Thursday 15 October 2009

الامن باعت لي واحد من الاضيشه يهددني

مش الاخ اللي دخل يقنعني ان التعامل مع امريكا وطنية طلع امن؟ اه والله، وبعد ما نتع قلبي في المناقشة ورص الكلام اللي مالوش اي معنى وانا بهبلي عمالة اقرا الكلام بجدية واذ بي أوفوجأ انه ابتدى يقول لي اتهامات امنية وبعدين اذ فجأتن راح مهددني وافصح عن نفسه في التعليق ده
وعشان ما تتعبوش نفسكوا في الكليك التعليق اهو

المعلم برعى صاحب القهوة said...
يانوارة بنت نجم احترمى نفسك واتكلمى بأدب مع الناس هنا من فضلك لا فيوم من الايام يكون مصيرك مصير الاخ بتاع حماس فى غياهب سجونا المصرية العتيدة التى لم تفتح خصيصا الا لامثالك لانك بكده ممكن تغلطى فى حد مهم يوديكى ورا الشمس وهناك برد يابنتى وانا خايف عليكى قلة الادب والسفالة لاتدل الا على بيئة صاحبها ، وياريت بلاش ضعف النسوان ده وتردى على اسئلتى كان بالذوق بدل الشتيمة لانى أساسا مش فاضى أعلق واضيع وقت مع واحدة فاضية لاوراها شغلة ولامشغلة ، وسلميلى علعروبة ، الا بصحيح انتى مصرية أساسا ؟ يعنى عندك كده انتماء للبلد وبتحسى زينا يعنى ؟
--------
لا وفاتح مدونة وبتاع عامل تموين مظبوط، بنصاحته فاتح المدونة الشهر اللي فات، وبنباهته كاتب بوست يوحي لك انه ضد جمال مبارك وتدخل على البوست تلاقيه بيقول ان جمال مبارك ح يطور البلد، وبعدين تدقق في البوستات شوية، ظابط ظابط يعني، الهيبة باينة برضه
طب وتاعب نفسك وبعدين تنسحب من لسانك كده؟ انا بقى ما ضحكنيش في ده كله غير "اتكلمي بادب مع الناس هنا" هنا فين؟ في مدونتي؟ الله الله الله، هي المدونة مسكونة وللا اييييييييه؟ انا فاكرة انا فيها لوحدي يا ح الظابط، انتوا هنا بقالكوا كتير؟ طب مش كنتوا تقولوا كنا عملنا معاكوا واجب؟ شاي، قهوة، ازوزا، كونيااااك مشروب الفتاة المهذبة؟
وانت بقى من الاخوة اللي تبع "مصير بتاع حماس" شخصيا؟ اهلا وسهلا، شرفت وآنست
وبالنوسبة لسؤالك يا ح الظابط هو انا مصرية وللا لا؟ دي حاجة تقدر تسأل فيها السجق المدني، بس اكيد انا عندي انتماء يوزنك انت والباشا بتاعك والباشا بتاع الباشا بتاعك والباشا بتاع الباشا بتاع الباشا بتاع الباشا بتاعك لحد اتخن باشا قاعد على قلبنا، واذا كان غسلوا لك مخك وفهموك ان المرمطة تحت رجلين امريكا والوقوف مع المحتل ضد المقاومين ده انتماء وفهموك انك لما تدخل مدونات الناس يا تقنعهم ان امريكا حلوة يا تهددهم انت كده بتخدم الوطن يبقى هاجر امريكا يا ننوس انت والباشا بتاعك والباشا بتاع الباشا بتاعك والباشا بتاع الباشا بتاع الباشا بتاعك وحلوا عن سمانا بقى لوجه الله تعالى، عشان النفس، سامعني يا عم الكتكوت، دي بلدنا احنا، وانتوا مش اكتر من كلاب نظام، ييجي واحد يقول لكوا يمين تهوهو يمين، يموت الواحد ده (وكلنا بنموت) وييجي واحد مكانه يقول لكوا شمال تهوهو شمال، ولو كنت موجود ايام بتاع العروبة كنت هوهوت مع العروبة عشان هم علموك كده في الكلية، اللي الراس الكبيرة تقوله لا ممكن ينزل الارض ابدا، امال هم بينقوكوا جايبين خمسين في المية ليه؟
واللي انا اعرفه ان السجون المصرية معمولة للناس المحترمة، فاذا كنت شايف اني محترمة لدرجة انك تقول لي السجون المصرية معمولة لامثالك فميرسي ليك كتير على المجاملة الرقيقة دي، وانت مش فاضي ليه؟ وراك كام واحد تعذبه يا ح الظابط؟
حاضر ح اسلم لك على العروبة، وانا متشكرة عن اعطائي فكرة للتهمة اللي بتحضروها لي، ههههه بجد؟ ح تتهموني باني متحالفة مع العروبة ضد مصالح مصر؟ ههههههههههههه والله تعملوها
طب ياللا يا عم الامور... روح قول للباشا بتاعك انك غبي وكشفت نفسك بسرعة، خليهم يبعتوا غيرك
-------
ملحوظة: انما مناورات النجم الساطع دي بسم الله ما شاء الله جابت لي ناس رتب هنا في المنطقة، مرة اكرم زكري القيادة الوسطى المركزية، ومرة ح الظابط... هو الكلام عن الموضوع ده حساس كده؟ طب ما كل الناس يعني بتتكلم عنه، ما الاهرام بيتكلم عنه، والجزيرة بتتكلم عنه، والسي ان ان بتتكلم عنه، ومحمد بيتكلم عنه، وحسين بيتكلم عنه، لو مش عايزين حد يتكلم عنه ما تعملوها سرية
------


VISITOR ANALYSIS
Referrer http://cairo-voice.blogspot.com/
Host Name
IP Address 196.221.166.45 [Label IP Address]
Country Egypt
Region Al Qahirah
City Cairo
ISP Rt-adsl-project
Returning Visits 0
Visit Length 16 hours 11 mins 43 secs
VISITOR SYSTEM SPECS
Browser IE 7.0
Operating System WinXP
Resolution 800x600
Javascript Enabled
دي معلومات الجهاز بتاعه من الكاونتر ومدة زيارة المدونة ستاااااااااااااشر ساعة، قاعد على مدونتي بقاله ستاشر ساعة، وده طبعا لانه مش فاضي، هي ايه ار تي ايه دي اس ال بروجيكت دي؟ عمري ما سمعت عنها

30 comments:

Unknown said...

الله
ده قاعد لي بقى

الساعة ستة ونص الصبح وهو قاعد على المدونة يعلق؟

بس انا مش ح انزل تعليقاته

Unknown said...

تخيل دي شغلانته اللي بياخد عليها مرتب
انه يقعد على النت
ههههههههههههههه
يا ترى بياخد كام في الشهر

Unknown said...

هههههه
على فكرة ده لسة قاعد

يا ضنايا يابني

طب تصبح على خير بقى

أبو عمر - الصارم الحاسم said...

يحموك في كنكة انت والباشا بتاعك والباشا بتاع الباشا بتاعك والباشا بتاع الباشا بتاع الباشا بتاعك لغاية اكبر باشا تخين قاعد على قلبنا


حمرا يا امن


يا خونة ياللي بتعرفوا عدو البلد بالنقاط الحساسة والمحاور اللي ممكن يحتلوا بيها البلد...وفرحانيني اوي بالمناورة... ده انتوا وساختكم ما جاتش على احد


وطبعا انتوا لو بتعرفوا شغلكم كويس هتعرفوا تجيبوني حتى لو باكتب باسم مستعار

فــــــرنـــــــاس said...

ولا يمهك
كلنا جبهة التهييس الشعبية

فرناس

فــــــرنـــــــاس said...

يمهك = يهمك
:)

فرناس

هتشوفوا said...

طب وحدي الله يا نوراة, وليه ما تقوليش انه عايز يلفت النظر, فيه ناس كدة , تلفت النظر بالخناق والزعيق وساعات كتير قلة الأدب, أنا قريت البوست بتاع جمال مبارك , على فكرة فيه ناس كتير لسه شويه جهلة , متأثرين بالاعلام الحكومي, بس ده مش معناه أنه أمن ,مش انتي جرستيه
هو ده بالضبط اللي عايزه ,بس حكاية الطرد من المدونة , مش هاعلق عليه , لأنها مدونتك وانتي حرة فيها

leeno said...

لالالالالا بجد؟

انشري تعليقاته بجد نفسي افهم بيقول ايه !

افرحي يا بنتي دة معناه ان انتي خطر

بس بجد بجد حاسبي على نفسك ربنا يحميكي

IVAN said...

Browser IE 7.0
Resolution 800x600

تؤتؤتؤ ..لسة فى حد شغال بـ 800 × 600 .. لأ وانترنت اكسبلورر كمان
توو ماتش يا مان . بيييئة بيييئة بيييئة :D

into said...

ايه ده هما رجال الامن في مصر مصريين؟ و عندهم انتماء؟انتماء لمصر؟ مصر اللي عاصمتها القاهرة بتعتنا دي اللي فيها الهرم و ابويا و ابوكي حاربو و ماتو و هم بيخلصوها من العدو الاسرائيلي؟؟

هو مش امن؟ يعني بيقبض الفلوس اللي بياكل بيها مم من ضرايبنا ؟ المفروض يروح يحلل اللقمة اللي بيكلها و يمسك واحد حرامي بدل ماهو قاعد عالنت يهرتل و يدخل اسم مصر الطاهر في كلامه الوسخ
مصر يا حمار مبتسجنش اولدها علشان جابو سيرة حد فاكر نفسه مهم، مصر يا متخلف مبتهددش واحده هماها على البلد ليل نهار .
ذي نواره
نوارة دي انا مافيش بيني و بينها غير الاختلاف و مبدخلش على البلوج بتعها الا علشان انتقدهاـ لكن عمري ما اشك في وطنيها و انتماءها للحظة . هي مصريه وطنيه اكتر مني و منك يا علق قاعد مستخبي في مصلحتك و بتهدد واحده بقول رايها بصراحة .
الكلام الاهل اللي انت بتقول ده بتاع ورا السمش و السجون يخاف منه واحد جبان ذيك يترعش من الكلمتان دول ويقول يلعن ابو مصر لكن نوارة بنت بميت راجل - قصدي راجل بجد مش ذيك- بتعمل عمل عام و تكتب و معرضه خصوصيتها للاختراق من امثالك و مهمهاش برضة كل علشان خاطر عيون مصر اللي مهما اديتنا بالجذمة الاديمة بنحها برضو

Anonymous said...

ده تعليق ليه من مدونته :
"اخواننا الجزائريين والعرب عموما من المحيط للخليج بيتربصوا لاى فريق كرة مصرى يلاعبهم على أرضهم وبيعموا حاجات تفوق الوصف من واحنا فى بلدنا مبنردش وبنعاملهم بالاخلاق والاحسان ، لكن جه الوقت اللى نفعل فيه مبدأ العين بالعين ، وكفاية عين الدكتور المصرى اللى طيروها سنة 90 ولاانتى مش هنا ؟"

يعني دول بقى عندهم هقدة من العرب عقدة مع ان العرب دول ادوا مصر زي ما اديتها الخليج في كام مليون مصري عايشين هناك و كذلك بقيت الدول العربية لولا كده كان حيكون مصيرهم إيه في مصر مصر استفادت من القومية العربية و لا إيه رأيك ؟؟
وقابلين إسرائيل و مش قادرين يتقبلوا إيران االي جاتهم من آلاف السنين !! بجد مش فهمة يعني الدماغ الذرية


-----------------------------------

معلش يا نوارة ده فاضي و بيشتغل شغلانة زي الفل ...يعقد على النت

into said...

RT-DSL-PROJECT = Raya Telecom DSL PROJECT

into said...

الا بالحق يا نورارة يا تري بتظني ان كل واحد جديد بيكتب تعليقات ممكن يكون امن؟
عموما لو عملتي كده لا ملامه عليك

Sahran said...

الأخت نوارة

هي مش بعيدة على الأمن تبعكم ممكن يعملها

بس نفسي أسأل : يعنس هم إيش بدهم منك , يعني وكأنك نازلة طول النهار تمدحي في الحكومة وتدعي للتوريث , وييجي الأخ برعي يوقعك في الكلام عشان تسبي الحكومة؟؟؟

إنت مش محتاجة يبعتولك واحد يتأكد من موالاتك للنظام الفاشي , لأنك بالعربي كدة مش راحمة حد فيهم

ممكن الأخ برعي يكون بتاع بق مش أكتر وتلاقيه هلقيت عم يشتغل سواق على الخط
والله أعلم

تحياتي

Eldebug said...

بالنسبة لمناورات النجم الساطع يانوراة .. تقدرى تقولى كده انك مرجعيتنا فى المصايب اللى بتحصل فى البلد -والبلاد اللى جنب البلد- فلما ييجى اسم القوات المسلحة فى مدونتك بنحس ان الموضوع فيه مصيبة .. فيه فساد .. اى حاجة من الكلام ده يعنى
وبما ان يعنى دى الحاجة الوحيدة اللى شايلة نفسها شوية فى بلدنا بنخاف عليها شويتين
وياستى البلد مليانة مصايب واضحة وضوح الشمس فيعنى مش لازم ندعبس فى المستخبى قبل ما نفضح المكشوف ونحاول نحله
وزى ما فى مدونين مهمتهم صحفية فى المقام الاول فى كشف الفضايح وعرضها على النت نفسى يبقى فى مدونين كل همهم انهم يفكروا ازاى يحلوا المشاكل دى .. علشان منبقاش سبب ان الناس تتعود على سماع الفضايح من غير محاسبة وتشوف الفساد من غير ما تحاول تصلحه

على فكرة طبقا لنظرية المؤامرة انا تقريبا متآمر مع الجيش لانى باقضى فترة تجنيدى دلوقتى :D

مي ثابت said...

نوارة

حاولى تقرى كلام الراجل تانى

مش حاسه إنه من إخوانا البعدا

لكن حساه واحد إستفزه الرد على كلامه
فبيثأر لنفسه


عموماً بعد ما أرجع إن شاء الله

أقرا البوست بتاع النجم الفاقع و الردود عليه علشان الصورة تكمل

سلام إلى لقاء إن شاء الله

ندى عياش said...

متحالفة مع العروبة ضد مصر

هههههههههههه

ذكرتيني بوجدي غنيم لما وجهوله تهمة الإساءة إلى دولة صديقة ،،، إسرائيل :)

نوارة ... انا برضه بقعد بالستاشر ساعة فمدونتك بس و الله العظيم انا مش أمن

انا فلسطينية من بتوع حماس :)

معلش يا نوارة ... سامحيه ... اصل البني ادم لما يخسر الحاجة اللي ربنا بيميزه بيها عن باقي الكائنات بيتهطل و بيخرف و بيفتكر انو كبييييييييييير و هو حتة بالونة هتفرقع

و يا رب دم الشهيد يوسف و دم كل واحد مسجون في أي حتة حتى لو مصر ملهاش دعوة بيه يوقفلهم يوم القيامة

هيوقفلهم انا بدعي ليه

فيا ريت عمو الخفيف يبتدي يجهز سجلات الاعتذار من دلوقت

اعملك حاجة مفيدة بلا قعدتك دي زي الولايا

ولايا ؟

فشر ... اشرف منك و من الباشا بتاع الباشا بتاع الباشا بتاع الباشا اللي مشغلك

مواطن شووجااع said...

جريدة اليوم الساقع
وقعت في شر أعمالها

شوفي الخبر دا كدا

http://www.egyoff.com/forums/viewtopic.php?t=49584

وهنا كمان

http://forum.kooora.com/f.aspx?t=19858111

Unknown said...

الصارم الحاسم
منور
نجاملك في الافراح ههههههههه ومستعار وللا مش مستعار هم مالهم ومالنا ما يسبونا نفضفض


فرناس
ان شالله ربنا يخليك


roaa

والله يا رؤى اذا كان امن تبقى مصيبة واذا كان مش امن وبيتكلم زي الامن تبقى مصيبة اعظم
هي حصلت اننا نكلم بعض بلغة امنجية؟ ما اعتقدش ان انسان محترم وللا حتى مش محترم يستخدم لغة الامن وهو بيتكلم

لينو
حاضر لو علق تاني ح انشر
استنى اما اروح اشوفه لسة قاعد وللا لا


ايفان
ههههههههههههه

help

دول كانوا هديوا شوية، قصدي بتوع الامن، انت ما حضرتهمش لما كانوا ملعلعين على المدونات

اسأل الصارم الحاسم بقى كان حاضر معانا في الظروف دي

اسراء

انت عارفة ان الموضوع ده جارحني ومقطع قلبي على المصريين قوي

بعيدا عن الواد الامنجي ده اللي ان شاء الله ح نمسي عليه قريب

موضوع ان الكورة تحولت عند المصريين لمعركة حقيقية ومشروع قومي، الموضوع ده جارحني قوي ومخلي المصريين صعبانين عليا

سهران

لا هم عادة كانوا من حوالي سنتين كده يقعدوا يلفوا على المدونات ويخفونا بس كانوا هديوا الفترة اللي فاتت وخلاص سابونا في حالنا وبقينا زي السمن على البتنجان الاسود لما عرفوا ديتنا
هم في الاول كانوا مخضوضين مننا

مش عارفة ايه اللي رجع النشاط ده تاني


eldebug

هممم بس انا باحب الجيش، ما عنديش مانع تتآمر مع الجيش

عندي مانع من اللي يتآمر على الجيش واخاف عليه

مي

طب على الله وهو داخل بصدره كده يطلع مش امن فعلا بقى عشان اللي قاعدين يراقبوا مدونتي يلقطوه ويعرفوا انه بيعمل لهم مشاكل وبيدعي انه امن عشان يشأمظوه

ما بقاش الا كده كمان يا مي، ما بقاش الا اننا نستخدم ضد بعض لغة امنية كمان

على الله يطلع مش امن، على الله

ندى عياش

يا حبيبتي انت منورة
الله يكون في عونكوا


مواطن شووجاااع

ههههههههههههههههه

اه عارفة الموضوع ده، ميدو قال لي على التويتر

جاتهم نيلة

مخبر قمل دولة said...

اخص على كده
وانا اللي كنت فاكره ابن ناس
طلع عامل عليا صحوبية اكمني عامل مخبر يعني وبتاع
دا حتى مرة كنت كاتب موضوع سخرية جامة من الريس وبتاع لقيته بيقولي

" البوست هايل يامخبر واسلوبك فى الكتابه مشوق وممتاز تمنياتى لك بالتوفيق وعايزين نشوفك على القهوة
"
انا شكلي كده هاستقيل من قمل الدولة

Unknown said...

مخبر قمل الدولة

انا شايفة انك تقدم تظلم قبل ما تتهور وتستقيل
لان كده قمل الدولة لم فعلا

ههههههههه

mado said...

روقي كدا يا نوارة ومتخديش في بالك وسبية يهوهو.
هو حاجة من الاتنين يا اما مجنون و بيخرف واظن انتي ليكي سوابق مع المجانين في المدونة.
يا اما كلب بوليسي.
متستغربيش ان في واحد شغلتة يقعد علي النت ويا خد مرتب ودي بقي اسمها مباحث الانترنت وشغلاتهم مراقبة المواقع والنشطاءعلي الانترنت.
ولو لسة قاعد في المدونة اكيد هو الشيفت بتاعة مكلف يقضية في مودونتك :P ;)
سيبك منه

3amar said...

نوارة

نعلك بالــف من ضباط الامــن والمخابرات الصهيومصرية ..

والخسيس الي يتهجـم ويهدد انسانة محترمة

ان شاء الله يومهم قريب جدا ً مع فرعونهم

البقرة الضاحكــة ..

والحمد لله والشكر مدونتك المجانية اصبحت

بقعة من بقع الشرف المصريــة ..

تحياتي الك أستاذتنا الغالية

Unknown said...

يارب يطلع مش امن

يارب

عشان الامن اللي بيراقبوا مدونتي يعكشوه عشان يحرم يستخدم لغة البلطجة

صوت الحق said...

نوارة دة عملك بوست مخصوص
http://cairo-voice.blogspot.com/2009/10/blog-post_15.html

Wild at Heart said...

هو أمن بوشه العكر.
كلنا جبهة التهييس الشعبية :p :p

مي ثابت said...

بجد أنا قلبى وجعانى من اللى حصل ده

يعنى ينفع من غير ما نتأكد نقعد نعاير الناس

بالرزليوشن بتاع الشاشة

و لا بالفرجن بتاع الإكسبلورر

و لا بالوجه و نوصفه بال
.....


أنا أفهم إننا نختلف فى الرأى

أو حتى نناقش إسلوب الكلام و نصوبه

لكن اللى حصل ده
حقيقى أسقمنى

مي ثابت said...

ده طبعاً مش معناه إننا مديالة الحق فى ألفاظه اللى ذكرها

لكن أبداً منعالجش الغلط بغلط

خاصةً لو كانت ردودنا تحمل فى طياتها النظرة الطبقية المقيتة


تصبحى على خير يا نوارة

tamer.sala7 said...

يا نوارا الـ
RT dsl
ده اختصار بتاع راية تليكوم شركة تعبانة وكحيانة ومفيش حد بيخد منها النت غير المؤسسات والهيئات الكبيرة

Unknown said...

والله انا مش عارفة انت بتتكلمي عن ايه يا مي

الواد امن فعلا ومسخر مدونته اللي لسة عاملها الشهر اللي فات لشتيمتي ونشر مقال الامنجية اللي زيه

انت ما تعرفيش الامن بيشتغل ازاي، بس انا اعرف