انا ما كنتش اعرف ان ام هيثم مرات عبود دمها خفيف كده

بصوا باعتة لابراهيم عيسى تقول له ايه:

في 13 أكتوبر1981 م دخل عبود وطارق الزمر إلي غياهب سجون مصر وفي ذات اليوم تم الإستفتاء علي الرئيس حسني مبارك ودخل هو الآخر إلي قصر العروبة ويبدو أنه قد أعتبر أن الحدث الأول مرتبط ارتباطا متلازما بالحدث الثاني لهذا واجهت أسرة الزمر إصرارا كبيرا علي عدم الأفراج عن أبنائها رغم إنتهاء أحكامهما منذ ثماني سنوات.

ههههه، استغفر الله، الظاهر الغلب علمها السخرية، انا والله مش باضحك على مصابها، ربنا يفك ضيقتها ويفك اسر جوزها واخوه، ويجزيهم عني انا شخصيا كل خير والله. ويتقبل اللي اعدموا في الشهداء. على الاقل تحملوا مسئولية اللي عملوه. المقال ياريت تقروه كله، وقد اورد الاستاذ ابراهيم عيسى خطاب للرئيس الراحل انور السادات، وما كان اكثر خطاباته، وهو يفاخر، قبل مقتلة بشوية صغننين، بانه قتل امين عثمان، وعامل لنفسه، اي السادات، مرافعة طويلة عريضة ازاي ان مشاركته في قتل امين عثمان ده كان انتقام الشعب المصري من الوزير الخاين، ليه الوزير ده خاين؟ عشان جوز مصر من انجلترا جواز كاتوليكي، امممم، امال اللي لا مؤاخذة نيم مصر مع اسرائيل من غير حتى ورقة عرفي تثبت بيها نسب مرضى سرطان الاطفال وتصدير الغاز حاجة ببلاش كده والمصريين اللي بيتموتوا على حدودها برصاص القناصة يبقى ايه؟ ما علينا، المهم يعني، لو السادات بطل يبقى عبود وطارق وكل اللي معاهم ابطال، لو هم مجرمين يبقى هو كمان مجرم، بس اتعلموا بقى حكمة الدنيا:

تقتل وتنكر جريمتك قدام المحكمة وتطلع براءة تبقى رئيس جمهورية

(لا وفيه ناس بتدافع عن جبنه في مواجهة المحكمة وبيعتبروها نباهة ونصاحة)

تقتل وتواجه وتعترف (زي اي صعيدي قفل من المنيا) وتتحمل مسئولية اللي عملته وتاخد عليه العقوبة القضائية اللي يقررها القانون بعيدا عن العاطفة تبقى مجرم

(والله يرحمه خالد كان صعيدي من اصل تركي، يعني مقفول من كل ناحية)

تضرب بلدين وتقتل تلاتة مليون تبقى بتحارب الارهاب

تضرب برجين وتقتل تلاتلاف تبقى ارهابي

تدك بلد باللي فيها تبقى دولة

تضرب كام صاروخ يعوروا اسفلت الشارع تبقى جماعة ارهابية

تخون بلدك بمساندة القوى العالمية تبقى رئيس

تدافع عن بلدك وانت لوحدك مالكش غير ربنا تبقى حكومة مقالة

هي الدنيا كده... خلاص، ح نعمل ايه؟ ح نغير الكون؟ الكلمتين دول تحفظهم عن ظهر قلب كويس قوي وتقول لهم بعد ما تخلص اذكار الصباح والمساء عشان ماتجيش في الاخر تتهور وبعدين تتعور، او على الاقل لما تتعور ما تعيطش

المهم انا مش صعبان عليا غير الست اللي عايزة جوزها يقضي ايامه اللي فاضلة له في بيته، محبوس بقاله تمن سنين بدون وجه حق، ده لو كان قتل صحابي كان زمانه طلع، دي مش عارفة تزوره، مش عارفة تزوره ليه؟ عشان هو مفرج عنه

اي والله عليكم، الراجل مفرج عنه وعشان كده ما ينفعش تطلع له تصريح زيارة، بس هو قاعد شوية كده جوة عشان وراه شوية حاجات بس ح يخلصها ويطلع على طول، مسافة تلات عشر خمسين سنة كده

هم حاجزينه عندهم ليه؟ متآنسين بيه مثلا؟ راجل بركة؟ بيجيب لهم الرزق؟ ما خلاص، هو فيه نفس يعمل حاجة؟ ما كل الجماعة بتاعتهم تابت وانابت وقالت انا حسحس وحسحس انا هالله هالله ع الجد والجد هالله هالله عليه، هو عبود ما قالش، بس كفاية اللي كرم قاله، ده هبل في الكلام بما يكفيه هو وشعب مصر كله

كفاية الراجل كل شعراية في جتته يا اما بيضت يا اما وقعت