Saturday 17 October 2009

وزارة الصحة مش اهل انها تحتفظ بالتامي فلو لوحدها

واحدة زميلتي في الشغل جوزها بيشتغل في السياحة رجع لها عنده حرارة ومتدهول، طبعا في ظل الهلع اللي عاملاه منظمة الزفة العالمية الناس كلها مفزوعة، كلنا يعني بما فيهم انا، اتصلت بمية وخمسة قال لها خديه حالا على الحميات راحت الحميات،
وعنها
بتقول لي مبدئيا الناس نايمة على الارض، لو تواليت عمومي في ميدان التحرير ح يبقى انضف، حاطين عيلة امتياز ومش مدينها ماسك، بتكشف عليه من فوق الهدوم وهي مدورة وشها الناحية التانية، بتكشف عليه ازاي؟ بالسماعة، وخلاص، ده الكشف، على فكرة انا ممكن اشتغل دكتورة يعني لو ده الكشف، فمراته قالت لها لازم تعملي له مسح، قالت لها: ماعنديش اوامر من وزارة الصحة اننا اعمل حاجة زي دي. 
الست شافت الوضع كده وشافت الناس نايمة على الارض كأنهم في الحجز راحت واخدة الراجل وراحت بيه دار الشفا
ستر ربنا انها طلعت انفلوانزا عادية
طب لو طلعت انفلوانزا الخنازير؟ دار الشفا ما عندهاش تامي فلو، قام ايه اللي حصل؟ اللي حصل ان الناس بتخاف تروح الحميات وبتشتري التامي فلو من السوق السودا
طيب يوزعوه على المستشفيات طيب، او حتى على مستشفيات معينة محترمة شوية
والحميات دي يقفلوها، او يحرقوها
الحاجة التانية، هم ليه صمموا انهم يفتحوا المدارس بجد يعني؟ يعني لو بانديميك يبقى مش مفروض يفتحوا المدارس، ولو مش بانديميك مش مفروض يفتحوا المدارس كمان، وفيه واحدة بتقول لي ان مدارس عيالها ظهر فيها حالات، والمدرسة اللي في شارعهم ظهر فيها حالات
الله اعلم ظهر فيها حالات فعلا وللا دي اوشاعات، بس اذا كانت الحكاية كده، اهم حاجة ان الناس تبقى مطمئنة، والناس مش، لان الحكومة خايبين ونايبين وموكوسين وحالتهم بالبلا والبلا لاحقهم، مش عارفين يدوا الدكتورة اللي قاعدة في الحميات ماسك
مش نافعين دول في حاجة على فكرة، وبصراحة الاهالي ناس غريبة فعلا، انا لو عندي ابن والله لو ح يشتغل صبي ميكانيكي ما اوديهوش المدرسة، لو كلهم اجمعوا على ان العيال ما تروحش المدرسة مش ح يعرفوا يفتحوا المدارس انما هم سمعوا الكلام ما اعرفش ليه؟
دلوقت، هل صحيح انهم ح يقفلوا المدارس في شهر نوفمبر؟ وللا دي اوشاعات؟ طب لو ح يقفلوها في شهر نوفمبر فتحوها من الاصل ليه؟ عشان يضمنوا ان العيال تعيا مثلا؟
ماهم طول ما بنسمع كلامهم بالطريقة ح يركبونا ويدلدلوا رجليهم، وياريت عندهم اي كفاءة، وزير الصحة الحالي لو البلد كلها ماتت مش ح يفرق معاه ده رجل اعمال بيتاجر في الطب، يعني مش بيتاجر في لبان وللا كازوزة، بيتاجر في ارواح الناس وصحتهم، وعنده مستشفى استثماري.. ياريت كلنا نموت ونفضي له البلد يلعب فيها لوحده، وما اعرفش بقى هو خايب فعلا ولو الاهمال ده متعمد
طب تصدقوا بايه؟ انا والله مقتنعة ان الحكومة عايزة تموتنا، والله العظيم، هو مش عوكل دايما قاعد ينبر علينا ويقول: انتوا كتير انتوا كتير؟ والله عايزين يخلصوا مننا وجات لهم الحكاية دي على الطبطاب، ومتعمدين تبقى انفلوانزا الطيور وبائية وبعدها بيعملوا كل اللي يقدروا عليه عشان انفلوانزا الخنازير تنتشر
والله عايزين يموتونا، ولهم سوابق، ما موتونا قبل كده، وماحدش يقول لي عارفين ده مجرد اهمال، او مش عارفين يتصرفوا، اي حد ح يتصرف احسن من كده، اي حد، اي واحد ما بيفكش الخط ح يعرف يمسك البلد احسن من كده، هم قاصدين

9 comments:

Rateb said...

اظن انهم فتحوا المدارس عشان يلموا المصاريف من العيال عالم جعانه

خيرالدين said...

المشكله يا نواره
ان فيه حالات كتير بيشتبه فى اصابتها لكن ادارات المدراس بتخاف تعلن ده علشان القلق وزيارات المسؤولين والوزراء والاعلام
صاحبى منسق فى معهد ازهرى الدكتوره اشتبهت فى سبع حالات وقالت له اكتب الكلام ده فىا لتقرير فعضو مجلس محلى جه قطع الورق وقال له احنا هنحل الموضوع بمعرفتنا
تخيلى بقى لو فيه فعلا اصابات ومع حاله الاسستعباط دى احتمالات العدوى كبيره جدا

Unknown said...

الله أعلم أّذا تحور الفيروس فى الكام شهر اللى جايين دول البلد هاتحصل فيها كارثه بجد
نسيوا البهوات لما قعدوا يطبلوا والبلد الوحيده اللى مفيهاش انفلونزا طيور والصحه العالميه بتحتذى بينا وبتنصح الدول انها تنفذ خطتنا وفى الاخر بأينا من أكتر الدول اللى فيها المرض
ربنا يستتتتتتتتتتتتر

خالد كامل said...

فى أول مرة يطلع موضوع انفلونزا الخنازير أخويا الصغير جاتله سخونية
مكدبناش خبر و رحنا بيه الحميات
و هو فى السكة رجع و كدة راحت حرارته نازلة بعد ما كانت 39
لما وصلنا قاسوهاله لقوها 37.7
و لقينا بقى عم الدكتور بيزعق و بيقول
(( أقل من 38 مش هكشف )) ... و اتخانقنا معاه و كدة
و لولا انى كنت مخضوض على أخويا كنت صورته و هو بيقول كدة

و بعد ما رحنا مستشفى خاصة لقينا عنده تيفود بس خف الحمد لله

حكومة كلامنجية صحيح

mado said...

بالنسبة للمدارس اعرف ناس كانو في اجتماع في وزارة التعليم وجاتلهم تعليمات بعدم التبليغ عن اي اصابة تظهر في اي مدرسة.ولو في اعراض ظهرت علي اي طالب يتصلو باهلة يجيو يخدوة والمدرسة ملهاش اي دعوة.
والدراسة في احتمال كبير تتوقف في شهر نوفمبر.
وطبعا في ناس بتسال طيب ليه الدراسة بدات من اساسة.
دي حاجة بسيطة علشان يلمو المصاريف من الطلبة :)

ياسمين حميد said...

انا كنت ناوية اختلف معكِ على موضوع المدارس
لكن بعد ما قرأت حكاية خوف المدارس من القلق وعضو المجلس المحلي الذي أخفى خبر الاشتباه، غيرت رأيي
عندك حق يانوارة

مش فاهمه said...

انا عندى عيال فى المدارس ما أقدرش ما اوديهومش حأعمل ايه فى مذاكرتهم اللى بالكوم و كده كده الدراسه شغاله و بياخدوا كميه مناهج رهيبه و الأمتحانات فى مواعيدها و المدرسين حايموتوا و يدوا دروس خصوصيه و المدرسه مصره على المتحانات الأسبوعيه و الشهريه علشان تجبرنا ناخد مجموعات خاصه و مدرسينها يشتغلوا لنا فى الخصوصيه و انا باشتغل يعنى اقطع نفسى ابعزء نفسى الموضوع كبير كبير يا اخوانا
المشكله ان فعلا انفلونزا الخنازير مرض غير مرعب بهذه الطريقه و اللى جالهم قعدوا فىالبيت و اخدوا خوافض حراره و مضادات حيويه و خفوا الحمد لله و قل لن يصيبنا الا ما كتب الله لنا

Anonymous said...

يانوارة
فيه مدير مستشفى يحتفظ بالتطعيم للانفلونزا العادية الموسمية المستورد ليختص طاقم ادارة المستشفى أولا
و ما زاد فللباقى
؟
معك حق
وزارة الصحة ليست اهلا
لاى شئ

الخوجة said...

انتو بالصلاة على النبى عايشين فى القاهرة يعنى حواليكم مستشفيات للركب

مدارس المنوفية:مدارس بركة السبع