مين بقى اكرم زكري القيادة الامريكية الوسطى؟

ههههههههههههه هي ايه القيادة الامريكية الوسطى دي؟ ومين اكرم زكري اللي سايب لي التعليق ده

وتعود بالنفع ازاي علينا يعني؟ يعني احنا عشان ساعدنا الجزائر في حرب التحرير وساعدنا الفلسطينيين في منظمة التحرير فاضحينهم عليها لحد دلوقت ومتخيلين انهم عبيد احساناتنا وماسحين بيهم البلاط، امال بقى اللي بتأكلنا وتشربنا وتلبسنا وتسلحنا وتدربنا تعمل فينا ايه؟ ودي بقى علاقتها بينا مش زي علاقتنا احنا بالجزائر وفلسطين، دي امريكا، دولة استعمارية حقيرة حقيييييييييييييييرة حقيييييييييييييييييرة ما عندهاش ادنى احترام للانسان ولا اي تورع عن اقتراف اسوأ الجرائم في التاريخ، دي دولة استفتاحها لبن بالصلاة ع النبي وقعت قنبلة ذرية على الناس، وحرقت مليون في فيتنام، وقتلت مليون ونص في العراق، وعطشت بلاد ما بين النهرين وعندهم ازمة مية وتضاعفت نسبة مرضى السرطان في العراق في السنة الاخيرة بسبب اليورانيوم المنضب، وقتلت حوالي مليون ونص تانيين في افغانستان، يعني بالصلاتو ع النبي تلاتة مليون في تمن سنين، وما تعرفش ربنا يعني، يعني تاخد صدام على حجرها وتهننه وبعدين تشنقه على الهوا هوب هوب، يعني تحط شاه ايران في نني عينها من جوة وبعدين تخلع منه اول ما شعبه يرفضه، يعني تعمل انقلاب في هندوراس وانقلاب في فنزويلا وتشأمظ نيكاراجوا وترتكب فيها جرائم حرب وتستخدم فيها اسلحة محرمة دوليا، يعني تضغط على عباس حبيبها وصاحبها عشان يأجل التقرير وتشيعه وتبيعه وتخلي طوب الارض ينعل سنسفيل جدوده عشان تحمي اسرائيل، وهي مش حاطة في اعتبارها، او حاطة ومش مهتمة، ان بعملتها دي عباس ممكن يتقتل بمنتهى البساطة، في داهية، مش مهم، مش لجل عيون اسرائيل، بس عشان اسرائيل زي ما ريجان قال: كلب الحراسة الامريكي في الشرق الاوسط، يعني حتى اقرب حليف ليها في العالم بتحتقره وبتعتبره مش اكتر من كلب حراسة، دي دولة وسخة، دولة وسخة، ولو فيه اكتر من وسخة كنت قلت، ومتهورة وخرقاء، وعاملة زي عيل عنده سنتين ماسك مسدس بحق وحقيق ومعمر رصاص بجد، وسياستها برجماتية، وتفتخر بانها برجماتية، برجماتية يعني ما عندهاش اخلاق من اي نوع، وواحد من ادارة اوباما لسة سامعاه بوداني النهاردة بيقول بمنتهى البجاحة: لو ايران تملكت سلاح نووي ح تهدد "الهيمنة الامريكية في الشرق الاوسط"، والله العظيم قال كده قال:

it will threaten the US domination in the Middle East

ومصر غلبانة، غلبااااااااانة، احنا روحنا في ايد امريكا، ما ينفعش كده، ما ينفعش روحنا حتى تبقى في ايد ليبيا، مافيش بلد في الدنيا بتحترم نفسها تبقى روحها في ايد اي بلد تانية، على الاقل تعمل اي تحالفات تانية، توزع البيض في عدة سلال بحيث لو امريكا ضايقتنا يبقى لنا حلفاء تانيين نركن عليهم اذا ما كناش قادرين نركن على نفسنا، انما نبقى معلقين في الهوا كده؟ ما كل الدول المحترمة عاملة تحالفات كتير، دي هيلاري راحت روسيا قام في نفس اليوم بوتين الكياد راح الصين، هي كوريا الشمالية روحها في ايد مين غير نفسها؟ البرازيل روحها في ايد مين؟ الصين روحها في ايد مين؟ احنا ازاي نعمل كده في نفسنا؟ واحنا بالنسبة لامريكا عمرنا ما ح نبقى زي اسرائيل اذا كانت دي اجمل احلامنا، مهما حاولنا ولحسنا الجزم، اسرائيل قاعدة عسكرية امريكية، ومضمونة لان كل حاجة فيها صناعة امريكية بما فيها الناس العادية، اللي ما يسمى بالشعب ده اللي هناك ده، كله فابريكا، مافيش حاجة طبيعي، وبرضه في اي لحظة تخلع منهم لو احتكم الامر، بس مش ح تستخلفنا بيهم، احنا هبل وللا ايه؟

احنا كلنا ايه وشربنا عليه مية من التعاون مع امريكا ورميتنا الوسخة في حضنها؟ دي سوريا اقتصادها بقى احسن مننا وبقينا نستورد فول وقمح منها، سوريا، سوريا المتحاصرة، اللي مواردها وتعدادها ومساحتها اقل مننا بكتير، وبطلوا حرب في نفس الوقت اللي احنا بطلنا فيه حرب، هم عندهم نسبة الفقر عشرين في المية واحنا خمسين في المية، ليه؟ المفروض اننا باديين مع بعض بعد الحرب، والمفروض ان وضعنا كان احسن من وضعهم، انا مش بانبر عليهم، بس احنا وسوريا، الاختين الحلوين هناء وشرين، كل حاجة ما بينا مشتركة ما عدا قاسم واحد بس: امريكا واسرائيل. احنا وقعنا في حجر امريكا واسرائيل وهم ما اتخانقوش ولا حاجة، بس جمدوا علاقاتهم. واحنا المفروض رجعنا سينا وهم ما رجعوش الجولان، والمفروض ان الجولان بالنسبة لسوريا زي سيناء بالنسبة لمصر، يعني مكان سياحي ممكن يجيب استثمارات ويدخل دخل كويس. طب ليه هم اقتصادهم احسن؟ وليه مستواهم المعيشي اعلى؟ وليه عندهم صناعة وزراعة احسن؟ ما شاء الله يعني، بس انا عايزة افهم

طب احنا استفدنا ايه؟ حد يقول حاجة واحدة م اللي ربنا كتبها علينا، انا فيه واد طيار في الجيش عنده 23 سنة قال لي: اسرائيل ممكن تموتنا بالليزر، ولما صحابي كانوا على الحدود اتكلموا مع الظباط وقالوا لهم: احنا مش قد الناس دي... على اسرائيل. والثابت بالدليل القطعي ان امريكا حريصة على انها تدينا جيل من الاسلحة متأخر عن اسرائيل عشان نفضل احنا اقل منها. طب ايه الفايدة؟ ماهو احنا المفروض ما عندناش عدو تاني بيهدد المية والسد العالي وبيبعت لنا اكل مسرطن وكل ما يلاقي خرم في الحيطة يدخل لنا منه تعبان غير اسرائيل، حد تاني بيهددنا؟ حد سمع ان فيه بلد في الدنيا هددت السد العالي غير اسرائيل؟ فيه حد تاني ضرب حدودنا واخترق مجالنا الجوي؟ في مخلوق تاني بعت لنا تقاوي مسرطنة؟ فيه حد تاني بيلعب في افريقيا وبيحرض دول حوض النيل علينا عشان تموتنا من العطش غير اسرائيل؟ فيه دولة تانية بتعمل كده؟ طيب احنا ناس بتوع مشاكل يعني؟ يعني احنا بنحارب حد غير اللي بيحاربنا؟ طب اه، احنا حاربنا دولة ما حربتناش، العراق، حاربنا العراق، احنا كان مالنا؟ محبة في الكويتيين يعني؟ هأو، اذا كان الكويتيين نفسهم بيقولوا لنا لولا القرشين اللي هبشتوهم من امريكا ما كنتوش عبرتونا، انتوا جيتوا بالامر من امريكا، اه، صح، كلامهم مظبوط، لا وببجاحتنا بنعايرهم اننا شاركنا في تحرير الكويت، هو احنا رحنا بمزاجنا؟ امال المظاهرات اللي كان فيها الاف دي كانت بتعبر عن مزاج مين؟ وبس عشان الاخوة الكويتيين ما يزعلوش، اه كان فيه مظاهرات بعشرات الالاف ضد اننا نشارك في حرب الكويت، مش عشان احنا عايزين الكويت تحتل، بس عشان احنا كنا شايفين ان فيه وسائل اخرى غير ضرب العراق، يعني اذا كان ضرب الكويت غلط فضرب العراق برضه غلط، ثم احنا عملنا سلام مع زفتة اسرائيل والسادات قال نو مور وور، نقوم نسالم اسرائيل ونحارب العراق؟ يعني احنا اهو، رحنا حرب غصب عننا اهو، ليه؟ عشان مين غصب علينا؟ طيب اللي غصب علينا مرة ما يعرفش يغصب علينا كمان مرتين تلاتة عشرة؟ ما لحم كتافنا من خيره وده سلاحه وتدريبه ومالناش حد غيره، يتشرط زي ماهو عايز

طيب لما دولة بتتحرش بينا ليل نهار، وبتهددنا ليل نهار، ويوم ما مسحنا لها جوخ واحتاجناها في اليونسكو مخمضتنا في بقها زي القطة اما تعذب فار قبل ما تاكله وبعدين تفتنا برة اليونسكو، وفوق ده كله عمالة تشوه سمعتنا في كل حتة لما وصل الامر بالناشطين اليساريين في اوروبا وامريكا انهم اثناء حرب غزة شتموا مصر زي ما بيشتموا اسرائيل بالظبط من كتر ما اولمرت وبيريز وليفني شكرونا في المصيبة اللي عملوها، احنا مالنا؟ احنا مش طرف في الحرب دي عشان كل ما يعملوا كارثة يشكرونا احنا، ايه حكاية نشكر مصر والرئيس مبارك في كل بلوة دي؟ سودوا وشنا في كل حتة في العالم ووحشوا صورتنا، انا شخصيا امريكان وطلاينة وفرنساويين قالوا لي: انتوا متحالفين مع اسرائيل ضد الفلسطينيين، ولما اقول لهم لا يقولوا لي: ليفني قالت وبيريز قال واولمرت قال طب ليه كده بيغلسوا علينا؟ يعني عاملين زي الرقاصة اللي حاطة راجل في دماغها وفي الرايحة والجاية ترمي عليه بالكلام وترمي زبالة قدام بيته وفوق ده كله تقعد وسط الناس وتقول: انتوا مانتوش عارفين، ده اخر الليل بيستنى اما تناموا وييجي يبات عندي في البيت، اوريكوا فانيلاته؟

طب مساعدات امريكا المشكورة دي، نفعتنا في ايه في ده كله؟ اذا كانت امريكا مصممة انها الوحيدة اللي تساعدنا عشان تضمن اننا نفضل متأخرين عن اسرائيل مش عشان تساعدنا اننا نتقدم

حد هنا عنده مخ؟ عشان تكسحنا وتضمن انها مكسحانا، زي الممرضة اللي بتدي العيان دوا غلط ومصممة ان ماحدش يديله الدوا غيرها عشان تضمن انه يموت، وهو بهبله عمال يقول: والله نبوية دي فيها الخير، بتيجي يوم اجازتها عشان تديني الدوا، احنا بنفهم وللا ايه؟

برضه مين اكرم زكري ده؟ وايه القيادة الوسطى الامريكية؟