Thursday, 29 October 2009

عبد المنعم مصمم ياخد حقه على الدولة

زي اي حد بيوصل للسن القانوني في المؤسسة، لازم يتخرج، ويبتدي نوع جديد من المشاكل. ومش محتاجة اقول لكوا المؤسسات بتبقى عاملة ازاي، المشرفين، المديرين، الاخصائيين، الزملاء، كلهم ناس غلابة بتفش غلها في بعض، وكل غلبان بيستقوى على اللي الاغلب منه.
بعد ما عبد المنعم اتخرج من المؤسسة فيه ناس ولاد حلال جابوا له شقة وكشك. الكشك اترخص في حتة يقطنها ناس شكل ذئاب الجبل كده. كل يوم على الله يمسكوه يرنوه علقة، لا بس هو واد جدع، ينضرب وما يقولش آي، ويصلح الكشك ويفتحه تاني
ماحدش يسالني بيكسروا له الكشك ويضربوه ليه؟ واحد راجع بالليل مبرشم، وعبد المنعم واد شكله غلبان ومالوش في حاجة، واللي راجع بالليل مبرشم ده واخد بالجزمة من مخاليق الله كلهم، لقى لقية واد غلبان، ما يفشش فيه غله ليه يعني؟ العيال بتوع المؤسسة يبقى جوة المؤسسة واد ايه، مقطع البطاقة، اول ما يطلع تجيله صدمة حضارية ويبقى مافيش اهبل ولا اغلب منه
المهم يا سيدي لما انت، عبد المنعم عارف ان: "الكانون يا ابلة بيقول اني لمن اتخرج من المؤسسة ليا حق اللي انا اخد شقة من المحافصة" بعد ما اهل الخير قدموا له على طلب شقة، واتطنش، كتبت مقال في الوفد لمحافظ القاهرة، اتصلوا بيا وقالوا لي ابعتي لنا عبد المنعم، فرحت فرحة الاعمى وكتبت احيي محافظ القاهرة، راح هناك، قالوا له انت تبع الجيزة، طلع بطاقة تبع القاهرة، او روح محافظة الجيزة، يبدو ان محافظة الجيزة بيبعتوا لها العيال اللي مش بتسمع الكلام عشان يعذبوهم
قام الواد عمل الاتنين، قدم على بطاقة في القاهرة وراح محافظة الجيزة، وانا كتبت نداء لمحافظ الجيزة
الكلام ده بقاله دلوقت سنتين حضراتكوا، كل اسبوعين عبد المنعم يكلمني: ايون يا ابلة، دوقت انا بقى رحت المحافصة، قالوا لي طب هات لنا وسل نور (عايزين وصل نور من واحد مقدم طلب على شقة، يعني هو لو عنده وصل نور ح يروح لهم ليه، ثم الشقة اللي جابها له اهل الخير في العشوائيات يعني، على قد فلوسهم ماهم اصلا كمان اهل الخير دول ناس مكافحين ماهماش احمد عز) جات عايدة عبد العزيز، الممثلة، قرت المقالين اللي كتبتهم عنه واتصلت بيا: انا عندي مزرعة وممكن ييجي يشتغل حارس وادي له مكان
- يا عبد المنعم
آه... بس انا يا ابلة ليا حق كانوني في شقة المحافصة، انا ايه اللي يخليني اخد حاجة من حد وانا ليا شقة في المحافصة
- طب معلش يا عبد المنعم مؤقتا كده بدل ما كل يوم وشك متخرشم من العيال اللي بيكسروا لك الكشك
طبعا قالت له طريق مصر اسكندرية قام راح اسكندرية ودور عليها هناك ما لقهاش. طريق مصر اسكندرية ايه بس؟ ده واحد عاش لسن عشرين سنة في مؤسسة ما شافش غيرها، يوم ما شاف الشارع كان بيروح يجيب سجاير للمدير من الكشك اللي جنبهم، يفهم ازاي هو فرق طريق مصر اسكندرية من اسكندرية نفسها؟ ثم حارس ايه وهو كل يوم ينضرب من عيال مبرشمة لمجرد ان شكله غلبان ومش عارف يدافع عن نفسه
"لا يا ابلة بس انا زعقت لهم بقى... قلت لهم مش كل يوم الاذية دي"
ده ما يعرفش حاجة ده غير ان له حق قانوني في شقة المحافظة، تصوروا؟ ومتسمك بيه قوي
- الو.. ايوة يا ابلة، انا رحت المحافصة وقالوا لي اليومين دولت مشكلة الدويقة ومش ح يدوك شقق فانا بقى ح اروح محافصة الجيزة، ما انا ليا حق في الجيزة
- الو ايوة يا ابلة، منكن اللي حضرتك تديني كارت برضك يساعدني؟
- الو ايوة يا ابلة، منكن اللي حضرتك بقى تديني المكال اللي فيه حضرتك بتتكلمي عني؟ برضك لمن اروح وادخل بيه
- الو ايوة ايا ابلة، انا لقيت حل.. منكن مثلا اللي انا لمن اروح اعمل مشكلة وازعق بقى واخوفهم

خلاااااااااااااااص يا عبد المنعم، يا عبد المنعم حرام عليك، يابني انا تعبت لك، ايه الاصرار اللي انت فيه ده؟ انت يابني مش عارف تفهم انهم بيمطوحوك، انسى المحافظة يا منعم، انساها
"بس انا ليا حق في شقة المحافصة دي"
عبد المنعم، مش ح يدوهالك، خلاص، دي ناس فاسدة، الشقة حقك ح يدوها لحد من معارفهم، انتهينا يا عبد المنعم مشي حالك، مشي حالك يا عبد المنعم، انا ح اكلم فلانة وفلانة واخليهم يجيبولك مكان في حتة ما تنضربش فيها
"بس ده حقي يا ابلة..طب اقول لك، انا عندي اكتراح كويس، ايه رأيك اطلع مكتب المحافص نفسه واكسر لهم المكتب؟ او ازعق"
ايه عبد المنعم اللي بتقوله ده؟
"ما انا باحاول الاقي حل... انا الظاهر تعبتك"
تعبتني؟ تعبتني في ايه عبد المنعم؟ يابني انا لو تعبانة تعبانة عشانك، انت مش حاسس بتعمل ايه في نفسك؟ يابني دول طلبوا منك وصل نور، هو فيه واحد عايز شقة يطلبوا منه وصل نور؟ انت مش واخد بالك انهم بيشيعوك؟ انا اللي تعبانة؟ وانت مش تعبان؟ ما زهقتش يا عبد المنعم؟
"ازهق من حقي؟"
مافيش فايدة
المبهر في الامر، ان انا اللي باقول له مشي حالك وهو اللي بيقول لي انا ليا حق "كانوني" وعايز اخده "الدولة مفروض اللي هي بتدي ابناء المؤسسات شقق تبعت المحافصة، يعني انا في الكانون كده" ايوة، بيقول الدولة وبيقول ابناء المؤسسات، وفي نفس الوقت بيقول المحافصة وما بيعرفش يقرا ولا يكتب عشان ما علمهوش في المؤسسة كانوا بيخلوه يمسح وينضف
وعلى كل البؤس اللي هو فيه ده جاب منين الاصرار على الحق الكانوني؟ وجاب منين التقديس المبالغ فيه للكانون اللي لازم ياخد مجراه؟ الله اعلم
ح اموت واعرف بجد، ده مش اول ولا اخر ولد من المؤسسة يتصرف بالطريقة الغريبة دي، ده كان ناقص يقول لي دي ضرايب المواطنين ولا يضيع حق وراءه مطالب واحنا لازم نحارب السلبية
ما كانش ناقص غير يقول كده بقى عشان كنت انكش شعري وامشي مجنونة في الشارع
ما بقتش عارفة اضحك وللا اعيط، افرح وللا ازعل، وامبارح مسكت صاحبتي اللي عندها جمعية اعصر فيها: العيال دي جابت الكلام ده منين؟ ده انت لما ابن عمك مات ما بقوش فاهمين يعني ايه ابن عمك
"البقية في حياتك يا ابلة، سمعت اللي حضرتك عندك حالة وفات، مين؟"
قالت لهم: ابن عمي
........ يعني ايه؟
قالت لهم: يعني ابويا له اخ، الاخ ده له ابن، ابنه ده هو اللي مات
اهو اللي مش عارفين يعني ايه ابن عمها دول، ييجوا لشقة المحافصة ويقفشوا فيها بمنطق: حقي بالكانون ويتكلموا كأنهم سليم العوا
لو جبت له قصر، عايز حقه بالكانون
- طب لو الشقة دي مش عاجباك نجيب لك شقة تانية
"بس ليا انا حق تبعت الكانون"
ولسة امبارح عرفت انهم بيتسللوا وينزلوا وسط البلد عشان يقفوا في الوقفات الاحتجاجية وكانوا عايزين يسافروا غزة عشان يحاربوا يناير اللي فات
"مين يا غادة اللي بيعلمهم الكلام ده؟ مين مهيج  الجماهير اللي في المؤسسات؟"
قالت لي: مافيش قاعدة، ممكن وهو قاعد على القهوة سمع كلمة، شاف منظر عيل وحس انه زيه، هم يعني عشان ما اتعلموش يبقوا ما بيفهموش وما بيحسوش؟ اما انت غبية ومتكبرة صحيح
تمام، انا غبية ومتكبرة وجاهلة وفاضية من جوة وضحلة، وعمالة ارغي
وفيه ناس ربنا خالقهم صح من غير رغي، هم ناس كده صح من راسهم لساسهم، من غير ماحد يعلمهم الصح
اللي حاول يعلمهم ما علمهمش غير ازاي يحط البشلة في بقه وما يعورش نفسه، وياريتهم بيعرفوا يستخدموها
اي حد عنده بيت واهل اسمعه يشتكي ح ارميه من الشباك

27 comments:

elmonadel said...

هذه التدوينة يجب ان تنشر كمقالة بأحد الصحف.
جيدة جدا

mido said...

المؤسسة اللى هى ايه ؟

الراجل بيتكلم صح

انا مش عارف انت مستغربة من ايه

المهدى said...

دى مصر يا عبلة اللى محدش مننا ولا منهم يعرفها دى بقى الحضارة وده بقى الإنسان المتحضر حتى إنسحابه وقلة أهتمامه مش عشان سلبى ولا متخلف فقط لأنه مش مصدق هو بالبلدى كدة (رقم ) قرا أن الموضوع مايخصوش فأداله ضهره ولو صدق أنه حيصبر عشر سنين غلب ويأخد حقه حيصبر أما لو نصاب نخبوى وعده بفكر جديد وفلوس هايخدهم وينتخبه ويواصل الأنسحاب وهى دى الخطورة
ترتيبة من يمثلهم عماد أديب هى إيجاد مرشح مقبول ولو نسبيا لدى النخبة ومقبول دوليا ثم يقوموا هم بشراء باقى الأصوات ( طبعا بعد تعديل المادة السودا إياها ) والنتيجة أنه يكسب أنتخابات الرياسة ولو ب2% أو3% و دة كلامه بالنص وبالتالى يصبح له من الشرعية ما يمنع الأعتراض سواء من قلة الشرفاء الباقية أو من مؤسسات الدولة والكل يبلع فى بقه جزمة ويسكت مدة رئاسية على الأقل وإلا يكون خارج عن الشرعية أمام الداخل والخارج
محمد المهدى

جبهة التهييس الشعبية said...

مؤسسة رعاية الاحداث يا ميدو
والغريبة انه مستغربة ان فيه حد بيتكلم صح في البلد دي

هو حد عاد بيتكلم صح كده؟

جبهة التهييس الشعبية said...

المناضل
شالله ميرسي

المهدي

بص
هي حاجة كويسة وحاجة وحشة
حاجة كويسة ان الغلابة في البلد دي لسة نضاف

وحاجة وحشة اللي ماسكين البلد دي مش هم الغلابة

حـنــّا السكران said...

هو فعلاً ربنا خلقه صح و بقي صح لأنه لم يختلط فينا نحنا العاهات .
والله كلام عبد المنعم يوازي كتب كاملة انكتبت .. و أثّر فيي أكتر من كلام حكماء العصر و الزمان , بهالزمان و بزمانات مضت .و إصراره الفطري على حقه بهذا الشكل هو دليل على أن النسخة الأصليّة من الإنسان لم تنقرض بعد .

البنفسج الحزين said...

انا جسمي قشعر لما قريت اللي انتي كاتباة عن عبد الله
عبد الله ده بيمثل( فطرة الله التي فطر الناس عليها) زي الاطفال كده شايفين كل حاجه علي حقيقتها الابيض ابيض والاسود اسود ماتلوثش بالواقع المرير اللي بيخلينا نقلب الحقايق ونقول ع الرشوة اكراميه والواسطه تقضيه مصلحه والخنوع للذل مطاطيه للريح عشان تعدي ما انشاله عنها ماعدت بس الانسان يعيش ويموت بكرامته... 

جبهة التهييس الشعبية said...

جو

اه يا جو، الظاهر اننا عاهات فعلا ولا بنفهم ولا بنحس وفاكرين نفسنا "الطبقة التي ستنهض بالمجتمع" بلا نيلة، لو ابادونا المجتمع ح يتحسن

جبهة التهييس الشعبية said...

البنفسج

طب ح اقول لك حاجة تانية عليه
عبد المنعم لما كان لسة في المؤسسة جم بتوع العاشرة مساء عايزين يعملوا حاجة عن مؤسسات التربية وطلبوا واد من العيال يطلع في التلفزيون يتكلم

تصدقي بايه؟

المسئولات من الجمعيات والمتطوعين خافوا على العيال وقالوا لا مش ح نبعت حد من العيال احسن المدير والمشرفين يئذوهم

والعيال بقى، كل واحد فيهم كان بيتسابق على انه يطلع يقول الحقيقة، مش عشان ح يطلع في التلفزيون ويتشهر مثلا، هم كانوا عارفين انهم ح يغطوا وشهم في التصوير

بس عشان "لزمن نقول الحقيقة للناس وللكانون" تصدقي
وعبد المنعم طلع مع منى الشاذلي وقال كلللللللللل حاجة

وطلع دينه بعدها وما هموش

جبهة التهييس الشعبية said...

على فكرة هو مش يتيم، هو لقيط

ده بس عشان الناس اللي بتحذر من اللقطاء انهم مش عارفة ايه ويقولوا عليهم ولاد حرام
انا مش شايفة ولاد حرام غيرنا

مهندس حر said...

لو عندنا مليون من عبدالمنعم وقفوا فى ميدان التحرير و قالوا الغازية لازم تنزل .. كان زمان الغازية نزلت و إرتحنا .. بدل ما إحنا قاعدين نتباحث فى تشريع قانون للنزول الآمن و مختلفين إذاكانت تنزل بملاية السرير و ألا نبعت نجيبلها هدمة تستر بيها نفسها..

جبهة التهييس الشعبية said...

عندنا اكتر من مليون يا مهندس

بس مش لاقيين حد يقول لهم يعملوا ايه وليه؟

المهدى said...

شكرا يانوارة على الرد وكمان على الأتفاق مبدأيا على أنها حاجة كويسةومش كويسة أن الغلابة بخير ولكن خلينا أحنا كمان نحاول نكون بخير خلينا ننتبه للكمين اللى معمول للكل ومش حيدفع ثمنه غير عبد المنعم وأخواته , مدى الخط لأخره الأن جزء من النخبة تتحدث بأسم الشعب وتطالب ( إما عن جهل أو عمالة ) بتعديل المادة 76 وطرح مرشح مقبول شعبيا ولامع دوليا (قبل عامين ) وآخرين نعلمهم جيدا فجأة اصبحوا مؤيدين لنفس التعديل ولا يمانعوا من ترشيح أى شخصية عامة
دول بقى لو أتلاقوا تبقى مصيبة لأنهم حيشتروا مصر حيشتروا الغلبان المهتم بالشأن العام عم طريق الأعلام الموجه وحيشتروا الغلبان المنصرف مباشرة بمتين جنيه للصوت والنتيجة نحن جميعا قد تتحسن أوضاعنا نسبيا فلم يعد هناك أسوأ مما نحن فيه أما عبد المنعم فمصيره سيكون كمصير أقرانه فى أمريكا اللاتينية ولاحظى جيدا أن أقتراح قد يبدو مقبولا ومعقولا لكل من نظن فيه بقية من شرف كمبادرة هيكل يبدو غير مقبول تماما من الطرفين
هما عايزين مرشح فورا
محمد المهدى

simplymoi said...

He is still positive person who is full of hope. God bless his soul we should encourage him not the opposite. Without his belief in law & order he could be criminal but this faith that is still protecting his soul from the corruption of the life, without his faith he will be one of the gangs. The criminal is created not born criminal.

عبد الزهراء المصري (علي الحسيني) said...

صراحة ياأستاذة نوارة أنا لما قريت البوست ده أتصدمت ... أي والله أتصدمت .
وقال أحنا اللي كنا فاكرين أننا أحنا الطبقة المثقفة اللي مفروض عليها توجيه الناس .
والنبي يانوارة تكتبي لنا عنوان الأخ عبد المنعم علشان نورح نتعلم أزاي نقدر نكون مواطنين بيطالبوا بحقهم بدل الخيبة اللي أحنا فيها دي .

علي الحسيني

جبهة التهييس الشعبية said...

مش عارفة موضوع مرشح للرئاسة

بس اللي عارفاه ان بدل ما الحركة الوطنية قاعدة تتباضن على نفسها وترغي مش بتهتم بيهم ليه؟

سيمبل موا

طب اعمل ايه؟ اعمل ايه؟ انت بتحسسيني بالذنب كده
اروح معاه المحافظة؟
ح اشبهه
هو انا مين اصلا
ممكن جمعيات اهلية تساعده
بس ما تعرفيش العيال دي بالذات بتتعامل مع الجمعيات الاهلية على انها حل مؤقت وان الحل الحقيقي ح ييجي من الدولة عشان هم ولاد الدولة
ده احساسهم

طبعا جمال مبارك شايف ان دول عقليتهم زي الستينات

حسبي الله ونعم الوكيل

طب قولي لي اعمل ايه؟
بجد

عبد الزهراء
انا بقى قرفانة من نفسي
وحاسة اني بضان

المهدى said...

زمان الأعلام الأمريكى كان بيتعمد ترسيخ جملة ما ( ما كان يعرف بالإتحاد السوفيتى ) أحب أقولك أنه هناك ما كان يعرف بالحركة الوطنية ناس مش قادرة تعمل حاجة لروحها بكل ماتملكه من سلاطة علم ولسان ممكن أزاى تعمل حاجة لعبد المنعم
لاتملك تجيب ولا تشيل ولا تحاسب والقادم لو تعلمون مرير وهناك قطار لا يرحم أسمه مرشح تحالف رجال الأعمال والقوى الدولية للرئاسة لو جاء فسنترحم على قطارات منصور المهترئة وأول الضحايا هو عبد المنعم وأول الراكبين هم الحركة الوطنية
علمتنا الأيام أن لما تكون مصر الدولة بخير بتكون مصر الغلابة بخير
محمد المهدى

Amr said...

العكس تماما" ياأبله
الناس دى لسه مخرجوش دنيا
يعنى زى الطفل الصغير مولود على الفطره
,مايعرفش يكدب, بيضحك على طول, يعيط لما يجوع

الناس دى لسه ماتلوثتش بالزباله اللى بره(واسمحولى اقول الزباله كده فى وسط القعده)

أصبرى عليهم شويه كده وأرجعى بصى عليهم

وصاحبنا ده أتحط فى أول موقف هايقابله جوه صفيحة الزباله
بس ياريت تعرفيه أنه كده يادوب وصلته الريحه بس .

الخوجة said...

شوفوا الحتة دى
المادة 48 من الدستور

أنفاس الصباح said...

نوارة
عبد المنعم مازال يثق فى الدولة والقانون لانه ابنها ده صحيح
هو لسه معرفش الحقيقة زى الى خارج المؤسسة
لو عاش شوية هيعرف واما انه يبقى زينا يتكلم وخلاص او يتحالف مع الدولة ضدنا لاننا بنتكلم وخلاص
انا مع المهدى رغم ان كلامه مؤلم

فتاه من الصعيد said...

عبد المنعم ما بيتفرجش على تليفزيونات تيجبله احباط

عبد المنعم دخل المؤسسه واقنعوه انه محبوس علشان القانون ياخد مجراه

عبد المنعم ما اتعملوش غسيل مخ من شويه المثقفين اللي بيخدوا جوايز الدوله التشجيعيه وهما عندهم ستين سنه

ولا بيشتموا الحكومه ويشجبوا التطبيع وتاني يوم يحضروا حفله الموسيقار الاسرائيلي في الاوبرا

عبد المنعم لسه بشوكه

تحياتي

simplymoi said...

Nawara
Try to make an episode about social housing corruption and let him appear; put him on spot light as example of social housing corruption in TV, Newspapers everywhere.

Please Nawara ask all your friends, relatives and their friends till you find someone who can find his right but never let go down. He wants to stay clean just help.

يوميات الحارة said...

هههههههههههه
رائع هذا البوست
جمعت بين فن المقال فى هذة التدونية ولك ان ترتفع الان وتان بصوت جهور بعدما اتضاح انه احتل كرسى العرش وجند التابعين فى كل الاتجاه وخاصة الفيس بوك للتهليل له والمناداة باسمة فى كل حدب وصواب

المهدى said...

متشكرين يا أنفاس الصباح ربنا يجبر بخاطرك بس أنا قصدى مش أنه حيتلوث لأ حيفضل نضيف لكن وهو نضيف بيتعامل بمنطقه ( النضيف ) الخاص لو أنت صادق حيقراك كويس ويصدقك ويصبر معاك ولو نصاب برضه حيقراك بس حياخد مصلحته الآنية ويحتقرك ويديلك ضهره وهذا هو السلوك المصرى العتيد جزء منه تحضر ونبذ للعنف وجزء منه تاريخ مديد من المظالم كل ده مقدور عليه ولكن الجديد هو الأصرار من جانب مجموعة من المشبوهين داخل الدولة وخارجها على تعديل المادة 76 وتقديم مرشح فورا ونضيف على ده أقتراح الخروج الآمن
يعنى نفهم من كدة أيه
1- مافيش جمال
2-محاولة تقديم مرشح مقبول لدى ما كان يعرف بالحركة الوطنية
3- إستغلال هذا السلوك المصرى العتييد وهنا تكمن الخطورة ) لشراء دولة
وفى نفس الوقت وبنفس الحماس ترفض أى مرحلة أنتقالية لأنها غير دستورية ( اللى عايزين يعدلوا المادة أياها للمرة الثالثة )
وكمان عشان إشراك الشعب ( اللى عمرهم ما شافوه )
هل من الممكن أن يكون كل هذا عبث أو مصادفات أو أوهام واحد خايف على بلده
وأخيرا هى مجرد أفكار واحد متابع شايف أشياء غريبة تقلق وكنت أتمنى أن أجد لديكم ما يغيث
محمد المهدى

أبويوسف said...

This is the best article i ever read here Nawara .

Thanks to you and to Abd-Elmeneim.

مش فاهمه said...

مش عارفه ليه افتكرت فيلم اللص و الكلاب اهو عبد المنعم لو وقع فى ايد حد من اياهم ممكن يخليه يسوى الهوايل و هو مفهمه انه بيعمل الصح و ده الطريق علشان ياخد حقه
الحمد لله انه وقع فى ايدك انت يا نوارة
المشكله ازاى نجمه الناس النضاف سواء المثقفين او البسطاء الأنقياء دول من غير ماحد يستغلهم عايزن ندور على الطريقه الصح اللى نتجمع فيها كلنا مع بعض و نكون كيان يتعمل له حساب و يبقى لنا رأى فى اليغمه اللى داخلين عليها دى

Dr Nemo said...

فى العاده مبدخلش اقول تدوينه حلوة او وحشه
بتفاعل
لكن المره بجد
مقال او تدوينه لانه حاجه بين البينين
جمييييييييييييييييييييل/ه جدا جدا جدا
من غير كلكعه كلام
ولا شحتفه على الغلابه
طريقة عرضك لكلامه
مست قلب كل واحد قرى
لدرجة اننا ممكن نسيبنا من المظاهرات والوقفات ووجع الدماغ بتاع جيمى الثانى
ونلم بعض نروح نعتصم معاه عشان ياخد شقة المحافصه بتاعته
ربنا ينورهالك اكتر واكتر