Monday, 12 October 2009

بيان اللجنة المصرية لمناهضة الاستعمار والصهيونية حول مناورات النجم الساطع


اللجنة المصرية لمناهضة الاستعمار والصهيونية

بيان الي جماهيرالشعب المصري حول :

مناورات النجم الساطع

تجري الآن، ومنذ 10 سبتمبر الماضي وحتي 10 توفمبر القادم ، جيوش دول أجنبية علي رأسها أمريكا المناورات العسكرية المسماة " النجم الساطع " ، وكانت أمريكا تجري هذه المناورات بمشاركة قوات مصرية فقط منذ سنة 1980 وتتكرر كل سنتين علي الاكثر ثم انضمت لها تباعا دول أخري , ويبلغ عدد الدول الاخري في مناورات هذاالعام عشرة دول هي : بريطانيا ، فرنسا ، المانيا ، ايطاليا ، هولندا ، اليونان ، باكستان ، تركيا ، الاردن ، الكويت .

وطبقا اتصريحات رسمبة مصرية منذ بصعة ايام ، تهدف هذه المناورات إلي تنمية علاقات التعاون العسكري ، وتقريب المفاهيم بين القيادات ، والتدريب علي القيام بعمليات عسكرية مشتركة ، وتبادل الخبرات ، ورفع مستوي القوات المشاركة في القتال الليلي والبحري والجوي واعمال البحث والانقاذ والامداد وإدارة الأزمات وجمع المعلومات وغيرها . وليس هذا عجيبا ولا غريبا علي حكومة بلادنا للأسف التي لم تخجل من وصف الولايات المتحدة الامريكية - العدو الرئيسي لشعبنا وشعوب العالم أجمع - بـ " الصديق الخاص " و " الحليف الاستراتيجي " وذلك منذ وقعت اتفاقية الاستسلام والاذعان المسماة " اتفاقية السلام مع اسرائيل " سنة 1979.

فالعاركل العار لحكومة تقبل بالتعاون العسكري والتدريب علي القيام بعمليات عسكرية مشتركة وتتبني مفاهيم مشتركة مع القوات المسلحة لاعداء بلادنا وشعبنا المصري والشعوب العربية .

من هو العدو الذي تتدرب هذه الجيوش بمافيها جيشنا علي الحرب عليه؟ أليس هو بلاد وشعوب المنطقة باستثناء اسرائيل طبعا؟وهل يوجد في عالمنا المعاصر اعداء لاستقلالنا وتحررنا وتقدمنا غير الاستعمار الامريكي والاطلسي والكيان الصهيوني الذي توكد أمريكا وحلفاؤها الاطلسيون كل يوم حمايتهم له وضمان تفوقه علي كل القوات المسلحة العربية؟

ياشعبنا المصري الأبي .
اعداؤك يدربون جيوشهم علي أرضك وفي بحارك وسمائك علي العوان عليك وعلي اشقائك من الشعوب العربية الأخري، فهب تسمح باستمرار هذا الهوان وأن تبقي ساكتا عي ما يعدونه لقهرك وليدوم حرمانك من وطن عزيز كريم ومستقبل افضل وسعيد لأبنائك واحفادك؟

ياشعبنا الأبي .. ياكل الوطنيين والاحرار في مصر.

ارفعوا صوتكم عاليا ضد هذا الهوان ولوقف هذا الخطر واتقشوا علي اعلامكم مهمة أساسيية وملحة هي وقف مناورات النجم الساطع والغاء التسهبلات العسكرية المتاحة للقوات الامريكية والاطلسية في بلادكم الغالية .

11 اكتوبر 2009 اللجنة المصرية لمناهضة الاستعمار والصهيونية

-----

تصدقوا بايه؟ اللجنة دي كان فيه واحد... وبعدين سابها.. وبعدين.. هييييييه، سبحان من له الدوام، المهم

اكون او لا اكون دخلت مشكورة وسابت لي لنكات بخصوص الصحفي السويدي اللي فجر متاجرة اسرائيل باعضاء الفلسطينيين، (على الله يا عباس يطلع لك عمولة في دي كمان ما انت تعملها) كتر خيرها لاني كنت قريت انه بيتعرض لتهديدات كتيرة بالقتل وما بقتش عارفة اعمل ايه وسابت لي كمان لنك فيه ميله وتليفونه، احنا طبعا كالعادة ح نعمل زي الباز افندي ونبعت نشد من ازره الراجل، عمار يا سويد


31 comments:

مواطن مصري said...

مناورة النجم الساطع متعارف عليها
على مستوى العالم في نفس الوقت لو ملفناش حد نتدرب معاة نتدرب يكون قوي زي امريكا مع السودان يعني

على فكرة تركيا ايضا في مناورة النجم الساطع

مواطن مصري said...

و دي فيها اية

وطبقا اتصريحات رسمبة مصرية منذ بصعة ايام ، تهدف هذه المناورات إلي تنمية علاقات التعاون العسكري ، وتقريب المفاهيم بين القيادات ، والتدريب علي القيام بعمليات عسكرية مشتركة ، وتبادل الخبرات ، ورفع مستوي القوات المشاركة في القتال الليلي والبحري والجوي واعمال البحث والانقاذ والامداد وإدارة الأزمات وجمع المعلومات وغيرها


انا شايف انة عادي

دي مناورة

مواطن مصري said...

و بعدين احنا في حالة سلام مع امريكا مش في حرب

المعلم برعى صاحب القهوة said...

تانى انا مش عارف ايه العادة دى فى انك تقلبى الحق باطل ، وايه الجريمة فى مناورة عسكرية جوية نصقل فيها قدرات قواتنا الجوية بالأشتباك مع قوات من دول أخرى حتى يومنا هذا لازلنا بنشحت الطيرات اللى سايقنها منهم بل وكل اللى العلم اللى عندنا فى مجالات الحرب الحديثة من بنات أفكار الأمريكان والانجليز والالمان اللى مش عجبينك ، حاولى تفرقى مابين كراهيتك للعدو الاسرائيلى ومصالحك الشخصية كبلد مع دولة زى امريكا

جبهة التهييس الشعبية said...

يا سلاااام؟
مصلحتي؟
ايه مصلحتي مع امريكا بقى وهي دولة استعمارية؟ وهي اسرائيل ح تدربنا بحيث اننا نبقى قوة فعلا؟ وللا بس بتعمل المناورات دي عشان تتجسس علينا؟ وتتأكد اننا ما عندناش قوة كافية لمواجهة اسرائيل عشان تضمن ان النظام ده لو مشي ما يجيش حد يهدد اسرائيل؟

هي ايه اهمية السلاح في الحرب اذا ما عندناش سرية؟ اذا هي اللي بتسلحنا وهي اللي بتدربنا ده عشان ايه؟ عشان يعني ح نحارب مين لما امريكا هي اللي بتسلحنا وهي اللي بتدربنا؟
وليه ماحدش بيقول علينا بننفذ اجندة امريكية زي ما بيقولوا على حماس بتنفذ اجندة ايرانية لمجرد انها بتتسلح من ايران مع ان ايران بقى متفقة معاها في الاهداف والمنطلقات لكن احنا ايه وجه الاتفاق بينا وبين امريكا في اهداف او منطلقات عشان خاطر تبقى هي اللي مسلحانا ومدربانا وعارفة الوان ملابسنا الداخلية؟

القدرات العسكرية دي عشان تستخدم ضد مين؟

ودولة زي امريكا دي مش دولة، ده احتلال بيقتل ناس وهو اللي ورا اسرائيل وبيساعدها

وبتتكلم عن الحق والباطل

انا عمالة ادور على سبب لتغبيش الرؤية بالطريقة دي، مش عارفة سبب غير عوكل بوظ مخ الناس باللي عمله فيهم

mido said...

المعلم برعى صاحب القهوة@

بص يا برعى

انت نفسك بتقول ان كل اسلحتنا او اغلبها من الدول دى ؟

صح ؟

الاسلحة دى كلها ملهاش اى لازمة فى اى مواجهة مع اسرائيل

لأنها منزوعة الدسم لو جاز التعبير

و ده بشهادة احد العاملين فى المجال العسكرى

الامريكان مثلا يصنعوا الاسلحة و يبعولك السلاح ناقص اهم جزء فيه

و فى نفس الوقت يدوا اسرائيل احدث جيل و بكده يضمنوا انك اضعف

بل متراقب كويس عن طريق التتبع فى الاسلحة دى
----------

كنت حنسى اقولك

ان دول الخليج اكبر مستورد للأسلحة من الغرب

و هم لا يفقهوا شىء فى الاسلحة دى على الرغم المليارات اللى بتتصرف

مجرد تخليص مصالح لشركات السلاح الاجنبية و عمولات و سمسرة

و راجع صفقة اليمامة

الخلاصة :

لازم بتقى ليك استقلالية

فى صناعة السلاح

و الغذاء


علشان تبقى بنى ادم

مطلق said...

مواطن مصري

هي مش امريكا دي فشخت اخواتك في العراق و افغانستان و الصومال و لبنان

فوووووق يا عم الحاج

جبهة التهييس الشعبية said...

امبارح في العاشرة مساء

واحد - كعادة كل اللي بيدافعوا عن عباس - بيقول ان عباس معذور لان اوروبا ضغطت عليه لان كل الرواتب وكل المعيشة اللي عايشها في حركة فتح وكل فلوس الاونوروا فلوسها جاية من اوروبا وعشان كده هددوه بقطع الفلوس لو ما اجلش التقرير

ده واحد بيتملى املاء قراراته عشان بياكل ويشرب على حساب الاوروبيين

ولما امريكا تبقى بتأكلنا وتشربنا وتستثمر لنا وكمان تسلحنا وتدربنا يبقى لنا عين ازاي نقول ان لنا سيادة او ان قرارنا من دماغنا

لا ومش غايظني غير اللي بيقول "احنا في سلام مع امريكا ده" وقابل اننا نعيش شحاتة على فلوس وكفاءات وتدريبات واسلحة امريكا الاستعمارية اللي بتقول لنا في وشنا علاقتنا باسرائيل غير قابلة للكسر واحنا ملتزمين بامن اسرائيل وله الاولوية هو نفسه بيقول على حماس وحركات المقاومة الغلبانة انهم "عملاء" لايران وسوريا عشان بياخدوا منهم سلاح

مع ان ايران وسوريا مش ملتزمين بامن اسرائيل ولا حاجة يعني

سبحان الله

الرسول كان بيقول ان المسيح الدجال ح يضل الناس ويلبس عليهم الحق والباطل

طيب هو مش محتاج ييجي دلوقت حاليا

الناس حولاء خلقة ربنا

مواطن مصري said...

المناورة دي مهمة و العالم كلة بتعمل مناورات مشتركة مع امريكا

اردوغان الي عاجبك بيشتري اسلحة من اسرائيل و دبابات ميركافا منها

المناورة دي مهمة جدا لمصر عشان بتعرف قدرتنا و قدراتهم و نتبادل فيها الخبرات العسكرية

مواطن مصري said...

مطلق انا مليش اخوات في افغنستان و جيش المصري يدافع فقط عن بلدة

بدراوى said...

مواطن مصرى حين يبدع

انا مليش اخوات في افغنستان و جيش المصري يدافع فقط عن بلدة
!!!

roaa said...

انا متابع مدونتك من زمان , واتعلمت منها حاجات كتير , ياريت تتابعي مدونتي , لو عندك وقت

مهندس حر said...

يا مواطن الجيش المصرى يدافع عن المصالح المصرية حتى لو إضطر يروح يحارب فى أنتارتيكا .. لو ده مش داخل دماغك تفتكر الجيش الأمريكى بينيل إيه فى أفغانستان .. بلاش أفغانستان لأن أكيد إنت مقتنع إن الجيش الأمريكى هناك عشان 11/9 .. طيب الجيش الأمريكى موجود فى اليابان و ألمانيا و تايوان و كوريا الجنوبية و بريطانيا و إيطاليا و غيرها ليه؟؟

الأمن القومى لأى دولة بيمتد جغرافيا حسب عوامل كتير مش هلحق أقولهالك هنا بس فى النهاية ما ينفعش يتقال إن الجيش بيدافع عن مصر داخل مصر و بس خلاص على كده..

و بعدين بنات أفغانستان مش إخواتك ليه؟ .. كخة - وحشين؟ و ألا عشان مش بيلبسوا مينى سكيرت؟ .. طب عديها إخواتك فى الإنسانية إذا كان الإسلام ده ما يعتبر رابطة ليها قيمة عندك..

يا مواطن .. يا إبنى .. خلص كليتك و إقرالك كام كتاب نضاف و بعدين إبقى إتكلم فى الحاجات دى .. مستعجل و معندكش وقت تقرى فتح نفوخك و حاول تفهم اللى بنقولهولك واحدة واحدة و بالعقل .. مابقولش خد مننا و إنت ساكت .. بس متقفلش دماغك قوى كده .. إنت جبتلى سكر و ضغط و أنا لسة ماربعنتش

Sahran said...

الأخت نوارة

أنا عارف أن كلامي قد لا يعجبك ومشاركتي لن تسرك ولكني أرجوك تتحمليني شوية وخديني على قد عقلي لو كنت مش معبراني,,,

لماذا تعتمدون دائما على مقدراتكم الصوتية للرد على ما يدور في هذا العالم ؟؟؟ وهل بمدونتك الغير محايدة تعتقدين أنك ستؤثرين في عقول الناس؟؟
أنا أعرف أنه كثيرا ما تكون الكلمة أقوى من آلاف السيوف , ولكن هي الكلمة الواعية المتفهمة لمجريات الأمور وليست الصراخات والهتافات هي ما نصبو إليه,,,

للأسف مدونتك غارقة في الدوغماتية ولا أعرف سر تهجمك على الفلسطينيين ولا تقولي هذا لم يحصل , فأنت حينما تهاجمين فصيلا فلسطينيا له من المؤيدين ما يجعله رقما صعبا في معادلة السياسة فأنت تتهجمين على قطاع واسع من الشعب الغلبان ,,,, أنا نفسي أعرف شو أخدنا منكم غير الصوت وتضييع وطننا وتشتيت الشعب لفرق متناحرة

وبالنسبة لمدونتي التي وصفتها بالقذرة فأنا إما أكتب مقال أو أعرض مقال لأحد الأشخاص وليس بالضرورة أن يكون معبرا عن رأيي , أما ما أكتبه أنا فهو من خلاصة تفكيري وقد أخطئ وقد أصيب ولكن لي شرف المحاولة ,, وهي ليست مدونة إباحية فأنا اخترت صور تتماشى مع الموضوع

من حقي أن أرفض الواقع السيء ولن أتراجع عن ما أكتبه ,, وأتمنى من سيادتك أن تعذريني على رغبتي في المشاركة فأنا لم أستطع أن أمنع نفسي من ذلك


ودمت سالمة

المعلم برعى صاحب القهوة said...

جبهة التهييس الشعبية
بصى هاقولك ايه المصلحة مع أمريكا دلوقت حتى لو كنا بنختلف معاها كليا او جزئيا ، امريكا فى عالمنا الان أصبحت القطب الأوحد يعنى فى عهد جمال عبدالناصر كان عندك الاتحاد السوفيتى ويوغوسلافيا قبل التفكك ممكن تشحتى منهم سلاح منهك ومتخلف عسكريا عن السلاح الغربى المتقدم عشان تحاربى بيه اسرائيل وقتها ده اذا رضيوا يدهولك أساسا ، اما دلوقت مييييين غير ماما أمريكا ممكن يديكى حتى بندقية رش حتى ولو كانت ناقصى حتة زى مابتقولى ، المهم انها عندك أساسا

المعلم برعى صاحب القهوة said...

جبهة التهييس
بالنسبة لحتة التجسس دى مش عارف أقولك ايه معظم المعلومات اللى انتى خايفة يعرفوها عننا دى بقت منشورة فى أغلب المجلات العسكرية ومن زمان وبدقة تفوق مانعرفة نحن عن انفسنا !! يعنى أمريكا مش جايه تتجسس فى مناورة ،لان عندها كل اللى بتقولى عليه من الوان الملابس الداخلية لافرع القوات المسلحة بحالها . الفايدة هنا هى التكنيك مش أكتر زى ما المنتخب يلعب ماتش ودى مع البرازيل كده اهو منه احتكاك بفريق قوى وصقل لموهبتك وانك تستفيد من طريقة لعبهم فهمتينى اقصد ايه ؟
فدى سياسة تختلف عن انهم بيساعدوا اسرائيل ومجوعين الفلسطينين ولاعايزنا نجوع احنا والفلسطينين فى يوم واحد ؟ والسياسة هى لغة المصالح ، انا مصلحتى مع أمريكا ومن غير متدينى سلاح وتدربنى عليه مش هعرف احارب حتى نملة ، ولا عايزانا نواجه اسرائيل فى اى حرب بعد
كده بالنبل والنبابيت ؟
اما عن التغبيش والتعميش فواضح انه عوكل فعلا هو السبب !!

المعلم برعى صاحب القهوة said...

ميدو

راجع تعليقى على نوارة وانت تفهم معنى المناورة دى كويس واننا فى اشد الاحتياج لاى سلاح غربى حتى ولو كان ناقص والا على البلد السلام ، مين ممكن يديك سلاح غير أمريكا تقدر هاه تعمل بيه حتى غارة على العدو ولو مكانش التسليح بتاعنا نضيف مكانتش اسرئيل تخاف مننا وتعلمنا حساب .
اخواننا فى الخليج اه عندهم الفلوس واحدث الاسلحة لكن معندهمش الكفاءة القتالية للجندى المصرى فى الحرب الحديثة ... والاستراتيجيات متتقالش على النت وانت فاهم طبعا.
اما عشان نصنع احنا سلاحنا فمتاخذنيش لما تعرف تنتج رباط جزمة نضيف ابقى قلى اصنع توك توك مش طيارة.

مهندس حر said...

المعلم برعى..

فكرة القطب الأوحد تحتاج إلى فهم واضح لتحديد حدودها الحقيقية .. لأن البعض ريح نفسه بالفكرة و إعتبرها مسلمة و مطلقة عشان ما يحاولش يفكر فى أى بديل إلا الإستسلام بشكل أو آخر للقطب الأوحد المزعوم ..

المهم سواء هى قطب أوحد أو قوة عظمى عسكريا و إقتصاديا فأكيد مش شيئ لطيف إننا نتصادم معاها .. العقل طبعا بيقول إن لو عندنا حرية الإختيار مش هنختار مسار تصادمى مع القوة العظمى دى .. لكن للأسف إحنا ماعندناش حرية الإختيار .. لأن القوة العظمى ماسابتش لينا الحرية دى .. وهى اللى إختارت تقسم العالم بين نوعين مالهمش تالت .. أتباع و أدوات تحقق مصالحها و بتدلعهم و تسميهم حلفاء و أصدقاء و ساعات تقول عليهم الدول المعتدلة .. أو عقبات فى سبيل تحقيق مصالحها بتسميهم أعداء و رعاة الإرهاب و الدول الفاشلة أو محور الشر يعنى حسب التساهيل..

المشكلة يا معلم فى طريقة تعريف الدولة العظمى لمصالحها بصورة بتخليها تتعارض حتميا مع مصالح و أمن دول و شعوب مختلفة أكتر من كده فيه دلائل واضحة إن تحديد القوة العظمى لمصالحها فيه من الغباء و العمى اللى ممكن يؤدى بالبشرية إلى الإفناء الذاتى .. يعنى القطب الأوحد اللى عاجبك ده حول البشر لجنس مهدد بالإنقراض..

إحنا مضطرين بدافع المصلحة الوطنية الحقيقية و الأمن القومى الطبيعى و بحكم حقنا فى السعى للبقاء و حفظ النوع إننا نواجه القطب الأوحد و نعمل على إيقاف متتالية التدمير الذاتى اللى هو ماشى فيها..

لو يهمك فعلا تفهم أكتر عن الكلام ده ممكن نتناقش .. لكن لو مستريح لفكرة إن مفيش أأمن لينا من حضن ماما أمريكا الحنين و حجرها الوسيع يبقى للأسف مفيش فايدة من الكلام معاك..

المعلم برعى صاحب القهوة said...

بص يا استاذ "مهندس حر " أمريكا أو ماما أمريكا أو حتى طنط أمريكا قوى عسكرية عظمى وقطب أوحد فى عالم اليوم شئنا ام ابينا ذلك ، لو عايز تحلل أشباه القوى الاخرى هتلاقيها مرتبطة بمصالح مع الولايات المتحدة الامريكية تجعلها لاتستطيع التضحية بها عشان سواد عيون العرب ، يعنى عندك مين مثلا الاتحاد الأوروبى ؟ وهو ده قطب بردك ؟ هل يقارن عسكريا او اقتصاديا بالولايات المتحدة الامريكية بالقطع لاوجه للمقارنة نهائى ، ده اوروبا لحم كتافها من خير أمريكا نفسها زى ما بيقولوا ولولا تدخل الولايات المتحدة فى الحرب العالمية الثانية ووقف الخطر النازى الالمانى والوحشية الامبراطورية اليابانية ولفهم تحت دراعها ، لكان لعالم اليوم شأن أخر ما يعلم بيه الا رب العباد ، شوف مصيرك ايه كعربى مسلم قد تكون أسمر البشرة ولاتنتمى للاريين لو هتلر كان حكم العالم ؟ المهم يبقى أوروبا ليست قطبا يعتمد عليه ، ولا انجلترا بالطبع لانها ديل أمريكا من أيام الحرب اللى بقول عليها دى ويمكن أقدم ، امريكا وليدة الحرب العالمية الثانية كقوة عظمى على الساحة ولازم
نعترف باثار هذه الحرب علينا حتى الان
هتقولى الصين وروسيا وعالم متعدد الأقطاب ، الصين دى لسه يادوب شوف يادوب دولة بتينى نفسها وحالة العلم والتكنولوجيا عندها لن تتفوق على امريكا باى حال ، روسيا لازال عندها بقايا كبرياء الدولة العظمى لكن الشعب الجعان والفساد الادارى وكل البلاوى الداخلية قلصت دورها ده فضلا عن حالة الفقر والتخلف العلمى اللى عندهم اللى وقف عند سنة 90 يعنى من 20 سنة فاتت ده وكالة الفضاء بتاعتهم حولوها متحف ياراجل وتقولى فيه أقطاب متعددة
يبقى واقعيا وعمليا مفيش غير أمريكا دلوقت وده الخيار سواء كنت قابل ده او رفضه حبه او كارهه ، وعليه فمن الحكمة ان أجد نقطة التقاء وتقارب بين مصالحى الوطنية مع المصالح الأمريكية فى مقابل ان ميبقاش حالى زى أفغانستان أو العراق أو سوريا اللى لسه بترضع من روسيا والحكمة بتقول لو جتلك الريح تاطيلها بدل متخلع الواحد من جذورة ، اما كلام القوميين واليبراليين والحدثيين والبتنجانيين ومساطيل قهاوى المثقفين ده مش هيودى البلد الا ورا الشمس ، لان الواقع العملى أصبح شئ أخر وابسط مثال انجلترا اللى كانت دولة عظمى فتحت ارضها للامريكان وتعايشت مع الوضع العالمى الجديد وظلت فى المقدمة أما عن التدمير الذاتى فانا مش فاهم قصدك ايه تحديدا ؟ لو تقصد تدميرهم لنفسهم فده شئ جميل جدا وتبقى جت منهم وارتحنا ونفضى لاسرائيل بقى من غير لما يكون لها ضهر تتسند عليه.
تقبل خالص تحياتى

ahmed samir said...

المعلم برعي صاحب القهوة

واحد - روسيا حلت محل الاتحاد السوفيتي في حكاية تصنيع السلاح عندها سلاح متفدم جداً و ممكن تشتري منها
عايز الدليل
لسه قريب الموساد خطف سفينة لأنه بس شك انها عليها منظومة الصواريخ الدفاعية الروسية اس 300 رايحة لإيران لو مكانتش الصواريخ دي متطورة جداً و خطيرة جداً مكنش عمل كدة لأنهم خايفين ان منظومة الصواريخ دي توصل لأيران

اتنين - احنا ليه ما نصنعش السلاح بتاعنا بايدينا
يعني هو الامريكاني او الروسي كامل مكمل و المصري اكتع
ايام عبد الناصر كنا بنصنع سلاح و لو الموساد سابنا في حالنا كنا حنبقى احسن من السوفيت كمان
عملنا مسدس اسمه حلوان و صنعنا الكلاشينكوف هنا و طورنا البندقية حكيم و عملنا صواريخ القاهر و الظافر و كان عندنا اسلحه كيماوية و بيلوجية

تعرف ان احنا عملنا طيارة نفاثه مقاتله و لو تم انتاجها كانت حتبقى افضل طيارة في العالم
الطيارة اسمها حلوان 300 اعمل بحث عليها و انت تعرف

بلاش نغمة احنا مش قدهم احنا غلبانين و الكلام اللي زي الفل ده

احساس لسه حى said...

يعنى احنا بنتعاون مع الدول دى فى كل شئ جت على المناورات العسكرية

الحاجه الوحيدة اللى هتنفعنا قريب ان شاء الله

سيبك من المناورات وخلينا نستفيد منهم بحاجه بجد مش الفوايد الاونطة

سلام

بدراوى said...

شوفى ده
عند الصديق محمود ناسا

http://mahmoudnasa.blogspot.com/2009/10/blog-post_13.html

maman de said...

و الله انتى شرفتيه لما قلتى على مدونته قذرة دة مرحاض عام لامم شخاخ العالم يا حبيبتى
بس انا عاتبة عليكى يا اختشى ليه بتنزلى تعليقات مواطن مصرى و مبتنزليش تعليقات بهيج على الاقل بهيج عارف راسه من رجله

جبهة التهييس الشعبية said...

تسمح لي اقول لك حاجة بس من غير ما تزعل يعني

انا اصلي مسحوبة من لساني وصريحة


الواحد يا بيفهم يا بيحس

يعني يا اما ناصح وعارف مصلحته كويس قوي

يا اما عنده اخلاق وبسبب الاخلاق ربنا يسترها معاه

فيه نوعية بقى من البشر زي السادات كده فاهمين المفهومية غلط فبتكون النتيجة انهم لا ناصحين ولا عندهم اخلاق وبتصفصف في الاخر على ان لا ربنا بيسترها معاهم ولا بيعرفوا ينجوا نفسهم بنباهتهم

اسرائيل ايه اللي ح تحاربها بسلاح وتدريب امريكا عشان "امريكا هي القطب الاوحد"

اولا افترضت افتراض فوق انه انهزامي ومنوفي مالوش اي اساس من الصحة

هي ايران بتاخد سلاح من امريكا؟ وللا بتدرب على مناورات مع امريكا؟

طيب ايه رأيك ان لو لا قدر الله قامت حرب ما بينا وبين ايران

(ومتهيالي دي الحرب الوحيدة اللي ممكن ندخلها في ظل تسليح وتدريب امريكاني وللا ايه؟)

ايران ح تبقى اقوى مننا

يا معلم
الندالة مش نصاحة ممكن يتقاطعوا بس هم مش حاجة واحدة يعني

احيانا النصاحة بتتقاطع مع الاخلاق واحيانا بتتقاطع مع الندالة على حسب الظروف

بس المرة الندالة مش متقاطعة مع النصاحة
حضرتك مختلط عليك الامر وفاكر ان كل ما بقينا اندال واوساخ ده دليل على اننا ناصحين
لا
غلط
حزب الله اللي ما حيلتوش غير شوية صواريخ ماحدش يعرف عنه حاجة ودي الطريقة اللي حرر بيها الجنوب
بالرغم من ضعف امكانياته بس هو كسب الحرب بالسرية مش بالطيارات لانه ماعندوش طيارات اصلا

والمناورات دي مش ح تفيدنا بحاجة
دي بتفيد امريكا وبتطمن اسرائيل

ونصيحة لوجه الله
تحرر من التفكير المنوفي، لو كان بينفع كان نفع صحابه
والله ما بينفع

جبهة التهييس الشعبية said...

ده كان ردي على واحد ذو عقلية منوفية برضه بعت لنا على الميل:

وايه مصلحة مصر في انها تبقى مكشوفة لدولة استعمارية احتلت بلدين وبتقتل المدنيين بالفسفور واليورانيوم بدون محاسبة وبدون ادنى تحرج ولا حتى تأنيب للضمير؟
لما تكبر ان شاء الله ح تعرف ان اهم حاجة في المصلحة العسكرية هي السرية، عشان كده اي دولة، حتى لو بتاخد مساعدات عسكرية ما تاخدش من دولة واحدة بس وما تبقاش روحها في ايد بلد واحدة وتقسم تحالفاتها عشان لو خسرت طرف او تعارضت مصالحها مع مصالحه تحت اي ظرف يبقى لها تحالفات تانية وعشان تقدر تضمن السرية وانها ما تكشفش كل ورقها قدام طرف واحد ناهيك عن ان الطرف ده دولة استعمارية كل هدفها انها تبقى على اسرائيل القوة الوحيدة المعتبرة في المنطقة وتضعف كل القوى اللي حواليها
اذا كنت بتعتبر ان الاخلاق كلام حنجوري فالمصلحة بتقول ان اللي يآمن لدولة زي امريكا كانت في يوم من الايام اقوى حليف لصدام وسلحته ضد ايران وضد شعبه وفي الاخر اعدمته على الهوا زي خروف العيد يبقى متخلف عقليا
والمصلحة بتقول ان اي دولة عشان تمتلك قرارها لازم تبقى مستقلة ولا تعتمد اعتماد كلي في المعونة والاكل والتسليح والتدريب على دولة هي بالنسبة لها مجرد ناموسة، على الاقل لو ح نعمل تحالفات يبقى نعمل تحالفات مع ناس مكافئة لينا في القوة عشان نضمن انهم ما يستغلوناش وما يفرضوش علينا ارادتهم زي ما اوروبا وامريكا كده عملوا مع عباس وهددوه انهم يقطعوا عنه الفلوس لو ما اجلش دراسة التقرير وفضح نفسه واتبهدل عشان ممسوك من رقبته
المصلحة بتقول ان لما يبقى جنبك قوة نووية بتهدد السد العالي وبتلف على دول حوض النيل عشان تقلل حصتك من المية وبتضرب حدودك وتخترق اجواءك وتبعت لك حبوب مسرطنة وفراخ مسممة وتبقى القوة دي متحالفة مع امريكا تحالف
ubreakable
زي ما اوباما قال لنا في وشنا بمنتهى الجليطة وهو في ضيافتنا يبقى ما ينفعش تبقى عريان قدام امريكا اللي بتسلح اللي بيهددوا اكلك وشربك وسرطنوا شعبك

حاجة بقت تقرففففففففففففففف

azikry said...

تدريبات النجم الساطع المشتركة بدأت منذ بداية الثمانينات وتجرى كل عامين، وهي تدريبات مشتركة تعود بالنفع على كل البلاد المشتركة فيها لتساعد على تدعيم التفاهم المشترك بين المشاركين وتعزز الصداقة وتنمية روح التعاون من خلال التدريبات على سيناريوهات واقعية في عمليات تطبق في الميادين المختلفة، وقد ساهمت تلك التدريبات المشتركة على الاستقرار في المنطقة عن طريق تقوية عزائمنا الهادفة لاستقرار المنطقة وتحقيق الأهداف المشتركة، وعلى صعيد العلاقات العسكرية فهي توفر فرصة التعاون العسكري على مختلف المستويات واكتساب الخبرة على العمل مع قوات الائتلاف الشريكة، فللتدريبات المشتركة منافع لا تعد ومنها تبادل لخبرة العسكرية المتميزة بين القوات المشاركة لتشارك وإكتساب كل ما هو معاصر في مجال إدارة العمليات العسكرية، ولا يصح رؤية هذه التدريبات المشتركة على إنها تجرى إستعداداً للهجوم على بلاد أخرى لأنها لم تكن كذلك منذ بدايتها في أوائل الثمانينات، فالجهات العسكرية التي تتدرب مع بعضها بهذا الأسلوب تقوم بتوطيد العلاقات التي تزيد من التفاهم المشترك مثلها كمثل البعثات العسكرية الأخرى التي تساهم في تعزيز الإحترام المتبادل. فكيف يمكن القول بأنها تدريبات من أجل الانقسام أو إضعاف أحد؟

أكرم زكري - القيادة الوسطى الأمريكية

المعلم برعى صاحب القهوة said...

أولا أسمح ليكى بالطبع بدون زعل .. بس بنفس المبدأ ولانى أشد سحبة من لسان معاليكى وصراحتى تصل للوقاحة أحيانا مع من يظنون أنفسهم دعاة حق وتقوى ومبدأ وأخلاقيات بل من يفهمون ما قيل بعكس ما كان مرجوا منه
من أجل كل ذلك اسمحى لى أن أعقب على كلامك بنفس الصراحة
اولا / اذا سمحتى لى هل من الممكن ان تخبرينى عن انتماءك السياسى ؟ انتى مع مين بالظبط ؟ ناصرية ؟ أخوان ؟ اشتراكية ؟ حلزونية ؟ عشان اعرف الاول دماغك لونها ايه بدل مضيع وقتى علفاضى!
ثانيا ايه اللى دخل المرحوم السادات فى القصة ؟ الراجل عمل قدر مايستطيع لينتشل بلاده من خطايا عبدالناصر وشركاه ، اه ممكن يكون غلط لكن ده لايمكن ابدا باى حال يمحو اثار مانزال نعيش الى الان فى ظلالها وسيبك من الكلام بتاع حرب اليهود الخفية علينا بعد السلام دى قصة تانية خالص مش وقتها
ثالثا اسمحى لى بشياكة وكياسة كده اقولك انك لا"تعلمى" شئ عن السياسة والعسكرية ، دى ليها ناسها فبالتأكيد ارائك المفتكسة دى لاهتودى ولاهتجيب ، توازن القوى والمصالح ده موضوع كبير قوى وحزب الله اللى بستشهيدى بيه ده (مع تسجيل سابق احترامى للسيد نصر الله سابقا) كان عايز يدمر بلدك الا اذا بقى كنتى من شيعة أهل البيت وبتتكلمى فارسى ومش فارق معاكى ان ايران تكون سادتنا قتلة عمر الفاروق ، مع ملاحظة انى مش بتهمك انك دراع للحركة وايران فى مصر
!!
رابعا الندالة والاخلاق ! جميل أوى الخلط ده هل فى كلامى شئ يدل على الندالة بالعكس كل اللى قلته انك تمشى ورا مصلحتك عشان خاطر بلدك وشعبك تيجى تقوليلى لازم يكون ليك اكتر من حليف مهو ده اللى مصر بتعمله والكل فى النهاية حليف لامريكا ياخت نوارة افهموها بقى يعنى دلوقت ساعة التصويت على ضرب العراق فى مجلس الامن حد كح مع امريكا فرنسا هددت بس بالفيتو امريكا طلعت لها لسانها!
وايران فى يوم من الايام هثبتلك انها بالونة اتنفخت علفاضى لو فكرت امريكا فى فرض عقوبات اقتصادية عليها بس مش عسكرية
والوساخة بجد اننا نرمى نفسنا فى حضن ايران ، خليك بلد قوى الاول العالم يعمل حسابك وبعدين كح واعطس فى وش اتخن تخين وياريت تحررى مدونتك من اتباع الايرانين لانى ابتديت اشك اساسا فيكى

المعلم برعى صاحب القهوة said...

تعقيب صغير جدا جدا "ان اخشى ماتخشاه إسرائيل من العرب جميعا هو التقارب الحى بين الولايات المتحدة الامريكية ومصر لانه ..." وكفاية كده

جبهة التهييس الشعبية said...

اتباع الايرانيين؟
لا ده انت متخلف كمان؟
منوفي ومتخلف؟

المعلم برعى صاحب القهوة said...

يانوارة بنت نجم احترمى نفسك واتكلمى بأدب مع الناس هنا من فضلك لا فيوم من الايام يكون مصيرك مصير الاخ بتاع حماس فى غياهب سجونا المصرية العتيدة التى لم تفتح خصيصا الا لامثالك لانك بكده ممكن تغلطى فى حد مهم يوديكى ورا الشمس وهناك برد يابنتى وانا خايف عليكى قلة الادب والسفالة لاتدل الا على بيئة صاحبها ، وياريت بلاش ضعف النسوان ده وتردى على اسئلتى كان بالذوق بدل الشتيمة لانى أساسا مش فاضى أعلق واضيع وقت مع واحدة فاضية لاوراها شغلة ولامشغلة ، وسلميلى علعروبة ، الا بصحيح انتى مصرية أساسا ؟ يعنى عندك كده انتماء للبلد وبتحسى زينا يعنى ؟

جبهة التهييس الشعبية said...

تعالى هنا يا زفت الطين انت؟

انت امن؟

وجاي تهددني؟
طب ايه رأيك اني ح اعمل لاهلك فضيحة بقى