Tuesday, 13 October 2009

يوسف حمدان ابو زهري

قتلنا اسير عندنا، وهو اسير اساسا ليه ما تعرفش، بس فوق انه اسير من غير مبرر، قتلناه، قتلناه، مش بالرصاص، ولا بالمشنقة، بالتعذيب لحد ما جاله نزيف داخلي وسبناه اسبوعين لحد ما لحق بربه
ربنا يرحمه ويتقبله في الشهداء
انا مش قادرة استحمل خلاص، احمد موسى بيتكلم في الجزيرة وبيخرف، وبيقول: ان سامي ابو زهري في غزة لكن انا باتكلم من مصر، على رأي احمد نصر، يعني قاعد في اودة الكنترول بتاعة مصر؟ طب ما انا قاعدة في مصر وما كنتش عارفة من الاصل ان عندنا كل دول مساجين من حماس، طيب فيه كام مسجون اسرائيلي من اللي بيتاجروا في المخدرات وبيصدروا دعارة وبيتجسسوا؟
احمد موسى قال: ما اتعرضش للتعذيب، ولقي رعاية طبية كاملة من النزيف اللي جاله (والنزيف ده طبعا جه لواحد عنده 38 سنة بسبب حمى النفاس مش بسبب التعذيب) وبعدين عمره جه ومات زي ما ناس كتير بتموت في السجن من غير سبب، او بسبب امراض مزمنة
همممم
او بسبب ان امه داعية عليه، او من كتر السعادة جوة السجن جات له ازمة قلبية من الفرح، او بسبب ان حماس اخدته درع بشري وهو جوة السجن المصري، او بسبب انهم جم على عباس المظلوم قام ربنا انتقم منهم
انا مصدقاك يا احمد يا موسى
مش ده سؤالي، سؤالي هوه: ايه اللي دخل عنصر من حماس جوة السجن المصري من اساسه؟ ده على اساس ان سجونا فاضية وبنبخرها عشان تسكن؟ اذا كان الرئيس بتاعنا ببقه قال تعقيبا على سؤال احدى الصحفيات الاسرائيليات عن الجاسوس عزام: ما احنا ياما رجعنا لكوا جواسيس وتجار مخدرات في الكتم، انما انتوا اللي عملتوا دوشة على عزام واضطرتونا اننا نخليه في السجن عندنا..
وبعد شوية عزام رجع لحضن شارون لافف العلم الاسرائيلي حوالين كتافه وهو لسة ما خلصش الحكم اللي عليه
يا ترى معتقلين حماس دول متاخدين رهينة لحد ما المعتقلين المصريين مثلا في سجن حماس يخرجوا؟ انا اللي اعرفه اننا لينا اسرى مصريين حمضوا في سجون اسرائيل وما طالبناش بيهم
يا ترى معتقلين حماس دول كانوا جواسيس مثلا؟ جواسيس لمين؟ طب جواسيس، ما يشبهوش عزام يعني؟ وتجار المخدرات والجواسيس اللي رجعوا في "الكتم" يا عوكل؟ يا راجل، يا راااااجل ده انت حفيدك لسة ما مرش عليه استغفر الله العظيم ح تخاف ربنا امتى؟
طب عيال المصريين وحابسهم وبتعذبهم وبيموتوا وبيطلع عينهم وادي احنا راضيين يا قدرنا وعملنا الرضي (اكيد ربنا بيعذبنا على حاجة عملناها) انما خلاص؟ يعني خلصت علينا وداير بقى تلم في اللي حوالينا؟ مرة السودانيين ومرة الفلسطينيين... شملول قوي، سبع، سبع يا عوكل، يا مسيطنا، يا رافع رايتنا واحنا حدودنا واجواءنا بتخترق وجواسيسهم بترجع في الكتم ومش لاقي غير المستضعفين تستقوى عليهم
وكل ما يذلوك ويفقعوك زنبة زي اللي عملوها مع اوسني دكتوري دكتوري اوسني في اليونسكو تفش غلك فينا اكتر واكتر وناشر خيرك على اللي حوالينا كمان
وياترى شاليط اللي محبوس عندنا بيتلقى خدمة كام نجمة؟ سبعة؟ تمانية؟ سبعتلاف سنة يا مصر يا غلبانة ياللي اتبليتي بينا وما كانش ليك الذل ده كله يا حبيبتي؟
انا مكسوووووفة، مكسوفة وحاسة بالذنب والمرار والعار والاحراج
اعمل ايه ياربي، نعمل ايه طيب؟ انا مش عارفة اعمل ايه؟ انا خايفة... خايفة ربنا ينتقم منا اكتر ما بينتقم
يارب انا أبرأ اليك من اللي حصل ده يارب، ما احنا بيحصل فينا برضه، لو كنا عارفين نعمل حاجة كنا عملنا من زمان، والله يارب احنا غلابة مالناش دعوة، احنا لا بندافع ولا راضيين يارب انت اعلم
تيجي من عندك بقى يارب، تيجي من عندك، عليهم هم، عليهم يارب عليهم يارب عليهم يارب وعلى اللي راضي بعمايلهم واللي بيدافع عنهم واللي بيبرر لهم واحنا لا والنبي يارب
انا محتاجة ارتاح بقى

40 comments:

Ahmed Nasr said...

احمد موسى إيه صفته أصلا؟..قال بتكلم من مصر قال!!

اللي يشيله ويرميه في أي داهية بعيد عننا..

سامي أبو زهري أخو القتيل وده جاي يتكلم وحجته انا في مصر، حجة البليد!!

يا اخواننا حد يتحرك حد يمشي في قضية حد ياخد توكيل من ابو زهري ويرفع قضية قدام القضاء هنا عالأقل..

فتاه من الصعيد said...

أنا مش فهمت يعني ايه بتكلم من مصر ؟

بس هو اكيد مات من التعذيب ؟... اصلها صعبه جدا على ان الانسان يموت من التعذيب ... ربنا يرحمه

تحياتي

جبهة التهييس الشعبية said...

احمد

انا ح اشوف مركز هشام مبارك ابانا الذي في حقوق الانسان

فتاة من الصعيد

صعبة ليه؟ مش فاكرة الطفل اللي عنده اتناشر سنة اللي فضلوا يعذبوه لحد ما مات؟

ده مافيش اسهل منها

مواطن مصري said...

طيب الله يرحمة

و يصبر اهلة

و هنشوف نتيجة تشريح الجثة مات موتة ربنا ولا


طيب فين حق الشهيد المصري ولا الدم المصري رخيص لدرجاتي عند بتوع حماس؟

جبهة التهييس الشعبية said...

مواطن
امبارح بهيج (كان داخل باكاونت مختلف) كان بيقول لي اشمعنى بتنزلي تعليقات مواطن ومش بتنزلي تعليقات بهيج مع ان بهيج يعني اعقل

قلت له عشان مواطن مش قليل الادب

وانت فعلا مش قليل الادب يا مواطن وعشان كده مش باشتمك
لاني مش باشتم غير اللي بيشتم

بس يا مواطن اللي انت بتعمله في ضغطي وسكري وقلبي اكبر بكتير من مجرد الشتيمة

مين الشهيد المصري ده؟ ده الله يغفر له بقى ويتولاه في المصيبة اللي هو فيها مات وهو بيضرب نار على ناس جعانة وعيانة وقتل اتنين من اللي كانوا واقفين على المعبر قبل ما واحد منهم يطلع الفرفر ويضرب عليه

ربنا ما يختم لحد بخاتمته

بدراوى said...

مواطن يا مصرى

و فين حق الشهداء المصريين اللى قتلتهم اسرائيل السنوات الماضية
و لا انت بس تتحمق لما حماس ترتكب جريمة و تقتل مصرى

عبدالرحمن أبوالعُلا said...

ماذا ننتظر من نظام عميل يُحاصر الضعفاء في غزة ويستقبل مجرمي الحرب الصهاينة ليعلنوا من أرضه بداية الحملة اغاشمة على غزة ، ويستقبله من أسابيع قليلة حتى في أثناء اقتحامهم واعتدائهم على المسجد الأقصى المبارك ؟
ألا لعنة الله على الظالمين

زقزوق said...

يا اخوانا اطمنوا

والله العظيم والله العظيم والله العظيم ربنا حيورينا يوم فى حسنى مبارك زى ما ورانا يوم فى صدام حسين

وفى الدنيا قبل الاخرة

يا رب

زقزوق said...

دا اللى المفروض وسيط نزية بين حماس وفتح؟

اللهم اقسم ظهر حسنى مبارك ودولته وكلاب امن دولته

زقزوق said...

احمد موسى كلب من كلاب النار

زقزوق said...

احيائا بتخيل ان الدرك الاسفل من النار متخلقش الا لحسنى مبارك وامن دولته فقط وحصريا

حسن على said...

، طيب فيه كام مسجون اسرائيلي من اللي بيتاجروا في المخدرات وبيصدروا دعارة وبيتجسسوا??????????????????????????? نقطة هامة جدا,ارتباط تجارة المخدرات بالدعارة والتجسس,فالموساد وغيرةمن الاجهزة الامنية ,يدفع مقابل خدمة التجسس ,مخدرات مصادرة لم يدفع فيها شيئا وتكون شبكات الدعارة بمثابة(الفرمون -الجاذبات الجنسية للحشرات)الذى يجذب العملاء الجدد. ونتمنى على الاجهزة الامنية المصرية والتى تراقبنا- نحن المصريين -ان توجة نشاطها وتورينا همتها فى ضبط هؤلاء وهى الاجهزة الاقوى فى الدولة - وعايزين نسمع عن نشاطهم فى ضبط عملاء اسرائيل سواء كانو جواسيس او مروجى الدعارة او مهربى مخدرات

زقزوق said...

غالبا اللى عذب وقتل الشهيد المجاهد اسمه محمد _محمود_مصطفى
وتلاقيه بيحرص على اداء العمرة كل سنه

د/جمال القرمه said...

والله صدقتي اختي الكريمه في كل ما قلتيه............. بس لا تاخذي علي كلام احمد موسي دا صحفي بدرجة مخبر وهو بيكره حماس واي حد من ريحتها ... دا بقي من الذين قال عليهم ربنا ( الم تري انهم في كل واد يهيمون ) نسال الله ان يخلص مصر من احمد موسي ومن عوكل ومن .. ومن.... كتيرررررررررررررررررر

زقزوق said...

اللهم اهلك اجهزة الامن المصريةكلهم بلا استثناء
من اول حبيب العادلى لاصغر خفير فيها
اهلكهم هم وازواجهم وابائهم وذرياتهم واهتك اعراضهم جميعا

زقزوق said...

دماء مسلم واحد اعز على الله من الكعبة المشرفة نفسها

فكيف اذا كانت دماء مجاهد فى سبيلك ؟ كيف؟
اللهم اهلك فرعون وهامان وجنودهما الخاطئين المجرمين

لورنس العرب said...

أولا: إنا لله وإنا إليه راجعون
ثانيا: من يتهمون مصر بتعذيب هذا الرجل عليهم باللجوء إلى الطبيب الشرعي وهو سيحدد سبب الوفاه واذا حدث بلها وهذا ليس بصعب على الطبيب الشرعي، سيستلموا جثته ويتأكدوا من الحقيقه، كل ما اريده ان لا نقول كلام دون دلائل، والدليل هنا هو الطبيب الشرعي، ومن ماتموجود وأهله سيحصلون على الجثه، وإن صدر فعلا من مصر تعذيب لصالح هذا الرجل فأنا أول من أكون معك في كلامك وكلام من يهاجم مصر، اما ان كانت فرقعه دون دليل فأنا لست معكم
وأخيرا/: أقول للأخ الفاضل الذي يقول ان مصر تحاصر غزه
يا أخي الفاضل نحن لم ولن نتعاون مع اليهود وموضوع المعبر قتل بحثا
وغن كنتم تريدون البحث عن اسباب الوضع المهين في فلسطين عليكم بالنظر إلى ما يحدث بين فتح وحماس وانتم تعرفون الحقيقه
صراع على السلطه وتراشق بالاتهامات وغيره - وتريدون منا ان نكون فلسطينيين أكثر من الفلسطينيين أنفسهم
انا اعرف الكثير من الفلسطينيين واكدوا لي ان سبب نكبة فلسطين هما فتح وحماس
فلا يعقل ان نحمل طرف بعيد عن الموقع -وهو مصر- مسئوليه كل شيء بينما أهل القضيه يتعاركون على اشياء بعيده عن القضيه الاساسيه


تحياتي لك

مهندس مصري said...

ليه و مش فاكرة البوست ده عندي
http://egyptioneng.blogspot.com/2009/02/30.html
اللي كان شاب من غزة بيحكي قصة تعذيبه هو عشرات من شباب غزة على يد أمن الدولة المصري لمدة شهر و بعدين سابوهم لما إتأكدوا إنهم مش من حماس

كأن حماس هي عدونا
حسبنا الله و نعم الوكيل
الله يرحم الشهيد و يصبر أهله

م/ الحسيني لزومي said...

إذا الشعب يوما أراد الحياه
فلابد أن يستجيب القدر

Sahran said...

الأخت نوارة :


والله أمرككم عجيب تقتلوا القتيل وتمشوا بجنازته ,,,,
هل كان المطلوب أن يموت سجين فلسطيني في سجونكم حتى تتذكروا ما يحدث في السجون ؟؟؟
مصر ما بتحترم الفلسطيني اللي مش عامل حاجة , فما بالك باللي داخل عليهم شمال؟؟؟

القصة مش قصة اضطهاد مسجون , لا فقصتكم هي قصة معاناة شعب بأكمله بمسلميه وأقباطه وتتركوا هموم وطنكم لتزغردوا للشيخ حسن والشيخ هنية والشيخ ...... معلش نسيت اسمه.

بمناسبة ذكر التعذيب فدعيني أقول رحم الله كل فلسطيني مات في سجون الأخوة اللي من حماس , فحماس لم تحترم سجنائها يوما , اللهم إلا غلعاد شاليط ( قدس سره ) بينما أبناء غزة يداسون تحت النعال بمجرد دخولهم أي مركز أمني تابع لحماس

على فكرة أنا زمان اتحبست في سجون فتح لما كنا نطالب بحقوق السجناء

يظهر إنو ما في .......خيار

عبد الزهراء المصري (علي الحسيني) said...

تعرف يانوارة أنا بجد قرفت ، والله بجد قرفت أوي أوي من عوكل ونظامهالبجح ده .
أنا لما عرفت بالخبر المشئوم ده تذكرت الشيخ حسن شحاتة وتخيلت اللي بيحصله وتذكرت الخبر اللي كان منشور في اليوم السابع بعنوان " شحاتة فقد عقله "وكان بيتكلم عن اللي حصل تحت التعذيب للشيخ حسن شحاتة ربنا يفك أسره من أيدي الظالمين وكل التعذيب اللي بيحصل في السجون ده ومافيش نائب عام بيتحرك ولا مجلس شعب فتح بقه بجد شيئ بيخليني أحس إن البلد دي مكتوب عليها الذل من نظام ملعون بس يعني هو النظام ده مستورد ؟؟؟
ياجماعة والله العظيم الموضوع مش كبير ولأ مُكلف لو كل مواطن أتبرع علشان نجيب محامي دولي يرفع لنا قضية أمام محكمة العدل الدولية ضد النظام ده لأنه بجد ماينفعش كده والله مابينفع السكوت .
حسبي الله ونعم الوكيل والله يرحم الشهيد ويصبر أهله ويصبرنا معاهم .

israaelsakka said...

تشريح إيه اللي هنستناه واحد عنده 40 سنة حيموت من ال1بحة بحب في اللي ما يتسموا ان تبريرتهم جاهزة يعني سليمان خاطر انتحر !! إزاي هو كده و كل شيئ ماشاء الله قضاء و قدر القدر في جانبهم دايمن بجد انا مكسوفة من نفسي و مكسوفة من المصريين الساكتيين مكسوفة من مذبحة الأسرى السودانيين و من تجويع الغزاويين زي ما قلتي يا نوارة اللهم اني ابرأ إليك مما فعلوا

احساس لسه حى said...

عزيزتى

معلش بقه ما حماس لازم تدوق من حب النظام للمصريين جانب

وعلشان يعرفوا ان اعتقال اسرائيل ليهم اهون من اعتقال المصريين ليهم

بجد لو يخيرونى اعتقل فى مصر ولا اسرائيل اقولهم جهنم ارحم من معتقالتنا

اما عن مواطن مصرى فهو فكلامه يدل عن انه ليبرالى كبيير بس بيشغل ال T مش ال G

تحياتى
سلام

سمية قهوة ؛آه ياني said...

من الصدمة مش قادرة أقول غير حسبنا الله و نعم الوكيل

جبهة التهييس الشعبية said...

سهران

انشالله دايما تنام والناس صاحية وتصحى والناس نايمة
مالكش دعوة بمشاكلنا احنا ادرى بيها
قلبك علينا قوي؟
لولا ان مبطلة شتيمة كنت قلت لك لمتين اولها ظرف مكان واخرها واحدة قريبتك

زقزوق said...

عبد الزهراء

اسمك غبى

زقزوق said...

نفسى اعرف التهمة اللى اتسجنت بسببها فى سجون فتح يا سهران وان كنت ممكن اخمن يعنى _!_ خخخخخ

جبهة التهييس الشعبية said...

لورانس العرب

تصدق بالله؟
بصيت على تعليقك قلت ده اكيد سلفي

دخلت مدونة من مدوناتك ولقيتك سلفي فعلا وبتحب محمد حسان كمان

هو يادوب كده
ربنا يخليهولك
ويخلي لك حسني مبارك كمان

جبهة التهييس الشعبية said...

زقزوق

ههههههههههههه
مش اقل من التخابر مع اسرائيل

زقزوق said...

استنى حيقلك كنت طالع فى مهمة فدائية مع مجموعة فتحاوية وكنت مديهم ضهرى بس غدروا بيا خخخخخخ

ahmed samir said...

هو مش الطبيب الشرعي ده حيبقى مصري برضه و لا انا بيتهيألي؟؟
يعني العملية حتخلص على انه قضاء و قدر

انسو ان حد يثبت انه اتعذب

Wild at Heart said...

@ لورنس العرب
ده على أساس إنهم حيجيبوا طبيب محايد يكشف عليه؟
اللهم خذهم أخذ عزيز مقتدر.

مسلم نفسه يعيش للإسلام said...

انا مفقوع

لورنس العرب said...

لا يا ستي انا لست بسلفي
ولو انا سلفي فهي ليست بتهمه
والأغرب انك دخلتي مدوناتي وبتقولي ربنا يخلي لي حسني مبارك
يبقى انتي لم تشاهدي ماذا أكتب
ليس معنى ردي اني اوافق او انا ضد ما قلتيه
وما علاقة السلفيه بالموضوع من الأساس؟
كل ما اريده ان يكون هناك دليل على الكلام
وهذا حقي ولا اطلب المستحيل
الجميع يكيل الاتهامات لمصر في مختلف وسائل الاعلام
معنى هذا ان مصر هي الشيطان الأكبر بينما الباقي ملائكه
انا اوافق هذا الرأي - لكن لا كلام بدون دليل
وإذا أحزن الناس تعذيب اخواننا الفلسطينيين في مصر
فعليهم بالنظر إلى ما يفعله الفلسطينيون في أنفسهم
انظري إلى من يعتقل من فتح من جانب حماس والعكس


قد حكمتي عليا بحكم لم يعجبك

هذا الحكم انني سلفي وأسير في ذيل السلطه

لكن لااعلم من اين لكي بهذا الكلام!
هل المطلوب مني بما انني معارض للحكومه أن أصدق أي كلام يقال؟
هل المعارضه معناها ان أي أحد يقول أي شيء أصدقه دون تأكيد؟

مهندس حر said...

رحمه الله و تقبله بين الشهداء و الصديقين..

مقدرش أقولك الموضوع ما يستاهلشى اللى إنتى عاملاه فى روحك لأنه أكيد يستاهل أكتر من كده .. لكن الصراحة إنه الكلام ده مالوش فايدة .. و لو حتى قلتيه تفكى عن نفسك بيطلعلك تعليقات تجيب الضغط و تعليقات ممكن تجيب سكتة دماغية ..

التعذيب ممارسة إعتيادية فى كل المواقع الأمنية فى مصر .. أفتكر ده مش محتاج مناقشة ..

اللى بيموتوا تحت التعذيب كتير و فيه كمان بيتم تصفيتهم عمدا .. و اللى نعرفه أقل من اللى مانعرفوش ..

مفيش أى حاجة تقول إن عناصر الأمن بتوعنا من الخفير لللواء و مع إعتيادهم الكامل لأنواع الإساءة للناس وصولا للتعذيب و القتل العمد بدم بارد ممكن يكون عنهم تمييز بين مصرى و غيره من الشعوب و الفئات اللى مالهاش ضهر و بالتالى مفيش أى جديد و مفيش أى شيئ غريب و طبيعى تجيلك تعليقات من العينات الموجودة..

بصى أنا عمال ألف و أقول الخلل أعمق و الحال دلوقتى هو إننا بنكلم لطزانات مش بنى آدمين بتحس .. إحنا محتاجين نرجع من الأول و نحاول نبحث فى دماغ الإنسان المصرى و العربى المعاصر على بقايا الآدمية اللى منها ممكن يطلع مشاعر الغضب و التعاطف و الذعر و النخوة و الكرامة إلخ .. كل الحاجات المفتقدة و اللى حل محلها البلادة و التناحة و البجاحة..

قصص من النوع ده ماتفرقش غير مع البنى آدمين و إحتمال تفرق مع القرود لو حكيتيهالهم فى الجبلاية .. لكن الكائن العربى اللافقارى ذو الدم البارد اللزج فيستوى لدية زقزقة العصافير و قصف الرعد و رنة الجزمة على قفاه

مهندس حر said...

غالبا هتزعللى عشان بشتم الكائن العربى .. بس عديهالى المرة دى عشان بقاللى أيام معبى و فاضللى شوية و أفطس .. ربنا يرحمنا برحمته أو ياخدنا بغضبه هو الأعلى و الأعلم و على كل شيئ قدير

Sahran said...

زقزوق أفندي

اقرأ تعليقي بتعرف ليش اتحبست

وعلى العموم اللي بيطالب بحقوق الناس مش خاين يا نوارة

ومعلش راح أعديهالك

سلامات

Al said...

هل تطلبون نبذة صغيرة عن ارض (قمعستان)
تلك التي تمتد من شمال افريقيا
الى بلاد نفطستان
تلك التي تمتد من شواطئ القهر الى شواطئ
القتل
الى شواطئ السحل, الى شواطئ الاحزان ..
وسيفها يمتد بين مدخل الشريان والشريان
ملوكها يقرفصون فوق رقبة الشعوب بالوراثة
ويفقأون أعين الأطفال بالوراثه
ويكرهون الورق الابيض, والمداد, والاقلام بالوراثة
واول البنود في دستورها:
يقضي بأن تلغى غريزة الكلام في الانسان
الله ... يا زمان ...

Al said...

أيها الزقزوق ..!! السر في مأساتنا
صراخنا أضخم من أصواتنا
وسيفنا..
أطول من قاماتنا..

Al said...

أماذلك السهران ..!! فاقول لة قف ثم فكر ..؟؟ وانظر الى ماتتعاطاة مدونتك ، ألم يقل سبحانة : (ولله الأسماء الحسنى فادعوه بها وذروا الذين يُلحدون في أسمائه سبجزون ما كانوا يعملون) (الأعراف 180).