Sunday 18 October 2009

انا عاملة كدهو تاني

مش عشان اي حاجة، بس عشان.. مش معقول، يعني، مش معقول ابدا
امبارح حماس قالت ان فيه بنود اضيفت وبنود اتشالت من ورقة المصالحة اللي هم اصلا اتفقوا عليها، لو تلاحظوا انا ما اهتميتش بالخبر لاني توقعت ان حماس تكون بتعمل مناورات، تعطيل، مماطلة، وماله
بس النهاردة لقيت واحد من حماس طالع يقول طب يا اخوانا طابقوا الورقة الاصلية بالورقة اللي مطلوب مننا نمضي عليها يمكن يكون حصل "خطأ سهوا" يا عيني مكسوفين يقولوا ان اتنصب عليهم
يعني فتح قالت ان مصر بتقول لحماس امضوا انتوا بس وبعد كده اعملوا اللي انتوا عايزينه، واخدناها بضحك
دلوقت حماس بتقول بدلوا الورق؟ هي الحقيقة ما قالتش كده، هي محرجة تقول كده، بتقول يمكن حصل غلط :) لالالالا مش معقول
احنا نستنى ونشوف ايه الحكاية
اصل كده فضيحة، وماحدش يقول لي ما احنا فضايحنا كترت، دي فضيحة كبيرة، مش معقول لا، لالالالالا، مش معقول، اكيد فيه فوء تساهم
 ما وصلتش لكده
برضه ما اهتميتش قوي بالتفجيرات اللي حصلت في ايران مع ان فيه ابرياء راحوا بس انا قلت ده ضمن خناقة امريكا والموالين ليها من المعارضة في ايران وبين الحكومة، عادي، وايران كالعادة لسة عايشة في العشرينات من القرن الماضي وبتتهم بريطانيا العظمى ومش ناقص غير تقول عليها: الامبراطورية التي لا تغيب عنها الشمس .. الاستقلال التام او الموت الزؤام
بريطانيا ح تعمل ايه؟ بريطانيا دي دلدولة امريكا، خلاص ما بقاش فيه بريطانية تاني خلاص، حاطينها في دماغهم و...وفجأة
ظهر شخص من جماعة سنية في مش عارفة ايه، حاجة كده من اللي بيبقى فيها سستان بستان حركشستان عبطستان وقال: احنا جماعة سنية تتلقى الدعم والمال من الولايات المتحدة الامريكية
يا ابن الهابلة، هو كده؟ بتقول كده؟ وماهواش محبوس ولا مقبوض عليه ولا حاجة، ده حر طليق، بيقول كده في البيان بتاع اعلان المسئولية، قمت انا عملت كدهو... وقامت ايران راخرة ياعيني (اللي لسة عايشة في زمن بريطانيا) عملت كدهو، وفي وسط التقرير، المعلق بيقول، ويقول فلان الفلاني الذي قتل زوجته واولاده بناء على طلب اخيه
:O
فيه ايه؟ ايه الجمل الغريبة اللي محاصرة حياتي دي؟
بصوا، عشان انا الحاجات اللي ما باعقلهاش بتوترني، موضوع حماس ده ان شاء الله سوء تفاهم، او حماس بتماطل، يعني لو حماس بتماطل دي حاجة ما تعيبهاش، لكن لو طلعنا احنا بنبدل الورق زي ابراهيم نفخو وسنية جنح تبقى فضيحة،
والواد اللي طلع يقول بناخد فلوس من امريكا بعد ما قتل مراته وعياله بناء على طلب الجماهير ده واد مجنون، يعني مريض عقلي وامريكا اخدته من السرايا الصفرا الايراني وجندته، بدليل انه متعمد ينزل فيديو فيه تفاصيل القتل والناس قعدت تصرخ وهي بتتفرج، يبقى مجنون
مالهاش حل يعقل تاني

20 comments:

mido said...

فين الفيديو؟

يا ريت تنزليه فى البوست

Unknown said...

فيديو ايه؟

الفيديو على الجزيرة بعد شوية ح تلاقيه نزل

انا ما شفتوش على النت انا شفته على التلفزيون

مواطن مصري said...

ما اهتميتش قوي بالتفجيرات اللي حصلت في ايران مع ان فيه ابرياء راحوا بس انا قلت ده ضمن خناقة امريكا والموالين ليها من المعارضة في ايران وبين الحكومة، عادي

عادي

انتيب عارفة ان اهل السنة هناك ملهمش اي حقوق

خالص و تقولي مولاة و عادي

معلش انا شايف ان دة ظلم واقع على ااهل السنة في ايران

و قبل كدة قتلو شيوخ سنة في ايران

دة رد فعل طبيعي على الانسان الظالم يا نوارة

Unknown said...

اه

طب لو عملوا كده في مصر؟ كنت قلت عليهم ظلاميين

معلش يا مواطن انت بقى كده جواك شر حقيقي لما تتمنى المصايب للناس وتفرح فيها وتبرر لها وانت ما تتمنهاش لنفسك

ده اسمه شر وسواد وحقد

ببساطة
يعني تخيل كده انا ما اتمناش المرض لنفسي ولما انت تعيا افرح واقول لك ده من ظلمك

دي مجموعة جند الله اللي كانت بتعمل تفجيرات في لبنان وغزة

ولو جات مجموعة جند الله دي تفجر هنا
ح يبقى ايه رأيك

بلاش

لو الاقباط فجروا هنا؟ لو البهائيين فجروا هنا؟ لو الشيعة المصريين فجروا هنا؟ ما كل دول مظلومين

ح تشمت وتقول ده رد فعل طبيعي؟

ايه يا قاسم يا سماوي ده؟

مواطن مصري said...

في مصر الوضع مختلف ممكن يبقى فية نقاش او حوار او قانون يتعمل

انما في ايران الوضع صعب جدا


ايران معندهومش نقاش

لو عندهم نقاش كانو سمحو للمعارضة تتكلم انما مش قتل و تكفير و تخوين

احنا في مصر الي حد ما فية جزء من الديموقراطية

انما ايران

مفيش ديموقراطية نهائي

Sofftheme said...

و الله عشنا و شفنا ناس بتنتحر و تقبض فلوس من أمريكا
إيه الدعاية اللئيمة دي بعد كدا أمريكا هتعمل عمليات استشهادية في شيعة لبنان

ما أمريكا ضربت سوريا يجي عشرين مرة و إسرائيل كمان ...دول بيضربوا من فوق و كمان دول الأمريكان عايشين في المنشآت بتعات نجاد و الوضع مش زي ما احنا متصورين

الأعمال الأنتحارية دا عمل حصري فينا "السنة"

بالنسبة للفلوس
يعني القاعدة و الجماعات السنية تأثرت بالأزمة العالميه علشان تاخد فلوس من أمريكا ....مش بعيد

طب يوم ما ضربوا أميركا أيام سبتمبر خدوا فلوس منين ؟؟؟!!!

قولوا كلام غير دا

Unknown said...

مواطن مصري

اما والله عجايب
ده البجاحة لها ناسها فعلا
يعني مصر اللي بتتحكم بقانون طوارئ ومافيهاش انتخابات وقعدت طول فترة التسعينات تقتل الناس في الشارع فيها حوار
وايران اللي فيها انتخابات ومافيهاش رئيس قعد اكتر من تمن سنين هي اللي وضعها صعب

لا يا مواطن
شوف علاج للي انت فيه ده

ثائر

الواد طلع في التسجيل بيقول: احنا بناخد فلوس من امريكا

هههههههههههه

باينه اهبل وللا ايه
هو قتل مراته وعياله بناء على طلب اخوه

ح اموت واعرف ازاي

mido said...

@مواطن مصرى

@نوارة

أظرف حاجة ان مواطن مصرى

مخدش باله أصلا ان التفجير ده حصل فى تجمع للتقريب بين السنة و الشيعة

:))))

Sofftheme said...

انا حعمل تسجيل و أقول إني انا اللي فجرت الناس دول و حقول أن احنا بنتلقى دعم من جيبوتي ....كمان شوية حتلاقوه على اليوتيوب

مواطن مصري said...

نوارة معلش انا اختلف معاكي

مش معنى انك بتحبي احمدي نجاد و دة حقك انك تحبي شخص او تكرهي شخص


بس مش معناة انك تبرري أخطاء شخص او تطلعية مش بيعمل أي خطأ و أنة ملاك

Unknown said...

ميدو

مش واخد باله من اي حاجة خالص

وانا عمري ما شفت كراهية عمياء غير مبررة كده وبشكل مستمر برضه

ويشتم في العنصرية وهو بيقول مافيش احسن من العرق المصري

بس ما توصلش انه يتشمت في الناس لما تموت يعني

Unknown said...

ده ما رضيش يشمت في حفيد مبارك اللي قاتل عيال الدنيا كلها وكان انتقام الهي وياريته اتعظ

لالالالا
ابنورمال

عبد الزهراء المصري (علي الحسيني) said...

بصي أنتي شكلك نسيتي كلمة وزيرنا الحقل أبوالغيط لما قال دور مصر أنها تعرص فعادي يعني مصر تعمل حركة نقص بس صراحة معلش بقى الأخوه في حماس هم اللي غلطانين لأنهم سق وأعلنوا عدم حيادية مصر في أي مفاوضات وأكيد أنتي فاكرة كده فكان ممكن الجماعة بتوع حماس يطلعوا على تركيا مثلاً ويأخدوها وسيط للمفاوضات ويحطوا الدنيا كلها أمام الأمر الواقع لكن صراحة الأخوه في حماس مش بيفكروا وقيادتها لأمركزية في أي قرار بتأخده .
أما بالنسبة لإيران والتفجير اللي حصل فيها فأنا عرفت بالخبر من اليوم السابع وهقول لك شيئ مش عارف هتفخميه مني ولا لأ لكنأنا سبق وأتكلمت عن الكلام ده في منتديات شيعية كتير لأن الحقيقة في النظام الإيراني هو نظام قمعي إستبدادي مش بيفرق في ظلمه بين شيعي وسني ومسيحي ويهودي بل هتستغربي إن النظام اللي هناك منع كتب شيعية عقائدية من الطباعة علشان عيون الأخوه السنه بل وقتل وإعتقال عشرات الالآف من علماء الشيعة لمجاهرتهم بمعارضة النظام في إيران زي الشهيد الظاوم السيد الشريعتمداري والشهيدان الإمام السيد الشيرازي الراحل وولده سيد محمد رضا الشيرازي قدس سرهما الشريف .
المهم ده مش موضوعنا لكن كلامي عن إن النظام الإيراني بيدفع ثمن ظلمه للناس من عصر الخوميني إلى الآن في عصر الخامنئي ومايغركيش الشكل الجميل والإنتخابات لأن السلطة كلها في أيد المرشد قائد الثورة وكلهم دمى ماريونيت في أيده ومافيش حد بيقدر يقول لأ للمرشد وعلى فكرة موضوع الشيطان الأكبر أمريكا وإسرائيل ده بايخ أوي لأن الشيطان الحقيقي هو من يجعل شعبه يعيش في جوع وفقر ومرض ولو حد من الشعب ده أعترض أو فتح بقه بيتعرض للقتل أوالإعتقال وهو يأخد قوت الشعب ويوزعه هنا وهنا شوية على التليح والجيش في الداخل وشوية في الكاريزما الإعلامية وتحسين صورة النظام وشوية على دعم الحركات المسلحةزي حزب الله وحماس وجماعة الحوثي .....إلخ

مواطن مصري said...

وقال بكبور كما نقلت عنه الوكالة إن "الحرس الثوري سيرد في شكل حازم ومدمر على هذه الجماعة لكي لا تتجرأ بعد اليوم على القيام بأعمال مماثلة في البلاد".


دة تطهير مذهبي يا نوارة مش عرقي

Unknown said...

هو كل السنة في ايران من جماعة جند الله؟

انت والله انسان غريب
يابني والله انت ما طبيعي

ما هو الواحد عشان يتعبى بكراهية الناس لدرجة انه يلغي عقله خالص زيك كده يا اما فيه سبب شخصي يا اما عنده مشكلة

والله باكلمك بجد

عبد الزهراء المصري (علي الحسيني) said...

هو كل السنة في ايران من جماعة جند الله؟
انت والله انسان غريب
يابني والله انت ما طبيعي
ما هو الواحد عشان يتعبى بكراهية الناس لدرجة انه يلغي عقله خالص زيك كده يا اما فيه سبب شخصي يا اما عنده مشكلة

=====================
ياأستاذة نوارة حضرتك مستغربة ليه اوي كده ؟؟؟
يااستاذة حتى الآن هناك من ينظر إلى كل مسلم شيعي على إنه عميل لإيران تخيلي ؟؟؟
ده شيئ عادي في ظل الإعلام الحكومي اللي بيحاول يلبس الأمور على البسطاء وعامة الناس .

عبد الزهراء المصري (علي الحسيني) said...

شايفة دور الحكومات في نشر التفرقة بين الناس ؟؟؟

==================
السلطات السعودية تجند الارهابيين لارسالهم إلى العراق

إباء : وكالات
اعلن موقع اسلام تايمز أن السلطات السعودية تجند الارهابيين لارسالهم إلى العراق .وذكر الموقع أن المواطن السعودي محمد عبد الله العبيد، 27 عاما، سعودي الجنسية، المسلح المعتقل لدى السلطات الأمنية العراقية كشف لوكاله الاسوشيتدبرس عن وجود شبكات تجنيد من قبل السلطات السعودية تعمل في جامعات ودور عبادة عربية وإرسالهم إلى العراق، حسب ما جاء في لقاء أجرته معه هذه الوكالة .
من جهته افاد موقع "اصوات العراق" نقلا عن وكالة الاسوشيتدبرس أن العبيد، قد جُنّد في حرم جامعة في العاصمة الرياض ".
و أفاد العبيد أن مفاتحته أول مرة كانت بشأن الانضمام إلى التمرد خلال سنته الثانية في جامعة الإمام محمد بن سعود الإسلامية في الرياض حيث بدأ احد زملائه من الطلبة تزويده بأدبيات وأقراص دي في دي عن القاعدة والمعارك في العراق.
و اشار الى انه انضم إلى مجموعة تتكون من حوالي 20 شخصا من دول من المنطقة، تونسيين، سعوديين، يمنيين وغيرهم من دول أخرى، مضيفا انه شارك في زرع العبوات الناسفة في الطرقات في محافظة ديالى وان قوات الامن العراقية القت القبض عليه حينما كان متجها الى بغداد بداية العام 2008.

و رأت الوكالة أن رحلة محمد عبد الله العبيد تفتح نافذة على كيفية إدارة الشبكات الإرهابية لسد النقص في صفوفها بتمشيط حرم جامعات وأسواق وجوامع لتجنيد أولئك الذين يريدون حمل السلاح في العراق وبنحو متزايد الآن في أفغانستان.
و استدركت قائلة " أنه حتى مع انخفاض العنف في العراق تشعر السلطات بالقلق من أن القنوات السرية نفسها التي استخدمت في جلب محمد عبد الله العبيد إلى العراق في أواخر العام 2005 لا تزال تعمل ومن الممكن أن تتوسع في أي وقت".

Unknown said...

الاستاذ عبد الزهراء

انا الحقيقة مش عارفة مدى صحة الخبر اللي حضرتك جايبه

بس ده كلام لو صح تبقى كارثة
ولو مش مؤكد يا استاذ الحسيني لو سمحت ما تنشرش فتن

عبد الزهراء المصري (علي الحسيني) said...

الاستاذ عبد الزهراء
انا الحقيقة مش عارفة مدى صحة الخبر اللي حضرتك جايبه
بس ده كلام لو صح تبقى كارثة
ولو مش مؤكد يا استاذ الحسيني لو سمحت ما تنشرش فتن
===================
بداية أنا عمري 20 سنة يعني أعتقد إن حضرتك مش محتاجة تقولي كلمة أستاذ دي .
ثانياً أحيي حضرتك لسعيك لنشر الحقيقة دوماً في مدونتك بكل حرية لكن أنا دوماً عندما أنقل خبر ما لأزم أكون حاطط في بالي إهتمام الآخرين بمصدر الخبر والمعلومة ولهذا أنا كتبت مصدر الخبر "
"إباء : وكالات"
وهذا هو رابط وكالة إباء للأنباء وهي وكالة إخبارية محترمة :
http://www.ebaa.net


تقبلي تحياتي

Unknown said...

يا استاذى العزيز مواطن
الفرق بينك وبين ايران ان هناك بيعرفوا يقولوا لأ حتى لو هايتسحلوا فى الشوارع بس برضه بيقولوا لأ
هنا أحنا بنتـ(تيييييت)
وبنتضرب بالجزمه وبنسكت
وكل يوم بنشوف فيديو تعذيب جديد من واحد ظابط فاسد بس يوم ماتحصل عمليه ويروح فيها ظابط بنزعل عليه وبنقول ربنا يصبر أهله

أيران مهما حصل فيها من قتل وتعذيب زى مانت بتقول بس بيطلعوا يقولوا لأ

هنا بيحصل اكتر من كده والناس راضيه وساكته يباه مين اللى أحسن ؟
وانت تقولى هنا فيه ديمقراطيه ؟

استاذ على الحسينى - واحد صاحبه جنده ايه العلاقه بين صاحبه والسلطات السعوديه ؟ - أيه دليل الربط بينهم ؟