امناء ايه وفتاء ايه؟

مع احترامي للاستاذ هيكل والاستاذ حمدي قنديل والاساتذة مبادرات كلهم

انتوا بتليسوا للنظام؟ كل المبادرات دي كانت فين ايام التعديلات الدستورية؟ فاكرينها؟ ايام ما العيال الصغيرة اتعجنت واترمت في صندوق وفضلوا يلفوا بيهم في الصحرا وبعد ما القادة العظام جرجروهم في ميدان طلعت حرب خلعوا منهم وقفلوا تليفوناتهم وطلعوا في الجزيرة محفلطين مظفلطين كتيري الكلام والعيال طلعت من العلقة شوية تفوا على البلد وشوية شافوا نفسهم وشوية اهم لسة بيحاولوا

كانت فين بقى المبادرات دي في اللحظة التاريخية الحاسمة بتاعة التعديلات الدستورية بدل بهدلة العيال؟

جايين دلوقت تدوا النظام قبلة الحياة وتعملوا له تنفس صناعي؟ ما خلاص، ما التعديلات الدستورية اتعملت واتفصلت على جمال وخلصنا

مافيش بقى غير اننا نفضل مشكلين معارضة شديدة لجمال عشان ما ياخدهاش بالساهل، ويبقى عارف انه مكروه، وهو مكروه وسط العمال والفلاحين فعلا لان دول الفئتين اللي بيتهم اتخرب من سياساته، ولسة بيتهم ح يتخرب تاني، على احسن التقديرات المعارضة الشديدة لجمال مبارك ح تخليه ما يوصلش وعلى اوحش التقديرات لو وصل مش ح يقعد

وهو اصلا كده كده ضعيف، ومنفصل عن الواقع، وعايش في زمان ومكان مالهمش اي علاقة بينا، يعني مش ح يقعد اكتر من خمس سنين قبل ما الناس تنزل تقطع بعضها في الشارع من الجوع، وبعدها الله اعلم ايه اللي ح يحصل، كل شيء جايز، جايز الجيش يمسكها وتبقى حكم عسكري زي هندوراس، جايز تقلب فوضى وحرب اهلية، جايز والعياذ بالله امريكا تتدخل (هي اصلا زارعة صحابها هنا عشان لما تيجي تنزل اهلا وتحل سهلا) وجايز على اخر لحظة ربنا ينور لنا سكتنا وينفخ في صورتنا، مافيش حاجة بعيدة، حصلت كتير قبل كده، وكان بتبقى السكة ضلمة وببركة ربنا فجأة تنور، وح تبقى معجزة صحيح، بس حصلت كتير معانا احنا بالذات في السابق، ومصر بالذات اثبتت انها غير خاضعة للتوقعات

مافيش حاجة ح تنجينا غير اننا ما نوطيش وما نليسش ونمسك فيها بايدينا وسنانا، والله المستعان

انتهينا بقى

والنظام ده خلاص شاخ وباظ وسوس وما بقاش نافع، بتحاولوا تنقذوه ليه؟ لما كنا محتاجين انقاذ البلد من التعديلات الدستورية خلعتوا مننا، ولما النظام دلوقت محتاج انقاذ من مصير اسود بتعملوا له مبادرات؟

لا متشكرين

ثم يعني كل الاسماء المقترحة ما كانوا موجودين في البلد من قبل ما احنا نتولد، ما لو كان ال... بينفع كان نفع نفسه

انتوا لسة فايقين دلوقت؟ احنا خياراتنا مش كتير

احسن سيناريو متاح: جمال يتراجع ويفضل مبارك لحد ما ربنا يئذن وبعدها الله اعلم

اوحش سيناريو متاح: جمال يتقدم ويبتدي بقمع دموي لمعارضينه وبعدها تتقلب عليه ويطير ثم الله اعلم

كده

واجهوا الحقيقة، هي البلد بقت كده، مصيرها الله اعلم، انتهينا، مافيش داعي للخيال ودفس الراس تحت المخدة عشان ما تشوفوش الانهيار الكبير، خلاص بقى، قميص الاسمنت المية اكلته، وكل الترميمات عمرها الافتراضي خلص، وكان في ايدكوا تساعدونا في توقيتات جوهرية وكنتوا سرحانين، وضيعتوا علينا فرص كتير

اسكتوا بقى... سيبونا في اللي احنا فيه، هو احنا ح نشوف وش حد فيكوا ساعتها؟ كله ح يخلع على برة واحنا اللي ح نفضل فيها

وح نشيلها، هو حد شايلها غيرنا؟

اللي معاه مبادرات متأخرة اربعين سنة، واللي جاية لنا من برة تعمل جمعية اللي اسمها نوال السعداوي دي اللي ما بتفكرش غير في الاعضاء التناسلية، واللي فاتح لنا حزب وهو اصلا كان صاحب جمال مبارك اللي هو اسامة الغزالي حرب بدون ذكر اسماء، واللي صاحب كوندوليزا وعمل لنا بطل من غير اي مناسبة، وكل دول خواجات زي جمال بالظبط، ايش عرفهم بينا دول؟ كلهم معاهم فيزا على برة وجنسية تانية اذا ازفت الازفة... واحنا بقى معانا سيدنا الحسين والست الرئيسة ام العواجز، يا ندفن جنبهم يا نغزل برجل حمار كالعادة... مدد يارب