Tuesday 13 October 2009

مين بقى اكرم زكري القيادة الامريكية الوسطى؟

ههههههههههههه هي ايه القيادة الامريكية الوسطى دي؟ ومين اكرم زكري اللي سايب لي التعليق ده
وتعود بالنفع ازاي علينا يعني؟ يعني احنا عشان ساعدنا الجزائر في حرب التحرير وساعدنا الفلسطينيين في منظمة التحرير فاضحينهم عليها لحد دلوقت ومتخيلين انهم عبيد احساناتنا وماسحين بيهم البلاط، امال بقى اللي بتأكلنا وتشربنا وتلبسنا وتسلحنا وتدربنا تعمل فينا ايه؟ ودي بقى علاقتها بينا مش زي علاقتنا احنا بالجزائر وفلسطين، دي امريكا، دولة استعمارية حقيرة حقيييييييييييييييرة حقيييييييييييييييييرة ما عندهاش ادنى احترام للانسان ولا اي تورع عن اقتراف اسوأ الجرائم في التاريخ، دي دولة استفتاحها لبن بالصلاة ع النبي وقعت قنبلة ذرية على الناس، وحرقت مليون في فيتنام، وقتلت مليون ونص في العراق، وعطشت بلاد ما بين النهرين وعندهم ازمة مية وتضاعفت نسبة مرضى السرطان في العراق في السنة الاخيرة بسبب اليورانيوم المنضب، وقتلت حوالي مليون ونص تانيين في افغانستان، يعني بالصلاتو ع النبي تلاتة مليون في تمن سنين، وما تعرفش ربنا يعني، يعني تاخد صدام على حجرها وتهننه وبعدين تشنقه على الهوا هوب هوب، يعني تحط شاه ايران في نني عينها من جوة وبعدين تخلع منه اول ما شعبه يرفضه، يعني تعمل انقلاب في هندوراس وانقلاب في فنزويلا وتشأمظ نيكاراجوا وترتكب فيها جرائم حرب وتستخدم فيها اسلحة محرمة دوليا، يعني تضغط على عباس حبيبها وصاحبها عشان يأجل التقرير وتشيعه وتبيعه وتخلي طوب الارض ينعل سنسفيل جدوده عشان تحمي اسرائيل، وهي مش حاطة في اعتبارها، او حاطة ومش مهتمة، ان بعملتها دي عباس ممكن يتقتل بمنتهى البساطة، في داهية، مش مهم، مش لجل عيون اسرائيل، بس عشان اسرائيل زي ما ريجان قال: كلب الحراسة الامريكي في الشرق الاوسط، يعني حتى اقرب حليف ليها في العالم بتحتقره وبتعتبره مش اكتر من كلب حراسة، دي دولة وسخة، دولة وسخة، ولو فيه اكتر من وسخة كنت قلت، ومتهورة وخرقاء، وعاملة زي عيل عنده سنتين ماسك مسدس بحق وحقيق ومعمر رصاص بجد، وسياستها برجماتية، وتفتخر بانها برجماتية، برجماتية يعني ما عندهاش اخلاق من اي نوع، وواحد من ادارة اوباما لسة سامعاه بوداني النهاردة بيقول بمنتهى البجاحة: لو ايران تملكت سلاح نووي ح تهدد "الهيمنة الامريكية في الشرق الاوسط"، والله العظيم قال كده قال:
it will threaten the US domination in the Middle East
ومصر غلبانة، غلبااااااااانة، احنا روحنا في ايد امريكا، ما ينفعش كده، ما ينفعش روحنا حتى تبقى في ايد ليبيا، مافيش بلد في الدنيا بتحترم نفسها تبقى روحها في ايد اي بلد تانية، على الاقل تعمل اي تحالفات تانية، توزع البيض في عدة سلال بحيث لو امريكا ضايقتنا يبقى لنا حلفاء تانيين نركن عليهم اذا ما كناش قادرين نركن على نفسنا، انما نبقى معلقين في الهوا كده؟ ما كل الدول المحترمة عاملة تحالفات كتير، دي هيلاري راحت روسيا قام في نفس اليوم بوتين الكياد راح الصين، هي كوريا الشمالية روحها في ايد مين غير نفسها؟ البرازيل روحها في ايد مين؟ الصين روحها في ايد مين؟ احنا ازاي نعمل كده في نفسنا؟ واحنا بالنسبة لامريكا عمرنا ما ح نبقى زي اسرائيل اذا كانت دي اجمل احلامنا، مهما حاولنا ولحسنا الجزم، اسرائيل قاعدة عسكرية امريكية، ومضمونة لان كل حاجة فيها صناعة امريكية بما فيها الناس العادية، اللي ما يسمى بالشعب ده اللي هناك ده، كله فابريكا، مافيش حاجة طبيعي، وبرضه في اي لحظة تخلع منهم لو احتكم الامر، بس مش ح تستخلفنا بيهم، احنا هبل وللا ايه؟
احنا كلنا ايه وشربنا عليه مية من التعاون مع امريكا ورميتنا الوسخة في حضنها؟ دي سوريا اقتصادها بقى احسن مننا وبقينا نستورد فول وقمح منها، سوريا، سوريا المتحاصرة، اللي مواردها وتعدادها ومساحتها اقل مننا بكتير، وبطلوا حرب في نفس الوقت اللي احنا بطلنا فيه حرب، هم عندهم نسبة الفقر عشرين في المية واحنا خمسين في المية، ليه؟ المفروض اننا باديين مع بعض بعد الحرب، والمفروض ان وضعنا كان احسن من وضعهم، انا مش بانبر عليهم، بس احنا وسوريا، الاختين الحلوين هناء وشرين، كل حاجة ما بينا مشتركة ما عدا قاسم واحد بس: امريكا واسرائيل. احنا وقعنا في حجر امريكا واسرائيل وهم ما اتخانقوش ولا حاجة، بس جمدوا علاقاتهم. واحنا المفروض رجعنا سينا وهم ما رجعوش الجولان، والمفروض ان الجولان بالنسبة لسوريا زي سيناء بالنسبة لمصر، يعني مكان سياحي ممكن يجيب استثمارات ويدخل دخل كويس. طب ليه هم اقتصادهم احسن؟ وليه مستواهم المعيشي اعلى؟ وليه عندهم صناعة وزراعة احسن؟ ما شاء الله يعني، بس انا عايزة افهم
طب احنا استفدنا ايه؟ حد يقول حاجة واحدة م اللي ربنا كتبها علينا، انا فيه واد طيار في الجيش عنده 23 سنة قال لي: اسرائيل ممكن تموتنا بالليزر، ولما صحابي كانوا على الحدود اتكلموا مع الظباط وقالوا لهم: احنا مش قد الناس دي... على اسرائيل. والثابت بالدليل القطعي ان امريكا حريصة على انها تدينا جيل من الاسلحة متأخر عن اسرائيل عشان نفضل احنا اقل منها. طب ايه الفايدة؟ ماهو احنا المفروض ما عندناش عدو تاني بيهدد المية والسد العالي وبيبعت لنا اكل مسرطن وكل ما يلاقي خرم في الحيطة يدخل لنا منه تعبان غير اسرائيل، حد تاني بيهددنا؟ حد سمع ان فيه بلد في الدنيا هددت السد العالي غير اسرائيل؟ فيه حد تاني ضرب حدودنا واخترق مجالنا الجوي؟ في مخلوق تاني بعت لنا تقاوي مسرطنة؟ فيه حد تاني بيلعب في افريقيا وبيحرض دول حوض النيل علينا عشان تموتنا من العطش غير اسرائيل؟ فيه دولة تانية بتعمل كده؟ طيب احنا ناس بتوع مشاكل يعني؟ يعني احنا بنحارب حد غير اللي بيحاربنا؟ طب اه، احنا حاربنا دولة ما حربتناش، العراق، حاربنا العراق، احنا كان مالنا؟ محبة في الكويتيين يعني؟ هأو، اذا كان الكويتيين نفسهم بيقولوا لنا لولا القرشين اللي هبشتوهم من امريكا ما كنتوش عبرتونا، انتوا جيتوا بالامر من امريكا، اه، صح، كلامهم مظبوط، لا وببجاحتنا بنعايرهم اننا شاركنا في تحرير الكويت، هو احنا رحنا بمزاجنا؟ امال المظاهرات اللي كان فيها الاف دي كانت بتعبر عن مزاج مين؟ وبس عشان الاخوة الكويتيين ما يزعلوش، اه كان فيه مظاهرات بعشرات الالاف ضد اننا نشارك في حرب الكويت، مش عشان احنا عايزين الكويت تحتل، بس عشان احنا كنا شايفين ان فيه وسائل اخرى غير ضرب العراق، يعني اذا كان ضرب الكويت غلط فضرب العراق برضه غلط، ثم احنا عملنا سلام مع زفتة اسرائيل والسادات قال نو مور وور، نقوم نسالم اسرائيل ونحارب العراق؟ يعني احنا اهو، رحنا حرب غصب عننا اهو، ليه؟ عشان مين غصب علينا؟ طيب اللي غصب علينا مرة ما يعرفش يغصب علينا كمان مرتين تلاتة عشرة؟ ما لحم كتافنا من خيره وده سلاحه وتدريبه ومالناش حد غيره، يتشرط زي ماهو عايز
طيب لما دولة بتتحرش بينا ليل نهار، وبتهددنا ليل نهار، ويوم ما مسحنا لها جوخ واحتاجناها في اليونسكو مخمضتنا في بقها زي القطة اما تعذب فار قبل ما تاكله وبعدين تفتنا برة اليونسكو، وفوق ده كله عمالة تشوه سمعتنا في كل حتة لما وصل الامر بالناشطين اليساريين في اوروبا وامريكا انهم اثناء حرب غزة شتموا مصر زي ما بيشتموا اسرائيل بالظبط من كتر ما اولمرت وبيريز وليفني شكرونا في المصيبة اللي عملوها، احنا مالنا؟ احنا مش طرف في الحرب دي عشان كل ما يعملوا كارثة يشكرونا احنا، ايه حكاية نشكر مصر والرئيس مبارك في كل بلوة دي؟ سودوا وشنا في كل حتة في العالم ووحشوا صورتنا، انا شخصيا امريكان وطلاينة وفرنساويين قالوا لي: انتوا متحالفين مع اسرائيل ضد الفلسطينيين، ولما اقول لهم لا يقولوا لي: ليفني قالت وبيريز قال واولمرت قال طب ليه كده بيغلسوا علينا؟ يعني عاملين زي الرقاصة اللي حاطة راجل في دماغها وفي الرايحة والجاية ترمي عليه بالكلام وترمي زبالة قدام بيته وفوق ده كله تقعد وسط الناس وتقول: انتوا مانتوش عارفين، ده اخر الليل بيستنى اما تناموا وييجي يبات عندي في البيت، اوريكوا فانيلاته؟
طب مساعدات امريكا المشكورة دي، نفعتنا في ايه في ده كله؟ اذا كانت امريكا مصممة انها الوحيدة اللي تساعدنا عشان تضمن اننا نفضل متأخرين عن اسرائيل مش عشان تساعدنا اننا نتقدم
حد هنا عنده مخ؟ عشان تكسحنا وتضمن انها مكسحانا، زي الممرضة اللي بتدي العيان دوا غلط ومصممة ان ماحدش يديله الدوا غيرها عشان تضمن انه يموت، وهو بهبله عمال يقول: والله نبوية دي فيها الخير، بتيجي يوم اجازتها عشان تديني الدوا، احنا بنفهم وللا ايه؟
برضه مين اكرم زكري ده؟ وايه القيادة الوسطى الامريكية؟

21 comments:

الميكروباص said...

أولا: صحيح أمريكا تعطينا سلاح متأخر عن اسرائيل وأيضا لا تقول لنا كل امكانيات السلاح الذي تعطيه لنا، ولكن ما هو البديل؟ - الخطأ الوحيد الذي وقعنا فيه اننا لم نسعى إلى تنمية الصناعه، وهم على علم بهذا الأمر، ومن أجل هذا يعطونا ما نريد، والسلاح القادم من هناك صحيح متأخر، لكن هو أفضل من انك لا تملك شيء، كما انهم يعطونا السلاح لإحداث توازن وضمان ان يخاف اليهود من مصر دائما حتى يكونوا في حاجه إليهم بصفه مستمره، يعني هم يمسكون العصا من المنتصف
ثانيا: تسألين البرازيل روحها في يد من - البرازيل تؤكل العالم كله لحمه، وماركة ساديا الخاصه بالفراغ تغرق الكرة الأرضيه، والصين يصدر سنويا بالمليارات، ولا يوجد بيت على وجه الأرض يخلو من منتج صيني - كوريا الشماليه تستطيع صناعة صواريخ ومفاعلات نوويه، وتركيا التي ظهر منها اردوغان وقال -لا- لبيريز نصف انتاج بلده يذهب للإتحاد الاوربي وعندهم خبره كبيره في صناعة المطاحن والمواتير وغيرها
إذن كلمة السر في الصناعه
بلد بلا صناعه لا تنتظري من ورائها أي شيء
باختصار
نحن لا نصنع شيئا
ولا حتى الملابس التي نرتديها
والطعام يأتي لك كمعونه
إذا كنت بهذه المواصفات فلا يحق لك الاعتراض

ahmed samir said...

شوفي اللينك ده

http://www.freearabvoice.org/arabi/maqalat/USCENTCOM.htm

Kalimalhus said...

القيادة الوسطى دى جنابك اللى تحت رياستها كل القوات الأمريكية فى منطقة الشرق الأوسط و شمال أفريقيا يعنى تبقى القيادة الأعلى لجيوش أمريكا اللى فى العراق و أفغانستان حاليا ..

بس ما شاء الله عليكى الأمريكان خدوا بالهم منك و بيخلوا موظفين بتوعهم يكتبوا تعليقات و بتوقيع كمان .. طب ما تشوفيلنا كارت أخضر و ألا بنفسجى و ألا كارت للباشا الظابط بتاع كمين ليلة القدر ..

Sahran said...

يا أخت نوارة

الشيخ الشعراوي قال : ( إن ماكانتش لقمتك من فاسك عمرها لقمتك ما تطلع من راسك )

إذا كان 80%من الخبز اللي بتاكلوه من أمريكا فلا أتوقع أنكم تكونوا قادرين على مواجهتها يوما ما

إنتو اللي جبتوه لنفسكم ورضيتوا تعيشوا على قفاهم فما تلوموا إلا نفسكم , وما تطلبوا من اليهود يأجلوا التطور لحد ما ربنا يفرجها عليكم,,

العالم كله بيمشي لقدام والعرب للخلف در

مش بالتهييس راح نفلح , ولا بالممانعة الكاذبة راح نفلح

العقل هو الحل

Unknown said...

طيب، لما ابقى انا واعية اني خايبة ومش باصنع اي حاجة ولا باكل نفسي
يقوم رد الفعل الطبيعي اللي اعمله ايه؟

اني ابتدي بقى احاول اصنع واكل نفسي؟ وللا اني اشيل الشنطة لسيدي؟

الكلام ده لورنس وسهران


ميرسي يا احمد على المقال
ح اقراه

مهندس حر

ههههههههههه
يا شيخ ده تلاقيه واحد بيهزر

Amal said...

اعصابك يا عزيزتي .. انا عارفة ان كلامك صح بس صدقي مافي شي يستاهل حرق الاعصاب ... ولا اقلك انا اعصابي متفحمة اساسا ... يعني كويس انك بتتكلمي كذا وتقولي للوسخ انت وسخ والحقير انت حقير بس للأسف الكلام ما وصلنا لأي مكان .. ولا يمكن رح يوصلنا لمكان بس انا مش عارفة متى ووين ؟... بأختصار شدييييييييييد ... انا محبطة ... والله جد محبطة .. محبطة وبصحي الامل الي بيموت كل يوم فيني لما افكر في فرصة للنهوض بعروبتنا بعيدا عن الشعارات الرنانة .... اوقات افكر لو كنت بنت قرية وما افهم شي يمكن الحياة كانت اسهل .. لكني افهم .. لكني اعرف .. لكني استطيع ان ارفض .. ان اغير .. ان اعبر ... لكني سيسألني رب العالمين عمافعلته إزاء الوضع السيئ الذي نعيشة .. يا ترى ماذا سأقول له ؟ هل سأجرء واقول اني كنت محبطة ؟ !

Unknown said...

انت فلسطينية؟

Ahmed Mohamed said...

الغريبه اني في وقت من الاوقات فسرت موقف مصر من حرب العراق والكويت
بقول الله عز وجل
وإن طائفتان من المؤمنين اقتتلوا فأصلحوا بينهما فإن بغت إحداهما على الأخرى فقاتلوا التي تبغي حتى تفيء إلى أمر الله فإن فاءت فأصلحوا بينهما بالعدل وأقسطوا إن الله يحب المقسطين
صدق الله العظيم
طب والله لو كانت دي النيه كان ربنا عدل لنا حالنا
****

تركيا استبعدت اسرائيل من مناورات
نسر الاناضول
وطبعا امريكا معاها
اصلها مش هتلعب الا مع اسرائيل
يا اما فركش وهرمي ازاز في الملعب

جدعه اوي تركيا دي
تركيا بقي روحها في ايد مين

انا اصدق اي حاجه عن امريكا
ومصدق انها الي بتطور الفيروسات
*
من أين حصل هذا الفيروس على كل هذه الجينات ؟ ، ويقولوا إن التحليل الدقيق للفيروس يكشف عن أن الجينات الأصلية للفيروس هي نفسها التي كانت في الفيروس الوبائي الذي انتشر عام 1918م بالإضافة إلى جينات من فيروس انفلونزا الطيورH5N1، وأخرى من سلالتين جديدتين لفيروس H3N2 و تشير كل الدلائل إلى أن انفلونزا الخنازير هو بالفعل فيروس مركب و مصنع وراثياً.
****
ودي كمان مصدقها

Unknown said...

انت كداب يا بهيج انت كنت بتدخل باكاونت واحد اسمه عمرو

واسكت بقى وجعت دماغي مش كل ما اروح اشرب بق مية الاقيك سايب لي عشرميت تعليق

Shoukry said...

1. I don't have arabic keyboard or maren
2. read till the end please to get the idea
3. Thanks in advance

There is an article wrote by Alaa El Aswany in Masrawy Portal. Some said it is taken from Wikipedia but it makes no difference, it is completely true anyway. I think if you stopped concerning with foreign crisis and and put all your effort in enlightening people with their rights and what to do and how to be proactive - away from violence, revolutions and wars (remember Ghandi took silence as his weapon against violence), it will have a greater impact. Unlike yelling, crying and getting angry for each stupid thing that takes place in our beloved country.

I hope you don't take this as criticism. I do believe in your power to do so, you are a writer with a leadership character and have influence on people. you have a blog with many followers and have a lot of connections. if you can guide people to their rights and how to get it by being proactive, it will be as a dream that became true :)

This is my own point of view which is if we fixed inside, may be someday we can fix outside as well.

Feel free to ignore this comment completely. just don't criticize me. about why don't I do this, just know that I am trying with my little power and traits.

Mohamed said...

نوارة اوعى تفوتك اصطباحة بلال 13-10
عن الدكتور محمد السيد سعيد.

مواطن مصري said...

نوارة انا بحب الواقعية احنا مش بنصنع سلاح حتى مصع الدبابات الوحيد مش بيصنع بيجمع

حتى سلاح المسدس مش بيتباع

ة امريكا بتدينا سلاح و فية سلاح بنشترية من روسيا و الصين مش من امريكا بس

بس احنا من حيث الكفائة القتالية ف الكل عارف انن الاقوى و أظن

ان الطيارة المصري الي طار ب الميج امام الفانتم الي كسر كل القواعد

ابسط مثال

و بعدين هاتيلنا دولة نعمل معاها مناورة

نعملل مع مين دول الخليج الي كل سكانها

مع بعض يعملو الجيزة عندنا

نعمل مع السودان مثلا ؟ ولا مع ايران

نوارة مفيش اي دولة بما فيها ايران تقدر تحارب امريكا دلوقتي

مواطن مصري said...

نوارة بعد اذنك شوفي دة

http://www.youtube.com/watch?v=B7O61c71Fuo

محمد ناصر الدين الهلالى said...

أتفق مع لورانس العرب تماما هنا تبرع مشكورا بالرد نيابة عنى !

الميكروباص said...

الغلطه غلطة الحكومه لأنها استمرت في هذا الوضع
ممكن يكونوا عاوزين الطريق السهل
السادات -الله يرحمه- كان ده في دماغه
وهو اننا نصل أولا إلى الأرض بالمفاوضات وبعدها نستطيع ان نقوي انفسنا
لا تنسي حرب أكتوبر 73 عندما فعلنا ما فعلناه ولم نستطيع ان نصمد كثيرا بسبب الضغط الامريكي الرهيب علينا
قد عرف وقتها ان اللعبه كلها في يد الأمريكان
اخذنا الأرض وبعدها كان من المفترض ان نعمل تنميه صناعيه كبيره تحقق لنا الرخاء - لم يمهله القدر لفعل شيء
وكان هذا واجب كبير على مبارك
اهتم مبارك بالمصانع الكبيره مثل الاسمنت والحديد والاسمده والسيراميك (التي هجرها الغربيون لأنها تضر بالصحه وألقوا بها في ملعبنا) ونسى أهم شيء
اهم شيء هو صناعة الملابس والصناعات الصغيره
ولكا رأى رجال الاعمال ان الطريق الصيني سهل وان التجاره بتكسب أكثر من الصناعه -يعني العمليه ما هي إ شوية مندوبين والموضوع ينتهي- كانت المصيبه كبيره
اعتمدوا على الصين ولم يتعبوا انفسهم ف بناء مصانع وانتاج شيء مكتوب عليه صنع في مصر
احنا نملك بالفعل صناعه - لكن ا ان تدخلي مصنعا للأسمنت أو مطحن دقيق وتجدي كل المواتير ايطالي والتصميمات تركي أو تشيكي إذن صناعتنا هذه لا تساوي شيء
وعلى هذا الأساس انت مجبر على ان تشيل الشنطه لسيدك
لأن سيدك هذا هو الذي يعطيك السلاح الذي تقف به أمام اليهود
انا لست مع من يقول ان هذا السلاح لا فائده منه
بل هو سلاح متقدم ومحترم وإن كان قليل التقدم
لكنه أفضل من لا شيء
ونحن بصفه مستمره اسلحتنا متأخره عن اليهود
وكن العبره بكيفية استخدام السلام وقت المعركه وليست بمدى تقدمه وتأخره
وقد كنا في حرب 73 لا نملك شيئا - ولكن ولله الحم نجحنا فيما اعتبره الكثيرين مستحيلا

عبده البرماوي said...

أولا باقترح ان بهيج يتقدملك رسمى عشان نعرف احنا نعيش

ثانيا الولايات المتحدها انتشار عسكرى بيغطى الكرة الارضية، فهتلاقى القيادة الغربية فى الكاريبى وامركيا اللاتينية والجزر اللى خدتهم هدية بعد الحرب العالمية الثانية فى الاطلسى والهادى

القيادة الاوربية فى آلمانيا واسمها بيختفى مع حقيقة ان امركيا بترأس حلف الناتو بموجب مواد التأسيس اللى بتشترط قيادة امريكية للحلف

وفيه قيادة الهادى الشرقية وموجودة فى المنطقة المحيطة بتايوان وبحر الصين وتقريبا مقرها فى اليابان

القيادة الوسطى مقرها قاعدة السليلية بقطر اللى الاخ التخين بتاعها دفع من جيبه تسعين مليار.. ايوه تسعين مليار دولار لإنشاءها على ارض بلاده.. ده غير قيادة العمليات ف ى العراق اللى مقرها قاعدة الكويت.. ودى قاعدة لطيفه يدخل فى حزامها الامنى ما يوازى ستين فى الميه من اراضى الكويت... مش باهزر والله

طيب ثالثا بقى مصر بتعمل مناورات مع دوله محتله ليه.. ده سؤال عبيط.. السؤال الصح هو مصر تصورها ايه عن استراتيجيتها الدفاعية وعن مصالحها فى اقليم الشرق الاوسط.. الاجابة سعادتك تحدفنا على طول لعدة امور لطيفه
- مصر ترى نفسها دولة حليفة للولايات المتحدة، حليفه ده التعبير الدبلوماسى الشيك، لكن التحليل الاستراتيجى الرصين بيديها لقب دولة تابعه عسكريا، لإن التحالف بيبقى بين اطراف بينهم نوع من التوزازن فى القوى والاحترام المتبادل للمصالح اللى بيتم بموجبها التحالف، لكن التبعية العسكرية بتبقى بناء على انى اديلك حماية عسكرية وانت تخدم مصالحى، وبالمناسبة جزء من مسألة الحماية العسكرية لا يشمل فقط توريد السلاح والتدريب وتقديم ضمانات عدم الاعتداء من الاطراف الاقليمية الاخرى، انما بيشمل كمان تقديم معلومات استراتيجية مخابراتية وحماية رؤوس النظام.. ايوه حماية القلة الحاكمة ودعم وجودها.. بمن فيهم سياسيين وصفوة اعمال وعسكريين محددين.. يعنى تحالف مش مؤسسى بس، ده طبقى وفردى احيانا

طب العلاقة الاستراتيجية المنيلة دى تؤدى لإيه، تؤدى إلى ان التصورات الاستراتيجية للامن والدفاع فى مصر توضع بالتشاور، او تملى، مع الامريكيين.. والامريكيين وحدهم على فكره.. فلا عرب ولا غيرهم فى الصورة، امريكا وتابعيها.. لإن الامر اكبر من ان دولة جوه التحالف تعمل اهداف وخطط وتصورات استراتيجية على مزاجها.. وده سر ما يسمى بالحوار الاستراتيجى بين مصر والولايات المتحدة اللى بيعقد بين قيادات واركان الجيش هنا واقرانهم من القيادة الوسطى...

فوايد المناورات المشتركة كتيرة جدا... لوجستية وتدريبية ومعرفية... لكن برضو ليها مخاطرها على قدرة الدولة فيما بعد على وضع خطط مستقلة للحماية والدفاع.. فى ظل التبعية لا شئ يضر فى المناورات.. فى ظل الاستراتيجية المستقلة مش هاتلاقى عندك شئ مستخبى.. كله اتعرف واتكشف.. من اول مين قياداتك اللى بيتعملهم ملفات بالنفر، وحجم استعداداتك.. وانتشارك العسكرى.. ونوعية الفكر اللى بيقودك.. وحتى عيوبك.ز كله بيبقى معروف..

.كفايه عليكى كده

Anonymous said...

هههه ماشاء الله الأمريكان عنيهم عليكي :) و بيكتبوا تعليقات ..خلي بالك من السي أي إيه بقى ::)
بالنسبة لموضوع مصر اللي ذلة العرب بانها ساعدتهم في حروب التحرير دي مصيبة كأنها سخرة مثلا طب هي مصر ما أستفدتش في المقابل من ده و البلوة اللي عملها عمرو اديب مؤخرا تثبت ده http://www.echoroukonline.com/ara/sports/en/43212.html
يعني شوفي الإستخفاف بالناس و إحنا عموما بنحب نقلل من تراث و حضارة العرب المحيطيين بينا معرفش ليه ؟؟

مصر مش بتعمل سلاح و ايام عبد الناصر كانت مصر محسوبة على السوفيت طبعا بعد إنهيار الإتحاد السوفيتي امريكا بقت بديل الوحيد للنظام جدي الله يرحمه كان بيشتغل في مصنع 99 حربي و كان بيحكيلي عن تشجيع الصناعة ايام عبد الناصر ( رغم مساوىء حكم عبد الناصر) لكن إحنا دلوقتي فين من كل ده ؟؟ مفيش مصانع تبع الدولة كله قطاع خاص داخل فيه مستثمرين اجانب ده غير ان التنمية الصناعية في مصر بتركز على التفاهات يا ترى عدد مصانع الشيبسي و المصاصات في مصر مقارنة بمصانع السلاح و الأسمنت و الحديد ( المصرية ) قد إيه ؟؟ الدولة اتخلت عن دورها في توجيه الإستثمار فبقى سداح مداح و بيدخلوا في الإستثمارات اللي تدر فلوس بس مش ضروري تحقق تقدم للبلد ده احنا بنستورد كل حاجة من الابرة للصاروخ ليهم حق يركبونا و يقولوا شييي حاااا

Al said...

نعيب زماننا والعيب فينا .. وما لزماننا عيب سوانا..!!؟؟

Sahran said...

عزيزتي نوارة

أنا مش عارف ليش كل ما واحد حكى كلمة وما بتعجبكم , بتروحوا تقولوا إنه صهيوني أو أمريكي , ولماذا دائما أنت على حق وغيرك دائما على باطل؟؟؟؟

أنا لا أقصد أن ندفن رؤوسنا في الرمال ولا أن نذهب للبيت الأبيض أو الكنيست حتى نأخذ منهم البركات , ولكن يا أختي الفاضلة أول خطوة لتصحيح الخطأ تكون بالاعتراف بوجود هذا الخطأ ومن ثم معالجته
قبل الحديث عن الصناعة أو الزراعة ( وهي بالتأكيد أساس بناء الدولة) ولكن يجب أن نبدأ بمراجعة كاملة لكل ما أنتجناه من أفكار ومبادئ ونحاول الفهم إن كانت قابلة للتطبيق.

أنا لست من المؤيدين لإسرائيل ولا أتمنى أن يكون معها تطبيع , ولكن هناك مقولة لجنكيز خان أعجبتني وهي ( إن المغفل هو من يخوض معركة خاسرة سلفا) فليس مطلوبا منا إذا أن ندعهم يدوسوا علينا بالجزمة حتى يعرف العالم أننا نقاومهم ولسنا مجبرين على الدخول معهم في حرب نعرف نتيجتها سلفا ... وهناك مقولة للدعاة ( ابني الساجد قبل المسجد ) يعني قبل ما نفكر نعمل جيش بدنا نعمل جندي محترف وفهمان

أتمنى منك ما تآخذيني على صراحتي

ودمت سالمة

Rateb said...

باختصار كده الموت اكرم من عيشة الذل واللى مش عاجبه يخبط دماغه فى اتخن حيط

Amal said...

لا انا يمنية ..بس لي اصدقاء فلسطينين كثر ... من عرب ال 48 كمان