Wednesday 28 October 2009

والله لفتت نظري يا عوكل يا خويا

تحديث لا بد منه:
من حيث انه خايف، اه خايف، من حيث انه ح يمشي لا مش ح يمشي، عشان جاتلي تعليقات واتكلمت مع ناس، من ضمن الناس اللي كنت باتكلم معاهم واحد بيقول لي: يتصدروا له قانون يا نوارة خلينا نخلص... مش ح نخلص
اولا: مهم جدا نعرف الكلام جاي من مين، الكلام جاي من عماد اديب باستصدار قانون يعفيه من المحاسبة لو عايزينه يمشي وما يجيبش ابنه. عماد اديب صديق شخصي له بيقول له يا محمد عشان تبقوا عارفين يعني.
ثانيا: هو فعلا عايز يستصدر القانون ده، بس مش عشان ما يجيبش ابنه
من امتى عوكل بيوعدنا بحاجة وبيعملها؟ فاكرين ايام اضراب اربعة مايو لما جه تسعة وعشرين ابريل ادا الناس علاوة تلاتين في المية ولما اضراب اربعة مايو باظ يوم خمسة مايو رفع البنزين خمسة وتلاتين في المية؟
عادي، ده المعتاد، ابتسم انت في المنوفية حضرتك
هو عايز يستصدر قانون يحميه ويحمي ابنه من المسائلة وبررررررررررضه ح يجيب ابنه، اول ما القانون ده، لا قدر الله، يتم استصداره، عشان عادي، هو متعود يسحبنا من ايدنا بالراحة واول ما نديله ضهرنا يلسعنا على قفانا
انتوا مش حاسين وللا ايه؟ ما ورمش؟ انا شخصيا قفايا ورم... ما اعرفش بقى انتوا من كتر الضرب ممكن يكون نحس؟
وماحدش يستهين بانه خايف من الشعب، ايوة خايف منه وشاف بعينه صورته وهي بتدهس بالجزم، وعارف اننا بنكرهه، وعارف ان فيه ناس كتير تتمنى انه يتحاكم، وعارف انه عامل جرايم
بس ده مش معناه انه عايز يمشي ولا ما يجيبش ابنه، ده معناه انه عايز يأمن نفسه وابنه بزيادة
ثالثا: على فرض ان طرح عماد اديب صحيح، انا بقى عندي يقعد كمان عشرين سنة على قلبي لحد ما يسري عليه اللي بيسري على كل حي (وللا ايه؟ وللا هو مش حي؟) ولا اني استصدر قانون يعفيه ويعفي كل من ييجي بعده من المحاسبة
وبرضه ماحدش يقول لي: ماهو بيتحايل على القانون، لما يبقى فيه قانون يدينه وهو يتحايل عليه تختلف تماما عن ان يبقى فيه قانون بيقول له: اسرق براحتك
رابعا: ما تستهونوش بكلام عماد اديب، عشان ده كلام عوكل نفسه، ده الناطق باسم شخصه المعظم
وما تصدقوش عوكل، عوكل دايما بيضحك علينا
وما تستهونوش بالشعب عشان هو فعلا يخوف... الظاهر عوكل بيفهم في الشعب المصري اكتر منكوا
عوكل شكله عايز يطلقنا وخايف نطالبه بالنفقة فبيقرفنا عشان نعمل خلع
باعت لنا رسالة مع عماد اديب يقول لنا: سيب وانا اسيب
قال ايه "كل رئيس" مضطر انه يختار خلفه عشان يضمن انه ما يتحاكمش، هذه الحكمة الغراء جات لنا على لسان عماد اديب واللي ما يعرفش ده صديق شخصي لعوكل، ما يتهياليش ان فيه حد ما يعرفش
يعني عوكل جاي لنا بالمفتشر يقول لنا، اضمنوا لي اخرج انا والعيال نضيف يا اما والله اسيب عليكوا فرانكشتاين
للدرجة دي عارف هو عامل ايه؟ ايه يا ناس اللي بيتقال لنا ده؟ احنا قاعدين في بلد وللا في الجبل مع المطاريد؟ وعايزنا عشان خاطر عيونه نطلع له قانون يخرجه بالسلامة ومش مهم بعد كده نلبس في مين
مش كده؟ بعد ايه؟ بعد ايه يا عوكل؟ بعد ما خربتها؟ بعد ما سوست البلد وخوختها وسبتها للامريكان يتغلغلوا في كل خلية فيها والبلد ما بقتش بلدنا خلاص؟ تولع بقى، يجيلنا سعد الدين ابراهيم، يجيلنا اسامة الغزالي حرب، يجيلنا المهبوشة ام كدش اللي لا محصلة ست ولا راجل وهي الدليل الحي على صحة نظرية داروين، يجيلنا جدري مالكش دعوة، دي شغلانة الامريكان يحطوا الحاكم الاقليمي اللي يعجبهم، انت الحمد لله جبت ضرفها وعملت اللي عليك وعايز ترتاح بقى وتسلم شعلة الخراب لجيل الشباب، وبتهددنا بالعاهة المستديمة اللي بليت بيها البشرية؟ طب اللي قبلك والناس بتترحم عليهم من غير اي مناسبة لمجرد انهم ماتوا واحنا من عادتنا اننا نترحم على الميت حتى لو كان خط الصعيد وريا وسكينة وانت حضرتك زهقت مننا واستكفيت وعايز تمشي
لا بقى يا سيدي، تموت وسطنا زي ما التانيين ماتوا وسطنا وخلاص، عشان على الاقل تلاقي حد يترحم عليك من غير مناسبة برضه
هو انت خربتها قاعد وعايز تخربها ماشي؟ انت ايه؟ يا اخي احنا لو بينا وبينك دم ما كنتش عملت كده
ثم ايه "كل رئيس" مضطر.. ده فين يعني؟ كل رئيس فين؟ في مصر صح؟ طب ايه قولك يا عوكل ان انت الظاهر فعلا الخوف سيطر على مخك وما بقتش تعرف تكتك زي زمان؟ عشان احنا ما جاش على بالنا نحاكمك
تصدق؟ انت دلوقت اللي لفتت نظرنا انك تستاهل تتحاكم على المعاهدات اللي وفقها بعت البلد، وعلى فزعتنا لما نعرف ان ناس رافعين قضية عشان ميدان التحرير متباع لهم، وعلى سرطنة اكلنا، وعلى بيع بلدنا، وعلى الفتنة الطائفية اللي خلقتها وكل شوية تزكيها، وعلى شهداء المواصلات برا وبحرا وجوا، وعلى تسديدك لرزقنا: اللحمة فيها حمى قلاعية، الفراخ فيها انفلوانزا، السمك فيه تلوث، قوم حتى يا راجل الفول والطعمية تحط لنا فيهم مجاري؟ وعلى تكبيلك للبلد بديون بفوايد مركبة وتخطيطك لهدم كل بناها التحتية عشان البلد تفشل في سداد الدين يقوم البنك الدولي يضع ايده على بنيتنا التحتية ويديها لمستثمرين اجانب وانت تاخد كومشن، وعلى تلويثك لهوانا وسمانا وتبوير ارضنا، ده انت فضيحتك وصلت لالكس جونز، وعلى كل اللي عملته، اللي ما يتوصفش باقل من انه جرائم حرب ضد الانسانية
وتصدق بقلبنا الابيض ما كناش واخدين بالنا انك ينفع تتحاكم، انت بقى عشان عارف انت عامل ايه وخايف من المحاسبة، وعارف انت مخلف ايه وبتهددنا بيه
ومش عاجبك اعملي خلع يا اما والله كل يوم علقة
انا طالبة توضيح عاجل من الاخوة المنايفة، فيه كده في الدنيا؟

22 comments:

هتشوفوا said...

هو دخول الحمام زي خروجه, والله ما هنسيبك, خلاص زهقتوا من قرفنا, وعايزين ترتاحوا, طب على قولك الكفن مالوش جيوب, رجعوا بقى اللي نهبتوه, ولا انت عايزنا خلاص ننسى المصايب اللي عملتها,

Unknown said...

سبحان الله
الراجل مش عارف يموت عشان يهرب من المحاكمة

وهو عارف ان المعتوه اللي هو جايبه ده ما ينفعش بتلاتة نكلة

ههههههههههه
عوكل اتزنق
اتزنق في عمره مش عارف يخلصه

هتشوفوا said...

يا سلام لما بكره يرموه في دار مسنين ويلبسوه بامبرز, ويبقوا قرفانين منه, ويجيله زهايمر,ويبقى كلهم مش طايقينه, وماما سوزان تفضل تتنأور عليه وتقوله أنا عارفة ربنا سايبك ليه الله, أنا نفسي أشوف اليوم ده,

Unknown said...

الناس اللي بتعيا دي ناس شالت هم في حياتها
تعبت في حياتها
اشتغلت وكافحت وشالت هم وحزنت وفرحت
عشان كده لما بتكبر صحتها بتتدهور لانها استهلكت كل طاقتها في شبابها عشان تشتغل وتبني مستقبل لعيالها

لكن هو عمره ما عمل كده
ما شالش هم عشان كده مش ح يجيله زهايمر
ما جريش في شبابه وشقي وتعب عشان كده مش ح يعيا ولا ح يتهالك

ح يفضل قاعد متصبر كده زهقان مننا واحنا زهقانين منه

mido said...

يا استاذة مبارك قال :

باق فى منصبى حتى أخر نفس

:))

هتشوفوا said...

ايه المشاعر دي كلها, أنا معاكي يا معلمة, بس برضه مفيش حاجة بعيدة على ربنا

Unknown said...

تعتقدى يانواره فعلا" أنه يكون خايف من مسائله قانونيه بعد المعاش الأختيارى طبعا" ؟

أنا مش عارف الفكره دى منين جاتلكم ؟

عوكل يخاف من الشعب ؟
ههههههههههههه
يانهار !!!!!

وأنهى شعب ده ؟
الشعب اللى اولادده بيموتوا من الأغذيه المسرطنه ؟

الشعب اللى صحته أتهدت من أكل بطعم وريحة المجارى وصدره باظ من السحابه السودا ؟

الشعب اللى الأنتخابات بتتزور تحت بصره وغالبا" ناس كتيره من الشعب ده بيشاركوا فى التزوير ؟

ولا الشعب اللى هاييجى جيمى ويحكمه علشان هو كمان عايز يجرب مش علشان والده خايف ؟

الشعب اللى لسه ما ماتش وفيه الروح أقل كارثه من دول يحاكم رئيسه وهو فى السلطه ؟

مابالك ب 30 سنه كوارث والناس لسه نايمه ؟

أيه اللى هايخليهم يصحوا يعنى ؟

يانههههههههار - عوكل يخاف مننا ؟

أيش حال هو اللى مربينا ؟
أحنا شعب أصيل مانعملش كده فى اللى مربينا

Unknown said...

لا عوكل مش خايف من الشعب

استنوا اعمل تحديث بس اوضح حاجة

مش فاهمه said...

مقاله فهمى هويدى فى هذا النطاق
http://www.egyptwindow.net/Article_Details.aspx?News_ID=5319
و بالمناسبه الناس اللى بتعيا فى اواخر ايامها و بتصاب بالعمى و الشلل و كده بيبقى ربنا بيحبها علشان عايزها تخلص ذنوبها فى الدنيا و تطلع فوق خالصه مخلصه

حواديت مصرية said...

ياست نوارة انا باحبك وباحترمك كناشطة ومعارضة طبعا لحسن تطمعى فى الجواز انا عاوز اقولك ارجو انك تراعى شعورنا كمنايفة واحب افكرك ان معظم اقطاب المعارضة فى مصر منايفة ومنهم حمدى رزق وطبعا استاذنا الكبير ابراهيم عيسى واحب اقولك ان معظم شباب قريتنا معارضة كان حزبنا هو حزب العمل وكنا نخوض حروب فى القرية مع بتوع الحزب الوثنى لكى ينجح مرشح العمل وكان بينجح عندنا وبعد تجميد الحزب اقسم الشباب الى اخوان وغد ومش ذنبنا ان المنايفة منها الحكومة ومنها المعارضة واحب اقولك ان منذ وفاة السادات لم يسال احد فى المنوفية عوكل اصلا ناسى اصله وفصله وناسه واحنا كمنايفه نعارض وصول جيمى للحكم وعاوزين اى حد مكانه واعتقد ان اى عيل فى شوارع مصر هيكون احسن بكتير من البلا الازرق ده ارجوكى لاتتعمدى الاساءة للمنايفة والا اتهمتك بمعاداة السامية هههههههه

أبو عمر - الصارم الحاسم said...

لو الصفقة انه نسيبه يمشي مقابل ان ننقذ ما تبقى من البلد فالصفقة رابحة

وتذكروا ان الثورة الايرانية فعلتها عندما تركت الشاه يرحل عن ايران ...وكلكوا عارفين نهايته وكيف اذله الله في ايامه الاخيرة ...فان تركناه-مبارك- الى ربه فلسنا خاسرين والله... خاصة في ظل الظروف الحالية وتركيبة العشب المصري الذي من المتسحيل تقريبا ان يقوم بثورة

اعلم ان كثيرين سيرفضوا هذا الكلام

أبو عمر - الصارم الحاسم said...

على فكرة مش ضروري يكون العيا في اواخر الايام تخليص ذنوب عشان يطلع مخلص


قد يكون كذلك وقد يكون ممن قيل فيهم
:
لهم في الدنيا في خزي وفي الآخرة عذاب عظيم

حسن على said...

كلمة "كدش"فصيحة وعلى علاقة بالاكديش" (فرس صغير الحجم من اسيا الوسطى لة"معرفة" رأس منفوشة عالية ميدو: .

يا استاذة مبارك قال :

. باق فى منصبى حتى أخر نفس
ياة...دة بيشرب سيجارة طويلة قوىىىىىىىىىىىىىىىىىىىىىىىىىى نوارةنجم: اختارى بين -استاذ عوكل ...او -عوكل بية وذلك مراعاة لأداب التخاطب مع العواكل

Ahmed Fawzi said...

يا نوارة و هو إيه ذنب المنايفة ؟؟ شايفاهم عايشين فى سعادة و هنا ؟ ما هو مصرى فى الأخر
بلاش العنصرية المصرية :)))

Unknown said...

اذن
فانا اطالب المنايفة الشرفاء بتوضيح فوري
واصدار بيان تبرئة

زي ما فيه يهود ضد الصهيونية اكيد فيه منايفة ضد مبارك

ههههههههههههههههههههههههههههههههههه

أبو عمر - الصارم الحاسم said...

آآآآآآآآه ده عايز قانون

عند امه يا ادهم

Mohamed said...

والله لو المنايفا فعلا مع جموع الشعب ضده فانا بطالبهم انهم يشلحووووووه.

ههههههههههه

Unknown said...

زى ماقال الصارم

لو فعلا" هو خايف للدرجه دى

معظم الشعب طالب الخلع
يعنى جاب من الأخر ووصل لأخر درجات التقاضى على طول أول لما شم انه فى نيه للتفريق بينا وبين عوكل

الشعب طالب الخللللللللع

لأن الخلع هنا ممكن يساوى 1% أمل جديد

الشعب بيقول نسألك الرحيل
بس شرط واحد - خد كل العيله معاك وماتسيبش حد
نختار أحنا
بالله عليك ياشيخ
سيبنا نختار
هه
احنا بينا عيال وميصحش يشوفونا بنبهدل بعض
دى عشرة 30 سنه

Dr Nemo said...

*اقتباس
"الناس اللي بتعيا دي ناس شالت هم في حياتها
تعبت في حياتها
اشتغلت وكافحت وشالت هم وحزنت وفرحت
عشان كده لما بتكبر صحتها بتتدهور لانها استهلكت كل طاقتها في شبابها عشان تشتغل وتبني مستقبل لعيالها

لكن هو عمره ما عمل كده
ما شالش هم عشان كده مش ح يجيله زهايمر
ما جريش في شبابه وشقي وتعب عشان كده مش ح يعيا ولا ح يتهالك

ح يفضل قاعد متصبر كده زهقان مننا واحنا زهقانين منه"

معلش يانواره انا مختلف معاكى جملة وتفصيلا هنا
حتى لا يقال اننا متطرفين او معارضين من اجل المعارضه وفقط
الراجل تعب فعلا
وشقى فعلا
وعمل اللى عليه فى وقت معين من عمره فعلا
هو من قواد حرب اكتوبر وفتره اعاده بناء الجيش المصرى
واول ما مسك مصر كرئيس
اظن
واقترح
واميل للاخير
انه كان ناوى يبقى محترم
ولكن اللى حصل
هوه التطبيق الحرفى للمثل المصرى" يافرعون ايه فرعنك...... قال ملقتش حد يلمنى"
مبارك لم يجد من يلمه فقط
بل ووجد من فخمه
وعظمه
ونفخ فى حكمته
وحلاوة صنعته
وفخامه ولمعه جزمته
وجمال تراب الارض تحت مشيته
كان من فساد النفس البشريه ما دعاه للركون الى هذا
والسعاده به
والوصول من مجرد الانبساط انه بيتقاله كده
الى الاقتناع انه كده فعلا
لالالالالا يانواره اعذرينى
مبارك تعب فى مرحلة من حياته كان فيها عسكرى جامد فحت
ولكن لما وصلل لرئاسه خاب
من الاخر
صاحب الحكمة الابديه يحاسب على خيبته كرئيس
يحاسب على مثالبه
ولكن لا ننزع منه محامده السابقه"قبل الرئاسه" وكفى

Unknown said...

بالظبط كده
تخيلو ان في قانون وهم بيعملو كده
امال لو متأكدين انهم مش هيتحاكموا هيعملو فينا ايه؟
هيعلقونا من ودانا علي الكباري؟

الخوجة said...

دى افكار جهنمية ياما المخيخ انا ماتخيلت كده وانا منوفى الاصل والفصل وحتى اخمص اخمص نخاعى يعنى تفكيرى منوفى اشد من الصعيدى يعنى تقدرى تقولى انا صاحب نظرية لو لم أكن منوفيا لوددت أن أكون منوفيا
رأى أيه
دا أنا واحد من الناس كنت عامل مشروح وراح بسبب ريحة مبيدات ريحة تاجر ضحك على وقالى ان هديك حاجة زى الفل
هتقضى على الحشرات وماكان الا انها خسرتنى الجلد والسقط وقعدت جنب الحيط
مين دخل المبيدات دى مصر بأقول رائحتها مش المبيدات نفسها كمان
ايه ده كل الليلة علشان يطلع قرار جايز بس مأظنيش كل حاجة فلتت
فعلا كل حاجه فلتت

حسن على said...

عوكل اتزنق
اتزنق في عمره مش عارف يخلصه" اجمل تعليق بليغ ...وهو وان جاء نثرا حرا ...الا انة يرقى فى هذة اللحظة لسمتوى الالشعر. دعاءلهى تفك زنقتة بسرعة يا رب ب ب ب