Wednesday 7 October 2009

احتفلنا خلاص؟ انا عايزة اعرف بقى الفلسطينيين مالهم؟

احتفلنا وانبسطنا وجسمنا قشعر وعيطنا وعشنا وقرينا الفاتحة للشهدا واتكلمنا عن القضية اللي رافعها نور الشريف وخلاص؟
ايه بقى؟ ايه الفضيحة اللي حاصلة دي؟
اه فضيحة جولدستون وفضيحة الصمت المطبق على اللي بيحصل في الاقصى
وفضيحة جولدستون مريعة، قال ايه بعد ما مندوب فلسطين طلب تأجيل التصويت على تقرير جولدستون ابو ماجن فتح التحقيق، واسماعيل هنية بقى يتشال ويتحط وعمره ما وشه احمر وبقى عمال يتنطط كده ولا حتى ايام حرب غزة، ده كان ح يشد شعره، والله قرب ايديه من راسه وكان ح يشد شعره: بتحققوا مع مين؟ التحقيق ده لما حاجة تحصل وما نبقاش عارفين مين المتسبب فيها، انما احنا عارفين، ابو مازن يطلب تأجيل التصويت ويحقق في طلب تأجيل التصويت؟ ايه ده؟
وكل واحد عمال يرمي على التاني، وابو ماجن بعد مع حقق مع نفسه في القرار اللي هو اخده طلع قال: القرار ده بعلم وموافقة الدول العربية. طبعا مصر على راسها بطحة من ايام ضرب غزة قالت: والله المرة دي مش انا، والله ما انا
امال مين؟ هسسسسسسسسسسسسس
ايوة يعني مين؟ 00000000000000
في الاخر قالوا باكستان
باكستان؟ باكستان مالها؟ باكستان مالها ومصر مالها والدول العربية كلها مالها؟ مالهم يا ابو ماسخ، الحقيقة يعني انا واقفة لعوكل على الواحدة وباطلع عينه في كل حاجة، بس المرة دي هو ماله؟
في الاخر طلع ريتشارد فولك وقال: السلطة الفلسطينية خانت شعبها وانقذت اسرائيل من المحاسبة، وفيه مصادفة غريبة، ان اسرائيل هددت بانها ما تديش تصريح لشركة الموبايلات لو التقرير تم التحقيق فيه والمصادفة الاغرب ان الشركة دي مملوكة لابن ابو ماجي
يعني عشان مازن يعمل سبوبة حلوة قام جه ابو مازن وضرب طناش على الف ونص ماتوا من غير ذنب ولا سبب
ومندوب فلسطين في جنيف بيقول انا كنت بانفذ الاوامر، ونبيل عمر قال ابو ماجن لازم يتحمل المسئولية هو المسئول الوحيد، قوم عريقات يقول يعني كلكوا بتتخلوا عنا وعايزين تحملونا المسئولية لوحدنا؟ الله، يعني ح نعمل لك ايه؟ ح نغير لك البامبرز وللا نعمل لك الرضعة. ثم تنطورت الاخبار يمنة ويسرى عن ان اسرائيل ماسكة سي دي لابو ماجي شوربة الدجاج الذ الذ الذ وهو مجتمع فيه مع ايهود باراك وبيقول له اضرب غزة قام ايهود باراك، ايهود باراك اللي باقول عليه ايهود باراك قال له: ده كده ح يبقى فيه خساير في المدنيين كتير
قام ابو ماجي قال له: مش انتخبوا حماس؟ هم اللي قرروا مصيرهم! المصادفة التالتة ان ايام الحرب على غزة المقروص في جنابه بدل ما يطلع يعزي الناس طلع قال لهم آدي جزات اللي ما يسمعش كلمة ماما تقولها، طلع يتشمت فيهم في وشهم وهم بينضربوا
المفاجأة الاعظم، ان الكلام ده لما نشر ابو ماجي ما ردش، وبقاله مدة ما بيردش، كل ما حد يقول ما يردش، نقوله ياعم، ما يردش، ياسيدي ما يردش
نعمل له ايه؟
انا عايزة اعرف الفلسطينيين مالهم؟ مش عارفين يعزلوه؟ هو مدته منتهية اصلا، مش عارفين يحاكموه؟ مش عارفين يعملوا اعتصام كبير شبه جنازة ياسر عرفات؟ مش عارفين يفسحوه؟ ماهو فسح عرفات، ما يفسحوه، ايه؟ هو احنا بنتكلم عن مصر وللا السعودية وللا سوريا وللا العراق؟ دي فلسطين، بلد الثورة، بلد الانتفاضة ايه؟ ايه اللي حصلهم؟ مالهم؟ طب احنا خايفين على حاجات، هم خايفين على ايه؟ هم حيلتهم حاجة؟ وبعدين قالوا الناس اعتصمت ضد تأجيل تقرير جولدستون، ابص يا اخويا الاقي لك عدد كده شبه العدد اللي بيقف على سلم النقابة، ينيلكوا ايه اللي حصل لكوا؟ احنا بعتنا لكوا اكل وللا ايه؟ ما عدتوش تاكلوا من عندنا تاني خالص، ده فلسطين دي كانت اقل مظاهرة فيها بتطلع عشرين الف، ده في الاحداث العرضية يعني، فين؟ فين؟ فين الفلسطينيين الفاقدين اللي مقطعين البطاقة ونازلين في الشارع وبايعين الدنيا؟ حصل لهم ايه؟ وللا مضروبين على دماغهم ومش عارفين يستوعبوا، هو اغلب الظن مش عارفين يستوعبوا، ويمكن دي حادثة اول مرة تحصل لهم، يعني هم بقالهم ستين سنة بيحدفوا الاسرائيليين بالطوب، اول مرة يلاقوا نفسهم قصاد زعيم خاين بالوضوح ده، بس خلاص، استوعبوا بقى، ده خاين، ده خاين، ده خاين، رسمي نظمي فهمي، مافيهاش فصال ولا كلام، ابو ماجن خاين، اغنيها لكوا؟ اعملها لكوا عصيدة؟ تاخدوها شندوشتات في شنطة المدرسة؟ ده خاين، خاين، اسمعوا الغنوة دي، خاااااااااااااييييييييين... مش عارفين تخلصوا من واحد خاين؟ لما هم يخيبوا ويحتاسوا كده امال مين اللي يعرف يتصرف؟ تؤ، ما تبصولناش، اللي عايز يفلح يبص للي بيطلع الاول ما يبص للي جايب كحك في الشهادة وعمال يعيد السنة
انتوا ايه اللي جرا لكوا؟  

12 comments:

Mohamed said...

هى موضة السنادى سديهات ولا ايه ربنا يستر علينا

mido said...

بخصوص موضوع المصل اقرى مقال احمد خالد توفيق ضرورى

Anonymous said...

الراجل ده مقرف قوي

بس اعتقد ان سبب الصمت الرهيبي من الفلسطينيين .... ان في نص اللي تبع فتح خايفين من النص بتاع حماس ليبهدلهم لو مسك الحكم

يعني نوع من العصبيه

وباقي الناس اما متعاطفه مع احدى الفريقين ....او خايفه من احدى الفريقين

اعتقد انها عصبيه وتحيز.... وانا واخويا على ابن عمي

تحياتي

مواطن مصري said...

و الله يا نوارة الي موجودين في فلسطين عاوزين فورمات و ينزل نسخة ويندز أصلي

ربنا يهديههم في المصالحة هي يوم 22 ولا 25؟

ahmed samir said...

بالنسبة للمظاهرات في الضفة متنسيش الأجهزة الأمنية هناك اللي تابعه للسلطة و الجنرال دايتون اللي كان بيفخر ان مكنش في مظاهرات في الضفة ايام ضرب غزة..

اما بالنسبة لأبو مازن الراجل خلاااااص ريحته فاحت و عفنت و عبئت الجو و لازم حد يخلص منه عشان كدة مش نافع
فاروق القدومي اتكلم عن مشاركته في اغتيال عرفات و حكم بلعاوي قال انه عنده وثائق تثبت تورط ابو مازن في اغتيال ابو جهاد ( خليل الوزير)في التمانينات.

دي كانت فرصة ممتعوضش انهم يلاحقوهم قضائيا و يخلوهم زي الفيران خايفين يروحوا اوروبا لتقبض عليهم..

بجد بجد اللي بيحصل في رام الله ده حاجه تقرف

Unknown said...

خايفين من حماس؟

انا عايزة اعرف هي حماس عملت ايه؟ حد يقول لي ايه الغلطة اللي عملتها حماس؟

حد يعمل لي ليستة كده حماس عملت كذا وكذا
يعني خانت مين مثلا
سرقت مين
اتعاونت مع اسرائيل ضد مين
عملت لهم ايه حماس غير انها نجحت في الانتخابات؟ مش هم اللي انتخبوها؟

عملت ايه؟ بتحجبهم بالعافية؟ يعني ح يضيعوا بلدهم عشان مش عايزين يتحجبوا بالعافية؟

وبعدين ما القدومي لحس الكلمتين هو راخر

انا عايزة اعرف ايه اللي وراه عباس ده
ازاي محمي بالطريقة دي

وبعدين هي المشكلة مش في عباس وبس، عباس وحواشي عباس

اذا ما كانوش عارفين يخلصوا من المجموعة دي يبقى يسكتوا بقى

عموما انا شفت ان حماس ح ترفع عليه قضية
المفروض كلهم بقى بكل فصائلهم يساندوا حماس في القضية دي

سبهللة said...

انا من الاول مش مرتاحة للزفت دة
يعنى الصهاينة يصب عليهم يقتلوا المدنيين
وهو اللى يحرقه يقولهم يستاهلوا عشان اختارو حماس
الهى ياكلك قطر يا شيخ
وتتنيل تنام ما تقوملكش قومة تانى
حسبى الله ونعم والوكيل

soreal said...

شوفي يس ستي... الفلسطينين مالهم زي مال غيرهم....
المصلحه رأكبهم زي ما هي راكبه غيرهم
ولي مصلحته تركبه وتخليه يتصور أنه مصلحته الفرديه أهم من مصلحه الجمأعه... أو أهم من الصواب والخطأ ... إو حتي الحلال والحرام .... ربنا بيخلي حاله زي ما إنتي شايفه ..

أما اللي ملهمش في هألموضيع ماشيين جنب الحيط وطالبين الستر من رب العالمين ، قولي أمين بلكي ربنا ينولها لاختك يا نواره

soreal said...

thinking about it, do u think anarchism is the solution?

عابر سبيل said...

it is the same reason all of us in the arab countries suffer from.... LEADERS in all shapes and forms; presedents, kings, Ameers etc... act as small gods and no one can do or even objects to thier actions... even if we all can see it as clear as the sun in June, we still cannot do anything to remove a presedent by force or by political means... we cannot have a coup to remove Abu Zeft... and we cannot even Enjoy the blessing of our elected goverment. we just cannot!!!! you speak highly about the palestinians but remember it is over 60 years now... they have been in so many masacres and wars... they have been killed in any possible oppurtunity !!!! they as I think had enough... they had enough of and it is so hard for them to continue... what is the point!!!!!???? that's what most of them say... to many of them( palestinains) it looks like a media war between different factions in the palestinian spectrum rather than a genuine... it looks like who would get the hot seat rather than who wants to liberate our holly land.... things are mixed up in the grass root level.... spme people even say to hell with the report if it is going to extend the siege on us... people basically scared... although they have nothing to lose in my opinioon... but most think they have tried to fight for 60 years with little success... we have been a target by brothers and enemies for a long time... fighting Israel is not a way forward... that's what the media teach them every morning and evening... Isralei politicians are appears like idols in the Arabic media... this no doubt affects people perceptions about "the enemy"....

in my opinion the like of Abu Majin is the enemy within... they are the more dangerous enemy and need to be fought... as they are now more than ever exposed and we can see their true colours disguiting!!!

the magnificent ninja said...

المشكلة في فتح اللي عمالين يختلقوا قصص وهمية لتشويه صورة حماس و يجندون الخوارج لمحاولة القضاء على حماس بل و كانوا يريدون دخل غزة على دبابة صهيونية , و حماس تحكم في غزة بالعدل و هذا لا تجده في أي بلد عربي حاصل على استقلاله التام , فلماذا كل هذا الحقد على حماس من بعض الناس ؟؟ كراهية في الاسلام و خلاص من جانب الماركسيين و الليبراليين و غيرهم من العلمانيين؟؟
و من الآخر حماس فوق الجميع و اللي ينتقد حماس لازم ياخد بالجزمة

Al said...

ما جرى مع قرار محكمة لاهاي حول الجدار سيجري مع تقرير جولد ستون ، فويل لأمة لا تُحسن توظيف ما لديها من أوراق قوة..!!؟

يعني في النهاية، أن ما حدث مع تقرير غولدستون، هو صورة عما سيجري مع الرعاية الأميركية للمفاوضات الفلسطينية ـ الإسرائيلية، ومع مشاريع أميركا للتسوية السياسية.

إنها سياسة إملاءات. وسياسة رضوخ. وفي قضايا تتعلق بمصير الشعب. ولم يحدث أبدا أن الشعوب سكتت أمام قضاياها المصيرية.
واخيرا اشكرك على هذة الجرأة في طرح مواضيعك المتنوعة http://alashoury.spaces.live.com