Friday, 23 October 2009

ايش عرفك انت، على الفيس بوك



اضغط على الصورة للمشاركة في جروب "ايش عرفك انت" وادخل اسأل

6 comments:

haneen said...

ايش عرفك انت بالناس اللى بيصحوا الصبح ياكلوا من الزباله وياخدوا لولادهم فطارهم منها ... عمركشى اكلت من الزباله ؟

ايش عرفك انت بالزبالين فى مص اللى تبع شركات النظافه ولابسين اليونيفورم بتاعهم وبيشحتوا علنى فى الشارع واتحولوا كلهم لمتسولين فى عصر ولدك الزاهى

ايش عرفك انت بفلوس الزباله اللى ضيفينها على فاتورة النور اجبارى علشان غصبن عن عين ابونا 6،9،والمحلات والمقاهى 50، و06 جنيه رسوم نظافه وهما اصلا مش بيجوا ياخدوها وبنضطر احنا نرميها بنفسنا واحنا خارجين اشغالنا وساعات الناس من قهرها بترميها فى الشارع عنداً فى الحكومه

ايش عرفك انت برئيس قطاع ووكيل وزاره جاى من ورا الجاموسه ولا حد اصلا كان يعرفوا ولا عنده اى مميزات لمنصبه دا غير انه قريب ولا معرفة فلان الفلانى وطلع سن المعاش من 3 سنسن ولسه بيباشر كل اعماله ونطاعته على الخلق وناس تانيه احق من اللى خلفوه بيطلعوها اصلا قبل سن المعاش .. لكن دا علناً بيرش حتى على الرقابه الادارية وجهازها علشان يسيبوه ينهب براحته وياخد 60 الف جنيه لتعيين اى حد مدير عام حتى ولو كان فى ناس لهم الاحقيه فى الدرجه قبله وتأشيرة الوزير حسب اهميتها وليها اسعارها وكله على حساب دم الناس الموظفين الغلابه وقوتهم وقوت عيالهم واراضى البلد اللى بتتباع بأبخث الاسعار لحيتان البلد يعملوا عليها مشروعات استثماريه هما والموظفين المسئولين ..واللى يتكلم جزاؤه الرفض او النفى لاى مكان مش على الخريطه ... وهو عايش ولا الملك وكل سنه يحج حج سياحى طيران 3 ايام تقريباً بحوالى 80 الف جنيه ولا حد عمره تجرأ وقال له من اين لك هذا

ايش عرفك ان رئيس الوزراء طلع قرار من حوالى تلت سنين بعدم تعيين اى حد فى الدوله الا طبعاً قرايب المحاسيب ليهم وضع تانى . ودا طبعاً بحجة تشجيعه للقطاع الخاص والعمل الحر.... حتى العقود المؤقته والتأمينيه مانعها

مهيج الجماهير said...

الحملة رهيييييييبة زى ما اتعودنا من حضرتك دايماً
بس المشكلة ان انا و كتير غيرى عاملين مقاطعة للفيس بوك من النهارة24-10 و لمدة تلت أيام علشان الفيس بوك رفض يقفل جروب بتشتم فى القرآن الكريم
رغم ان احنا عدينا 300.000 مشترك بيطالبوا بالغائها

و على فكرة انا متابع لحضرتك دايماً بس انا اللى مش بعلق كتير


تحياتى

عمرو امام said...

يا نوارة
دحنا كدة قلبناها شؤن اجتماعية

امال عاوزين مين يحكم مصر بعد مبارك

مهو احنا كمصرين قدمنا حل من لاتنين
يا جمال مبارك
يا الاخوان

وما ادراكى بقا حكم الاخوان
يبقى العقل بيقول الى نهرفة احسن من الى منعرفوش

وبعدين 80 فى المية من الشباب الى بيعلق على ايش عرفك انت

والله والله والله
لو سالتيهم طيب تعرفة مال دة خريج اية
تعرفة كان بيدرس اية او قبل ما يستقر فى مصر كان عايش اية

ي نوارة صدقينى البلد دية
تغيرها من شعبها

الشعب دة لو يبطل النمطة الطبقية الى بيتكلم بيها دية
وبيشتغل بجد مكنش دة بقا حالة

قوليلى مين فى كل الى مشاركين فى الحملة دية حتى المعلقين بس
مشفش واسطة على شان يخلص حاجتة

قوليلى مين مرحش بكرت للمرور مثلا على شان يطلع رخصة

مرحش بكارت على شان يتعين ولا يشتغل ولا يدرس ولا اى حاجة

الواقع بتاعنا فى مصر يا نوارة

حكومة وشعب عاوزين توعية
عاوزين يعرفة يعنى اية تقدم

عاوزين يعرفة ازاى تبقى الحرية

هما مش عارين ازاى يبقة احرار


على فكرة انا مش ضد الحملة دية
ولا معاها
ولا مع جمال

بس زى ما قولتلك

فين البديل

الى نقف وراه ونهاجم جمال وابوة كمان والى يتشددلة
بس فين

Amr said...

أستاذ عمرو أمام
يا جمال ياالأخوان ؟!!!!!
البلد عدمت رجاله ومابأش فيها الا جمال والأخوان مش كده ؟

أنا أسف فى اللى هاقوله وأستحملنى الجمله دى بالذات - اللى نعرفه أحسن من اللى مانعرفوش - مايقلهاش الا الجهله والناس اللى ماهمهاش الا انها تقضى يومها وفى نفس الوقت مش عايزه تبين جهلها فيقول الجمله دى ويبأه أدلى بدلوه فى القضيه الحساسه (-:
وماعتقدش أنك منهم !!!!!

وبعدين مين قالك ان 80% من اللى دخلوا مايعرفوش ؟
أنت عملت زى الحكومه كل مالناس تعترض على قانون يطلعوا الوزرا فى التلفزيون ويقولولنا معلش أصلكم ماتعرفوش حاجه واحنا اللى عارفين لأننا اللى ممشين البلد ؟!

ومين اللى مانعنا اننا نشتغل بجد علشان نبطل (النمطه الطبقيه) اللى بنتكلم بيها ؟ مين اللى بيبيع ويطرد العمال مش الحكومه ؟ الناس بتتظاهر علشان تفضل فى المصانع وتشتغل ياأستاذ عمرو - مش الشعب هو اللى كسلان !

وكمان مين اللى دفعنى أنى أقدم بالواسطه وأروح المرور بالكارت
فيه حكمه بتقول أذا أستقام ماحولك جبرت على الأستقامه
يعنى لو كل اللى حواليك ماشى كويس وصح حتى اذا انت وحش هاتمشى صح
وشكرا"

Dr Nemo said...

زى ما مهيج الجماهير قال فى مقاطعه للفيس بوك النهادره ولمده تلات ايام .... انا هقاطع اول يوم بس لان على فكره غالبية الناس فاكراه يوم واحد
المهم
شوفتى دى .... بس على مسؤلية بتوع جريدة المصريين على ما اشوف وانا راجع النهارده من الكليه اصل الحكايه
اصل بنى عبيد قريبة منى
نشبت يوم الخميس مشاجرة بالشوم والأسلحة البيضاء بين أعضاء الحزب الوطنى بالدقهلية بسبب رفض أنصار المتولى هاجر، أمين الحزب بالدقهلية، دخول أنصار هيرماس رضوان، عضو مجلس الشعب السابق، إلى المؤتمر السنوى للحزب بمدينة بنى عبيد، أصيب على إثرها 8 من أعضاء الحزب بجروح قطعية فى الرأس والوجه تلقى مأمور مركز شرطة بنى عبيد بلاغا من الأهالى بنشوب مشاجرة بسبب رفض أنصار المتولى هاجر، دخول أنصار هيرماس، للمؤتمر، ما دفعهم إلى اقتحام المقر فتصدى لهم أعضاء المؤتمر، الأمر الذى نتج عنه إصابة 8 من أعضاء الحزب بإصابات مختلفة، تم إلقاء القبض عليهم وإحالتهم إلى النيابة التى أمرت بحبسهم أربعة أيام على ذمة التحقيق

عبد الزهراء المصري (علي الحسيني) said...

أيش عرفك أنت بعيال صغيرة بتروح المدرسة الساعة 7 الصبح علشان يتعلموا حاجات ماتفرقش كتير عن ماية المجاري اللي بيشربوها ؟؟؟
أيش عرفك أنت برأي شوية المنافقين اللي حواليك فيك ؟؟؟
أيش عرفك أنت أنك تنفع أصلاً تكون عمدة لقرية مش رئيس لدولة ؟؟؟
أيش عرفك أنت بشباب محبط مش لأقيين أي حاحة تخليهم يحب بلده ؟؟؟
أيشر عرفك أنت بمصر وسكان العشوائيات ؟؟؟
أيش عرفك أنت بأي حاجة مرتبطة بالشباب وأنت طول عمرك بعيد عنهم ؟؟؟