Wednesday, 21 October 2009

تهويد القدس وعرفنا... ايه تهويد الفلسطينيين؟

وشاغلين نفسهم قوي بالدي ان ايه يا عيني، ماسكين الناس ونازلين فيهم تحليل، ايه الدي ان ايه اليهودي ده؟ هو فيه دي ان ايه يهودي ودي ان ايه مسلم وواحد مسيحي وواحد بوذي ودي ان ايه ملحد بقى؟
قصدهم دي ان ايه عبراني؟ طب ما العبراني فرع من الاسرة السامية واكيد الفلسطينيين ساميين طبعا واكيد فيهم عبرانيين كتير قوي، مش هم دخلوا مع الفتح العربي بعد ما كانوا ممنوعين من الدخول؟ ومش كل عبراني يهودي ومش كل يهودي عبراني، وراخرين فيه فلسطينيين بياخدوهم على قد عقلهم عشان خايفين يطردوا من اراضيهم، ولا بالبجاحة طالع حاخام يقول: خمسة وتمانين في المية من الفلسطينيين اصلهم يهودي واجبروهم على الاسلام
هو فيه اجبار اكتر من ان الناس تدعي لنفسها دين مش دينها عشان مش عايزين يقفوا على المعابر ولا يطردوا من اراضيهم ويتبني مكانها مستوطنات؟
يعني المسلمين كانوا موجودين وكان فيه مسيحيين ويهود في فلسطين، دلوقت نسبة المسيحيين قلت جدا بعد انشاء الكيان الصهيوني، لانهم طفشوا من معاملة الكلاب، وملايين اللاجئين الفلسطينيين والمهاجرين في الشتات من المسلمين والمسيحيين، وابتدا ناس من اللي قاعدين يقولوا: يهود احنا يهود سيبونا في حالنا بقى
يبقى مين اللي بيجبر التاني؟
وعلى فرض يعني انهم اجبروا من الف وربعميت سنة على الاسلام، ح يجبروهم تاني يبقوا يهود؟
ثم السواركة يهود؟ السواركة يهود ازاي؟ احنا من السواركة، عيلة نجم في الشرقية اسمها نجم السواركة، واصلهم يرجع للجزيرة العربية وجدهم الكبير اسمه عكاشة بن محصن، صحابي. عملوا لهم دي ان ايه وطلعوا ساميين، يا سلام، طب ما احنا عارفين، ده معناه انهم يهود؟
عندهم عادات قديمة من اليهود زي ما المصريين المسلمين عندهم عادات من الاقباط والاقباط عندهم عادات من الفراعنة، ايه الغريب في كده؟
هم مالهم محدثين تاريخ كده؟ ثم عايزين ايه؟ نعم؟
طب كل تحاليل البول دي ما تثبتش حاجة غير ان الفلسطينيين هم السكان الاصليين، وان الاحقية في الارض مالوش علاقة بالدين، ايه مشكلتهم بالظبط؟
هو حد كان منع اليهود انهم يهاجروا عندنا؟ مش كانوا بالفعل بيهاجروا طول الوقت عندنا، ومرزيين واكلين شاربين بيتعاملوا احسن من اهل البلد؟ لو لموا بعض من كل حتة في الدنيا وجم هنا حد كان حاشهم؟ عمرنا طردناهم؟ عمرنا عاملناهم وحش؟ مش هم اللي جم على دبابات انجلترا بالسلاح وطردوا سلالة "الدي ان ايه المقدسة" من اراضيهم وهجروهم وعملوا لهم مدابح؟ عايزين ايه دلوقت؟ وبيقولوا لنا احنا الكلام ده ليه؟ على اساس اننا اللي طردناهم من ارضهم وشردناهم وعايزين ييجوا واحنا مانعينهم؟ والراجل الاهبل اللي في الفيديو قال ايه ماشي في الشارع للفلسطينيين يوزع عليهم ورق عشان "احنا شعب واحد" ياعم شعب واحد شعبين تلاتة احنا عمرنا ما كنا عنصريين ولا قلنا لحد ما تجيش عندنا
وللا يا اما يرجعوا يهود يا اما يكفروهم في عيشتهم؟ وليفني كانت عارفة بقى انها كانت بتقتل اطفال يرجع نسبهم الى "الشجرة المقدسة" وقرايب شعب الله المختار؟ ايه العته ده؟
ايه البجاحة دي؟ بقى احنا اللي شبههم وللا هم اللي شبهنا، طبيعي يبقى فيه شبه جيني بسبب عادات الحياة والاكل، الجينات مش وراثة بس، كمان توارث الاكل والعادات في الحياة اليومية بيأثر على الجينات واليهود والمسلمين عاداتهم واكلهم زي بعض، وطبيعي ان بتوارث العادات دي جيناتهم تبقى متشابهة، طب يجيبوا مسلم صيني متوارث الدين الاسلامي بعاداته واكله ح يلاقوا تشابه في الدي ان ايه مع المسلمين واليهود كمان، ايه الغريب؟ ثم اصلا البني ادمين كلهم بينهم تشابه جيني، ده البني ادمين والخنازير والقرود بينهم تشابه جيني، مش كلنا مخلوقين من مادة واحدة؟ طبيعي، ماهو اللي خلقنا واحد، ايه الدوشة اللي عاملينها دي؟ 
يعني ما خلصناش من تهويد القدس عايزين يهودوا الفلسطينيين بالعافية
طب لو الا لازم كل واحد يرجع لاصله يبقى كلنا نرجع وثنيين بقى، هو ده الاصل
وللا نرجع لآردي ده حتى وسيم
طب مدام عقلهم صغير كده احنا عايزين التحاليل دي بقى نثبت بيها حق الفلسطينيين في فلسطين، وبالذات اللاجئين
اللاجئين يتعمل لهم التحاليل دي ويرجعوا على اساسها بقى، ودينهم هم يختاروه، هو فيه دين مكتوب على الدي ان ايه؟ طب على فكرة اللبنانيين كمان والسوريين، وصدق او لا تصدق، كمان المصريين والاناضول والارمن طلع نتيجة تحاليلهم زي الفلسطينيين وطلعوا كلهم من اصل جيني واحد اهو
يعني الفنيقيين والفراعنة يهود؟ ههههههه، لا بقى، اليهود هم اللي فينيقيين وفراعنة، واحنا عايزين نرجع لبابا امون رع عشان الحزازات بقى، يعني مش ممكن ناس في الدنيا تحول الدين لعرق ويبقى ما عندهمش اي استعداد لتقبل ان فيه بشر تانيين لهم اختيارات تانية خالص كده وكمان عايزين يفرضوا على الناس اختياراتهم وفقا للدي ان ايه:
انت يهودي بس انت اللي مش واخد بالك
وبيتصرفوا زي هتلر بالظبط وعايزين يثبتوا نظرياتهم العنصرية بالعلم زي ما كان هتلر بيأجر علماء عشان يثبتوا ان اليهود اغبيا
الملاحظ ان في كل تحاليلهم دي ما جابوش سيرة الفلسطينيين المسيحيين، ماهو سهل يقتلوهم ويخلصوا منهم، ماهم شوية، المسلمين كتير ومش بيخلصوا، ح يعملوا فيهم ايه؟ يعملوهم يهود
ح يهبلونا والله
اتفرجوا على الهطل الرسمي:




22 comments:

the SeMiTiC said...

في القدس تنتظمُ القبورُ، كأنهنَّ سطورُ تاريخِ المدينةِ والكتابُ ترابُها

الكل مرُّوا من هُنا

فالقدسُ تقبلُ من أتاها كافراً أو مؤمنا

أُمرر بها واقرأ شواهدَها بكلِّ لغاتِ أهلِ الأرضِ

فيها الزنجُ والإفرنجُ والقِفْجَاقُ والصِّقْلابُ والبُشْنَاقُ

والتتارُ والأتراكُ، أهلُ الله والهلاك، والفقراءُ والملاك، والفجارُ والنساكُ،

فيها كلُّ من وطئَ الثَّرى

كانوا الهوامشَ في الكتابِ فأصبحوا نَصَّ المدينةِ قبلنا

يا كاتب التاريخِ ماذا جَدَّ فاستثنيتنا

يا شيخُ فلتُعِدِ الكتابةَ والقراءةَ مرةً أخرى، أراك لَحَنْتْ

مهندس حر said...

أنا ما كملتش الفيديو فمعرفش همه خرفوا قد إيه .. واضح إنهم واخدين مدخل خزعبلى للموضوع و يمكن الهدف هوه إن إذا كانت الدولة الواحدة حتمية فى نهاية المطاف يبقى يحاولوا يخلوها يهودية برضه .. بس ده كلام فارغ و مش لازم نتوقف قدامه كتير أهم من كده إننا مانسمحش للخرافة إنها تنفرنا من الحقيقة التاريخية اللى فى الواقع بتؤيد تصوراتنا التاريخية و بتهدم فكرة الدولة العبرية من الأساس..

الكلام الجد بقى مش مبنى على تحليل الدى إن إيه .. لأن على فكرة الإعتماد على الدى إن إيه فى التفريق بين السلالات البشرية هو أمر غير مثبت علميا .. لأن فى نهاية المطاف كل البشر بيشتركوا فى مجموع جينى يكاد يكون واحد و الفروق الجينية بينهم محدودة جدا بحيث يصعب إستخدامها فى التفريق المؤكد بين سلالاتهم..

الفروق بين الشعوب معظمها فى الفينوتيب .. اللى ممكن فهم الفرق بينه و بين الجينوتايب من المقال اللى إنتى جيبتى لينك ليه .. بس إنتى فاتك منه حاجة دقيقة ضعيرة لأن المقصود هنا هو تغييرات فى ترجمة الجينات إلى صفات شكلية فى حين تبقى الجينات كما هى .. العوامل الثقافية لا تؤثر على الجينات و لكن تؤثر على ترجمة الجينات..

مهندس حر said...

فيه كتاب شديد الأهمية كتبه عالم تاريخ يهودى إسرائيلى هو شالوم ساند و ترجمته للإنجليزية أثارت إهتمام كبير جدا فى الأيام اللى فاتت .. ساند ضد الصهيونية و بيبنى معارضته ليها على أبحاثه التاريخية اللى أثبتت إن العرق اليهودى هو مجرد أسطورة خيالية ليس لها وجود..

ساند يقول إن حكاية إن الرومان طردوا اليهود من أرض فلسطين هى كلام فارغ و إن معظم اليهود فى الواقع فضلوا فى فلسطين و إختلطوا بغيرهم و ذابوا فيهم و تحول بعضهم إلى المسيحية ثم تحول أغلبهم إلى الإسلام .. طبعا الكلام عن إجبار أى من هؤلاء هو كلام فارغ و إحنا فاهمين ده و مش محتاجين نتناقش فيه..

الغالبية العظمى بل و الساحقة من اليهود المعاصرين و ده من كلام ساند لا يمتون بصلة عرقيا ليهود فلسطين و لكنهم أحفاد يهود متحولين إلى اليهودية و أهم المناطق اللى عاشوا فيها اليمن و شمال إفريقيا و جنوب شرق أوروبا و الأخيرة هى منطقة مملكة الخزر اللى ساند بيقول إن كل يهود أوروبا تقريبا من بقاياها اللى هاجرو مع المجر إلى شرق و وسط أوروبا و كونوا الثقافة اليهودية اللى إسمها اليديشية هناك..

يهود أسبانيا كانوا من شمال إفريقيا و هاجروا مع العرب و البربر إلى أسبانيا و سابوها معاهم بس بعضهم إتجه إلى أوروبا الغربية و منها إلى الأمريكيتين..

إذن لا توجد علاقة حالية بين عرق يهودى و ديانة يهودية لأن أغلب من تجرى فى عرقهم دماء من أصول العبرانيين هم حاليا ليسوا يهود و أغلب اليهود ديانة ليسوا من أحفاد العبرانيين و بالتالى مالهمش حقوق فى أرض فلسطين..

الخوجة said...

يعنى الدى ان ايه لليهودى مختلف عن بقية البشر.
احذروا .احذروا
Tainted nightmare - مصل أنفلوانزا الخنازير طلع مضروب و عبارة عن سلاح بيولوجى

مواطن مصري said...
This comment has been removed by the author.
soreal said...

أموت واعرف أزاي الواحد ممكن يعرف شكل الجين الكهاني ده عشان يقارن بيه ..

ما فيش وقت دلوقتي عشان أكمل بقيه الفديو ...ولذلك لي عوده

جبهة التهييس الشعبية said...

The Semitic

الله يروق بالك عشان خليتني افتتح يومي بتعليقك الجميل

:)


مهندس حر
لا مش عادات ثقافية يا مهندس عادات بدنية
انت لو بتدخن وخليت ابنك يدخن وابن ابنك يدخن بعد شوية ح يبقى في السلالة الجينية بتاعتك
لو بتاكل اكل معين متوارث طبيعة الاكل بتأثر على تكوين الجسم
البدانة ممكن تتوارث بسبب توارث عادات واكلات معينة
وهكذا
توارث الطباع ده لسة فيه كلام بس اللنك اللي انا حاطاه بتاع الايبيجيناتيكس بيقول ان العادات المتوارثة وطبيعة الحياة المتوارثة بتأثر في تطور سلالة معينة

بس انت كلامك مظبوط ان الفروق الجينية بين البشر قليلة جدا وزي ما قلت احنا بينا وبين الحيوانات والنباتات كمان صفات جينية مشتركة

وانا متفقة معاك ان مافيش امة بتتكون من تحليل الدي ان ايه؟ دي حاجة ارتيفيشال جدا زي ما الفكرة الصهيونية اتأسست بشكل صناعي فكرة الدي ان ايه لها شكل صناعي كمان

وانا جايبة ورقة البحث اللي اليهود هاجوا وماجوا عليها واتنشرت في نشرة علمية واتشالت تاني يوم لانها بتقول ان بعض اليهود والفلسطينيين والاناضول والارمن والمصريين واللبنانيين والسوريين مشتركين في صفات جينية واحدة

وده معناه ان مافيش حاجة اسمها عرق يهودي

يعني لو الفلسطينيين واللبنانيين اصلهم يهودي

طيب الاناضول والارمن والمصريين
المصريين عمرهم ما كانوا يهود، دي تقريبا الديانة الوحيدة اللي المصريين رفضوها، ده كل ما كان حد يجيب لهم دين يقولو: حلو حلو.. هاتوه ده

الا اليهودية

وده دليل على ان مافيش عرق يهودي

عشان كده حاربوا البحث وهددوا الفريق اللي عمل البحث وبالفعل رئيس الفريق العالم الاسباني جات له تهديدات بالقتل

واللجوء الى الدي ان ايه بالطريقة المضحكة دي دليل على حوستهم

لانهم ادعوا ان لهم ثقافة بتوحدهم

ولما تبص على ثقافتهم المزعومة بتلاقي ان ده كلام فارغ
اليهود الشرقيين لهم ثقافة شرقية
واليهود الغربيين لهم ثقافة غربية
اذن هم ولاد المجتمعات اللي جم منها ومالهمش ثقافة مميزة

قالوا بيوحدهم الدين
بس مافيش اي دين تاني له وطن قومي
يعني هم بيضربوا مثل بالفاتيكان ومكة بس مافيش اي وجه مقارنة
دي اماكن مقدسة لكن لا الفاتيكان وطن قومي للكاثوليك ولا مكة وطن قومي للمسلمين
ثم ان لا مكة ولا الفاتيكان عندهم سلاح نووي
ولا مواطنيهم مستوردين من برة

اخر حاجة طالعين فيها موضوع الدي ان ايه
ولو مشيوا يحللوا لكل الناس بالطريقة دي ح يطلع في الاخر ان العالم كله يهودي
بلاش
طيب احنا والقرد متشابهين بتسعة وتسعين في المية من الجينات

يعني القرد يهودي؟

الخوجة
تشكر على اللنك


مواطن مصري

بالظبط يا مواطن
فعلا الاب الحقيقي للصهيونية هو هتلر مافيش كلام

مواطن مصري said...
This comment has been removed by the author.
جبهة التهييس الشعبية said...

اه صحيح يا مهندس حر

لا ناخد الكلام بجدية ونقف عنده

احنا اخدنا الفكر الصهيوني باستخفاف وما صدقناش من كتر ما الكلام وهمي وادي النتيجة

مش لازم كل مرة نستنى لما الحاجة تكبر وتستفحل

هم معاهم فلوس، ومعاهم سلاح، ومعاهم البحث العلمي العالمي في جيبهم واللي بيخالفهم بيهددوه زي اصحاب البحث ده

وزي ما طمسوا حقايق كتير مافيش حد عارف انها حقايق غيرنا وبقية العالم مصدقهم

يقدروا يطمسوا حقائق تانية

وما تقوليش ده علم

العلم لا يكيل بالبتنجان

احنا كنا اتكلمنا قبل كده ان العلم لما يبقى مش مستقل ممكن يستغل ويتزور كمان

هو فيه حاجة اسمها جين الكهان؟

والنبي تشوف يا مهندس بقية الفيلم ارجوك

مطلعين واحدة في المعمل المفروض انها عالمة ظراط كبيرة بتقول: جين الكهان اللي عند الاشكيناز موجود عند الفلسطينيين
ونقدر نستنتج ان الفلسطينيين من سلالة الكهان
طب جين الكهان ده اصله ايه؟

جبهة التهييس الشعبية said...

ونسيت اقول لك كمان

فيه واحد امريكي يهودي قال لي ان فعلا فيه فلسطينيين دلوقت بيروحوا يحولوا لليهودية بالذات من الفلاحين اللي من عرب الداخل عشان خايفين ينطردوا من ارضهم

وقال لي انه لما راح شاف بنفسه مجموعة من الفلسطينيين الحاخامات كانوا واخدينهم يعملوا لهم تحليل دي ان ايه وبعد ما بيخلصوا التحليل بيختبروهم في اليهودية

قلت له مؤمنين فعلا؟

قال لي مؤمنين ايه؟ هو فيه حد بيآمن بدين صحابه بينزلوا عليه قنابل؟ هو خايف ينطرد

والحاخامات عارفين كده ومطنشين، مدام ح يبقى يهودي مش مشكلة

جبهة التهييس الشعبية said...

soreal

سبحان الله

وانت بتكتبي تعليقك كنت باكتب لمهندس نفس التعليق

وانا كمان

نفسي اعرف شكله جين الكهان ده؟ مربي دقنة ولابس برنيطة سودا؟

هههههههههههههههه

جبهة التهييس الشعبية said...

مواطن

انت رايح الجيش
:((

ح توحشني والله العظيم

مين ح يحرق دمي؟

:""(

جبهة التهييس الشعبية said...

ثم انا متأكدة مية في المية ان السواركة مالهمش اي علاقة باليهود

لان السواركة موثقين كويس الانساب اسم اسم مش ساقط منهم ولا اب ودي من القبائل النادرة جدا اللي مدونة اسماء كل جيل

مواطن مصري said...

انا مكنتش متوقع ان دة هيكون ردك الله يسامحك و اسف لو كنت ازعجتك

جبهة التهييس الشعبية said...

مواطن

اخص عليك
انت زعلت؟ انا والله باهزر معاك، طب والله العظيم ح توحشني قوي

انت زي اخويا الصغير فيها ايه لما اناغشك شوية

خمسة فضفضة said...

هي العالم دي فاضيه ؟!!!
من كتر ما كذبهم كل يوم بيتفضح قاموا مألفين كدبه جديده عشان يقنعوا نفسهم قبل العالم ان فلسطين دي من حقهم

ودي نكته جديده حكاية الجين الكهاني دي بالظبط زي النكة بتاع معاداة السامية :)

نواره اسجل اعتراضي علي الجمله دي لو سمحتي :

طب لو الا لازم كل واحد يرجع لاصله يبقى كلنا نرجع وثنيين بقى، هو ده الاصل

لأ الوثنيه مش هي الاصل ربنا لما خلق سيدنا آدم خلقه علي الفِطره اللي هي الاسلام ( مش قصدي الاسلام الدين والشريعه الحاليه لأ اقصد التسليم لله )
وبعد كده لما عصي ربه عاقبه بالخروج من الجنه وبعدين قبل توبته ، وفضل هو ونسله علي الاسلام لحد ماابليس بدأ يشوف شغله وينخور في عقول البشر ويخرجهم من دينهم ويزين لهم عبادة الاصنام

mido said...

:d :d

mido said...

@مواطن مصرى

و أنا كمان زى أخوك الصغير

:D

فتاه من الصعيد said...

فيديو مسسلي جدا


اصلا انا اعرف ان اليهود كانوا يخبوا انهم يهود ايام النازي ...... لكن يخبوا انهم يهود في اسرائيل ؟.... جديده دي الصراحه

تحياتي

جبهة التهييس الشعبية said...

ههههههههههههههههههههه

ملاحظة ذكية جدا جدا جدا جدا جدا جدا جدا

انا احترم الذكاء قوي

هههههههههههههههههههههههههه
صحيح

mido said...

اقريه احدى ابداعات مروة

فتاه من الصعيد said...

هههههههههههه

شكرا يا ميدو .... بس دي فضيحه موش دعايه

انا حاسه ان ده اوحش بوست عندي


تحياتي