ايه يا خالد يا يوسف ده؟

هو انا بقالي كام يوم باقع بدري، مش بابقى قصدي انام، بس فجأة باروح على الساعة عشرة حداشر كده، امبارح ماما صحتني بالعافية عشان اتفرج على العاشرة مساء كان فيها جمال بخيت وخالد يوسف ممثلين للي ضد التطبيع وإيلي شالوم (علي سالم سابقا) والراجل بتاع الاهرام ده اللي عمري ما بالحق اسمع اسمه، رحت اودة التلفزيون ومددت على الكنبة وابتدى جمال بخيت يتكلم كلام كويس وبعدين لقيت ماما بتصحيني اروح انام في سريري: ايه اللي حصل؟

قالت لي: قفلت، خالد يوسف كان بيرد على علي سالم وبيقول له "طب ما العرب قعدوا قد ما قعدوا في الاندلس وبعدين عشان فضلوا محاطين بالكراهية لحد ما مشيوا"!! ايه يا خالد ده يا خالد؟ ياريتك ما نطقت يا شيخ، المصيبة اني انا عارفة انه كويس ووطني ونيته مخلصة، بس الكلام الكتير يغلط كتير، ايه وجه المقارنة ما بين الاندلس واسرائيل؟ اللي اطردوا من الاندلس كانوا من السكان الاصليين واطردوا عشان دينهم مش عشان اغراب ولا محتلين، هي الاندلس كانت دولة استيطانية؟ هم العرب في الاندلس طردوا السكان الاصليين وقعدوا ناس تانية مكانهم؟ 

 جمال بخيت قال ما الاتحاد السوفييتي اتفكك، بس مافيش اي مقارنة ما بين اسرائيل وما بين اي حد، الحقيقة ما شفناش قبلها ولا بعدها، هي الناس بتحاول تلاقي لاسرائيل شبه ليه؟ مالهاش، هو فيه دولة في الدنيا اتأستت بقرار وله رقم كمان عشان تلم شوية عيال صيع مطلوبين؟ لا وقلالات الاصل كالعادة، بعد ما الامم المتحدة اسست لهم البلوة غدروا عليها وقالوا ما احناش سامعين الكلام، ودلوقت هم اكتر ناس بيشتموا في القلل المنتحرة ونازلين فيها تهزيء لحد ما رئيس وزراءهم راح شتم الامم المتحدة كلها واحنا اللي اخدنا على قفانا منها اللي ملتزمين بكلامها، طبعا، حد يجيب شوية مجرمين ويعمل لهم دولة؟

انما ليه خالد يوسف يتفلسف؟ ما يتكلم من غير ابتكارات، لو فيه اي شبه يبقى الشبه الوحيد هو اللي الشماليين عملوه وطردوا سكان اصليين عشان دينهم وخيروهم ما بين تغيير دينهم وما بين الهجرة من بلدهم، اصلا ما كانش فيه حاجة اسمها اسبانيا ولا الاندلس لما طارق ابن زياد دخل بالاتناشر الف بتوعه اللي ما ينفعش يفتح بيهم ازازة كازوزة مش شبه جزيرة ايبيريا، بس ربنا سترها معاه، والعرب كانوا دايما كده، لا مقاتلين، ولا كانوا فالحين في حاجة الحقيقة، بس ناس طيبة ومتكلين على الله وعددهم قليل جدا وربنا بيسترها معاهم، وده يبقى احتلال ايه ده ناهيك على انه يتقارن بعصابات مسنودة على قوة استعمارية زي انجلترا؟ قوم تروح يا خالد يا يوسف تشمت فينا الناس؟ انت مش شايف اننا بنمر بأسوأ مراحل تاريخنا وكل كلب اتجرأ علينا، بس وماله، بكرة تروق وتحلا، واحنا لينا اجر اننا مستحملين وصابرين، والحمد لله ان فيه نت وتسجيلات عشان يتسجل الكلام ده، عشان اللي جايين كمان خمسين، مية، ميتين سنة، مش مهم امتى، انما اللي جايين يجمعوا الحساب ويعرفوا مين قل اصله معانا ومين كان معانا على الحلوة والمرة والحساب يجمع، وانا باسجل اهو للاجيال القادمة: انا مش مسامحة، مش مسامحة حد ابدا، مش مسامحة كل الدنيا اللي خيرنا عليهم ياكلوه وينكروه ويذلونا، حاسبوا لي على مشاريبي ده حقنا عليكوا، احنا استحملنا وشفنا اللي ماحدش شافه وفضلنا ماسكين اهو، لا غيرنا ولا بدلنا، واتحبس دمنا كتير من اللي خلعوا مننا، وطلعوا عينهم برضه، تاخدوا لي حقي.

هو العالم بيتصرف كده على اننا رحنا ومش جايين ليه؟ هو فيه حد بيروح ومش جاي؟ جايين ان شاء الله، واحنا معروفين، احنا بالذات لما ربنا بيفرجها السكك بتتفتح بزقة والله ما بنعملش مجهود، بس هو زمن صعب، كل الامم مرت بظروف صعبة، وخلاص، فيه اللي ما صدق، وفيه اللي يأس، وفيه اللي كان مداري نفسه واول ما لقى الشلاليت نازلة علينا من كل ناحية قالك اما ادخل في الزحمة كده اديهم شلوت مش ح ياخدوا بالهم، وفيه اللي عمل زي الفيران واول ما المركب مالت جري، وفيه اللي يجي يصلح يقوم يعك، وفيه اللي تغابى، وفيه اللي عايز ياكل عيش، وفيه اللي لسة بيتصرف على انه ابن الباشا وح يودينا في داهية بالاطته، احنا ما ينفعش نتصرف كأننا لسة زي ما كنا، لازم نهدا شوية خصوصا ان احنا وقعنا في ايد اللي يقدر ولا يعفيش، بس وماله وماله، إنما يوفى الصابرون أجرهم بغير حساب، الصبر بس، الصبر، انما مش طالبة غباوة، كفاية اللي احنا فيه، ده خالد يوسف مفروض انه عامل فيلم عن الاندلس! طيب مش يذاكر؟ ده الدكتور طاهر مكي عامل ابحاث طويلة عريضة يثبت فيها ان بعد اقل من خمسين سنة من دخول العرب كل الدماء اللي كانت في الاندلس كانت اوروبية لان اصلا العرب اللي دخلوا مش كتير، وللا دي لخبطة في القدرة على القياس وللا ايه؟

هو زمن صعب، هو زمن صعب، مالوش غير الصبر على مكارهه بكل اشكالها من اول وساخة علي سالم لحد ذكاوة خالد يوسف