Sunday, 4 October 2009

الثلاثاء القادم بدء المحاكمة الشعبية ووقفة احتجاجية ضد اقتحام المسجد الاقصى

الثلاثاء القادم، يوم ستة اكتوبر، الساعة اتناشر الضهر في نقابة المحامين ح تبدأ المحكامة الشعبية لمصدري الغاز لاسرائيل ان شاء الله، وبعدها الساعة واحدة الضهر ح تبقى وقفة احتجاجية، على سلم النقابة طبعا :)، احتجاجا على اقتحام مسجد الاقصى
انا عندي شوية ملاحيس:
1- مافيش داعي للاهتمام بعلي سالم، انا مش فاهمة ايه سر تسليط الضوء على الجربوع ده بعد ما كان مرمي في مزبلة التاريخ، مين اللي طلعه من الزبالة ونفضه وحطه على الترابيزة؟ ياريت اللي طلعه يرجعه مكانه على ما اروح اجيب ازازة الديتول، ده واحد لا هو ولا نوال الزعبلاوي لهم اهمية ولا مفروض يبقى لهم اهمية
نوال الزعبلاوي راخرة راجعة بقوة والظاهر راجعة من برة مدّفية كويس
2- انا محرجة جدا اني اقول اللي ح اقوله ده، بس مضطرة: حد يذكر لي واقعة واحدة تنم عن ان التعامل مع اسرائيل مفيد للبلد دي، ماحدش عاد يتكلم عن الاسرى اللي اتقتلوا وضحايا بحر البقر، احنا من هنا ورايح ح نتكلم على اللي عملته فينا اسرائيل بعد اتفاقية السلام، مش هي دي اللي بعتت لنا فراخ مسممة سنة 92 وقتلت كل اللي اكلوها؟ مش هي دي اللي بعتت لنا تقاوي مسرطنة عمالين يشحتوا على ضحاياها دلوقت؟ مش هي دي اللي بعتوا لها البذور تعالجها جينيا قامت خلت الزرع يطلع من غير ثمر ومن ضمنها ثمار القطن وخربت بيت الفلاحين؟ مش هي دي اللي لسة من كام شهر مهددة السد العالي بتاعنا؟ مش هي دي اللي بعد ما سعد الدين براهين عمل قرد لامريكا عشان تستغنى عن عوكل وبالفعل ابتدت مجهوداته البهلوانية تجيب نتايجها وماحدش لحق عوكل عند امريكا غير شارون؟ مش هم دول اللي مقعدين عوكل على قلبنا لدلوقت؟ ومع ذلك كل شوية والتانية يلسعوه على قفاه قدامنا عشان يهزأوه ويقلوا قيمته؟ يعني فارضينه علينا وحتى مش عايزين يهنونا عليه، مش هم دول اللي كل شوية القناصة بتوعهم، بدون اي سبب منطقي، ينشنوا على المواطنين في رفح كنوع من انواع التسلية؟ مش هم دول اللي من غير ما نعمل لهم حاجة، وبرغم كل ندالتنا مع الفلسطينيين نزلوا هبد ورقع في حدودنا وكل شوية يضربوا حدودنا ولسة ضاربينها في المناورات بتاعتهم من كام يوم؟ ووصل بينا الذل والاهانة ان بعض الناس تقول: يعني هم ضربوا الحدود بس ما دخلوش جوة! واقتحموا مجالنا الجوي وخرقوا اتفاقية كامب ديفيد اكتر من مرة لما ضربوا جوة حدودنا؟ مش هم دول اللي حاولوا يشتروا حدودنا وشواطئنا من خلال وكلاء مزيفين؟ وكانوا ح يشتروا ميدان التحرير كمان؟ واحنا ساكتين، بلاش ده كله، مش هي دي اللي عملنا لها عجين الفلاحة ونوم العازب عشان تعدي فاروق حسني واخدتنا على خوانة وغدرت علينا في اخر لحظة بعد ما نكلت بالراجل وقعدت تعصر فيه اربع جولات؟ مش دول اللي فضلوا ورا دول منابع النيل عشان تقلل حصتنا من النيل؟ احنا كنا عملنا لهم ايه عشان يعملوا فينا ده كله؟ ما احنا كافيين شيرنا خرنا وفي حالنا، هات بترول يا زكي قدرة يجيب زكي قدرة، قب بالغاز يا زكي قدرة يقب زكي قدرة، اقفل على الفلسطينيين يا زكي قدرة يقفل زكي قدرة، لحد ما وصل الامر ان بعض من اللي مسميين نفسهم معارضة تعهدوا عند امريكا انهم يرعوا مصالح اسرائيل لو جم بدل عوكل، طيب بيسرطنونا ويسممونا ويعطشونا ويضربونا ليه؟ وبيهددوا السد العالي بتاعنا ليه؟ احنا كنا عملنا ايه؟ ده كل ده واحنا عاملين مقاطعة شعبية، وكللللللل ده بعد ما بقالنا اكتر من تلاتين سنة عاملين معاهدة سلااااام، بعد ما خلعنا من العرب وعملنا معاهم شغل منايفة وقلنا لهم امكوا في العش وللا طارت، بعد ما قلنا لهم نو مور وور، مش بنحاربهم ولا بنهددهم بالحرب اصلا، امال لو فتحنا الباب على البحري وعدينها ح يعملوا فينا ايه؟ ح اعيد الكلام اللي قلته في احد التعليقات:
احنا دولة ضعيفة، احنا بلد هشة، واجهوا الحقيقة، احنا بلد مش عارفة تلم زبالتها من الشارع، مش عارفة تعالج شوية عيانين من غير شحاتة، مش عارفة تحل مشكلة رغيف عيش من غير ما تنزل الجيش يأكل الناس عيش، وقالوا الجيش ح يحل مشكلة الزبالة، الجيش ح يلم الزبالة، عشان الدولة مش عارفة تلمها بعد ما انضحك عليها من الشركة الايطالي وانا وانتوا لسة بندفع لهم فلوس، مش عارفة تطلع رخص لسواقين الميكروباص، مش عارفة تلم البلطجية من الشارع، مش عارفة تعمل شبكة صرف صحي وبتقول ان الناس هي سبب انفجار المواسير عشان بياكلوا كرات!!!! اي والله العظيم، مش عارفة تحط سبت زبالة وللا تجيب كناس في الاماكن السياحية قامت منعت المصريين من زيارتها، مش عارفة تسيطر على انفلوانزا الطيور، مش عارفة تعمل حاجة خالص، خالص، ربنا ساترها معانا بالبركة، احنا مش حمل اننا نفتح الباب على البحري لناس كل ما يلاقوا خرم صغنن يدخلوا لنا منه تعبان اصفر بالرغم من كل حسن النوايا اللي عمالين نظهره ده احنا اتخانقنا مع سوريا توأمنا اللي احنا وهم كنا زي اللب والسوداني كده ما يفترقوش عشان خاطر يرضوا عنا، ومافيش فايدة، لو هجموا علينا بالتطبيع مش ح نعرف نعمل لهم حاجة، ده حربهم اسهل واضرارها اهون من التطبيع معاهم، مش عشان حربهم سهلة، بس على الاقل عشان ح نعرف راسنا من رجلينا، انما التطبيع ح يبقى لسع على القفا ونيجي نتدور مش ح نلاقي حد ورانا، وكلام مجموعة كوبنهاجن السافلة، سافلة فعلا، بتاع: انتوا ما عندكوش الشجاعة تطبعوا مع اسرائيل (قذرين قوي، قوي يعني) خلينا نعتبره صحيح، اه، ما عندناش الشجاعة، ايه الشجاعة في اننا نرمي نفسنا في سرطان وتسمم وتعطيش وتهديد لا ينقطع، عشان ايه؟ عشان شعرهم اصفر وعينيهم ملونة مثلا؟ اذا كان الجعانين واقفين على حدودنا مش عايزين نفتح لهم وبنقول لهم سيبونا في حالنا احنا فينا اللي مكفينا، نقوم نفتح على نفسنا ابواب جهنم؟
على فكرة، الكلام اللي فوق ده وسخ قوي، قوي يعني، بس الواحد مضطر يقوله، الزبالة ملت البلد، واحنا مضطرين نتعامل مع الامر الواقع، مافيش مجال اننا نتكلم عن المبادئ والاشياء التي لا تشترى، لا مؤاخذة يا عم امل دنقل، ماعدش ياكل الكلام ده، احنا ماشيين نقول يا حيطة داريني

16 comments:

مواطن مصري said...

هو بس سؤال كدة هي المحاكمة الشعبية دي ليها لازمة انا بحس انها تمثيلية و تضيع وقت

و بعدين ما سوريا عاوزة تعمل اتفاقية سلام مع اسرائيلبوساطة تركيا عشان ترجع الجولان

الله يرحمك يا سادات كان زمان سوريا معاها الجولان دلوقتي

Ahmed Nasr said...

بصي، أنا مش هتكلم عن علي سالم لو تقصدي حلقة العاشرة مساء بتاعة امبارح..
لأنه حقيقي، نبيل شرف الدين كان هو الأحقر والأكثر حماقة والأزبل على الاطلاق..

احتقاره للمقاومة ورميه بالتهم على حماس واحتقاره لدولة سوريا الشقيقة ودولة إيران (اللي هي دولة فعلا على خلاف حالتنا) كان بجد ينطبق عليه المثل الشهير "كلم الـ**** تلهيك، واللي فيها تجيبه فيك"

شفتي اترمى ساجد ازاي لما علي سالم اقتبس من نجيب محفوظ كلام عام لا ينطبق أصلا في حالتنا؟..نفاق ثقافي ملوش حد بصراحة..
لدرجة انه استفز منى الشاذلي وراحت مفتوحه فيه زي المترليوز..

بجد مش طالبة معايا هبل وحقارة وسفالة وقلة أدب..

علي سالم آخر مرة كنت شفته فيها كانت فوق العشر سنين ومن يومها كل ما بفتكره باتمنى ميكونش لسة عايش..ساءني فعلا اني شفته صاحي وبيلعب امبارح..

والزفت التاني الله يحرقه ويحرق أمثالهم..

آخر حاجة بقى واللي محدش اتكلم فيها ولا فتح بقه..
انه محدش فيهم تناول المسؤولية الأخلاقية..ولا كان يقدر..
فضلوا يتكلموا عن المنافع والمفاسد المادية، أما الأخلاق والقيم..انسى، مش دول اللي يتكلموا فيها لأنه واضح انهم فكر مادي تماما لا مكان فيه للقيم..

منى عملت محايدة وقالت احنا مش هنخون ولا هنعمل، أنا مش محايد وضد الحياد والحياد نفسه في الحالة دي ذنب أبرأ إلى الله منه..

ومهما كانت التحفظات على خالد يوسف أو أفلامه ولا حتى هيفاء وهبي شخصيا، يظلوا أنظف وأرقى وأكثر احتراما من أمثال علي سالم أو نبيل شرف الدين..

جبهة التهييس الشعبية said...

انا ما عنديش تحفظات على خالد يوسف، عندي نقد لافلامه، بس خالد وطني ونزيه وصاحب موقف، بس غبي يا احمد
ايه المقارنة ما بين الاندلس واسرائيل؟

كتر خيرك انك قلت لي على اسم قرف الطين ده لاني كل شوية انسى اسمه
انا مش فاكرة غير بقه ودقنه الاستفزازيين دول
مش ممكن ربنا يرضى عن بني ادم ويخلق بقه شكله كده ابدا
وللا ربنا سخط شكله هو وايلي شالوم

مسئولية اخلاقية ايه يا احمد؟

انت مش شايفني باقول ماعدش ياكل الكلام ده احنا ماشيين نقول يا حطية داريني؟

Ahmed Nasr said...

هو موضوع الأندلس هو اللي استفزني برضو في كلامه..
لأنه حتى فكرة الكراهية للأندلس في الوسط المحيط مسألة فيها نظر وكلام..لأن الأندلس فعلا في الفترة دي كانت رمز الرقي وكان المثقف عند الأوروبيين هو خريج جامعات الأندلس، بخلاف حالتنا هنا، الأندلس بالنسبة لهم كانت زي أمريكا بالنسبة لنا دلوقتي أو بريطانيا..أكسفورد وكامبريدج وهارفارد..

على فكرة احنا، أنا وانتي واللي زيي وزيك مش مفروض نقول يا حيطة داريني، مش احنا علي سالم ولا الزفت التاني، لو قلنا يا حيطة داريني دول هيركبونا بعد شوية ويمشونا على كيفهم..

وحتى لو كانت السلطة بقت رمز للخيانة والعمالة لازم كل شوية نفكر كل اللي يسمعنا انه دول خونة وعملاء، باعوا القضية..

ولازم كمان الأسلوب الواطي بتاع شرفنطح ده، بتاع فصل مصر عن محيطها العربي ومشكلة الفلسطينيين مش مشكلتنا وضرب تونس والعراق مش قضيتنا..كل السفالة دي لازم نشاور عليها بسهم ونكتب عليه "سفالة"
ده منى الشاذلي بتقول له أنا أقدر أقول عليه سفاح وهو ميقدرش يقولها عليا، باعتبار اننا أعطينا استحقاقات السلام في حين امتنعوا هم، لقيته بيقول لها مانتي بتشتميه أهو وهو مش بيشتمك!!!

خليني ساكت أحسن دمي فاير من امبارح..

e7na said...

ربنا يستر بجد
جيفارا البديرى كانت بتقول من دقائق ان فيه احتمالات كبيره ان الجيش الاسرائيلى يسمح للمتطرفين بالدخول
للاسف فيه صمت كبير سواء من السلطه او من حماس
التحركات أقل من خطورة الحدث بكتير يا نواره
سواء فى فلسطين او هنا
فيه سكوت مستفز من الاخوان
واحنا شكلنا كمان اخرنا بانرات ودعوات على الفايس بوك
...
انت عارفه اكتر حجه تغيظ فى موضوع على زفت سالم ونبيل شرف الدين ده
مش مكتفين بانهم اوساخ
بيروجوا للوساخه
...
@ مواطن مصرى عبقرى
حضرتك السادات كان هيجيب الجولان لسوريا
؟؟
وده امتى ان شاء الله؟
مش لما كان يجيب لنا سينا اساسا
ارحمنا يا عم لحاج احنا ناس عيانه ومش ناقصين
وياريت تجمع توصياتك واستراتيجيتك مره واحده وتنشرها
بلاش تتحفنا كل مره بنظريه جديده

جبهة التهييس الشعبية said...

بص يا احمد
كلامك من حيث المبدأ صحيح، بس مش كل حاجة من حيث المبدأ صحيحة تبقى صالحة للاستخدام في توقيتات معينة

احنا يا احمد بنمر باسوأ مراحل تاريخنا
تداعت علينا الامم فعلا، ما ينفعش دلوقت نفضل نتصرف زي احمد مظهر في الايدي الناعمة، مش دلوقت على الاقل

اجيلك دوغري واقول لك شوية كلام وسخ بالمرة بقى مدام كده كده دمك محروق


فيه مسرحية انجليزي اسمها
she stoops to conquer
هي تنحني لتنتصر

احنا مافيناش حيل، الناس ما عادش فيها حيل، وبقى فيه ثقافة عامة: ابجني تجدني، ظرفني تعرفني
انا ح اطلع من الموضوع ده بمصلحة وللا لك ورغي وخلاص؟

ده واقع، لازم نتعامل معاه

والواقع كمان اننا مش طالبين من الناس يتخلوا عن مصلحتهم من اجل المبادئ، دي حقيقة كمان، الحقيقة انه ولحسن الحظ، المبادئ اتفقت مع المصالح، وده نادرا ما بيحصل
بس اهو حصل والحمد لله عشان ربنا عالم بينا اننا غلابة قوي يا سيد، جابها لنا من عنده عشان ما نقعش في اشكالية احنا مش حملها في الوقت الحالي

الدنيا للاسف ماشية بمبدأ المهزوم غلطان وارهابي والمنتصر القوي هو اللي معاه حق

بن لادن ارهابي عشان ضرب برجين بس وقتل تلاتلاف بسسسس

لكن بوش بيحارب الارهاب عشان احتل بلدين وقتل تلاتة مليون

هي الدنيا كده
بس الضعيف صاحب حيلة برضه، مش معنى انه ضعيف وما يقدرش يهاجم انه مضطر يقبل انه يتهاجم
مش لازم الست اللي بتغتصب تعمل بمبدأ
relax and enjoy it
تقدر تصرخ تقدر تروح تقدم بلاغ في القسم اذا ما كانتش تقدر تقتل اللي اغتصبها ولا تقدر تمنع اصلا انها تغتصب

هم طالبين مننا حاجة احنا مش مضطرين ليها اننا
relax and enjoy it
طب وليه؟ ايه اللي جابرنا احنا؟

خاطبوا الناس على قدر عقولهم يا احمد، الناس هلكانة ومستنزفة خالص مافيهاش نفس لا لمبادئ ولا حتى اخلاق

بس معلش
بكرة تروق وتحلا

مواطن مصري said...

احنا انت الظاهر مش شايف و مش حاسس

سينا رجعت لينا من زمان و مصر انتصرت في حرب اكتوبر و رجعت سيناء

احنا انتصرنا و الي يقلل من قيمة الانتصار دة من الاخر ميتسهلش انة يكون مواطن مصري

بدراوى said...

انا ليا سؤال بايخ معلش

طبعاً انا مقدر المجهود اللى بتعمليه فى اى بوست بيبقى ثرى بالمعلومات اللى بتفدنى

بس السؤال بقى
هو حضرتك ليه مش بتهتمى بتنسيق الموضوع

و ترك فراغات و مسافات بدل ما كله لازق فى بعضه يخلى الواحد يتوه و هو بيقراه و يتعب

بدراوى said...

تفريغ الحلقة بشكل شبه كامل
نقلاً عن اليوم السابع
--------
http://www.youm7.com/News.asp?NewsID=142053#


العاشرة مساء.. الشاعر جمال بخيت: إسرائيل تمارس أعمال الحرب على مصر.. والكاتب على سالم يرد إسرائيل ليست عدواً
مناظرة بين مثقفين مع التطبيع وضد التطبيع

الضيوف:
المخرج خالد يوسف ضد التطبيع
الشاعر جمال بخيت ضد التطبيع
المؤلف المسرحى على سالم مع التطبيع
الكاتب الصحفى نبيل شرف الدين مع التطبيع

فى فقرة ساخنة استمرت لأكثر من ساعتين، هاجم الشاعر جمال بخيت والمخرج خالد يوسف المثقفين المؤيدين للتطبيع مع إسرائيل، وأكدوا أن التطبيع جريمة، فيما دافع نبيل شرف الدين وعلى سالم عن التطبيع، وطالبا بإعادة مراجعة

مفهوم التطبيع، وأكد الثانى أن إسرائيل ليست عدواً لمصر، وفى موقف مثير وأثناء إلقاء جمال بخيت لقصيدة تهاجم التطبيع قاطعه الكاتب على سالم قائلا – بأسلوب لا يخلو من السخرية - "التكييف تعبنى هدخل الحمام" إلى أن انتهت القصيدة، وعاد بعدها.

اعتبر جمال بخيت التطبيع مع إسرائيل جريمة، وهاجم لقاء الدكتورة هالة مصطفى رئيس تحرير مجلة الديمقراطية مع السفير الإسرائيلى بمكتبها بالأهرام. وقولها إنها التقته فى العلن وأمام الناس جميعا،

وقال "لا توجد جريمة سرية، وأخرى علنية، فالجريمة ليس لها علاقة بالظروف المحيط، ورفض بخيت اعتبار إسرائيل دولة، مطالباً أن نطلق عليه الكيان الإسرائيلى أو الصهيونى، لأنها الوحيدة فى العالم التى لا توجد بها ورقة رسمية تحدد لها حدودها.

فيما رد عليه نبيل شرف الدين قائلا إسرائيل حقيقة موجودة دبلوماسيا وجغرافيا، وتساندها كل دول العالم، وزملاؤنا فى المهنة فى إسرائيل يلتقون أى مسئول مصرى بدءاً من السفير حتى رئيس الدولة، ولكننا فى مصر لا نستطيع أن نلتق سفير إسرائيلى فى بلد

بسبب "فزاعة التطبيع" التى تستخدم ضدنا، والتى تجعلنا أول الخاسرين، وشدد شرف الدين على أن عدم التطبيع يمكن اليمين المتطرف الإسرائيلى من الوصول للسلطة، وأن التواصل مع المجتمع الإسرائيلى يحقق مصالح مصر والفلسطينيين، كما اعتبر حماس صنيعة إسرائيلية لشق وحدة الصف الفلسطينى.

بينما دعا خالد يوسف إلى أن ننقل لأبنائنا حقيقة أن هذا الكيان الإسرائيلى مغتصب، لكى لا ينسى أحد مؤكداً أن حائط الصد الوحيد للمقاومة هو رفض التطبيع الذى لو زرعناه فى

قلوب أطفالنا فهو كفيل بانتزاع هذا الكيان من الأمة، وردا على سؤال منى الشاذلى هل يقبل العمل مع إسرائيليين مخرجاً لفيلم ضد إسرائيل قال يوسف سأقول له "لن أفعل، إلا إذا حارب فكرة دولة إسرائيل، ليقدم لنا فكرة للإنسانية".

فيما اتهم على سالم من يقفون ضد التطبيع قائلا "إنهم يربون الكراهية داخل قلوب الناس وينعون بروباجندا الحرب، رغم أننا فى حالة سلام، وأكد أن إسرائيل لا تسرق الأفلام من مصر كما ندعى، وإنما باعها التليفزيون المصرى لهم، وهو ما رفضه خالد يوسف وقال "هذا الكلام غير صحيح وهم يسرقون الأفلام".

وقال جمال بخيت رداً على ما أثاره على سالم بأننا فى حالة سلام، بأن إسرائيل منذ اتفاقية السلام وهى تمارس أعمال الحرب على مصر، وقتلت يحيى المشد، وتمارس دوراً خطيراً فى دول حوض النيل، وتساءل ماذا كسبنا من التطبيع، ونحن عندما طبعنا معها فى الزراعة انتهى القطن المصرى طويل التيلة.

فيما دعا نبيل شرف الدين إلى بناء ثقافة التعايش والتواصل مع الإسرائيليين رافضاً أن يحمل إسرائيل "ما سماه" بضعف الدبلوماسية المصرية، واعتبارها شماعة نضع عليها أخطاءنا.

فيما قال على سالم فى انفعال، حالة السلام مع إسرائيل حقيقية ولن تحدث حرب بيننا وبين إسرائيل، إلا فى حال وصول اليمين المتطرف وإلغائه اتفاقية السلام،

وإسرائيل ليست عدواً، وقضيتنا هى وجود دولة فلسطينية تعيش بسلام مع إسرائيل، وليس من حق أحد أن يهاجمنا بسبب التطبيع، أو يعتبرنا مجرمين. كما انتقد نبيل شرف الدين اتخاذ الدولة إجراءات وقيود على السفر إلى إسرائيل داعياً إلى أن تحسم اختياراتها.

e7na said...

طلعتنى مش شايف ومش حاسس ومش مصرى كمان
والله يا ابنى انت صعبان عليا

مدير التحرير said...

أكد عدد من المواطنين الفلسطينيين بأن مستوطنين يهودا من الجنسين، يقومون بأعمال "غير أخلاقية" أمامهم بهدف مماحكتهم أو إذلالهم. وقال المواطن
أن آخر مشهد رآه يوم أمس قبالة معسكر حوارة جنوبي مدينة نابلس شمال الضفة الغربية، حيث لاحظ مستوطنًا ومستوطنة يتعانقان ويتبادلان القبل على الشارع الرئيس. وأشار إلى أنه لاحظ بأن المستوطنين كانا ينظران باتجاه سيارته قبل أن يصل إلى مكانهما، وبمجرد وصوله قام المستوطنان بتبادل القبل بطريقة وصفتها بـ"غير أخلاقية".
وأكد المواطن عايد محارب الذي كان برفقة زميله شحادة، بأنه على قناعة أن مثل هذه "التصرفات" مقصودة وليست عبثية، موضحا بأنها ليست المرة الأولى التي يرى فيها مستوطنين أو جنود أو عناصر شرطة إسرائيلية من الجنسين يتبادلون القبلات الحارة على الشوارع الرئيسية، مؤكدًا أنهم يتعمّدون القيام بذلك أمام الفلسطينيين.

خالد منصور: الهدف تعويد الفلسطينيين على وجود الإسرائيليين بواقعهم
ويقول الناشط البارز في مجال مقاومة الاستيطان خالد منصور لـ"ايلاف" بأن الإسرائيليين يحاولون منذ بداية احتلالهم للضفة الغربية "نشر الدعارة والسموم بمختلف أنواعها بين الشباب الفلسطيني". وأضاف: "فلا عجب أن يقوم بعض الشباب الإسرائيلي بمثل هذه التصرفات المشينة أمام الفلسطينيين، ويوضح منصور وهو من قيادات حزب الشعب الفلسطيني، بأنه يعتقد أن الاسرائيليين يتعمّدون ذلك محاولة منهم لفرض وجودهم على الشعب الفلسطيني، وان يقبل الفلسطينيين هذا "الانسان الاسرائيلي" بواقعه وبعاداته، وأن يكون وجوده بين ظهرانيهم أمرًا طبيعيًّا. ويعرب منصور عن اعتقاده بأن سياسة الحكومة الاسرائيلية وأذرعها المختلفة فشلت في ترويض الشعب الفلسطيني، على الرغم من كل الاساليب الترغيبية والترهيبية التي استخدمتها مع الفلسطينيين. ويؤكد بأن مثل هذه "التصرفات" المشينة لا تزيد الشعب الفلسطيني الا اصرارًا على وجودهم وهويتهم العربية الفلسطينية، وقال: " حتى الشباب غير المتدين من الممكن أن تكون ردة الفعل لديه حين يشاهد هذه الممارسات بأن يصبح متدينا كنوع من التحدي، لأنه على قناعة بأن المقصود من هذه التصرفات هو هويته الوطنية ووجوده".

نادي الأسير: ليس غريبًا...!!
من جانبه، قال رئيس نادي الأسير الفلسطيني في محافظة نابلس رائد عامر لـ"ايلاف"، بأنه لا يستغرب مثل هذه الممارسات، موضحًا أنّ جميع المستوطنين خاصة المتمركزون في منطقة نابلس يتميزون بأنهم لصوص وقتلة وعديمي الأخلاق، ولم يستبعد عامر أن تكون مثل هذه الممارسات "مدبرة ومخطط لها" بهدف الترويج للإباحية أو محاولة إذلال الفلسطينيين الذين يرفضون مثل هذه التصرفات غير الأخلاقية. وقال عامر بأن الأجهزة الأمنية الإسرائيلية الرسمية تعتمد مثل هذا الأسلوب، مستذكرًا الواقعة التي حصلت مع الأسير سلطان عبد الله سليمان "21 عامًا" من مدينة رام الله بالضفة الغربية قبل حوالى شهر، والذي أعلن في حينه لمحامي نادي الأسير بأن السجانين في سجن عوفر أصبحوا يستخدمون أسلوبًا جديدًا في التحقيق، حيث يأتون بفتاة تدعى "نورا" ويدخلوها على الأسير أثناء التحقيق معه وتدخل الفتاة بملابس شبه عارية وتجلس أمام الأسير وتبدأ بإصدار أصوات والقيام بحركات لإغرائه وتقترب منه لدرجة ملامسة جسدها جسده ثم تبتعد وذلك بغرض الحصول على اعترافات، ونقل عامر عن الأسير سلطان قوله بأن هذه الفتاة أصبحت أكثر ما يعاني منه الأسرى أثناء التحقيق.

مواطن مصري said...

بس نسيتو مداخلة محمد صبحي كانت رائعة و الله

Ahmed Nasr said...

تقرير اليوم السابع مش دقيق، شغل ملء فراغات برضو..

المهم، والله يا نوارة أنا مش ضد الكلام في المصلحة، إذا كانت المصالح والمفاسد بتؤثر بشكل أو آخر حتى في الأحكام الشرعية، يبقى من باب أولى مش هنتجاهلها في أحكام الواقع..أنا معاكي في كدة..

لكن كمان مينفعش الكلام كله يبقى مصالح مادية صرفة، وانا مختلف معاكي أنا أعتقد انه دايما بتكون المصالح على المدى البعيد هي في التزام الجانب الأخلاقي، حتى لو بدا في بعض الحالات العكس، لكن حتى في هذه الحالات، بعد ما نبين المصالح اللي هتعود علينا من التزام جانب العدل والحق، لازم برضو نرجع ونتكلم عن المسؤولية الأخلاقية، ولو خمس دقائق..
لأنه المسؤولية الأخلاقية في النهاية مفيش جدل حواليها، علي سالم ونبيل زفت الطين حاولوا يفلسفوا الأمور وحاولوا يخترعوا مصالح متخيلة من التعامل مع اسرائيل، عادي، كل الناس ممكن تجادلك حتى في انه الشمس تشع ضوءا وحرارة، لكن محدش فيهم هيعرف أبدا يرد عليكي يوم ما هتقولي انه ميشرفنيش يكونلي علاقات طبيعية على أي مستوى بالسفاحين وقتلة الأطفال..
ده اللي باقوله..

كان المفروض أي واحد يقول لهم ومين اللي هيتحمل مسؤولية تلويث اسم مصر وتعاملها مع قتلة الأطفال والسفاحين؟..ياللي بتدّعوا حب مصر وانه قلبكوا على مصر..

ولما انتوا مش عارفين تطلعوا أي مصلحة حقيقية من تعاملنا مع العدو، عالأقل افهموا انها عالم متشرفش عشان نتمحك فيهم..

مهندس حر said...

لو شايفة إن كل اللى فى إيدينا نعمله هو إننا ناخد الناس على قد عقلها و نقبل منطق المصالح و مانجرحش مشاعر أهلهم بالكلام عن المسئولية الأخلاقية و الحقوق التاريخية و كل الكلام اللى مابقاش بياكل مع الأجيال المغيبة بالجهل .. لو ده آخرة صبرنا يبقى أحسن لنا نتمدد و نستنى لما عربية الزبالة تعدى و تلمنا و تقلبنا فى مزبلة التاريخ..

إحنا غلابة قوى يا نوارة لما نعترف إننا غلابة و إن ماعادش فيه فايدة .. و ساعتها تبقى دى إهانة حقيقية لكل حاجة إحنا مؤمنين بيها و إهانة للحق اللى المفروض إنه بيعطى صاحبه القوة..

ما تقوليليش كلام أمل دنقل مابقاش يأكل عيش .. أمل دنقل لسه حى رغم إنه مات و إيلى شالوم مات و إتدفن رغم إن لسه بيلوث الهوا بزفارته..

منطق المصلحة ما ينفعناش و لو قررنا نتكلم بيه يبقى هنرمى كل حاجة فى الزبالة .. منطق المصلحة هوه اللى بيقول نطاطى لأمريكا و نلحس جزمة إسرائيل عشان كام رجل أعمال يشفطوا البلد و يستفردوا بيها مشفية بدون أى مسئولية من مسئوليات الدولة اللى كان إسمها مصر

جبهة التهييس الشعبية said...

لا الحقيقة يا مهندس منطق المصلحة ما بيقولش خالص اننا نطاطي لامريكا ونلحس جزمة اسرائيل

وده الواقع احنا مش محتاجين نعمل بطولات مالهاش لازمة

البطولة الحقيقية (اذا اعتبرنا ان العمل ضد المصلحة بطولة) هو اللي احنا بنعمله دلوقت، اننا بنطاطي من غير اي مناسبة

لاننا ما اكلناش حاجة ولا شربنا عليها مية

حقيقي يعني
يعني عمالين نطاطي ونلحس الجزم، ايه الفايدة اللي عادت علينا؟ جول لي حاجة واحدة من اللي ربنا كتبها علينا؟

منطق المصلحة هو اللي دول تانية ما كانتش اقوى مننا ولا حاجة وعملته
انا تابعت مصلحتها بصرف النظر عن رضا امريكا واسرائيل
اللي بينفعها تعمله وامريكا واسرائيل يشربوا من البحر واعلى ما في خيلهم يركبوه
زي ايران مثلا
زي حتى تركيا اللي عاملة علاقات مع اسرائيل وعلاقاتها كويسة قوي بالغرب
بس مصلحتها اهم

لكن اللي احنا بنعمله ده مش منطق المصلحة خالص
ده من منطق احبه مهما اشوف منه ومهما الناس قالت عنه
او فعلا من منطق
relax and enjoy it

Nohaz said...

read no comment cause if i say anything it will be cursing 7asbona allah wa ne3ma al wakeel
they made children write msgs on the bombs b4 attacking lebonon and u ask us not to hate them??? how come when they teach kids how to hate us
how come while they killed our children in ba7r al baqar and workers of the factory ???
ya rab ya rab er7mna be ra7metak ya rab
and the amazing thing is that some accept that and are members of the group..... tell me plz how can this be
how can i love my enemy??