدة قالوا: على الاقل حماس وحزب الله من اهل البلد لكن واشنطن وانجلترا كانوا اتنين حرامية بيتخانقوا على سريقة
وبكده التنازل اللي عملته في الاول من حيث اني قارنت واشنطن اللي فعلا حرامي بناس بتدافع عن بلدها اللي جدودهم فيها من الاف السنين اترد، واترد بشكل احسن من لو كنت انا اللي قلتها
فهمتوا قصدي ايه؟
انا عايزة مليون توقيع على الوثيقة دي، لو مش ح اجيبه منكوا ح اجيبه من اليهود اللي ضد الصهيونية والايرانيين وانشالله من الصين، ح الف الدنيا كلها على النت لحد ما اجيب اللي انا عايزاه، بس دايما الاسبق بياخد اجر الاسبق دنيا واخرة
http://www.petitiononline.com/ttwpdi/petition.html

Thursday 26 February 2009

عايزة حد بيعمل فيديوهات

اللي بيعمل فيديوهات يبعت لي على الميل ده عايزاه في حاجة

إخصصصصصصصصصصصصصصصص

إخصصصصصصصصصصصص
إخصصصصصصصصصصصصصصصصصصصصصصصصص
إخصصصصصصصصصصصصصصصصصصصصصصصصصصصصصصصصصص
شايفين هم توقيعاتهم كام
وشايفين احنا توقيعاتنا كام؟
إخصصصصصصصصصصصصصصصصصصصصصصصصصصصصصصصصص
إخصصصصصصصصصصصصصصصصصصصصصصصصصصصصصصصصصصصصصص
إخصصصصصصصصصصصصصصصصصصصصصصصصصصصصصصصصصصصصصصصصصصصصصص
وزعلانين من اللي بيحكمونا ليه؟ ماهم شبهنا

اه يا بطني

بس انا طالبة ملحق للبوست ده
عايزة مراقب مصري
مالك
مواطن مصري
ادهم اللي هو ميدو
حسام الحملاوي اللي بيكتب السب بالام والاب بالانجليزي ده هههههههههههه ولاد الناس برضه حاجة تانية يا اخي
وتشكيلة كده على ذوقه، كل الناس اكتر حاجة ضحكتها الحتة بتاعتي وبتاعة ابي والصباغ وقطة الصحرا
بس انا اكتر حتة ضحكتي بتاعة احمد شقير وبتاعة البنت المشمشية
ماليش دعوة انا عايزة ملحق ولما تشوفوا البوست ح تطلبوا ملحق انتوا كمان واللي مش ح يطلب ملحق ح اعذبه ههههههههه
---
اه وعايزة عمرو غربية كمان والنبي

Wednesday 25 February 2009

هو اوباما بيسمع عمرو دياب؟

ايه الحملة الانتخابية اللي عاملها عمرو دياب دي؟ انا منين ما امشي الاقيه، وبيعملوا برامج عليه ويستضيفوا مفيد فوزي وعمار الشريعي وحلمي بكر!!!!!!!!!!!! علامات التعجب الكتير دي للناس اللي من جيلي اللي عارفين ان التلاتة دول كانوا بيلعوا ابو خاش عمرو دياب على السبحة
عموما لو عمرو دياب اترشح قدام ايمن نور وجمال مبارك انا ح انتخب عمرو دياب
عته بعته يبقى على الاقل قرد يسليني ولا غزال شارد

مين الظريف اللي بيعدل على شغل غيره

الى اعضاء مدونة نيو هولوكوست
ايمان نزلت العريضة بالعربي والانجليزي هنا وكانت عاملة البند بالازرق والدليل على خرق اسرائيل له بالاسود
مين الظريف اللي دخل عمله كله ازرق؟ ليه الاستظراف ده
حد ناشر بوست تدخل تعمل له ايديت كده من دماغك؟
اللي عمل كده يدخل دلوقت يصلحه وما يخافش اسمه مش ح ينزل عشان الاحراج
ملحوظة تانية
الوثيقة دي ارجو من الجميع، للي يحب، انه ينشرها على مدونته بالعربي والانجليزي مع لنك للبيتيشن بالعربي والانجليزي

Tuesday 24 February 2009

للتوقيع: وثيقة تفكيك اسرائيل

ارجو من الجميع التوقيع على وثيقة تفكيك اسرائيل
وهنا كمان بالانجليزي
الوثيقة مستندة على
1- التعريف العالمي للدولة
2- الميثاق العالمي لحقوق الانسان
3- العهد الدولي للحقوق المدنية والسياسية
4- العهد الدولي للحقوق الاقتصادية والاجتماعية والثقافية
وبتثبت من خلال المواثيق الدولية دي ان الكيان الاستيطاني العنصري القائم على الفكر الصهيوني الموجود المسمى باسرائيل لا ينطبق عليه شروط الدولة ولا يلتزم باي من المواثيق او القوانين الدولية وعليه فيجب تفكيكه، وانا اسفة الموضوع ما كانش فيه لا قرود ولا خنازير
اذا سمحتوا اقروا الوثيقة واذا عجبتكوا وقعوا عليها النسختين العربي والانجليزي
انا دورت ما لقتش حد بيطالب بتفكيك اسرائيل غير حركة ناتورا كارتا! اظن حان الوقت اننا يبقى لنا دور في الموضوع ده
لو تحبوا يعني
ملحوظة تانية، عايزين حد بيعرف يعمل بانرات يعمل لنا بانر للحملة دي

Monday 23 February 2009

ولا يهمكوا يا شباب...احنا الشعب

:)
ولا يهمكوا يا شباب، احنا الشعب، احنا من بلد الكنبلة، بلد الميت مليون شاب، احنا مش رياض البنطلوني
ومدام هو عامل استفتاء لازم يشوف رأي الناس الحقيقي، الجمنهور يعني
بس ليه يا شباب عايزين تطردوا اليهود
:)
ليه كده؟ ماهو اللي ما ترضاهوش على نفسك ما ترضاهوش على غيرك صح؟
وفيه زميل كتب يقول اليهودي اللي اصله جه مع الصهيونية يمشي واللي اصلا يهودي من اهل البلد يقعد
:))
دي محاكم تفتيش بقى؟
طب نمسكها واحدة واحدة كده
من وجهة النظر الدينية ربنا بيقول ايه؟
ربنا بيقول:
ولولا دفع الله الناس بعضهم ببعض لهدمت صوامع وبيع وصلوات ومساجد يذكر فيها اسم الله كثيرا، ولينصرن الله من ينصره، ان الله لقوي عزيز
نتأمل الآية كده
المساجد جاية في الآخر، يعني ايه؟ يعني الناس اللي مؤمنة بالقرآن المفروض ان شغلتها تحمي الصوامع والبيع والصلوات والمساجد
يعني تحمي حرية العقيدة
وحماية حرية العقيدة - اي عقيدة كانت سواء عبادة مسيحية او يهودية او اسلامية وفقا لما هو مذكور في الاية - ربنا مسميه نصر لله
يعني انت لما تحمي حرية عقيدة لواحد يهودي او مسيحي يبقى انت بتنصر ربنا زي ما بتحمي المسجد بالظبط
والمبدأ اللي مفروض تتحرك منه هو العفو عند المقدرة
لما ربنا نصر الرسول على قريش اللي عملوا فيه زي ما الصهاينة بيعملوا في الفلسطينيين قال لهم ايه؟ قال لهم: اذهبو فأنتم الطلقاء
صح؟
وصلاح الدين الايوبي افتكر الواقعة دي وهو داخل بيت المقدس وعمل زي الرسول بالظبط
صح؟
طيب يعني اذا كنت مسلم متدين ونيتك سودا كده للناس تتوقع ربنا ينصرك ازاي؟ المفروض تخلص نيتك لله وتنوي خير عشان ربنا ينصرك
صح؟
من وجهة النظر الانسانية والاخلاقية
واحد اتولد في بلد، وانت ربنا غلبك عليه، تطرده؟ ايه الحكمة من انك تطرده ماهو انت منصور خلاص
فين العدالة وانت بتدين عدوك بأنه عنصري وبيطرد الناس من بيوتها وبيخليها عشان يعمل جناين وانت لو كنت مكانه وانت اللي في موقف القوي وهو اللي في موقف الضعيف ح تعمل فيه بالظبط اللي عمله فيك؟
امال انت ضد الصهيونية ليه؟
طب ما الصهيونية دي رد فعل للنازية
انت عايز بقى تبقى رد فعل للصهيونية ونفضل نلف في الحلقة المفرغة دي؟
من وجهة النظر السياسية
مافيش حاجة تقضي على الفكر الصهيوني تماما وتقطع شأفته من جذورها غير ان فلسطين تبقى دولة ديمقراطية تستوعب كل المعتقدات
لان اقتراح طرد اليهود من فلسطين بيؤكد على الفكر الصهيوني وبيخدمه مش بيقضي عليه ولا بيضره
الفكر الصهيوني في اساسه مبني على فكرة ان اليهود مضطهدين دونا عن كل البني ادمين، وبما انهم مضطهدين دونا عن كل الناس، وكل الناس مش عايزاهم، وكل الناس يا اما عايزة تقصيهم يا اما عايزة تموتهم فمن حقهم بقى انهم يبقى لهم وطن قومي خاص بيهم
اهم لو وحشين ما حدش ح يستحملهم غيرهم ولو كويسين يبقى يقعدوا مع بعض
المهم انهم يبعدوا عن الناس اللي مش عايزاهم
وبناء على ان الناس كلها مش عايزاهم، فهم لاقيين مبرر يموتوا بيه كل الناس، ماهم بيكرهونا بقى ولو قدروا علينا ح يموتونا
حتى اطفالهم ورضعهم لما يكبروا ح يموتونا عشان احنا مضطهدين بالسليقة
والحقيقة ان دي مش حقيقة
الناس كلها بتضطهد بعض، مش اليهود بس هم اللي ضحية الاضطهاد، يعني احنا مثلا ما طالبناش الامبراطورية الرومانية بتعويضنا عن كم الشهداء اللي هي قتلتهم في مصر قبل ما الامبراطورية تدخل المسيحية وبعدها
ما قلناش للكنيسة الكاثوليكية تعتذر لنا عن المذابح اللي عملوها للعرب في الاندلس
البروتستانت والكاتوليك قطعوا بعض وكل واحد فيهم قدر على التاني ما رحموش وهكذا
يعني الانسان حيوان مضطهد بطبيعته
والمفروض اننا ناس بندور على العدالة مش بنحلم باليوم اللي ربنا يقدرنا فيه على اللي قادرين علينا عشان ما نرحمهمش
هههههههه
ما ينفعش كده يا شباب دي نية سودا دي
ربنا ح يسترها مع اتنين قتالين قتلا ازاي؟

استفتاء مهم ارجو التصويت

عمرو غربية عامل الاستفتاء ده ارجو منكم انكم تدخلوا وتجاوبوا عليه لاني اظن انه مهم جدا، واظن ان مناقشة الاستفتاء ده بعد ما يخلص مع عمرو ومع اللي شاركوا فيه ح يبقى مهم جدا
ادي النك تاني اهو اتفضلوا هنا

حاج اوباما....مش طالبة غباوة الله لا يسيئك

الى السيد الرئيس، رئيس محور الخير في مقابل محور الشر
هل تسمعني
حووووووووول
وحياتك فيه حتة في محور الخير اللي هي احنا حاصل فيها شوية لبش، وانت كنت عايز تقطع المعونة
باقول لك ايه يا حاج اوباما
مش طالبة غباوة الله لا يسيئك، دلوقت انت بتقول لهم يلغوا قانون الطوارئ، واذا اردت ان تطاع فامر بالمستطاع، قلت لهم يطلعوا لك ايمن نور واهو طلعوه، قلت لهم سعد الدين براهين يطلع نضيف واهو طلع نضيف
بتحط لهم العقدة في المنشار وتقول لهم يلغوا قانون الطوارئ ليه؟ انت كده بتضحي بتمانين مليون عشان اودة العمليات تعيش
يعني ح يموتونا واحد واحد في ستميت انفجار وح يلبسوا حماس المصيبة ومش بعيد يلبسوها لايران وحزب الله وطالبان وباكستان والقاعدة في نفس واحد
ويمكن الأي أر إيه بالمرة
(اه والله حيدر بغدادي بتخلفه طلع يقول ايران وطلبان، يعني حتى ما بيقراش الجرايد عشان يعرف ان ايران وطالبان لا يمكن يجتمعوا ابدا في مكان)
انت كده ح تولع لنا الدنيا
بتتلكك عشان تقطع المعونة صح؟
احب على رجلك اقطعها وخلصنا واختصر على نفسك وعلينا تلتميت تفجير في خمس ايام الله لا يسيئك
دول ممكن يعملوا حرب اقليمية عشان ما يشيلوش قانون الطوارئ
قال في الاول قالوا واحد رمى قنبلة من الشباك! انا مش فاهمة رماها من الشباك ازاي يعني؟ كان هو ومراته بيهزروا وبيحدفوا على بعض قنابل وواحدة منهم وقعت من الشباك؟
وبعدين رجعوا قالوا لك لا دي كانت تحت كرسي
تحت كرسي في الحسين! الحسين اللي لو ناموسة قعدت تحت كرسي كل الناس ح تشوفها
يا عم سيبنا في حالنا يا عم، يا عم ابوس ايدك انت ما انتاش دريان باللي احنا فيه
خلاص، ده قسمة ونصيب، يا جدعان سيبونا في حالنا لو فيه حاجة تتعمل كنا عملناها، خلاص بقى ده قضاء الله ح نعمل ايه؟ اكتر من كده وبيزيح ربنا
انت في ايدك تقطع المعونة؟ اقطعها يا عم انت لازم تذلنا قبلها؟
بدل كل التلاكيك دي، قول لهم والله بنمر بازمة اقتصادية ومحتاجين الفلوس، ما اعطلكوش
وما تخافش على قمل اسرائيل، هم اصلا مكرهين الناس فيهم ومش ح يساعدوا حد ابدا من اللي بالك فيهم لو قطعت عنهم المعونة هم عارفين يساعدوا نفسهم؟
ولا في ايدهم اي حاجة يعملوها غير يولعوا فينا احنا بس وما بيتشطروش غير علينا
طب احنا ذنبا ايه بقى في الليلة السودا دي؟ يا جدعان هو احنا مالناش حد ابدا في الدنيا دي؟ قاعدين في النص احنا زي سرحان عبد البصير؟
خلص في الكلااااااام انت ح تنقطنا؟ انجز وغلاوة الحاج حسين عندك، احنا عارفين انك مش بتطيق النظام المصري حتى كاتب في الرواية بتاعتك بتوصف البطل المخنوق: "وكأنه كان في أحد سجون مصر"، خلاص وصلت، وحياتك ولا احنا، بس ادي الله وادي حكمته، سيبنا بقى في حالنا نواجه مصيرنا لوحدنا ويا نحلة لا تقرصيني ولا عايز عسل منك، يا سيدي متشكرين كتر خيرك مش عايزين خدمات منك تيجي على دماغنا احنا في الاخر، انت مش عارف حاجة شكلك كده، دي المنوفية...المنوفيييية

Sunday 22 February 2009

والنكتة دييييي كمان قديمة

قال لك فيه اقتراح بالغاء قانون الطوارئ مارس الجاي، قام سبحان الله حصل انفجار في الحسين
يا ترى مين اللي عمله

احد مصارف الزكاة الامريكية

منقول عن كتاب: هل يمكن قطع رؤوس الهيدرا؟ معركة اضعاف حزب الله تأليف داني بركوفيتش تقديم ومراجعة د. ابراهيم البيومي غانم صادر عن مكتبة الشروق الدولية
النص:
ضرب العلاقة بين ايران وحزب الله-
(اقرا التفاصيل في الكتاب انا مش ح اعمل لكوا كل حاجة)
تغيير السياسة السورية تجاه حزب الله-
يمكن ضرب العلاقة بين حزب الله وسوريا في الظروف التالية: اسقاط النظام الحالي بما سيؤدي الى تغيير الاتجاه السياسي والعقائدي والتحول السياسي لديه. او تغيير سياسة النظام القائم في اعقاب اتفاق سلام مع اسرائيل كجزء من رزمة تسوية اقلمية او تكثيف الرقابة والضغوط الدولية على سوريا او فجوة او ازمة في العلاقات بين سوريا وايران
(انا حطيت النص عشان تبقوا بس عارفين ايه اللي ح يحصل لو حصل..ويمكرون ويمكر الله)
تعزيز وضع النظام اللبناني-
(اقرا التفاصيل في الكتاب بس كفاية العنوان يعني)
اضعاف العلاقة بين حزب الله والطائفة الشيعية-
(التفاصيل في الكتاب)
ضرب القيادة، والمؤسسات والقدرت والموارد عبر معركة سرية:
يسيطر حزب الله كمنظمة ذات مهام سياسية على ثروات واجهزة كثيرة وضربها يمكن ان يشوش عمله ويضعف من قدرته ويشوش القدرة لديه على تقدير خطوات اخصم، ويتحقق ذلك من خلال معركة اقتصادية ونفسية واعلامية موجهة، وعمليات خاصة بوتيرة منخفضة. اضافة الى احتمال اخر يتعلق بالتصفيات المركزة لقادة حزب الله وتحديدا امينه العام. اذ ان الفرضية تقول ان التخلص من نصر الله سيمس بشكل هام بالحزب وسيمنح اسرائيل انجازا معنويا من الطراز الاول وسيسرع من عملية اضعافه حتى وان كان ذلك بثمن ظواهر عرضية على شكل عمليات انتقامية من جانب حزب الله ضد اسرائيل
(بعد الشر...ربنا ينتقم منهم ومن كل اللي بيساعدهم)
---------
محمد عادل كلمني دلوقت وانا باكتب البوست ده وبيقول لي انه اخد خمستاشر يوم كمان وانه ح يعمل اضراب عن الطعام
ومعاه واحد اسمه محمد مقبوض عليه بتهمة خالد الاسلامبولي
اه والله
هو مش خالد الاسلامبولي مات الله يرحمه؟
حاجة كمان
محمد عادل بيقول لي اني نشرت مقال في العربي الناصري عن موضوع غزة وبيقول لي انه كان فيه هجوم على غزة
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
انا؟
انا؟
اللي عنده العدد ده يقول لي انهي عدد ويقول لي ايه اللي اتنشر بالظبط عشان انا ما اعرفش حد في العربي الناصري وما نشرتش فيه مقالات اكيد
وانا ح اهاجم غزة؟ انا؟ وللا ح اهاجم المقاومة؟
حسبي الله ونعم الوكيل
اللي يعرف يجيب لي العدد والنبي يجيبهولي عشان اقرا بالظبط ايه اللي مكتوب واعمل فضيحة
محمد عادل بيقول لي: هو ايه اللي بيحصل برة؟ انا حاسس ان الناس مخبية عني حاجة
قلت له ان الوضع مقرف وان ربنا حاميه في سجنه زي ما حمى سيدنا يوسف
ربنا يخرجه بالسلامة

النكتة دييييي قديمة

اتصل بيا ساندمانكي من قطر، هو ايام غزة اتصل بيا عشان يطمن اني لسة عايشة ويغيظني شوية كالعادة، بس المرة دي اتصل بيا وهو مصدوم، وساندمانكي مش من عادته انه يتصدم لانه مؤمن بالنظريات الفلسفية اللي بتقول ان الانسان اصله واطي والمفروض انه مش بيتصدم، وانا بدوري مصدومة انه مصدوم، ليه؟ لان هلبت ساندمانكي مصدوم ان عمرو خالد اخد تسعة مليون دولار معونة امريكية! حد يشيلني من هنا
مبدئيا ساندمانكي في قطر مش عشان يشحت ويتسول، عشان يشتغل ويكدح ويكوم نفسه، وح يجيله او جاله اكتئاب من القعدة هناك، ييجي واحد يقول لي ازاي ساندمانكي صاحبك بينما انتوا الاتنين لا ممكن ابدا تتفقوا في تنتوفة رأي قد كده، اقول له عشان اختلاف الدماغ ده يرجع الى اختلاف التربية واختلاف التعليم واختلاف القرايات، لكن مافيش اختلاف على الاخلاق، يعني مثلا ساندمانكي مش نصاب، مش شحات، مش بيلعب على الحبال، مش مدعي بطولات، مش كداب (وزي ما انتوا عارفين يا اصدقائي الصغار ان اللي بيكدب بيروح النار) ثم ان اراءه دي طالعة من دماغه، ماحدش بيدوس على بطنه يقوم مصقف وعلى حسب القبضية جاية منين النهاردة، له اراء تنقط وتشل ومش باقرا معظمها عشان ما اتخانقش معاه، خصوصا في فترة ضرب غزة اللي كوابيسها لسة بتهاجمني لدرجة اني من كام يوم حلمت بتسيبي ليفني وانا باقول لها:
It is not hamas, it is you who has to know that enough is enough
شفتوا الثقافة؟ كوابيس بالعنجليزي
بس انا عارفة ان دي دماغه، مش شاحتها من الجيران عشان اكلوه فتة بالهبر، وعمره ما عاش في دور المضحي المتفاني ولما حب يكسب فلوس راح زي اي انسان محترم شاف له شغلانة واتغرب عشان ياكل عيش من عرق جبينه
المهم ما علينا
ايه الجديد بقى في ان عمرو خالد بياخد معونة من امريكا؟ عشان ايه ساندمانكي يتصدم يعني؟ مش فاهمة، امال احنا عمالين نهاتي في ايه من الصبح وسيب عليا عياله يسبوا لي الدين ويشتموني بالاب والام والدين والميتين بمنتهى التقوى والورع؟
ماهو قبل كده راح الدنمارك ايام ما كل الناس كانت مقاطعاها وقال على موقعه انا رايح عشان اخد تموين لمشروع صناع الحياة
وواحدة صاحبتي صاحبة جمعية قالت لي ان بتوع صناع الحياة طلبوا منها الانضمام لمشروع ممول من المعونة الامريكية لتنمية العشوائيات، ثم ان ساندمانكي بيقول لي ان المؤتمر الاخراني اللي حدف عليهم عاصفة الصحراء دي في قطر كله كان ميغة وكله رايح يعبي عبي شيل شيل
ايه بقى؟ فين وجه الصدمة؟ على فكرة صدمة ساندمانكي يؤرخ لها، يعني نبتدي نقول: خمس سنين ما قبل صدمة ساندمانكي السنة الثالثة ما بعد صدمة ساندمانكي
طيب بقى قبل ما هاموش عمرو خالد يعف عليا ويدخل يسب لي الدين بكل التقوى والورع كما هو المعتاد احب اقول لكوا
اولا: الفلوس دي حرام، دي فلوس تعاملاتها كلها بالربا، ومصدرها الاساسي شركات صناعة السلاح، وشركات صناعة السلاح، هي اللي عملت قنبلة الدايم اللي عمالة تقطع في لحم الغزاوية لحد دلوقت حيث انها لما بتصيب مش بتسكت، بتفضل تسرح في الدم وتقطع الشرايين، هم بقى دولم الناس اللي بيغطوا فلوس المعونة الامريكية والمؤسسات الخيرية الامريكية اللي بتصرف على الداخل والخارج الامريكي
نفسي الاقي بقى الحلقة بتاعة عمرو خالد اللي كان بيقول فيها: لما تشرب ازازة بيبسي يبقى كأنك بتشرب دم طفل فلسطيني
اه، ماهو كان عامل حملة مقاطعة زمان وانا قصير كنت باحلم ابقى طويل
ثانيا: الفلوس دي سرقة، ناس بتشتغل في اليوم تمن ساعات ومش لاقية تأمين صحي وحضرتك بتقلبهم في الفلوس وتضربها في جيبك، ومش عشان هم امريكان يحل لك انك تاكل شقاهم
ثالثا: مافيش بني ادم محترم يبقى شحات، بجد والله العظيم، ده حتى الشحاتة بتيجي يوم القيامة نقطة سودا في جبين الشحات
يعني كل اللي بيمد ايده في المعونة ده ح ييجي على وشه بلاعة سودا قد كده يوم القيامة
رابعا: "انا عايز اعمل نهضة لبلدنا"، اه، ونهضة ايه دي اللي بتتعمل بالتسول؟ فيه حد بيشحت وينهض؟ ده الافرو امريكان في امريكا ذات نفسيتها طالبوا بان الدولة تقطع الاعانات اللي بتصرفها لفقراء السود في امريكا لانها بتعوقهم وبتخليهم يخلفوا كتير لان كل عيل بياخدوا عليه فلوس وبتخليهم ما يشتغلوش وما يتعلموش
خامسا: ما الدولة بتاخد معونة من امريكا، ما عملتش نهضة ليه؟ عشان بتسرقها؟ طيب ما اسرائيل بتاخد اكبر معونة في العالم من امريكا، ما شفناش على وشها نهضة ولا نيلة، وبعدين الدولة بتاخد بصفتها دولة، شحاتة بقى متسولة، اهي بتاخد بصفتها دولة، لكن المؤسسات الاهلية والافراد والدعاة والصحفيين والمدونين وحنفي ابو دقة وغير ابو دقة بياخدوا معونة بصفتهم ايه؟ ولاد مين في مصر يعني عشان ياكلوا معونة؟
سادسا: مين في الدنيا اللي ح يديلك فلوس ويسيبك تعمل اللي انت عايزه غير المواطن المصري اللي بيدي الحكومة ضرايب ويسيبها تعمل اللي هي عايزاه؟ مين غيرنا بيعمل كده؟ الامريكان دول تجار، من اول حرب الاستقلال وهم تجار، والحرب دي لا كانت عشان كرامة ولا استقلال دي كانت عشان البسبس لا مؤاخذة، يعني لا ممكن ابدا يصرفوا ملين من غير ما يحطوه على وشها تنور على كتفها تنور على كل حتة تنور
يعني مثلا لو دخل لعمرو خالد واحد على الموقع واستشاره في انه مثلي على سبيل المثال والحصر، وقال له انه مش قادر يقاوم ميوله المثلية وانه بيصلي ويصوم وبيحب ابن الجيران، هلبت ح يقدر عمرو خالد يقول ايه عن المثلية الجنسية على موقع ممون من المعونة الامريكية؟ طبعا المثلية الجنسية عليها خلاف داخل امريكا لكن مش خارجها، يعني السياسة الخارجية الامريكية في عز عز فترة بوش كانت بتهاجم ايران لانها ضد المثليين لان دعم المثليين خارجيا دي سياسة مالهاش دعوة بقى برايهم الحقيقي في المثلية
هلبت عمرو خالد ح يقدر يقول ايه عن اسرائيل؟ هل ح يقدر يعمل حملات المليون دعاء بتاعته لنصرة اهلنا في غزة؟ وبالمناسبة هو في الحرب الاخيرة ما عملش حملة المليون دعاء بتاعته اللي متعود يعملها
يا ترى ليه؟
هو عمرو خالد ده ما عندوش حد ينصحه لوجه الله تعالى ويقول له اللي انت بتعمله ده حرام عليك؟ كل اللي حواليه كده بياخدوه على قد عقله؟ مافيش حد يتقي ربنا فيه وينصحه نصيحة تنفعه في اخرته؟ يعني انت بتعمل ايه في الناس؟ تعلمهم الصلاة والحجاب والمعونة الامريكية؟ يعني ده تشريع جديد ده؟ معلش مع احترامي لكلام سيادتكم وليكن ما يكون، الواحد لما يبقى مقطع البطاقة زي سعد الدين براهين كده، اهو الناس ح تقول واحد بيشتغل بالاجرة عند الامريكان وخلاص
لكن واحد عمال يقول للناس قال الله وقال الرسول ويمشيهم وراه والناس بتقتنع بيه فعلا، ويروح ياخد معونة امريكية وهو اصبح، للاسف، مرجعية عند شباب كتير يبقى ده بيخرب اكتر من سعد الدين ابراهيم اللي ما بيخلطش المرمطة عند امريكا بالدين
لكن عمرو خالد بقى تأثيره على العيال اللي ماسحة عقلها وماشية وراه ح يبقى ازاي؟ دول ممكن يتهيالهم ان العمالة عند امريكا والشحاتة منها فرض عين على كل مسلم
وماحدش يقول لي بلاش تخوين احسن ارميه من الشباك، امال يعني امريكا ح تدي فلوس لاي حد في الدنيا ليه؟ في حب الله والوطن؟ لو انت ترضى تدي فلوسك لواحد يشتغل ضد مصلحتك يبقى امريكا تعملها، ومصلحة امريكا اظن واضحة يعني، وللا محتاجة شرح دي كمان

Saturday 21 February 2009

عايزة حد بيعرف عبري

اللي بيعرف عبري يبعت لي على الميل ده
عايزة حد  بيعرف عبري ضروري
----
كلمتين بخصوص الواد الكوميديان الاسرائيلي اللي الس على سيدنا عيسى وستنا مريم، بصرف النظر يعني عن اي حاجة هو اصلا واد اهبل وبرنامج كوميدي ودمه تقيل كمان بالمناسبة، ما تضحكش يعني
بس انا عايزة افهم، هي الناس مافيش عندها اي احساس بالعدالة خالص كده؟ يعني هو بيقول ان ده رد على انكار الهولوكوست! بقى دي زي دي؟ بقى انكار واقعة تاريخية توازي الخوض في عرض السيدة مريم والتريقة على لب عقيدة كاملة؟ عقيدتين الحقيقة بس احنا مش مهم احنا مافيش حد طايقنا اصلا، بس يعني لما انت تقول لي يا كدابة يا نوارة اقوم اقول لك الست والدتك جابتك من البواب ولزقتك في ابوك؟ هي دي زي دي؟
يعني ده بيفكرني بالناس اللي كنا نقول لهم: افتحوا المعبر يقولوا طب ايران مش بتحارب ليه؟

Wednesday 18 February 2009

اما اكمل لكوا قبل ما انزل تاني

وبعدين يا ستي ويا سيدي لما انت شاورت لهم على المكان اللي كان واقف فيه الشخص اللي انا مش عارفة له رتبة وللا امين وللا ايه؟
بصوا هو شاب كده بتاع خمسة وعشرين سنة، لابس جاكيت كحلي وما اخدتش بالي من البنطلون ولابس بيريه، هل البيريه كان عليه نسر وللا لا؟ مش فاكرة والله بجد، بس اغلب الظن ما كانش فيه نسر. المهم انه كان واقف عند تاندة كحلي برضه (هو كان يوم كحلي من اوله) ومكتوب عليها مديرية امن القاهرة، بس مافيش حد واقف خالص، يا سبحان الله، مش هو ده المكان المؤمن اللي خايفين عليه من تفجيرات المحجبات؟ فين الناس بقى؟ رحنا على الجنب اقصد يعني دخلنا شمال ما بين المتحف وجراج الفندق لقينا عساكر كتييييييييييييييييير وامناء وبرضه عمالين يبصوا لنا على اساس اننا كائنات فضائية واخيرا لقيت واحد لابس كحلي وقاعد على موتوسيكل ومكتوب على الموتوسيكل شرطة سألناه على الناس اللي كانوا موجودين قال مشيوا
محمد غزالي سأل امين في الخباثة كده قال له واحد بالمواصفات دي بيقى ظابط بس هم شيفتهم بيخلص تمانية (الساعة كانت حوالي سبعة، سبعة ونص) المهم الظابط اللي كان معانا اللي كان مبتسم ده قال لنا اهو مافيش حد مش لاقيينه رجعنا لقينا مين بقى؟
مش عارفة لقيناه قبل ما نروح وللا بعد ما جينا، بس لقيناه، لقينا ظابط لطيف كده ومهذب قوي ومؤدب وبيتلطف معانا جدا وعلى كتفه نسر، وعمالين نبص في وشه، ياربي الشكل ده مش غريب علينا الشكل ده مش غريب علينا وبعدين محمد مفيد ومحمد الغزالي نادوا عليا برة وهم بيقولوا لي عارفة مين ده؟
قام رجعت لي الذاكرة فورا واحنا التلاتة قلنا: سموءل ابو سحلة
المهم، ح نعمل لك المحضر، بس انت ما تعرفيهوش، ح نعمل لك المحضر بس يعني هو ح نجيبه منين، ح نعمل لك المحضر بس انت مش متأكدة انه شرطة
هو انا قلت انه شرطة؟ انا قلت كان لابس كذا، ممكن يبقى من امن الفندق، ممكن يبقى شرطة
لا مش ممكن يبقى شرطة احنا مش بنلبس كحلي
خلاص، يبقى مش شرطة
قام محمد مفيد قال: وكمان مش شرطة؟  يعني بيتعجرف على الناس ويهينهم وهو سكيوريتي؟ 
قام سموءل ابو سحلة اللي على كتفه نسر ومش عارفة كده يبقى رتبته ايه ، هو قال بس انا نسيت،قال لنا فيه ناس كده فلاحين وهزارهم تقيل وبعدين انتوا ح تجيبوه منين، وبعدين ده ممكن ما ينزلش الخدمة تاني بقى مدام عرف انك عملتي فيه محضر انا لو عارف ان عندي عسكري ومتقدم فيه محضر ح اقول له ما تنزلش الخدمة هنا تاني وبعدين الموضوع بسيط يعني انتوا مكبرين الموضوع ليه؟ 
بصراحة كانت الساعة سبعة ونص وانا تعبت وزهقت واتخنقت وكنت خلاص عايزة امشي قام محمد شاف انني بافيص راح شابط: لا ح نعمل محضر، ح انزل كل يوم اسأل عليه لحد ما اجيبه، مش مهم ييجي تاني، انا ح اعرف هو مين ومن انهي قسم بطريقتي
راح سموئل ابو سحلة قال له انت اخوها؟ قال له انا ابن خالتها فقال للعيال طب لو سمحتوا عايز اقعد معاها لوحدي وقال لي نفس الكلام قلت له خلاص هات البطاقة يافندم انا مش ح اعمل محضر
لا لا لا لا لا ح نعمل لك محضر بس انا باقول لك مش ح تاخدي حاجة
طيب خلاص نعمل محضر
انا الحقيقة اسقط في يدي، ما بقتش عارفة هو عايزني اعمل محضر وللا مش عايزني، هو اكيد مش عايزني اعمل محضر بس ليه لما اقول له خلاص يقول لي لا ح نعمل لك محضر؟ هل كان عايزني اقولها له بطريقة تانية؟ انا كنت عايزة امشي لان كان عندي محاضرة في استوديو جلال ورأفت الميهي ما بيحبش حد يدخل وراه وح يمسح بيا البلاط وانا مش ناقصة تهزيئ مرتين في اليوم ومحمد الغزالي عمال يرن لي على الموبايل من برة عشان ازن على المحضر الحقيقة انا كنت فيصت ومافياش مقاومة ومش عارفة ازن عليه عشان يعمل محضر او ما يعملش محضر
قلت له خلاص ما نعملش محضر
ليه؟ اعملي محضر
طيب خلاص نعمل محضر
براحتك اديني قلت لك وانت حرة! 
بعدين نادوا لي ظابط بنجمة واحدة وقعد يعمل المحضر ومحمد الغزالي قاعد
الظابط ابو نجمة قال لي على فكرة ده اكيد مهتز نفسيا، اصل احنا بنشوف الحاجات دي في حملاتنا كتير، بسبب وجود السياح فالمختلين عقليا بيبقوا كتير اصل ده كلام واحد مختل عقليا
طبعا محمد الغزالي بص لي رحت مدورة وشي عشان ما اضحكش 
اه نسيت اقول لكوا، محمد الغزالي واحمد مهنا اتصلوا بالدستور والمصري اليوم والبديل
المهم جينا لحد اوصاف الشخص وقلت وكان لابس بيريه، قال لي لا ما تقوليش لابس بيريه لانه مش ظابط، قلت له وهو انا قلت انه ظابط؟ قال لي ماهو ماحدش بيلبس بيريه غير الشرطة قلت له خلاص يبقى شرطة قال لي بس انت مش بنلبس كحلي قلت له خلاص يبقى مش شرطة قال لي يبقى مش لابس بيريه قلت له لا كان لابس بيريه قال لي ماهو لو لابس بيريه يبقى شرطة، طيب يبقى شرطة، قال لي: هو كان عليه نسر؟ قلت له: الحقيقة مش متذكرة قوي بس غالبا ما كانش عليه نسر لا، قال لي يبقى مش شرطة قلت له خلاص مش شرطة قال لي يبقى ما نكتبش بيريه قلت له بس هو كان لابس بيريه 
يييييييييي
لحد ما محمد قال له: اكتب بيريه من غير نسر
راح كاتب بيريه من غير نسر
وماما كل شوية تتصل وضغطها وصل ميتين على مية وستة، قلت لهم ممكن امشي بقى بعد ما وقعت على المحضر عشان ماما تعبانة
راح سموئل قال لي لا المأمور عايز يشوفك هو جاي في السكة
فالمصور اللي مش عارفة اسمه اللي جه مع محمد مفيد قال له: هو كل اللي بيعمل محضر بيقابل المأمور؟
- لا بس انتوا شاكيين واحد في الشرطة
هو احنا قلنا انه شرطة-
- مش بتقولوا لابس بيريه؟
بس ما قلناش انه شرطة-
-ماهو ماحدش بيلبس بيريه غير الشرطة
من غير نسر-
- المأمور لازم يقابلها ده موضوع كبير، مش حاجة بسيطة (مع انه كان لسه بيقول الموضوع بسيط)
وطبعا امي تعبانة وانا فيصت وزهقت وكنت ح ارمي نفسي من الشباك الساعة تمانية ونص وانا من خمسة وانا في القسم
قلت له انا متنازلة عن المحضر
الله انت مش عملتي محضر-
انا متنازلة عنه
لا احنا ما اجبرناكيش تتنازلي عن المحضر-
ما اجبرتونيش انا خلاص مش عايزة المحضر الله يسامحه
لا انت عملتي محضر استني المأمور جاي في السكة، -
(اللي جاي في السكة ده دخلونا ليه بعد مدة في اودته مع انه ما عداش علينا، ما شفناهوش يعني وهو داخل اودته مع اننا كنا في وش باب القسم ولو كان جاي من برة كنا شفناه وهو داخل خصوصا اني لما دخلت قعدت ادور على باب وراني للاودة ما لقتش)
وبعدين سموئل ابتدا يزعق: خلاص اقعدي...انا باتعامل معاكوا بذوق من الصبح
:)
ح تستني هنا وح تقابلي المأمور
راح محمد مفيد قال له: لو سمحت ما تزعقش
راح طاردهم كلهم برة الاودة: طب كلكوا بقى تطلعوا برة، بس الاستاذ محمد عشان ابن خالتها يقعد كاستثناء، مش عايز حد فيكوا هنا في القسم خالص، استنوا بررررررررررررةةةةةةةةةةةةةةةةةة
العيال كانوا ح ينشفوا دماغهم راح محمد غزالي غامز لهم راحوا طالعين عشان ما يعملوش مشاكل بس طبعا كلنا بنغلي وانا خلاص بقى مناخيري بقت في كعب رجلي ومقعدين معانا راجل شيك لابس بدلة موتار وكرافتة زرقا وعمال يضحك برضه
والله سليناهم رحنا ضحكناهم شوية
بس مش معقولة يعني قاعدة اقول للناس اللي في اوروبا وامريكا والدول المتقدمة ما تسكتوش على حقكوا واشتكوا ضد اي عبارات عنصرية وعمالة اشرد لاسرائيل عشان معاملتها مع عرب اسرائيل ولما اتلقى نفس المعاملة في بلدي اسكت
يعني انا عايزة اي واحدة عايشة برة تقول لي: ينفع ظابط فرنساوي مثلا يقول لها كل اللي بيفجروا المتروهات لابسين حجاب زيك وتسكت؟ مش كانت عملت لاهله فضيحة؟ 
وللا ايه؟ وللا انا غلطانة ان كرامتي بتوجعني وللا ايه؟ وقلت لسموئل كده والله: يا فندم كرامتي وجعتني وزعلت على نفسي
مش الناس كرامتها بتوجعها برضه؟ وللا انا مخي خواجاتي زي ما رأفت الميهي بعد كده قعد يقول لي وزعلت منه قوي لدرجة انه صالحني وهو مش بيصالح حد بيزعل ابدا بيسيبه يتفلق، بس انا زعلت قوي من الكلمة دي، هو ماحدش عنده كرامة غير الخواجات؟ ليه كده؟ انا بقى الكلمة دي عيطتني، كأن احنا اتكتب علينا ما يبقاش عندنا كرامة، راح رأفت الميهي مطبطب عليا وقال لي معلش ما تزعليش
وبعدين بقى فضلنا مستنيين وانا عمالة اقول لسموئل ابو سحلة اللي عمال يقول لي خمس دقايق، قلت له الخمس دقايق دول عملوا تلات ساعات ونص وانا امي تعبانة وما اقدرش اسيبها
المهم دخلونا انا والغزالي عند المأمور هاني جرجس وقال لي ما تقلقيش اللي حصل ده ما نرضاهوش ابدا واخد نمرة محمد غزالي بعد ما كان سموئل ابو سحلة اخد مني نمرتي برة
على الله بقى بطرس يرد عليهم كالعادة
وخرجت وانا حالفة ان لو حد دبحني في الشارع مش ح اروح اشتكيه ابدا، يا اخد حقي بدراعي يا احسبن عليه وافوض امري لله
وكانت الساعة حوالي تسعة الا ربع
بس انا عندي كام سؤال بجد والله العظيم: ايه اللي يضحك في كلمة: احنا بندفع ضرايب ومن حقنا...اي حاجة بقى؟ ايه الغريب في كلمة: توجيه اهانة والتحدث الى المواطن بعجرفة واهانة رمز ديني وخطاب عنصري؟ مش مكتوب في المواثيق والقوانين ده؟
وللا هو بس كريم عامر اللي بيزدري الاديان؟ واتهام كل اللي "لابسين زي حضرتك كده" بانهم بيفجروا المتاحف ده اسمه ايه؟
الظابط اللي بيكتب المحضر قال لي بتتهميه بايه؟ قلت له: باهانتي والتحدث الي بعجرفة واهانة زي ديني
ليه بص لي شوية كده كأني باتكلم جزر قمري؟ وبعدين قال لي: ايه؟. تاني لو سمحتي، وهو بيكتب بامليه بالراحة كأني باقول طلاسم سحرية
المهم اديني خضت التجربة والحمد لله رب العالمين زي ما نصحتكوا كده انكوا تتناقشوش مع صهاينة
بانصحكوا انكوا ما تروحوش اقسام والحكمة المصرية القديمة اللي بتقول: احنا مش وش اقسام هي حكمة شعب عمره سبعتلاف سنة خبر الحياة وفهمها وانا من هنا ورايح ح اشوف الموروث الشعبي بيقول ايه وامشي وراه لان حكمة الشعوب العريقة لا يستهان بها وده مش كلام فض مجالس ده كلام خارج من تجارب ولزمن ولابد اراجع كل الامثال الشعبية واحطها نبراس ليا في حياتي خصوصا مثل لا تـ....تمسي على العبيط ولا تخلي العبيط يمسي عليك، وعلى رأي رأفت الميهي: بلا تفكير خواجاتي

لا اتحبسنا ولا اتعذبنا

الموضوع وما فيه اني زعلت على كرامتي، سايقة جنب النيل هيلتون من ناحية المتحف والمطبات جبال لقيت شخص ما لابس كحلى وبيريه كحلي وواقف في الكشك بتاع الامن ده اللي جنب الجراج بتاع النيل هيلتون باقول له بابتسامة: المطبات عالية قوي
واذ بي اوفوجأ انه بيكلمني كأنه ظبطني في اثناء الاعداد للجريمة واحبط المخطط يافندم: عشان اللي بيفجروا المتاحف ماهو كلهم بيلبسوا زيك كده (وراح مشاور على الحجاب) انا طبعا في الاول ما صدقتش قلت ينكن بيهزر فاوسعت الابتسامة: ح ابقى اخد بالي وانا بافجر المرة الجاية قام بمنتهى العجرفة قال لي: ما انا عرفت عربيتك خلاص
الشهادة لله انا زعلت على روحي قوي حودت شمال عشان اطلع على الكورنيش لقيت واحد تاني لابس كحلي وبيريه بس عنده شرط على كتفه قلت له: فيه واحد قدام الفندق قال لي كذا كذا قوم يقول لي: لا مش كل المحجبات كده يعني
قلت له: انا على فكرة صحفية ومش ح اسكت وح اكتب في الموضوع ده يعني ما اعرفش امشي في بلدي، معدية اقوم اتهان ده انا لو كنت في اوروبا وللا امريكا يبقى دي اسمها عبارات عنصرية وكنت اشتكيته فقال لي: لااا هو قال لك ايه يعني
قوم انا فجأة لقيت الدموع نازلة لوحدها
احمد مهنا كلمني يبارك لي على الكتاب لقاني باعيط فقال لي طب خليكي مكانك انا جاي لك
جالي احمد مهنا ومحمد غزالي وقالوا لي ح نعمل محضر بالواقعة
مها سكوت ح نصوت كلمتني في التليفون وقالت لي: ما تروحيش يا نوارة القسم ح تعطلي نفسك وتوجعي دماغك على الفاضي
مش اسمع الكلام بقى؟ لا محمد الغزالي قال لي: لازم نثبت حقنا هو انتوا ما تلبسوش حجاب يتحرشوا بيكوا ويقولوا لكوا تستاهلوا تلبسوا حجاب تبقوا ارهابيين؟ طب تعملوا ايه يعني؟ مش ح تعرفوا تمشوا في البلد؟
وطبعا بما اني مؤمنة بالقانون وسيادة القانون فضلت قاعدة في قسم قصر النيل من الساعة خمسة لتمانية ونص، تروح الناس وتيجي الناس يعملوا محاضر ويمشوا لدرجة ان فيه واحد عمل محضر بقتل مراته ومشي واحنا لسة قاعدين
- ايه الحكاية؟
الحكاية كذا كذا
الامين يبص لي باندهاش ويقول لي: طيب طيب...الباشا ح يغسل ايده بس ويشوفكوا اصله كان بيتغدا
الشهادة لله المعاملة ما كانش فيها اي قلة ذوق خالص لحد قبل الاخر، قبل الاخر ح اقول لكوا ايه اللي حصل، 
الباشا يقول لي ايه الحكاية اقول له...يتنح شوية وبعدين يقول لي: هو انت ح تعملي عقلك بعقل واحد خريج ابتدائية؟ ما اخدتهاش ليه بروح الدعابة؟ عموما ح اعمل لك محضر
انسحبت من لساني وقلت له: يا فندم انا بادفع ضرايب وهو بياخد مرتبه من ضرايبي مش عشان يهزأني وانا ماشية في الشارع
الظابط: الاربعين جنيه؟
انا: طب يعني هو خواجة؟ مالوش ام وللا اخت وللا خالة لابسة زيي؟
الظابط: طب ح اشوف لك حد يعمل لك المحضر!
يبدو والله اعلم انه لقى فيا مادة خصبة عشان ينادي كل الناس تيجي تبص عليا انا والاتنين اللي معايا اللي بقوا بعد كده اربعة
لان محمد مفيد جه ومعاه مصور صحفي، ومحمد مفيد عنده لا مؤاخذة دقن راحوا على الباب شافوا بطاقته وموبايله
بعد شوية جه ملازم كده بص لي وكل شوية واحد يدخل ماسك في ايده ورق قال يعني ح يعمل المحضر عشان يسألني فيه ايه عشان يضحك الظاهر وللا ايه؟ وانا راخرة قعدت اقول كلام بتاع الضرايب والاهانة ولو كنت في بلد تانية كانت بقت عبارة عنصرية، هو محمد غزالي حاول يغلوش على كلامي شوية عشان يقتصد في ضحكهم عليا وهم يقولوا: مافيش ظابط بيلبس كحلي
قلت له ايا كان حتى لو بياع ترمس ده واحد اهاني في الشارع وانا عايزة اشتكيه
ورايحين جايين، الظابط وصحابه اللي ناداهم، يتكلموا في التليفون: يافندم بتقول انها صحفية وعايزة تشتكي ظابط
وبعدين الظابط ابو تلات نجوم قال لي ح ابعت معاكي حد يعاين مكان الواقعة! بس هو ح ييجي من قسم الجزيرة
هم العيال قالوا لي هو بيحاول يعطلك يعني جايب واحد من قسم الجزيرة ليه؟ بس انا حاسة انه كان بيجيب صحابه يتفرجوا عليا
جه ظابط ما شفتش النجوم على كتفه وتقريبا ميت على روحه من الضحك ومحمد مفيد بيحاول يقنعه اننا عايزين يبقى لنا كرامة وهو يضحك اكتر ومحمد مفيد يقول له يعني وانا داخل القسم ليه يتشاف بطاقتي وموبايلي دونا عن كل الناس عشان مربي دقني والراجل برضه مش فاهم ايه الحكاية ويضحك تاني وبعدين راح معانا لموقع الحدث
اني الاقي اي حاجة كحلي هناك
كل اللي موجودين امناء شرطة وعساكري وكلهم شكلهم كانوا مستنيينا عمالين يبصوا لنا ويزغدوا بعض
انا لازم انزل دلوقت حالا ح اكمل لكوا الحكاية لما ارجع ان شاء الله واقول لكوا على مفاجأة مش ح تصدقوها

Monday 16 February 2009

آه صحيح ده انا نازل لي كتاب

تحديث:
الواد ميدو طلع هو اللي عارف كل حاجة عن كتابي، اولا في معرض كتاب مكتبة الاسكندرية قاعة...ايه؟ كتكت؟ استنوا...آه
ارض كوتة
احفظوها بقى
ارض كوتة
ارض كوتة
ارض كوتة
ايه ارض كوتة دي؟ وهو اللي جاب لي الغلاف بتاع الكتاب، اصل انا كنت شفته على الميل ووافقت عليه بس ما نزلتوش على اللاب توب على اساس ان دي صورتي يعني وانا صغيرة، حد بينزل صوره هو على اللاب توب؟

نسيت اقول لكوا، وحفل التوقيع ان شاء الله الجمعة الجاية في اسكندرية :) في...في...باين معرض الكتاب، مش عارفة بقى في مكتبة اسكندرية وللا فين؟ ح اسأل تاني واقول لكوا ح يبقى من اربعة لستة ان شاء الله

Sunday 15 February 2009

مين رفعت السكري ده؟ وهو لسة فيه قلم سياسي في السن ده؟

انا دخل لي حد ساب لي التعليق ده
وده نصه:

Anonymous said...
سيتم القبض ع صاحب هذا الموقع و صاحب التعليق
رئيس القلم السياسى امن الدولة
!!!!!!!!!!!!!!
انا شفت رئيس القلم السياسي دي من هنا ووقعت من الضحك
نهارك سعيد يا فندم
ارجوك ما تكلمنيش بالطريقة البطالة دي
ميرسي....ميرسي
مساء الخير

اتفرجوا.... اهم كلهم عاملين كده

واي حد ما يقولش ان اليهود احسن من كل الناس يبقى نازي، وحاطين الفاتيكان في دماغهم ما اعرفش ليه؟ ما اعرفش اصلا الفاتيكان تعمل لهم ايه اكتر من اللي هي عاملاه، دي ناقص تدخل الادان في الكنيسة ومع كل الادان تقول احنا بندين الهولوكوست ولو تشوفوا الفيديو حتة عيل صغير عنده بتاع تمنتاشر تسعتاشر سنة وبيقول كلام عجب عجب عجب استغفر الله العظيم، هتلر ابن الكلب كان بيقول عليهم مجانين وبيعمل ابحاث بتقول كده، استغفر الله العظيم، لا، انا مش ح اصدق هتلر لا...مش ح اتنازل عن مبادئي ابدا، ليكون كلام الولية المجنونة اللي بتقول انهم بيحقنوهم بحاجات تخليهم مجانين ده صحيح؟ لا برضه ما انا مش ح ادي مخي لواحدة مجنونة زي دي، تؤ، هو ايه ده؟ فيه كده في الدنيا؟ عمركوا شوفتوا كده في الدنيا؟ ولا اجن مجنون بيكلم نفسه في شوارع القاهرة بيعمل كده، ولا الراجل اللي كان بيعمل بيبي تقيلة في الشارع وضرب واحدة زميلتنا بالقلم عشان بصت عليه وقال لها: مش من حقك تقتحمي خصوصيتي
:)
كان مثقف قوي الحقيقة


احداث ايه؟ ده انا بت ظالمة والله، اما ادور لكوا على فيديوهات الفاتيكان، ده حتى الولية المجنونة اللي بتقول انهم بيجننوهم بتقول الفاتيكان هي اللي ورا ده كله هههههههههههه لا حول ولا قوة الا بالله دول لسة عايشين من الف سنة ومش عايزين يخرجوا من الة الزمن، هي الفاتيكان لها سلطة سياسية دلوقت؟

طب والله العظيم ما طبيعيين

انا ملاحظة انكوا سايبيني لوحدي على المواقع الاسرائيلي والفيديوهات اللي منزلها اسرائيليين، يعني انا مقدرة الحاجز النفسي والقرف والغيظ، ما انا برضه، هو انا مش بني ادمة يعني، بس الواحد بيضغط على نفسه
على العموم انا باقصر عليكوا الطريق
ما تضغطوش على نفسكوا ولا حاجة، استغفر الله العظيم كلهم مجانين
تؤ
انا مش عايزة ابقى مش موضوعية ولا شريرة ولا اشيطن حد، كلنا بني ادمين واكيد اللي فينا بيعمل حاجة غلط يمكن الكلام يجيب معاه فايدة، يعني انا كنت زمان باحاول اتكلم مع العيال بتوع الاحداث اللي ممكن يبقى واحد فيهم بيشد كلة وبيغتصب الاطفال وجاي في جريمة قتل كمان، فيه اكتر من كده؟
طب والله العظيم العظيم الكلام مع العيال دي بيجيب نتيجة، هم في الاول بيحاولوا يستعبطوك، بس فيه اسلوب تتكلم معاهم، مش تدب لهم الحاجة وش كده في وشهم، تحاول تتصاحب عليهم وما تحسسهمش انك مستغربهم ولا بتدينهم ولا برضه تبقى عبيط ومتجاهل فكرة انه مجرم
تركيبة كده بالتعود بتعرف تلاقي صيغة
الا الصهاينة
شفت اخضر كتير وقليل الا الاخضر اللي فوق قبة عينيكي ده
اولا بقى:
the chosen people
شعب الله المختار
ده طلع الحكاية دي بجد، مش تريقة ولا سمعة ولا نيلة دول بيتكلموا كده بجد، الحقيقة انا شفت الكلام ده عملت كدهو وواحدة بتقول اللي تقوله التوراة لازم العالم كله يصدقه واي حد مايصدقوش يتقتل وكده يبقى بندافع عن نفسنا لان اللي مش مصدق التوراة معادي للسامية
طب انا اعمل ايه انا دلوقت، وانا بهبلي فاكرة ان الواحد ممكن ياخد ويدي في الكلام يعني اقول لهم طب يعني يا قناوي يابني هو ربنا ظالم عشان يخلق جنس احسن من جنس؟ مش كل واحد وعمله؟ متخلفة بقى وفاكرة نفسي ح اعرف اتكلم عشان كنت باصاحب اطفال الشوارع والعيال بتوع الاحداث، طب دي عيال غلابة، ما انا راخرة معتوهة ايه وجه المقارنة ما بين عيال غلابة ما لقوش حد يقول لهم الصح من الغلط وما بين ناس مجانين زي دول؟ عمالة اقول لهم كلنا بني ادمين هو انتوا لما تموتوا الاطفال لبعدين يكبروا ويموتوكوا يبقى ده اسمه دفاع عن النفس؟ يقوموا يقولوا لي ايه؟ يقولوا: ايوة... اه والله! فضلت انتع في قلبي لحد ما واحد هو يهودي نفسه (بس مش صهيوني) دخل وقال لي ما معناه انت يا بت عبيطة؟ انت بتقنعيهم بايه؟ دي ناس لو قعدتي ميت سنة تقولي الكلام ده مش ح تعرفي تقنعيهم هم كده خلاص، اهم حاجة دلوقت نعملها اننا نوقف دعم العالم ليهم مش نقنعهم انهم غلطانين مش ح يقتنعوا كنت عرفت اقنع جدتي وبلطجية وكل الناس بتخاف منهم واحد بيقول لك التفوق اليهودي ح تقولي له ايه ده؟
صحيح
انا بايني هابلة وللا ايه
على اي حال نصيحة ما تدخلوش على مواقع الصهاينة ولا على فيديوهاتهم غير عشان تلطشوا لهم وتمشوا عشان بس ما تتعلوش ولا تتشلوا زي ما حصل لي
والحمد لله اني عاملة مودريشن لانهم بيدخلوا يسيبوا لي كلام بالصيني ولينكات غالبا فيها فيروسات، على الله ما يكونوش بيعملوا كده على موقع النيو هولوكوست اما اروح اشوف

هو مش ده الانبا مكسيموس؟

شايفين الراجل اللي في اخر صف تاني واحد لو بتعد من على يمينك وخامس واحد لو بتعد من على شمالك لو بتتفرج على الماتش من التلفزيون مش ح تشوف حاجة؟
هو الراجل ده مش شبه الانبا مكسيموس وللا انا بيتهيألي؟
هو مين الراجل ده؟

Gaza Hacker Team

جدعان ربنا يحميهم
انا طبعا الباز افندي....بعت لهم جواب شكر، الميل محطوط على الموقع
ده موقع كاديما
بصوا بقى عامل ازاي

Saturday 14 February 2009

لا دي خيبتك انت يا حاج تونة

ده كاريكاتير بتاع حلمي التوني مش واحد اسرائيلي اللي راسمه
الا موضوع ان الخارجية الاسرائيلية نشرت اسماء الناس وفضحتهم ما خوفش اللي اساميهم اتنشرت ولا حاجة زي ما الواحد كان متصور، ده خلا ناس اساميهم ما اتنشرتش يقدموا ابليكيشن مع السي في يمكن ربنا يكرم
هي الخارجية الاسرائيلية بتدي فلوس كتير كده؟ اكتر من الاهرام يعني؟ ده الواحد يسمع ان الاهرام فلوسه ياما
والحاج تونة نفسه ان شلبية تكبر وشعرها يصفر (سهلة دي، اي علبة اكشوجين وتضرب شعرها) وعينيها تزرق (ان شاء الله بس هاتلها عدسات ملونة على حسابك) وتغلب الرجالة زي تسيبي ليفني
اولا من حيث ان الستات عندنا بيغلبوا الرجالة، نو اوفنس، دايما بيغلبوهم ده حتى اسطور الست اللي اكلت دراع جوزها اسطورة خالدة ومؤثرة في الوجدان الشعبي اكتر من اسطورة ايزيس
سابعا كده على طول عشان انا بس اخلاقي كنزة شوية، في الانتخابات، ايااااااااااااااااااام ما كان عندنا انتخابات، مافيش واحدة اترشحت وخسرت ابدا، الناس في مصر هنا عندها عقدة اوديب، اول ما يشوفوا ست مترشحة ينجحوها، اه والله، وفي الفلاحين بقى بالذات، واسألوا طنط شاهندة اللي مافيش مرة رشحت نفسها في كمشيش الا ونجحت
لكن هو احنا عندنا انتخابات يغلب فيها رجالة عشان يغلب فيها ستات دلوقت؟
يا حاج تونة انت يا ضنايا يا اما التعليم على ايامكوا كان مضروب، يا اما بقيت تنسى بقى، عشان قبل ما اسرائيل اللي عاجباك تتعمل كان فيه واحدة اسمها وداد متري، ست، ومسيحية، واترشحت في الاربعينات لانتخابات رئاسة اتحاد الطلبة في جامعة القاهرة وفازت في الانتخابات باكتسااااااااااااااااح منقطع النظير مع ان كان نازل قدامها نشامى اشاوس وكان نازل قدامها الاخوان المسلمين كمان، ايه رايك بقى؟
وقبل ما هرتزل يفكر يعمل كيان صهيوني كانت نبوية موسى ناظرة مدرسة وهدى شعراوي جارة النسوان في الشارع قدام الجيش الانجليزي وفتحوا عليهم الرصاص الحي، وانا ما جبتش سيرة حتشبسوت وكليوباترا وشجر الدر لان دول كانوا ايام عزنا انا باتكلم على مصر تحت الاحتلال
بس طبعا ولا واحدة فيهم كان شعرها اصفر، الاكشوجين اياميها كانوا بيستخدموه للتنفس بس يمكن كانوا بيحنوا شعرهم وكعوبهم، ولا واحدة فيهم كانت عينيها زرقا
واكيد اكيد، ولا واحدة فيهم كانت بتحرق اطفال رضع بالقنابل الفسفورية ولا واحدة فيهم كانت بتدي اوامر للجنود بتوعها (اللي عادة بيبقى اعمارهم ما بين 19 لواحد وعشرين) انهم يضربوا رصاص على روس الاطفال الرضع اللي ما حصلوش تلات شهور من مسافة اقل من نص متر، وعلى فكرة طنط وداد ما اضطرتش يلبسوها حجاب في الانتخابات زي ما الست السكرية ليفني لبسوها حجاب غصب عنها عشان تنجح في الانتخابات وياريتها نجحت هو مقعد واحد اللي تقدمت بيه وبرررررررررررضه بيبي هو اللي ح يشكل الوزارة
لا وعارف كمان ايه، ولا حتى شهيناز النجار عملت قردة عشان تكسب الانتخابات، ولا لسنوا عليها وقالوا عليها مش بتصلي ومش متدينة مثلا زي ما قالوا على ليفني
انا ما باحبش النصب يا حاج تونة، كون ان المزة عاجباك عشان شعرها اصفر وعينيها زرقا فتقدر تعلق لها بوستر على حيطة اودتك او تحط صورتها على الموبايل بتاعك او حتى تودي التي شيرت بتاعك المطبعة يحطوا لك ام شعر اصفر عليهن نقدر نجيب لك الايميل بتاعها او تضيفها على الفيس بوك، ممكن نوسط لك طارق حجي يجيب لك مرة الموبايل ومسيجات بقى او لو عندك ويب كام تعملوا شات الساعة تلاتة بالليل وهي بت شقية يعني، بس الخوف بس انها لا مؤاخذة بتحب الشيباب الصغننين، شفتها انا وهي عمالة تلقح راسها على كتف العيل اللي من دور عيالي انا، يعني من دور احفادها ممكن نضرب لك باروكة صفرا وبنطلون جلد احمر وبلوزة هاي كول فتافيت السكر عشان تعجبها وترحمنا احنا لكن ده لا يسوغ انك في سنك ده تنصب علينا، الحملة الانتخابية للكيان الصهيوني اثبتت مدى تخلف وعته المجتمع ده، اولا غير ان الاحزاب بتاعتهم كده: يمين متطرف، يمين، يمين معتدل! معلش احنا دلوقت بنمر بأسوأ مراحل تاريخنا من ايام الملك مينا موحد القطرين ومع ذلك مين في الدنيا يلبس مرشحة حجاب بالعافية عشان رايحة تزور مثلا الاخوان المسلمين؟ يالهو بالي، ده كان زمان الكل شرشح وشنشل وزغرد ورقع بغطيان الحلل
مين في الدنيا يترشح للانتخابات المزورة بتاعتنا دي وفي الحملة الانتخابية منافسيه يقولوا: مش بيصلي
يا لهويييييييييييييييييييييييييييييييييييييي، ده اللي يقول كلمة زي دي كان زمانه متعلق من ودانه في ميدان عام
ويعني ايه رايحة تقابل المتدينيين؟ دي انتخابات، يعني مثلا في الانتخابات المضروبة بالنار بتاعتنا حد بيروح يقابل الطريقة الاحمدية؟ وللا شيخ الازهر في الحملة الانتخابية بتاعته؟ ده ايمن نور راح قابل المرشد العام للاخوان المسلمين ودي جماعة سياسية ما اسمهمش المتدينيين ولا حاجة وعملوا له فضيحة مع ان يعني ماحدش بيلبس حجاب وهو بيقابل المرشد ولا حاجة
ثم ايه الحملة الانتخابية بتاعتهم: ح اقتل الفلسطينيين، لا انا ح اقتلهم اكتر، لا بقى ده انا لسة قاتلاهم اهو، لا ما قتلتيش كفاية
لا سمعنا عن خطة اقتصادية ولا اجتماعية ولا اي اصلاح سياسي ولا اصلاح في التعليم ولا تنمية ولا اي حاجة، دي دولة شحاتة عايشة على المعونة والمعونة اهو، الاسرائيليين نفسهم بيقولوا عايزين نعرف بتروح فين؟ احنا عندنا فقر، اغبيا مش عارفين بتروح فين؟ بتروح لقنابل الدايم
هي دي انتخابات؟ وللا دي دولة؟ 
يعني فيه دولة في الدنيا العالم كله عرب وادانب واقفين وراها يساندوها ولحد دلوقت مش عارفة تعمل حاجة عليها النطلة حتى انتخاباتها كلها بتدور حوالين مين اللي ح يقتل اكتر وبس عمالين ينزلوا فيديوهات على اليوتيوب يقولوا احنا اللي عاملين جوجل واحنا اللي عاملين ميكروسوفت واحنا اللي خلقنا ادم وحوا بلطجة كده زي ما بيقولوا احنا اللي بنينا الاهرامات طب فين؟ مش نشوف؟ ادي الجمل وادي الجمال، مش لما حاجة بتتعمل في دولة ظرمبيح بيتكتب عليها صنع في دولة ظرمبيح؟ وللا ده انكار ذات ده وللا ايه؟ واذا كان بيصنعوا كل ده وهم اللي خرموا التعريفة ومخبيين عشان الناس لما تشوف مكتوب عليها اسرائيل مش ح تشتريها يبقى اسخم وانيل، يعني هم عارفين انهم مكروهين من المستهلكين في العالم كله بالرغم من دعم كل حكومات العالم ليهم باستثناء تلات اربع دول
انا عايزة افهم ايه اللي عند اسرائيل تتحسد عليه؟ ده احنا اللي بقينا عبرة خلقه وانا اقصد مصر بالذات مش بقية الدول العربية، وبقى الدنيا كلها عمالة تتفرج علينا من كتر اعاجيبنا وتهييساتنا حالنا احسن على الاقل مش بنموت اطفال بايدينا، اه بنساعد يعني، بس مش احنا اللي بننفذ
على الاقل يوم ما يترشح لنا واحد، لو بقى عندنا انتخابات، مايقدرش يقول انا ح اقتل ويتساب كده ناهيك عن انه ينتخب اساسا
ده الفلسطينيين اللي ما عندهمش دولة كان عندهم برامج انتخابية فيها تنمية ومحاربة فساد وخطط اصلاح سياسي واقتصادي
على قولك، بلا خيبة
بلا خيبة في السن ده، الناس بتكبر تعقل وللا تتجنن؟ هو حلمي التوني محتاج يقدم على وظيفة في الخارجية الاسرائيلية دلوقت؟ وللا ده طلب معاش ده وللا ايه؟  

Friday 13 February 2009

هو عوكل وعاطف السكري بيعملوا ايه؟

هو ايه حكاية ان عوكل وعاطف السكري بيسعوا لخلق شرخ اوسخ جديد دي؟ واحد ماسك ودن تركيا وواحد ماسك ودن امريكا وودود ودود ودود؟ بيقولوا بيتفقوا على شرخ اوسخ فيه اسرائيل ومافيهوش ايران! ح امووووووووووت واعرف ايران عملت لهم ايه؟ من باب حب الفضول على راي ام زينب، مافيش غير نظرية شاندوشت المربى اللي سرقه واحد ايراني من عاطف السكري وهو في المدرسة وممكن تبقى كان مربى بلح باللوز في عيش فينو وعينه كانت ح تطلع عليه
بيهببوا ايه دلوقت، يا جدعان هو احنا كل واحد ييجي يهبب لنا الدنيا ويموت؟ والاتنين اللي هببوا الدنيا قبله كل واحد مات بعدها بتلات سنين....ربنا يعدي التلات سنين اللي جايين دول على خير، على الله اكون مت قبلهم....ياخد من عمري ويديكي يا روزيتا
وبابا الفاتيكان اعتذر لليهود عن المحرقة تاني..قصدي عاشر..قصدي خمسمية سبعة وخمسيني طب واحنا مين ح يعتذر لنا على كل اللي العواكل بيعملوه فينا ده؟ 

Thursday 12 February 2009

الاستاذ فتحي محمود كتب عننا تاني

ربنا يكرمه ويفتح نفسه زي ماهو فاتح نفسنا، الاستاذ فتحي محمود كتب عننا تاني وجو بعت لي المقال
أمل الأمة







منذ سنوات قليلة فشل وزراء الاعلام العرب فى تنفيذ خطة اعلامية اتفقوا عليها كانت تستهدف مخاطبة الرأى العام العالمى، وكان سبب الفشل هو عدم التزام معظم الدول العربية بدفع حصتها فى المبلغ الذى تم تخصيصه لتلك الحملة وهو 20 مليون دولار.



بينما نجح عدد من المدونين بجهد شخصى فى التواصل مع بعض قطاعات الرأى العام العالمى، وفضح المجازر الصهيونية فى غزة، سواء عبر مدونة "نيو هولوكوست" التى تم تأسيسها باللغة الانجليزية، أو بالتواصل المباشر مع بعض المواقع العالمية.



وعندما أشرت الي هذا الموضوع الأسبوع الماضى لم يكن الهدف هو الاشادة فقط بهذا الشباب المبدع، وانما تنبيه الشباب العربى الى وسيلة مهمة يستطيع من خلالها ان يقدم عملا ايجابيا لأمته، خاصة قراء الطبعة الدولية للأهرام فى اوروبا والولايات المتحدة الذين يستطيعون تقديم الكثير من خلال خبرتهم فى التعامل مع الرأى العام الغربى.



وقد سعدت أن وجدت كلماتى صدى طيبا لدى هؤلاء الشباب، وأنا اعرف ان مهمتهم تحتاج الى بعض الوقت والصبر حتى تظهر آثارها بشكل فاعل، وهم يطورون عملهم بشكل سريع واستطاعوا اعداد مجموعة من الفيديوهات التى تتضمن مشاهد مشتركة من الهولوكوست الصهيونى والهولوكوست النازى، داعين الى نشرها بكثافة على صفحة اليوتيوب الشهيرة على الانترنت باسم holocaust أو new holocaust، بحيث ان أى شخص فى العالم يبحث عن هاتين الكلمتين على الشبكة العنكبوتية تظهر له هذه الفيديوهات ضمن نتائج البحث.



ونشر المدونون موضوعات كثيرة باللغة الانجليزية على موقع "جلوبال فويسيز" وهو من اهم المواقع الدولية التى تحظى بمتابعة كبيرة، واستغل بعضهم غرف المحادثة (الشات) للدخول فى مناقشات مباشرة مع الشباب الأجنبى، وقد شاهدت تجربة مماثلة خلال فترة عملى فى لبنان خلال وبعد حرب 2006 حظيت بدعم بعض المنظمات اللبنانية، وهو الدور الذى يجب أن تقوم به بعض الهيئات العربية الآن مثل اتحادات الصحفيين والمحامين لدعم نشاط هؤلاء الشباب الذين اصبحوا أمل الأمة.







فتحى محمود



الأهرام 10 ـ 2 ـ 2009

انا مبسوطة قوي من العسل بتاعنا

بصوا بقى احنا بنعمل ايه؟ احنا قاعدين نقول ده مسلم وده مسيحي، وده شيعي رافضي وده سني، وده اخوان وده سلفي، ودي ودني وده شعري، اه يا شعري طلع في ايدي كله، لو بينطق كان رقع بالصوت من كتر ما باشد فيه، ويا ترى يا هل ترى، المسلم الاندونيسي اقرب لي وللا المسيحي المصري اقرب لي، احنا فراعنة وللا عرب، فينيقيين وللا بتنجان؟ لا وفيه شوية عرب صهاينة طالعين لنا في موضة احنا بحر متوسطيين! يعني اذا كنا حيرانين نتبرى من بعض ازاي فهاذوها الامر صعب جدا حيث ان ربنا انعم علينا بنفس الغباوة بنفس المنطلون بنفس الفالنة، فمهما حاولنا نتبرى من بعض الناس ح تبص من بعيد وتقول: اه....مش هم الاغبيا دول؟
وفي نفس الوقت، في نفس ذات شخص عين الوقت نقول ايه؟
"اه، هم اليهود كده، طول عمرهم كده، من زمان وهم كده، من ايام سيدنا موسى وهم كده، من ايام ما رموا يوسف في البير وهم كده، كلهم كده، على مر التاريخ دايما كده وهم كلهم حاجة واحدة لعملك مافيش يهودي له امان ابدا ما تاكليش من الكلام ده"
لدرجة ان احمد المسلماني اللي كان خايف من الاحتلال الفلسطيني لمصر قال ان اليهود اللي ضد الصهيونية دولم بيمثلوا انهم ضد الصهيونية وكلهم متفقين مع بعض يقسموا بعض نص يموت الناس ونص يعترض على تمويت الناس عشان يبقوا هم المعارضة والمولاة ويسيطروا على الدنيا كلها، اه والله قال كدهون مع انه راجل متعلم ومتنور ومعاه شهادات 
يعني سبحان الله، انا جدتي ام ابويا كانت بتقول: ربنا لما يغضب على بني ادم يسلط عليه مخه
صدقت، ماهو لو سلط عليك حاكم ظام مصير الحاكم يموت (ماعدا حاكم واحد كلنا عارفين انه مش ح يموت ولا حاجة) لو سلط عليك فيضان مصيره يخلص لو سلط عليك مرض يا تخف يا تموت لكن لما يسلط عليك مخك دي حلها ايه؟ مالهاش حل صح؟
يعني سبحان الله ولا اله لا الله ولا حول ولا قوة الا بالله منه له جاي رايح منه له
قاعدين نقطع في اوصال نفسنا، ونشتم في تاريخنا، ونتهم نفسنا شوية بالارهاب وشوية بالكفر وشوية بالمسيحية (حيث انها بقت تهمة اكيد) وشوية بالرافضية وشوية بمجموعة الاجية اللي بيستخدمها بعض البلطجية لما يقولوا: القومجية الاسلامجية العروبجية الشماشرجية الاي جية. وفرحانين ومبهورين بان ابن مهاجر كان مدمن كوكايين واسود وحكم امريكا وحاسين انها معجزة لان "امريكا بتدي فرص لكل الناس" بينما احنا من الف سنة مجموعة مش بس مهاجرين دول مهاجرين وعبيد وعملوا عدة دول زي الاخشيدية والمملوكية، وبدل ما نقول: احنا اول حضارة حررت العبيد وعملت منهم حكام بنشتم في نفسنا ونقول احنا الامة الوحيدة اللي حكمها عبيد من اعراق واجناس مختلفة وما حكمناش واحد مننا، طب ما اهو، ما انتوا فرحانين اهو ان ابن مهاجر كان جدوده من طايفة العبيد ومن عرق وجنس مختلف وبيحكم امريكا اهو وبتقولوا امريكا عظيمة عشان ادت واحد زي ده فرصة انه يحكمها اهو
لا
لما تيجي مننا تبقى عيبة، ولما تيجي من غيرنا تبقى انجاز حضاري عظيم
ومش بس كده
لا وفوق البيعة بنخدم الصهاينة خدمة العمر، قاعدين ميت سنة يكافحوا عشان يثبتوا الاتي: ان اليهود كلهم حاجة واحدة وشعب واحد، وان اليهود كلهم يتصفوا بصفات واحدة، وان اليهود كلهم صهاينة حتى لو بينوا غير كده لانهم بيبقوا خايفين من الاضطهاد وعليه فاليهود شعب بلا ارض واليهودية مش مجرد دين زي الاسلام والمسيحية دي عرقية وجنسية، هاتوا لنا ارض بقى، خدوا ارض اهي، بتاعتنا لا مش بتاعتنا
طيب انا مش ح اكلمكوا بوصفي عربية ولا مسلمة انا ح اتقمص شخصية واحد من التبت واقول لكوا انا لو مكانه ح ابص للموضوع ازاي
دلوقت انا واحدة تبتة (من التبت يعني) شايفة اتنين ناس بيتخانقوا مع بعضياتهم، ناس منهم النفر الواحد فيهم شعر شنبه بيتخانق مع شعر دقنه وكل واحد فيهم حيران ينتمي لايه ولمين حيث ان كلهم قرفانين من بعض ومش عارفين يهربوا من بعض ازاي 
والناس التانية بيدعوا انهم حاجة واحدة، والاسخم من كده ان القوم الاولانيين بيقولوا على القوم التانيين انهم كلهم حاجة واحدة على مر التاريخ كله، وان حتى الناس اللي من القوم التانيين دول اللي بيقولوا يا ناس يا عالم احنا مالناش دعوة بدوكهمة برضه جزء منهم بس هم مخبيين
والقوم الاولانيين مشغولين في خناقات شنباتهم مع دقونهم بينما القوم التانيين اللي عندهم طوائف كتير قوي (غير الطوائف الكبرى الاساسية: الرباي والقراي والسامري) ماحدش شايف خناقاتهم مع بعض، ومهما يتخانقوا مع بعض القوم الاولانيين اغبيا ومش بيحاولوا يفكروا في الموضوع ده ويستغلوه صح
طب ما اذا كان الكلام من بق القوم الاولانيين انهم مقسمين نفسهم ستميت حاجة وموحدين القوم التانيين ومأرخين لهم كمان وعاملين لهم جذور عمرها خمستلاف سنة، طب ما يبقى القوم التانيين معاهم حق بقى، ماهم كده يبقوا شعب واحد بقى فعلا، وشعب عريق كمان وعمره الاف السنين، والله بقى طول عمره وحش طول عمره خاين طول عمره مالوش عهد طول عمره لو حلف لك على المصحف ما تصدقهوش ماحدش طلب منك تناسبهم، بس على الاقل طول عمرهم حاجة واحدة من الالاف السنين وعليه فمن حقهم يبقى لهم ارض تجمعهم مدام هم شعب واحد كلهم مسخة تلك الاصل من بعض
ومش من حق القوم الاولانيين يفتحوا بقهم بقى، ولا يفرق معاهم يبقى لهم وطن يجمعهم لانهم اصلا مش طايقين بعض، بالعكس، شيل ده من ده يرتاح ده عن ده
انا زهقت، مين ح يدفع تمن زرع الشعر لما اقرع؟ كل الكلام اللي على ان اليهود حاجة واحدة (حتى لو حاجة واحدة وحشة شيء ما يهمش حد وحشين وحشين وعاجبين نفسهم والله) وكمان على مر التاريخ هو بالظبط الكلام الصهيوني
طب زعلانين ليه من اسرائيل طاه؟ ثم ان حقيقي الكلام ده مش صحيح، مش صحيح، والله مش صحيح، اليهودي الانجليزي انجليزي واليهودي اليمني يمني، مش ممكن اليهودي الانلجيزي هو واليهودي اليمني يبقى طباعهم واحدة ابدا، واليهودي الصهيوني مش ممكن ابدا يبقى زي اليهودي اللي مش صهيوني يا ناس ح يجيلي حمى البحر المتوسط حرام عليكوا اذا كان اهو جوة اسرائيل والبت ليفني السكرية والواد بيبي بتاع المافيا ماسكين في شواشي بعض اهو ونتنياهو بلطجة كده بيقول انا اللي نجحت
ما سمعناش حد بيقول لهم حلوا مشاكلكم الداخلية واتوحدوا ولا حد عايرهم انهم منقسمين زي ما بيعايروا الفلسطينيين
ما جوة اسرائيل ناس بتنزل مظاهرات ضد الصهيونية وبيقولوا احنا اتولدنا هنا واتورطنا حتى الولية اللي بتقول ان النازيين هم اللي عملوا اسرائيل اهو وبرة اسرائيل يهود بيقولوا بتفكيك اسرائيل خالص
واكتر من كده يهود بروكلين دلوقت حالا وانا باكلمكوا معلقين يفط مكتوب عليها
free palestine
ويهود تانيين لهم تفسيرات تانية ضد الصهيونية اهو
ماهو
ماهي احلوت وزهزهت اهي، ايه بقى؟ ايه؟ ايه؟ ليه مصممين نشتم في اليهود كلهم تاني بقى ونقول طول عمرهم كده ولاااااا مهما قالوا لك ده تمثيل في تمثيل هم من جواهم متفقين مع بعضهم ومصممين نوحدهم تحت راية هم مش متوحدين تحتها وكمان نعمم الكراهية عليهم؟ ليه؟ عشان نأكد كلام الصهيونية ان اليهود مستهدفين وانهم لو ما بقوش صهاينة الناس كلها ح تدبحهم لان الناس كلها بتكرههم حتى شوفوا العرب بيقولوا عليكوا ايه؟ بيقولوا كلكوا كدابين وكلكوا حاجة واحدة صح؟ 
صح
صح
العبي يا حاجة العبي
حسبي الله ونعم الوكيل سبحان الله
هو ربنا بيظلم؟ حاشا لله
ربنا ما بيظلمش حد، والله ما بيظلم حد ابدا، كل واحد ربنا بيديله اللي يستاهله