Wednesday 14 October 2009

انا في حالة لا يرصى لها

اللاب توب بتاعي بيهنج، وانا حاليا باكلمكوا من جهاز ماما حيث اخدت لي كلمتين في جنابي قبل ما اقعد وح اخد زيهم لما اقوم وزيهم تلات اربع مرات لما تيجي تقعد على الجهاز بتاعها وتتهمني باني بوظت لها شغلها وستشفعهم بتقريع مصحوب بالشماتة: انا باحافظ على حاجتي... مش زيك
ولما مهندس الكمبيوتر خطف ابني وسار به بعيدا تذكرت صرخة عقيد الشرطة التاريخية التي نقشت باحرف من نور في ذاكرتي ايام ما كان المصريين راجعين من الكويت بعد غزو الكويت: المصريين راجعين من الكويت في حالة لا يرصى لها 
 المهم وصيتي ليكوا على ما ضنايا يرجع لي: ما حدش ياخد تطعيم انفلوانزا الخنازير
ماحدش ياخد تطعيم انفلوانزا الخنازير
ماحدش ياخد تطعيم انفلوانزا الخنازير
وماحدش يقرا احمد خالد توفيق واللي يقراه ما يسمعش كلامه لو كان هو وخالد منتصر فالحين في الطب ماكانوش كتبوا في الجرايد، بصوا بقى، بصوا، مبدئيا احنا دول وبائية، بمعنى، اننا بالفعل عندنا اوبئة وامراض اوحش بكتييييييييييييييييييييير من انفلوانزا الخنازير، يعني دي مش اوحش حاجة حصلت لنا
لو كلام العلماء العالميين المستقلين (اللي ابحاثهم لا متمولة من شركات رأسمالية ولا من جهات سياسية) صح - وغالبا هو صح - يبقى احنا مش ناقصين فاكسين يرفع نسبة الغباء زيادة ماهي مرتفعة المية الملوثة والجو الملوث قايمين بالواجب وزيادة
لو كلام العلماء التانيين - اللي مافيش ولا واحد فيهم مستقل سبحان الله وانت لازم تتعلم كده ان المستقل وغير المستقل لما يختلفوا كلام المستقل غالبا هو اللي صح - لو كلامهم طلع هو اللي صح فانفلوانزا الخنازير مش هي اوحش حاجة حصلت لنا، انفلوانزا الطيور اوحش واهي وبائية التهاب الكبد الوبائي اوحش ومن كتر انتشاره الدولة خايفة تعمل له حصر وتنسبه او على الاقل خايفة تعلن عن نسبة الاصابة به، الفشل الكلوي من المية اوحش، السرطان من الاكل المسرطن اوحش، السرطان مش مرض وبائي ولا الفشل الكلوي، صح، بس لما يبقى من الاكل والمية يبقى ينفع نعتبره وبائي مجازا
نسبة الوفيات من الانفلوانزا العادية لحد دلوقت اعلى من نسبة الوفيات من الخنازير
يعني لو ما اخدناش الفاكسين وطلع كلام منظمة الصحة - النصابة اللي كل شوية تقول كلام وعكسه - صح، ما خسرناش حاجة اكتر من اللي احنا بالفعل بنخسره كل سنة
لو اخدنا الفاكسين وطلع كلام المشككين صح، خسرنا كتير، خسرنا مخنا وجنينا على الاجيال اللي جاية
من امتى بيدوا الدول الفقيرة حاجة ببلاش الا حاجة في نفس الرأسمالية
ليه نسبة اللي مش ح ياخدوا الفاكسين في اوروبا وامريكا خمسة واربعين في المية واربعين في المية من الاطباء والممرضات في انجلترا رفضوا التطعيم المجاني؟
انتوا عارفين موقفي من عقدة الخواجة بس للاسف انا مضطرة الجألها في الحالة دي لان ياروح ما بعدك روح
نصيحة: ما تسمعوش كلام دكتور مصري في الموضوع ده
معلش
مش لان الدكاترة بتوعنا حمير، بس لان كل ما يتصل عندنا بالبحث العلمي والطب سكند هاند زي جيل الاسلحة اللي بتديهولنا امريكا كده، ولان العلماء والاطباء بالذات في مصر حقيقي عندهم عقدة خواجة مستعصية تصل لان الواحد فيهم لو في سكته اكتشف او توصل لنتيجة او حتى يقين يتعارض مع الابحاث اللي جاية من عند الخواجات يكدب نفسه ويصدقهم ويقول اكيد انا اللي غلطان، يعني ما ينفعناش ده، مش واثقين من قدراتهم ح نثق فيهم احنا ازاي، اللي بالنسبة لنا احنا حديث بالنسبة للعالم حفريات واحنا محرومين من البحث العلمي بجد، جزء منه كبير بسبب فساد الحكومة، بس اصلا الحكومة الفاسدة دي احنا عارفين بتخدم مين
انا خالي كان رئيس معهد السرطان في بنسلفانيا، دلوقت هو متقاعد بس مازال بيمارس الطب، ماما بعتت له تقارير طبية بخصوص حد معين من تلات اما كن مختلفة واغلى اماكن كمان، بعت لها قال لها ابعتي لي الحالة تعمل الفحوصات هنا، دي مش تقارير طبية ده كلام مصاطب
باللفظ كده، وانا خالي راجل عاقل يعني ما يقولش الكلام ده بسهولة
نفسه خالي بقى مش ح ياخد الفاكسين، وقال لي، حتى الفاكسينز المضمونة يستحسن انك ما تاخديهاش لان ده بيضعف امكانية انتاج مناعة طبيعية للجسم، وخالي مش بياخد ادويا ابدا، حتى لما جه مصر وجاله تسمم طبعا، عادي يعني، ما اخدش دوا، فضل يشرب في نعناع لحد ما خف
في اوروبا والدول المتقدمة الدكتور ممكن يئذيك مش عشان حمار زي اللي عندنا، بس عشان شرير، از سيمبل از ذات، بيشتغل في مؤسسة رأسمالية وعايز يدفعك فلوس
العلم والدين لازم يبقوا مستقلين عشان بيتحكموا في حياة الناس
الحمد لله الفساد المصري ح يحمي مصر، لان الفاكسين ح يتاجر فيه في السوق السودا، وح يستثنى منه الفقراء كالعادة ومش ح يبقى متاح غير للطبقة المتوسطة والطبقة المتوسطة العليا اللي عندها امكانية لتجميع معلومات كافية وسماع الرأي والرأي الاخر بخصوص التطعيم، وفي الحالة دي ماحدش منهم ح ياخد التطعيم غير، سوري، الاغبيا، ومش مهم الاغبيا ياخدوا التطعيم ده، ياريت، على الله يكون بيموت
يعني الحمد لله، الفقرا، اللي هو خمسة وتمانين في المية، مش ح ياخدوا التطيعم
بركة، رب ضارة نافعة
وبعدين هم مش قالوا التطعيم مش متجرب؟ اهي دي بقى حاجة عليها اجماع من الطرفين، انه مش متجرب، خلاص، اعتبروا ان الفاكسين لسة ما نزلش الاسواق وانه لسة في مرحلة الاختبار، فيه خمسة وخمسين في المية من سكان اوروبا والدول المتقدمة ح يجربوه على نفسهم، استنوا شوية وشوفوا ح يطلع ايه، والمية تكدب الغطاس
هو لو استنين ست عشر سبعتاشر شهر يعني ح يجرا ايه؟ ماهو التطعيم ما كانش وموجود، اعتبره لسة مش موجود، او لسة في مرحلة التصنيع لحد ما نشوف النتيجة
بالمناسبة، بخصوص منظمة الصحة العالمية المقدسة، قالت ان استخدام الفسفور المنضب مافيش دليل علمي يقول انه بيجيب سرطان، ح اجيب لكوا اللنك لما ابني يرجع لي عشان كنت حاطاه في الفيفوريتس، والسنة دي تضاعف عدد المصابين بالسرطان في العراق
    

29 comments:

mido said...

موضوع الفاكسين لم يستقر بعد

!

هو انت عملتى ايه فى ابنك ؟


و حيرجع امتى ؟

:D

Unknown said...

اسم الله عليك
لم يستقر بعد
خلينا احنا في السيف سايد لحد ما يستقر

اللي يجيله انفلوانزا الخنازير لا قدر الله ياخد تامي فلو

لحد ما يتجرب ونعرف راسنا من رجلينا

طول عمرهم بيجربوا فينا
خلينا المرة دي نجرب فيهم

Fatma said...

انا مع كلامك بصراحة
وشخصيا مش هاخده

كفاية بالبلاوي الزرقا اللي جاتلنا من ورا التطعيمات كلها اساسا

لسه كنت بقول على تويتر واحد دكتور اعرفه عايش في ماليزيا ضد التطعيمات كلها اساسا وعمره ما طعم بنته وعندها دلوقتي 16 سنة وزي الفل

مش عارفه دا ستر ربنا ولا هو فعلا كلامه صح ولا ايه
بس هو مقتنع ان دي كلها لعبة رأسمالية قذرة

انا شخصيا ماقدرش اخد ريسك في مرض زي شلل الاطفال مثلا

انما في انفلونزا الخنازير ريسك اني ماخدتش التطعيم اهون من ريسك اني اخده

ربنا يسترها معانا

Anonymous said...

و الله قلبي معاكي في غياب العائد بإذن الله اللاب توب :) اللي لما بيغيب الواحد بيجيلوا ارتكريا
انا شفت الحلقة بتاعة احمد منصور مع الدكتور الأمريكي ده و من بعدها وعيت على الليلة بس امي ناوية تطعمنا من الأنفلونزا الموسمية عشان سالت دكتور و قالها حيفيد ي المناعة من إنفلونزا الخنازير معرفش الناس اتهوست كده ليه و طبعا نقدرش اثق في كلام الدكتور لأنه حياخد 75 جنيه في التطعيم اضربي في 5 ولا 100 بتهياقلي احسن حاجة نعملها نشرب ليمون كتير

مواطن شووجااع said...

مفيش شعب على وجه الارض محتار دلوقتي زي المصريين.. 2/صفر تطلعنا كاس العالم ولا لأ ، نودي عيالنا المدارس ولا لأ ، النقاب صح ولا لأ ، الحج هيتلغي ولا لأ ، مصل انفلونزا الخنازير مضر ولا لأ .. بقينا شعب الله المحتار

Kalimalhus said...

لو ما قريتيش الكلام ده يبقى ممكن يكون مفيد

http://www.mathaba.net/news/?x=621794

لو عملتى سيرش على كلمة
Vaccine
هتلاقى عدد كبير من المقالات كتير منها مهم..

ألف لا بأس على الننوس ربنا يرجعولك بالسلامة..

Unknown said...

فنون

هو بالنسبة لمرض شلل الاطفال فيه رسك كبيرة لو البنت سخنت واي عيل بيسخن الا اذا حطها في العناية المركزة لحد ما تخطي السن الخطر

بس زي ما قلتي التطعيمات دايما فيه نسبة خطورة
وده تطعيم مش متجرب
بيجربوه على الناس دلوقت

لو مرض انفلوانزا الخنازير طاعون العصر زي ما بيخوفونا ولو التطعيم حيوي زي ما بيوهمونا كانت منظمة الصحة استصدرت قانون للتطعيم الاجباري

زي تطعيمات الاطفال ماهي اجبارية وصاحبك الدكتور ده نفد من القانون باعجوبة

ده لو حد بلغ عنه ح يتحاسب

بما انهم مش بس عاملين التطعيم اختياري ده عاملينه على مسئولية اللي ح ياخده يبقى ولا الانفلوانزا بالخطورة دي ولا التطعيم بالحيوية دي واحتمالية خطورته مرتفعه بسبب تصرف اللي بيدوا التطعيم اللي يشكك اي حد

وربنا يستر

في البي بي سي سمعتهم بيتكلموا عن "خطورة ارتفاع تعداد السكان في العالم" فاهماني؟ ودي ناس تاريخها عامر بالمذابح

مش باين عليهم اي امارات لاحترام الانسانية
ومش مؤمنين بربنا زينا عشان يقولوا كل مولود بييجي برزقه
وعايشين في رفاهية خايفين تروح منهم
وكانوا بيتكلموا عن خطورة ارتفاع عدد السكان لانه بيهدد رفاهيتهم
قالوا كده
قالوا الموارد قليلة وح نضطر نقتسمها مع بقية سكان العالم وده ح يقلل حصتنا

شفتي صراحة اكتر من كده؟

طب اللي قتل عشرة مليون بنغالي
وعشرة مليون هندي
ومليون ونص جزائري
وستة مليون يهودي
وعشرين مليون هندي احمر
ومليون ونص عراقي
ومليون ونص افغاني

عشان الموارد
كل القتل ده عشان الفلوس بما فيها الهولوكوست كانت اسبابها اقتصادية
مبرراتها عنصرية زي المبررات الديمقراطية

بس الاسباب اقتصادية

اللي يقتل كل الناس دي ايه المانع انه يصنع امراض وادوية عشان يخلص من الناس لنفس الاسباب


اسراء

انا افضل المناعة الطبيعية

Unknown said...

اه نسيت في قائمة القتلى

ستاشر مليون افريقي من ضحايا تجارة الرقيق اترموا في البحر

Unknown said...

المقال ده بيقول كل الفاكسينز
ineffective

يعني خطر اصدق
لكن كلها غير فعالة؟
مش عارفة

دعاء said...

بصرف النظر عن إني لأول مرة من يوم ما دخلت مدونتك ألاقيني مختلفة معاكي، يا شيخة أنا قلت شخصيتي باظت وبوافق على كل ألي بتقولية :D

لكن انا بقى أقنعني كلام أحمد خالد توفيق جدًا يا نوارة، والاخ الامريكي ألي ظهر مع احمد منصور كان واضح بشدة جهله..

على فكره أنا باحثة في البيوتكنولجي أساسًا.

مش طبيبه بالمناسبة علشان محدش يقول إني بروج لمهنتي..

لكن الكلام ألي ظاهر وألي أتقال عن الفاكسين لأي متخصص يا نوارة هيلاقي كلام مصاطب، وناس مش فاهمة كلام يحرق دم أي شخص عندة معلومات ولو بسيطة في المجال ده..

بصراحة انا بقى عكس الجميع عندي إيمان قوي بالفعل بنظرية المؤامرة العكسية..

هما من البداية كانوا عايزين يدوا مصر عدد محدود من التطعيم

و عملنا هليله والناس بدات تقول الحكومة هتاخدة للناس الكبار والناس البسيطة تولع وإيه يعني لما نموت بالنسبة لهم..

الحقيقة إن موضوع مقاطعة الفاكسين دي جات لهم على الطبطاب محدش عايز ياخده أصلاً

وبكرة هنشوف لما تدخل الانفلونزا الموسيمية مصر مع الشتاء و احنا متوطنين في انفلونزا الطيور وعندنا انفلونزا خنازير صدقيني هتبقى كارثة

و وقتها لما نطلب اللقاح هنلاقي الكبار والدول الجميلة الكبرى خدته وهيقوللنا ما انتوا ألي رافضتوا

أنا معرفش عن الفاكسين أكثر من الطبيعي لكن بقولك كل الحجج العلمية التي سيقت للقول ان الفاكسين خطير حجج غير منطقية وفاشلة تمامًا ولا أساس لها من الصحة علميًا

و علشان كده بقولك كلام احمد خالد توفيق منطقي لأن عذرًا يعني امتى عرفوا أي حاجة اكثر مما يعرفها الجميع عن الفاكسين لتخرج كل هذه الحمالات الغير منطقية فجاءة كده؟؟؟

والله الموضوع ميدخلش العقل بالشكل ده و وراه إن

بالمناسبة احمد خالد توفيق طبيب جيد جدًا بعيدًا عن الكتابة بالجرايد شخصيًا أكتشف مشكلة لدي دخت بها على الدكاترة لمدة 3 سنوات دون أي طبيب عدل يعرف يحلها

ربما لهذا أيضًا انا بتحمسله دائمًا لانه انقذ حياتي بمعنى الكلمة ..

Kalimalhus said...

فعالية التطعيمات دى مسألة إحصائية و إن ماكانش اللى يقول إنها فعالة أو غير فعالة يقدم دراسة على نطاق معقول تؤكد كلامه فمش لازم ناخد بيه..

أنا مهتم بحاجتين:

1 - التطعيمات ينتجها حصريا شركات إستثمارية تنظر للأمر بصفته عملية إستثمارية ذات أرباح عالية و سوق غير محدودة..

2 - المؤسسات الحكومية و الدولية ذات العلاقة ترتبط بتعاملات ليس فوق مستوى الشبهات مع هذه الشركات ..

الحاجتين دول كافيين لزرع الشك فى نفس أى بنى آدم بيشغل عقله..

Unknown said...

دعاء

طب كويس
جربي بقى الفاكسين وقولي لنا

انا شخصيا من حقي كمستهلك ان الفاكسين يتجرب على الاقل

هم ما جربوهوش ودي خطوة مهمة جدا

نجرب فيك انت بقى يا جميل
ههههههههههه

Unknown said...

مهندس حر

انت عارف، انا حيثما وجدت الرأسمالية اتحسس مسدسي

Unknown said...

على فكرة يا دعاء
هم ح يدوا الفاكسين للدول الفقيرة مجانا

بالنسبة لنا احنا
ماحدش مقاطع الفاكسين
معظم اللي مقاطعين الفاكسين في اوروبا وامريكا

مش هنا

Kalimalhus said...

يا ريت الناس تبدأ تفهم إن الرأسمالية هى الوباء العالمى الحقيقى و اللى هيؤدى إلى إنقراض الجنس البشرى لما يقوده جشعه إلى تدمير نفسه بنفسه .. بس طبعا هيتقال إن ده كلام ديماجوجى..

سيبك صحيح إن رزق الهبل عالمجانين :)

soreal said...

thats what happens when you get on myspace :P
NOW..
leaving jokes a side; considering the speed by which the flu virus mutates , a flu vaccine is worst than useless..

Unknown said...

هههههههه
بقالي شوية مش باقعد على ماي سبيس

والله انا فعلا خايفة من اللي بتقوليه ده

عشان كده نستنى نجرب في الناس اللي طواعية مستعدة تاخد الفاكسين

نعتبرهم متطوعين من اجل العلم وانا عن نفسي فكرت اني اوصي باعضائي بعد ما ا موت لكن طول ما انا عايشة مش ح اتطوع في حاجة زي دي

أبو أمك said...

عدنا...والعود أحمد
في اوروبا والدول المتقدمة
بياخدوا مع الفاكسين طحينة

مهندس مصري بيحب مصر said...

ابقي شوفي الموضوع ده عن تقرير جولد ستون
http://forums.myspace.com/p/4635819/64798887.aspx?fuseaction=forums.viewpost#64798887
و حملي التقرير الأصلي كاملاً من هنا
http://www2.ohchr.org/english/bodies/hrcouncil/specialsession/9/ docs/UNFFMGC_Report.pdf

BmBm said...

بصى يا ست الكل
أولا: نقطة ان احمد خالد توفيق مش فالح فى الطب و عشان كده بيكتب فى الجرايد، فيحيى الرخاوى بيكتب فى الجرايد.
ثانيا، ماهو التامى فلو برضه بتنتجه شركات رأسمالية وضيعة، تستدعى أن تتحسسى مسدسك، الواقع ان شركات الأدوية شر لابد منه، لحد ماربنا يريحنا من النيو وورلد أوردر برمته (حلوة برمته دى)
ثالثا، ماهو العالم غير المستقل مش هايسيح لنفسه و يقول أنا مش مستقل، ليه مانفترضش ان شركة روش اللى بتنتج التاميفلو، حست ان الفاكسين هايقضى على المرض اللى كان فاتحة خير عليها، و هايرجع التراب على علب التامفلو تانى، قامت مفبركة الفلم ده.
رابعا، إذا كنتى بتتكلمى عن المقال اللى اتكلم عنه أحمد خالد توفيق، فالمقال فيه أخطاء علمية بالكيلو، لكن فيه كذلك هبل كتير، مثلا هما بيقولوا ان الفيروس ده اشتغالة و مش موجود أصلا، و فى نفس الوقت بيقولوا انه مخلق فى المعامل، طب ازاى ؟ ماهو يا دى يا دى.
بيقولوا ان المرض قتل 500 بس، الرقم ده كان فى شهر ستة، ساعتها مكانش فيه لقاح.
أما بالنسبة لمنطق ان احنا عندنا بلاوى كتير، ماشى ، المشرحة مش ناقصة قتلى، و إجراءات الوقاية فى الجامعات و المدارس عندنا تمثيلية كبيرة ، و ان شاء الله ربنا هايبعت للبلد الوسخة دى مصيبة تاخدها من تحت راس انفلونزا الخنازير دى.
على فكرة، حسب معلوماتى، احنا بنشحت 15 مليون جرعة من اللقاح من منظمة الصحة العالمية، يعنى هما لو عايزين يقضوا علينا بجد، كانوا ادونا تمانين مليون.
آخر حاجة، لقاح الانفلونزا اللى بينزل كل سنة فى الصيدليات أول الشتا ده، برضه مابيتجربش فترة كافية، و اللقاح بتاع أنفلونزا الخنازير ده مصنع بنفس الطريقة.

Kalimalhus said...

بخصوص الفيفوريتس عشان إنتى عارفة إن أى كمبيوتر معرض لوعكات و ساعات لاقدر الله يعنى الشر بره و بعيد مبيقومش منها .. لو لسة مش بتستخدمى أى بووكماركينج سيرفيس عالنت يبقى لازم تعملى أكونت فى أى واحدة منهم ..

دعاء said...

ههههههههههه

هجرب والله يا نوارة وأديني موصياكي اهو لو جرالي حاجة في ظرف سنه أوعي تاخدي الفاكسين وعليكي وعلى نشر اخطارة وقتها على الأقل نبقى جربنا وبتتكلمي وفي أيدكي مستندات (شهادة وفاتي وقتها)

لو محصليش حاجة أبقوا خدوه بقى وانتوا مطمنين بس ربنا يستر بقى طول السنة دي..

overdose said...

كلامك صح للاسف

بس دكاترة مصر ايه يا نواررةةةة؟؟

Eldebug said...

سؤال بسيط مالوش دعوة باى بتنجان
ايه فايدة المناورات بتاع النجم الساطع اللى انتى كاتباه ده ... هى دى حاجة كمان يعنى بنفهم فيها !!!
انا صحيح صوّت .. بس بعد ما صوّت قلت ايه الهبل ده .. انا صوّت مفيدة على اساس ايه يعنى .. واللى صوّت ضارة على اساس ايه

بليييز يعنى المؤسسة العسكرية هى الحاجة الوحيدة فى مصر اللى شغالة صح فى مصر .. بليز بليز اوى يعنى ياريت نسيبهم فى حالهم وندعى ربنا يثبتهم على حالهم .. ولو فى حاجة سيادتك شايفاها غلط فيها معلش المرة دى غمضى عينك واعملى عبيطة

Unknown said...

ابو امك

ههههههههههه
وحشتني

مهندس مصري
متشكرة قوي قوي قوي يا محمد


BmBm

لا مش شرط، هههه، انا بس متشككة في حماسة احمد خالد توفيق للفاكسين فقلت اشكه
ههههههه

بص، انا مش ماشية ورا المؤامرة ولا حاجة
انا ماشية ورا مخي
الفاكسين ما اتجربش
ما اتجربش
انا مش مستعدة يتجرب عليا، فيه متطوعين كتر خيرهم زيك وزي دعاء مستعدين يجربوه عليهم
انا مش ناوية اعمل كده، وما انصحش ان اي حد في دول العالم التالت يعمل كده، لو ح يتجرب ماهو ح يتجرب في اوروبا والدول المتقدمة
احنا اولى بالفلوس لحد ما نشوف ح يعمل فيهم ايه؟ لو طلع كويس ناخده لو طلع وحش يبقى وحش

انما اي كلام عن فاعلية الفاكسين وازاي انه كويس وحلو وقمر وجميل ده اسمه نصب علني

يعني اذا كان اللي بيهاجموا الفاكسين ادلتهم العملية واهية

فاللي بيقولوا ان فاكسين كويس ماعندهمش اي ادلة علمية خالص

هو حد بيعرف التطعيم كويس وفعال وللا لا الا لما يتجرب؟
طيب يتجرب فينا احنا ليه؟ هو احنا ناقصين؟

مهندس حر
اسكت، مش الموكوس ستبهولي والفيفورتس طارت
ههههههههه


دعاء
هههههههه
ربنا يسلمك يا حبيبتي


overdose

الدكاترة المصريين بيفضلوا حانوتيه لحد ما يروحوا في حتة فيها طب ويتفوقوا وده مش راجع لعظمة كلية الطب المصرية لا سمح الله بس لانهم اخدوا تدريب هنا يغزلوا برجل حمار

Eldebug

طب كنت تصوت على اربط الحمار مطرح ما يحب صاحبه
بليز بليز بليز
احنا ما نعرفش حاجة عن الجيش بتاعنا اللي بندفع له ضرايب
وكل حاجة في البلد دي تخصنا مفيش حاجة اسمها نسيبهم
نسيبهم ده ايه؟
ما سيبناهم في سبعة وستين

mido said...

فيديو( النجم الساطع) :مناورات قبالة السواحل المصرية بمشاركة أمريكية

مها said...

العزيزة نوارة

اتفق معك فى ضرورة الحذر من اتخاذ قرار التطعيم بالمصل
ومناقشة الامر بشكل موضوعي
:ولكني لا اتفق معك في فرض ذلك بجملة
ماحدش ياخد تطعيم انفلونزا الخنازير

ولا في تعميم صفة "حمير" على دكاترة مصر اللي معظمهم بيعمل معجزات رغم عمله في ظروف صعبة
وتكاد الامكانيات فيها تكون منعدمة

هل يجوز مثلاً تعميم صفة فاسدين أو منافقين أو مرتشين
على كل الصحفيين لأن واحد صحفي فاسد ومنافق ومرتشي كتب خبر مضلل
بدافع الوصولية والتملق والزيس؟؟

التعميم أسلوب كلاسيكي في الطرح
لا أعتقد أنه يليق بك



كل احترامي وحبي

Unknown said...

لا ياحبيبتي
بالرجوع للبوست انا قلت ان الدكاترة بتوعنا مش حمير
بس احنا محرومين من البحث العلمي
لكن هم مش حمير طبعا، لما بتتوفر لهم ظروف يزاولوا في الطب بجد بيتفوقوا وبيبقوا احسن دكاترة، ووالله مش باقول كده عشان هم مصريين، بس بجد دي حقيقة، لما بيروحوا في اي حتة بيفلحوا
لكن مصر بتحارب البحث العلمي للاسف

حسن على said...

انا حاليا باكلمكوا من جهاز ماما حيث اخدت لي كلمتين في جنابي قبل ما اقعد وح اخد زيهم لما اقوم وزيهم تلات اربع مرات لما تيجي تقعد على الجهاز بتاعها وتتهمني باني بوظت لها شغلها وستشفعهم بتقريع مصحوب بالشماتة: انا باحافظ على حاجتي... مش زيك >>>>>>>>>>>>>>>................ هااااىىىىىىىىىىىىىى شامتان فيكى قوى بل اكثر من ذلك فرحان فبكى ,و ولا تفدرى تردى ولا تقولى بم. طب لو جدعة كدة قولى بم...؟؟؟؟؟؟؟؟