Tuesday 27 October 2009

امناء ايه وفتاء ايه؟

مع احترامي للاستاذ هيكل والاستاذ حمدي قنديل والاساتذة مبادرات كلهم
انتوا بتليسوا للنظام؟ كل المبادرات دي كانت فين ايام التعديلات الدستورية؟ فاكرينها؟ ايام ما العيال الصغيرة اتعجنت واترمت في صندوق وفضلوا يلفوا بيهم في الصحرا وبعد ما القادة العظام جرجروهم في ميدان طلعت حرب خلعوا منهم وقفلوا تليفوناتهم وطلعوا في الجزيرة محفلطين مظفلطين كتيري الكلام والعيال طلعت من العلقة شوية تفوا على البلد وشوية شافوا نفسهم وشوية اهم لسة بيحاولوا
كانت فين بقى المبادرات دي في اللحظة التاريخية الحاسمة بتاعة التعديلات الدستورية بدل بهدلة العيال؟
جايين دلوقت تدوا النظام قبلة الحياة وتعملوا له تنفس صناعي؟ ما خلاص، ما التعديلات الدستورية اتعملت واتفصلت على جمال وخلصنا
مافيش بقى غير اننا نفضل مشكلين معارضة شديدة لجمال عشان ما ياخدهاش بالساهل، ويبقى عارف انه مكروه، وهو مكروه وسط العمال والفلاحين فعلا لان دول الفئتين اللي بيتهم اتخرب من سياساته، ولسة بيتهم ح يتخرب تاني، على احسن التقديرات المعارضة الشديدة لجمال مبارك ح تخليه ما يوصلش وعلى اوحش التقديرات لو وصل مش ح يقعد
وهو اصلا كده كده ضعيف، ومنفصل عن الواقع، وعايش في زمان ومكان مالهمش اي علاقة بينا، يعني مش ح يقعد اكتر من خمس سنين قبل ما الناس تنزل تقطع بعضها في الشارع من الجوع، وبعدها الله اعلم ايه اللي ح يحصل، كل شيء جايز، جايز الجيش يمسكها وتبقى حكم عسكري زي هندوراس، جايز تقلب فوضى وحرب اهلية، جايز والعياذ بالله امريكا تتدخل (هي اصلا زارعة صحابها هنا عشان لما تيجي تنزل اهلا وتحل سهلا) وجايز على اخر لحظة ربنا ينور لنا سكتنا وينفخ في صورتنا، مافيش حاجة بعيدة، حصلت كتير قبل كده، وكان بتبقى السكة ضلمة وببركة ربنا فجأة تنور، وح تبقى معجزة صحيح، بس حصلت كتير معانا احنا بالذات في السابق، ومصر بالذات اثبتت انها غير خاضعة للتوقعات
مافيش حاجة ح تنجينا غير اننا ما نوطيش وما نليسش ونمسك فيها بايدينا وسنانا، والله المستعان
انتهينا بقى
والنظام ده خلاص شاخ وباظ وسوس وما بقاش نافع، بتحاولوا تنقذوه ليه؟ لما كنا محتاجين انقاذ البلد من التعديلات الدستورية خلعتوا مننا، ولما النظام دلوقت محتاج انقاذ من مصير اسود بتعملوا له مبادرات؟
لا متشكرين
ثم يعني كل الاسماء المقترحة ما كانوا موجودين في البلد من قبل ما احنا نتولد، ما لو كان ال... بينفع كان نفع نفسه
انتوا لسة فايقين دلوقت؟ احنا خياراتنا مش كتير
احسن سيناريو متاح: جمال يتراجع ويفضل مبارك لحد ما ربنا يئذن وبعدها الله اعلم
اوحش سيناريو متاح: جمال يتقدم ويبتدي بقمع دموي لمعارضينه وبعدها تتقلب عليه ويطير ثم الله اعلم
كده
واجهوا الحقيقة، هي البلد بقت كده، مصيرها الله اعلم، انتهينا، مافيش داعي للخيال ودفس الراس تحت المخدة عشان ما تشوفوش الانهيار الكبير، خلاص بقى، قميص الاسمنت المية اكلته، وكل الترميمات عمرها الافتراضي خلص، وكان في ايدكوا تساعدونا في توقيتات جوهرية وكنتوا سرحانين، وضيعتوا علينا فرص كتير
اسكتوا بقى... سيبونا في اللي احنا فيه، هو احنا ح نشوف وش حد فيكوا ساعتها؟ كله ح يخلع على برة واحنا اللي ح نفضل فيها
وح نشيلها، هو حد شايلها غيرنا؟
اللي معاه مبادرات متأخرة اربعين سنة، واللي جاية لنا من برة تعمل جمعية اللي اسمها نوال السعداوي دي اللي ما بتفكرش غير في الاعضاء التناسلية، واللي فاتح لنا حزب وهو اصلا كان صاحب جمال مبارك اللي هو اسامة الغزالي حرب بدون ذكر اسماء، واللي صاحب كوندوليزا وعمل لنا بطل من غير اي مناسبة، وكل دول خواجات زي جمال بالظبط، ايش عرفهم بينا دول؟ كلهم معاهم فيزا على برة وجنسية تانية اذا ازفت الازفة... واحنا بقى معانا سيدنا الحسين والست الرئيسة ام العواجز، يا ندفن جنبهم يا نغزل برجل حمار كالعادة... مدد يارب

15 comments:

حسن على said...

نوارة تقلب الترابيزة وتخرج رشاشا - مخباء فى معطفها- وتفتح النار على الجميع. صحيح انها اوضحت فكرتها ولكن ربنا ستر ولم يصب احد الا يخدوش ...ربما

Unknown said...

دوووول مرشحين هيكل رئيس جمهورية
!!!!
شفتى الهبل وصل لإيه
!!!

مدونة النسر المصرى said...

من أجلك أنت

عزيزى المواطن المتواضع المصرى الأصيل،نحن نبذل قصارى جهدنا لكى تنعم بحياة أفضل فى ظل مناخ صحى ومفيد.
فمن أجلك أنت
- حادث قطار العياط......من أجلك أنت
- مصل أنفلوانزا الخنازير الذى لم نختبره......من اجلك أنت
- القمح المسرطن اللى بتطفحه كل يوم وبعد كده بيجيلك بلاوى زرقا ....من أجلك أنت
- زحمة المواصلات كل يوم....من اجلك أنت
- المياه الملوثة اللى بترمى فيها الحمير الميتة...من أجلك أنت
- المقاهى التى زودناعددها خصيصاً لأبناءنا العاطلين.....من أجلك أنت
- الخضروات التى تسقى بمياه الترع ...من اجلك أنت
- عرفت بقى بنحبك قد ايه
- كل ده من اجلك أنت

مي ثابت said...

الملاحظ اليومين دول إن اللى بيصحى بدري الأول بيعمل مبادرة

يكونش فيه تخفيض

و إن اللى يعمل مبادرتين يدوله التالتة مجاناً



بالفعل الحاجة اللى فى إيدينا دلوقتى

هى التركيز على منع التوريث الملكى و الجمهورى

و أعتقد إن كلام عماد الدين أديب الآن عن إعطاء الحكام منحة الخروج الآمن
!!

يوحى بمدى المأزق الذى يمر به النظام

و بالتالى لن يحتاج الأمر منا إلا لبعض التصميم و التماسك

حتى تنزاح الغمة





بجد عجبتى الجملة ديه

واللي فاتح لنا حزب وهو اصلا كان صاحب جمال مبارك اللي هو اسامة الغزالي حرب بدون ذكر اسماء

Anonymous said...

والله الحال من أسوأ إلي أسوأ
لسه النهارده باعت البوست بتاعك لإنسان بعتبره إنسان كويس
( هو رئيسي في العمل ( مدير مالي وإداري
وبقول له شوف اللي بيحصل في مصر وإحنا
(هنا بعيد ( في السعوديه
شايف جمال ومبارك وأعوانهم بيتهزئوا إزاي
عارفه قال لي إيه
إنت هتودينا في داهيه
وهما كده أو كده هيفضلوا قاعدين
فأنا دخلت وقولت إن جمال هو أحسن واحد
عشان لما يحصل حاجه نبقي في السليم
كل ده قالوا وهو مبسوط وشايف إنه صح
أقول له والـ 85 واحد أو أكتر اللي ماتوا وإتهموا فيها الجاموسه
يقول لي والله الوزراء دول بيتعبوا عليهم مسئوليه كبيره

بجد إتخنقت
هو في كده إنسان عاقل والمفروض إنه مثقف وفي سن والدي وجهة نظره تبقي سطحيه كده

بس بيتهيئلي إن اللي إحنا فيه ده هو بسبب الجيل القديم ده
تركولنا مركب خربانه قربت تغرق وبيقولوا شدوا حيلكم

نفسي أرجع بلدي مش لأي حاجه إلا لأنها وحشتني بكل بلاويها
وجمالها
ووحشتها
وناسها
بس الظروف اللي خلتني أسيبها لسه ورايا ورايا

ربنا يرحمنا بقي

سلالالالالالام

Empress appy said...

جوووووووووون
حتى اللى انتى بتكلميهم وبتقولى لهم سبتوا العيل حصل لها
هما برضه ايش عرفهم بينا ما عملوا كله كبش فدا
مفيش حل تالت غير ان ده يستمر او ده ياخدها دورى كده يمكن تلاقى حل تانى

Unknown said...

حسن علي

ولا رشاش ولا حاجة
هم عارفين انها مطربقة مطربقة، بس هم يحبوا بعد ما تخرب يقعدوا زي عواجيز الفرح ويقولوا: ما احنا قلنا وحذرنا

عشان كده جايين بعد ما القطر مشي يقول لها ما كان ممكن تطوقوا

بدراوي
مالقوش اكبر في السن من كده شوية؟

هو قصر الرئاسة ده خلاص قلب دار مسنين؟

النسر المصري
من اجل مين بقى؟
نفسي افهم

مي
هههههههههههههه
يعني الواد اسامة الغزالي حرب ده اخنق واحد في الدنيا رجل اعمال وكان جزء من السلطة والحرامية اتخانقوا وبروح اهله لما اتقلش عامل لنا مناضل؟

ده بامارة ايه يعني؟ ولما هو عارف الصح من الغلط لما كان في السلطة ما عملش الصح ليه؟
وللا مستني لما يتشاط عشان ينظر على دماغ امنا

انا مش عايزة ناس من دقن النظام وافتل له

خلصنا بقى من المحنطين دول


محمد الجريدي
مش كل الناس زيه

نص الناس بس
ههههههههههههههههههههه

ربنا يرد غربتك

mido said...

منصور شيفروليه اقيل او استقال

المهم انه غار

مي ثابت said...

ميدو

إقالته أو إستقالته مش كفاية

لازم يتحاسب عن كل روح من الأرواح الغير معلومة العدد إلى الآن من ضحايا القطار

!!

اللى إتسبب فى موتها هوه و الجاموسة

أنفاس الصباح said...

اجمل حاجة فى مدونتك يا نوارة انك بتعبرى عن الى جوانا بتلقائية وخفة دم

رغم حرقة الدم

وهو ده الابداع الى المصريين ماهرين فيه طول عمرهم

اجمل حاجة قولتيها هى

وجايز على اخر لحظة ربنا ينور لنا سكتنا وينفخ في صورتنا، مافيش حاجة بعيدة، حصلت كتير قبل كده، وكان بتبقى السكة ضلمة وببركة ربنا فجأة تنور، وح تبقى معجزة صحيح، بس حصلت كتير معانا احنا بالذات في السابق، ومصر بالذات اثبتت انها غير خاضعة للتوقعات

وانا والله مش مستبعداها
بس ازى وايه هى الصورة الى هيكون فيها النجاة وامتى ؟؟؟؟؟؟؟؟

الله أعلم

أبو عمر - الصارم الحاسم said...

بجد مش فاهمكم

بجد


يمكن غلطوا في مرحلة من المراحل او حتى في كل المراحل السابقة...هل الاصوب ان يستمروا في الخطأ ام ان يتحركوا

هل ده وقته نشكك في مبادرات بعض...وفي النهاية مبارك الابن والاب هو المستفيد



سؤال حقيقي لاني قريت نفس الكلام عن الاستاذة عزة ماهر

Unknown said...

دي مش مبادرات حضرتك
دي اسمها، لا مؤاخذة، علوقية، زي مثلا ما افضل اصرخ واقول لك، ح يرموني من الشباك، وانا متعلقة
تقوم تستنى لما اترمي فعلا من الشباك وتقول لي: طب ممكن بقى تمسي في حلق الشباك عشان ما تقعيش

بتكلم مين؟ ما انا وقعت من الشباك واتغدغت خلاص

سيبني على الاقل اروح المستشفى اذا كان لسة فيا نفس

Unknown said...

المبادرات اللي هم بيقولوها دي مستحيلة
مش ح تحصل دلوقت

لو كانت ايام التعديلات الدستورية او اول ما اعلنوا انهم ح يعملوا تعديلات كانت ممكن الدنيا تتلحق

لكن دلوقت بعد التعديلا خلاص
اللي بيقولوه ده مجرد سد خانة عشان يبقى اسمهم قالوا

أبو عمر - الصارم الحاسم said...

من ناحية متأخرين اكيد متأخرين وساعة التعديلات الدستورية قسم منهم كبير قاطع الموضوع في وقت ماكانش مستحمل مقاطعة

لكن وجهة نظزي هي ان تأتي متاخرا خيرا من الا تأتي ابدا

حسن على said...

صديقتى العزيزةالاستاذة نوارة - تعلمت ولاتزال -من الاستاذ هيكل وهذا حال المصريين خصوصا والعالم العربى عموما. الاستاذ-متعة اللة بالعافية والصحة, بح صوتة فى القضيةالوطنية-مصريةكانت ام عربية- القى مئات المحاضرات والف حوالى ثمانين كتابا هامافى اغلب المجالات الوطنية والسباسية ,الاستاذ لايحتاج دفاعا من احد ويانوارة بلاش تعملى زى بابا وماما فىموقفهم من الرجل الذى اذاقال انة اكل لحمة رالس مع "متيران"فانة يسارع باعطائك فاتورة المطعم الذى اكلا فية!!!