Sunday 25 October 2009

نو مور وور؟ فعلا

حد يقول لي احنا ايه الفرق بينا وبين اي بلد بتحارب؟ ومش ح اسأل ايه الفرق بينا وبين اي بلد تانية في حالة لا سلم لا حرب مع اسرائيل عشان دول حالهم احسن مننا بكتير، ولا نحلم اننا نتقارن بيهم
ايه الوحش في الحرب؟ انها بتموت الناس، انها بتعمل فوضى، ممكن تعمل حرب اهلية، (في حالة لما يبقى فيه احتلال مش مجرد حرب) ممكن تجيب احتلال، ايه الوحش في الاحتلال؟ ناس اغراب عايزين ياخدوا موارد البلد لحسابهم ويستعبدوا الشعب
حد يقول لي ان اللي فوق ده مش موجود هنا في مصر، قولوا لي، يمكن انا بابص بنضارة سودا
احنا بناكل احسن من العراق مثلا او فلسطين وافغانستان؟ بنشرب مية انضف من ميتهم؟ لما الف واحد يموتوا في لبنان على مدى تلاتة وتلاتين يوم في الحرب دي حاجة فظيعة، ازاي بقى مات قدهم في اربعة وعشرين ساعة في البحر عندنا واحنا ما كناش بنحارب؟ حادثة القطر الاولاني مات فيها تلاتلاف واحد في ست ساعات، يعني قد اللي موتتهم اسرائيل في تلات اسابيع في غزة مرتين، من غير قنابل ولا فسفور ولا سحر ولا شعوذة
الاحتلال، خصوصا المودرن ده، بيستخدم اسلحة محرمة دوليا، وحشة في ايه؟ اذا مش بتموت بتجيب امراض وغالبا سرطان
يا سلااااام، واحنا لما ناكل خضار مروي بمية المجاري ده بيجيب ايه؟ حلاوة مولد؟ لما التقاوي بتاعتنا تيجي من اسرائيل مسرطنة، ده اسمه ايه؟
العدد المهول من الاطفال المرضى بالسرطان اللي انفجر في وشنا فجأة ده ايه؟ يعني لو كنا انضربنا بقنبلة ذرية ما كانش كل العيال دي جالها سرطان، تلت سرطان الاطفال في العالم موجود في مصر
حرب اهلية؟ الصعيد ما بطلهاش، من ساعة ما الامن عتبه ولحد اخر مرة اتحرق فيها مسيحيين ما بطلتش، هم بس مش راضيين يفسروا في وشنا
ما اعتقدش ابدا ان اللاجئين الفلسطينيين والعراقيين والافغان واليمنيين حالهم اوحش كتير من سكان العشوائيات اللي تعدادهم بالملايين وكل شوية يجروا وراهم بالونش عشان يهدوا عششهم وهم ينزوحوا في حتة تانية ويبنوا عشش تانية
هو احنا مش بقالنا تلاتين سنة عاملين سلام؟ مين اللي رمى القنبلة دي علينا؟ ثم اترمت امتى؟ انا ما شفتهاش
مش ح نتكلم عن سرقة موارد الوطن لحساب الاجنبي واستعباد الشعب عشان مش عايزين قباحة، المدونة دي طاهرة، وح تفضل طول عمرها طاهرة
طب ايه؟ ايه الفرق؟
فيه فرقين:
الفرق الاولاني: ان اللي عنده حرب او احتلال عارف هو بيتعمل فيه كده ليه؟ وعنده قضية، وهدف، وعارف عدوه، وعارف يعمل معاه ايه؟ حتى لما بيبقى فيه خاين بيعرف يسميه خاين وعميل للعدو، بسهولة الحكاية دي بتتعمل، احنا هنا كل ما بنتكلم بيقولوا لنا مافيش داعي للتخوين
ولما ناس بتموت بيزعل عليهم وبيقول شهدا، بس بيبقى فخور بيهم
لكن احنا بنموت فطيس، موت عبثي مالوش معنى ولا معروف حصل ليه ولا حتى ايه؟ يعني تقدر تزعل على ضحايا الدويقة ويصعبوا عليك، لكن ح تبقى فخور بيهم ليه يعني؟ وللا هم حتى يفخروا بنفسهم ليه ويقولوا احنا صامدين ومستحملين؟ عشان ايه الهدف في الاخر؟
الفرق التاني:
نكتة.... كل الدول اللي بتحارب او اللي لا قدر الله عندها احتلال عندها انتخابات
تصدقوا؟
شوف، برضه باقول لا قدر الله
وده الفرق التالت، اننا عندنا كل اعراض الاحتلال وخايفين، بينما اللي واقع تحت احتلال فعلي مش خايف من حاجة، خلاص، اوحش حاجة حصلت له.
طب انا مش عايزة احتلال
انا عايزة بلد.. اصل البلد اللي حيلتي بااااااظط... بااااااظط

15 comments:

MerMaid said...

ازيك يا نوارة؟؟
بصي انا قرفت من البلد دي البلد دي باظت
اللي ماسكها شوية حراميو وخونة و متقوليش مبارك هو السبب اي نعم هو من ضمن الاسباب بس انا رايي الشخصي الخاص بيه ان المصريين هي دي التركيبة الجينية بتاعتهم
هم كدة
تابعين و بيخافوا علي لقمة العيش محدش فيهم بيفكر في مستقبل افضل محدش بيفكر ان انا لما اعتقل واتعذب دلوقتي ان انا كدة ممكن اضمن مستقبل افضل لاولادي وبكرة التاريخ يذكر اني كنت من الثوار
لا محدش بيفكر كدة
كلهم بياخدوا علي دماغهم بالجزمة و يقولوا و مالوا
هنعمل ايه يعني ؟؟يعني اقطع عيشي؟؟ابهدل نفسي؟؟
انا الحقيقة بحس ان المصري ده معندوش هدف ولا حلم ولا امل و لا مستقبل بحس انه بهيمة
معلش كلامي صعب
بس انا مشحونة ع الاخر دلوقتي
كل شيء زبالة محدش بيلمع الا الحرامي او الوصولي المنافق
بنخاف من امين الشرطة
عربية البوليس اللي سايقها معاه سادسة ابتدائي و بنخاف نعدي من جنبه يكسر علينا منعرفش ناخد منه حق ولا باطل
الشرطة عندنا مش لخدمة الشعب بل لذل الشعب
لا استطيع ان اقول اني احب هذه البلد
لاني بصراحة لا احبها في الوقت الحالي

simplymoi said...

Nawara
I can’t give you any suggestions here for I will end up in jail for attempting murder. Minimum 20 years to life sentence. Better keep my mouth shut. Get rid of the bad blood.

AhmedEzzat said...

كل واحد خايف علي الشقه و الموبايل و العربيه ! و الاولاد ياعيني !! بجد ناس تفقع

مواطن مصري said...

الحرب كلمة سهلة يا نوارة

انما هنعاني لو دخلنا حرب

المهم انا بقول ان في فرصة و هي الانتخبات نطلع بطاقة انتخابية و ننزل نتخب

و نختار حد تاني

و دي في المخطط اني قبل الانتخبات هطلع البطاقة و هنزل انتخب المرشح الافضل و البرنامج بتاعة عاجبني

بس عاوزين نقارن كام واحد نزل انتخب اوبما في امريكا و كام

واحد شارك في الانتخابات في مصر

لو بتوع مصر في امريكا كان بوش فضل موجود


المهم هو نطلع البطاقة الانتخابية و نحدد هنختار مين و ننزل نصوتلة

تحياتي

Shady Shrif an Egyptian Software engineer said...

حرام

بجد حرام

انا تعبت نفسيا

اشليت

عاوز انفجر

يا ريت حد يقولي اعمل اية

سيد المعلمين said...

“ كتاب لابد من قراءته
ثورة يوليو الأمريكية” لـ/ محمد جلال كشك
http://www.4shared.com/file/114597815/5c13cfd3/___online.html

حسن على said...

اولا يا استاذة اهو مواطن مصرى افحمك!!!!ومانتيش قادرة تردى غلية وقاللك ان الحرب مش سهلة!!! وانتى كنتى فاكراها سهلة -ايتها الساذجة -...اهو مواطن ضرب كلام نوارة فى مقتل !!!!!!!

فاروق عادل said...

الجميل فى مواطن مصرى انه فاكر اننا لو نزلنا صوتنا لمرشح تانى هيدوا اى اعتبار لاصواتنا

---
فى حاجه ياحبيبى اسمها تزوير

بتنفس حريه said...

سبحان الله كنت لسه بتكلم فى الموضوع ده مع ناس امبارح

وتقريبا نفس الاستنتاجات

°°°°°°°°°°°°°°°°°°°°°°°°°°°°°°

اه انتى صحيح شوفتى عمو€ جيمى امبارح فى لقاءه مع الشيباب

كان حاجه كده بالنسبه لى اشبه بتعذيب الذات

مدونة النسر المصرى said...

حيطلعوه مجنون ابن مجنون

اليوم محاكمة قاتل الشهيدة مروة الشربينى

نحن نطالب بالقصاص العادل يارااااااخ

هتشوفوا said...

أنا سبت البلد اللي باظط

كنت الأول بقول مش ممكن اعيش بره بلدي , وكانوا بيقولولي جرب شهرين تلاتة وابقى ارجع, وجربت ,ودلوقتي بقت الاجازة مش فارقة معايا

Anonymous said...

هي باظت

بس املي انها تتصلح .... لان مفيش اسوء من كده

حضرتك ماكلمتيش عن حادث ديروط يعني

دي حادثه ملهمه .... ومثال يقدر بيه اي واحد يفهم طبيعه الحوادث الطائفيه .... والتعامل الامني .... والتعامل الاعلامي ..... والتعامل الشعبي

كمان ممكن تفهموا الصعيد و تطوراته .... ده لو قدرتوا .... لاني موش قادره افهم الصراحه :D

تحياتي

خواطر شابة said...

انا ليس لدي تعليق على موضوع البوست لكن هنا فقط اسجل احترامي لقلمك ولفكرك وانا متابعة دائمة لكتاباتك حتى ولو لم أعلق

Anonymous said...

بما إن إنتي مش جايباها لبر
ومع إن مدونتي لسه مكتملتش
بس مضطر أشارك بشئ من تأليفي
ممكن يكون ساذج بس بيعبر عن اللي أنا شايفه و خلاص
وبما أن إنتي لسه متخطفتيش
وده مطمني وبيشجعني أتكلم هقولك : ـ

إحصائنا ولحد اليوم
قال إننا 80 مليون
إن مات منا شويه كتيير
كل عشان العيله يهون

وأهو شوفوا يا حبة طرطير
ياللي ما ينفع يحكمكوا خفير

دي مامتنا دي حنان وضمير
مع إن أشغالها كتير

و بابانا مابيدوق النوم
لصالحنا ولحد اليوم
بيدعبس وبمخ كبير

أما خليفته فغير الغير
ده حبيبنا وحارس و أمير

وبجد ده فارس مغوار
وناقص له بردعه وحمار
ويحرر كل الأقطار

وتعالوا نشوف الكرمات
في صعيدنا بانت بأكيد
ميه وصرف وكهربانات
وكمان بقي ليهم تعليم
فبلاش ظلم وهرطقنات
داحنا في عصر الإنجازانات

محصولنا بقي فيه تطوير
وبيطخن يكبر ويصير
م الصرف كأنه خاوزيق
خلي الشعب يهيص ويطير

لا تقل لي أسلحه بيلوجيه
ولا تقل لي أسلحه نوويه
ولا تقل لي حتي كيماويه
دي بلدنا سبقت بكتييير
جـاموسـتـنا بتموت 100

ف إوعوا تقولوا مفيش تطوير
وإوعوا تقولوا ده في تطويل
الخطه قدامها كتيير
ألفيه وليست خمسيه
ما هو فيها من الهم كبيير

وشهاده وأقولها بجد
و ف نفسي وما بخاف من حد
العيله وبجد بجد
لـهي مره كانت أنانيه
ولامره كانت حرميه

بتاكلها بدقه وطعميه
والعيشه علي أد الـ أد



وفي نهاية سمينار رحلتنا
نتمني لأفراد عائلتنا
الـدهـيـه وزوال العافيه
وخليهم مـاسـكـيـنـه بالعافيه


جميع الحقوق محفوظه لشخصي المتواضع
ومسموح بنشرها نقلا عني

ربـنـا يـسـتـر

منظور شامل للحياة السعيده said...

اتفقعتي

ففكرتي

فكتبت

فشملتي و اوجزتي

انا رأيي دايما

كل حاجه و اتعملت فينا خلاص

هوا احنا لسه خايفين او مستنيين ايه؟