Monday, 26 October 2009

بالنوسبة لحكاية "الطفل الاعوجبة" دي

اولا وقبل اي حاجة، احب اسجل اعجابي الشديد بالاعلام العربي وسعادتي بحرصه، واحب اسجل فضيحة رويترز والديلي تليجراف وعدم موضوعيتهم وسفاهتهم
لان الاعلام العربي لما وكالة نوفوستي كتبت ونزل فيديوهات عن الطفل الداغستاني اللي زعمت ان بيظهر على رجله آيات قرآن، تناولوا الموضوع بمنتهى الحرص، ونقلوا الخبر بموضوعية من غير ما يهللوا له ولا يدوا له حجم اكبر من حجمه، لان لسة الاطباء ما قرروش ده ايه
ده غير ان فيه قنوات رئيسية تجاهلت الخبر لحد ما يتأكد، زي الجزيرة والعربية. وده حرص مبالغ فيه، محمود، لانهم عرب واي حاجة ح تتحسب عليهم
في المقابل، الديلي تليجراف ورويترز نقلوا الخبر، بس نقلوه كأعجب ما يكون، اولا مافيش جملة خبرية واحدة في الخبر، واحد بيكره المسلمين كره العمى، استخدم لغة الاستهزاء وحط كلمة "معجزة" بين علامتين تنصيص مع ان نوفوستي ما قالتش معجزة، وقعد يتكلم عن اليأس المسيطر على المسلمين، والعنف الاسلامي المتزايد في داغستان، ثم ختمها بالمقتطف ده
Though divine "miracles" are common in Christianity -- such as weeping icons and stigmata, bleeding wounds in the hands and feet similar to those of Christ -- Islam rarely has them.
هههههههههههههههههههههههههه
لا حول ولا قوة الا بالله، والظاهر يا اما ناقلين من بعض يا اما هو صحفي واحد وبيعمل سبوبة في مكانين لان المقتطف ده نازل في الاتنين.
طيب يعني رويترز والتلجراف بيتخانقوا مع مين دلوقت؟ بيتخانقوا مع نفسهم
اولا: احنا مش بنصدق في المعجزات، ما عندناش معجزات في الاسلام وكلمة معجزة دي مش مذكورة في القرآن بالمعنى ده، مذكور وما أنتم بمعجزين في الأرض، ودي مالهاش علاقة بالمعجزات
احنا مؤمنين بالايات، والايات دي في النفس اللي طالع وداخل، مش لازم تبقى حاجة غريبة، المفروض اننا مؤمنين ان كل حاجة في الدنيا غريبة ولازم نتأملها، حتى النشاط اليومي بتاعنا
والمعجزات دي، وفقا للتصور الاسلامي، ربنا كان بيبعتها للانسانية لما كانت بدائية، بس بنزول الاسلام خلاص، والرسول قال ما معناه لو واحد قال لكوا فيه إله غير الله كدبوه ولو شفتوه ماشي على المية، عشان الفيصل في الايمان الاسلامي مش اللي بيمشي على المية، الفيصل هو ان الناس تستخدم عقلها
هم اللي قالوا معجزة، لا نوفوستي قالت معجزة، ولا احنا قلنا معجزة، ده الاعلام العربي ادا الخبر ادنى اهمية على الاطلاق
ثانيا: هههههههه هو حد جاب سيرة المسيحية دلوقت؟ ايه يعني اللي كاتب الخبر بيقول لنا معجزاتنا اكتر من معجزاتكوا؟ هههههه طيب يا حبيبي معلش ما تزعلش
ده حتى الايات المكتوبة مش جايبة سيرة المسيحية في حاجة
ثالثا: ايه لزوم قلة الادب واليأس والعنف الاسلامي؟ ايه دخل ده في الخبر؟ انتوا شفتوا نوفوستي نقلت الخبر ازاي، انقلوها زي ما هي نقلتها، والحقيقة الاعلام العربي اللي منهم اهتم ينقل نقل بالظبط من نوفوستي زي ما هي وقال ان مصدره نوفوستي، ايه دخل "العنف الاسلامي" في داغستان في الموضوع ده؟
وانا عمالة اكرر واقول الاعلام العربي، لان المسلمين الغربيين اهتموا نفس الاهتمام الهيستيري بالخبر بنفس طريقة رويترز والتليجراف بس في الاتجاه المعاكس، يعني انا متعمدة اقول انها مسألة ثقافة مش مسألة دين، ومش باقول كده من جيبي دي حقيقة
الاتنين، المسلمين والمسيحيين الغربيين بيتكلموا في الموضوع على انه حاجة اصلا مهمة، وقاطعة وبيتناقشوا على الاساس ده، وبينقلوا الخبر بدون ادنى موضوعية ولا مهنية
وانا شخصيا مبسوطة قوي من رد الفعل العربي عشان ده مؤشر تطور في طريقة التفكير، خلينا نبقى صرحا، لو ده خبر نزل من عشر سنين ما كانش رد الفعل العربي ح يبقى بالعقلانية دي، بس الظاهر كتر الاسية علمتنا
والظاهر كمان ان الحضارة الاوروبية في تآكل لما يوصل الامر باهم وكالة اخبارية في العالم انها تنزل خبر بالطريقة الخزعبلية دي
ده بالنوسبة للمهنيين
بالنوسبة للبلوجات واليوتيوب بقى، اللي هو رد الفعل الشعبي، برضه رد الفعل الشعبي العربي اكثر تطورا بكتير من رد الفعل الغربي على الجانبين
يعني مثلا المسلمين العرب كتير منهم علقوا بانهم متشككين في الكلام ده، وناس حاولت تستخدم المنطق، سواء منطق ديني او علمي، لتفسير الخبر، فيه اللي قال: ربنا ح يعمل كده ليه يعني؟ على رجل عيل يكتب قرآن؟ وفيه ناس قالت: اكيد فيه تفسير علمي للموضوع، وفيه ناس قالت: استنوا شوية اما نشوف الدكاترة ح يقولوا ايه. دي معظم التعليقات اللي كتبت بالحرف العربي
وما شفتش مسيحي عربي واحد دخل يقول: معجزاتنا اكتر من معجزاتكوا دي اللي كتبتها رويترز ابدا. ما علقوش خالص. مع ان لو كتبها معلق مسيحي مفهومة، لكن لما تكتبها وكالة تبقى مش مفهومة خالص
وانا شايفة برضه ان ده رد فعل عقلاني جدا من الجمهور العربي سواء مسلم او مسيحي، دول جمهور عادي من اللي بيعلق
فيه ناس قالت: سبحان الله. وام زينب قالت لي: مش عايزة اشوفه، انا باخاف من الكلام ده. هههههه
البلوجات بقى المكتوبة بالانجليزي سواء من مسلمين او غير مسلمين اتسمت برضه برد الفعل الهيستيري، المسلمين يقولوا للناس: اسلموا بقى. واللي مش مسلمين يقولوا للناس: ده انتهاك لحقوق الطفل انكم تصوروه بالطريقة دي. ههههههه، والخناقة ما كانتش بين مسلمين ومسيحيين بس، الملحدين الغربيين تعليقهم كان
I am not ready to believe in shit
اظن احنا كمان عندنا ملحدين، وانا شخصيا ما شفتش حد منهم علق التعليق ده
طب كويس، انا مبسوطة مننا، وده برضه له تفسير علمي، ان فعلا المعاناة اللي عاناها العرب طبيعي تدفعهم دفعا انهم يحكموا عقلهم ويبقوا اكثر حرصا
والقوة المبالغ فيها اللي في الغرب طبيعي تبث فيهم احساس انهم بتوع ربنا وربنا بتاعهم وانهم فوق البشر وده بينتج عنه غرور وصلف يوقع الواحد في الغلط ويخليه يرتكب اخطاء مهنية ما يعملهاش عيل عنده خمس سنين
والتفسير بقى التاني
ان العرب فعلا عندهم مشاكل قد دماغهم ومش فاضيين حقيقي للكلام ده
بينما الرفاهية بتخلي الواحد فاضي يسفسط، ودايما الامم لما بتوصل لقمة الرفاهية بتبتدي تتآكل، واحد علامات تآكلها انها تنغمس في السفسطة، دول حتى سموه "جدل بيزنطي" في اشارة الى انشغال القصر البيزنطي في جدل عقيم والعدو على الابواب من كتر ماهم سكرانين بالقوة والرفاهية
نيجي بقى للطفل المعجزة
انا في الاول ما اهتميتش قوي لسبب بسيط، حاجة زي دي لا ح تنقص ولا ح تزود، المسلم مش محتاج معجزة، واللي مش مسلم ومؤمن بدين تاني ممكن يفسرها على ان الشيطان هو اللي بيعمل كده، واللي مش مؤمن بديانة ح يقول يا اما معمولة يا اما لها تفسير علمي. ماحدش بيغير معتقده عشان حاجة بسيطة زي دي.
طيب انا متشككة في موضوع الطفل ده، وعندي احساس، ربنا يسامحني لو كنت ظالمة فيه، بيقول ان دي معمولة
بالرغم من ان الخبر بيقول
Medics deny that the marks are from someone writing on the child's skin.
بس الله اعلم، ممكن يكون الدكاترة صح، وممكن يا حمير يا كدابين، ليه بقى؟ لأن ربنا لو ح يكتب قرآن مش ح يغلط فيه
بصوا على الصورة دي


بصوا بقى على اخر كلمة على رجل الواد، اللي هي مفيدة شوية دي؟ اييييوة
"علم"
غلط
الآية في سورة الاعراف بتقول: ولنقصن عليهم بعلم
مش
علم
الله اعلم
يمكن الصورة مش جايبة حرف الباء، بس انا فعلا مش شايفاه، ومش باين ان فيه حرف قبل العين والا كانت ح تبقى مقفولة، ولو الكاميرا جايبة الصورة صح، يبقى فعلا الاب والام هم اللي عاملين الحكاية دي لاي اسباب بقى
وبرضه ياعيني الله يكون في عونهم في داغستان واخدين بالجزمة ونفسهم يترحموا، فممكن يكون الاب والام تفتق ذهنهم عن الفكرة الجهنمية دي
وعموما الدكاترة ح يقولوا، لو دي حاجة مكتوبة فعلا على جلد الواد بمادة تسبب الالتهاب ح يقدروا يعرفوا
في كل الاحوال، انا بس حبيت اسجل اعجابي برد الفعل العربي

28 comments:

مواطن مصري said...

انا اول مرة قريت فيها خبر على اسلام اون لاين

و الخبر كان كلة هجوم على العلمانين بانهم كفرة

و طبعاً من خلال الخبر انا مصدقتش ولاكلمة من الخبر لائن اسلوب الكتابة واضح مهاجمة العلمانين

و الخبر شكلو متفبرك من الاول

و الله أعلم

مواطن مصري said...

و مش بعيد الخبر يطلع زي بتاع سيفون سبورت بتاع ميزو

mido said...

الحروف فى حالة الولد ده بتظهر و تختفى

يعنى ممكن تختفى فى وقت و تظهر فى وقت تانى

ممكن يكون ده سبب اختفاء بعض الحروف و يمكن تكون ظهرت بعد فترة

مهندس حر said...

أنا متفق معاكى تماما فى كلامك و خصوصا فى الجزء الأخير .. المؤمن حقا ليس فى حاجة إلى إشارات من النوع ده و غير المؤمن هيكون عنده دائما مليون سبب و طريقة للتشكيك فيها و بالتالى مش هتغير موقفه .. لكن فيه ناس بتحب الحاجات دى و بتفرح بيها و بصراحة ساعات ما بحبش أضايقهم لأن بالنسبة للبسطاء - عقليا مش أى حاجة تانية - مفيش ضرر من الإعتقاد بصحة هذه الأمور و مفيش داعى لإزعاجهم بالجدل فيها ..

فى المقابل أنا لا أقبل من غير البسطاء .. يعنى من المتعلمين و المثقفين إنهم يسارعوا لقبول الحكايات اللى من النوع ده من غير ما يلاقوا سند و دليل واضح .. و السبب إنى بقفش تحديدا فى الحكاية دى مش إنى مستبعد تماما فكرة إن ربنا إذا أراد لحكمة نجهلها ممكن يخرج للناس آية من النوع ده .. و لكن لأنى بتعفرت من غياب العقلية النقدية عند الناس .. و دى آفة سيئة للغاية لأنها بتخلى شيوع الشائعات و الأفكار الخاطئة و أنواع الضلالات المختلفة أمر سهل جدا ..

جبهة التهييس الشعبية said...

ايشي خيال يا ناس
انا قريت الخبر ده في عدة طرق وكباري بالعربي والانجليزي وهبشت في الفرنصاوي برضه
ما لقتش ولا كلمة على العلمانيين واتهامهم بانهم كفرة يا مواطن
انت بتجيب الكلام ده منين

وهو مش زي سيفون سبور لان سيفون سبورت كان هزار لكن ده مش هزار

ميدو
لو فيه حرف مختفي ما كانش العين يبقى شكلها كده كانت تبقى مقفولة
وعموما الله اعلم
هي زي ما قلت حاجة مش مهمة قوي
انا بس اللي همني هو التغطية الاعلامية
واستغربت ان التغطية الاعلامية العربية اكثر مهنية

جبهة التهييس الشعبية said...

لا والله يا مهندس

انا شايفة ان رد الفعل المرة دي متطور جدا
حط كل حاجة في سياقها واعمل نسبة وتناسب
من عشر سنين ما كانش ده ح يبقى رد فعل المسلمين العرب ابدا
ولا كان ح يبقى رد فعل الاقباط مثلا
ومن عشر سنين ما كانش رويترز تكتب خبر بالفشل ده

فيه تقدم من ناحيتها وتآكل من ناحيتهم
وبصراحة انا فرحانة وشمتانة في نفس الوقت ههههه

Sahran said...

عزيزتي نوارة

بالنسبة لموضوع الرسم فقد دار فيه نقاش على أحد البلوجات لأخ مصري
https://www.blogger.com/comment.g?blogID=3478212430908499807&postID=2773688221451477989

ولكن على العمو , فهذه ليست المرة الأولى ولن تكون الأخيرة التي يتم فيها الترويج لهذه الأمور,,,ودائما كان يتم أكتشاف التزييف فيها..

هذه الأفعال هي التي تسيء لله , يعني وكأنه ما بقي مكان في الدنيا ينكتب عليه القرآن غير رجل الولد

سكوت هنصوت said...

انا برضه رفضت إني اكتب عن الخبر والحقيقة اني اصلا ما اهتمتش بيه...يعني ده خبر مش هيقدم ولا هيأخر...وما اعتقدش ان احنا في العصر الي يسلم الناس فيه عشان شايفين معجزة...معجزة الإسلام في منطقه واتساقه مع العقل والحياة...

بس مخدتش بالي من ردود الإعلام المختلفة...حقيقي عندك حق..,يا مسهل...لعل دي تكون نهاية ايميلات الشيخ احمد حامل مفاتيح الكعبة الي هينزل اللعنات على الي مش هيصلي عليه ويرسل الميل لميت شخص...او ميلات الشجرة الي لقوها بتسجد...

جبهة التهييس الشعبية said...

لا ماهو بصي
المجانين ح يفضلوا موجودين طول عمرهم موجودين ومش ح يخلصوا

انا بس زي ما قلت هي نسبة وتناسب وبارصد تقدم موجود

يعني المجانين دول مش مسيطرين على الاعلام خصوصا الاعلام المؤثر ودي حاجة ايجابية
بينما ابتدوا يسيطروا على الاعلام الغربي واعلام المفروض انه مهم وكنا احنا نفسنا بناخد منه اخبار

دي خطوة تقدم من عشر سنين ما كانتش موجودة

بس الراجل ده مش ح يبطل اعملي حسابك

ههههههههههههههههه

هتشوفوا said...

كنا زمان أيام الثانوي, يوزعوا ورق ويقولوا انشروه ل 10 على الأقل يا اما رزقك يقل وكنت مقتنع ان اللي بيعمل الحاجات دي مكاتب التصوير, وكنت بسخر منها جامد, بس المشكلة دلوقتي أني خايف ليكون فعلا رزقي قالل من الموضوع ده, تفتكروا أكفر عن ذنبي ده أزاي,أنا مستعد أرشي الدكاترة اللي هايقولوا,

حسن على said...

الناس بعموم يصبحون فريسة سهلة للاشاعات والخرافات عند تضيق بهم الاحوال. وهناك منتهزوا الفرص يبلعون ريقهم,ولقد جمع احد هؤلاء اربعة ملايين جنية من بيع صورة مطبوعة عن صورة مرسومة باليد لصفى اشجار يكتبان"لااللة الا اللة, محمد رسول اللة" وكتب على الصورة انها حقيقة ووجدت باحد الغابات بالمانيا... التجارة بالدين فى كل مكان للأسف الشديد

مواطن مصري said...

فاكرة موضوع الشجر و الصور الشجرة المباركة

الي ب 10 جنية

و الناس قالت انها معجزة و اية و الكلام دة

نفس الموضوع

بهيج الشرير said...

على فكرة ياأبلتي أيام ماكنت في ثانوي وبداية جامعة كنت بأعمل نفس الحركة دي وكنت بأعملها بشوية حرفنة وأخلي الكلام يظهرعلى دراعي شوية بشوية وفعلا كان في ناس بتصدق أني بأعرف أسحر، حقيقي والله بأتكلم بجد ودي فعلا فكرة قديمة جدا ، تقولي إيه بقى صايع ونصاب من صغري

جبهة التهييس الشعبية said...

بس موضوع الشجرة ده قديم، بقاله عشر سنين تقريبا
وده اللي انا باقوله
في العشر سنين حصل تطور ان الناس ما بقتش زي الاول
ماحدش ح يطبع صورة الولد ده عشان مش ح تبيع لدرجة انها تجيب ملايين

بالنسبة لتعليق سهران
مافيش حد بيسيء الى الله
الاهم من ان القرآن يتكتب على رجل طفل
هو القرآن نفسه
ماهو موجود ومش محتاج يتكتب على جسم طفل عشان هو محفوظ وبين
والامانة تحتم علي اني اقول ان الفكرة دي مش فكرتي اقصد ان القرآن اللي في الكتاب اهم من ايات مكتوبة على جلد طفل
دي فكرة واحد معلق على اليوتيوب
وتعليقات شبه تعليقاته كتير
وانا شايفة ان ده نضج ما كانش موجود بالشكل ده من عشر سنين
ونضج نتج عن معاناة
رب ضارة النافعة، يمكن الجزم اللي بتتحدف علينا من كل ناحية كبرت مخنا

lymona said...

انا مبسوطة انك مبسوطة من الاعلام العربي

donya said...

لاحول والا قوة الا بالله
هو الاسلام ناقص هو مافيش حيطه مايله غيرنا
همه بيسلوا العلم بينا
يعني ربنا سبحانه وتعالي لما يحب يعمل حاجه كده يعملها علي الرجليين!!!!!!!!!!!
ياسااااااااااتر

ماحدش قال لهم ان بموت الرسول زمن المعجزات راح راح وانقضي

*تحياتي

ياسمين حميد said...

ياريت بهيج الشرير يشرح لنا بتتعمل ازاي
انا لما شفتها أول حاجة فكرت فيها انه حناء

Al said...

بارك الله في أطفال موهوبين يحفظون دقائق السير الذاتية لرونالدو وبيكهام وزيدان ويظنون أن عقبة بن نافع هو مذيع خليجي يقدم برنامج ( الاتجاه المعاكس ).‏

بارك الله في كتاب أوفياء لوطنهم يساهمون بإخلاص وتفان في إنقاذه من أزمات سكانية عاتية عن طريق كتاباتهم التي تنشر الضجر والاشمئزاز والقنوط, وتحض الناس على الهجرة إلى الصومال وطلب اللجوء السياسي إليها.‏

Al said...

لقد زارني بالأمس .. ابن خلدون..!!, وكان جائعاً ضجراً يعاني العطش, فأطعمناه همبرغر ماكدونالد وسقيناه كوكا كولا وأطلعناه على آخر أخبار الدنيا من محطة.. الجزيرة ( لهلوبة ، والعبريةواليل الفضائية..!!)، فتجهم وجهه من دون سبب وجيه, واستلقى على الأرض, وأغمض عينيه, ومات مرة أخرى.‏ .. إهنئك على إعجابك بالإعلام العربي الفذ ..!!؟؟

Sonnet said...

السلام عليكم
أنا شاهدت الخبر فى الفضائيات
مرة واحدة
لكن لم أتابعه
بالنسبة للمقالين غالبا ناقلين و غاشين من بعض
مثل التلميذ البليد

Sonnet said...

ربما تكون الصورة غير مفبركة كما الفيديو
لكن هناك امراض كالحساسية يمكن فيها ترك أثر على الجلد بمجرد الكتابة عليه و يستمر الأثر لساعات
و هذا على ما اعرف

Sonnet said...

بالنسبة للاعجاز العلمى
تؤخذ مثل هذه الأمور على انها من اللطائف
لا تبرهن على شئ
من الدين لان نفس المعجزات قد يعرضها كل شخص حسب دينه بنفس الطريقة لاثبات الاعجاز العلمى فى كتابه
في حين انه لا يستدل بها على الايمان اطلاقا
فهل لو جاءني عابد للنار مثلا بمعجزة ساتبعه؟
او اترك دينى لان المعجزات اقل من غيره؟


http://shayunbiqalbi.blogspot.com/2009/04/blog-post_30.html

عبد الزهراء المصري (علي الحسيني) said...

سبحان الله فعلاً .
من يويمن كنت نازل مع صديقي وكنا بنتكلم في الحاجات اللي زي كده وكنت بقول له رب مش محتاج يظهر قدرته على ورقة شجر أو بطيخى أو بيضة .... إلخ إلخ إلخ من كل هذا الدجل .
يكفي إن ربنا سبحانه وتعالى قال {إِنَّ اللَّهَ لاَ يَسْتَحْيِي أَن يَضْرِبَ مَثَلاً مَّا بَعُوضَةً فَمَا فَوْقَهَا فَأَمَّا الَّذِينَ آمَنُواْ فَيَعْلَمُونَ أَنَّهُ الْحَقُّ مِن رَّبِّهِمْ وَأَمَّا الَّذِينَ كَفَرُواْ فَيَقُولُونَ مَاذَا أَرَادَ اللَّهُ بِهَـذَا مَثَلاً يُضِلُّ بِهِ كَثِيراً وَيَهْدِي بِهِ كَثِيراً وَمَا يُضِلُّ بِهِ إِلاَّ الْفَاسِقِينَ }البقرة26 .
يعني من الآخر الأمر منتهي وشخصياً أنا لأ أعتقد بهكذا أشياء لأنها تخالف العقل وتقلل من القيمة الحقيقية للإسلام الاصيل .
أما عن الصحافة والإعلام العربي فهو أصبح حذر هذة الأيام خوفاً من سقوط وأنهيار سيحدث عاجلاً ام آجلاً .

Sonnet said...

http://allergies.about.com/od/urticariahives/a/dermatographism.htm

هذا هو الرابط
عن الديرماتوجرافيزم

ساقرأ المقالين عن الخبر لأحدد رأيى

لكن اعتقد الاهم هو هذا المقال
و هذه هي فعلا المعجزة التى تستخدم العقل لتنتج

http://tabibqulob.blogspot.com/2009/09/biomedical-image-awards-becomes-annual.html

تحياتي

Al said...

.إعلام يحتفى بزغلول النجار وعمرو خالد والحوينى والجوينى والعوا وماهر الجندى وهشام طلعت والشاب تامر وسعد الصغير ودينا الراقصه ويستضيف علماء امثال عبد العال المدلكاتى خبير طب الاعشاب والشيخ سيد مفسر الاحلام الاول فى العالم ..ويحاوره امثال تامر امين واحمد عبدون ..الصحفيون الافذاذ هم ممتاز القط وسمير رجب ومصطفى بكرى وعبدالله كمال .. اصبحنا نصنع تماثيل للمفتش كورومبو و نتجاهل الدكتور احمد زويل مع اننا نتابع تامر وشوقيه .نحتفى بالكابتن ميدو والكابتن زيدان ونهاجم سيد القمنى

The Laundry Man said...

يا أخت نوارة

الحاجات ديت بتسيء للدين الاسلامي أكتر ما بتفيده

الإسلام مش هش للدرجة ديت عشان نحتاج لمعجزات - او حركات نص كم زي دي - عشان يتثبت ايماننا

مش محتاجين لمعجزة تبان قدامنا عشان نؤمن بالله, يكفي اننا نبص لنفسينا كبشر ومخلوقات حية, يكفي اننا نبص للدنيا ومافيها عشان نعرف ان الله حق

عارفة ايه اللي مرجعنا سبعين سنة لورا؟

اننا بنلتفت للقشور وبنسيب الجوهر واللي واضح قدام عنينا بس احنا مش حاسين فيه


وشكرا


شكلي خرجت عن الموضوع ومش عارف انا باتكلم في ايه بس اعذريني, همة كلمتين جادت القريحة الشعرية عندي بوقتها وحبيت اكتبهم

يعني ممكن تشطبيهم او ترميهم بالترعة ان حبيتي

Maha said...

تدوينة أحييك عليها

sonchy said...

لست ملحدا أو علمانيا و لكني أري أن الله لا يحتاج لأن يظهر هذه المعجزة او الآية و ليس هذا ما سيجعل الناس يؤمنوا .. ففي سورة البقرة أذاق الله آل فرعون ألوان العذاب و شهد ذلك بنوا إسرائيل و أنجاهم من آل فرعون في البحر و كفروا و طلبوا ر}ية الله جهرة فصعقوا و أحياهم و أنزل عليهم المن و السلوي و فجر لهم العيون و حمل فوقهم جبل الطور ليأخذ عليهم الميثاق .. و بعد كل ذلك .... كفروا به