Thursday, 8 October 2009

بقى هو ده الكلام اللي بيحرك البلد لقدام؟

اليوم السابع رايحة من موقع الاقباط الاحرار تنقل القرف بتاعهم وتعيد نشره تاني
يا ترى مهنيا، ده يعد خبر او انفراد او ايه؟ يعني لا هو مقال رأي بيعلق على الخبر اللي في الموقع بتاع الاقباط الاحرار، ولا هو خبر لان اصلا لو عايز تعرف اخبار الاقباط الاحرار ح تروح عندهم وتشوفهم بيقولوا ايه؟ صح؟ مش محتاج يعني ان اليوم السابع ينزل تاني كلامهم، ودي مش اول مرة، كل شوية يروحوا يغوصوا في المواقع المريضة ويعملوا كوبي بيست وينزلوه، ايه المهنية في كده بقى؟ وليه دايما ينقوا الاخبار اللي تجيب لهم تعليقات طائفية من شوية ناس مجانين؟
طب انا بقى سمعت عن اليوم السابع ده كلام كتير وح ابتدي اصدقه مع انه مش موثق، سمعت ان ابن اخو ممدوح سماعين قاتل ضحايا العبارة هو اللي بيمولهم، وسمعت انهم تبع الامن، وسمعت كلام كتير مش حلو عليهم، والناس ياما بتتكلم انا ما قرتش الخبر ده في صحيفة ولا اللي قال لي وثق لي الكلام ده، بس تصرفات الصحيفة المريبة دي تخلي الواحد يشك، خصوصا ان دايما معروف ان الصحف اللي بتبقى تابعة للامن انها بتلعب على الوتر الطائفي لان النظام يهمه اننا نكره بعض عشان ننشغل في بعض، وعشان كده عجبته قوي مسرحية قهوة سادة والهانم راحت وادتها باين جايزة وللا ايه، عشان بتشتم في الشعب مش في الحكومة
هي دي المودا الجديدة، اننا بدل ما نصب غضبنا على المسئولين نصب غضبنا على بعض، وهم بيشتغلوا في الحتة دي كويس قوي، وكانوا الحقيقة صرحا معانا لما وزيرة القوة العاملة قالت بصراحة: العيب مش في الحكومة العيب في الشعب، وربنا ح يعمل فيكوا كده ليه؟ لازم الغلط منكوا!!!! وما نسيتش تستشهد بالقرآن طبعا عشان تسكت الناس
طب ليه اليوم السابع تروح تجيب اخبار من مواقع اقباط المهجر وتنزلها عشان تستفز الناس وتطلع منهم أسوأ ما فيهم؟ ليه تعمل كده؟ احنا كنا عملنا لها ايه؟ احنا كنا ناقصينها؟ الملاحظ بقى، ان المفروض في اي موقع محترم، وللا حتى مش محترم، بيعمل مودريشن للتعليقات اللي فيها شتيمة او تجاوزات، الغريبة بقى ان اليوم السابع بتنقي التعليقات اللي فيها طائفية خرافية وسب دين من الطرفين، مش  ح امشي للاخر ورا نظرية المؤامرة وافترض انهم هم اللي بيكتبوا التعليقات دي لان فعلا فيه مجانين كتير على النت، لكن ده مش دليل على انهم بيمثلوا قطاع من الناس لان اصلا اللي قاعدين على النت دول كلهم على بعضهم بعاقلينهم ومجانينهم لا يشكلوا اي نسبة تذكر في المجتمع المصري، ما انا في حتة المدونة التعبانة دي بتجيلي تعليقات من مجانين ومش بانزلها، عشان لو نزلت واحد مسلم بيشتم المسيحيين او واحد مسيحي بيشتم المسلمين لازم انزل الطرف التاني، والموضوع يكبر ويتشعلل، ثم ان اثارة النعرات مافيش اسهل منها يعني، طب انا اهو، مش انا مسقعة دماغي خالص من موضوع الطائفية ده؟ ممكن لو فضلت تسب لي الدين اسبلك دينك عادي يعني، ما انا بني ادم وممكن اسخن زي اي حد ما ممكن يسخن، مش انا باكره الشوفونية بكل اشكالها، طب لو واحد قل ادبه على مصر ممكن اسب له بلده واللي خلفوه
ايه النصاحة في انك تسخن الناس على بعض، انت لو حبيت تسخن شبرا على مصر الجديدة ينفع، وح تلاقي حزبين نازلين شتيمة في بعض وبيعملوا اغاني، وح تلاقي بتوع مصر الجديدة بيقولوا لبتوع شبرا: يا بيئة يا صيع، وبتوع شبرا بيقولوا لبتوع مصر الجديدة: يا فرافير يا.... يا....مش ح اقدر اكتب اللي ممكن سكان شبرا يقولوه على سكان مصر الجديدة. والموضوع ممكن يكبر ويوصول للتشابك بالايدي، ويعملوا تي شيرتات مكتوب عليها: شبراوي وافتخر... مصر الجديدة = مصر النضيفة...إلخ وممكن يوصل للحرق والجنازير والاغتصاب وكل حاجة، والله، انا لولا ان ضميري ما يسمحليش اني اجرب عشان اوريكوا كنت وريتكوا ازاي ممكن الواحد يعمل فتنة بين السمر والبيض وسكان مدينة نصر وفيصل والطوال والقصيرين والتخان والرفيعين واللي مناخيرهم كبيرة واللي مناخيرهم صغيرة وازاي انها ممكن توصل لخسائر في الارواح والممتلكات
شطارة دي يعني؟ صحافة دي؟ مهنية دي؟ ايه دي غير وساخة؟  

23 comments:

mido said...

لازم نقاطع الجريدة دى

mido said...

و نشيلها من الريدر

انا شيلتها من ايام حرب غزة

لاستعباطهم فى تغطيتها

انت لسه بتسالى اذا كانت امن ولا لأ ؟

!!

Fahd said...

كويس انك مجبتيش سيرة امبابة علشان هتبقي المعركة خسرانة

المهم انتي اختزلتي كل المواقع القبطية اللي بقت زي الرز الان في كلمة واحده وهي مريضة
لكن هل ده صحيح
هل هذه المواقع لا يقوم بها ولا يدخلها ويتفاعل معها الا الاقباط المرضي

انا بحترم رغبتك في عدم الدخول في المناقشات اللي بالشكل ده لانها مش مفيدة تماما لاني شايف ان كل واحد حر ومش علشان رغبتي باني اكد لروحي ان ديني صحيح يبقي كل الناس تدخل الاسلام

لكن المواقع دي زادت ونبرتها عليت جدا

رفيق حبيب كان قال في مقال ان الاقباط اقلية عددية فقط وليسوا اقلية ثقافية لانهم نفس الثقافة ونفس المجتمع
دلوقتي هما بيعملوا لنفسهم ثقافة خاصة
يعني بقوا اقلية ثقافية كمان
ده مش من مصلحتهم يعني
والله اعلم

Fahd said...
This comment has been removed by the author.
جبهة التهييس الشعبية said...

اقلية ثقافية ايه بس؟
يعني الزبال اللي ما بيفكش الخط ده اقلية ثقافية؟

انا قلت لك كل اللي على النت دول شريحة قليلة جدا جدا جدا من المجتمع المصري

Fahd said...

انا مقتنع بانهم لا يمثلوا كل الاقباط

لكن انتي مش اخده بالك انه بقي توجه
بقي فيه نقلة نوعية في خطابهم

وكلام كتير بيتقال عن الغزو العربي ومصر القبطية والظلم الواقع علي الاقباط وكل الكلام ده
الكلام زاد
المشكلة انا مش شاغلني الرد علي الكلام ده قد ما اللي شاغلني انه هيترد عليه من ناس كتير فاضية وعندها نظرة احادية لاي موضوع وكده البلد هتضيع بجد

مش من مصلحة حد خالص


كان فيه منتدي ليهم بيجمعوا اسماء الممثلين والفنانين المسييحيين علشان يعني يبقي عزة ليهم
هل ياتري ده لمصحلتهم فعلا

آيوشة said...

اليوم السابع ده موقع ثقيل بشكل واخباره سخيفة بشكل
على راى محمد جمال اسمه اليوم الساقع :)

Kontiki said...

ضحكتينى على الفتنة اللى حتقوم بين مصر الجديدة و شبرا عندك حق و الله شعب غلبان و لا عندة قيم ، ولا عندة ارادة وراكن مخة على الرف اى كلمتين ممكن يتحكموا فية ودة السبب ان اى نشاط او حاجة بنتحمسلها بتاخد فترة وتعدى نثور على الاسعار والموضوع يموت ومفيش اى اجراء حقيقى يحصل وقيسى على كدة اى حاجة مفيش تغيير حقيقى بيحصل عشان مفيش ايمان حقيقى باى قضية كل اللى عندنا شوية امخاخ **** كلمة توديها و كلمة تجيبها وبالتالى احنا اسهل شعب ممكن التحكم فية وخصوصا بعصاية الدين السحرية .

مهندس حر said...

نوارة عدد اللى بيتنططوا على النت فى مصر من 10 - 12 مليون بنى آدم .. دى على فكرة مش نسبة ضئيلة خالص .. طبعا الحمدلله إن معظمهم بيخشوا يجيبوا صورتين بورنو على أغنية لتامر حسنى و يقضوا بقيت وقتهم بيعملوا تشات و يشتغلوا بعض..

الحقيقة أنا من زمان و أنا مش مستريح لليوم الساقع و الأخ المزفلط رئيس تحريرها .. لكن همه ما بيخترعوش اللى بينقلوه عن المواقع القبطية و بغض النظر عن سوء النية فى الموضوع ده فالكلام اللى بيتقال على المواقع دى من المهم فعلا إننا نهتم بيه..

أنا مش قادر أحدد بالضبط المطلوب القيام بيه لكن الموضوع لابد و إنه يناقشه ناس تانية غير المتطرفين و القطيع المشايع ليهم لأن تجاهله مبقاش سلوك إيجابى أو مفيد..

Ahmed said...

تصدقي بالله يانواره انا مابقتش اصدق اي جريده خالص لا حكوميه ولا مستقله ولا اي حاجه لوتفتكري من تلات او اربع اسابيع كان في حمله في جريدة صوت الامه علي محمد فريد خميس والحمله اتوقفت من اسبوعين بعد تلات مرات كتبو قصة حياتو فيهم مع اني معايا ورق يودي ورا الشمس في قواضي نصب واحتيال ورشاوي قضاه وبلاوي زرقه كتير وكنت بديهم الورق ببلاش وجه الباشا في قعدة تصافي دفع 500000جنيه حملة دعايه والورق بتاعي بقي بالنسبه لهم عامل مشكله وقالولي مش هنقدر نعمل حاجه للراجل ده انا بدور علي اي حد يساعد في القضاء علي الفساد بس\ واضح ان البلد دي مش عاوزه تنضف

لورنس العرب said...

معذورين
الناس عاوزين يكسبوا
هو الراجل مثلا فاتح الجريده صدقه؟
لأ طبعا
لازم حاجات من دي
ولا تنسى ان طبيعة شخصيتنا اننا نعشق الفضائح والكوارث والكلام اللي بيجيبنا ورا
هما برضوا دارسين شخصيتنا كويس جدا

Islam said...

عايز أكدلك موضوع الإنتقائية في نشر التعليقات حصلتلي كذا مرة ، و مسحولي كذا تعليق ، ساعات هما إللي بيوجهو سكة التعليقات بإنهم يسندو طرف على حساب طرف

زقزوق said...

معروف ان الموقع بيصرف عليه نجيب ساويرس ومتخيلة ايه من موقع اخبارى بيصرف عليه نجيب باشا؟
اللى فارض علينا صورة البابا شنودة يوميا فى المصرى اليوم
بحيث لو عطس قداستة تلاقى خبر عطسته فى الصفحة الاولى

سبهللة said...

هدى اعصابك كدة وقوليلى يعنى ايه
شوفونيه؟؟
هل ليه اى علاقة بالشوفونيرة؟
الظاهر ان انا هاتعلم العربى ن مدونتك

مهندس حر said...

سبهللة

شوفونية مش عربى .. معناها العربى شعوبية .. يعنى التعصب لقومية معينة و إعتبارها أعلى و أفضل من غيرها .. زى ماكان بعض الفرس مثلا فى القرون الأولى للإسلام و زى المصريين حاليا ما بيحبوا يفتكروا نفسهم أفضل من بقية العرب

overdose said...

خارج السياق
قهوة سادة بتشتم ف الناس مش ف الحكومة؟؟؟

مواطن مصري said...

نوارة مواقع الاقباط المهجر و موقع الاخوان انا بكرهم كرهي ل الاهلي

و لتامر حسني

و ضيفي عليهم مدونات اقباط المهجر على مدونات الاخوان

ما عدا مدونة عبد المنعم انا اخوان

انما باقي المدونات الاخوانية و مدونات اقباط المهجر

عاوزين الحرق


فاتك انتي ندوة احمد خالد توفيق

هو مصطفى محمود العلم و الايمان

بيموت؟؟؟؟؟؟؟

يا ريت لو عندك معلومات عن حالة قولينا

مواطن مصري said...

و بعدين مالهم بتوع مدينة و مصر الجديدة

هة مالهم

كفاية حقد طبقي
:D

مواطن مصري said...

زقوزق ما تحترم نفسك نجيب ساويرس رجل وطني و اقتصادي محترم

و امثالك هما الي بيخربو مصر

رامز عباس said...

انا كرهتهم من يوم مبقم بيسرقوا صور الدكتور محمد مرعي من مدونة المحلة مصر


الموضوع اللي اثارتيهم مهم جدا

بس ده كله كوم اقصد الحروب الاهلية بين الشعب


وبين مخطط التوريث اللي ماشي بدون عوائق


علي فكرة كنت دايما بظن ان سوء التفاهم بيحصل دايما بين افراد الشعب نتيجة لاختلاف المستويات التعليمية اللي كل واحد مر بيها لوحدة وظروف بيئته


دلوقت مقتنع بكدة اضافة لوجود عامل خارجي وهو الصحف او اشخاص يتعمدون التفرغ لاحداث سوءات التفاهم



لعن الله الفتنة ومن ايقظها مبكرا والمنبة كان عطلان

مواطن مصري said...

نوارة أسمعي الاغني دي راب مصري بس جامد بيتكلم عن الواقع

أغنية هي فين صورة البلد
EGyRap.NeT _ Hya Feen - Priesto Ft. Romel-B , TAG
http://www.4shared.com/file/138518282/f3b45271/EGyRapNeT___Hya_Feen_-_Priesto_Ft_Romel-B__TAG.html

نوارة أنتي مش هتكتبي رائيك في الراب المصري

Tarek said...

http://www.facebook.com/video/video.php?v=103667899645773&ref=nf


:D:D:D fedee7a

maman de said...

obama wins nobel peace price
لا عزاء
لغلابة وزيرستان و العراق