بقى هو ده الكلام اللي بيحرك البلد لقدام؟

اليوم السابع رايحة من موقع الاقباط الاحرار تنقل القرف بتاعهم وتعيد نشره تاني

يا ترى مهنيا، ده يعد خبر او انفراد او ايه؟ يعني لا هو مقال رأي بيعلق على الخبر اللي في الموقع بتاع الاقباط الاحرار، ولا هو خبر لان اصلا لو عايز تعرف اخبار الاقباط الاحرار ح تروح عندهم وتشوفهم بيقولوا ايه؟ صح؟ مش محتاج يعني ان اليوم السابع ينزل تاني كلامهم، ودي مش اول مرة، كل شوية يروحوا يغوصوا في المواقع المريضة ويعملوا كوبي بيست وينزلوه، ايه المهنية في كده بقى؟ وليه دايما ينقوا الاخبار اللي تجيب لهم تعليقات طائفية من شوية ناس مجانين؟

طب انا بقى سمعت عن اليوم السابع ده كلام كتير وح ابتدي اصدقه مع انه مش موثق، سمعت ان ابن اخو ممدوح سماعين قاتل ضحايا العبارة هو اللي بيمولهم، وسمعت انهم تبع الامن، وسمعت كلام كتير مش حلو عليهم، والناس ياما بتتكلم انا ما قرتش الخبر ده في صحيفة ولا اللي قال لي وثق لي الكلام ده، بس تصرفات الصحيفة المريبة دي تخلي الواحد يشك، خصوصا ان دايما معروف ان الصحف اللي بتبقى تابعة للامن انها بتلعب على الوتر الطائفي لان النظام يهمه اننا نكره بعض عشان ننشغل في بعض، وعشان كده عجبته قوي مسرحية قهوة سادة والهانم راحت وادتها باين جايزة وللا ايه، عشان بتشتم في الشعب مش في الحكومة

هي دي المودا الجديدة، اننا بدل ما نصب غضبنا على المسئولين نصب غضبنا على بعض، وهم بيشتغلوا في الحتة دي كويس قوي، وكانوا الحقيقة صرحا معانا لما وزيرة القوة العاملة قالت بصراحة: العيب مش في الحكومة العيب في الشعب، وربنا ح يعمل فيكوا كده ليه؟ لازم الغلط منكوا!!!! وما نسيتش تستشهد بالقرآن طبعا عشان تسكت الناس

طب ليه اليوم السابع تروح تجيب اخبار من مواقع اقباط المهجر وتنزلها عشان تستفز الناس وتطلع منهم أسوأ ما فيهم؟ ليه تعمل كده؟ احنا كنا عملنا لها ايه؟ احنا كنا ناقصينها؟ الملاحظ بقى، ان المفروض في اي موقع محترم، وللا حتى مش محترم، بيعمل مودريشن للتعليقات اللي فيها شتيمة او تجاوزات، الغريبة بقى ان اليوم السابع بتنقي التعليقات اللي فيها طائفية خرافية وسب دين من الطرفين، مش  ح امشي للاخر ورا نظرية المؤامرة وافترض انهم هم اللي بيكتبوا التعليقات دي لان فعلا فيه مجانين كتير على النت، لكن ده مش دليل على انهم بيمثلوا قطاع من الناس لان اصلا اللي قاعدين على النت دول كلهم على بعضهم بعاقلينهم ومجانينهم لا يشكلوا اي نسبة تذكر في المجتمع المصري، ما انا في حتة المدونة التعبانة دي بتجيلي تعليقات من مجانين ومش بانزلها، عشان لو نزلت واحد مسلم بيشتم المسيحيين او واحد مسيحي بيشتم المسلمين لازم انزل الطرف التاني، والموضوع يكبر ويتشعلل، ثم ان اثارة النعرات مافيش اسهل منها يعني، طب انا اهو، مش انا مسقعة دماغي خالص من موضوع الطائفية ده؟ ممكن لو فضلت تسب لي الدين اسبلك دينك عادي يعني، ما انا بني ادم وممكن اسخن زي اي حد ما ممكن يسخن، مش انا باكره الشوفونية بكل اشكالها، طب لو واحد قل ادبه على مصر ممكن اسب له بلده واللي خلفوه

ايه النصاحة في انك تسخن الناس على بعض، انت لو حبيت تسخن شبرا على مصر الجديدة ينفع، وح تلاقي حزبين نازلين شتيمة في بعض وبيعملوا اغاني، وح تلاقي بتوع مصر الجديدة بيقولوا لبتوع شبرا: يا بيئة يا صيع، وبتوع شبرا بيقولوا لبتوع مصر الجديدة: يا فرافير يا.... يا....مش ح اقدر اكتب اللي ممكن سكان شبرا يقولوه على سكان مصر الجديدة. والموضوع ممكن يكبر ويوصول للتشابك بالايدي، ويعملوا تي شيرتات مكتوب عليها: شبراوي وافتخر... مصر الجديدة = مصر النضيفة...إلخ وممكن يوصل للحرق والجنازير والاغتصاب وكل حاجة، والله، انا لولا ان ضميري ما يسمحليش اني اجرب عشان اوريكوا كنت وريتكوا ازاي ممكن الواحد يعمل فتنة بين السمر والبيض وسكان مدينة نصر وفيصل والطوال والقصيرين والتخان والرفيعين واللي مناخيرهم كبيرة واللي مناخيرهم صغيرة وازاي انها ممكن توصل لخسائر في الارواح والممتلكات

شطارة دي يعني؟ صحافة دي؟ مهنية دي؟ ايه دي غير وساخة؟