Tuesday 13 October 2009

الشعب الجزائري الشقيق والشعب المصري الشقيق... جاتكوا خيبة انتوا الاتنين

اكتر حاجة الستات بتكرهها ايه؟ ان جوزها ياخد اجازة ويقعد لها في البيت، ويا وقعة سودا لو طلع على المعاش وما عندوش حاجة بديلة يعملها، ويا داهية دقي لو كان ظابط جيش او بوليس، البيت بيتحول الى جحيم، لأن مافيش حاجة حياق الراجل وتكفي البيت كله شره غير انه يشتغل لما يتهد، واسعد بيت في الدنيا اللي راجله بيشتغل شغلانة مليانة معارك مقسمة، تبقى زي افلام السيما كده، بداية ووسط ونهاية سعيدة، وبعدين يبتدي معركة تانية بداية ووسط ونهاية سعيدة وهكذا كذا فزورة، يا سلاااام اهو الراجل ده بيبقى نسمة في البيت، عثل عثل، وبيتحول بقدرة قادر الى تسونامي اول ما بيفضى.
ده بقى اللي حصل لكل من الشعبين الشقيقين المصري والجزائري، فضيوا، طلعوا معاش بعد سنوات طويلة من الكفاح والاحلام، وبيقرفونا بقى، واللي زاد في قرفهم ان كل احلامهم احبطت، زي اتنين لواءات جيش جيران في عمارة واحدة بيتخانقوا على مفتاح الاسانسير بعد ما حاربوا اربع حروب وطلعوا الاتنين على المعاش، طب على فكرة يا سيادة اللواء مصري وسيادة اللواء جزائري، لواءات الجيش عادة عشان ما يعملوش زيكوا كده بيشوفوا لهم شغلانة تانية بعد ما يطلعوا معاش، بيشتروا حتة ارض ويزرعوها، بيدخلوا مشاريع، وبيفشلوا فيها لانهم ما بيفهموش في الاستثمار، ويقعدوا يشتموا في الناس النصابة اللي عايزة كل حاجة تمشي بالرشوة، ويتندموا على البلد اللي حاربوا عشانها وباظط، مش مهم، المهم انهم بيشغلوا وقتهم في حاجة مفيدة (وعادة لازم تبقى مفيدة للبلد عشان هم عندهم تصور ان البلد دي مسئوليتهم من ايام ما كانوا في الكلية)، ياريت تعملوا زيهم كده وتشغلوا وقتكوا في حاجة مفيدة عشان احنا مالناش ذنب نقعد نسمع خناقاتكوا في منور العمارة كل يوم، وكل واحد عمال يعاير التاني: احنا ساعدناكوا في حرب التحرير.. احنا ساعدناكوا في تلاتة وسبعين، كل ده على ماتش كورة، يارب انتوا الاتنين تخسروا
ما اعرفش ازاي، بس قادر على كل شيء، ممكن فجأة الاتنين وعشرين لاعب بالجمهور بتاعهم يتكسحوا، بعيدة على ربنا يعني؟ 
جتكوا خيبة

9 comments:

مواطن مصري said...

، ويا وقعة سودا لو طلع على المعاش وما عندوش حاجة بديلة يعملها، ويا داهية دقي لو كان ظابط جيش او بوليس، البيت بيتحول الى جحيم


صدقتي في دي

بس دة مينكرش فضل فصر في مساندة الجزائرة يعني يفوتلنا المتش زي ما احنا ساعدناهم كدة

انشاء الله هنكسب

المتش في ارضنا و ملعبنا

Unknown said...

الله يفتح عليكى يانواره - جبتى المفيد كله
خير اللهم اجعله خير حلمت ان

"مصر تسحب سفيرها من الجزائر للتشاور بعد صعود الجزائر لكأس العالم"

" الجزائر تتقدم بشكوى لمجلس الأمن تشكو من ظلم التحكيم ووقوفه بجانب مصر"

حسن على said...

وكل واحد عمال يعاير التاني".....دة "داء متأصل فى المهزومين ومتلازم مع قلة الاصل والجهل والشوفانية والتفاهة والمعيلة والغباوة لامؤاخذة

mido said...

هو انت لسه شوفتى حاجة :d

حيبقى فى ضحايا فى الموضوع ده

واحد يتفقع عينه

واحد يكسر

االخ

mido said...

النساء المحور الرئيسي للاهانات المصرية الجزائرية قبل المواجهة التاريخية

عبد الزهراء المصري (علي الحسيني) said...

ههههههههههههههههههههههههههههه الله ينور عليكي يانوارة والله بجد بتفهمي ، عاملين لنا دوشة عالفاضي ولأ هما بيعرفوا كورة ولا يحزنون وأهو حاجة ويشغلوا فيها الناس عن فساد وفشل النظام .
ربنا يحرقهم نفر نفر


صورة لفشل حسني ونظامه :
http://14massoum-egyptsfatimid.blogspot.com/2009/10/200.html

Anonymous said...

هههههههههههه

لا ده لسه في ضرب نار كمان

دي الموقعه المرتقبه

امبارح علاء صادق " محلل رياضي لو تعرفيه " قال نلاعبهم في ملعب من غير تراك علشان الجمهور يبقا قريب من الملعب يخوف الحكم واللاعيبه :D

تحياتي

هتشوفوا said...

والنبي يا جماعة كله إلا الكورة, دي الحاجة الوحيدة إلا ممكن لسه فيها أمل , أنا عارف أنها بستخدم لتحسين وجه النظام ,بس معلهش أهو المعلم الكبير لما بيروح الماتشات , بنخسر , ونفضل نشمت فيه , ونقول الحاجة الوحيدة اللي تفرحنا , أن الناس ها تقول عليه وشه نحس, معلهش علشان خاطر أبوتريكة, ومفيش حد بيدخل الكورة في السياسة, يعني احنا بنكره الجزائر في الكورة بس

يساري نوبي said...

http://www.facebook.com/board.php?uid=138340787090#/topic.php?uid=138340787090&topic=10030
معلش انا عارف ان اللينك دا جارح ومهين فعلا لكن دي حقيقه واحد مصري معلش ف اللفظ وسخ امه ماربتوش بيشتموا المناضله العظيمه جميله بو حريد و بيعايرا الجزائرين
ارجوكي يانواره افضحي الكلاب دا