Sunday 11 October 2009

وانا مش عايزة الديمقراطية اذا كانت جاية من الفريدم هاوس


تحديث: اااااااااااااااااه، ده عته رسمي بقى، طب احتياطا عشان انا قابلت كلام معاتيهي على التويتر، فقبل ماحد يجي يجيب لي قزمة البية هنا على المدودة دي، اقروا الفريدم هاوس على الويكيبيديا وموجود انها بتاخد فلوس من السي اي ايه وان اول رئيس لها كان عنصر سي اي ايه، وان لها دور في نيكاراجوا، اظن عارفين امريكا عملت ايه في نيكارواجوا؟ مش عارفين؟ لا دوروا بقى انا مش باحضر لكوا الرضعة، وستميت مرة قبل كده قلت ناعوم تشومسكي مهم جدا جدا جدا، مش مجرد راجل بيقول كلام حلو، ده يديلك صورة كاملة عن اللي بيحصل في الدنيا بدل ما احنا مغيبين، نزلوا كتبه واقروها، ده واجب، فرض عين،
هو الفريدم هاوس ده خلاص بقى ييجي بوفد رفيع بلدنا ويبعت دعوة لجمال مبارك كمان؟
طب بقى انا عايزاكوا تركزوا في اسامي كل اللي ح يقابلوا الوفد الرفيع ده عشان نعرف من اين نؤتى، هي البلد متفرتكة كده؟ هي وصلت ان قيادات الحزب الوطني والحكومة ح تقعد تاخد اوامر من الفريدم هاوس؟ يعني الحكومة بتتجسس علينا؟ احنا لو كنا ايام السادات، مش حتى عبد الناصر، كان كل اللي اتعاونوا مع الفريدم هاوس اخدوا اعدام بتهمة التخابر مع جهات اجنبية... عشان الشغل مع الفريدم هاوس تخابر مع جهات اجنبية، ده جهاز مخابرات، ده جهاز مخابرات، ومعروف في كل حتة في الدنيا انه قسم المجتمع المدني في جهاز مخابرات، يعني مثلا زي ما احنا في المخابرات بتاعتنا عندنا القسم العبري، عندنا قسم الانترنت، السي اي ايه عنده الفريدم هاوس لاختراق والسيطرة على الانظمة، واللي بيشتغل معاهم جاسوس، وش كده، جاسوس يعني جاسوس، يعني زي مديحة كامل في فيلم دي مصر يا عبلة كده، (تخيل عناصر من القسم العبري في جهاز المخابرات بتاعنا رايحين اسرائيل بوفد رفيع المستوى يقولوا لهم يعملوا ايه في الانتخابات) فيه اللي عارف وعشان كده مخبي، وفيه المش مخبي مش عارفة ليه؟ هل دي اوامر انه يستعبط، وللا، مش ممكن يكون عبيط، يعني لما واحد يشتغل مع السي اي ايه ويبقى مش عارف انه جاسوس، يبقى ايه؟ مش ممكن يبقى مش عارف، لكن ممكن يبقى بيستعبط تعمدا عشان ده بيبقى شكل من اشكال اضفاء الشرعية على التخابر، مستغربين من التعبير الاخير؟ ماهو ده اللي حصل في بلدنا فيه حالة من اضفاء الشرعية على التخابر، بس ان يوصل الامر ان الحكومة بتاعتنا نفسها، النظام نفسه....مين دول؟ مين اللي بيحكمونا دول؟ الغريبة بقى ان اي كلب في اي كهف في الدنيا دي عارف كده والله، ماحدش بيستعبط غيرنا، قسم في جهاز مخابرات للسيطرة على الانظمة واختراقها جاي بلدنا في عز الضهر يدي حكومتنا اوامر؟ ويبعت لهم دعاوي في بلدهم؟ هي بقت كده؟ انا ما كنتش اتصور ابدا ان البلد بقت سايبة للدرجة دي
الله، طب والمعارضة اللي كانت بتشتغل مع الفريدم هاوس ح تعمل ايه؟ الله، دي طلعت مش معارضة هيهيهييي، يا سبحان الله، الواحد كان فاكر ان فيه حساسات طلعوا كلهم مع بعض، انا مش فاهمة حاجة، مش فاهمة حاجة ابدا، انا عاملة كدهو، اهو، بصوا، كدهو.. يعني دلوقت الانسان لما يحب يشتغل جاسوس في بلد الحزب الحاكم اللي فيها بيشتغل مع الفريدم هاوس يبقى يشتغل لحساب مين؟ لحساب الشعب بقى، ويركب الطيارة مع محمود يس ويقولوا: ده الفريدم هاوس، وده السي اي ايه، دي مصر يا ابن الهابلة
اتاااااري وزارة الخارجية كانت بتقول بمنتهى الثقة: اللي سافروا مع الفريدم هاوس سافروا بعلمنا وموافقتنا.. انا مش قلت لكوا امريكا بتحتوي المعارضة لصالح النظام؟
بس يا سيدي وعنها ورااااحت البلد ستمييييييييت حتة
بالنسبة لي انا كنت باسأل عن "ماذا حدث للفلسطينيين" وبعدها جالي واحد غاظني وبعدين قطع قلبي من كتر ماهو متلخبط، وبعدها اميرة هويدي على التويتر بعتت  المقال ده، ياسر الزعاترة بيشرح لنا بقى ماذا حدث للفلسطينيين... حدث لهم رأسمالية واستثمارات اجنبية، طب يعني حد ح يلحقهم؟ وللا ح يستنوا على نفسهم لحد ما الحكومة تشتغل مع جهاز مخابرات اجنبي وتحاكمهم بتهمة التخابرمع جهات محلية اللي هو الشعب؟ اصل لو وصلوا للمرحلة اللي احنا فيها دي مش ح يفلحوا ولا لحد  يوم القيامة
على فكرة انا مش فاهمة حاجة... والله ما فاهمة حاجة ابدا، واحد يجيب لي مقال اسرائيل بتقول فيه: ليه كشفتوا عباس اهو بيتشتم، ومعتبر ان ده دفاع عن عباس، وتطلع الحكومة بتاعتنا بتشتغل مع الفريدم هاوس، واحنا ايه؟ يعني انا بس افهم، يعني احنا مثلا تحت الاحتلال زي العراق؟ وللا احنا مين؟ يعني..اأ..مأ.. هو..مع السلامو عليكو


12 comments:

صوت الحق said...

يا نوارة الفريدوم هاوس بعتت للحكومة بحسب الخبر المنشور في المصري اليوم لكن لسة مستلموش رد نستني لما نشوف الحكومة هتقول ايه و بعد كدة نبدأ نفكر

Unknown said...

بصرف النظر عن تمثيلية بعتنا لهم ولسة ما ردوش

اقرا المقتطف ده:

لافتاً إلى أن الحكومة سيمثلها فى هذا اللقاء السفير وائل أبوالمجد، المسؤول عن ملف حقوق الإنسان بالخارجية المصرية، ومن المتوقع حضور كل من الدكتور بطرس غالى ونائبه أحمد كمال أبوالمجد، ممثلين عن المجلس القومى لحقوق الإنسان، إضافة إلى الدكتور عبدالمنعم سعيد وبعض المعنيين بقضايا حقوق الإنسان فى مصر، ومن الأسماء المعلنة للقاء: نجاد البرعى، الناشط الحقوقى، والدكتور أسامة الغزالى حرب، رئيس حزب الجبهة.

دول جايين للحكومة المصرية مش للمعارضة

يعني المعارضة اللي كانت بتتعامل طول الوقت مع الفريدم هاوس يا تقبل باللي ح يتوصولوا له يا تتشيع
يعني كانوا بيدوهم على قفاهم طول الفترة اللي فاتت دي

Unknown said...

الكلام عن بعتنا لهم وما ردوش ده بالون اختبار عشان يشوفوا رد الفعل ح يبقى ايه؟

mido said...

محمد عادل بيكلمك فى الموضوع على تويتر

مواطن مصري said...

احنا لو كنا ايام السادات، مش حتى عبد الناصر، كان كل اللي اتعاونوا مع الفريدم هاوس اخدوا اعدام بتهمة التخابر مع جهات اجنبية... عشان الشغل
مع الفريدم هاوس تخابر مع جهات اجنبية

الله يرحمك ياسادات

مواطن مصري said...

بس دة ميمنعش وجود رقابة ع الانتخبات


منظمات المجتمع المدني و القضاء يراقبو الانتخابات

أبو عمر - الصارم الحاسم said...

http://www.masrawy.com/News/Egypt/Politics/2009/october/10/alsadat.aspx

والله ما متفق معاه ولا اعرفه حتى

يسري said...

الناس اللى فى قعر الخلاط

عرفتى احنا مين يا نوارة
عرفتى احنا ايه ؟؟؟

انتى عاملة كدهو
انا بقا عامل كدهون :××O

دا اسمه على رأي احمد سعيد
هبل فى الجبل

الموضوع معروف و من زمان بس انتى اللى مش عاوزة تصدقي نفسك .. مش قادرة تعترفى

بس هما سهلوا عليكى الموضوع خالص

و ادى الفريديم هاوس بنتعامل معاه و ف عز الظهر
حد ليه شوق فى حاجة ؟؟


احنا بقا نعمل ايه ؟
سهله بسيطه 1+1=2

اللى مش مع الشعب .. يبقى ضده

و حتي المعارضه .. انسى الموضوع دا اصلا
انا مش مقتنع بيه من الاول اصلا
المعارضه ما هى إلا بالونه اختبار
بالونة بننفخ فيه

بمزاجهم طلعوا
و بمزاجهم يقولوا
و بمزاجهم برضه ينزلوا

و ايمن نور خير مثال

التكية من زمااااان شغاله و مفتوحه بس احنا بنضحك على بعض بالكلام يا نوارة

ههههههه
و روحى يلا لحسن ابتديت اشك فيكي

Unknown said...

طب وبعدين؟
اعمل ايه انا دلوقت؟ اعمل ايه انا دلوقت؟

Unknown said...

يعني انا مثلا بما اني مع الشعب ح اتقدم بتهمة الخيانة العظمى للسي اي ايه؟

يسري said...

هههههههههههههههههههههههههههههههههه

إلحقى استخبى بقا

اسد الجيزة said...

واحد راح الكباريه لاقه ابوه هناك بيهلس اشمعني هو يروح وميهلسش