Saturday 17 October 2009

يااااااااااااااا رببببب حماس والناخبين الفلسطينيين تقاطع الانتخابات

ياااااااااااااااااااااااا رب، وتبتدي تحضر نفسها من دلوقت، بدل ما تعمل حملة انتخابية عشان الناس تنتخبها، تحمل حملة لا انتخابية لمقاطعة الانتخابات، هي والفصائل التانية، بلا انتخابات بلا تهريج، هو فيه دولة عشان يبقى فيه انتخابات؟
ثم مين المنافس بتاعهم؟ ناس بتحرض اسرائيل عليهم؟
والله العظيم تبقى ضربة قوية جدا جدا جدا، قاااااااااااصمة لعباس وشلته لو الفلسطينيين قاطعوا الانتخابات مع حماس، وده ح يبقى اعادة انتخاب لحماس تاني ويديها شرعية اكبر ويسحب الشرعية من عبس وديوله
اهي حماس لما اترشحت اتلامت على الترشيح واتلامت على انها نجحت، واتعاقبت على النجاح ده
طيب بقى ما تترشحش، وماحدش يحضر الانتخابات ولا يصوت فيها، اظن الفلسطينيين انبه بكتير من انهم يصدقوا لعبة الانتخابات دي
يارب يعملوا كده ويارب الفلسطينيين يقاطعوا الانتخابات
ياااااااااااااااااااااااا ررررررررررررررررررب
آمين
اصل حلو الملامح ابو السباع ما عجبوش ان حماس لها تحفظات على ورقة المصالحة، عايزين يمضوهم غميضي كده كأنهم ماسكين عليهم كمبيالات وقال: كده؟ طب انا بقى ح احدد معاد للانتخابات ومش ح اجلها
يعني حتى مش مستني ياخد ويدي معاهم في الكلام... اصله ما بيتحاورش مع القتلة ننوس عين امه

69 comments:

عبد الزهراء المصري (علي الحسيني) said...

لأ طبعاً ماينفعش يقاطعوا الإنتخابات الي جاية أبداً لأنهم لو دخلوا الإنتخابات أكيد هيكسبوها إن شاء الله تاني وخاصة بعد فضيحة "تقرير جولدستون" وده هيبقى قلم جامد أوي لفريق العملاء من أعوان السلطة العباسية وهيؤكد للعالم الغربي إن أختيار الشعب الفلسطيني لحماس المرة الأولى ماكانش غلطة زي ماإسرائيل والسلطة العباسية قالت لهم وهيؤكد تمسك الشعب الفلسطيني بحماس وبخيار المقاومة وحتى الفلسطينيين ولو لم يكن لهم دولة فالمهم يكون لهم ممثلين وقادة بدل من الشتات السياسي اللي هم عايشين فيه ده مع العلم إن الشعوب هي اللي بتصنع الأوطان وليس العكس .

مي ثابت said...

بصى يا نوارة

مخطط أبو ماجن كالتالى

إذا إنعقدت المصالحة
حيصدر مرسوم بتأجيل الإنتخابات
فترة قدرها عزام الأحمد ب
60
يوم
بعدها تُجرى الإنتخابات فى الضفة و غزة بإشراف مصرى عربى

!!!
حسب ما نصت عليه الورقة المصرية

و إذا كانت الإنتخابات الأفغانية الأخيرة و اللى كانت تحت إشراف أممى دولى

شفنا أد إيه زورت و يجرى الآن الحديث عن إعادتها

فلنا أن نتخيل إنتخابات أبو ماجن المنكهة مصرياً و عربياً

يعنى حتخرج حماس من العملية السياسية و بالإنتخابات

مي ثابت said...

إذا لم تنعقد المصالحة

حيصدر أو ماجن فى الخامس و العشرين من هذا الشهر

مرسوم رئاسى بإجراء إنتخابات رئاسية و تشريعية متزامنة فى الضفة فقط يوم
25
يناير
أى قبل تسعين يوم من نهاية صالحية التشريعى
و هى المدة التى ألزمه بها القانون

و هنا حيجرى الإنتخابات بإشراف دايتون و فياض

و برضة حيخَرج حماس

يعنى حماس توقع متوقعش
تدخل الإنتخابات و لا متدخلش

النتيجة واحدة
و هى خروج حماس من العملية السياسية



طيب لو قلناالناس تقاطع الإنتخابات

برضة حلها سهل عند المعتلين العرب

و لنا فى إنتخابات الشورى و المحليات المصرية الأخيرة المثل على ده

الناس قاطعت و الحزب الوثنى فاز
!!

مي ثابت said...

طيب إيه الحل

فى رأيي هو المناورة و لو فى الكورنر الضيق اللى محشورة فيه حماس

علشان متخليش مصر تظهر غلها أكتر


كمان عليهاإنها متتحركش لوحدها و إنما مدعومة من فصائل أخرى متلوثتش بالمال

زى الجهاد و الجبهة الشعبية القيادة العامة أحمد جبريل
و زى حركة المبادرة الوطنية الفلسطينية بقيادة مصطفى البرغوثى


بحيث إن إذا خرجوها بالإنتخابات تظل متماسكة على الأرض كمقاومة

و أهى كده و لا كده سلطة غير شرعية بزعم أبو ماجن و داعميه

Anonymous said...

طيب ما انصار فتح هيروحوا ينتخبوا

والامور هتمشي عادي يعني

اعتقد يمشوها عاي وحماس اعتقد هتكسب برضه

تحياتي

Unknown said...

ماهو مش ح يحصل مصالحة يا مي
والانتخابات المرة دي ما اظنش انها ح تبقى نزيهة ابدا

لو مصر والاردن ح يراقبوها

ههههههه
دي نكتة

بلدين واحدة ملكية والتانية شبه ملكية يشرفوا على انتخابات ديمقراطية ازاي؟

الا اذا كان فيها ان

الحل ان الناس ما تروحش تنتخب
تبقى دي الحملة الانتخابية بتاعتهم انهم يحثوا الناس على مقاطعة الانتخابات

وفي الحالة دي عباس يبقى نظام قمعي زيه زي اي قرد من اللي حواليه ولان فلسطين مش دولة فالنظام القمعي سهل انهياره

وحماس لازم تخرج من العملية السياسية لانها مش لعبتها ولا مكانها

يا مي الانتخابات دي تمثيلية
هم عندهم بلد؟

حماس من ساعة ما فازت في الانتخابات وقياداتها بتحصد اكتر من لما كانت خارج اللعبة السياسية لان ضهرهم اتكشف
الاول ما كانش بيتقتل غير المستبيعين دلوقت القيادات عمالة تتقطف

انا مش عارفة هم ح يعملوا ايه؟

انا برضه مش متأكدة ان اللي باقوله صح

ما هو انا ايدي في المية برضه
الله يكون في عونهم

صعبانين عليا قوي
قوي على فكرة

Unknown said...

أنا اصلا مش مؤمن بدخول حماس الأنتخابات من المره اللى فاتت

المقاومين مايوسخوش أيدهم بقذارة السياسه
المقاومين دايما" تحت الأرض والناس بتكره السياسه والسياسيين وحماس خسرت كتير لما دخلت الأنتخابات الأخيره وفتح صورت ان حماس بتستخدم قوتها لأغراض سياسيه وللسيطره على السلطه
سياسه وأنتخابات لما تحرروا البلد ساعتها الناس تكافئكوا وتجبكم الحكم تعمروا البلد اللى حررتوها

Kalimalhus said...

كلام مى صحيح .. و كلام مروة صحيح برضه..

يعنى مصالحة + إنتخابات .. حماس خارج اللعبة و نو مصالحة + إنتخابات حماس خارج اللعبة و مصالحة + مقاطعة إنتخابات برضه حماس خارج اللعبة..

يا بنتى المؤمن لا يلدغ من جحر مرتين و مبارك راجل مؤمن و عباس راجل مؤمن برضه و التنين حالفين إن لو حماس شافتها أو شمت ريحيتها تانى تبقى تتف على قبرهما قولى إن شاء الله..

هى بصراحة مقفولة زى الدومينو و مالهاش مخرج .. حتى لو تخيلنا إن حماس قررت تبقى بنت مطيعة و تسمع الكلام و تعمل مصالحة و تخش إنتخابات و الإنتخابات تتزور و تخسر بروح رياضية و تسلم السلطة فى غزة لأبوماجن و قطيعه .. هيحصل إيه؟ .. دايتون يخش غزة و يصفى كوادر حماس فى 6 شهور و اللى يتسرب منهم عبر الحدود زبانية مبارك يخلوه يندم إنه مفضلش فى غزة و مات بكرامته..

اللى كتير مش فاهمينه إن إحتفاظ حماس بالسلطة فى غزة هو ضرورة بقاء ما ينفعش حماس تسلم القطاع لسلطة عميلة و بينها و بينهم تار بايت كمان..

عشان كده أنا بصراحة مش فاهم حماس بتتفاوض على إيه فى موضوع المصالحة ده؟ .. لو كان فى راعى دولى زى ألمانيا مثلا كان يمكن يبقى فيه أمل فى ضمانات لرقابة و إدارة دولية على الإنتخابات لكن لما كلهم يبقوا فى حجر عوكل .. منين ييجى خير

لبنــــــــــى said...

المفروض حماس حتكون اذكى هاي المرة يا نوارة و ترشح واحد مستقل و نزيه و تدعموا
واحد الو تاريخ نضيف و اهم شي شبعان( مواصفات صعبة )
علشان اللي عندو تحزز من حماس و منهجيتها
يعني مش كل الناس حتوافق تنتخب حزب اسلامي في مسيحيين و شيوعيين و ناس بتخاف من هادا التوحه
و تخليها هي في مشروع الجهاد و المقاومة وورقة ضغط رابحة
عبسي و اصحابوا سقطوا لكن دايما بكون في مرتزقة و مزورين

الله يستر

مي ثابت said...

وفي الحالة دي عباس يبقى نظام قمعي زيه زي اي قرد من اللي حواليه ولان فلسطين مش دولة فالنظام القمعي سهل انهياره


المفروض فعلاً يكون هوه ده الحل

بس اللى حاصل بيقول إن دول جماعة بقى جلدهم سميك و بيعملوا اللى هما عايزينه
و مادام أمريكا راضية يبقى مفيش حد حيمس أبو حلموس

و مادام ساندينه أمنياً بدايتون يبقى برضه مش حينهار
فى تصورهم على الأقل

و أديكى شايفة أبو ماجن سلطته إنتهت يوم
9
يناير
2009

و برغم كده و بتوليفة و شوية اوكسجين من محور الإعتلال و جامعته العربية

تم التمديد لعباس المنتهية ولايته
!!

into said...

ممكن تديني مثال واحد لحد قاطع الانتخابات و ده اضفى عليه شرعية اكتر؟

افعانستان مصر العراق.....الخ
مش كانو دعوا ان الناس تقاطع الاستفتاء على التعديلات الدستورية؟ و ادينا قاطعنا ايه اللي حصل؟ ولا حاجة

السنه في العراق قاطعت الانتخابات ايه اللي حصل؟ حكومة متهمة بالطائفية لكن في الاخر في نشرة الاخبار بيقولو الحكومة العراقيه و الاخرون ارهابيون.

الغرب كان في مأزق خطير بعد انتخاب حماس بصورة ديموقراطية ، و لو ان حماس قاطعت الانتخابات كانت ستصبح انتخابات بنسبة مشركه ضعيفة( ظاهرة منتشرة جدا في الغرب) لكن ذلك لا ينتقص من شرعيتها شئ

into said...

عرفه لو الانتخابات بأشراف مصري مين اللي هيفوز في الانتخابات ؟؟

طبعا السيد الرئيس محمد حسني مبارك
هاهاهاهاها

سامي said...

انتخابات مش انتخابات
غزة اللى بتطلع كل سنه عشرة الاف حافظ للقرأن حتظل معقل للمقاومة ورفض التسوية والضفة برضه حتفضل مرتع للخونة والعباسيين طب وبعدين؟ ولامتى؟ فين المعلق مهندس مصرى يقلنا رؤيته للموضوع دا وايه المناورة اللى ممكن تعملها حماس فى الكورنر الضيق زى ما بتقول الاستاذة مى؟؟ ولا حماس ممكن تخوض الانتخابات وتراهن على وعى الشعب الفلسطينى وتكسبها ولا ايه طيب

Sahran said...

عزيزتي نوارة

شوفي آخر محاولة للوفاق الوطني
علشان ما حدا يزعل
http://www.youtube.com/watch?v=XfDuAcRN4Eg&annotation_id=annotation_424961&feature=iv

Kalimalhus said...

نسيت أقول .. لو حماس قبلت المصالحة فمينفعش تقاطع الإنتخابات لأن جزء من إتفاق المصالحة متعلق بالإنتخابات دى ..

المقاطعة مستحيل تكون إجماعية الأمور أعقد من كده و حماس مش معاها الأغلبية الساحقة اللى إنتى متخيلاها.. فيه حالة غربلة حصلت للأمور و فيه متغيرات على الأرض فى الضفة و كمان فيه أمور حصلت فى القطاع غيرت من شعبية الأطراف المختلفة..

تصدقى إنتى خلتينى أفكر كويس فى الموضوع و اللى طلعت بيه إن موقف حماس دقيق فعلا .. ده مزنق شديد الصعوبة و مفيش مخرج يطلعوا فيه كسبانين على الإطلاق؟؟؟؟

احساس لسه حى said...

انا شايف انهم يشاركوا فى الانتخابات

ولو مشاركوش كده كده هتتعمل واللى هيفوزا فيها هيقولوا كده كده كنا فوزنا

يحقوا دمهم ويفوزا ونشوف الدول الديمقراطية هتعمل ايه

ومش هيعرفوا يزوروها

سلام

Unknown said...

عمالة ادور على مروة يا تامر اللي انت بتتكلم عنها ان معاها حق مش لاقياها

مروة مين؟

Unknown said...

طيب يا جدعان قولوا لي تعمل ايه؟

بصوا

من الاخر كده حماس دايما تطلع هي اللي غلطانة

تضرب صواريخ يقولوا لها انت السبب في الناس اللي اتقتلت

ما تضربش الصواريخ وتقبل هدنة تبقى وسخة وباعت القضية عشان السلطة

تدخل الانتخابات وتصدق يا عيني في موضوع الديمقراطية دي يقولوا لها انت مالك ومال السياسة؟ انت مقاومة وتتحارب وتتحاصر ودحلان يسلط عليها البلطجية بتوعه

ترد على دحلان يتقال لها انت استخدمتي سلاحك ضد الفلسطينيين

تسكت يقولوا لها ساكتة ليه؟

قلبها يوجعها على 1500 واحد وتقول لهم مش قادرة اقابل عباس يقولوا لها بتتهربي من المصالحة

تسكت على اللي مصر عملته يتقال لها يا معرصة انت بتتصالحي مع النظام المصري ازاي؟

وبعدين بنود المصالحة دي وسخة جدا
ماحدش يرضى بيها

لو رفضتها تبقى بترفض المصالحة
ولو قبلتها تبقى بتنتحر وح تتعاير برضه ويتقال لها قبلتي المصالحة ازاي؟

انا عمري في حياتي ما شفت ظلم بين بالطريقة دي
ظلم ظلم ظلم ظلم ظلم

ظلم الى ابعد الحدود
وربنا ح يشنير الناس الظلمة دول
الناس قياداتها بتموت ويقولوا لهم انتوا مستخبيين

ده كاتب امريكاني لا من جسنا ولا من بقية اهلنا قال يعني انتوا متوقعين ان حماس تعمل حلقة نار فوق السطوح وتطلع ترقص وتصوت وتشاور لاسرائيل: انا هنا انا هنا.. عشان ما تبقاش جبانة

هم خسرانين زي ما مهندس حر بيقول في كل الاحوال
وفي كل الاحوال ح يطلعوا غلطانين وح يتشتموا

طيب مدام كده كده خسرانين
وكده كده بيتشتموا
يقطعوا البطاقة بقى
ما يعملوش حساب حد

Amal said...

يعني عشان عباس وشلته اشرار وشياطين صارت حماس ملاك ؟؟ ... لو الشعب الفلسطيني عايز يقاطع خلوه يقاطع بس بليز لا تقولو انه بيقاطع تضامنا مع حماس .... ياريت تتناقشي مع اي غزاوي عايش برة العالم العربي عشان تعرفي من هي حماس .... مساكين احنا العرب "القوى الخارجي" مش بس بتلعب بينا للا بس كمان مخليانا فرجة قدام العالم واحنا فرحانين ونهلل

Anonymous said...

زي ما قلتي آخر مرة، يقطعوا البطاقة..

يعني من أول يوم يعلنوا انهم غير معترفين بالانتخابات ولا المجلس التشريعي اللي هتجيبه انتخابات بقرار منفرد من رئيس انتهت ولايته..وانه القائم بأعمال رئيس الجمهورية الشرعي حاليا هو أحمد بحر..

خلصنا كدة، لا انتخابات ولا يحزنون غزة في إيد حماس برضو لو عايزينها تعالوا فاوضوا الحكومة الشرعية..

ما عباس أساسا كان عايز يعمل خطوة الانتخابات المنفردة دي من زمان وحماس هددت وقتها بعدم الاعتراف لا بيه ولا بالانتخابات اللي هيعملها..مظنش عباس هيرتاح لما غزة تبقى في إيد فصائل المقاومة وتستمر في إعلان العصيان بعيد عن سلطته..

لأنه ده بيدمر أهميته بالنسبة للاسرائيليين..هو احنا جايبينك ليه يا بيسو؟..عشان تعمل لنا منطقة مقاومة حرة معليهاش جمارك؟

لو حصل وحماس انفصلت تماما عن فتح وسحبت أي اعتراف بحكومة عبس ده هيديها بسهولة ذريعة للقضاء على السلطة عسكريا..بس ازاي بقى، دي عايزة خطة تكون متاخدة من ثورات سابقة، وليكن يوليو..ولو انه يوليو عكت عك جامد بس في حالة فلسطين يعني حماس خلاص مش هتعك معاها أكتر من كدة..يا تصيب وتكسب يا تخيب ومش هتخسر حاجة زيادة..

المقاطعة مشكلتها هي انها هتعترف بالانتخابات ابتداء..
وغير كدة فتح ليها سوابق في اجبار الناخبين على التصويت بقوة السلاح (الجماعة صيّع برضو يعني مش مصر اللي هتعلّمهم)..وده انا فاكر كويس حصل في انتخابات البلديات السابق للانتخابات التشريعية اللي جابت حماس على طول..

مي ثابت said...

طيب مدام كده كده خسرانين
وكده كده بيتشتموا
يقطعوا البطاقة بقى
ما يعملوش حساب حد
___________________________

يارييييت يقدروا يعملوا كده

بس حتى ديه ميقدروش عليها
عوكل حبيسهم و حاطط القفل فى جيبه


طب إسمعى العجب

النهاردة أسامة حمدان كان فى لقاء مفتوح مع غسان بن جدو على الجزيرة

(حيتعاد ظهر الأحد الساعة واحدة)


بيقول إحنا توافقنا و وافقنا على

8

ورقات

فجأة لقينا المصريين طالبين مننا التوقيع على

28

صفحة

تتضمن الموافقة على شروط الرباعية

أى الإعتراف بإسرائيل

طب إزاى
طب ليه

ملكوش دعوة وقعوا و خلاص

مي ثابت said...

زقزوق

أقصد بالمناورة فى الكورنر

إنهم ميقطعوش مع مصر علشان روحهم فى إيديها

و يفضلوا يقولوا الشقيقة و العفيفة مصر

و أهو إذا كان لك عند
....
قوله يا شقيقى
!!

لكن يحاولوا يستعينوا بأطراف أخرى

زى تركيا مثلاً

لإجراء المصالحة المأسوف على شبابها



تصبحوا جميعاً بألف خير

Unknown said...

احمد نصر

ابصم بالعشرة على الكلام ده
ابصم بالعشرة
وانطح بقورتي كمان
يارب يعملوا كده
وح يتشتموا ما يتشتموا
هو فيه يوم حماس مش بتتشتم؟ ده ناقص يضيفوا شتيمتهم على الادان

مي

مصر انكرت انها اضافت اي حاجة وبتقول ان حماس بتقول كده عشان تماطل

خليها تماطل لحد ما ربنا يفرجها

Unknown said...

معلشششششش

بكرة تروق وتحلا

وكل ولاة عكا ح ينضربوا بالجزم

Unknown said...

ايه ده؟
انا كان فيه تعليق ردا على اللي بيقول يعني حماس ملاك؟

راح فين؟

انا مش شايفاه
حد شايفه؟

Unknown said...

اما انا عبيطة

نزلته في البوست اللي قبل كده

بالنسبة للاخ اللي بيسأل هل حماس ملايكة الرد بتاعي اهو:


باقول لك ايه؟ حماس لا ملاك ولا شيطان

حماس اتظلمت

انت تقدر تنكر انها اتظلمت؟ وتقدر تنكر انها دايما بتتظلم، ودايما بتتحمل فوق طاقتها

ومن غير ما اتكلم مع غزاوي ولا ضفاوي (جتكوا خيبة بصراحة قسمتوا نفسكوا ستين تقسيمة)

انا بقى ح افترض معاك ان حماس شيطان

طيب ايه رأيك بقى ان لا فتح ولا اسرائيل ولا مصر ولا امريكا ولا المجتمع الدولي ولا العالم العربي ولا الاعلام ولا حضرتك واللي زيك ولا حتى الغزاوية ادونا فرصة عشان نشوف الوجه "الشيطاني" من حماس

انا ما شفتش منهم اي حاجة غير انهم بيتظلموا طول الوقت
ويلاموا طول الوقت
ومهما يعملوا ملامين
ومهما يعملوا منتقدين
وما كسبوش اي حاجة خالص، عباس كسب مليارات، والموالين لعباس كمان كسبوا مستوى معيشي مرتفع، لكن هم ما كسبوش اي حاجة، ومات منهم ناس كتير قوي وما اخدوش فرصة يحكموا اصلا عشان نشوف "وجههم القبيح" واي حاجة ح يعملوها في الظرف ده ح يبقوا معذورين لان المظلوم معذور والضعيف معذور

ده للناس اللي عندها ادنى حس بالعدالة واللي بيطلب من حماس فوق الطاقة
مافيش حاجة ترضي الناس وتسكت الناس عن حماس غير انها تعترف باسرائيل وتبقى زي عباس

يعني هم ما عندهمش خيارات كتير

وانتوا كمان الحقيقة ما عندكوش خيارات كتير

يا عباس يا حماس

مافيش اوبشنز يعني

واي شعب عنده احتلال بيقاوم من غير رغي كتير، زي طالبان كده

فما فيش داعي للمرقعة يعني

او يا سيدي وللا يا ستي حلوا المشكلة واطلبوا الجنسية الاسرائيلي وطناش على الدولة الفلسطينية

انا عن نفسي شايفة ان ده حل كويس ورخيص وابن ناس

اطلبوا جنسية اسرائيلي وتنضموا لعرب اسرائيل، كلكوا، باللاجئين
والله كده المشكلة تتحل ونخلص بقى

انما لا مقاومة ولا حلول استسلامية؟ امال عايزين ايه؟

اففففففففف
خلتني اقول لك كلام وحش وقاسي
وانا مش قصدي والله
الله يكون في عونكوا انتوا كمان ما انتوا غلابة واللي شفتوه ما شافوش حد في الدنيا

لا حول ولا قوة الا بالله

هي مالها اتكعبلت وقفلت كده

الفرج من عندك يا رب

Sahran said...

أنا بس عندي طلب من الأخوة المعلقين اللي طايرين بحماس في السما وحابب أسألهم يعني شو المقاومة من وجهة نظركم وكيف يعني حماس بتقاوم ؟؟؟ والأخت نوارة بتقول إنو حماس بتوقف عملياتها علشان الشعب ما يتضرر , طب لشو قاعدين على قلبنا إذا علة وجودهم صارت غير موجودة
وشو يعني بدكم الشعب يقاطع الانتخابات ؟؟؟
أليس من المفروض بكم يا من تحترمون حماس أن تحترموا الشعب الأكبر من كل التنظيمات والفصائل وتحترموا قراره ؟؟؟؟

وشو يعني الفرق بين هدنة لعشر سنوات واتفاقية سلام ؟؟؟
ألم يوقع ياسر عرفات اتفاقية أوسلو ورغم ذلك فهو لم يمتنع عن إشعال الإنتفاضة ؟؟؟؟
وأطلب من كل اللي عم يتكلموا عن حماس الشريفة يسألوا أي واحد من غزة عن فضايح حماس
فعلى سبيل المثال هناك المدعو أيمن طه وهو عضو قيادي كبير في حماس وأيضا هو المسئول عن تهريب السجائر إلى غزة ومن دون جمرك ومن يومها صار الشحات يدخن الروثمان
مين من قادة حماس مات في ساحة قتال ؟؟؟ اللي مات فيهم ما كان طلب من اليهود أنهم يقتلوه , والشيء اللي يظهر إنكم ما بتعرفوه إنو بعد كل عملية اغتيال كانت حماس بتخلص على أحد عناصرها بعد ثبوت تورطه في المشاركة بالاغتيال مع اليهود
يبدو لي أنكم لا تعرفون أي شيء ولا يهمكم أن تعرفوا شيء

أرجوك يا أخت نوارة ردي عليّا بالمنطق وفسري لي ليش حماس ما بدها مصالحة ولا انتخابات
ومن الذي يخشى من الانتخابات إلا الذي يعرف نتيجتها مسبقا
ثم أن أية انتخابات سوف تجري سيكون من الصعب تزويرها فحماس طرف قوي ولديها من العناصر ما يكفي لمراقبة كل صندوق اقتراع

وتحياتي للجميع

mido said...

@ Sahran

المدعو أيمن طه وهو عضو قيادي كبير في حماس وأيضا هو المسئول عن تهريب السجائر إلى غزة ومن دون جمرك ومن يومها صار الشحات يدخن الروثمان

---------------

ههه انت بتحسسنى ان فى بضايع بتدخل غزة من غير تهريب


مين من قادة حماس مات في ساحة قتال ؟؟؟

الشهداء

نزار ريان

سعيد صيام

ابن الزهار

غير القادة فى الصف الثانى


والشيء اللي يظهر إنكم ما بتعرفوه إنو بعد كل عملية اغتيال كانت حماس بتخلص على أحد عناصرها بعد ثبوت تورطه في المشاركة بالاغتيال مع اليهود

--------------

طيب ده شىء عظيم

المعروف انه فى خونة فى قطاع غزة ساهموافى ارشاد الصهاينة اثناء الحرب خاصة فى بدايتها

و على الحركة تطهير نفسها منهم بدون تردد


أن أية انتخابات سوف تجري سيكون من الصعب تزويرها فحماس طرف قوي ولديها من العناصر ما يكفي لمراقبة كل صندوق اقتراع

----------

تزوير الانتخابات دى لعبة سهلة اوى

و مستحيل تقريبا ان امريكا و اسرائيل تترك الانتخابات تأتى بحماس مرة اخرى

او حتى تعطيهم نسبة معتبرة

Unknown said...

سهران

والله انا مستغربة، هي حماس، وفتح دول مش من الشعب برضه؟

مين من قيادات حماس قتل؟ ياراجل، ياراااجل، انت اللي بتسأل يعني؟

طيب منين بتنكر ان قادة حماس قتلت ومنين ترجع تقول الجملة الغريبة دي بتاعة هم ما طلبوش من اسرائيل تقتلهم

هو فيه حد طلب من اسرائيل تقتله؟

وللا هم المفروض يقدموا طلب على ورقة دمغة وختم النسر: طلب قتل
جناب اسرائيل المعظم
لو سمحتوا اقتلونا

ما طلبوش اسرائيل تقتلهم اكيد
بس قتلتهم

انا بقى عايزة اسألك، ليه لما واحد من حماس بيموت يبقى في داهية ولما اي حد تاني يموت يبقى ضحية؟ ما ده فلسطيني وده فلسطيني
صح؟

انتخابات؟ طيب يا اخ سهران
الانتخابات دي بتبقى في دولة
انتوا عندكوا دولة؟

بص يا اخ سهران، انا مش ح الومك على حاجة عشان انت فلسطيني

مش عشان الفلسطينيين فوق اللوم بس عشان انتوا شفتوا حاجات تجنن اي حد وتطير العقل

بس انت كلامك متناقض

عرفات، الله يرحمه، مضى على اتفاقية وعمل كل المنوط به وقبض على عناصر المقاومة وقتل ناس منهم كمان

وفي الاخر كسب ايه؟ ما كسبش حاجة
اتحبس في بيته، ولما اتحبس ولقى نفسه خسر كل حاجة اشعل الانتفاضة اللي انت بتقول عليها

يعني ياريت يبقى عندك شوية تسلسل في التاريخ

وح اطلب منك طلب صعب شوية في ظل الظروف اللي انت عايش فيها

حاول تبقى عادل شوية

يعني انسى انك بتكره حماس كفصيل ممكن تكون افكاره مش عاجباك واحكم بعدل

حماس نجحت في الانتخابات وللا لا؟
حماس لما نجحت اتعاقبت واتعاقب معاها الشعب الفلسطيني كله اللي انتخبها وللا لا؟
حماس اتسلط عليها عملاء عشان يشعلوا فتنة ويخلقوا لها فوضى تقوم ما تعرفش تدير ولا تحكم وللا لا؟
حماس اول ما شكلت حكومة معظم اعضاء حكومتها اتقبض عليهم وللا لا؟
حماس اضطرت اضطرارا انها تلجأ لغزة بعد ما كل العالم حاصرها واولهم سلطة عباس وللا لا؟
حماس اتحاصرت واتجوعت واتقفل عليها من كل ناحية وللا لا؟
حماس لما قبلت الهدنة تمت المزايدة عليها وللا لا؟
حماس قبلت الهدنة ومع ذلك اسرائيل قتلت ستة من قادتها في غارة جوية على غزة وللا لا؟
حماس لما ردت على خرق اسرائيل للهدنة بضرب صواريخ (وده رد فعل انساني طبيعي) اتلامت على انها عملت رد فعل وللا لا؟
حماس فضلت تنضرب وهي جوة غزة بتحريض من عباس والعرب قبل امريكا، ضد المدنيين، عقابا ليهم على انتخابهم لحماس وللا لا؟

Unknown said...

ده حصل وللا ما حصلش؟ وللا احنا عندنا خيالات؟ وللا اخبار بتكدب علينا وانتوا عايشين في باريس الشرق وحماس هي اللي عملتها لكوا افغانستان؟

طيب ده ظلم وللا مش ظلم؟

لو اللي حصل فيهم ده حصل في فرقة البيتلز ده يرضي مين؟

انسى ان دول حماس وفكر فيهم انهم بني ادمين

انت ملاحظ ان بقالكوا فترة كبير قوي يا اخ سهران بتتكلموا في لوم حماس وغلط حماس وفظاعة حماس وقلة ادب حماس وما بترموش اي لوم على اسرائيل؟

انت ملاحظ ان تماديكوا في اللوم على حماس ادا اسرائيل مبررات وبقت تستشهد بكلامكوا عشان تبرر انها تقتلكوا؟

ملاحظ كده وللا مش ملاحظ الله يخليك؟

انا باتكلم في مسألة انسانية بحتة

اللي حصل في حماس ده لو كان حصل في نتانياهو كان صعب عليا

والله العظيم

شوف بقى؟

انا باكره الظلم

قول لي مكسب واحد حماس كسبته من ساعة ما نجحت في الانتخابات

قول لي اي شكل من اشكال الاضطهاد والظلم حماس ما اتعرضتلوش
وفوق ده كله اللي انتخبوها اتعرضوا لكل انواع الظلم والاضطهاد

ما خلوش في نفسهم حاجة، قتل واتقتلوا، اعتقال واعتقلوا، تعذيب وماتوا من كتر التعذيب، قنابل ومطروا عليهم بيها، تجويع واتجوعوا

وكانت النتيجة ان بدل ما الناس تقف جنب اختيارها الديمقراطي ابتدت تلقي اللوم على الفصيل اللي بيتعرض معاهم لكل انواع الاضطهاد

طيب يا اخي على الاقل فضلوا معاكوا وشربوا من نفس الكاس اللي شربتوا منه

طيب بقى لو ح تلوموا حد لوموا نفسكوا بقى، مش انتوا اللي انتخبتوهم؟ ماهو ده منطق عباس: هم اللي انتخبوهم ويستاهلوا القتل

وقال الكلام ده لباراك وقاله على الاعلام في وشنا والناس بتموت

طيب يعني هو انتوا زي الصعيدي اللي اخد سبعة وخمسين قفا على سهوة؟ يعني جربتوا اكذوبة الديمقراطية دي والعالم كله القريب قبل الغريب قال لكوا امكوا في العش وللا طارت

ح تعملوا في نفسكوا كده تاني؟

طب اعمل حسابك يا سهران
اي فصيل ح يقاوم، اخوان بقى شيوعيين عبدة شيطان ح يتعمل فيه كده

ولو من بكرة الصبح فتح قررت ترجع للمقاومة ح يطلع تلاتين اللي جابوها وح يتعمل فيها اللي اتعمل في حماس بالظبط

اي تحفظات لك على حماس نفسها كحركة او كفكر ما اعتقدش انه له سياق دلوقت لانهم مش فايقين يرفعوا راسهم من كتر الضرب عشان يعرفوا يعملوا حاجة تنتقدهم عليها

رافضين المصالحة عشان المصالحة ح تحطهم تحت سيطرة عباس

ما اظنش ابدا يا سهران انك عندك ثقة في عباس

وما اظنش ان اي حد مهما كان مستوى ذكاءه لسة ح يفكر مرتين قبل ما يقول عباس عميل اسرائيلي

Unknown said...

يا اخ سهران

القصة لا قصة حماس ولا قصة عباس

القصة قصة: يا ترضى بانك تعيش زي الضفة وتنسى بقى كل حاجة

تاكل وتشرب زي الانعام بلا دولة بلا لاجئين بلا تحرير بلا كلام فارغ

عيش وكل واشرب وانت ساكت عشان اكلك وشربك من فضل وخير اسرائيل لانك ح تفضل عايش عواله عليها

يا اما اذا نشفت دماغك واتكلمت عن التحرير واللاجئين والدولة والكلام ده خد على دماغك، سوى كنت حماس وللا فتح وللا الشيطان نفسه

عشان ده الطبيعي، مش متوقع ان الاحتلال يساعدك عشان تقاومه

بس المتوقع ان اهل البلد الواحد يساعدوا بعض بدل ما يرموا اللوم على اللي بيقاوم

رئبال عبدالله said...

بالمبدأ يجب الاعتراف بان حماس لم تتوقع فوزها بالاغلبية في المجلس التشريعي، وانها دخلت الانتخابات تحت اعتقاد انها ستثبت شعبيتها المرتفعة ورضى الناس عن اهدافها.
واعتقدت انها تستطيع توظيف هذا المردود في الداخل والخارج بشكل يكبح اي محاولة فصائلية لتصفية القضية الفلسطينية تحت شعار قوة اسرائيل وتخلى العالم العربي عن مسئولياته تجاه الشعب الفلسطيني
وعندما وقعت "الواقعة"وانتصر خيار المقاومة في الانتخابات سارعت الادارة الامريكية الى استغلال هذا النصر وفرضت على صبيانها القبول بحكومة تشكلها حماس وهي تعرف ان حماس ستتسلم حكم جزء من بلد مكتظ بالسكان
فقير بالموارد
مسلوب السيادة على ارضه وبحره وجوه
محاصر من قبل انظمة عدائية اشد شراسة في تعاطيها مع الملف الاسلامي من اسرائيل
ادارة حكومية فاسدة ومتضخمة
اجهزة امنية مخترقة ومعادية لحكومتها
ميزانية مالية ثلثها اسرائيلي وثلثيها اوربي امريكي
فوضى سلاح وفصائل لم يسبق لها مثيل في الدنيا الا في افغانستان التحالف الدولي ضد الروس ولبنان الحرب الاهلية وحاليا في عراق النزيف اليومي
ويضاف الى ذلك كله
حرب مفتوحة مع العالم الغربي وربيبته اسرائيل
وشركائهم في معسكر الاعتدال العربي

Kalimalhus said...

.. مروة دى تبقى فتاة من الصعيد .. كنت فاكرك عارفة .. بصراحة كسلت أكتب الإسم الطويل..

رئبال عبدالله said...

اذا، دخلت حماس الى الاسر باختيارها، وتورطت في لعبة نتيجتها كانت محسومة سلفاً
ولكننا يجب ان نسجل ان حماس نجحت في البداية، من التملص من كل الالغام التي وضعت في طريقها.
وبفضل داعميها استطاعت ان تسجل قدرة الحكومة الفلسطينية على الحياة بدون التمويل الغربي - الاسرائيلي المشروط بالاستسلام وقبول الشعب الفلسطيني بالفتات الذي يعرض عليه
واستطاعت ان تمارس رؤيتها لمفهوم الحكومة الداعمة للمقاومة، ولم يسجل ان حماس ادانت او منعت او ضايقت مجموعة مقاومة في طريقها لتنفيذ عمليات عسكرية ضد المحتل
طبعاً هذا الكلام قبل انفرادها الاجباري بحكم غزة

Sahran said...

عزيزتي نوارة

أولا أشكرك على هذا الرد مطول على تعليقي ولكن أنا أحب أوضح بعض النقاط
أولا أنا ما استخفيت بدماء أي فلسطيني ويما مشيت في جنازاتهم لما كان يموت منهم واحد بأعرفه
وأنا لي كتير أصدقاء من حماس وغيرها , وطبعا مش معقول أعمل فلتر وأختار أصحابي عالفرازة
ثانيا وبالنسبة لموضوع الظلم اللي حضرتك بتقولي إنو وقع على حماس : ولكن يا سيدتي بيبقى مصلحة الشعب فوق حماس وعباس وكل الأيديولوجيات اللي عندنا
لو كان عباس في يوم من الأيام أرسل شاب ليفجر نفسه كنا سنطلب منه أن يبعث أولاده حتى نصدقه, ولكن عباس لم يفعلها ولا يتمناها لأحد , ثم أنا دائما بألحظ إنو كل ما إسرائيل بتعمل شغلة ضد حماس بتقولوا إنها علشان خاطر عباس , طيب كيف يعني ؟؟؟ معقول يعني عباس عنده قوة تأثير على إسرائيل حتى أنه لا يصبح هناك شغلة ولا عملة لإسرائيل إلاّ تنفيذ مطالب عباس
عباس قرّب ينجلط من كتر ما شاف الويل من إسرائيل ومن كتر ما بتتعمد إحراجه أما الناس
عزيزتي أنا مش عم بدافع عن عباس ولا عن كتير من الأخطاء اللي عملوها ولكن فالحق يقتضي منا أن لا نجرم طرفا ونترك الآخر
ويا ريت بدل الدعوة العلنية للتفرقة بين الشعب الفلسطيني اللي عم بتعملوها يا ريت يا أختي تقدروا أحزان وآلام الشعب شوية
اللي بيموتوا هدولا بشر مش حيوانات
إحنا من حقنا نعيش زي البشر ويوم ما يكون بإيدنا نحرر فلسطين فأهلا وسهلا بالوطن ولتذهب إسرائيل إلى الجحيم

ودمت سالمة

Kalimalhus said...

أنا برضه كسلت أقرا كل التعليقات و بعدين لقيت كلام مكرر و إتسمع كتير ..

أولا .. حماس مش ملايكة .. دى معروفة .. كلنا بنى آدمين .. حماس ليهم أخطاءهم .. متهيألى كتير متفقين إن الإنخراط فى موضوع الإنتخابات كان خطأ فادح بس كانوا مضطريين ليه و إلا وجودهم كحركة مسلحة فى ظل سلطة عباس معناه إنهم يبقوا مطاريد و يتم إصطيادهم فرادى و جماعات .. و ده نفس المصير اللى بيستناهم حاليا فى حال رجعت لعبة الإنتخابات و إتعملت على طريقة الست نزيهة اللى عوكل يعرفها كويس..

ثانيا .. حماس ماكانش قدامها بدائل مقبولة و هى رفضتها .. حماس طول الوقت المتاح ليها هى بدائل كلها أزفت من بعضها .. و حاليا بديل الإستسلام للتصفية هو الحرب الأهلية..

ثالثا .. لو أنا مكان حماس .. أماطل فى المصالحة على أمل إن يبقى فيه ضغط دولى يفك الحصار .. مفيش ضغط دولى .. أقبل المصالحة و أستنى لما تخرب و ألبس غيرى الغلط و هو كده كده غيرى ده ناوى عالغلط من الأول .. و آخرتها هنوصل للحرب الأهلية إلا إذا .. تخلصت من عباس و دحلان ..

نقول من تانى .. لازم عباس و دحلان يختفوا .. و إلا النتيجة المحتومة إما بقاء الأمر على ماهو عليه و القتل البطئ لأهل غزة أو الحرب الأهلية ..

Unknown said...

سهران

انت وجعت قلبي
اااه
انا ما اقدرش افرض عليك صمود وانا ايدي في المية الساقعة وانت في النار

طيب

قول لي يا سهران
ليه عرفات ما كانش بيتخانق مع حماس؟ هاه؟ ليه؟ ليه كانت علاقته بيهم كويسة؟ ليه عمره ما قال عنهم ظلاميين ولا امارة ظلامية ولا الكلام ده كله؟

يعني هي فتح عدمت قائد يعرف يتصرف بنفس كياسة عرفات؟

مع ان عرفات هو اللي وقع اوسلو، وحماس كانت ضد اوسلو على طول الخط

ليه ما حصلتش الفرقة دي غير لما عباس جه؟

راح فين القدومي؟

اذا كنت فهمت كلامي انه تفرقة ما بين الفلسطينيين اعذرني انا باعتذر لك اهو
انا اسفة
مش ده قصدي خالص
بس عباس وشلته دول مجرد افراد، لا هم الشعب الفلسطيني، ولا هم كل فتح، والمفروض ان الفصائل دول مش هم الشعب بس ممثلين للشعب

انا كل اللي قصدته ان لما يبقى فيه مجموعة فاسدة يتم اقصاءها، ويتم اقصاءها من الشعب نفسه

عشان انا عندي ظن ان الفلسطينيين عندهم القوة والفرصة انهم يعملوا كده اكتر من اي شعب عربي تاني

بس واضح من كلامك انكوا مرهقين

الله يكون في عونكوا الحقيقة
انا ما اقدرش ازايد عليكوا

Kalimalhus said...

الأخ سهران

يعنى إيه ما نجرمش أى طرف؟؟ .. يعنى يبقى فيه دلائل واضحة على عمالته و خيانته و برضه مانجرموش؟ ..

و لما عباس إنجلط من إسرائيل مستمر فى العملية السلمية ليه ؟.. هل شايف إنها هتحقق للفلسطينيين حاجة؟ .. لو شايف كده يبقى أعمى أو ساذج و بريالة ..

عباس راضى بما تمنحه إسرائيل مادام ده يتضمن موجة شبكة المحمول الجديدة اللى عياله هيسترزقوا منها و مادام هيفضل هو الرئيس و بيستقبل بالتشريفات و الأحضان فى العواصم رغم إن سلطته لا تتعدى حدود فراشه لو إفترضنا إنه قادر يفرض سلطته فى الفراش..

ياريت تكون قادر تخدع نفسط لأنك أكيد مش قادر تخدع غيرك ..

Unknown said...

باقول لك يا سهران

انت طيب، يعني حاولوا تشوفوا اعذار بعض

انتوا ظروفكوا صعبة قوي يعني، هو الطبيعي في الظروف دي ان الناس بترمي اللوم على بعض بدل ما ترمي اللوم على المسئول

بس حاولوا تعذروا بعض شوية

انت كلامك وجعني قوي على فكرة

مش ح انام الليلة دي

استغفر الله العظيم يارب

انتوا ايه النحس اللي انتوا فيه ده؟ يارب يفكها بقى عليكوا

رئبال عبدالله said...

وعندما احست الادارة الامريكية بفشل مخططها لترويض حماس وتكبيلها وتحويلها الى مجرد سلطة بلدية قانعة بسيطرتها على المناطق المحررة وتعيش تحت التهديد الدائم باحتلالها من جديد
اوعزت الى صبيانها لممارسة مزيد من الضغوط العسكرية وكانت النتيجة انفجار الاحتقان وخروج الامور عن السيطرة وتظهير لمشهد انفراد حماس بحكم الجزيرة المحاطة ببحور العداء من كل جانب
وهنا كانت النقمة التي تحمل في طياتها نعمة
فهمت حماس وقيادتها معنى ان تحكم في ظل الظروف الحالية، ومارست نسخة معدلة من طريقة حكم من سبقها
وفهمت شرائح مهمة من فتح ان مايقال عن الضرورة واحكامها لا يجب ان تكون ترجمته الانبطاح والزحف والاستسلام بدون قيد او شرط
والاهم من هاذين الامرين، ان الشعب الفلسطيني اصبح اكثر وعياً وحراكاً باتجاه انتاج حركة تحرر وطني تتميز بالجدية والاحتراف والثبات

Sahran said...

عزيزتي نوارة

أولا سلامة قلبك من الوجع وانشالله في نتنياهو مش فيكي

ثانيا مين اللي قال إنو عرفات ما تخانق مع حماس , ولاّ يمكن نسينا كيف حماس كفرت عرفات وخونته وقالوا عنه الجعظري الجوّاظ ( وما بعرف شو معناها )
واسألي أي فلسطيني عن أحداث ال96 لما أبو عمار حبس كل الحمساويين اللي في البلد بعد ما زهق من تصرفاتهم
ثالثا عباس لم يكن دائما مكروها من حماس ولطالما وصفوه بفخامة الرئيس وعلى الأقل فعباس أوقف الفساد الإداري في السلطة وهذه حقيقة وإن لم تصل للدرجة التي يجب ان تكون , اما دحلان فللعلم فهو فاز في نفس الانتخابات اللي فازت فيها حماس , وحماس بتكرهه لأنه له شعبية كبيرة في غزة وهذه أيضا حقيقة ولطالما ألهب الناس بخطبه العنترية
وأخيرا لو كان خروج عباس من السلطة هو ودحلان سوف يحل المشكلة فأهلا وسهلا إحنا ما بنعبد أشخاص ولا نتمنى لبلدنا إلا الخير
تحياتي

Kalimalhus said...

نوارة هوه لما حد يطلع فلسطينى يبقى مسكك من الإيد اللى بتوجعك؟

ما عباس فلسطينى و الراجل عضمة كبيرة و أكيد تعب يا عين أمه ..

من إمتى قضية فلسطين ملك الفلسطينيين ؟ ..و من إمتى نتائج أى قرار ليهم بخصوصها مش بيأثر علينا و على مستقبلنا ..؟

هوه يعنى عشان السادات إستندل و عوكل نايم فى حضن الصهاينة هنفضل طول عمرنا نحسس عالواوا زى الولية اللى قفشوها فى بيت دعارة؟

اللى جرى علينا جرى على غيرنا و اللى مش عارف يشيل عباس ما يقولناش مش عارفين نشيل عوكل ليه .. غير كده إحنا كشعب لينا فى الأرض زيهم و لو سابوا حقهم إحنا مش هنسيب حقنا و معانا حجج من 4000 سنة إن فلسطين دى بتاعتنا إن كانوا همه مش عايزينها

Unknown said...

لا
كلامه هو اللي وجعني

يا تامر انت ما تقدرش تفرض عليه صمود هو مش عايزه، واحد بيقول لك عايزين نعيش

انا الكلمة دي وجعت قلبي قوي

لما باسمع فلسطيني، او اي حد ما احنا ما شاء الله مصايبنا كتير في كل حتة، لما باسمع حد منهم بيقول ما بنخافش من الموت والموت اهون والكلام ده

مش بازعل، ولا قلبي بيوجعني

بالعكس، باحس بالكسوف من نفسي واني حشرة

بس لما واحد بيقول لي عايز اعيش

عايز يعيش وهو عنده احتلال

انت متخيل ده ارهق واتحرقت اعصابه قد ايه عشان يوصل للمرحلة دي

ستوكهولم يا تامر

هو فعلا مش شايف عباس خاين مش بيعرص له

هو زهق وتعب وخلاص بقى عايز يقضي العيشة زي ما تتقضى بقى لحد ما يخلص

حاجة توجع القلب

Sahran said...

عزيزي مهندس حر

تفضل وشاركنا آلامنا وبعديها خود اللي بدك إياه وشاركنا في فلسطين

فلسطين مات من أجلها آلاف الشهداء المصريين ولا ننكر ذلك ولكن آسف أذكرك بالمقولة الثورية
الثورة يطلقها مغامر ويخوض غمارها ثائر ويجني ثمارها جبان

ما تآخذني على صراحتي ولكن زي ما بأقوللك تفضل عندنا وجرب تعيش زينا وإلك اللي بدك إياه

Unknown said...

سهران

طيب يا سهران احنا بقى هنا نعرف دحلان اكتر منكوا

دحلان ده ملياردير وله استثمارات كتير هنا في مصر

سايب بلده مش لاقية تاكل وبيستثمر في مصر عشان امان

جاب فلوسه منين؟

Kalimalhus said...

آسف يا نوارة .. كلمة عايز أعيش دى نسبية و خصوصا فى ايامينا دى ..

ما هى مصر كلها عايزة تعيش أحمد عز عايز يعيش و جابر اللى مش لاقى شغل و بيدور على أكل فى الزبالة عايز يعيش .. بس مين فيهم اللى يقطع القلب فعلا؟

المسألة فى المحصلة هى ضمانات المعيشة دى .. يعنى هى الدولة دى ليه؟ مش عشان هى الضمان الوحيد لإن الفلسطينيين يقدروا يعيشوا زى الناس و لأن الإحتلال عمره ما هيخليهم يعيشوا زى الناس ؟

اللى عايز يعيش و عايز ولاده يعيشوا لازم يعرف إن مالهاش حل غير إن الإحتلال ينتهى و الإحتلال مش هينتهى بالعملية السلمية بتاعة عباس .. دى حاجة أكيدة يبقى الحل هو المقاومة و المقاطعة و الصبر إلى أن يتم المطلوب .. غير كده يبقى بيبيع أى أمل ليه و لولاده فى إنهم فعلا يعيشوا زى الناس

رئبال عبدالله said...

الحل المنطقي امام حماس، هو التوقف عن اللعب بموجب قواعد ثبت ان الخصم لا يحترمها، والانتقال الى ميدان لايملك فيه كل هذه الارجحيات
وبشكل عملي امام حماس فرصة ذهبية لقلب الطاولة على الماكرين بالشعب الفلسطيني والمتآمرين على قضيته من خلال :
الدعوة الى جمعية عمومية تمثل الشعب الفلسطيني في الداخل والشتات

تشكيل لجنة تمثل كافة اطياف
الشعب وتكليفها بصياغة مشروع وطني لعرضه على الجمعية العمومية

عند المصادقة على المشروع، تعلن كل الاطراف الحاضرة عن حل فصائلها السياسية والعسكرية واتحادها ضمن هيئات منبثقة عن الجمعية العمومية
واهمها برلمان المنفى وحكومة المنفى وجيش التحرير الوطني الفلسطيني

Unknown said...

سهران

بس العيشة دي مش جديدة عليكوا، بقالكوا ستين سنة فيها

ايه اللي جد عليكوا وخلاك تقول انك عايز تعيش ولما يبقى ربنا يسهل تبقوا تطردوا اسرائيل في المشمش

انت تقريبا قلت كده

يعني انت متقبل وجود اسرائيل
ما كانش ده الحال من كام سنة

ليه؟
وفيه كتير بيفكروا زيك كده؟

Unknown said...

على فكرة انا مش بالومك
انا باسأل بجد

هل مثلا خناقة الفصائل مع بعض خلتك تفقد ايمانك باي حاجة مثلا؟

مش عارفة انا باخمن

بس دي مش اول مرة الفصائل تتخانق، دول كان بينهم حرب

بس ما كانتش روح المقاومة ضعيفة كده

ايه اللي حصل؟

Kalimalhus said...

أخ سهران

أنا مش بزايد على معاناتكم لكن متأكد من إن نهاية المعاناة دى مش طريقها سكة عباس و دحلان..

أنا أتمنى لو ألاقى طريقة أكون بيها معاكوا و صدقنى مش طق حنك زى مابنقول عندنا و تأكد إن مصريين كتير عايشين فى ظل عوكل أسوأ من معيشة الغزاوية المحاصرين بس من غير تغطية إعلامية ..

إحنا مش هنزايد على بعض فى البؤس لأن نصيب وطننا منه ماشاء الله يكفى و يفيض .. لكن مش لازم المعاناة تعمينا عن السبيل للخروج منها بدل ما نبيع كل شيئ مقابل الريح

Unknown said...

يا سيدي وهي دي عيشة اللي عايشينها

حتى لو كلهم بطلوا مقاومة من بكرة

هي دي عيشة؟ هو احسن واحد فيهم عايش ازاي يا تامر؟

ده رئيس الدولة بيقف على نقاط التفتيش بالساعات

ده لما اردوغان راح لهم وقف على نقطة التفتيش وعمل لاسرائيل فضيحة واعتذروا له

لما واحد في الظروف دي يقول عايز اعيش تبقى مأساة تبكي

يبقى الواحد مش عارف يعمل ايه يا اخي

بس ما تقدرش كمان تقول له حاجة، مش ح تبقى انت والزمن عليه

Unknown said...

ماهو ده اللي انا عايزة اقولهولك يا سهران

بس متخوفة تفهمني اني بازايد عليك

انا مقدرة رغبتك في الحياة

بس مش ح تعيشوا يا سهران، مش ح تعيشوا، لو انتوا بطلتوا مقاومة اسرائيل مش ح تبطل تذلكوا لانها مش عايزاكوا

هو انت لما تقف على معبر عشرين ساعة دي عيشة؟ انت ما شفتش العيشة بقى

لا، دي مش عيشة، ومش لازم تتعود عليها، انت انسان، ولك حق انك تعيش بكرامة

ووالله ما بازايد عليك ولا باحرجك وانا ايدي في المية الساقعة وانت ادرى بنفسك بس والله الحياة بكرامة تستاهل ان الواحد يضحي بحياته

لو بطلتوا مقاومة يبقى بتسرعوا بفنائكم

وانا برضه يمكن اطلع غلطانة
في كل الاحوال ربنا معاكوا

مواطن مصري said...

انتخبات وهمية كرسي وهمي

المشكلة يا ريت بيتخانقو على حاجة موجودة اساسا


هي فين الكرسي الحقيقي الي بجد

مش الي على الورق

Kalimalhus said...

نوارة ما تسخنينيش أنا دماغى دلوقت هتروح ميت حتة..

إحنا تحت إحتلال أسوأ من الإحتلال الصهيونى معيش 40% مننا تحت خط الفقر يعنى عددهم أكبر من الفلسطينيين اللى جوه و اللى فى المخيمات و اللى فى الشتات ..

نظامنا بيقتل مننا كل سنة ضعف اللى ماتوا فى مذبحة غزة و شرطتنا بتمسح بكرامتنا الأرض فى الأكمنة اللى على كل الطرق..

النيل بيجرى من تحت رجلينا و بنشرب مية مجارى و ناكل أكل كله مسمم..

كل ده ليه؟ .. لأن أمريكا ساندة النظام .. و سانداه ليه؟ .. عشان إسرائيل ..

إحنا مع الفلسطينيين فى نفس القفة و حبل خلاصنا واحد .. لا بنمن عليهم و همه كمان يمنوا علينا ..اللى ماتوا مننا مش أغلى من اللى ماتوا منهم بس دمهم كلهم أغلى من إنه يتباع برخصة محمول لإبن عباس النجس ..

Sahran said...

يا أخت نوارة

معلش قبل ما أنام واسيبكم بس أنا حابب أوضح شغلة مهمة

لما أقول عايز أعيش يعني ما غلطتش في البخاري ومين اللي ما بدو يعيش

وإذا كان الشعب الفلسطيني زي ما بتقولي بيعاني من ستين سنة ولكن هذا لا يعني أن نتوارث الألم إلى مالانهاية ونفضل نتحسر على حالنا العمر كلو

فلسطين مش راح تتحرر بالنوم في العسل وأنا معك في هالكلمة , بس للأسف الكل بيتكلموا وما بيعملوا إشي

هل سألت نفسك لماذا خالد مشعل يزوج ابنته أثناء الحرب على غزةولا يؤجله على الأقل لحين انتهاء الحرب؟؟؟
لو سألتيه راح يقوللك الحي أبقى من الميت ومش ضروري علشان مات 1500 مواطن والباقيين يتحرقوا بكاز

عزيزتي : أنا وأنت عارفين الصحيح ولكن يبدو أننا نتغاضى عن أخطاء من نحبهم ونضع الحمل كله على الآخر

أنا كنت بأكره فتح قبل الانتخابات وكتير من الناس زيي , بس بعد الانتخابات صرنا نترحم على أيام فتح , لأن فتح على الأقل تبنت سياسة تثبيت الفلسطيني في أرضه وكانت بتحول تمنع خروج الشباب من فلسطين وتقنعهم بالبقاء فيها
بس كل هادا تغير وصرنا اليوم نتمنى الساعة اللي ترجع فيها فتح

رئبال عبدالله said...

السيد سهران، تعبان ويريد الحياة ويدعو السيد تامر للحياة في فلسطين ليتمتع بالحق في الحديث عن فلسطين. ومن يقرأه هنا يتخيل ان الرجل مثقل تحت وطأة معاناة شعبه، مطحون في معيشته، يرجو السلامة تحت امطار السموم التي لا تتوقف عن الهطول
والحقيقة ان سهران يعلم ان سهران لا يحق له ان يحاضر بالعفة
وسهران يعلم ان سهران بالذات لا علاقة له بفلسطين
وسهران بالذات يدرك ان سهران ليس الا رقم على سلسلة رتب ورواتب
وسهران يجب ان يذهب الى النوم قبل ان يباغته الصباح بصورة معبرة عن قذراة مايفعله باسم من يحتلهم ويسومهم اسؤ انواع العذاب

رئبال عبدالله said...

الاستاذة نوارة


سهران صهيوني الديانة، اسرائيلي الجنسية.
ولا اعتقد ان مدونتك تقبل بالتطبيع مع اسرائيل

Al said...

عندما أنظر الى خارطة العالم والى كل رقعة من العالم دخل ايهاالمتأسلمين او الإسلاميون.. المتطرفين أو .... سمهم كما شئت, أتحسر على ما وصل اليه المسلمون تحت شعار الإسلام , أنظر الى افغانستان وباكستان, انظر الى العراق, انظر الى فلسطين ومصر الى الجزائر, الى السودان او لبنان, أنظر الى أكبر (لا- دوله أو شبة دولة) فى العالم منذ اكثر من عشرون عاما ....الصومال , أنظر حولك جيدا وخبرنى بصراحة وواقعيه, أين فى أى من تلك البقع نجد لهم نجاحا يفخرون به ويفخر به المسلمون, ويرجعونه الى ذلك النوع من الإسلام المتطرف الذى يتشدقون به... فزورة حماس: نوقع لا نوقع.. نوقع لا نوقع.. نوقع لا نوقع.. نوقع لا..... نوقع.. ولما كل ذلك .. فمحمية غزة تحت الحماية.. لعبة الموت قادمة..

Al said...

هل هناك فارق بين حماس أوالقاعدة أو حزب الله , او الأخوان المسلمين أو طالبان او الشبان المسلمين فى الصومال أو أى جماعة أخرى تتخفى خلف الدين , مجرد وجوه مختلفة لنفس العملة, ليس هناك فارقا على الإطلاق سوى ان كل منهم يعتقد, او يريد من الناس أن تعتقد, انه ممثلا لله فى الأرض, وأن من يتبعه فهو يتبع الله ومن يحاربة فهو يحارب الله. هذا ما يجمعهم وهذا ما يغسلون به أدمغة الناس من حولهم , لهم نفس الأسلوب فى قتل البريئ سواء كان ذلك فى العراق او أفغانستان او الجزائر او السودان او باكستان او خيبتستان وجهلستان وتخلفستان , قتلوا من المسلمين ومن بنى أوطانهم مئات أضعاف من قتلوا ممن يسمونهم أعداءهم أو أعداء الإسلام, هل هناك من يستطيع ان ينكر ذلك ؟؟, لا فارق فى تطرفهم و غبائهم وغباء من يتبعهم, كل ما يودوا ان يصلوا اليه حقيقة هو كرسى الحكم,

ahmed samir said...

انا متفق مع كل كلمة قالها مهندس حر و خصوصاً في اول تعليق ليه ع البوست ده

و ان كنت اكتر مشاكلي مع المصالحه المشئومة دي
هو البند الوذعي اللي بيقول
يحظر اقامه تشكيلات عسكرية خارج الهيكل المقرر لكل جهاز امني.

مش عارف ازاي حماس ممكن تمضي على شرط زي ده
ده بيقول بالعربي مطلوب تفكيك الاجنحه العسكرية للفصائل المختلفة
زي كتائب القسام و سرايا القدس و ابو علي مصطفى و غيرهم

يعني من الأخر تفكيك المقاومة المسلحة و عودتها للمربع رقم واحد
المقاومة بالحجر و السكين و بصورة فردية و ننسى بقى كل الخبرات العسكرية و تصنيع الصواريخ و القنابل اليدوية

دي اكبر مصيبة انا شايفها في المصالحه و مش عايز حماس تمضي ع البند ده مهما كان التمن

الاجنحه العسكرية دي كانت هي صمام الأمان ضد اسرائيل اما تحب تقتحم غزة و هي صمام الأمان ضد دحلان و ازلامه اما يحبوا ينقلبوا على حماس في القطاع

Unknown said...

سهران

"لما أقول عايز أعيش يعني ما غلطتش في البخاري"


انت يابني بتجيب الكلام اللي بيقطع القلب ده منين؟

لا يا حبيبي، ما غلطتش في البخاري

بس قدر الله بقى
اللي عنده احتلال له طريقة تانية يعيش بيها

ماهو عشان كده الاحتلال جريمة
عشان بيحرم الناس من العيشة

وبعدين بطل بقى اللي بتعمله على مدونتك ده :) خليت رنبال يفتكرك جاسوس


مهندس حر

بلاش مغالطات يا تامر

هي مش مسابقة معاناة واللي يكسب ح ياخد السلطانية

مافيش في الدنيا اوحش من الاحتلال
ما بالك احتلال عنصري استيطاني

اربعين في المية ايه وخط فقر ايه؟

خد فلوس الدنيا وعيش تحت احتلال عنصري صهيوني ووريني ح تعيش ازاي؟


رنبال

ده غلبان هو بس الظروف


Al

آآآآآآه مالك بقى ومال طالبان وحزب الله؟

طب دول فالحين
وحزب الله رجع ارضه وطالبان ان شاء الله ح يحرروا بلدهم لانهم شاطرين

مالك ومالهم؟

ومافيش داعي للكلام المكرور بتاع الاستتار وراء الدين

اشمعنى ماحدش بيقول كده على النظام السعودي؟

اشمعنى على قلبكوا عسل؟

عشان ما بيقاومش

كل المشكلة في كل الاسماء اللي بتقولها على اختلاف اتجاهتهم انهم بيقاوموا

لازم يوطوا ويـ.... زي ما احنا بنعمل

طب احنا مش قادرين، مش عايزين، تعبانين، يائسين، زهقانين.. ما نسيب غيرنا يقاوم يعني، وللا لا نرحم ولا نسيب رحمة ربنا تنزل؟


وسيب الصومال في حالها

وما تقعدش تنظر على قفا الناس

ما تآخذنيش لو فالح ما كانش بقى ده حالك

احمد سمير

اللي انا شايفاه ان حماس بتماطل

ودي حاجة كويسة

Kalimalhus said...

مفيش مغالطات فى اللى بقوله .. إنتى بطلى سنتمنتالية و إقرى اللى قلته بس من خلال وجهة نظر الأخ سهران بتاعة عايزين نعيش..

أما حكاية إذا كان معايا فلوس و عايش تحت الإحتلال فواضح إن الأخ سهران شايفها تنفع و مليونيرات الضفة اللى بيستقبلوا فى قصورهم ضباط الإحتلال بالأحضان أكيد برضه شايفينها ميت فل و أربعتاشر ده حتى وجود الإحتلال بيتيح لهم فرص مكسب أكتر .. و من مصلحتهم إستمراره و كمان الترويج لنظرية خلينا نعيش بين أبناء الطبقة المتوسطة اللى عندهم تطلعات و شعور بإنهم أفضل من الفقرا اللى همه فقرا عشان أغبيا طبعا و لما الأغبيا دول يبقوا همه بس المتمسكين بخيار المقاومة يبقى خيار غبى بيتجاهل معطيات الواقع اللى بيفهمها الناس الأذكياء اللى دليل ذكاؤهم طبعا إنهم عملوا فلوس و عرفوا يعيشوا..

Unknown said...

لا معلش
لما تقارن ناس تحت احتلال بناس مش تحت احتلال ايا كان ظروفهم تبقى بتغالط

ده زي كده ما واحد يقول لك انا مشلول فتقول له: وانا والله اتسرق مني تلاتين جنيه امبارح

Unknown said...

مهندس حر

لا خلينا نعيش دي صرخة يأس
انا شايفاها كده
لان اصلا دي مش عيشة
مهما كان معاه فلوس دي مش عيشة ولو هو حب يطنش على الاحتلال الاحتلال مش ح يطنش عليه

ينفع الواحد يعيش تحت قمع
بس ماثبتش لحد دلوقت ان حد عرف يعيش تحت احتلال

سامي said...

يعنى امبارح كانو ست تعليقات النهاردة الاقيهم سبعه واربعين ومضطر اقرا معظم الردود عشان تهمنى
استعنا ع الشقا بالله

سامي said...

انا متأثر جدا بالاخ سهران ودموعى بتفر من عينى وانا بكتب التعليق دا وبطلب الانضمام لجمعية (عايز اعيش) .. نوارة دا مش جاسوس دا ملحد (اقروا البوست الاخير فى مدونته اللى بينكر فيه وجود الروح والحياة الاخرة اصلا) عشان تعرفوا ليه الاخ حريص على الحياة _ اى حياة وعايز يعيييش.. ومن جديد بفكركم بالصور الللى حاططها فى مدونته وبتمثل واحدة من امهات المؤمنين وهى عارية تماما مع تعليقات ساخرة عليها وعلى النبى صلى الله عليه وسلم.. لا بجد هو فيه ايه؟

LiNa Sh said...

أولاً
سهران دا مايصعبش عليكي ولا مللي متر واحد

أنا أجزم لك إن مافيش فلسطيني حر أبيّ بيقول أنا عايز اعيش وخلاص
ويصرف نظره عن اللي هو ماشي ورا مين
عباس خيانته وتخاذله واضح وضوح الشمس
واللي لحد دلوقتي مايشوفش كدا
حقيقي مايستاهلش إنه يعيش ،، أي عيشة بقى

ثانياً : أنا مع مهندس حر في كلامه
في هنا حالات أسوأ وأشد بؤساً من الاحتلال
بل بالعكس ،، لما واحد يكون عارف إن العدو هو اللي بيعمل فيه كدا أهون له مليون مرة من إن بلده وحكومته تعمل فيه كدا

LiNa Sh said...

في حاجة عايزة اسألك فيها كمان

http://www.petitiononline.com/mod_perl/signed.cgi?ttwpdi

وثيقة التوقيعات دي أنا واخداها من عندك كنتي انتي حاطة اللينك

شوفي الإعلان اللي بيعرض في نص الصفحة كدا

Unknown said...

أنا مش مصدق ان فيه ناس بأت تفضل الأحتلال على أى ظروف تانيه!!!!!!!

فيه مثل مش عارف ايه نسبة تطبيقه هنا (أنا وأخويا على ابن عمى وأنا وأبن عمى على الغريب)

مهما كان انت عايش فى بلدك فى مأساه بس
أى حد فينا يسأل أى حد من أهله عاصروا النكسه والأنتصار يسألهم أيه طعم الأحتلال ويخيرهم بين الديكتاتوريه والفقر وبين الأحتلال وماتفتكروش ان عصر عبد الناصر كان وردى وكانت الناس متريشه وكده أينعم الناس كانت مبسوطه بالبؤين بتوع ناصر اللى جابولنا الكافيه بس اللى كان بيفتح بقه كان بيتشنير برضه .