Wednesday 7 October 2009

انا ما كنتش اعرف ان ام هيثم مرات عبود دمها خفيف كده

بصوا باعتة لابراهيم عيسى تقول له ايه:



ههههه، استغفر الله، الظاهر الغلب علمها السخرية، انا والله مش باضحك على مصابها، ربنا يفك ضيقتها ويفك اسر جوزها واخوه، ويجزيهم عني انا شخصيا كل خير والله. ويتقبل اللي اعدموا في الشهداء. على الاقل تحملوا مسئولية اللي عملوه. المقال ياريت تقروه كله، وقد اورد الاستاذ ابراهيم عيسى خطاب للرئيس الراحل انور السادات، وما كان اكثر خطاباته، وهو يفاخر، قبل مقتلة بشوية صغننين، بانه قتل امين عثمان، وعامل لنفسه، اي السادات، مرافعة طويلة عريضة ازاي ان مشاركته في قتل امين عثمان ده كان انتقام الشعب المصري من الوزير الخاين، ليه الوزير ده خاين؟ عشان جوز مصر من انجلترا جواز كاتوليكي، امممم، امال اللي لا مؤاخذة نيم مصر مع اسرائيل من غير حتى ورقة عرفي تثبت بيها نسب مرضى سرطان الاطفال وتصدير الغاز حاجة ببلاش كده والمصريين اللي بيتموتوا على حدودها برصاص القناصة يبقى ايه؟ ما علينا، المهم يعني، لو السادات بطل يبقى عبود وطارق وكل اللي معاهم ابطال، لو هم مجرمين يبقى هو كمان مجرم، بس اتعلموا بقى حكمة الدنيا:
تقتل وتنكر جريمتك قدام المحكمة وتطلع براءة تبقى رئيس جمهورية
(لا وفيه ناس بتدافع عن جبنه في مواجهة المحكمة وبيعتبروها نباهة ونصاحة)
تقتل وتواجه وتعترف (زي اي صعيدي قفل من المنيا) وتتحمل مسئولية اللي عملته وتاخد عليه العقوبة القضائية اللي يقررها القانون بعيدا عن العاطفة تبقى مجرم
(والله يرحمه خالد كان صعيدي من اصل تركي، يعني مقفول من كل ناحية)
تضرب بلدين وتقتل تلاتة مليون تبقى بتحارب الارهاب
تضرب برجين وتقتل تلاتلاف تبقى ارهابي
تدك بلد باللي فيها تبقى دولة
تضرب كام صاروخ يعوروا اسفلت الشارع تبقى جماعة ارهابية
تخون بلدك بمساندة القوى العالمية تبقى رئيس
تدافع عن بلدك وانت لوحدك مالكش غير ربنا تبقى حكومة مقالة

هي الدنيا كده... خلاص، ح نعمل ايه؟ ح نغير الكون؟ الكلمتين دول تحفظهم عن ظهر قلب كويس قوي وتقول لهم بعد ما تخلص اذكار الصباح والمساء عشان ماتجيش في الاخر تتهور وبعدين تتعور، او على الاقل لما تتعور ما تعيطش
المهم انا مش صعبان عليا غير الست اللي عايزة جوزها يقضي ايامه اللي فاضلة له في بيته، محبوس بقاله تمن سنين بدون وجه حق، ده لو كان قتل صحابي كان زمانه طلع، دي مش عارفة تزوره، مش عارفة تزوره ليه؟ عشان هو مفرج عنه
اي والله عليكم، الراجل مفرج عنه وعشان كده ما ينفعش تطلع له تصريح زيارة، بس هو قاعد شوية كده جوة عشان وراه شوية حاجات بس ح يخلصها ويطلع على طول، مسافة تلات عشر خمسين سنة كده
هم حاجزينه عندهم ليه؟ متآنسين بيه مثلا؟ راجل بركة؟ بيجيب لهم الرزق؟ ما خلاص، هو فيه نفس يعمل حاجة؟ ما كل الجماعة بتاعتهم تابت وانابت وقالت انا حسحس وحسحس انا هالله هالله ع الجد والجد هالله هالله عليه، هو عبود ما قالش، بس كفاية اللي كرم قاله، ده هبل في الكلام بما يكفيه هو وشعب مصر كله
كفاية الراجل كل شعراية في جتته يا اما بيضت يا اما وقعت

29 comments:

simplymoi said...

I like your writing style, you can make me sad & laugh at same sente nce. امال اللي لا مؤاخذة نيم مصر مع اسرائيل من غير حتى ورقة عرفي

Keep up the good work.

Unknown said...

Tohfa ya Nawwara:)
I read ElDostor's article today and i was amazed by the courage of Ibrahim Essa...i don't understand why are they letting him say all these things really? I don't understand the amount of freedom of speech that they are allowing...can you explain it plz? why r they allowing all of this?

Anonymous said...

ايه صعيدي قفل من المنيا دي .... احنا موش اقفال ولا حاجه .... بلاش عنصريه

خالد مسكوه بيضرب الراجل .... هيقول ايه يعني ؟

انا بلدياته على فكره

Unknown said...

هههههههههه الصعايدة اجدع ناس

Anonymous said...

والشراقوه ولاد عمنا .... واحسن ناس

:D

mido said...

@nhammouda

هم مش سايبيه فى حاله يتكلم براحته
!

مين قال كده

دول قارفينه قضايا و تعويضات

مش لازم يحبسوه

بس بيضيقه عليه فى شغله

أبو عمر - الصارم الحاسم said...

يعني انتي استحليتي دم الراجل لانه افزعك وانت صغيرة باعتقال ابويكي - ولانك تري اتفاقية السلام خيانة

طبعا أنا لا استخف على الاطلاق بحادثة اعتقال والديك ولكن هل تحل دم الراجل خاصة انه لم يعذب ولم يقتل احدا


ومع اننا ان دققنا سنجد ان اتفاقية السلام والتي اسميها هدنة كانت المفروض ان تكون مؤقتة وهو ارادها مؤقتة الخيانة من السخس اللي جه بعده مش منه هو وان ماكانش اي كلب اسرائيلي او امريكي يحلم بان يعامل مصر هكذا الا في عهد موظف الارشيف الحالي


والسخس اللي جه بعده جاء بسبب هذا الاغتيال - دعوة للتفكير


سؤال آخر....ياترى لو اغتيل مبارك الكبير او جمال مبارك غدا هل ستوافقي وبضمير مرتاح تماما كما بالضبط توافقي على اغتيال السادات


بيقولوا على امثالي هم الاكثر تطرفا مع اني ارى اغتيال شخص مثله كان خطأ كبيرا من الناحية الشرعية حتى وان كانت فكرة اسلامية خالصة مخلصة


هذا غير اني اصدق انها كانت من بعيد مؤامرة مخابراتية بأيدي اسلاميين متحمسين لم يعلموا لحساب من يعملون بالضبط


ليكي الحق انك متنشريش التعليق ولا ابعثه للنشر ولكن كسؤال مطروح


بالنسبة الي كل ما اعدي على النصب التذكاري اسأل من معي في السيارة ايا من كانوا الدعاء للاثنين...الاسلامبولي والسادات

Unknown said...

ثانية واحدة يا شباب عشان بس ح اطلع طلعة

الصارم الحاسم

يعني انت مستحل دم البشريات كلهم وكاره للانسانية جمعاء
وماحدش صعب عليك من كل البشرية اللي تعدادها سبعة مليار غير انور السادات؟

ههههههههههههههه
اما والله العظيم عجايب

سامي said...

لا حلوة الاسلامى دا اللى كل ما يعدى على النصب التذكارى يقرا الفاتحة ويدعى للسادات

نكتة دى؟

أبو عمر - الصارم الحاسم said...

انا اللي هاضحك ههههههههههه

مستحل دم البشرية جمعاء

ماكنتش واخد بالي اني جاك السفاح قبل كده
:))


هههههههههههه

Unknown said...

ما داهية يا صارم يا حاسم تكون بتحب السادات عشان كان بيكره المسيحيين
ههههههههه
والنبي تلاقيك بتحبه عشان كده

أبو عمر - الصارم الحاسم said...

على كده انتي بتكرهيه عشان كان بيكره النصارى
:)))



طبعا تصحيح هاهنا...هو ماكانش بيكرههم بل كان بيكره افعال الفتنة اللي كان بيعملها البابا شنودة ومن على شاكلته لان السادات كان داهية وفاهم وكان مصحصح له اكتر من موظف الارشيف الحالي اللي سلم وفاء قسطنطين باوامره وبمنتهى الاريحية....وكان السادات ابعد نظرا في قراءة هذوها الشخص


ودي نقطة تحسب له ايضا وتحسب لوجهة النظر ان ما جاء بعده كان اسوأ وانه افضل لاطراف عدة انه كان يختفي من على الساحة


هاتقوليلي ما هو الي جاب الرئيس الحالي...هاقولك ان فيه ناس طلعت واتكلمت انه كان على وشك استبداله



وعلى فكرة السادات كان ليه صدامات شديدة ايضا مع شيوخ اسلاميين كبار واللي ارى فيها ايضا ان معظم هؤلاء الشيوخ اخطاوا في التعامل معاه والتحامل عليه والهجوم الشرس عليه...والوحيد اللي اتعامل مع السادات بحكمة ودون لين في نفس الوقت هو عمر التلمساني رحمه الله


ما بقولش انه كان ملك منزل...كان له اخطاء هو التاني ولكن لنكن موضعيين...واخدالي بالك...موضوعيييييييــــــــــــن


ومع كل الناس
:)

Unknown said...

باقول لك ايه انا مش فايقة للكلام ده انا لسة شايفة مندوب فلسطين في الامم المتحدة بيخري ويكدب ويدلس ودراعي وقف وجالي صداع وشكلي ح اتشل فعلا
بس فعلا طلعت بتحبه عشان بيكره المسيحيين

سبحان الله
انا قلت برضه مش ممكن ح تحب حد كده للمحبة

أبو عمر - الصارم الحاسم said...

فعلا
؟

انتي ادرى بي مني
:D

اسيبك لمندوب فلسطين...بقى تشبهيني بمندوب فلسطين...اهي
دي الكلمة التي لا تغتفر
:D

سامي said...

طب ايه دليلك ياخويا على ان اتفاقية السلاموز
كان المفروض انها مؤقتة والمرحوم برضه ارادها مؤقتة؟
انت قرات بنود الاتقافية ؟ وايه البند اللى بيشير من قؤيب او من بعيد انها مؤقتة او كان من المفروض انها مؤقتة ؟؟

سبهللة said...

منتهى الظلم
يعنى الناس دىلو فرضنا وقتلت لما كانوا شباب
واتسجنوا 25 سنة يعنى اصبحوا عواجيز ولا خوف منهم على الاطلاق
لان السنة فى السجن بتساوى كتييير اوى وبتعجر كتييير اوى
وبالتالى كان المفروض يفرج عنهم على الاقل عشان يموتوا فى فرشتهم
لان اعتقد انهم خلاص ما بقاش فيهم نفس لاى اعمال تانية
ربنا يفرج كربهم يفك سجنهم
قادر يا كريم

الخوجة said...

بكرة عيد ميلاد نوارة يامنز
عيد ميلاد نوارة يامنز



كل سنة وأنتى طيبة وبأحسن صحة وحال

سبهللة said...

كل سنة وانتى طيبة يا زعيمة

mido said...

@نوارة

السادات مكنش بيكره المسيحيين
!!

الكلام ده اول مرة اعرفه
!

Anonymous said...

الجميع يقول كل سنة وانتى طيبة للاستاذة مش عاوزين هتافات علشان الأمن والمكالمات أحسن علشان ماتكلفنوش وتزحموا الشوارع دا كويس أوى بالأوى أنها لسه عايشة وكل واحد النهاردة يعبر بطريقتة



Happy Birthday To You in Chinese and English



Happy birthday in Korean




Happy birthday tropical


HAPPY BIRTHDAY IN POLISH



Happy Birthday / Chamber Orchestra Kremlin



Happy Birthday---Indian Style



أجمل زهور لأختنا وزعيمة ولازعيمة الأ الزعيمة




فدان زهور اختارى ماشئتى

الخوجة said...

أنا كمان
أهة
طبعا أنتى كالعادة بتنسى

الجميع يقول كل سنة وانتى طيبة للاستاذة مش عاوزين هتافات علشان الأمن والمكالمات أحسن علشان ماتكلفنوش وتزحموا الشوارع دا كويس أوى بالأوى أنها لسه عايشة وكل واحد النهاردة يعبر بطريقتة



Happy Birthday To You in Chinese and English



Happy birthday in Korean




Happy birthday tropical


HAPPY BIRTHDAY IN POLISH



Happy Birthday / Chamber Orchestra Kremlin



Happy Birthday---Indian Style



أجمل زهور لأختنا وزعيمة ولازعيمة الأ الزعيمة




فدان زهور اختارى ماشئتى

Unknown said...

صوصوصوصو

ميرسي ليكوا كتير يا شباب

"بابربش"

mido said...

http://www.guardian.co.uk/commentisfree/2009/oct/05/mahmoud-ahmadinejad-jewish-family

عابر سبيل said...

Happy Birthday Nawara... many happy returns to this day inshallah

صوت الحق said...

المقارنات جمدة أوي منك يا نوارة و كل سنة و انتي طيبة يا أستاذة
حلوة تقتل تقول مش انا تبقي ريس تقتل تقول انا تبقي ارهابي و يعدموك

Unknown said...

اه
ماهي الدنيا مش دنيا فرسان

عيش ندل تموت مستور

شريف العدوي said...

يا ست نوارة السلام عليكم ورحمة الله.. انا متابع كتاباتك من فترة كبيرة ..فيها اللي بيعجبني (يمكن علشان بتوافق هوى في نفسي) وفيها اللي ما بيعجبنيش على الأطلاق (يمكن علشان بتختلف مع وجهة نظري) الكثير من هذا الجيل لم يعاصر الزعيمين عبد الناصر والسادات (انما طبعا كله غصب عنه عاش في العصر المباركي الأول وربما الثاني) وعلشان كدة احنا بناخد ارائنا من اباءنا ومن اللي شافوه !! تحاملك على الرئيس السادات بهذا الشكل غير موضوعي لأنك لم تعاشريه بينما تنصب كراهتك له ربما بسبب ما لاقاه وقاساه والدك منه.. أنا والدي ما بيحبش ناصر وبحب السادات.. ده مش معناه اني أكره ناصر علشان أخطاؤه ولا أذوب عشقا في السادات نكاية في ناصر او ارضاء لوالدي!! كل واحد جاء في زمنه التاريخي!! وفي سياق العصر..لا أقبل أن يهين أحد عبد الناصر حتى وان كنت لا أحبه.. لا أقبل ان يصفق أحد طربا عندما يسمون كلبا بأسم السادات في فيلم أمريكي أو أقول ان السادات مش رمز لمصر! لأ ناصر رمز لمصر والسادات رمز لمصر ومبارك رمز لمصر و رمسيس رمز لمصر وأم كلثوم رمز لمصر وأبو تريكة ونجيب محفوظ و زويل رموز مصرية.. أنا لا أحب مبارك ولكن لن أكون سعيدا على الأطلاق أن يعتدي عليه في أديس أباباأو أن يقتل الأسلامبولي والزمر السادات!! أرجو ألا أكون ضايقتك بس سيبي الميتين في حالهم حسابهم على الله وخلينا في الرابضين ..شريف العدوي

محمد ناصر الدين الهلالى said...

ايه ده ؟! بتشتموا فى السادات وشمتانين انوا أتقتل ؟ وكمان بتدعوا بالرحمة والمغفرة والشهادة للى قتلوه ؟! ولسه مقبضوش عليكوا ؟ كلام غريب عجيب اول مرة اشوفه ومندهش ان لازال فيه بشر عايزة تمشى على انجازات السادات بأستيكة ، نصيحة لصاحبة البلوج اللطيف ده أقرى أكتر من كده وياريت لو تقرى مقال فى الأخبار صفحة مساحة للرأى بتاريخ 7/10/2009
فيه مقالة بعنوان الزعيم الأسطورة .. رجل المواقف الصعبة بقلم عز الدولة الشرقاوى ، اقريها واعرفى مين هو السادات

Unknown said...

معلش كله كوم وعز الدولة الشرقاوي ده كوم تاني
مين بقى عز الدولة الشرقاوي ده؟ ابن مين في مصر يعني؟