Friday 16 October 2009

انا مبسوطة :)

عشان هيثم مناع قال انه متوقع عشرين صوت والتقرير اخد خمسة وعشرين صوت :)، دي مرحلة اولى وانا مبسوطة برغم كل النكد اللي شفناه في الاسبوع اللي فات، المفروض بقى حماس تبتدي تستعد للدفاع عن نفسها، عشان الاعلام الغربي، بعد ما مجلس حقوق الانسان صوت على التقرير، ح يركز على ان التقرير بيدين حماس اكتر ما ح يجيب سيرة اسرائيل، اللي متابع القنوات الامريكية زيي، غير ان ح يبقى ضغطه يا اما عالي على طول يا اما واطي على طول، بس ح يبقى فاهم انا باقول ايه، ليهم طريقة كده ما تعرفش تقفشها بس تحس انهم بينوموا الناس تنويم تغطاطيسي، زي مثلا استخفاف رويترز بالخبر وصياغتها دي
مين بقى الست دول اللي صوتت ضد التقرير غير امريكا، نعرفهم بس عشان احطهم في دماغي واغل منهم زي ما قعدت اغل من اليوم السابع لحد ما ربنا فضحهم فضيحة المطاهر يوم طلوعه ع المعاش
خمسة وعشرين دولة صوتوا على القرار من حبايبنا وصحابنا، والبرازيل وتشيلي على اخر لحظة غيروا رأيهم وصوتوا على التقرير
حداشر دولة امتنعت عن التصويت، اندال وجبنا، مع ان بينهم النرويج يعني، ده حتى النرويج ولاد حلال، وبريطانيا وفرنسا امتنعوا عن التصويت
وستة قادر ربنا يقصمهم صوتوا ضد التقرير
معرفة مين الدول مهم ح اقول لكوا ليه

يعني لما الكاميرون وكذا دولة افريقية تمتنع عن التصويت دي اشارة وحشة اننا اهملنا في افريقيا قوي واسرائيل عمالة تتوغل فيها، احنا الاول كانت علاقتنا بافريقيا احسن من كده، دي اصواتهم كانت في جيبنا، ونقدر بقى في الحالة دي نستخدم الية الشرشحة، اللي احنا متميزين فيها، ونعايرهم، احنا ساعدنا حركات التحرر في افريقيا بالهبل، مش مصر بس، الدول العربية كلها، دي الجزائر في عز ما كانت كفرانة كانت بتساعدهم.

ليه قلة الاصل دي بقى؟

حتى لو دلوقت اتوكسنا واسرائيل نطت ورا ضهرنا، يراعونا في ظروفنا دي، هم تبع اللي يدفع اكتر وللا ايه؟ عيب كده، هم رقاصة؟ وبعدين احنا دفعنا لهم عشان التحرر، اسرائيل بتدفع لهم عشان الاستثمارات، يعني المفروض اننا لنا فضل عليهم اكبر، مافيش مقارنة ما بين التحرر والاستثمار.

وده برضه معناه تقصير مننا، يعني احنا كده زي ما يكون خلينا بيهم في وسط السكة، لانهم بعد خروج الاحتلال كانوا محتاجين يبنوا بلدهم واحنا كان لازم نتواجد باي طريقة، انشالله جمعيات خيرية


لكن لما فرنسا وبريطانية (اللي اصلا اسست اسرائيل) يمتنعوا عن التصويت دي اشارة كويسة، لانهم اصلا منبع اذيتنا، وده معناه ان مجهود الناشطين هناك تمكن انه يعمل رأي عام كويس يضغط على حكومته بحيث انها تضطر تمتنع عن التصويت (اللي عادة بيبقى صالح اسرائيل بنتهم) عشان ما تحرجش نفسها قدامهم، ودي اشارة ايجابية


تردد بعض دول امريكا اللاتينية مش حلو، اشارة خطر، وده معناه اننا محتاجين نوطد علاقتنا بيهم، البرازيل انسحبت اثناء كلمة نجاد، وكانت ح تصوت لصالح اسرائيل لولا المجهود اللي عملته جمعيات حقوق الانسان المستقلة، المفروض برضه ان من الستينات امريكا اللاتينية دي في جيبنا

احنا كنا فين؟


احنا من بعد ما مصر وقعت اتفاقية السلام واحنا قاعدين بنخسر في حلفاء كان المفروض انهم معانا بدون مناقشة. دي خسارة كبيرة، ضيفها على الخسائر اللي لحقت بينا بعد توقيع الاتفاقية، بس احنا نقدر نتحايل على الاتفاقية دي.

الصين صوتت معانا بدون تردد وده معناه ان اسرائيل لسة ما سيطرتش قوي، عايزين نركز شوية، لان اسرائيل بالفعل بتحاول توطد علاقتها بيهم


اختصارا:
يعني ايه توطد علاقتها؟

مش يعني بتعزمهم على شاي وكيك وللا تعمل لهم عشا

يعني جمعيات اهلية واستثمارات وتصدير حاجات حيوية للاقتصاد بتاعهم، لو اتقطع يحتاسوا، لو سحبت الكام مشروع اللي عندهم ينهاروا، لو قفلت الجمعيات اللي هناك بيوتهم تتخرب... كده

احنا ما عندناش صناعة قوية عشان نصدر، واستيراد بضاعة منهم مش هو ده المفتاح، لانك مجرد سوق ح تقفله فيه الف غيرك يشتري، وانت اللي محتاج له مش هو اللي محتاج لك، اليد العليا خير من اليد السفلى يا مؤمن، عشان كده السياسات الجديدة بتاعة جمال مبارك ح تخربها فوق ماهي مخروبة لانها بتحولنا ليد سفلى.

طيب من هنا لحد ما ربنا ينفخ في صورتنا ويبقى عندنا اي صناعة مهببة على دماغنا، نقدر نعمل ايه؟

نقدر نعمل نشاط اهلي وحقوقي هناك، مش ح نبعت حد، العرب المقيمين هناك قاعدين بينيلوا ايه؟ انا باكره الرأسمالية، بس اذا مضطرين للاستثمار هناك ما يعملوا لهم كام مشروع كبير ومهم، ثم بالفعل العرب عندهم مشاريع هناك، بس بدل ما قاعدين يتداروا في اليهود ما يتلموا على بعض ويعملوا حاجة كده زي الوكالة اليهودية ويشدوا حيلهم شوية، اسرائيل خلت العالم كله رأسمالي وهي عاملة عندها كيبوتز

وشيلوا بقى الحكومات من دماغكوا خلاص، ادي انتوا شايفين وكستهم، هم عايزين اللي ساعدهم، احنا نقدر نساعدهم لو ركزنا بس.


نركز في الاستثمار والعمل الاهلي في الصين والبرازيل وافريقيا، اهي حاجة كويسة ورخيصة وبنت ناس، بحيث يبقوا محتاجين لنا، مافيش حاجة تضمن لك التصويت في اي داهية غير ان الدولة الفلانية تبقى محتاجة لك

هي اسرائيل عاملة زي الشبشب في رجل تركيا وهي عمالة ترقعها في الحيطة وتردها ليه؟

عشان محتاجة لها، اهي، تركيا عاملة تطبيع مع اسرائيل بس ما خيبتش نفسها زينا، بحيث احنا لا عندنا صناعة ولا زراعة بعد ما كان عندنا، هدينا زراعتنا وصناعتنا، او بالاحرى البنك الدولي ومن قبلها اتفاقية كامب ديفيد هدوها لنا عشان ما حدش يحتاج لنا ونبقى احنا محتاجين لطوب الارض وكل كلب وحشرة ماشيين في الشارع

طب خلاص، اعتبروا ان الحكومات دي مش موجودة اصلا، احنا عندنا ناس شاطرين في حاجتين قوي: الرغي والتجارة. اللي هم المصريين والفلسطينيين واللبنانيين. وسبحان الله ربنا كاتب على التلاتة دول الشتات ومنين ما تمشي تلاقيهم في كل خن في العالم.

انا واحدة صاحبتي بتشتغل في الصين وبتقول لي ان كل الناس ناشطة في الصين قوي، ومنهم الاسرائيلييين والبهائيين، واحنا عددنا كبير هناك، بالذات من التلات جنسيات المذكورة والجزائريين، بس مالناش بودي، طب ليه؟

عشان مش بيطيقوا بعض، معلش، وماله؟ كراهيتنا لبعض دي نابعة من كراهيتنا لنفسنا وكراهيتنا لنفسنا نابعة من الاضطهاد المبالغ فيه اللي بنعاني منه في كل حتة والاحساس المستمر باننا لازم نعتذر عن كينونتنا، وعن اننا اتخلقنا اصلا، وماله، ما اليهود كانوا كده، نستحمل بعض، ما جراش حاجة لما نقطع بعض بس في نفس الوقت يبقى لنا بودي يجمعنا على مصالح ويأهلنا ان يبقى لنا تأثير في المجتمعات اللي احنا عايشين فيها لحد ما ربنا يفك اسرنا احنا هنا من الحكومات دي.

ونبطل نصب وفهلوة، خالص بقى، لا على بعض ولا على الناس، عشان ده قصر نظر، لازم نكسب ثقة الناس بحيث ان لما نقول كلمة تبقى هي الكلمة، زي ما كنا زمان. هو كل مسلمين اسيا بقوا مسلمين ازاي غير اتعاملوا مع عرب لقوهم ناس مؤدبة ومحترمة وكلمتهم واحدة؟

ولازم نستقطب المتوطنين هناك، اللي ابوه عربي واللي جده عربي واللي جد جد عربي، ح تلاقوه واد واطي وعايز يهرب مننا، بس اكيد محتاج حاجة: محتاج شغل، محتاج فرصة معينة، محتاج يشتغل في عمل خيري عشان يحس بنفسه، صوته منيل وبيحب يغني وماحدش عايز يسمعه...الخ. مساعدته في احتياجاته تخليه يحبنا ويجدد احساسه بالانتماء لينا. وهو مهم، عشان لو انت مثلا في هولندا وواحد جد جده عربي، هو هولندي، وفي مجتمعه هولندي، بس كمان هو اصله عربي.


بس الاول نعمل بودي كويس، وح يبقى فيه فساد برضه في البودي ده، اعملوا حسابكوا مافيش حاجة خالي العيوب يا قصب، لازم نتعلم نفوت لبعض وما نفوتش للغريب، احنا بنعمل العكس، بنفوت للغريب ونقف لبعض على الواحدة، ده غلط، ده اللي مخلي الصهاينة متفوقين علينا لحد دلوقت، الصهيوني بيقول: اليهودي يهودي حتى لو بيشتم اسرائيل، واللي مش يهودي يطلع عينه، زي ما واحد من الحاخامات قال على بابا الفاتيكان بعد ما الراجل راح وزار نصب الهولوكست وعيط واشتحتف وكل حاجة راح طالع الحاخام:
He said about the holocaust victims "killed" not "murdered"!
لما لبشوا الناس ما بقاش حد عارف يتكلم معاهم، شراشيح يعني
طب اقول لكوا، مش احنا، احنا المصريين يعني، شراشيح وكل الدول العربية بتخاف مننا تكلمنا؟ طيب نفس المهارات دي بدل ما نستخدمها ضد العرب نخفض جناحنا لاهلنا ونسلط لسانا الوسخ ده على اللي ضدنا.


ولازم ما نسحبش خناقاتنا الطائفية والمذهبية والاقليمية برة معانا لما بنسافر.
انا ما اقدرش انكر ان بالفعل العرب ابتدوا ينشطوا ويعملوا شغل كويس، والدليل على كده ان اولمرت اتهزأ في جامعة شيكاغو والامر وصل للتشابك بالايدي. واصلا كسب اصوات لتقرير جولدستون ده حاجة ممتازة، ده مجهود الناشطين مش بس في حشد اصوات، ده مجهودهم على مدى سنين، طيب اذا كان العرب في امريكا وبعض الدول الاوروبية، بالتحديد شاطرين، ممكن العرب في اي حتة في الدنيا يوجدوا قناة اتصال ويستفيدوا من خبراتهم.


هو العربي المقيم في الخارج مش ح يعمل حاجة زيادة في شغله غير انه يركز شوية في ان له امة محتاجة مساعدته ومحتاج يخدمها ويكسب المحيطين به ليها من خلال تعامله هو في شغله، بدل ماهو قاعد مش مركز غير في نفسه وبس، يستوعب بس انه ممثل لامة، مجرد التركيز ذهنيا في حاجة زي دي ح يساعد.

ويفهم ان اي عربي، من اي دين او مذهب، ده من بقية عيلته، ويستحمله شوية، استحملوا بعض شوية وبطلوا قلة ادب بقى زهقتوني

ولما تجتمع فيك كذا هوية ده مش مبعث للحيرة ولازم تختار ما بينهم، دي فرصة كويسة انك تبقى دايرة متداخل معاها كذا دايرة



يعني لما تبقى مسلم وعربي وافريقي مثلا،



يبقى كل المسلمين حتى اللي مش عرب من بقية اهلك،



وكل العرب حتى اللي مش مسلمين من بقية اهلك،



وكل الافارقة حتى اللي لا عرب ولا مسلمين من بقية اهلك،



دي حاجة كويسة، تساعد على كسب حلفاء كتير وبالبلدي تكتر العزوة، ومش بس كده، دي تخليك همزة وصل ما بين تلات هويات ما كانش منتظر يتصلوا ببعض لولاك، واي تداخل ايجابي بينهم ح يبقى لك الفضل فيه،



ازاي وصلنا بيها انها تبقى مبعث للفتن؟

ومش كل واحد يقعد يبص لغيره، كل واحد زي ما بيركز انه يبقى حاجة مشرفة لنفسه وهو مقيم برة، يركز في انه ممثل لناس، ده اللي خلا العرب الامريكيين متقدمين عن بقية العرب في اي حتة في الدنيا، وعلى فكرة العرب الفرنسيين والبريطانيين كمان شاطرين،

وشغلهم مع اليسار كمان ساعدهم قوي، لان اليسار في اي حتة في الدنيا في الواق واق يسهل جدا كسبه للقضية العربية عشان هم بيحبوا يقفوا جنب البائسين والمنحوسين والكفرانين في عيشتهم، دي غواية يعني، وياريت بقى لو ينضربوا ويتقتلوا عشانهم يا سلاااام، متعة حياتهم يعني، وفي نفس الوقت مواردهم قليلة خصوصا في اوروبا والدول المتقدمة عشان الناس بتتعامل معاهم على انهم فريكس ولوزرز والعرب بيعملوا فلوس بسرعة، ويقدروا يدعموهم ماديا، يعني فايدة متبادلة

بالمختصر، اينما هاجرت في اي داهية دور على اللي بتدور عليه عادة: نجاح مادي وعلم (وعرفت من مينا ان العرب في الدول الاسكندنيفية بيعيشوا عوالة على المعونة وبيطنشوا على التعليم.. لا، نتعلم ونشتغل ونعمل استثمارات ما نركزش على الوظائف) وفي نفس الوقت تدور على حاجتين كمان
اليسار في البلد دي... واستحمل طرقة كلامهم معلش، ههههه هم طيبين والله بس هم بيتكلموا كده
والعرب والافارقة والمسلمين غير العرب، حتى لو كنت مش مسلم، ولا افريقي، يعني تبقى علاقته بيك انت كويسة وللا علاقته بالاسرائيلي؟ وح تلاقي عرب كتير قذرين قوي، استحملهم، غلابة، حتى اللي ح تلاقيه مرمي في حضن الصهاينة، ده من غلبه

ودايما غيرك يبقى محتاج لك وانت مش محتاج لحد، ودايما يبقى فضلك على الناس وماحدش له فضل عليك، واول ما بتروح فيه ناس بيبقى لهم فضل عليك، لما ربنا ينفخ في صورتك ترجع له فضل له مضروب في عشرة.

ودايما تبقى فاكر انت مين، ما تنساش، وما تنسيش ولادك، على رأي الافريكان امريكان دايما يقولوا:
Don't forget who are you
ده حتى تجار المخدرات بيقولوها، اوعى تنسى انت مين، لانك لو نسيت غيرك مش ناسي، وفي نفس الوقت تندمج بمعنى:

يبقى لك فضل اقتصادي ونشاط سياسي (بجد رابضوا في اليسار حتى لو رأسماليين، ما سوروس عامل لنا فيها يساري وهو ابن كلب) ولازم اسهام علمي، اذا ما كانش عن طريق دراستك انت يبقى عن طريق انك تتبرع للبحث العلمي لازم اللي معاه فلوس هناك يتبرع للبحث العلمي والعمل الخيري

فيه ناس بتفهم ان الاندماج انه يلوء ضبته وخلاص او انه ينسى اصله، ده مش اندماج، مش عيب نتعلم من اليهود، اليهود خلقوا هوية جديدة في المجتمعات اللي عاشوا فيها من خلال الاندماج اللا اندماجي، هو يهودي وله شخصية وله مجتمع وله ناسه وعاداته، وفي نفس الوقت له نشاط داخل المجتمع


ده بالنوسبة لعرب المهجر
احنا في تلاتين سنة بس خسرنا افريقيا، وخسرنا عدد من دول امريكا اللاتينية، وخسرنا دول اسيوية كانت معانا، وخسرنا الهند، الهند خسرناها، وكل الدول السابق ذكرها فيها عرب كتير، واغنيا كمان... طب قاعدين بتعملوا ايه يا حلوين؟


بالنوسبة لنا احنا هنا، الله المستعان، يا مصبر الوحش ع الجحش، وبرضه لما جرايبنا يبجو قوة برة ده يساعدنا هنا من غير اي محاولات انقلابية ولا فريدم هاوس، مجرد نشاطهم هناك ح يفضح فساد الحكومات هنا ويضعف موقفها ويخلينا احنا هنا نعرف نتصرف من غير مساعدة حد من برة، احنا مش عايزين حاجة من اللي برة غير انهم يبقوا كويسين وبخير وما ينسوناش

وبدل ما احمد زويل وفاروق الباز يفضلوا يحوموا حوالين مصر زي العيل اليتيم، وكل مرة ينضربوا ويرجعوا معيطين، مصر دولة فاسدة واحنا هنا علينا اننا نحارب فسادها، لكن نطتكوا انتوا الاتنين هنا كل شوية مش ح تفيد

يفيد انهم يدعموا الطلبة العرب عندهم، بل ويشجعوهم على دراسة الجولوجيا والفيزياء بكثرة ويتفوقوا فيها ويبقى فيه عدد كبير من العرب خريجين من تحت ايدهم
يعملوا جمعية لتشجيع العرب مثلا على العلم ويزقوهم في البحث العلمي
يعملوا رابطة للعلماء العرب ويرشحوا منهم كتير لجايزة نوبل، جايزة نوبل جايزة فاسدة، بس لها ثقل

ماحدش له دعوة بينا هنا احنا ما عندناش مشكلة غير دعم الغرب لكل من النظم العربية الفاسدة واسرائيل، وبدل ما تضطرونا اننا نروح نسمح جوخ لكوندوليزا وهيلاري وفي الاخر يدونا على قفانا ويفضحونا وانا اقعد هنا اانبهم واقرعهم، كل اللي احنا محتاجينه ان نشاط العرب يساعد في تقليل دعم اسرائيل والانظمة العربية

وعلى فكرة، فيه ارتباط شرطي ما بين قوة اسرائيل وقوة الانظمة العربية لان امن اسرائيل القومي انها تبقى الدولة الوحيدة القوية والديمقراطية في المنطقة عشان كده يلزمها ضروري انظمة فاسدة

لو الدعم العالمي لاسرائيل تراجع، ح يتراجع معاه الدعم للانظمة الفاسدة، احنا هنا بقى نعرف نتصرف واحنا ادرى بشعابنا

من غير بقى عمالة ووساخة واقباط مهجر وفريدم هاوس وهبل، انا عاذراهم والله، بس هم ماشيين في سكة ما توصلش، هم مش عملا، هم فايض بيهم، بس لبستهم العمالة غصب عنهم. مع ان الطريق اللي يوصل اسهل
slowly but surely
-----
مصر مددت المهلة للفصائل عشان تدرس المصالحة،

والظاهر ان مصر هههههه،

امبارح الراجل اللي بانسى اسمه ده دايما، الرجوب تقريبا، قال ان فيه "جهة عربية على اعلى قمة الهرم قالت لحماس وقعوا ثم افعلوا بعد ذلك ما شئتم" انا شامة ريحة كشري في الجملة دي: راضيه بكلمتين يا سيدي وبعدين ساعة الجد ابقى اعمل اللي انت عايزه هو ح يعمل لك ايه يعني؟ ح يشنقك؟

يا اما جامعة الدول العربية، يا اما الحكومة المصرية نفسها زهقت هههههههههههه

بس انا مش عايزة الاخوة الفلسطينيين من فتح يزعلوا من الكلمة دي، دي كلمة بتتقال ملايين المرات في مصر والناس بتفض خناقة

19 comments:

مواطن مصري said...

يا نوارة شفتي الجدعان


http://www.youtube.com/watch?v=FeoMUGiqlwg


من عند طفاطيفو


تظاهر طلاب جامعة شيكاغو ضد المحاضرة التي ألقاها أولمرت في جامعتهم عن القيادة، وانتقدوا قدومه إلى جامعتهم كونه ملاحقاً قضائياً بتهم فساد في إسرائيل ولكونه مجرم حرب .. وأثناء محاضرته -التي منع الإعلا...

مواطن مصري said...

قريت البوست تاني الدول الافريقية

الي صوتت ضد التقرير دول عبيد مش احرار


دول نيجرززززززززززززززز

عبيد ل اسيادهم البيض


انا معاكي اننا فعلا نسينا افريقيا و اهتمينا بقضايا سواء داخلية او عربية ضيعت مكانة مصر في افريقيا

عشان كدة لازم نتهم باحياء مشروع الوحدة الافريقية

و ان القوات المسلحة تعمل مشاريع

مشتركة في الصومال و دول حوض النيل

و لما نقول كدة ناس تطلع لينا ب القومية العربية

و الصراع العربي العربي


ما لو فية حد مريض الجسم كلة مريض لو الجسم اتعالج الجسم هيبقى حديد


فهمتيني

Sahran said...

عزيزتي نوارة :
الحمد لله مر التقرير على خير وهيو راح ينعرض على الأمم المتحدة ونشوف إيش راح يصير

أنا مش متوقع إنو القرار يغادر الأمم المتحدة فأمريكا راح تديها فيتو وتنهي المسألة

بس الشيء اللي بيغيظ وبيجلط هو ما فعلتموه في الأيام الماضية من التشهير بالسلطة وقلتم بأنها أجلت التقرير رضوخا لأمريكا وإسرائيل , وأنا هنا أسألك وأقل لك بالله عليك ما الذي حصل لأمريكا وإسرائيل الآن وكيف استطاعت السلطة هذه المرة أن تتهرب من رضوخها لهم إن كانت قد رضخت لهم بالماضي فعلا كما زعمتم؟؟؟
وهناك سؤال آخر لم تسلأوه لأنفسكم وهو من الذي طلب التحقيق في الجرائم أصلا قبل ما يأتي جولدستون ؟؟؟ أليست هي السلطة الوطنية ؟؟؟ ولاّ يمكن زيمبابوي هيّ اللي عملتها؟؟؟
ألم تكن حماس مدانة في هذا التقري مثل إسرائيل
http://www.alarabiya.net/articles/2009/09/16/85105.html

http://arabic.euronews.net/2009/09/16/un-calls-for-separate-gaza-inquiries/

وعلى العموم هي القرار صدر وخلينا نشوف كيف حماس بكرة راح تتعامل معه

ويا خبر بفلوس بكرة يبقى ببلاش

soreal said...

who voted what


http://www.maannews.net/eng/ViewDetails.aspx?ID=232673


am not sure why it was hard to find this... or am i ? :P

احساس لسه حى said...

انتى عاوزه القيادة بتاعتنا ولا القيادات العربية تدور على العمق الافريقى ولا اللاتينى ولا الاسيوى

الناس دى مركزه فى حماية مملكتها وسلطتها واى حاجه بتحصل بخصوص التعاون مع الدول دى حاجات ماشية لوحدها من غير اى دفعة من حكومتنا

يعنى ماشين بالتكالة

وكويس ان العدد ده صوت لصالح التقرير احنا كنا فين

البركة فى الفضائيات اللى احرجت الحكومات ومنعتها من حاجات كتير

Unknown said...

والنبى يانوارة تشوفى رد ع الأنسة دى أحسن خلاص حاطق وكل ما أرد عندها ماتنشرش الرد عشان هى حاجزة لنفسها كل الردود

http://catofdesert.blogspot.com/

Anonymous said...

قائمة الدول الـ47



دول ضد القرار:

امريكا

ايطاليا

هولندا

هنغاريا

سلوفاكيا

اوكرانيا



دول مع القرار:

روسيا

الصين

الارجنتين

البحرين

بنغلادش

بوليفيا

كوبا

مصر

غانا

الهند

اندونيسيا

الاردن

جيبوتي

السعودية

باكستان

الفلبين

قطر

سنغال

جنوب افريقيا

البرازيل

نيكاراغوا

جزر ماروتيوس في المحيط الهندي

نيجيريا

التشيلي



دول امتنعت:

بوسنة

بوركينا فاسو

الكاميرون

الغابون

اليابان

المكسيك

النرويج

بلجيكا

كوريا الجنوبية

سلوفينيا

اورغواي



غياب عن التصويت:

كريغستان

مدغشقر



رفضوا المشاركة في التصويت:

فرنسا

بريطانيا

Unknown said...

أولا" برافو عليكى يانواره أوى انك لخصتى التقرير ببساطه ووضوح وأهم نقطتين هما هروب افريقيا من يد العرب ومصر خصوصا" لحد ماوصل الأمر بتهديدنا بالنيل وده لما حصل فى عهد السادات هدد بضرب أثيوبيا بالطيران
ثانيا" مش متفق مع مواطن بوصفه الأفارقه بالنيجرز والعبيد لأن فى لغة السياسه دلوقتى مابأش فيه مكان للعواطف
ودول العالم ماشيه بقانون المصالح المشتركه يعنى بالبلدى أبجنى وأبجك
وزى مانواره قالت دى مش عزومة عشا ولا مسانده بالكلام
طول عمرنا بنساند فلسطين بالكلام وأخرتها ايه
ويوم ماتحركنا وحركنا الجيوش فى 48 وكسناهم أكتر
غسيلنا الوسخ كتر أوى قدام العالم
والعالم بأه بندر صغير زى ماحنا عارفين
ثالثا" اكتر حاجه كانت خايفه منها اسرائيل هو تخلى القوى الكبرى عن مساندتها لأن ده اللى عايشه عليه اسرائيل وهو ده جهاز التنفس الصناعى ليها وبالفعل وأكتر مكاسب التقرير من وجهة نظرى ان اسرائيل بدات تحس بتراجع بعض الحلفاء عن مساندتها
يعنى عدم تصويت بريطانيا اللى اصلا كانت السبب فى زرع اسرائيل وسطنا وفرنسا اللى بنت مفاعل ديمونه ده ليه دلاله كبيره اوى عند اسرائيل
وهايخليها تعيد التفكير فى بعض خطط المستقبل

Fahd said...

نوارة عندي اقتراح كتير ما ببيجي علي بالي وانا بزور مدونتك
ليه مش بتحوليها لموقع او صحيفة الكترونية

انا شايف انك كفيله بانك تغطيها كلها
لكن ده كمان هيدي فرصه للمشاركه من الناس اللي سواء بتتفق معاكي او حتي بتختلف لكن بالضوابط اللي احنا متفقين عليها
هتقدري تعملي اشبه بمدرسة مؤثرة اكتر وكمان مترتبه
مثلا هيبقي صعب اني راجع لتدوينة مثلا كانت من شهر
لكن لو علي موقع وتم ارشفتها في ابواب هيبقي سهل اكتر استعادتها

المدونة لها فضل كبير وهي اكثر شيء مناسب لنا لكن بالنسبة لك صارت المدونة زي شقة اوضتين وصالة وانتي عندك من خلال افكارك جيش عيال زي فيلم الحفيد كده

ياريت لو موقع يكون علي النيل كده وشرح وبرح و600 متر ومستويين زي شقة محمد هنيدي
اللهم لا حسد

مهندس مصري بيحب مصر said...

التصويت على تقرير جولدستون
مع: الأرجنتين والبرازيل والصين وروسيا والبحرين ، وبنغلاديش ، وبوليفيا ، وشيلي ، وكوبا ، و جيبوتي ومصر وغانا والهند واندونيسيا والأردن وموريشيوس ، ونيكاراغوا ، نيجيريا ، باكستان ، الفلبين ، قطر ، المملكة العربية السعودية والسنغال وجنوب افريقيا وزامبيا

ضد : الولايات المتحدة والمجر وايطاليا وهولندا وسلوفاكيا وأوكرانيا

الممتنعون عن التصويت : بلجيكا ، البوسنة وبوركينا فاسو والكاميرون والغابون واليابان والمكسيك والنرويج وكوريا الجنوبية ، وسلوفينيا ، وأوروغواي

لا تصويت : بريطانيا وفرنسا ومدغشقر ، وقيرغيزستان ، وأنغولا

Anonymous said...

امتناع البوسنة عن التصويت مؤشر سلبي، وهو نتيجة طبيعية لأننا خذلناهم فعلا في محنتهم في حين انه أمريكا ظهرت في الصورة فورا واستلمت المبادرة وأظهرت تعاطف عملي وإن كان كاذب..

يعني اذا كنا بنقول انه المعاهدة التي وقعها علي عزت بيجوفيتش ظالمة للمسلمين وكان اسمها دايتون برضو على فكرة، فالحقيقة اننا مسبنالوش حل تاني ولا اختيار تاني فوقعها وهو بيقول:"هذا ليس أفضل ما نحصل عليه.. ولكن شيء أحسن من لا شيء"

Anonymous said...

على فكرة بقى، في حتتين لو مقلتلكيش عليهم هطق واموت..

خدي بصي ومتعي عينيكي، واحدة عالفيس بوك اسمها وفاء داوود (شكلي همسحها من عندي قريب)

http://www.facebook.com/group.php?gid=157332954449

عمالة تبعتلي جروبات الحزب الوثني، هو لسة حد بيبجح ويقول انه مؤيد للحزب الوثني؟

Unknown said...

عموما انا جاى اعلق بس عشان العنوان

ربنا يبسطك كمان وكمان

:)

Kalimalhus said...

تصدقى أول ماقريت العنوان ما صدقتش إنى دخلت المدونة صح .. أصل إنتى ممكن تنكتى أو تضحكى لكن حكاية الإنبساط دى مش من طبعك خالص ..

بس إنتى عندك حق المرة دى .. و الموضوع ده هيكون له أهمية كبيرة و إحتمال يكون تاريخ يتأرخ بيه بعد كام سنة .. بداية شيئ ملامحه لم تكتمل و لكنه فى إعتقادى أفضل ألف مرة من الضبابية العكرة اللى إحنا عايشينها دلوقت ..

المهم .. اللهم إجعله خير

بهيج الشرير said...

والنبي ياأبلتي أنا عندي سؤال، هو عوكل الأول ملك الفياجرا وقاهر الهكسوس بيتاجر في البطاطين والملايات المستعملة؟ ليه كل ماتحصل كارثة في أي حتة يقوم باعت طيارة البطاطين وقايل من عوكل الأول ملك الفياجرا إلى ضحايا الكوارث وحثالة القوم

Unknown said...

انت كنت عايز صور من ماك عشان تقدم شكوى للسناتور عن دايرتك

ادخل على لنك مدونته ح تلاقيه نزل صور كتير وحكى بالتفصيل

بهيج الشرير said...

أنا بعتت للسيناتورز الإتنين بتوع الولاية اللي أنا عايش فيها وبرضه بعتت لممثل الكونجرس عن دايرتي وحطيت لنك مدونة دماغ ماك في الإيميلات كلها

منظور شامل للحياة السعيده said...

بوست رائع

رائع رائع

مش عارف اقول ايه

بس رائع

منظور شامل للحياة السعيده said...

اؤيد رأي fahd بشده