Saturday 24 October 2009

ده طلع ايش عرفنا احنا؟

يا جاهل منها لها له له
ايش عرفكوا بتطور العالم السريع وتفضلوا كده تفكيركوا متوقف عند الستينات؟ الله يرحمه السادات


لا انا ما اتجننتش، ده جزء من اقوال جمال مبارك رضي الله عنه وارضاه
هو طبعا الله يرحم السادات مش جابكوا؟
ايش عرفنا احنا بدور مصر الاقليمي المهم؟ الكلام عن تراجع الدور المصري وقفاها اللي بتاخد عليه بمضرب الدبان ده كلام انشا، مصر مهما كان، ست كبارة، وقد والدتنا، وكل الناس بتحترمها، اذا ما كانش عشان حاجة يبقى عشان سنها ومركزها
موضوع ضرب الحدود واختراق مجالها الجوي ده كلام انشا
موضوع ان السيد الوالد بلسانه قال: اللي بيدخل من حدود باخطر اسرائيل واللي بيخرج باخطر اسرائيل ولو ما اخطرتهم هم شايفين من المونيتور وح ينزلوا لي بنفسهم ده كلام انشا
موضوع اننا ما بقالناش منتج محترم نصدره ونعرف نضغط بيه على اللي بيتعاملوا معانا اذا احتكم الامر ده كلام انشا
موضوع ان دول حوض النيل مدية ودنها لاسرائيل واحنا مش عارفين نفتح بقنا ده كلام انشا
موضوع اننا لما حبينا نرشح واحد لليونسكو رحنا اخدنا الاذن والسماح من الاسرائيل وبرضه ادتنا على قفانا ده كلام انشا
العالم بيتغير
ييجي واحد وللا واحدة اغبيا زيي يسألوا طب ملامح التغيير ده ايه؟
ايش عرفكوا انتوا؟
هو ليه محسسني انه بيتكلم عن حاجة اخترعوها اول امبارح الساعة عشرة الصبح؟ اللي بيقوله ده كان بيتقال في القرن التمنتاشر واثبت فشله ونفس اللي انتجوا الافكار دي عدلوا فيها كتير، ده امريكا وحش الرأسمالية بتأمم اهي وبتعمل تأمين صحي، طب يقرا كتب اتكتبت في العشرينات على الاقل بدل ما هو قاعد في متحف الشمع بيكلمنا عن الفكر الجديد
ده ناقص يكلمنا عن اكتشاف نظرية داروين بوصفها ثورة في العلم ح تغير العالم
قال واحنا اللي كنا بنقول له ايش عرفك بمصر؟ هو ايش عرفه احنا سنة كام اصلا؟ بصوا والنبي بيقول ايه؟
موضحاً أن مصر يجب أن تظل متواجدة على الساحة الدولية بعد أن ولى زمن المقاطعة عندما نختلف مع أحد. وشدد جمال مبارك على أنه يشعر بتفاؤل نسبى من الجهد المبذول خلال السنوات الماضية، وأن محافظات الصعيد بدأت تأخذ حقها فى فرص العمل، سواء من استثمارات الدولة أو القطاع الخاص، موضحاً أن القطاع الصناعى حقق خلال ٤ سنوات ما يفوق المحقق خلال ١٥ سنة.
طب ده عايش فين وسنة كام؟
زمن المقاطعة ولى ازاي اذا كانت امريكا اللي في ايدها تعجن العالم لما فرنسا رفضت الانضمام لها في غزو العراق قاطعت المنتجات الفرنسية، ده كان سنة الفين وتلاتة يعني يا عم الكتكوت ياللي عايش سنة الف وسبعمية واحد وخمسين وبتكلمنا عن التجديد وفاكر نفسك محمد علي باشا الكبير ووصفك محافظ قنا بإنه من ابناء مصر العظام والمخ والاعصاب
بس فيه نايب قال عليه "رائد الاصلاح في الالفية الثالثة" طب حيث كده بقى، وبما اننا يا افندية من بتوع فكر الستينات
فـيصح اننا نبحث عن لقب كويس قوي خالص وارجوكو ما يمكنش ابدا نتكلم بالطريقة البطالة دي مرة تاني عن جنابه، اه يا زلنطحية يا دون، احفظوا مركزكوا، انا بدي اعرف ايه سر الحئد الدفين اللي عامي قلوبكوا عن الحقيقة، صدقوني (بتضخيم الصاد) انتوا اللي بتجنوا على انفسكممممم، لو مافيهاش اساءة ادب يصح اني انتظر منكوا شوية القاب خصوص افندينا


بس الحقيقة، العمدة قال لك: والله انا مش بانافق، اللي شايفة على ارض الواقع فوق الخيال
ليه؟
عشان بقى عندنا صرف صحي
ههههههههه
اي والله قال كده
اهو في الخبر ده
ايه فيلم سلامة في خير ده؟
بس الحقيقة، انا اضايقت (مع تضخيم الضاد قوي زي حسين صدقي) من الطلبات المرفهة اللي مالهاش داعي ابدا، اذا كان العمدة بذات نفسه قال ان اللي شايفه على ارض الواقع يفوق الخيال امال ايه لازمة الكماليات اللي طلبوها دي:
وطالب أحد الحضور بإنشاء مكتب بريد، واقترح عماد عبدالهادى إنشاء مدرسة ثانوية تجارية، وعندما سأله جمال مبارك: هل لها الأولوية؟ قال: «عندنا ٦ آلاف طالب يذهبون لمراكز أخرى.. العيال هيروحوا فين؟!»


واستنكر عبدالمحسن حافظ زيادة فوائد الصندوق الاجتماعى للتنمية، واستنكر سيد الخولى عدم تطهير الترع ونوهت الدكتورة منى الشحات إلى ضرورة حل مشكلة صعوبة إجراءات ساقطى القيد وطالبت بإلغاء التعليم التجارى، وطالب د.بركات بتخفيض أسعار أراضى المدن الجديدة.


ما كانش يصح ابدا انهم يتمادوا في الطلبات السفيهة دي يا منير، ده العز اللي هم عايشين فيه من لحظة ما دخلت مواسير المجاري قريتهم السعيدة ما عمرهمش شافوا زيه ابدا، اييييه، ياما كان في نفسي اعيش حياة الريف، حيث مافيش النفاق والكدب والخداع اللي بيتحكم في ابناء المدنية الحديثة


وفيه سؤال صفيق سألته طالبة مش ولابد عن نيته في الترشح فأجاب بمنتهى اللباقة:
«يبدو كل ما تتأخر الأسئلة ستسخن»
يبدو؟ يبدو كل ما تتأخر الاسئلة؟ سليمان باشا نجيب بيتكلم يا اخواتي

ارجو من جنابكم زيارة المكان ده في اقرب فرصة
(منعا لاني افاجئكم بشيء ما يسركمش اللنك اللي فوق ده الفيس بوك)

ميرسي...
ميرسي...
نهاركم سعيد

22 comments:

Unknown said...

ليه كده - خلتينى أخش الفيسبوك يوم المقاطعه

أنا هاقول كلمه واحده للطفل المعجزه

اللى والدك ماعرفش يعمله فى 28 سنه - هاتعمله أنت فى قد أيه ؟
ده طبعا" اذا عملته

وبعدين ايشى صرف صحى ومكتب بريد ومدرسه وبنوك فوايدها تقل !!!!
أيه - فاكرين نفسكم فين ؟
شايفين نفسكم قاعدين فى دوله محترمه ؟!
بلا قلة أدب وكلام فارغ
سيبوا الراجل فى حاله وبطلوا طلبات من بتاعة شعوب دول عظمى .

وأحنا أيش عرفنا ؟!!!!

Unknown said...

وواحد من المنافقين قال له: انت وصلت كده ازاي؟ اصلك مثلي الاعلى

ههههههههههه

Anonymous said...

النسوان عندهم مقوله حلوه جدا
بيقولوا : أصبر علي الجار السوء ليرحل لتجيله مصيبه تاخده

وأنا أقترح الحل الثاني

زمان زمان العالم الزاهد سعـيـد بـن جـبـير قال للحـجـاج إبن يوسف الثـقفي مقوله معبره جدا
قاله
( أعجب من جرأتك علي الله وصبر الله عنك )

بس أكيد هو كان عارف زي ما إحنا عارفين إن الله يمهل ولايهمل

أنصحك بقرائة الموضوع ده
http://nouranelshamly.blogspot.com/2009/10/blog-post_23.html

شكرا

Anonymous said...

موضحا ان محافظات الصعيد بدأت تأخذ حقها فى فرص العمل، سواء من استثمارات الدولة أو القطاع الخاص

هههههههههههههههههههههههههههههههههههههههههههههههههههههههههههههههههه

مواطن مصري said...

هي الناس هتقاطع الفيس بوك انا مش هقاطع الفيس بوك

بس هي اعلانات جمال لية بقت في كل مواقع مش بعيد نشوفها في مواقع البورنو ههههههه


من جمال عبد الناصر لجمال مبارك يا قلبي لا تحزن واحد ساب مصر في نكسة و الثاني هيخليها وكسة

Unknown said...

ههههههههههههه

والله ماعارفه أقولك ايه
أدينا طلعتا ظالمين الراجل أهو وهو مش سايب حاجه في جهده مش بيعملها

احنا طلعنا ظلمه اوي يانوراه

بس الجزء بتاع
«يبدو كل ما تتأخر الأسئلة ستسخن»
يبدو؟ يبدو كل ما تتأخر الاسئلة؟ سليمان باشا نجيب بيتكلم يا اخواتي

ضحكتيني اوي بجد

Unknown said...

شفتوا أخبار اليوم النهارده
تووووو ماتش يامان - توووووووماتش

وبالمره عدوا على مقال ممتاز النو علشان تكمل جرعة الشلل المظبوطه

عبد الزهراء المصري (علي الحسيني) said...

سامحنا ياأبوالجماجم على اللي بنقوله وهنقوله في حقك .
أصلنا شعب واطي مانستحقش وبناكل وبننكر ، وأنت بقى الأمير أبن الأمراء وياريت والنبي وآله تفارقنا وحياة أبوك اللي عمره طويييييييييييييييييييييييل أوي
83 سنة فارقنا بقى .
وبقول لكم ماتنسوش ياجماعة إن جمال مبارك زي القطنة والقطنة مابتكدبش

عبد الزهراء المصري (علي الحسيني) said...

أنا مش هقاطع الفيس بوك لسبب مهم وهو إن غلق هذا الجروب هيخلي بدل الجروب الواحد يبقوا 100 جروب مسيئ والحل الوحيد هو نقاش إسائتهم والرد على الشبهات بالعقل والمنطق والحجة والدليل والأنترنت عالم مفتوح .

simplymoi said...

ووصفك محافظ قنا بإنه من ابناء مصر العظام والمخ والاعصاب
ha ha ha

مواطن مصري said...

تمام انا مع النقاش الي واثق من ايمانة

يقعد و يناقشش في الفيس بوك

الخوجة said...

طيب الليلة دى الهدف منها ايه انا سألتك أسئلة بسيطة الملفات دى تعرف حاجه عنها

Tainted nightmare - مصل أنفلوانزا الخنازير طلع مضروب و عبارة عن سلاح بيولوجى


HUMAN ORGANS TRADE -Harvesting Human Organs -تجارة الأعضاء البشرية


ايش عرفك انت ؟




طيب بتاريخ اليوم بص هنا اضغط على اللنك دة الناس بتقول ان لقاح الخنازير سام وعاوزين ومصممين تجربوة فى الناس ليه ليه
اذا كل حاجه مستوردينها من برة مشكوك فيها مش احنا دى امريكا اللى بتقول انه سام
سام يابشر

H1N1 Flu Vaccine is Toxic,لقاح انفلونزا الخنازير سام




the truth -الحقيقة | الخوجة | Swine Fever Flu Protection

أحــوال الهـوي said...

مش قادر ما اعلقش
طبعا الفيلم الابيض و اسود اللي اتفرجت عليه دلوقت بيتعرض من زمان المشكله ان الكلام الكتير بيخللي الموضوع سهل و هين علي الناس و لما جمال يمسك الحكم و ده امر حصل خلاص مش هتلاقي حد مستغرب او مستنكر لان المجهود كله ضاع في السخريه و الاستهانه

الكلام لازم يكون اكثر جديه لانه بجد مش نكته و الا قافيه

تحياتي

-_- said...

بقى مثل اعلى

!!!

مهندس مصري بيحب مصر said...

صحيح القوالب نامت و الإنصاص قامت

بهيج الشرير said...

بصي ياأبلتي، فعلا الأخ اللي قال عملناها شئون إجتماعية عنده حق، طيب الشكاوي دي كلها ساكتين عليها لحد دلوقتي ليه؟ وبرضه إيه علاقة الهبل ده بجمال إبن عرس أو بغيره؟ مش المفروض بدل مانستنى المهدي المنتظر اللي هايخللي حياتنا حرير في حرير، نغيرالطريقة اللي البلد ماشية بيها زي الشعوب المحترمة مابتعمل، فياريت مثلا نبدأ بكتابة نظام حكم وشكل وهيئة وتصورنا للدولة اللي عايزين نعيش فيها.

يعني ياريت مثلا نبدأ بنقاط محددة وواحدة واحدة، وياريت كل واحد في تخصصه يساعد برأيه وخبرته ومن غير خناق وفتونة لحد مالنقطة دي تخلص بموافقة أغلبية المشاركين وبعدين نبدأ في اللي بعدها، فعلى سبيل المثال ممكن نبدأ بشكل ودستورية نظام الحكم والحاكم وياريت الناس اللي شغلها ودراستها في مجال القانون والعلوم السياسية يساعدوا في بلورة النقطة دي. الحاجة التانية، لازم كل واحد فينا ينسى أنه هيكون الريس الجاي لمصر.

أخيرا وتعليقا على موضوع آخر بخصوص باسبور الواد إبن عرس الإنجليزي، أن الباسبور المصري بتاعه أقوى ألف مرة لأنه باسبور دبلوماسي

Unknown said...

انا عجبني التعليق ده قلت انزله تقروه

بدل سندوتشات سد الحنك اللي نفسه فيها وبيبعتها تلتميت مرة

Wild at Heart said...

يا خراشيييييييييي
الأهرام بقى لهم يومين حاطين صورته في الصفحة الأولى حامي حمى الوطن يا اخواتي
يا خراشيييييييي

Anonymous said...

أناآسفة متزعليش مني

عاوزة أقولك

ليه الحكم,إللي في الرد التاني

ليه الحكم ده :)


وآسفة لو أخطأت

بس,مش لازم نقول على حد,بيحب حد,أو شايفه,مثله الأعلى,إنه ممكن يبقى منافق

لكل واحد,وجهة نظر

وفيه ناس فعلا,ممكن تكون بتحبه


متزعليش مني


وآسفة تاني لو أخطأت في أي شيء:)

..

ممكن مكونش عارفة حاجة قوي

بس وجهة نظري

ممكن تكون,عكس وجهة نظرك

فأنا من الناس,إللي يمكن,شايفاه نموذج كويس

ممكن :)

..

ليه ممكن حد ينافق في الكلمة,بدون قصد

الإنسان,ممكن ينبهر بحد,أو يشوفه,نموذج كويس قوي


كل شاب,من حقه,يشوف نموذج كويس,ويتخذه مثل أعلى ليه

مش مشكلة

مش فيها نفاق دي

وآسفة تاني لو أخطأت,وممكن أكون جاهلة في كلامي,بس لفت نظري الرد التاني,سامحيني,مش لازم يكون نفاق :) معلهش:)

Unknown said...

يعني مافيش داعي للاسف ده كله
بس قولي لي لما واحد يسأل ابن رئيس الجمهورية: انت وصلت للي انت فيه ده ازاي؟

ح يرد عليه يقول له ايه؟: شد حيلك وخلي ابوك يبقى رئيس جمهورية زي ما انا كافحت وابويا بقى رئيس جمهورية؟

ماهو يا مجنون يا منافق

الخوجة said...

أة يابهيج الشرير شئون اجتماعية لما واحد من مجلس قيادة الثورة ياخد عربيتين رولزرويس وقصر بخمسة الاف جنية وبالمزاد وكله بالقانون والباقى بيدور علاج على نفقة الدولة بجد ومافيش حمامات لعيالنا بالمدارس
تبقى شئون اجتماعية لما الجيش عامل مناحل ومزارع خاصة بأكل رئاسة الجمهورية وأحنا بنأكل من زراعات المجارى
هذا ماحدث مع أحمد سيف النصر

Kontiki said...

إزيك يا نوارة صباح الخير
اصطبحت على اخبار القطرين قلت اجى اشوف الحقيقة كاملة هنا :S
" فى نايب قال علية رائد الاصلاح فى الالفية التالتة" !!!!
هما المنافقين بدءوا اسطوانتهم كل واحد خايف على الكرسى احسن امواج التغير تشيلة من مكانة حيبدأوا الخطب و العبارات الرنانة بصيغ المبالغة عشان يفضلوا كل واحد من اصغر موظف فى حى لاكبر رئيس حى او مدير ادارة او نائب حيبدأوا وصلات المدح و اللزوجة والنفاق و التملق المعجونة بالكدب و الغش و كراهية بلدهم وحب شىء واحد السلطة و المال تفتكرى حنيجى قدام يوم لو كل الادارات المحلية و رؤساء الاحياء و الوزاء متغيرتش وفضلت زى ما هيا بفضل وصلات النفاق ؟
السؤال هو مفيش اى حد مسئول بمعنى الكلمة فى البلد دى يعنى رئيس حى شرق مش بيشوف الزبالة على طول الطريق وهو فى عربيتة النائب الع** اللى قال انه رائد الاصلاح فى الالفية الثالثة قالها على اساس اية ! شاف اية انجازات عشان يبقى رائد اصلاح صلح التعليم ولا المواصلات ولا حل مشكلة الزبالة ولا اطمن على احوال هيئة السكة الحديد ولا نزل بنفسة من غير حاشية و لا حرس و لا عربية و استغل منصبة عشان يصلح الغلط و يحاسب المسئول و يقيم العدل !
المعادلة متوازنة جدا فساد + منافقين + حب سلطة ومال والنتيجة بلد بقت زى الجسد شبة الميت اللى الكل بينهشة اللى بياخد كلية و اللى بياخد اسنان واللى بياخد قرنية عشان يسيبوها خربة تماما ومنهوشة تماماوميتة تماما وفوضى تامة
فى بعض احداث التاريخ الحرب او الثورة هى السبيل الوحيد لاصلاح الامور والقضاء على الفساد
الحرب او الثورة .