Tuesday 20 October 2009

عفوا قداسة البابا

ليه حطيت العنوان الخنيق ده؟ لاني باكره العناوين اللي فيها "عفوا..." وبعدها اي حاجة بقى، بيعصبني قوي العنوان ده، تصدقوا اتعصبت دلوقت، وبما ان البابا شنودة بيحب الادب والشعر فاكيد ركاكة العنوان ح تضايقه زي ما هو ضايقني بالخبر ده
وهو المطلوب اثباته
كده؟ تشمت فيا مينا زكري اللي كان بيقول لي: خليه ينفعك... بكرة تشوفي؟ هو كل واحد يكره اسرائيل تحبيه؟ اما انت هايفة صحيح...
انا عايزة اعرف باي صفة البابا شنودة بيقول الكلام ده؟
اذا كان بيقوله بصفته مواطن فدي حاجة ما تخصناش، ثم هو ما قالش ح انتخب جمال مبارك، هو قال سوف أؤيده، يعني ايه؟ يعني ح ينضم لحملته الانتخابية؟ باي صفة برضه
لو بصفته مواطن مصري برضه دي حاجة ما تهمناش
وللا بصفته الكنسية؟ فهو كده بيقمع المسيحيين، انا ما شفتش مسيحي مصري واحد بيحب لا مبارك ولا ابنه، عشان الاقباط ما مرش عليهم اسود من التمانية وعشرين سنة اللي فاتوا
تعالوا نقلب المواجع بقى
فترة الحرب مع الجماعات الاسلامية في الصعيد:
مافيش حد تضرر قد المسيحيين في الصعيد، اتزنقوا ما بين الجماعات الاسلامية اللي بتقول لهم كلام يخوفهم، وما بين الامن اللي استغل انهم خايفين وفرض عليهم جبرا انهم يرشدوا عن الهربانين، وهم ما كانوش عايزين كده، انتوا عارفين الاقليات في كل حتة بتحب تبقى في حالها ويا نحلة لا تقرصيني ولا عايز عسل منك
اللي حصل في الصعيد، انهم في الاول ما رضيوش يتعاونوا مع الامن وبقوا يخبوا ناس عندهم فعلا، الصعيد اكتر حاجة بتتحكم فيه العادات والتقاليد، فوق القانون وفوق الدين كمان، من تقاليد الصعايدة ان لو جالك عدو انت طالبه عشان بينك وبينه تار واستغاث بيك تخبيه لازم تخبيه، مافيهاش فصال والا تتفضح والعيال تزفك في الشارع، والانتقام منك يبقى كده، ماحدش يقتلك، يسلطوا عليك عيل، يشوهوا وشك بمية نار، يفقعوا عينك، ليه؟ عشان انت خسيس، وهم بيعتبروا انه لو قتلك يبقى بيشرفك لانك مت راجل على ايد راجل، وده شرف لا المرشد ولا اللي بيتكلم في اعراض الستات في الصعيد يستاهله وفقا لمفاهيمهم
قام الامن استعان شوية بتجار المخدرات والمطاريد، حيث ان دول بقى اصحاب الطباع الدنيئة، وما يأسش من الضغط المستمر على المسيحيين، الله اعلم، فيه ناس في الصعيد بتقول ان المطاريد اللي تبع الامن ضربوا كنايس عشان يخوفوا المسيحيين، وفيه ناس تانية بتقول لا، الامن هو اللي فضل يهددهم ويخوفهم وبقى ينقي الفقرا منهم عشان يرشدوا له فكانت النتيجة ان الجماعات الاسلامية (اللي هم طلعوا وللا نزلوا صعايدة يعني مافيش فصال في التقاليد برضه) شافوا ان دي خيانة وبقوا يطيروا عين وللا ايد لـ"الخاين" اللي بلغ عنهم
ما اعرفش اي الروايتين اصح بس فعلا حصل ضرب للكنايس قام المسيحيين خافوا وتحت الضغط بقوا يرشدوا عن مكان المطلوب اللي يعرفوه
وعنها وعاديك، خلاص، هو اللي بينكسر في الصعيد بيتصلح؟ دول في قعدة الصلح بيقولوا: اصطلحنا واللي في الجلب في الجلب
ده وهم بيتصالحوا، تخيل بقى لما يتخانقوا
طيب
تعالى يا عوكل بعد ما الامن ضغط على المسيحيين وكفرهم وخلاهم يرشدوا له، وجه الجماعات، بعائلاتهم، ونسايبهم، وجيرانهم، وكل اللي بيغير على "الاخلاق الحميدة" اللي بتبص للمرشد على انه ما يفرقش عن الخائض في اعراض النسوان حاجة، ينتقموا من المرشدين
حماهم؟
ابدا، سابهم يتعجنوا ولا حتى سمح لهم يحرروا محضر، ماهو منوفي بقى
وادي جزات الصعيدي اللي يتعامل مع منوفي
الناس كلها فاكرة الكشح، بس دي مش الحادثة الوحيدة، لحد دلوقت ع اجابل صعايدة ع يجولوا لي: النفوس ما عمرهاش ع تصفى
ليه بس؟
دول يقولوا لي: اشتغلوا مرشدين
ودول يقولوا لي: تعالي حدانا في البلد اوريكي ابن خالي اللي عينه طارت وابن عمي اللي رجله اتجطعت
مين المسئول عن ده كله؟
مين يا ابونا؟
اللي حصل في الصعيد هو اس كل البلاء، ليه بجىىىىى، صحيح المسيحيين اتفتونوا في الاول وجالوا ما ع نشتغلش مرشدين للحاكومة، بس الكترة تغلب الشجاعة، وسلاح الاسر المسيحية ع ييجي ايه في سلاح الحاكومة؟
بالنسبة للمسلمين بقوا يتعاملوا على اساس ان بينهم وبين عوايل المسيحيين تار، وعيلة الشرطة (كانوا بجد بيتعاملوا مع الشرطة على انها عيلة، يعني ظابط جوازات وللا مرور مثلا ده من نفس العيلة مطلوب برضه) تار. والصعيد ده ماحدش يهزر فيه، ابدا ابدا ابدا، ده بيشكل خمسة وسبعين في المية من السكان
كان ممكن حتى المشكلة دي تتحل لو حصل ايه؟
لو المسيحيين عملوا محاضر والموضوع اتصعد للقضاء واللي اعتدوا على المسيحيين في حادثة واحدة توحد ربنا اتقدموا للمحاكمة، في الحالة دي النفوس كلها كانت ح تهدا، المسيحيين كانوا ح يحسوا انهم اكلوا حاجة وشربوا عليها مية، والمسلمين ما كانوش ح يزعلوا انهم اتحبسوا لان: السجن للجدعان وضرب الحاكومة ما ع يوجعش
انما ليه؟ ليه تهدي النفوس لما ممكن تشعللها؟
ما الصعيد ده بيورد لنا ناس ع تتعارك كاتير، والصعيد ده مقفول على نفسه وعامل نفسه عزوة وقانونه خاص ومافيش غريب يدخل باناتهم، طب تتصرف كيف يا عبد الرحيم، خلي بقى مجموعة في الصعيد كده تعيش منبوذة ومكروهة وفي نفس الوقت حاسة بمرارة وظلم وان حقها مهضوم، عشان اذا ما كانوش ح يشتغلوا لحسابي، يبقى على الاقل يتسلطوا على بعض
ومن هنا انطلق كل القرف اللي احنا شايفينه حاليا دلوقت، وكل الكراهية المتبادلة، والاعتداءات على المسيحيين المتكررة، وقلة الادب بتاعة اقباط المهجر..إلخ
طب ده كله عمره ما حصل قبل كده، عمره، ده الاحتلال الانجليزي ما عرفش يعمل كده
وكل ما الامور تهدا يروح ظابط وللا امين للناس يسخنهم ويقول لهم: انصروا دينكوا. ويعملوا زي الندابة اللي بتهيج الخواطر ويقعدوا يفكروهم باللي كان واللي راح واللي عمل واللي سوا لحد ما الناس تتجنن وتقوم على قومة رجل واحد
وكل ما حادثة زي دي بتحصل، بتتحفر في القلب، هي الحاجات دي تتنسي؟ ما تتنسيش ابدا وخصوصا بقى لما المعتدى عليه يتجبر جبرا انه يتنازل عن المحضر ويعمل صلح وهو نصه محروق وللا عينه طايرة، كأنه ممسوك عليه ذلة
ثم ان دلوقت المحاضر ما بقتش تنفع، لان المتهم في المحضر ح يجيب اللي حرضه، واللي حرضه الباشا، مش حلو ده، بس حتى لو المحضر اتقفل المسلمين ما بيسكتوش، وبيفضحوهم وبيقولوا: الباشا قال لنا انهم بينصروا البنات وقال لنا انصروا دينكوا
يعني انت عارف يا قداسة البابا،
عارف ان ذنب المحروقين والمعووريين والمكسحين في رقبة الامن، عارف ان المواقع القبطية اللي بتزود الطين بلة واقباط المهجر (ماهم قالوا لك لا بناخد حقنا بدراعنا ولا بالقانون ناخده كلام طيب) ولأول مرة يبقى فيه من المسيحيين المصريين ناس تتجرأ على كرسي البابوية وتطول لسانها عليك كل ده نتيجة لكل الاحداث دي
عارف ده كويس
عارف
عارف
طب ليه كده؟
يعني بيزنق المسيحيين كده، المسيحي المتدين ح يعصر على نفسه لمونة وينتخب جمال مبارك، والمسيحي اللي مش متدين قوي ح يقل ادبه على البابا، طيب وليه يتحطوا في المزنق ده؟ ثم دي مؤسسة دينية، مالها ومال السياسة؟

امال بس الغوا المادة التانية والدولة المدنية والمواطنة ولا للدولة الدينية، الله، ايه يا قداستك؟ هي دولة مدنية علينا ودينية عليكوا وللا ايه؟ ماهي يا مدنية للكل يا دينية للكل
البابا شنودة خايف من الاخوان؟ اولا الاخوان مش ح يسمح ليهم ييجوا، وهم نفسهم يعني قالوا وش كده: احنا مش مستعدين نتصفى
ثانيا: هو الاخوان ح يعملوا ايه اكتر من اللي معمول في المسيحيين اللي بقوا المحروقين في الارض؟ وراخرين لسانهم جايب لهم الكافية

وعشان بس ماحدش يقول لي الاضطهاد العالمي للمسلمين هو السبب، لا، ما سوريا فيها مسلمين ومسيحيين، ما لبنان، اللي قطعوا بعض، فيها مسلمين ومسيحيين، العراق الله يرحمها ويحسن اليها كان فيها مسلمين ومسيحيين وما حصلش بينهم صراع طائفي والمسيحيين اتهجروا وبيتهم اتخرب الا لما الاحتلال جه، يعني مبارك عمل فينا زي ما الاحتلال عمل في المسيحيين
بلاش، ما فلسطين ذات نفسها اللي ضاربها السلك وفيها احتلال عنصري استيطاني مافيش اوسخ منه في التاريخ فيها مسيحيين، ما غزة فيها مسيحيين وفيها حماس، واكتر ناس وقفت جنب حماس ايام الضرب كانت الكنيسة في غزة، ما ايران فيها مسلمين ومسيحيين ويهود وزرادشت وماحدش اشتكى غير السنة (معلش سيبونا، احنا لينا وضع خاص، احنا لو ما مسكناش الحكم بنعتبر ان ده اضطهاد، ده احنا حاسين اننا مضطهدين في مصر، مش عارفة الالاطة دي كلها جايبينها منين) ما سمعناش بفضايح حد منهم زينا
الله، ما احنا، احنا نفسنا، ما كانش عندنا الفضايح دي ابدا
ده الدنيا كلها بتتفرج علينا
الاخوان ح يعملوا ايه اكتر من كده؟
بالعكس، ده بقى ممكن الاخوان بسبب موقفهم الحساس يبالغوا في حسن معاملتهم المسيحيين اكتر من اي حد تاني عشان يكسبوهم، لانهم بفرض رشحوا نفسهم، وده مش ح يحصل، وبفرض نجحوا، وده وارد، وبفرض انهم سمح لهم يوصلوا للسلطة بعد ما نجحوا وما اتعملش فيهم زي ما اتعمل في الجزائر وفلسطين، وده من رابع المستحيلات، ح يبقوا لوحدهم والعالم كله ضدهم ومش طالبة معاهم يخسروا المسيحيين، وهم برجماتيين، يعني ح يبذلوا كل جهدهم عشان يكسبوا حتى موريس صادق نفسه لان ايده طايلة امريكا


ويعني ايه لا يوجد اكفأ من جمال مبارك؟ أكفأ ازاي يعني؟ بيكتب على الالة الكاتبة ميت كلمة في الدقيقة مثلا؟
ايش عرفك بكفائته؟ ومصر عدمت كفاءات مافيهاش الا الننوس؟ بقى كل الناس دي مش كفء هو اللي علموه عربي على كبر بس اللي كفء؟
يعرف ايه عننا جمال مبارك ده؟
عمره ركب ميكروباص؟ عمره ركب مترو مصر الجديدة وللا مترو الانفاس حتى؟ عمره نزل يطلع بطاقة؟ يجدد الرخص بنفسه؟ دفع اقساط موبايل بكاميرا؟ اشترى كارت شحن بعشرة جنيه؟ اتزنق في الرصيد وقضاها رنات؟ وقف في اشارة؟ فاصل مع بياع؟ شال هم مصاريف مدرسة؟ مرتبه اتأخر والفلوس قصرت معاه اخر الشهر؟ نزل مولد الحسين؟ كمل الشهر طبيخ ارديحي عشان مافيش لحمة ولا فراخ؟ غير عجلة عربيته؟ العربية عطلت منه اصلا؟ المدير خصم له عشان التأخير؟ دور على ركنة وما لقاش وقعد يسب ويلعن في اللي بياخدوا مكانين لما بيركنوا؟ اتخانق مع سواق الميكروباص عشان استعبط وقال له ماعيش فكة جنيه؟ المية اتقطعت عندهم؟ النور اتقطع عليه وهو قاعد يعمل شغل مهم؟ بييجي محصل النت ياخد منه الاشتراك؟ بيمشي يطفي في نور البيت عشان فاتورة النور جات تقصم الوسط؟ بيضرب التلفزيون عشان بيزغلل وهو بيتفرج على الماتش؟ بيرف الشراب بتاعه؟ بييجي يغسل وشه يلاقي نازل منه طين من كتر اللف في الشوارع؟ بيبعت للجيران طبق كحك في العيد؟ بيقعد على المحطة ويتصاحب على كل اللي واقفين لحد ما الاتوبيس ييجي بعد ساعة؟ بيهزر مع الناس في الاسانسير؟ بيحكي قصة حياته لواحد ما يعرفوش وهو قاعد مستني ورقه يخلص في الجوازات؟ عمل في الشغل افطار جماعي والاكل طلع استغفر الله العظيم واكله برضه عشان ما يكسفش زمايله؟

انا لا اتكلمت عن اللي بيروحوا يملوا مية من اخر الدنيا، ولا اللي عايشين هم والمجاري اخوات وصحاب، ولا اللي السقف بيخر عليهم في الشتا ولا اللي واقفين في مستشفى حكومة مستنيين دورهم لحد ما عزرائيل يعفي عنهم ولا اللي بيدوروا على اكلهم في الزبالة
انا اتكلمت عن ناس طبقة متوسطة عايشة حياتها وشايفة انها سعيدة ومبسوطة وفضل وعدل واحنا احسن من غيرنا كتير وكمان ضميرهم مأنبهم عشان عايشين العيشة الملوكي دي وغيرهم تعبان في حياته

ولا حتى يعرف دول، يعرف مين؟ يعرف عننا ايه؟ ابوه يعرف، لكن هو يعرف ايه؟ أكفأ ازاي في بلد هو ما يعرفش عنها حتى طريقة حياتهم، حتى مفرداتهم، حتى ايه اللي بيضحكهم وايه اللي بينرفزهم، بيشتموا بعض ازاي في الشارع؟ بيضربوا بعض ليه؟ بيضحكوا في وش بعض عشان حصل ايه؟ بيتريقوا على ايه وبيعيطوا من ايه؟
اذا كان متخيل ان السواق بتاعه من البسطاء فانا احب اقول له ان السواق بتاعه ما يرضاش يناسبنا عشان احنا مش قد المقام
مش لما يبقى مواطن مصري الاول يبقى يفكر يحكم المواطنين المصريين؟
انا زعلانة منك يا قداسة البابا، ومينا فرحان فيا


النظام الحالي، زي ما قلت امبارح، نجح في حاجات كتير عمرها ما حصلت على مدى سبعتلاف سنة، زي مثلا تخريب القطن، والقضاء على فئة المزارعين
بس الاهم كمان، انه خلق حالة من الكراهية بين المسلمين والمسيحيين غير مسبوقة، ما حصلتش ابدا ولا في اسود ايام العثمانيين وفترة اضمحلالهم
والبابا بيأيده
الله اعلم، يمكن هذا النظام يجني ما صنعت يداه، ومن كتر ما المسلمين والمسيحيين بيكرهوا بعض، قوم لما المسلمين يلاقوا المسيحيين بيأيدوا جمال مبارك هم بقى يسقطوه وتبقى عدالة السماء نزلت على استاد باليرمو
قادر الكريم، اللي اتعمل في اليوم السابع يتعمل في الانتخابات

55 comments:

Anonymous said...

بس المشكلة انه المسلمين لما يلاقوا المسيحيين بيأيدوا جمال مبارك هيكرهوا المسيحيين يا نوارة..

إذا كنت انا كرهت شنودة أساسا بسبب الموضوع ده تحديدا، هو مش أول مرة يصرّح التصريح ده، والله كنت معجب بيه زمان، كنت باحس من تصرفاته انه عنده قضية أيا كانت وبيتصرف وفق صالح القضية دي..

دلوقتي بقيت باحس انها مش مصلحة (شعب الكنيسة) الصرفة هي اللي بتحرّكه، مصلحة المسيحيين في كل مكان في العالم ممكن تيجي منغير ما يحط نفسه في صف ناس مفترية ظالمة وهو عارف عنهم كدة كويس..نو أوفينس يا اخواننا بس ده مجرد احساس جالي من موقفه ده..

Anonymous said...

وبعدين كتري من الدعوات يا ستي أحسن انتي الظاهر سرك باتع، اللي جبتيله فلفوسا الخنازير واللي مش عارف عملتي فيه ايه..

مواطن مصري said...

نوارة دة رأي الشخصي لقداسة البابا شنودة

يعني الملاين المصرين المسيحين ارادتهم حرة و هما الي هيصوتو في الانتخابات حسب اختيارهم للشخص


و بعدين لو فية انتخبات حرة و ديموقراطية زي ابراهيم عيسي ما بيكتب عمر ما الاخوان هياخدو صوت واحد


و الي حصل في المجلس 88 طرطور من بقيت الطراطير الي قاعدين

دي مجرد تمثيلية و صفقة

اتعملت

مواطن مصري said...

العكس، ده بقى ممكن الاخوان بسبب موقفهم الحساس يبالغوا في حسن معاملتهم المسيحيين اكتر من اي حد تاني عشان يكسبوهم، لانهم بفرض رشحوا نفسهم، وده مش ح يحصل، وبفرض نجحوا، وده وارد، وبفرض انهم سمح لهم يوصلوا للسلطة بعد ما نجحوا وما اتعملش فيهم زي ما اتعمل في الجزائر وفلسطين، وده من رابع المستحيلات، ح يبقوا لوحدهم والعالم كله ضدهم ومش طالبة معاهم يخسروا المسيحيين، وهم برجماتيين، يعني ح يبذلوا كل جهدهم عشان يكسبوا حتى موريس صادق نفسه لان ايده طايلة امريكا



نوارة مهدي عاكف قال انة ضد المواطنة و معظم الاخوان

عاوزين يفرضو الجزية عليهم

دة غير انهم ضد قانون بناء دور عبادة الموحد

Anonymous said...

ولا صوت يا مواطن؟
ولا حتى النص مليون اخوانجي حسب تقديرات الحكومة سنة 2000؟ :)

ولا الكام ألف اللي لموهم في استاد القاهرة أيام العراق عاللي لموهم في الأقاليم؟

نفسي في مرة تقول كلام يدخل الدماغ بدل ما توجع دماغنا بأمنياتك السخصية..ليه انت فاكر الشعب كله دماغها زيك؟..كانت تبقى ليه الانتخابات بقى؟ :)))

لا يطلع الشعب زيك بصحيح؟..دي تبقى كارثة!! :))))

Unknown said...

احمد نصر
ياريتها مصلحة "شعب الكنيسة" شعب الكنيسة كفران وطالع دين امه

المسلمين ح يكرهوا المسيحيين

لا بص يا احمد مافيش كراهية متبادلة زي اللي موجودة دلوقت

فاذا كان المسلمين ح يكرهوا جمال مبارك من وش المسيحيين يبقى دي الميزة الوحيدة

هههههههههه

مواطن

البابا شنودة مالوش رأي شخصي
البابا شنودة كلامه ملزم للمسيحيين الارثودوكس

شبه شوية، بس مش قوي لاننا ما عندناش مؤسسة ممكن تتحكم قوي كده فينا، بس شبه مثلا لما المجمع الاسلامي يطلع فتوى بوجوب او حرمة حاجة

المسلمين ممكن يخالفوا ويفضلوا مسلمين

لكن الارثودوكس ده امر بابوي ما ينفعش يخالفوه

Unknown said...

مواطن مصري

لا معلش
لو فيه انتخابات حرة الصوت الوحيد اللي الاخوان ح تخسره هو صوتك

هههههههههههههه

ده واقع يا مواطن
الاخوان متواجدين في الشارع وسط الناس
وسهل جدا يكسبوا اصوات باغلبية ساحقة

بس هم مش ح يترشحوا
مش ح يترشحوا لانهم عارفين اخرتها ايه

اذا كان فلسطين اللي مافيهاش دولة لم يسمح للاخوان انهم يتواجدوا في السلطة

مصر بالنسبة لامريكا واسرائيل خط احمر

يستحيل يجازفوا ويحطوا الاخوان
ولو الامر استدعى انهم يولعوا في البلد

عشان كده الاخوان قالوا مش ح نترشح

Unknown said...

الاخوان ضد قانون دور العبادة الموحد؟

يابني ده اختراعهم

مواطن
يعني فيه وسائل اخرى تنتقد بيها الاخوان لو عايز غير انك تقول كلام مالوش اساس من الصحة

بس بما انك ليبرالي فاي انتقاد للاخوان ح يرتد عليك

انا عشان اشتراكية اقدر انتقدهم زي ما انا عايزة

:p

بس انا برضه مش شايفة داعي لانتقاد ناس في السجن ومتقدمة لمحاكم عسكرية وهم مدنيين ومش ح يترشحوا للانتخابات وما بيعملوش حاجة غير بيوكلوا محامين عشان يطلعوا من الوحلة اللي هم فيها

وميت مرة قلت لك يا مواطن

مافيش اي شجاعة ولا نبل في انك تنضم لزفة مهاجمين على اي فئة معزولة ومظلومة حتى لو بتختلف معاهم

مش مرجلة دي

المرجلة والشجاعة: كلمة حق عند سلطان جائر

مش كلمة تقريع عند مظلوم اسير يا عم انت

مواطن مصري said...

الحكومة بتلعب ب الاخوان

و السلفين

و مصلحتها تواجد الاخوان لو كانو عاوزين يخلصو منهم كان اعتقلو مكتب الارشاد و صفوهم من زماننننن

Unknown said...

صح

لو كانوا عايزين يصفوا الاخوان كانوا اعتقلوا الراجل اللي عنده مليون سنة عشان الدنيا كلها تقوم عليهم ومبارك يتقتل زي السادات

صح... انت صح

سبحان الله
ويخلق مالا تعلمون

Unknown said...

سلفيين؟

انا لسة دلوقت واخدة بالي انك قلت الاخوان والسلفيين

يابني السلفيين دول الحكومة دشنتهم عشان تضرب بيهم الاخوان

طيب يا مواطن انت واضح انك ما تعرفش الاخوان


انا ليا تحفظات على الاخوان ح اقولها لك عشان تهدا

بس دي اول واخر مرة ح اقول اي تحفظ عليهم لحد ما ربنا يفك اسرهم ويفرج كربتهم وياخدوا حقهم في التواجد والترشح والتعبير عن نفسهم زيهم زي بقية البني ادمين

وربنا يسامحني انا والله مش قصدي اغتاب مظلوم

انا بس قصدي ابين لك الاخوان اللي انت بتتكلم عليهم دول ومش عارفهم
ح تلاقي انهم متفقين معاك اكتر ماهم متفقين معايا لانهم ليبراليين زيك


اولا: رأسماليين، ومؤمنين بالاقتصاد الحرب، الفرق بينهم وبين الليبراليين الجدد انهم مؤمنين برأسمالية فيها شوية انسانية، يعني فيها ضمان اجتماعي
وده بسبب التوجه الديني
اقصد الضمان الاجتماعي مش الراسمالية طبعا

ثانيا: عندهم قبول للتعددية الدينية والمذهبية وما عندهمش قبول للتعددية في داخل الدين والمذهب

بمعنى
الاخوان بيقبلوا الاديان الاخرى، وبيقبلوا الشيعة
بس ما يقبلوش انك تبقى سني وتفسر تفسير مختلف في الاقتصاد خصوصا
مش في السياسة، ممكن يقبلوا تفسير مختلف في السياسة، ويبقى فيه تعددية جوة الاخوان سياسية، بس مش اقتصادية

ثالثا: مش مؤمنين بالثورة، مؤمنين بالتغيير الاجتماعي
وانا شايفة ان حتى لو حصل التغيير الاجتماعي اللي بيقولوا عليه (وهو شبه مستحيل خصوصا في بلد تعدادها كبير كده) فالتغيير ده بيوصل لنقطة لازم توصل بشكل حتمي للثورة
وبسبب عدم ايمانهم بالثورة ضيعوا على البلد فرص كتير
- ده من وجهة نظري المتواضعة طبعا -

رابعا: برجماتيين
يعني عندهم استعداد لتقديم تنازلات تشيب وتحرق الدم لو الظروف مش مواتية
وانا شخصيا شايفة ان البرجماتية لما تبقى ضعيف مش عملية ولما تبقى قوي تبقى استغلالية

دي تحفظاتي اللي انا فاكراها

وهي نفس تحفظاتي على الليبراليين يا مواطن
زايد عليها
ان الليبراليين ما عندهمش الانسانية اللي العقيدة الدينية بتفرضها على الاخوان
وبرجماتيتهم مالهاش حدود برضه لان ما عندهمش العقيدة اللي تحجم البرجماتية دي
وتطبيعيين
ومتأمركين
وعنصريين
وكل ده مش موجود في الاخوان

ولو الليبراليين اتعمل فيهم اللي بيتعمل في الاخوان دلوقت ح اقف جنبهم واساندهم ويستحيل اوجه لهم اي نقد

عشان هم بني ادمين
ومافيش بني ادم يستاهل انه يتعمل فيه كده

Unknown said...

النقطة الاولى: *الاقتصاد الحر مش الحرب ههههه

مواطن مصري said...

ازاي يا نوارة انا مؤمن ب الرأس مالية المبنية على الاخلاق و مؤمن بتغير المجتمع بس برفض فكرة ان حزب يبقى على اساس ديني

او اقتصاد ديني

دة غير في ليبرالين كثير انسانين

Unknown said...

الليبراليين مؤمنين بالمجتمع المدني لخدمة مصالح الرأسمالية البحتة اللي هم متبنينها

زي جمال مبارك كده

الرأسمالية لازم زي ما بتنتج غنى مالوش مبرر ولا داعي

الطبيعي انها تنتج في المقابل فقر لا انساني وده فيه خطورة على المصالح الرأسمالية

وحفاظا على مصالح الرأسمالية فهم بيأيدوا المجتمع المدني والتبرع

يعني لقمة بيرموها للمظلومين عشان يسدوا بقهم

لكن مافيش عدالة حقيقية

وبرجماتية الليبرالية هي اللي بتخليها تتبنى بعض القيم الانسانية لان ده في مصلحتها

مش لان ده هو الصح

المزنق اللي واقع فيه الاخوان انهم مؤمنين

يعني ما يقدروش يفكروا بطريقة المكسب والخسارة والمصلحة والضرر طول الوقت

فيه مبادئ غصب عنهم، مدام مسلمين، ملتزمين بيها حتى لو ح تضرهم وتخسرهم

فعملوا توليفة كده تجمع ما بين الرأسمالية والمبدأية

وده تحفظي عليهم
لانها حاجة تلخبط والحقيقة مش عملية
والدليل اهو ان بقالهم تمانين سنة، ولهم شعبية كبيرة، وفعلا غلابة، لا بتوع عنف ولا وجع دماغ، ومنظمين جدا، وبيربوا كوادرهم بالقلم والمسطرة، ويدوهم واجب يقروا كتب بالهبل، ولازم يقراهم، وما تلاقيش فيهم عيل هايف وللا جاهل

ومع ذلك مش عارفين يحققوا اي حاجة عملية على ارض الواقع

مش عشان هم مأسسين جماعتهم على اساس ديني

ما تهربش من الحقيقة يا مواطن احنا مجتمع ديني
وانت دافعت عن البابا مع انه سلطة دينية وبتتدخل في الانتخابات

بس عشان متمسكين بحاجات هي مجرد افكار واجتهادات ومحتاجة انها تطور

الرأسمالية اثبتت فشلها
والليبرالية اثبتت قسوتها ولا انسانيتها ولا اخلاقيتها
والبرجماتية اثبتت انها مش عملية ولا تخدم مصالح الضعيف

ومع ذلك مصممين يتمسكوا بيهم

ياللا

ما تخلنيش اتكلم كتير في انتقادهم انا اخدت عهد على نفسي اني ما انتقدهمش واساندهم ولو بالكلمة لحد ما ياخدوا حقهم

لانهم فعلا مظلومين يا مواطن، مظلومين بشدة وبيتعاقبوا على ولا حاجة، بيتعاقبوا على وجودهم في الدنيا، وبيتقدموا لمحاكمات عسكرية من غير اي جريمة يستاهلوا يتقدموا بسببها لمحكمة مدنية وللا حتى يروحوا القسم

حرام حرام حرام

الظلم حرام

وبيخنقني

ولو كنت برجماتية ما كنتش قلت الكلام ده
:)

هتشوفوا said...

زعلانة, لأ حنينة والله, معنى كده انك مستنية منه انه يتغير, نوارة فيه ناس كتير كانوا معارضين للسادات وتغيروا, ومفيش حد منهم ناوي يتغير تاني

Anonymous said...

البوست ده رااااااااائع بل أكثر من رائع ، فش عارفة إنت فاكراني و لا لأ بس أنا إختلفت معك في بوست كنت كاتبة فيه
عن الملك حسين و قلتلك يومها إني حاقول رأيي في أي بوست ليكي بمنتهى الصراحة بس بجد إنت هايلة و أنا أتمنى لك التوفيق ، و على فكرة إحنا هنا في الأردن عندنا مسيحيين كتير بس عمره ما كان في بيننا و بينهم أي مشاكل تذكر حتى على الحكم دحنا علاقتنا مع بعضنا"مسلمين و مسيحيين" هايلة حتى إن العراقيين المسيحيين اللي جم هنا بعد الحرب بيقولوا إنهم مستغربين من الإنسجام الرهيب بين فئات الشعب. إن شاء الله نبقى كده على طول.. أهنيكي مرة تانية و بدعي للشعب المصري ربنا يفرجها عليه

LMUUM said...

أنا بجد بهينيكي على الأسلوب الرهيب اللي حضرتك بتكتبي بيه ، أنا مش عارفة إذا كنت فاكراني و لا لأ ، بس سبق و قلت إني هقول رأيي في كتاباتك بكل صراحة.. عن العلاقة بين المسلمين و المسيحيين ، إحنا هنا في الأردن ما عندناش الحاجات دي خاااالص ، متفتهمين و متحابين و زي السمن على العسل زي ما بتقولوا في مصر ... يبقى إني أدعي لكل الشعب المصري بالراحة و الطمأنينة و الحياة الكريمة التي يستحقها فالشعب ده شاف سنين سودة ما يعلم بيها إلا ربنا و الله المعين.

Unknown said...

شعار الحزب الوطنى فى الإنتخابات
من أجلك أنت
---------
مواطن مصرى جميل اوووى
و ارائه بتبهرنى بشده

هو مش عارف اساساً ان البابا شنودة يعتبر زعامة سياسية اكثر من دينية للأقباط يعنى ليه تأثير عليهم سياسياً على اعتبار ان نسبة كبيرة من الأقباط منعزلين عن السياسة و يحتمون بالبابا
--
خلاص بيجهزوا المحروس
بلد بنت تييييييييييييييييييت

Unknown said...

ايوة

ده انا نسيت اكتب الاردن

ده الاردن العلاقة بين المسلمين والمسيحيين نموذجية

تدرس في المدارس يعني

والله احنا كنا كده

منه لله اللي كان السبب

Kalimalhus said...

سبحان الله !! .. يعنى الواحد ينام بيتكلم فى حاجة يصحى يلاقيها فى وشه .. فرحان فيكى و مش قادر أخبى شماتى .. عشان تبطلى السنتمنتالية المهترئة اللى هريتينا بيها..

إستنى هأقعد أضحك شوية و بعدين أرجع أكتب تعليق تانى .. ههههههههههههه

Kalimalhus said...

بالنسبة لقداسة البابا و مع كل الإحترام .. هوه عنده قناعة إن حماية الأقباط مرتبطة بإستمرارية النظام الحالى .. ده الإحتمال الأول ..

لكن الأرجح إنه إتعلم الدرس سنة 81 و عرف إن بقاؤه فى كرسى البابوية مرهون بإنه يكون فى حضن النظام و لا يظهر أى مخالفة ليه..

ليه بقى يقول اللى بيقوله ده فغالبا طلب منه أو أوعز إليه أو أمر بقول هذا الكلام .. و دى واحدة من بالونات الإختبار بتاعة جماعة الإبن اللى بصفتهم رجال أعمال متعودين يجسوا السوق قبل ما يخشوا عالجد..

Unknown said...

اه طبعا هو خايف

بس هو ما بقاش صغير ولو حصل له حاجة لا قدر الله مش ح تعدي بالساهل

ومبارك ما عندوش الجرأة انه يعمل فيه زي ما السادات عمل فيه خصوصا ان السادات اتشيع بعدها على طول

الاقباط مصلحتهم مع النظام الحالي

همممممممم

على فكرة، فيه مسيحيين كتير فاكرين كده

انا مش عارفة الهلوسات دي جات لهم منين؟

يمكن من تجربة الصعيد برضه

بس هم مش واخدين بالهم ان اللي حصل لهم في الصعيد كله من تحت راس النظام ده؟

وان النظام بيتعمد يسلط عليهم مشايخ السلفيين يثيروا الناس ضدهم عشان يفضل عندهم احساس ان كل الناس عدوينهم كل الناس بيكرهوهم نافع هو اللي حبيبهم نافع هو اللي خطيبهم

مش معقولة يعني مش واخدين بالهم

ده كل الناس واخدة بالها

هييييه الخوف وحش برضه


ماعرفش ازاي عوكل عرف يبث الخوف في نفوس كل الناس من كل الاطياف والطبقات والاديان كده

عبقري والله
والله عبقري

طيب تفتكر يعني مهما كان رد الفعل للبالون مش ح ينزلوا البضاعة في السوق؟

ح تنزل ورجلنا فوق رقبتنا

وبعدين يوم ما يحب يجرب السوق يقوم ينقي اضعف منادي؟ هو ناقص يقوم عليه الناس كمان وكمان؟

وللا هو متخيل ان الناس بتحبه؟
طب واحنا نحب واحد بيكرهنا ليه؟ مرضى؟

Kalimalhus said...

لأ جس السوق مش عشان يشوفوا هينزلوا البضاعة و ألا لأ .. ده عشان يحطوا الخطة التسويقية .. البضاعة نازلة نازلة..

المسيحيين فى مصر عندهم حق يخافوا .. لأن بصراحة كده مش مهم مين بدأ الملعوب و مين زاقق مين .. المهم النتيجة و إنتى شايفاها بعينك .. معدل الكراهية للمختلف دينيا و حتى مذهبيا بقى عالى بشكل يجيب إحباط .. و عشان كده أى حد هيقول إن الناس دى لو إتساب لها حرية إختيار من يحكمها مش هيجيبوا الإخوان حتى .. الإخوان شعبيتهم قلت فى البلد و أحد أسباب ده هو تنامى التعاطف الشعبى مع السلفيين اللى بيقولوا على الإخوان علمانيين ..

هى عاملة زى الدومينو لما تقفل .. عشان تقنعى المسيحيين إن جيمى مش الرهان المناسب لازم تضمنى ليهم إن البديل مش هيكون حاجة تشبه طالبان ..

لكن فيه بديل أوضح .. لازم الناس مسلمين و مسيحيين يعرفوا إن توريث جيمى نتيجته هى إستمرار سياساته اللى بتضغط بشكل مستمر على الطبقات الدنيا و الطبقات دى أصلا بطنهم فى ضهرهم و ضهرهم للحيط و النتيجة الطبيعية هى تزايد معدل الجريمة لغلية ماتتحول إلى حالة فوضى أمنية كاملة .. و ساعتها الكل مضار لكن المسيحيين هيضاروا أكبر لأن فى حالات الإضطراب و فوضى العنف الأقليات هى الهدف الأسهل و الأكثر إغراءا..

فى إعتقادى الرهان على جيمى و الفوضى الحتمية أسوأ الف مرة من إنهم يجربوا حظهم مع اللى بيساندوا خيار الدولة المدنية من المسلمين و مع الإخوان لأنهم أحسن من غيرهم..

رامز عباس said...

ومين قال ان مينا شمتان فيكي هو مشردلك عالفيس بوك بس



تحياتي



بصراحة قداسة البابا والامام الاكبر زدووها شويتين يمكن بسبب انهم فاكرين ان الدين سلطان

علينا يبقي سمعا وطاعه

مؤسف جدا لكن السؤال الان من سيكون رئيسا وكيف ستمر مسأله وصوله للحكم وهل سيوقف الرئيس القادم ثورة الجياع القادمة

رامز عباس said...

انا عاوز رئيس بيفهم ويراعي حقوق 10 مليون معاق علشان نعمل العمليات ونسمع شويه وكمان نشارك في التنمية


وزملائنا المعاقين حركيا يلاقوا شوارع ممهدة ووسائل موصلات تراعي ظروفهم

أما عن زملائي المكفوفين فلا بد من تحديث طرق تعليم بطريقه برايل لام معهد الزيتون للمكفوفين اصابه الفساد



وكمان نفسي برئيس يعيد انشاء مساكن لاهالي الدويقة واسطبل عنتر وكافه المناطق العشوائيات



نفسي البنت تنزل الشارع ومتحش انها اقل من الولد وتحس بقيمتها الفكريه والعقلية



ولا ايه دى جزء من احلام طويله عريضه فما سنتبه لها

Kalimalhus said...

لأ جس السوق مش عشان يشوفوا هينزلوا البضاعة و ألا لأ .. ده عشان يحطوا الخطة التسويقية .. البضاعة نازلة نازلة..

المسيحيين فى مصر عندهم حق يخافوا .. لأن بصراحة كده مش مهم مين بدأ الملعوب و مين زاقق مين .. المهم النتيجة و إنتى شايفاها بعينك .. معدل الكراهية للمختلف دينيا و حتى مذهبيا بقى عالى بشكل يجيب إحباط .. و عشان كده أى حد هيقول إن الناس دى لو إتساب لها حرية إختيار من يحكمها مش هيجيبوا الإخوان حتى .. الإخوان شعبيتهم قلت فى البلد و أحد أسباب ده هو تنامى التعاطف الشعبى مع السلفيين اللى بيقولوا على الإخوان علمانيين ..

هى عاملة زى الدومينو لما تقفل .. عشان تقنعى المسيحيين إن جيمى مش الرهان المناسب لازم تضمنى ليهم إن البديل مش هيكون حاجة تشبه طالبان ..

لكن فيه بديل أوضح .. لازم الناس مسلمين و مسيحيين يعرفوا إن توريث جيمى نتيجته هى إستمرار سياساته اللى بتضغط بشكل مستمر على الطبقات الدنيا و الطبقات دى أصلا بطنهم فى ضهرهم و ضهرهم للحيط و النتيجة الطبيعية هى تزايد معدل الجريمة لغلية ماتتحول إلى حالة فوضى أمنية كاملة .. و ساعتها الكل مضار لكن المسيحيين هيضاروا أكبر لأن فى حالات الإضطراب و فوضى العنف الأقليات هى الهدف الأسهل و الأكثر إغراءا..

فى إعتقادى الرهان على جيمى و الفوضى الحتمية أسوأ الف مرة من إنهم يجربوا حظهم مع اللى بيساندوا خيار الدولة المدنية من المسلمين و مع الإخوان لأنهم أحسن من غيرهم..

Unknown said...

مهندس حر

بص
هو لو جيمي جه ح يقعد خمس سنين وبعدين الناس ح تنزل تموت بعضها في الشارع من الجوع

ده واد ما بيفهمش

مش حكاية شرير بس

ما بيفهمشششششش يعني ابوه شرير، بس تقيل، لكن ده شرير بغشومية

العرق الانجليزي ضرب مع المنوفي وخرج توليفة بنت وسخة


رامز

هههههههههههه

بس هو شمتان

انا عرفاه، شراني
:)

الامام الاكبر مالوش وزي يا رامز

ده اضحوكة والناس بتعرف هو بيقول ايه عشان يعملوا عكسه

لكن البابا شنودة له وزن وكلامه يؤخذ على محمل الجد لانه بيلاقي صدى عند المسيحيين

Kontiki said...

" يعرف ايه عننا جمال مبارك ده؟
عمره ركب ميكروباص؟ عمره ركب مترو مصر الجديدة وللا مترو الانفاس حتى... انا لا اتكلمت عن اللي بيروحوا يملوا مية من اخر الدنيا، ولا اللي
"
الله يا نوارة بجد قبل ما اكتئب وابطل اكتب كان فى موضوع عملتة انى عاوزة اللى يحكمنى يبقى مصرى بجد واخد شهادة من جامعه حكومية زينا بيكافح طول الشهر عشان يحط قرشين فى بنك عارف يعنى اية غلب وشغل و كفاح مش كل حاجة على الجاهز رئيس مصر لازم يبقى مصرى راجل او ست مكافح يعرف مين هو المصرى و محتاج اية وبلدة كبيرة قد اية وهو قد المسئولية او لا ونرجع للقاعدة اللى حطها محمد على باشا زمان مفيش والى يقعد اكتر من 4 سنين عشان الفساد والرئيس الجاى برضة اربع سنين و نختار غيرة وهكذا التغير المستمر تغيير السياسات على اساس واضح على اساس مصلحة مصر
والله العظيم تلاتة مش عاوزة رئيس يعملى البحر طحينة ومصر والدور الدولى والله العظيم عاوزة رئيس بس يهتم بالانسان المصرى صحة و شغل و تعليم ومسنين واسكان مش عاوزة رئيس بيركب عربية لو قعدت اشتغل 80 سنة معرفش اجيبها
عاوزة بنى ادم مصرى شريف نزية بجد
؟موجود دة
استاذ جامعه
قاضى
دكتور
محامى
شاعر
بيانست
مدون
صحفى
رجل اعمال
اى حد شريف و نزيه وبيحب البلد دى وعاوز يعمل حاجة للناس
تعبنا و الله من الفساد و البطالة و التعليم البايظ الجامعه الهلس التدين الظاهرى والاخوان
تفتكرى موجود ! ؟

Unknown said...

هههههههههه
شاعر وبيانيست وصحفي ده ايه؟

وكمان مدون؟

طب ده لو عامل يسد عنهم

المسئولية السياسية محتاجة طريقة تصرف وتفكير مختلفة عن الشاعر والبيانيست والصحفي

ثم الشاعر والبيانيست ح يزهقوا من الناس ويبقوا عايزين يقعدوا لوحدهم


قاضي طبعا
ياريت يبقى قاضي شريف

محامي برضه ممكن


بس دكتور لا ولا استاذ جامعة

لان السياسة مش شغلتهم

القاضي والمحامي دارسين قانون محلي ودولي والسياسة دراستهم

Kalimalhus said...

هوه إعلان عن وظيفة ..؟

همه خلاص لعبوا فى دماغ كل المصريين و خلوهم يفتكروا إن الحكم ده مهنه و وظيفة ..

أى بنى آدم ممكن يوصل للحكم فى بلد ديموقراطى و مؤهلاته هى أمر يبقى يناقشه الناس و يقبلوها أو ما يقبلوهاش..

Unknown said...

ههههههه اه وظيفة

والطبيب بشار الاسد رئيس جمهورية
ايه بقى؟

لا السياسة مش فتة

اصلها عايزة بيانيست

قرد يسليني ولا غزال شارد

احساس لسه حى said...

اللى اعرفوا ان راى البابا ملزم للمسيحين وقليل منهم اللى مش هينفذه

وبدل قال كده يبقا عليه العوض

بصراجة انا شايف ان لازم المسيحين يتحركوا ولازم نلاقى تنديد من بعض الاقباط

معقول البابا شنودة مش شايف الا جمال مبارك يمسك الحكم

دى خبرة السنين والاحساس بهموم الشعب المصرى والقبطى

طيب عاوز بقه اسمع حد يقولى فيه اضطهاد حكومى للمسيحين

هقوله روح كلم البابا متكلمنيش انا

بيعجبنى ردك على مواطن اوى من اول المقارنة ببهيج الى



لو فيه انتخابات حرة الصوت الوحيد اللي الاخوان ح تخسره هو صوتك

تحياتى
سلام

شمعى أسعد said...

لكن الارثودوكس ده امر بابوي ما ينفعش يخالفوه
-----
مين قال الكلام ده؟
الكلام ده صح فقط فى الامور العقائدية والطقسية

لكن فى السياسة او حتى اى حاجة تانى طبعا لا

وانا اهو مسيحى ارثوذكسى عادى جدا
لا انا من المعارضين للبابا ولا
ولا من الخارجين عن الكنيسة عموما
ومع ذلك لم يمثل كلام البابا فى السياسة سوى وجهة نظر غير ملزمة

مش هقول انها وجهة نظر شخصية لان البابا اذكى من انه ميكونش واخد باله من انه البابا
يعنى رأيه مش محسوب عليه هو بس

لكن ادخلى جوه المجتمع الكنسى وشوفى الصورة من جوه

متحكميش سلفا ان طالما البابا قال كده يبقى انتهت خلاص والمسيحيين كلهم هايخدوا اول قطر ويروحوا ينتخبوا جمال
الحكاية مش بالسذاجة دى
والا هيبقى عندنا نوع جديد من الانتخابات اسمه الانتخاب بالكتلة

ولعلمك الكنيسة بقالها عشرين سنة او اكتر بتحاول تقنع الاقباط يعملوا بطايق انتخابات
ومع ذلك ودن من طين وودن من عجين
يعنى اذن هم بيعرفوا يفرقوا كويس بين
كلام الكنيسة فى الدين وكلامها فى السياسة

وعموما
تعالى ارتبلك الموضوع من جوه الكنيسة بصورة اوضح

مبدأيا المسيحيين كلهم مش مصنفين سياسيا كحزب وطنى
لان فيهم ناس كتير منتميين لاحزاب كتير
ومنهم ناس متدينين جدا وخدام فى الكنيسة
تفتكرى دول وقت الانتخابات
يمشوا مع اتجاه حزبهم ولا مع رأى البابا

غير ان الغالبية العظمى اصلا معندهاش بطاقة انتخاب زى ما قلتلك
فين بقى امر البابا الملزم هنا

هايفضل فى النهاية نسبة معينة هاتسمع كلام البابا وترشح جمال
كويس
بس هل دول رشحوا جمال عشان البابا قال كده
ولا عشان هم من الاول واقعين تحت تأثير اعلام موجه
حطهم قدام اختيارين
جمال او الاخوان

ايه ذنب البابا فى دى
ومتنسيش ان مسلمين كتير بيفكروا كده برده
ان مكنش جمال يبقى الاخوان
مش المنظومة كلها بتلعب فى دماغ الناس فى السكة دى؟
ومفيش فعلا ع الساحة حد ظاهر يقول انا اهو
حتى انتخابات 2005
كلنا عارفين انهم كانوا اتنين مش عشرة
مبارك قصاد تسعة
لان التسعة مجرد منظر فتقدرى تقولى عليهم واحد وخلاص
نقطة اخيرة
انتى عارفة ان فى ايام مفترجة زى ايام الانتخابات الحكومة والقطاع العام بيشحن الموظفين والعمال فى اتوبيسات على مقر الانتخابات اجبارى عشان يختاروا الشخص المطلوب
تفتكرى المسيحيين اللى فى الاتوبيسات دى رايحين لان البابا قالهم روحوا انتخبوا فلان
ولا هم كده كده رايحين ينتخبوا فلان اجبارى

سامي said...

فاكرة الدكتور محمد عباس ؟

يا ريت تقرى المقال دا


http://www.mohamadabbas.net/Ma2al/Atahem.htm

منظور شامل للحياة السعيده said...

بعد مالكل شكروك

انا هدعيلك يفضل قلمك دايما سلس كدا و افكارك سلسه

و انتا يا مواطن روح ربنا يديلك على قد نيتك و يهديك للخير

قادر يا كريم

منظور شامل للحياة السعيده said...

بعد مالكل شكروك

انا هدعيلك يفضل قلمك دايما سلس كدا و افكارك سلسه

و انتا يا مواطن روح ربنا يديلك على قد نيتك و يهديك للخير

قادر يا كريم

Unknown said...

زقزوق

بالنسبة للمعلومات الواردة فانا جبتها من ظباط امن كانوا بيشتغلوا في الصعيد

ومن صعايدة كانوا حاضرين وراح لهم عيال من الطرفين

بالنسبة لتعليقك الحقيقة انا ما لقتش فيه اي معلومات

انا لقيت شتيمة في النصارى النصارى النصارى

وانا مش بانزل التعليقات دي

عندك معلومات تانية مخالفة للوارد في البوست ياريت ترويهولنا وانا احب اسمع كل وجهات النظر

بخصوص ليه المسيحيين كانوا بينضربوا وبيتحرقوا

حاجة تانية غير انك بتكرههم وغير المعلومات اللي جات لي من الصعيد

من غير شتيمة ومن غير ما تسب الناس وتخوض في اعراضهم

احسن اسلط عليك واحدة ست تطخك ههههههههه
سلو بلدكوا وتتحاكم بيه

Unknown said...

شمعي

ههههه
يا راااجل
يعني كلام البابا ده مش ملزم لحد خالص؟ والحياة وردي والدنيا ديمقراطية كده؟ مش عشان البابا قال يبقى ح ينتخبوه؟

طيب


زقزوق

انت ايه اللنك العجيب اللي انت جايبهولي ده؟

اه فاكرة محمد عباس

راجل مجنون وخلل وما عندوش سلك موصل ع التاني
بس هو من امتى بقى طائفي؟


dr online
الله يجبر بخاطرك

Unknown said...

مش معقول

يا جماعة انا بادعوكوا لقراءة اللنك اللولبي اللي اداهوني زقزوق على اساس يقنعني ان المسيحيين يستاهلوا الحرق

تحذير: يحذر قراءة المقال على مرضى القلب والسكر والبنكرياس والبواسير

الاثار الجانبية: ممكن يجيب سرطان الرحم للرجالة والبروستاتا للستات

سامي said...

نوارة هههههههههه ماهو الحلو ميكملش كل كتاباتك ومواقفك بتعجبنى الا موضوع النصارى دا وعلى فكرة القرأن اللى سماهم نصارى مش انا واضح ان الزمن وقف عندك بالنسبة للنصارى _ اقصد المسيحيين عشان متزعليش وقف عند عهد البابا كيرلس الله يرحمه ومعندكيش اى فكرة عن الجماعة اللى اختطفت الكنسية وبتعمل بدأب من عشرات السنين على وليعها نااااااااار وطردنا احنا الغزاة المسلمين الوحشين المحتلين لارضهم دا بيتقال علنى دلوقتى من روؤس كبيرة فى الكنيسة علنىىىى سمعانى علنىىىىى مش حزود اكتر من كدا عشان التعليق
ينشر ههههههههه

Unknown said...

يعني حادثة الكشح اتعملت عشان بيقولوا احنا ح نطرد الغزاة؟

ههههههههههههههه

ماشي

واحد داخل يقول لي البابا مالوش تأثير وواحد بيقول لي النصارى ح يطردوا الغزاة

ح يطردوا سبعين مليون؟

سامي said...

ما يطردوا لو قدروا

هههههه


د ى مشكلتهم مش مشكلتنا

بس احب اقلك انه لو استمر الحال على ماهو عليه ( الحال اللى بيتكلم عنه اللينك اللولبى اياه) فساعة الحسم قربت قوى والتقسيم جاى جاااااااااااااااااى وحيبقى فيه دولتين فى مصر

تلاقيكى ميتة من الضحك دلوقتى

بس الايام بينما على رأى شكوكو

Unknown said...

ايه اللي في المقال؟

ايه يا زقزوق؟
فيه ايه غير واحد مشهور بهلاوسه السمعية والبصرية

يعني ما لقتش اجن من الراجل ده تجيبهولي؟

سامي said...

لا مفهوش حاجة المقال وكله هلاوس سمعية وبصرية زى ما قلتى


بس تصدقى انه اتكلم عنك فى مقال واثنى عليكى انا فاكر دا كويس جدا لكن مش فاكر هو قال ايه بالظبط وليه اثنى عليكى

مش فاكر

Unknown said...

ايوة عارفة
تقريبا ايام التحرش الجنسي

بس ده ايه علاقته بان عنده هلاوس سمعية وبصرية؟

يا راجل اقرا المقال
ده كلام واحد عاقل؟

سامي said...

بس ده ايه علاقته بان عنده هلاوس سمعية وبصرية؟

ههههههههههههههههههه


حموت من الضحك

انا مقصدتش طبعا الربط بين ثناؤه عليكى وكونه عنه هلاوس سمعية وبصرية

عموما دا كاتبى المفضل وشايف انه اعقل كاتب فى مصر

تصبحى على خير بجه

soreal said...

I just read the link posted by zaqzok.. and i just want to share some thoughts:
firstly;
what has been said about blackwater (or xe after the rebranding) is absolutely true...

althought; it is hard to see why and how this fits into the discussion about Egyptian Christians... the neo crusaders of blackwater did not differentiate between iraqies or seek the assistance of the iraqi christian who actually were targeted too by them for not being the "right" type of christains..

secondly:

i remind you and my self that in the near past, there were no boarders in the middle east, and that the only reason we have been devided to 22 country, with boarders - that we love, so much idolize, and are ready to kill and die for these days - was strictly admistrativly triggered for the interest of the then colonizing powers of that specific era..

blackwater and the ppl behind blackwater (ideologically ) have no regard to your national sentiments, sacrad boarders, or religious or ideological aspiration..

to these ppl, your boarders are nothing.... and to them its time to redraw these boarders based on the ethnic and religious divisions in the region..

at this point , we see the importance of the Egyptian Christians in egypt for these ppl... they are one of the the seeds for any attempt to devide Egypt in the future

if you say this will never happen, i invite u to look at what is happening in iraq...

a region devided on religion or ethnicity, is a region where israel can exist naturally, and without objections..

every one, Christians, Muslims whatever, have a responsibility to be aware of this so they dont become a tool in translating that plan to reality

unity is very important today... much much more than before

عبد الزهراء المصري (علي الحسيني) said...

بداية أنا ضد التعددية الحزبية بدون اي قيمة تذكر منها وعلشان كده أنا عندي سؤال بسيط وتقليدي أوي بما أن أحنا عندنا 24 حزب سياسي - مفترض أنهم يكونوا معارضة - إلى جانب المعارض الأكبر وهم الأخوان المسلمين فلماذا لأ تختار تلك الأحزاب كلها وعلى قلب رجل واحد مرشح واحد والكل يدعمه سواء كان المرشح إخوان أو ليبرالي أو ناصري أو وفدي .... إلخ ؟؟؟
===============
أما بالنسبة لكلام الانبأ شنودة فهو حر في رأيه وكمان الأخوه المسيحيين أحرار واللي عايز يسمع كلأمه ينفذه واللي مش عاجبه خلاص يشوف المرشح اللي عاجبه ويختاره وإن كنت أعتقد أنهم مش هيسمعوا كلامه مش لأنه زعيم ديني فقط لكن كمان علشان النظام الحالي بيخاف من أمريكا وهم شايفين إن مصلحتهم بقاء آل مبارك في الحكم لإعتقاد سيئ إن أمريكا تسعى لمصالحهم على الرغم الكل طالع عين اللي خلفوه من النظام الملعون ده ، زيهم زي السنه في إيران كده بالضبط فاكرين إن شيعة إيران عايشين في الجنة والنعيم على الرغم إن الشعب سنه وشيعة ومسيحين ويهود وزرداشت مضطهدين ومظلومين إلا أتباع النظام الإستبدادي من كل فرقة فقط هم المكرمين والمعززين .
======================
ماهو قادم سيكون اسوأ من حسني مبارك نفسه فجمال بيفكرني بهتلر بالضبط لأنه هيعمل لنا محرقة زي محرقة اليهود .


عبد الزهراء

محمود سلامة said...

سألوا الدكتور شديد عن رأيه في التوريث
فقال
وماله يا خويا ما يضرش , التوريث حلو برضه, واللي نعرفه أحسن من اللي نعرفه , واهو يبقى زيتنا في الردة ونعمل كده رغيفين سن صيامي علشان البابا عنده السكر

بلد غلبانة أوي يا نوارة
غلبانة أوي

Unknown said...

soreal

انا ما عنديش اي اعتراض على فكرة الاطماع الاستعمارية وانهم بيزرعوا الفتن عشان يقسموا المنطقة

انا عايزة اعرف ايه علاقة ده باستثارة الناس عشان يحرقوا ناس بتصلي؟ وايه علاقة ده بان المشاكل بين المسلمين والمسيحيين بدأت في الصعيد بتلاعب من الامن؟

اذا كان، يبقى الامن بقى هو اللي متعاون مع امريكا عشان يقسمنا

يعني امريكا عايزة تقسمنا

نقوم نعمل ايه؟ نحرق المسيحيين

طيب امريكا قسمت العراق، وطردت المسيحيين العراقيين من بلدهم

هل المسيحيين مسئولين عن ده؟ وهل كان المفروض العراقيين من الاصل يقتلوا كل المسيحيين قوم امريكا لما تيجي ما تلاقيش حد ترحله؟

وبعدين تفتكري الاتجاه بتاع زقزوق في الكلام ده ما يعملش فتن؟ مش ضد الوحدة اللي انت بتقولي عليها؟ لما يقعد يشتم في الناس من غير ما يعملوا له حاجة ويقول لي الكلام اللي بتقوليه ده مش صحيح
طيب يا عم قول لي الكلام الصحيح
يروح شاتم وجايب لي الراجل اللي بيكتب كأنه جات له نوبة مش كأنه بيتكلم عن مخطط امريكا في التقسم ومحاباة الحكومة "للنصارى" ايه دخل النصارى وفين هي محاباة الحكومة ومال ده كله بمخطط امريكا؟

امريكا لو ح تنجح في مخطط هي عاملاه يبقى بسببنا

ماهي يا اما ح تضرب مصر ولو ما عرفناش ندافع عن بلدنا يبقى غلطتنا

يا اما ح تسلط عملاء يعملوا حرب اهلية

طيب الحرب الاهلية، مهما الاحتلال خطط لها، عمرها ما بتحصل الا يكون فيه غلط في الناس نفسهم

هي بتعمل ايه غير بتسخننا على بعض

طب واحنا نسخن ليه يعني؟

وبعدين انا مش شايفة من العدالة ابدا المساواة ما بين مسئولية ناس نسبتهم تسعين في المية وناس نسبتهم عشرة في المية

طبيعي العشرة في المية ح يبقوا حاسين انهم خايفين ومهددين الا اذا حاسين ان فيه قانون بيحميهم وفيه محيط بيأمنهم

والكلام عن مخطط امريكي لتقسيم مصر يخليني اشك في الناس اللي مفروض انهم مسلمين وبيحرضوا على المسيحيين وبيروحوا يحرقوهم انهم هم اللي عملاء لامريكا وهم اللي بيشتغلوا لمصلحتها

مش العكس


عبد الزهراء
مين قال لك ان المسيحيين فاكرين ان امريكا بتعمل لمصلحتهم؟
والله حاجة غريبة

يعني الفريدم هاوس على سبيل المثال ادا قائمة للحكومة المصرية بالناس اللي بتشتغل معاه

فضحهم يعني

القائمة معظمها مسلمين

وفيها اتنين وللا تلاتة مسيحيين، واحد بقى بدون ذكر اسماء يقول لي: شفتي اسم فلانة وفلان؟ شفتي بقى المسيحيين بيشتغلوا مع امريكا

يعني كل المسلمين اللي كانوا في القائمة دول ما اخدش باله منهم وما شافش غير الاتنين المسيحيين الوحيدين اللي في القائمة

السنة في ايران... الشيعة في العراق

اذا كانوا الاتنين دول اشتغلوا مع امريكا احنا مالناش دعوة ما تآخذنيش

احنا ناس بنجري على لقمة عيشنا


محمود سلامة

يارب ياخويا يارب

Gihan Soliman said...

انا شايفة ان الموضوع ده خطير جدا ..لو ان الشعب اختار جمال مبارك بارادته يبقى مش توريث ..يبقى اختيار الشعب و اسأل شعب سوريا عن بشار الاسد و حبهم ليه ..لكن الديل مش نضيفة خالص .. البابا شنودة مش من حقه يدلي بتصريحات سياسية بالمنظر ده و هو لا يعبر سياسيا عن الشعب القبطي .. البابا شنودة ليس رئيس دولة الاقباط بل هو رئيس ديني للاقباط ..دخوله في السياسة بهذا المنظر يسقط عنه هالة القداسة و التقديس .. احنا مش هانخلص من الاخوان تطلعلنا الكنيسة و معروف ان اي حكم ديني مدني هو الخراب بعينه سواء كان و العصور الوسطى تشهد و دماء الخلفاء الراشدين

عبد الزهراء المصري (علي الحسيني) said...

عبد الزهراء
مين قال لك ان المسيحيين فاكرين ان امريكا بتعمل لمصلحتهم؟
والله حاجة غريبة يعني الفريدم هاوس على سبيل المثال ادا قائمة للحكومة المصرية بالناس اللي بتشتغل معاه فضحهم يعني القائمة معظمها مسلمين وفيها اتنين وللا تلاتة مسيحيين، واحد بقى بدون ذكر اسماء يقول لي: شفتي اسم فلانة وفلان؟ شفتي بقى المسيحيين بيشتغلوا مع امريكا يعني كل المسلمين اللي كانوا في القائمة دول ما اخدش باله منهم وما شافش غير الاتنين المسيحيين الوحيدين اللي في القائمة
السنة في ايران... الشيعة في العراق
اذا كانوا الاتنين دول اشتغلوا مع امريكا احنا مالناش دعوة ما تآخذنيش
احنا ناس بنجري على لقمة عيشنا
===========================

بداية أنا مش بقصد كل المسيحين في مصر لأن كثير من أصدقائي مسيحين ومش بيحبوا أمريكا بس ياأستاذة نوارة شكل حضرتك نسيتي إضراب ليلة رأس السنة القبطية الموافق 11 سبتمبر واللي كان بدعوة من أقباط مصر في المهجر بل وبعض الناس اللي أعرفهم من أقباط الداخل .
وبرضه مش بقول إن المسلمين ملايكة ولأ حتى بقول إن أمريكا شيطان لأني مثلاً شايف إن تدخل أمريكا وتحرير العراق من اللعين صدام كان شيئ جيد ومضمون كلامي والقصد منه أن الاخوه المسحين في مصر صوتهم أكثر قوة ونفوذ في الكونجرس الأمريكي وبيضغطوا على النظام المصري بأمريكا والمعونة الأمريكية وهذا يجعل نظام آل مبارك هم الأفضل من حيث كونه نظام ديكتاتوري بيخاف من أمريكا وإستقراره = إستقرار القدرة على طلب المزيد والمزيد .

Kontiki said...

صباح الخير
:Dيا بنتى متخشيش فيا شمال
الشاعر و البيانست اللى مش عاجبينك ممكن يكون ليهم وجهه نظر و خطة عمل للنهوض بالبلد وبعدين مفيش رئيس مسئول لوحدة كدة مش فى وزراء ومستشارين مش لية عينين ولامس واقع الناس ومعانتهم يبقى ببساطة ممكن يشتغل ويعمل لمصلحتهم واعتقد مدة 4 سنين كافية جدا للحكم على مدى صلاحية سياسة الرئيس مش كل شخص افترضنا ان وظيفتة او مؤهلة كافية لرسم ملامح شخصيتة و الا مكنش الطبيب البشرى بقى كاتب ومكنش الشاعر لية وجهه نظر سياسية
انا رايى ان الانسان المصرى ان اكتملت فية شروط الترشيح لمنصب الرئيس و وجد فى نفسة القدرة و الارادة لخدمة الناس والنهوض ببلدة ويعمل فرق من حقة يرشح نفسة مسلم مسيحى متفرقش المهم يخدم الناس صحة و تعليم وشغل واسكان هو دة المهم

tamer.sala7 said...

@Kontiki


الاخت Kontiki

لو سمحتي يعني بلاش موضوع فنان ده بدل ما فاروق حسني يشم خبر هو او زاهي حواس ويجي يقولك بناء علي طلب الجمهور وتبقي مصيبة سودا لأن الراجل ده واخد علي اللزقة في الكرسي

Unknown said...

هههههههههههههههه

يابنتي مش بادخل فيك شمال

بس اهو تامر قال لك

فاروق حسني يشم خبر تبقى وقعة