ايه دخل الحياة الجنسية للمسلمين بالارهاب

قال بيقول لك انجلترا خافت على المسلمين الابرياء السذج اللي بينضحك عليهم بسهولة لبعدين يا ضنايا يقعوا في سكة الارهاب، قامت قالت تراقبهم يمكن تلحقهم قبل ما يمشوا في السكة دي، قلب الام بقى

ووصل بيها الامر انها تطلب من الجامعة انها تراقب المسلمين و"اللي شكلهم اسيوي" على حيث ان اللي شكله مش اسيوي فيه استحالة جينية ان ينضم لاي مجموعة مسلحة

الاغرب بقى انهم بيتجسسوا على حياتهم الجنسية، غير الكاميرات، لما حد بيروح لطبيب نفسي او ثيرابيست، العيادة بتدي الجهات الامنية معلومات مفصلة والجهات الامنية بتسأل عن الحياة الجنسية للمسلمين، ليه؟ هل مثلا لو طلع جاي أو له صاحبة عايش معاها يبقى واد ماشي في السليم ويستثنوه من قوائم الارهاب؟ لو طلع متجوز يبقى ارهابي؟ مش فاهمة

وامبارح طالع مسئول امني سابق انجليزي في الجزيرة يقول: طب ما صدام كان بيتجسس، وسوريا بتتجسس، وايران بتتجسس، (ما جابش سيرة مصر ولا السعودية ولا الاردن، عشان زي ما احنا عارفين الدول "المعتدلة" بتتجسس بس بحنية) ويسري بيمشي في الشارع ومحمد بيمشي في الشارع والجبري بيمشي في الشارع ايه يعني لما شفيق يا راجل يمشي في الشارع؟

على رأيك يعني هم ناس اصلا وش بهدلة ومتعودين عليها، جرا ايه يعني لما تبهدلوهم شوية؟ مالكوش نفس؟

وبعدين قال فعلا: ما هم فعلا عملوا عمليات ارهابية!

بجد قال كده، يعني تخيل مثلا واحد قتل قتيل من دار السلام تقوم تراقب كل سكان دار السلام، او سواق ميكروباص خبط واحد يقوم كل سواقين الميكروباص يبقوا متهمين (مافيش داعي نذكر انك لو من سكان مدينتي وقتلت ماحدش غير يتهم)، لا وبيراقبوا "كل اللي شكلهم اسيوي" ههههه، يعني اللي قتل مثلا بنت ليلى غفران رفيع يبقى كل الرفيعين مجرمين حتى تثبت برائتهم

هم متعودين على كده؟ يعني مثلا لما الاي ار ايه كانت بتفجر في انجلترا كانوا بيراقبوا كل الايرلانديين؟ كلهم كلهم؟ ده لازم الشعب كله بيشتغل في المخابرات عشان يلاحق على مراقبة كل البشريات دي

وازاي جامعة او عيادة طبيب نفسي تقبل على نفسها انها تعمل حاجة زي دي؟

وبعدين دول خلوا اباء وابناء يتجسسوا على اهاليهم... الله، طب ما مدام صدام كان بيعمل كده وسوريا بتعمل كده وايران بتعمل كده... وانجلترا بتعمل كده، ما شاء الله، ده العراق وسوريا وايران تقدموا يعني وبقوا من دول العالم الاول، وللا انجلترا اللي بقت من دول العالم التالت؟

احنا مالنا يا خويا، احنا الحمد لله دولة معتدلة، وزير الداخلية طلع قال لنا في التلفزيون: اللي خايف ما يتكلمش

طب والله كتر خيره، ده حتى انجلترا ما ادتهم اي تحذير بهاذوها الخصوص