Thursday 22 October 2009

دعوة لاطلاق حملة "ايش عرفك انت" بمناسبة من اجلك انت

احبك انت، يا ابيض انت
وتعتمد حملة ايش عرفك انت على عشرة اسئلة توجه لحياتي انت جمالك انت مبارك انت خاصة بالشعب المصري

1-  ايش عرفك انت اللي بيقبض 300 جنيه في الشهر وعنده عيلين بيعيش ازاي؟ جربت تعيش بتلتميت جنيه في الشهر بطولك؟
2- ايش عرفك انت لما اي حاجة بتبوظ (تلفزيون، تلاجة، عربية، جلدة حنفية، تليفون) في بيت موظف مرتبه الف جنيه بيعمل ايه؟
3- ايش عرفك انت باحساس الناس اللي واقفة في الاشارة لحد ما نبت لها جدور في الارض عشان حضرتك او اي مسئول تاني معدي؟ عمرك استنيت حد؟ 
4- ايش عرفك انت باحساس واحد راكب اسانسير فيه حوالي خمستاشر واحد؟ واحيانا بيبقوا تلاتين؟ عمرك شميت؟
5- ايش عرفك انت شكل سواق الميكروباص، بعد ستاشر ساعة لف في عربية شكمانها منفس وتعامل مع ركاب ياكلوا دماغه عشان خمستاشر قرش وامين شرطة بيطلب منه اتاوة، وهو راجع بالليل البيت بيعمل ايه في مراته؟
6- ايش عرفك انت بقى بمراته بتعمل ايه في عياله عشان تفش غلها؟
7- ايش عرفك انت بيعمل ايه العامل اللي بقاله تلات شهور ما قبضش مليم؟
8- ايش عرفك انت بفلاح صرف اللي وراه واللي قدامه على زراعة القطن عشان يجهز بنته وجيتوا انتوا بمنتهى البساطة عملتوا فيه مغرز وادتوا له تقاوي بايظة: مدودة، طلعت المحصول اصفر، ما طلعتش محصول اصلا؟
9- ايش عرفك انت بواحدة ست جوزها عاطل (مرفود من مصنع مثلا) وهي اللي بتشتغل بتعمل ايه عشان تحوش القسط الاولاني بتاع المدرسة؟
10- ايش عرفك انت بحال المواطن والموظف في المصالح الحكومية: السجل المدني، المرور، الجوازات..إلخ؟ وايش عرفك بالمرتب اللي بيقبضه الموظف وبالرشوة اللي بيدفعها المواطن؟
-------
يا جاااااااااااابرررررررررررررر
اذا عجبتك الفكرة توكل على الله، والاقتراحات مفتوحة للاضافة والتعديل والتطوير
احنا ناس ديمقراطيين يا ولادي
الاسئلة ممكن تزيد وممكن تتعدل
وانني اهيب بالوكالة الحاج حسام الحملاوي للحملات بمد يد المساعدة


33 comments:

Kalimalhus said...

إيش عرفك بخريج جامعة أو تعليم متوسط مش لاقى شغلانة لا بشهادته و لا من غيرها و معندوش واسطة؟

إيش عرفك بواحد أبوه إترفد من شغله و مابقاش يقدر يصرف عليه و لا على إخواته فإضطر يسيب المدرسة و يدور على رزقه فى الشوارع؟

إيش عرفك بمهندس خبرة خمس سنين لأ و بيشتغل و بشهادته و قطاع خاص و مع ذلك مرتبه ما يجيبلوش شقة لو حوشه كله 15 سنة؟

into said...

سؤال بسيط لو سمحتي

هو مش جيمي برضة ممته نصها انجليزي و نصها مصري؟
يعني جيمي 75% منه بس مصري
و على حسب معلوماتي ان اللي زيه لا يصلح ان يكون عسكري في الجيش اصلا فكيف يصبح القائد الاعلى للقوات المسلحة و هو 25% منه انجليزي؟
سؤال اصغر
هل جيمي عند بسبور انجليزي؟

Unknown said...

والله هو سؤال وجيه

وياريت نعرف برضه هو عنده بسبور امريكاني وللا لا؟

اصل نظيف عنده بسبور كندي

البنفسج الحزين said...

وانا هاضيف من عندي كمان :

ايش عرفك انت باحساس شاب لسه في العشرينيات وقلبه حزين وعنده احباط ويأس الدنياكله راكبه وتشوفه تديله 100 سنه.
اتقتل طموحه وكل الابواب مقفوله في وشه هو ومفتوحه علي مصراعيها للتافهين والاغبياء والفاشلين
ومطلوب منه يكون انسان كوووووووول وميحقدش علي ولاد الناس الواصلين علي الرغم من تفوقه وكم الشهادات العليا وكورسات اللغه والكمبيوتر اللي واخدها لكن مش عارف يلاقي مكان محترم يقبله للعمل فيه وكل ده لسبب بسيط لأنه معندوش واسطه واسطته دراسته وعمله الجاد ودول موصلهوش لاي حاجه...

Kalimalhus said...

الجنسية المزدوجة مش مشكلة إذا تخلى عن الجنسية التانية عند الترشيح .. لكن النقطة هى إن المرشح لازم يكون من أبوين و جدود يتمتعون - حلو يتمتعون دى - بالجنسية المصرية و طبعا جد و جدة من جدود جيمى ما كانوش بيتمتعوا ..

Unknown said...

طب وجدته الانجليزية؟ ده مش دستوري اصلا ان يبقى له جدة او جد مباشرين مش مصريين

ثم هو مش عسكري
زي ما قال
helfperF1
ح يبقى القائد الاعلى للقوات المسلحة ازاي؟

Kalimalhus said...

ما أوباما مش عسكرى و هو القائد الأعلى للقوات المشلحة الأمريكانى .. يعنى إحنا مش عايزين مدنى يمسك و ألا إيه ..؟

لحظة هى جدته بس اللى مش مصرية؟ .. كده يبقى ينفع حضرتك .. الجدود الذكور بس همه اللى بيعول عليهم .. أنا آسف لأن الجملة اللى كتبتها فى التعليق اللى فات كانت غلط هى أصلها أبوين و جدين يتمتعون بالجنسية المصرية ..

و بعدين لو الموضوع مش دستورى كانوا غيرهالوا فى الدستور .. دول مفصلينله مادة على مقاسه تفتكرى كانت تفوتهم؟

Unknown said...

هو ده مدني؟

ده جدته انجليزية، ودارس في الجامعة الامريكية، واشتغل في لندن

مين ده؟

نفسي اشوفه راكب مترو مش حتى اتوبيس

انا مالي باوباما

ما يولع اوباما بالبلد اللي بيحكمها اصلا

احنا لينا ظروف تانية

Fatma said...

ايش عرفك انت بواحدة ست عجوزة ماتت في سريرها وحيدة بتبكي ان ولادها كلهم مش جنبها عشان راحوا الخليج بعد ما ضاقت بيهم الدنيا هنا عشان يعرفوا يستروا نفسهم
ايش عرفك انت باوضة وصالة ساكن فيها 3 اسر بملحقاتهم
ايش عرفك انت بناس ساكنة في عشش كل 10 اسر ليهم حمام واحد مشترك
ايش عرفك انت بواحد ولا واحدة عزيز النفس مش لاقي يأكل عياله ويسترهم وبيستعفف ومش هاين عليه نفسه يشحت
ايش عرفك انت بناس بتموت عشان مش لاقيين تمن الدوا
ايش عرفك انت بينا انت مش مننا على فكرة

مواطن مصري said...

معاكي يا نوارة

td hgl,q,u ]m

رامز عباس said...

إيش عرفك

انت وانت اللي قابض علي نفسنا بعد المتعوس ابو كلت مدلدل اللي مسكك البلد دى ان فيه 10 مليون معاق اللهي اللي فيهم يجي فيك يابعيد انهم مبيشتغلوش ولا ليهم تأمين صحي محترم ولا سكن يلهم ولا جوازة تعفهم ايش عرفك انت وانت عامل فيها فرعون تيت اوى وعامل فاهم البلد جتنا نيله في حظنا بعد ما السادات خمنا وجابك

رامز عباس said...

ايش عرفك انت بحالنا وحال عيال وعمال المصانع في بلدنا

ايش عرفك ومين فينا اصلا عاوز يعرفك


من الاخر خليك بعيد لانك متشرفناش رغم اننا نشرفك

بتنفس حريه said...

ايش عرفك ب 5 ماتوا مخنقوين من السحابه السوداء وناس عندها ربو و ازمات حتى الهواء النضيف مش عارفين يشموه؟

ايه عرفك بواحد عنده الكبد و استسقاء وبيعملوله بزل كل شويه و بيلف على التامين الصحى علشان يلاقى الدواء و لسه بيشتغل لاخر نفس علشان يوفر لولاده لقمه؟

ايه عرفك بمعنى انك تكون مصرى ابن مصرى شريف وتتعامل معمله الكلاب فى القسو ولو حد طلع بسبور امريكانى ؟؟
ينضربله تعظيم

ايه عرفك عن شاب باع الى وراه والى قدامه علشان يركب قارب فى البحر علشان ياكل اكله نضيفه؟

ايه عرفك باكل مسمم بالمجارى و انت بتاكل الاورجنك؟

ايه عرفك بواحده غلبانه بتحط القرش على القرش علشان تجيب خلاط لجهاز بنتها احسن الجوازه حتبوظ؟


انا بصراحه لو انفتحت مش حسكت خلى الى فى القلب فى القلب بقه

Mohamed said...

ايش عرفك انت بواحد ساكن فى عشة
يصحى من نومه ويكون فطاره صخرة تقع عليه تدفنوا تحتهاو مقدرتش تطلعه, عمرك صحيت من النوم؟

ايش عرفك انت باحساس ام مستنية ابنها يرجع من غربته هو وابنه من السعودية و الحوت ياكلهم فى البحرو الحوت ياخد 7 سنين,عمرك حسيت بالظلم ؟

ايش عرفك بام تانية ابنها نازل يعيد عليها ويولع فى قطار. عمرك ركبت قطار؟

مواطن مصري said...

http://www.youtube.com/watch?v=Zal_jRhqLe4

حوار المصري اليوم مع الاستاذ هيكل يا نوارة

Unknown said...

الاسئلة اللي اضافت رائعة

انا ح اجمعها ان شاء الله وبعد ما جابر يخلص ح ننطلق

Kalimalhus said...

ما تبقيش تنسى شعار الحملة :)

tamer.sala7 said...

ايش عرفك بـ شباب كتير بيدرسوا حاجة مش طايقنها لمجرد ان مكتب التنسيق رماهم فيها ؟؟

ومع ذلك بيذاكر وبينجح بيتخرج

ايش عرفك بطلبة الانتساب المشوخين من الدكاترة وادارة الجامعة اللي عاملاهم سبوبة بصرفوا بيها علي الجامعة وكل شهر زيادة في الرسوم واخرها مفيش حضور علشان انفلونزا الخنازير


ايش عرفك بواحد طالع عينه علشان يحوش 95 جنيه اشتراك نت من الزبالة وفي الاخر السنترال يتعوج ويقوله خطك مش نافع روح غيره

ايش عرفك بأربعة جيران مشتركين مع بعض في وصلة نت علشان الاشتراك عالي

ايش عرفك بموظف شاطر وعنده 24 سنة وشغال 15 ساعة بمرتب 600 جنيه مع العلم بأن صاحب الشركة مليونير

ايش عرفك بالبنات اللي بتبيع نفسها وشغالة جرسونة في كافيه علي البحر علشان الف جنيه مع العلم ان كهم مؤهلات عليا

ايش عرفك ب بنت اتجوزت من واحد خليجي اكبر من ابوها واتطلقت وعي مجبتش 25 سنة

عايزة تاني ولا اكتبهم في بوست عندي ؟؟

Unknown said...

أسمحولى ابأه أنانى شويه

أيش عرفك أنت

بخريج هندسه حاسبات وأهله طفحوا الدم فى كورسات علشان ياخد أكبر شهادات تقنيه فى العالم وبيتفرج على أعلان (أشتغل أى حاجه لا القطر يفوتك)
ومطلوب منه 25 الف جنيه علشان يتعين فى الحكومه ؟!!!!!

الخوجة said...

خلاص أنا نفسى أتقطع ماعدتش قادر أخد نفس تانى كل مانطلع من نقرة نقع فى دحديرة منيلة بستين نيلة العالم دى جنسها ايه هما مايعرفوش المثل الفلسطينى عدو جدك مابيحبك ولو عبدتة عبادة ربك.....جاىىىىىىىىىىىى
أىىىىىىىىىىىىى.
Tainted nightmare - مصل أنفلوانزا الخنازير طلع مضروب و عبارة عن سلاح بيولوجى

HUMAN ORGANS TRADE ,Harvesting Human Organs ,تجارة الأعضاء البشرية

VACCINE CREATORS WILL REFUSE THE H1N1 VACCINE !
هنياءا عليكى ياسرائيل الشعب المصرى والجزائرى والفلسطينى طبيعى
دى سلسلة كاملة

جاىىىىىىىىىىىىىىىىىىىىىىىىى

أبو أمك said...

ايش عرفك انت
ايش بلدي بمسامير
وايش فينو بنص جنيه
واللي يايش ياما يشوف

اللهجة معدلة عشان ماننساش الربع الانجليزي

Al said...

وقف أحد الحجاج العرب علي جبل الرحمة بعرفة، ورنا إلي السماء متضرعاً إلي الله بصوت خاشع متهدج .. نابع من قلب يئن تحت جبال من الحزن ..!!؟؟


تضرع إلي الله أن يطيل أعمار الحكام العرب، فهم زينة الحياة الدنيا والربيع والخريف والصيف والشتاء..واختفاؤهم من الحياة يعني.. اختفاء العدل والحرية والزهد والتواضع الجم واحتقار المال

تضرع إلي الله أن يلهم الجيش الأمريكي فيرسل طائراته وصواريخه إلي سماء الأرض العربية ..لتخلص.. المدن والقري من فوضي طرقها وقبح أبنيتها، ولتخلص الناس من حياة دكناء ليس فيها ما يسر ويغري ..بالبقاء..؟


وتضرع إلي الله أن تكف الشمس عن الشروق كل صباح، فالظلمة تستر والنور يفضح

وتضرع إلي الله أن يزداد عدد السجون حتي يتاح لكل معوز الحصول علي قوته اليومي من غير جهد...

رجاء said...

ان شاء الله حشارك معاكم يا نوارة بس قولوا نعمل ايه
ولو انى حاسةانهم سايبينا نتكلم وماشيين فى مشروع التوريث على قدم وساق
ربنا يستر

عبد الزهراء المصري (علي الحسيني) said...

طيب هحاول أشارك معاكم :
أيش عرفك أنت بشاب ترك تعليمه وبيشتغل في شغله مالوش أي دعوة بيها علشان يقدر يعيش في بلد أنت بتطمع تحكمه ؟؟؟

أيش عرفك أنت بنظام الكفيل اللي بيستعبد شباب بلدنا في الخليج وبيذلهم ؟؟؟

أيش عرفك أنت بشباب نفسهم يعيشوا كبشر في بلدهم ؟؟؟

أيش عرفك أنت بشباب كتير أنتحروا علشان شافوا من كرم نظام حكام أبوك كتير ؟؟؟

أيش عرفك أنت بشباب بيسب ويلعن في اليوم اللي أهله خلفوه فيه علشان حاسس أن خير بلده مش لأهلها ؟؟؟

أيش عرفك أنت بشباب ماشيين مع بعض ويوقفهم ظابط معفن بـ 50% ويقول لهم طلعوا بطايقكم ؟؟؟

احساس لسه حى said...

انا شايف الحملة يكون اسمها

من اجلنا نحن

مش فاهمه said...

ايش عرفك انت بواحد ولا واحده بيركب له 3 او اربع مواصلات علشان مافيش حاجه اسمها هيئة النقل العام او دور للحكومة فى المواصلات و سايبين عليهم سواقين الميكروباصات البلطجيه و بتوع التكاتك
ايش عرفك انت بعيل فى اعدادى مش بيعرف يقرأ و يكتب لأن تعداد الفصل بتاعه 60 تلميذ و بيروح 3 فترات دراسه تخيل عيال تروح الساعه 7 تخرج على الساعه 10 بيضحكوا على مين
ايش عرفك انت بالستات اللى بيتروح للفرارجيه علشان يشتروا كيلو رؤوس و اجنحة فراخ يعملوا عليهم مرقه ياكلوا بيها

wahat_alshohada said...

ايش عرفك بالغلابة الفقراء اللى بيسترزقوا بالبيع فى المترو وكل شوية الامن يجرى وراهم و يسحبهم علشان يزهقوا و يتحولوا لحرامية؟

ايش عرفك بأم الايتام اللى بتدور تشحت علشان جوزها كان عامل سريح مالوش معاش؟

مهندس مصري بيحب مصر said...

بصي على البوست الأخير عندي يا نوارة
http://egyptioneng.blogspot.com/2009/10/blog-post_22.html
الترجمة الرسمية للموجز التنفيذي لتقرير جولدستون
مهمة جداً

مهندس مصري بيحب مصر said...

ايش عرفك بالملايين اللي هجوا بره مصر و كتير منهم مش عايز يرجع تاني
ايش عرفك يعني ايه تكون بتشرف على بناء و تشطيب شقق و انت مرتبك ما يسمحلكش تحلم بأوضة حتى مش بشقة
ايش عرفك لما تكون بتمضي على مستخلصات للمقاولين بملايين و مرتبك 500 جنيه و الرشاوي بتتعرض عليك يومياً و انت تقول لأ رغم انك عارف إنك لو فضلت تحوش مرتبك 50 سنة مش حتعرف تتجوز و لا تجيب حق شقة و لا شبكة و لا مهر و لا فرح

على فكرة أنا فاكر إني كنت قريت في جرنان الدستور من زمان إن جمال و علاء معاهم جوازات سفر بريطانية
لأنهم أخدوا الجنسية البريطانية من مامتهم سوزان اللي أخدتها من أمها الممرضة من مقاطعة ويلز

Sosso said...

شفتي دي الامريكان حيعلموا المتفوقين
http://dostor.org/ar/index.php?option=com_content&task=view&id=35659&Itemid=30

Al said...

هل نحن بلهاء إلى هذا الحد الذي يجعلنا ننتظر(!) حتى تتضح أمامنا معالم مسرحية توريث السلطة، رغم أن الستار تم رفعه منذ سنوات طويلة، ولم يبق على انتهاء المشهد الأخير من الفصل النهائي غير جملة أو جملتين في وجود أو غياب المُلقن؟

Al said...

تشرب من ماء النيل، وتسمع في شاطئه الجميل ما قالت الريح للنخيل، ثم تشير إلى النهر الخالد متهما إياه بأنه بهذا الهدوء الذي يستمر سنوات طويلة، ثم يفيض مرة، ويسكن إلى الهدوء مرات أنه السبب في العبث بالجهاز العصبي للمصريين.

ماذا حدث لأهل .. أم الدنيا؟

Captain L.J.Silver said...

ايش عرفك إنتا بواحد وإف في طابور العيش ساعتين وزيادة عشان يجيب ١٠ ارغفة ؟؟، ذ سلام بئة لو الساعتين دول وهو صايم....

ايش عرفك انتا بخريج هندسة القاهرة و شغال مندوب وبيعات ؟؟؟؟

ايش عرفك انتا بدكتور يدرس 7 سنين و في الاخر ياخد 150 حنيه في الامتياز .....


سايق عليك النبي يا شيخ ...سبنا في حالنا ........


!!!