Sunday 18 October 2009

ايه دخل الحياة الجنسية للمسلمين بالارهاب

قال بيقول لك انجلترا خافت على المسلمين الابرياء السذج اللي بينضحك عليهم بسهولة لبعدين يا ضنايا يقعوا في سكة الارهاب، قامت قالت تراقبهم يمكن تلحقهم قبل ما يمشوا في السكة دي، قلب الام بقى
ووصل بيها الامر انها تطلب من الجامعة انها تراقب المسلمين و"اللي شكلهم اسيوي" على حيث ان اللي شكله مش اسيوي فيه استحالة جينية ان ينضم لاي مجموعة مسلحة
الاغرب بقى انهم بيتجسسوا على حياتهم الجنسية، غير الكاميرات، لما حد بيروح لطبيب نفسي او ثيرابيست، العيادة بتدي الجهات الامنية معلومات مفصلة والجهات الامنية بتسأل عن الحياة الجنسية للمسلمين، ليه؟ هل مثلا لو طلع جاي أو له صاحبة عايش معاها يبقى واد ماشي في السليم ويستثنوه من قوائم الارهاب؟ لو طلع متجوز يبقى ارهابي؟ مش فاهمة
وامبارح طالع مسئول امني سابق انجليزي في الجزيرة يقول: طب ما صدام كان بيتجسس، وسوريا بتتجسس، وايران بتتجسس، (ما جابش سيرة مصر ولا السعودية ولا الاردن، عشان زي ما احنا عارفين الدول "المعتدلة" بتتجسس بس بحنية) ويسري بيمشي في الشارع ومحمد بيمشي في الشارع والجبري بيمشي في الشارع ايه يعني لما شفيق يا راجل يمشي في الشارع؟
على رأيك يعني هم ناس اصلا وش بهدلة ومتعودين عليها، جرا ايه يعني لما تبهدلوهم شوية؟ مالكوش نفس؟
وبعدين قال فعلا: ما هم فعلا عملوا عمليات ارهابية!
بجد قال كده، يعني تخيل مثلا واحد قتل قتيل من دار السلام تقوم تراقب كل سكان دار السلام، او سواق ميكروباص خبط واحد يقوم كل سواقين الميكروباص يبقوا متهمين (مافيش داعي نذكر انك لو من سكان مدينتي وقتلت ماحدش غير يتهم)، لا وبيراقبوا "كل اللي شكلهم اسيوي" ههههه، يعني اللي قتل مثلا بنت ليلى غفران رفيع يبقى كل الرفيعين مجرمين حتى تثبت برائتهم
هم متعودين على كده؟ يعني مثلا لما الاي ار ايه كانت بتفجر في انجلترا كانوا بيراقبوا كل الايرلانديين؟ كلهم كلهم؟ ده لازم الشعب كله بيشتغل في المخابرات عشان يلاحق على مراقبة كل البشريات دي
وازاي جامعة او عيادة طبيب نفسي تقبل على نفسها انها تعمل حاجة زي دي؟
وبعدين دول خلوا اباء وابناء يتجسسوا على اهاليهم... الله، طب ما مدام صدام كان بيعمل كده وسوريا بتعمل كده وايران بتعمل كده... وانجلترا بتعمل كده، ما شاء الله، ده العراق وسوريا وايران تقدموا يعني وبقوا من دول العالم الاول، وللا انجلترا اللي بقت من دول العالم التالت؟
احنا مالنا يا خويا، احنا الحمد لله دولة معتدلة، وزير الداخلية طلع قال لنا في التلفزيون: اللي خايف ما يتكلمش
طب والله كتر خيره، ده حتى انجلترا ما ادتهم اي تحذير بهاذوها الخصوص 

14 comments:

Sofftheme said...

الأنظمة العربية بتراقب علشان تحمي نفسها
و الأنظمة الغربية بتراقب علشان تحمي شعبها
هو دا الفرق

soreal said...

rest assured if the British are not doing it, others are doing it in britain.... and elsewhere..

رحلتنا في الحياة said...

^_^ ايه العالم الرايقة دى ولا بلاش الرايقة دول عالم مضايقة على راى احمد عدوية

رحلتنا في الحياة said...

شوفى بقى لو حبوا يطبقوا ده على الشعب المصرى هيتجسسوا على ميييييييييين ولا ميييييييين الشعب كله عند كبت ياحينى

Unknown said...

على كده لما الراجل هناك يحب يمارس حقوقه الزوجيه مع المودام يخرج بره البلد يخلص ويرجع تانى ؟
هو الصراحه مش هاينفع اقول غير زى مالأسكندرانيه بيقولوا

أححححييييييييه على الملطشه هى بأت بره وجوه؟

ممكن قدام شويه السفاره البريطانيه تعمل نوعين من الأستمارات ويسالونا


هما : - مسلم ؟
أنت : - أه!!!!!
هما : - عايز أستماره شامله التجسس ولا من غير ؟
أنت : - تقع تطب ساكت!!!!!
المخرج : - ستتتتتتتتتوب هايل ياجماعه - أطبع ده

ودايما" الطبع بيباه بقلم على قفانا
احنا قفانا هايستحمل ايه ولا ايه
ربنا ياخدكوا

Unknown said...

انا بس حابة ارد على الاستاذ ثائر جبر

مش ممكن الاحساس بالدونية يوصل للمستوى ده

بجد يعني

كده يبقى انت محتاج مساعدة

Unknown said...

soreal

others who are who?


ايوشة

اه، تصدقي الظاهر مش مراقبينا ولا حاجة
الظاهر بيقنعونا انهم بيراقبونا عشان نخاف بس

اصل على رأيك ح يراقبوا مين وللا مين؟


عمرو

هههههههه حقة لو طلعوا بيصوروهم
ده ممكن يطبعوا افلام بورنو ويكسبوا دهب

بس بقى المسلمين يبقى لهم نسبة

حق ربنا يعني

العلم نور said...

طريقة عرض الموضوع طريقة لذيذة أوي

وأنا لما شفت الخبر ده في الجزيرة، قلت الله هو من إمتى التاج البريطاني بقى له إحساس

أما مسألة التجسس فيها مضيعة للوقت لأنوا إللي ربنا كاتبه حيسير غصبا عن الكل

جزاك الله خير الجزاء أختي في الله على هذا الموضوع اللذيذ، ونفع بك الأمة الإسلامية العربية

العلم نور said...

طريقة عرض الموضوع طريقة لذيذة أوي

وأنا لما شفت الخبر ده في الجزيرة، قلت الله هو من إمتى التاج البريطاني بقى له إحساس

أما مسألة التجسس فيها مضيعة للوقت لأنوا إللي ربنا كاتبه حيسير غصبا عن الكل

جزاك الله خير الجزاء أختي في الله على هذا الموضوع اللذيذ، ونفع بك الأمة الإسلامية العربية

Unknown said...

أخى ثائر
الشخص الذى يأبى على نفسه العيش فى حريه ويبرر التجسسس على الأحرار يستحق أن يعيش عبدا" تحت الأرض ويستحق أكثر نظاما" فاشيا" يسحقه أقصد يحكمه

Sofftheme said...

مساعدة من أي نوع أنا وصفت واقع دولي و أنظمة ما وصفت نفسي ...يبقى الزاي عرفتي اني محتاج مساعده؟

Sofftheme said...

يا اخونا أنا مأبدتش رأي لحتى حد يرد عليا أنا بتكلم عن حقايق على الأرض

Unknown said...

يا استاذ ثائر بريطانيا بتتجسس على الشعب

المسلمين البريطانيين دول من الشعب البريطاني

ايش عرفك انها بتتجسس عشان تحمي الشعب؟
ليه ما تكونش بتتجسس عشان تلبسهم قضايا؟

واللي انت بتقوله ده لا هو حقائق ولا عليه اي ادلة

انا مش شايفة ان اللي يقتلوا ملايين في تلات سنين دول عندهم انسانية ولا اي حرص على الشعب، اي شعب في الدنيا

Sofftheme said...

شفتي أن المسألة مش مسألة دونية المسألة انك فاهمة الواقع أكتر و أنا دلوقتي فهمت

بارك الله بك