Sunday 4 October 2009

ايه يا خالد يا يوسف ده؟

هو انا بقالي كام يوم باقع بدري، مش بابقى قصدي انام، بس فجأة باروح على الساعة عشرة حداشر كده، امبارح ماما صحتني بالعافية عشان اتفرج على العاشرة مساء كان فيها جمال بخيت وخالد يوسف ممثلين للي ضد التطبيع وإيلي شالوم (علي سالم سابقا) والراجل بتاع الاهرام ده اللي عمري ما بالحق اسمع اسمه، رحت اودة التلفزيون ومددت على الكنبة وابتدى جمال بخيت يتكلم كلام كويس وبعدين لقيت ماما بتصحيني اروح انام في سريري: ايه اللي حصل؟
قالت لي: قفلت، خالد يوسف كان بيرد على علي سالم وبيقول له "طب ما العرب قعدوا قد ما قعدوا في الاندلس وبعدين عشان فضلوا محاطين بالكراهية لحد ما مشيوا"!! ايه يا خالد ده يا خالد؟ ياريتك ما نطقت يا شيخ، المصيبة اني انا عارفة انه كويس ووطني ونيته مخلصة، بس الكلام الكتير يغلط كتير، ايه وجه المقارنة ما بين الاندلس واسرائيل؟ اللي اطردوا من الاندلس كانوا من السكان الاصليين واطردوا عشان دينهم مش عشان اغراب ولا محتلين، هي الاندلس كانت دولة استيطانية؟ هم العرب في الاندلس طردوا السكان الاصليين وقعدوا ناس تانية مكانهم؟ 
 جمال بخيت قال ما الاتحاد السوفييتي اتفكك، بس مافيش اي مقارنة ما بين اسرائيل وما بين اي حد، الحقيقة ما شفناش قبلها ولا بعدها، هي الناس بتحاول تلاقي لاسرائيل شبه ليه؟ مالهاش، هو فيه دولة في الدنيا اتأستت بقرار وله رقم كمان عشان تلم شوية عيال صيع مطلوبين؟ لا وقلالات الاصل كالعادة، بعد ما الامم المتحدة اسست لهم البلوة غدروا عليها وقالوا ما احناش سامعين الكلام، ودلوقت هم اكتر ناس بيشتموا في القلل المنتحرة ونازلين فيها تهزيء لحد ما رئيس وزراءهم راح شتم الامم المتحدة كلها واحنا اللي اخدنا على قفانا منها اللي ملتزمين بكلامها، طبعا، حد يجيب شوية مجرمين ويعمل لهم دولة؟
انما ليه خالد يوسف يتفلسف؟ ما يتكلم من غير ابتكارات، لو فيه اي شبه يبقى الشبه الوحيد هو اللي الشماليين عملوه وطردوا سكان اصليين عشان دينهم وخيروهم ما بين تغيير دينهم وما بين الهجرة من بلدهم، اصلا ما كانش فيه حاجة اسمها اسبانيا ولا الاندلس لما طارق ابن زياد دخل بالاتناشر الف بتوعه اللي ما ينفعش يفتح بيهم ازازة كازوزة مش شبه جزيرة ايبيريا، بس ربنا سترها معاه، والعرب كانوا دايما كده، لا مقاتلين، ولا كانوا فالحين في حاجة الحقيقة، بس ناس طيبة ومتكلين على الله وعددهم قليل جدا وربنا بيسترها معاهم، وده يبقى احتلال ايه ده ناهيك على انه يتقارن بعصابات مسنودة على قوة استعمارية زي انجلترا؟ قوم تروح يا خالد يا يوسف تشمت فينا الناس؟ انت مش شايف اننا بنمر بأسوأ مراحل تاريخنا وكل كلب اتجرأ علينا، بس وماله، بكرة تروق وتحلا، واحنا لينا اجر اننا مستحملين وصابرين، والحمد لله ان فيه نت وتسجيلات عشان يتسجل الكلام ده، عشان اللي جايين كمان خمسين، مية، ميتين سنة، مش مهم امتى، انما اللي جايين يجمعوا الحساب ويعرفوا مين قل اصله معانا ومين كان معانا على الحلوة والمرة والحساب يجمع، وانا باسجل اهو للاجيال القادمة: انا مش مسامحة، مش مسامحة حد ابدا، مش مسامحة كل الدنيا اللي خيرنا عليهم ياكلوه وينكروه ويذلونا، حاسبوا لي على مشاريبي ده حقنا عليكوا، احنا استحملنا وشفنا اللي ماحدش شافه وفضلنا ماسكين اهو، لا غيرنا ولا بدلنا، واتحبس دمنا كتير من اللي خلعوا مننا، وطلعوا عينهم برضه، تاخدوا لي حقي.
هو العالم بيتصرف كده على اننا رحنا ومش جايين ليه؟ هو فيه حد بيروح ومش جاي؟ جايين ان شاء الله، واحنا معروفين، احنا بالذات لما ربنا بيفرجها السكك بتتفتح بزقة والله ما بنعملش مجهود، بس هو زمن صعب، كل الامم مرت بظروف صعبة، وخلاص، فيه اللي ما صدق، وفيه اللي يأس، وفيه اللي كان مداري نفسه واول ما لقى الشلاليت نازلة علينا من كل ناحية قالك اما ادخل في الزحمة كده اديهم شلوت مش ح ياخدوا بالهم، وفيه اللي عمل زي الفيران واول ما المركب مالت جري، وفيه اللي يجي يصلح يقوم يعك، وفيه اللي تغابى، وفيه اللي عايز ياكل عيش، وفيه اللي لسة بيتصرف على انه ابن الباشا وح يودينا في داهية بالاطته، احنا ما ينفعش نتصرف كأننا لسة زي ما كنا، لازم نهدا شوية خصوصا ان احنا وقعنا في ايد اللي يقدر ولا يعفيش، بس وماله وماله، إنما يوفى الصابرون أجرهم بغير حساب، الصبر بس، الصبر، انما مش طالبة غباوة، كفاية اللي احنا فيه، ده خالد يوسف مفروض انه عامل فيلم عن الاندلس! طيب مش يذاكر؟ ده الدكتور طاهر مكي عامل ابحاث طويلة عريضة يثبت فيها ان بعد اقل من خمسين سنة من دخول العرب كل الدماء اللي كانت في الاندلس كانت اوروبية لان اصلا العرب اللي دخلوا مش كتير، وللا دي لخبطة في القدرة على القياس وللا ايه؟
هو زمن صعب، هو زمن صعب، مالوش غير الصبر على مكارهه بكل اشكالها من اول وساخة علي سالم لحد ذكاوة خالد يوسف

35 comments:

مواطن مصري said...

هو عامل فلم عن الاندلس ؟
اذا كان فلمة القادم كلمني شكرا

و لعدين موضوع هالة مصطفى دة انا شايف ان هي مظلومة فية

يعني اشمعنى لما الجزيرة تعمل لقاء مع ايهود براك ولا تتكلم مع مسئول في الجيش الاسرائيلي ايام حرب غزة مشفناش حد من الناصرجين او بتوع القومية العربية

يقفشو على الجزيرة

و لما صحفية في الاهرام الي هو مفروض تابع

لسياسة الدولة تقابل السفير الاسرائيلي الدنيا تهيج عليها

انا شايف ان الصحافة ملهاش قيود من حق اي صحفي يعمل حوار مع مسئول في اسرائيل

زي ما الجزيرة ما بتعمل و زي ما قناة العربية بتروح تغطي الاحداث في تل ابيب

ولا احنا اقل منهم يعني

هالة مصطفى فعلا اتظلمت

Unknown said...

انا ماليش دعوة بالجزيرة
وهالة مصطفى مش مظلومة قطم رقبتها
دلوقت لما واحد يشتغل حرامي وييجي يتقبض عليه تقوم تقول واشمعنى هو اللي يتقبض عليه ما فيه حرامية كتير برة السجن؟

مواطن مصري said...

اشمعنى الناس بتتفرج ع الجزيرة لما تعمل لقاء مع متحدث الرسمي ب الجيش الصهيوني

و تقفش على صحفية في الاهرام دي ازدواجية

في التفكير ولا عشان هي الجزيرة؟

انا مقتنع ان من حق الصحفي اجراء حوار حتى لو مع العدو امال نعرف اخبارهم ازاي ولا ازاي بيفكرو او بيكتبو اية عننا
او اراء الشارع عندهم علينا

Unknown said...

عشان هي ما عملتش حوار مع متحدث باسم الجيش الاسرائيلي
هي قابلت السفير الاسرائيلي
يعني دي علاقات دبلوماسية وما عملتش كده عشان تعمل شغل للاهرام هي عملت كده في اطار علاقات دبلوماسية وهي طلعت في العاشرة مساء تقول انا افتخر اني من مجموعة كوبنهاجن

اللي الجزيرة بتعمله مش تطبيع
لكن اللي هي عملته تطبيع لانه علاقات دبلوماسية

Unknown said...

هو انا لما اقرا هاآرتس ابقى باطبع؟
لكن لما اكتب في هاآرتس ابقى باطبع

عمرو said...

أنا كمان أستغربت جدا من كلام خالد يوسف و بقيت محتار فى أمره و الله !!
و أفتكرت حسين فهمى لما فى مره صرح فى بداية الغزو الأمريكى للعراق و أيه الغريب فى كده ما العرب عملوها قبل الأمريكان و غزوا نص العالم :))
أما طبعا اٍيلى شالوم فلا لوم عليه خلاص بس يا ريت يقروا شويه بتمعن فى تاريخ الأندلس و نسأل عن اليهود المغاربه اللى أصلهم أندلسى أيه اللى سيبهم بلدهم الأصليه و رماهم على المغرب و منها أنتشروا لباقى العالم ؟؟
مش عارف ليه حاسس أن فيه اٍتجاه جديد لخالد يوسف !!

mido said...

القانون واضح و باجماع الجمعية العمومية المنتخبة ديمقراطيابنقابة الصحفيين

و هالة مصطفى خالفت القانون و ضربت بالاجماع عرض الحائط

اى كلام بعد كده سفسطة و تخريف

مواطن مصري said...

طيب ما مسئولين اسرائيلين زارو قناة الجزيرة في قطر و كان منهم ليفني ايام ما كانت وزيرة

ما دة يبقى الطبيع ذاتة

و بعدين الي عاوز يطبع يطبع الي مش عاوز هو حر

بس في نقطة الصحافة دي زي ما قولت من حق اي صحفي انة يلتقي باي شخصية حتى لو في حالة حرب

طيب لو حد راح مثلا و كتب تعليق في المدونات اسرائيلية

عشان يدافع عن وجهة نظرة دة مش تطبيع دي مواجهة

Unknown said...

ماهو بقى المقصود يا ميدو ان القانون ده يتلغي
عشان كده بيزعزعوه

هالة مصطفى قابلت العرص ده بامر من وزارة الخارجية عشان يساعدهم في اليونسكو

Unknown said...

انا شفت عمرو سليم رسم
كاريكاتير بيقول فيه
ان النقيب نفسه راح اسرائيل
!!!

Unknown said...

هالة مصطفى قابلت العرص ده بامر من وزارة الخارجية عشان يساعدهم في اليونسكو


و فى الأخر رموه على اول ناصية و باعوه بيعة
قصدى على روقة

Unknown said...

عمرو

خالد يوسف له اتجاه جديد؟ ما اعتقدش، انا والله عارفة انه مش نيته شر

بس عدو عاقل خير من صديق جاهل

حسين فهمي؟ هههههههههههههه ماهو ده من صعوبة الزمن
ان البهايم يتكلموا

Unknown said...

بدراوي
اه
ماهو مكره مهبب احمق راح اسرائيل

بس ده مش منطق الحقيقة

طيب قياسا على كده

مبارك اكبر حرامي

افتحوا السجن وخرجوا كل الحرامية الصغيرين

مواطن مصري said...

خالد يوسف معروف انة ناصري ازاي يبقالو اتجاة جديد؟

mido said...

مواطن مصرى

و بعدين الي عاوز يطبع يطبع الي مش عاوز هو حر
---------------

لأ يا عمرو

دى مخالفة للقانون

و لا القانون مش على مزاجك المرة دى
@!!

Unknown said...

انا بس لما قولت موضوع مكرم
ان قضية هالة مصطفى حيطرمخ عليها

الكاريكاتير كان راسم مكرم بيقول فيه
حاسبوا هالة مصطفى و شدوا عليها
بس مش اووووووى كدة
عشان انا رحت اسرائيل قبل كدة

mido said...

و احنا مال اهلنا بالجزيرة و العربية ؟

احنا مالنا ؟

هى مش الجزيرة دى اللى انت بتكرهها؟

عاملها مثال ليه؟

كل واحد ليه نفسه

Unknown said...

احنا مش ناقصين اختراقات

البلد دي احنا ساندينها بعود كبريت لحد ما ربنا يفك اسرنا

مالهاش غير انها تتلصم

اظن يعني ماحدش ناسي التقاوي المسرطنة اللي جات من اسرائيل

وماحدش ناسي بذور القطن اللي بعتوها تتعالج في اسرائيل ونزعوا منها الثمرة وطلعت كاملة من غير نوار قطن

وماحدش ناسي ان اسرائيل هددت بهد السد العالي

واحنا دولة ضعيفة
احنا دولة ضعيفة

ومخرمة من كل ناحية
كل ما نتعامل معاهم في حاجة يعطوا لنا فيها خابور يطلع من نافوخنا ومش بنعرف نسلك معاهم

المسألة لا ليها علاقة بفلسطين ولا نيلة ولو ان ده ما يعيبناش

بس احنا كل ما نتعامل معاهم ننضر

مش فاكرين الفراخ المسممة؟

انتواا بتنسوا ليه؟

حد يقول لي اتعاملنا امتى مع اسرائيل بشكل مباشر واستفدنا؟

mido said...

عاجل

وصول عدد من الحافلات التي تقل أعداداً كبيرة من المتطرفين الصهاينة لمحيط المسجد الأقصى المبارك


افتحوا الجزيرة

mido said...

قناة الاقصى و القدس جايبة الحادث مباشرة

mido said...

ابراهيم عيسى يبدع : البحث عن خط آمن


http://bit.ly/1xs4Iq

Unknown said...

الملخص اننا في زمن صعب
زمن صعب قوي

ده بعد يومين من تأجيل جولدستون؟ بيقتحموا الاقصى بعد يومين؟

احنا في زمن صعب
صعب قوي

مواطن مصري said...

احنا في زمن اللص و الكلاب

Unknown said...

ملخص ما قاله فى ال10 مساءاً

على سالم: إسرائيل ليست عدواً لمصر

http://www.youm7.com/News.asp?NewsID=142041#

BmBm said...

أنا متهيألى ان خالد يوسف كان يقصد يرد على جوز الافندية اللى كانوا عايزين يقنعونا ان اسرائيل بقت أمر واقع مش هايتغير ، عشان هى قاعدة على قلبنا آديلها ستين سنة.
فالراجل قال ، مالعرب قعدوا فى الأندلس تمنميت سنة، و بعد كده خرجوا، أو انهارت دولتهم.

أنا مابحبش خالد يوسف قوى، بس متهيألى هو كان يقصد كده.

الكارثة ان الاتنين دول (اللى نسيت أساميهم الحمد لله) مافيش فى قاموسهم كلمة "حق" و عمالين يكلمونا عن المصالح و الأمر الواقع.
و قال إيه، إسرائيل مش عدو.
ياخى ...

يسري said...

***اصلا ما كانش فيه حاجة اسمها اسبانيا ولا الاندلس لما طارق ابن زياد دخل بالاتناشر الف بتوعه اللي ما ينفعش يفتح بيهم ازازة كازوزة مش شبه جزيرة ايبيريا، بس ربنا سترها معاه، والعرب كانوا دايما كده، لا مقاتلين، ولا كانوا فالحين في حاجة الحقيقة****

زعلتينى منك يااستاذه نوارة
لما انتا تقولى كده على العرب و المسلمين فى فترة من أزهي عصورهم
سيبتيلهم هما يقولوا ايه

الانقلاب المدوى فى تاريخ العرب بعد البعثة النبوية الشريفة
من لاشئ
إلي أمة عظيمة و فاتحين عظام محاربين بالنهار لا يشق لهم غبار و رهبان بالليل
و اشرقت شمسهم على الغرب و العالم كله
و دا نص كلامك على اليمين فى المدونة

الناس دى انتصروا و عملوا معجزات عشان صدقوا ما عاهدوا الله عليه
و اعزهم الله بالاسلام

الآية فى سورة الانبياء بتقول

ولقد كتبنا في الزبور من بعد الذكر ان الارض يرثها عبادي الصالحون

هل عرفتى من هم الصالحون ؟

هل نحن منهم؟

هل ينطبق علينا وصف الله ؟

لا أظن

نحن من تكالبت علينا الامم
عشان ابتغينا العزة فى غير الإسلام
و لم نصدق الله كى يصدقنا

مقدر موقفك و شعورك
بس خلى بالك انتى مش لوحدك
و مدونتك ليها شعبية هايلة

و بعدين انتى مستنية ايه من واحد زى خالد يوسف يعنى

خلينا ساكتين احسن

Unknown said...

استاذ يسري
انت نفسك قلت امة من لا شيء

صح
خلينا موضوعيين بس

اربعتلاف جندي دول فتحوا مصر
اتناشر الف جندي فتحوا شبه جزيرة

وهم اصلا ما كانوش مقاتلين ولا حاجة يا يسري

دول اكبر حرب خاضوها كانت مع ولاد خالتهم

ودي حاجة ما تعيبهمش يا يسري
كونهم انهم كانوا ناس ولا حاجة، فعلا ولا حاجة لدرجة ان حتى فارس وروما عمرهم ما فكروا حتى يحتلوهم من كتر ماهم مش مهمين وما عندهمش حاجة اي حد يطمع فيها

وبعدين ربنا يوفقهم انهم يهزموا اقوى امبراطوريتين ويوصلوا شبه جزيرة ايبيريا ويأسسوا امبراطورية عظيمة وحضارة فاخرة
ومافيش اي تعبير يناسب الحضارة الاسلامية غير انها حضارة فاخرة

لما دي الحقيقة، والحقيقة بقى انهم ما كانوش مقاتلين شاطرين ولا حاجة، والحقيقة ان الاوروبيين كانوا مقاتلين اشطر واشد، وان المقاتلين الرومان لا يشق لهم غبار، ومع ذلك هزموهم بإذن الله دي حاجة ما تعيبهمش خالص، بالعكس دي حاجة تشرفهم وتبين نعمة ربنا عليهم وتؤكد قول الله "وما رميت اذ رميت ولكن الله رمى" ودي الحقيقة يا يسري

ربنا بعثهم من موات، ومن عليهم وهم كانوا مستضعفين في الارض مالهمش سعر ولا وزن

ده مش عيب
دي حاجة تشرف، وطول ما كانوا عارفين نعمة ربنا عليهم ومتواضعين له، ربنا كان ناصفهم، ولما ابتدوا يتغروا ربنا عمل فينا اللي عمله بقى

الصبر
الصبر

يسري said...

طيب ممكن أروح افطر و اجى اكمل الحوار دا معاكى ؟؟؟

و حدعيلك كمان بظهر الغيب

بعد إذنك

Unknown said...

ربنا يتقبل

يسري said...

الحمد لله

موضوعنا بقا

طب و التكتيك العسكرى لأمراء الحرب المسلمين الذي لازال يدرس فى المعاهد العسكرية حتى الآن
أمثال خالد بن الوليد رضى الله عنه و صلاح الدين ( الكردى الذى شب و تعلم و درس فى أرض العرب) و غيرهم من الصحابة و التابعين من المجاهدين.

وبعدين الرسالة منزلتش فى العرب من لاشئ اكيد عندهم مزايا و مواصفات مكنتش موجوده غير عندهم

فى كتاب انا قرأت جزء منه ولا أزال مستمر فيه حجيبلك اسمه بالتفصيل و اسم المؤلف .. بيتكلم عن النقطة دى من إجمالى الكتاب كله الذي يتحدث عن السيرة النبوية المطهرة.

العرب مكنوش مستضعفين فى الارض
عشان هما اصلا مكنش عندهم ارض
هما كانوا يستقروا و ينتقلوا تبعا لحاله المرعي
و ابدا مكانوش مستضعفين فى الارض

لكن نحن العرب الجدد اصابنا الوهن...
عارفه ايه الوهن طبعا ؟؟

عشان بس مطولش
النقطة اللى عاوز اوصلها
ان العرب و اللى احنا منهم طبعا

مكانوش حاجه و فعلا مكنش عندهم حاجة يطمع فيها ..
بس ربنا اعزهم و نصرهم و أورثهم الارض بالإسلام
و عندما ابتغينا العزة فى و المدد من غيرة .. أذلنا الله .. و أذلنا بنفس الشئ الذي ابتغينا فيه العزة

سُنَّةَ اللَّهِ الَّتِي قَدْ خَلَتْ مِن قَبْلُ وَلَن تَجِدَ لِسُنَّةِ اللَّهِ تَبْدِيلا

سورة الفتح

تحياتى لك

Unknown said...

طيب يا يسري احنا مش مختلفين كتير

هي بس نقطة التكتيك العسكري

فيه فرق انهم ما كانش عندهم حاجة وفعلا ما كانوش يعرفوا حاجة بس كان عندهم تعطش انهم يعرفوا ويتقدموا وفرق انهم بذلوا كل اللي عندهم

بمعنى
هم ما كانش عندهم كتير، بس بذلوه كله، وعملوا اقصى ما في طاقتهم، وطاقتهم ما كانتش كتيرة ولا حاجة، لا عندهم موارد، ولا عندهم حضارة سابقة، ولا عندهم تجهيزات، بس عندهم رغبة انهم يبذلوا كل ما في وسعهم عشان ينجحوا

بس لما تقارن اقصى ما في وسعهم باقل ما كان في وسع الرومان مثلا ح تلاقيه ولا حاجة
بصراحة يا يسري دي اعجوبة من اعاجيب الزمن انهم يهزموا الرومان

والخطة العسكرية الرهيبة اللي بتدرس اللي انت بتتكلم عليها دي كانت خطة انسحاب
ازاي الواحد ينسحب باقل خسائر

يعني المفروض، او الطبيعي يعني، انهم بعد العلقة دي يتعقدوا ويقرروا ما يواجهوش الرومان تاني ابدا ويقولوا احنا ما صدقنا طلعنا منها
صح؟
بس ما عملوش كده

هم كان حيلتهم ايه يا يسري غير ايمان ورغبة في النجاح مع عدم توافر اي مقومات للنجاح خالص
وسبحان الله نجحوا
حاجة غريبة فعلا
وبعدين هم فعلا ربنا كان فاتحها في وشهم من غير مبررات منطقية دنيوية
يعني لو حسبتها بالورقة والقلم ازاي في ظرف عشرين سنة كانوا شطبوا شغلهم كلوا وكانوا جابوا ضرف اكبر امبراطوريتين الحساب ح يخرم معاك
بس اهو حصل
ازاي؟ الله اعلم، مافيش غير انها هم الشخصيات دي بايمانها وتواضعها وتوكلها على الله، وكانوا طيبين برضه، اقصد يعني لما كانوا بيقدروا كانوا بيعفوا، ولما كانوا بيواجهوا كان عندهم اخلاق
ما اغتصبوش رجالة في سجن وصوروهم يعني زي دلوقت
وعلى قد بقى طيبتهم ربنا اداهم
وعلى قد تواضعهم ربنا رفعهم

احنا غلابة يا يسري، احنا اللي اتحصل فينا ما اتحصلش في حد بصراحة، لاننا برضه غلابة وطيبين لسة، يعني اللي بيتعمل فينا ده لو اتعمل نصه في اوروبا كان زمانهم قلبوا الدنيا
وكان زمانهم ليه؟ ماهم قلبوا الدنيا فعلا وعملوا حربين عالميتين مات فيها الملايين عشان حصل فيهم اقل بكتير من اللي حصل فينا

بس احنا طيبين، اه والله، طيبين يعني، بمبة هنا، طيارة هناك، ده اخرنا ما بنقلبش الدنيا عاليها واطيها زي الاوروبيين او الصينيين مثلا
بنبلع مصايب كتير ونسكت

بس احنا طول عمرنا كده يا يسري، اقصد طول عمرنا بنحب نقصر الشر، وحضارتنا من ايام الحضارة الفرعونية والسومارية ولحد الحضارة الاسلامية طول عمرها تحب تقصر الشر ما تحبش الخناق، وناعمين ولما نقدر نعفي ولما ما نقدرش نطنش لحد ما تنزاح

مش حاجة جديدة يعني

هو بس احنا حاسين دلوقت بالهبد والرقع جامد قوي لان الناس اللي جه عليهم الدور في الحضارة هم الغربيين وهم طبيعتهم انهم جامدين شوية ههههه يعني ايدهم تقيلة، وبرضه هم كده طول عمرهم، من ايام الرومان وهم ايدهم تقيلة ولما يمسكوا في حد ما يسبوهوش الا لما يهربدوه

بس اهو كاس وداير، كل امة بتروح وتيجي، واحنا ح نيجي تاني يعني ح نروح فين؟

يسري said...

ذلك فضل الله يؤتيه من يشاء والله ذو الفضل العظيم
سورة الجمعة

مختلفناش كلام جميل بس برضه عندى تعقيب

ايه الكلام الرقيق دا بقا
طيبة ايه اللى بتتكلمى عنها
إحنا كنا طيبين ... عشان كنا اقوياء و عارفين ربنا
احنا دلوقت مش طيبين
احنا جبناء ... بنمشى بالعين الحمراء
اصابنا الوهن ..( طبعا مش كلنا بس الغالبية العظمي )

عاوزين نخلد فى الارض

اومال تفسري بأيه الجرائم البشعة اللى بتحصل دلوقت ..فى بلاد العرب و فى مصر بالذات ...
سيبك من الجرائم
المعاملات
الاخلاقيات
هو فى كده

مفيش شرح وافي للى إحنا فيه غير الآية اللى ربنا انزلها فى اليهود و انطبقت علينا بحذافيرها

باسهم بينهم شديد تحسبهم جميعا وقلوبهم شتى ذلك بانهم قوم لا يعقلون

سورة الحشر

إيه رأيك ؟؟؟
بيحصل و لا مبيحصلش ؟؟

و هما اليهود اصابهم اللى اصابهم دا من ايه بعد ما كانوا شعب الله و ارسل لهم كل الرسل تقريبا و الانبياء
دا اكتر من نصف القرآن عليهم
هما لعنوا و كفروا ليه

لُعِنَ الَّذِينَ كَفَرُواْ مِن بَنِي إِسْرَائِيلَ عَلَى لِسَانِ دَاوُودَ وَعِيسَى ابْنِ مَرْيَمَ ذَلِكَ بِمَا عَصَوا وَّكَانُواْ يَعْتَدُونَ

كَانُواْ لاَ يَتَنَاهَوْنَ عَن مُّنكَرٍ فَعَلُوهُ لَبِئْسَ مَا كَانُواْ يَفْعَلُونَ

سورة المائدة
و مش بس كده عشان حاجات كتير بس دى نقطة و نقطة رئيسية

ربك يضرب الامثال
و احنا و لا هنا

و حنفضل كده لغايه مناخد قلم حلو .. محترم .. يفوقنا ... بس الموقف لا يبشر بخير
الاقلام كتير
دا انا اتقهرت على موضوع الاسيرات دا
20 اسيرة ثمنهم دقيقتين و نص
يعنى اقل من 10 ف الدقيقة
و باقى الاسيرات راحوا فين

هو فى ذل اكتر من كده
طيبة ايه بس
دا جبن و تخاذل و حب للدنيا

قال النبى صلى الله عليه و سلم
" إذا تبايعتم بالعينة ، وأخذتم أذناب البقر ، ورضيتم بالزرع ، وتركتم الجهاد ، سلط الله عليكم ذلاً لا ينزعه حتى ترجعوا إلى دينكم " .

النبى نبى الرحمة نفسه أجلى اليهود عن المدينة لأجل إمرأة مسلمة واحده

الخليفة المعتصم اهو .. عمل ايه ؟؟
ربنا يستر .. و الله لسوف نسأل

يابنتى هى نعم طيبة و غلبنه بس مفتعله بالتمثيل
( برضه مش كلنا .. نسبة كبيرة )

ربنا يستر
لنا الله

يسري said...

لو فى اى تعليق او اى نقطة مش واضحة .. انا موجود
و مقولتليش اجبلك اسم الكتاب و الكاتب و لا لا ؟؟

سعيد للحوار معك ..

تحياتي

Unknown said...

انا نازلة الشغل وح ارجع تاني ان شاء الله نكمل

اذا ما متش يعني
هههههههه

حسن على said...

بالاختصار الشديد: عسل ابيض لاتنقصة الزيدة .