Friday 2 October 2009

الاسيرات مش مبسوطين

انا لسة ما ابتدتش مذاكرة، اصل انا بامشي في الجزمة الاول. تغطية الافراج عن الاسيرات في الجزيرة بشكل كامل، لاحظت ان الاسيرات وشهم مقلوب، قلت طبعا ماهم خارجين من عند الاسرائيليين يعني، اكيد شافوا ايام سودا. وبعدين ليلى الشايب في الاخبار استضافت اسيرة. ومش عارفة اقول لكوا بقى، ليلى الشايب اللي وشها ما بيضحكش للرغيف السخن وماحدش بينافسها في التكشير غير جميل عازر، ويا سلام لما الاتنين بيقولوا النشرة بيتبقى محزنة، ومع ذلك فجأتن ولأول مرة ابتسامتها من الاذن للأذن: ونرحب بالاسيرة المحررة. اهلا بك والحمد لله على السلام، اخبرينا عن مشاعرك ومشاعر الاسيرات..
الاسيرة باصة في الارض وزعلانة زعلانة زعلانة، زعلانة قوي
قالت ان الصفقة مش مرضية، وقالت ان المفروض كانت تشمل كل الاسيرات، وقالت ان كان فاضل لها ست شهور وتخرج، وقالت ان المفروض الصفقة كانت تبدي اللي واخدين مؤبد على اللي واخدين احكام صغيرة، وقالت ان الاسيرات اللي في السجن زعلانين جدا، وقالت ان الفصائل الفلسطينية تبطل خناق بقى وتوحد صفوفها وتحاول تبرم صفقة عادلة
وليلى الشايب ابتسامتها فضلت تصغر تصغر تصغر لحد ما رجعت قلبت وشها خالص زي فردة الشراب
وانا باعيط دلوقت

19 comments:

ندى عياش said...

فصائل ايه اللي تتوحد يا نوارة ؟

اللي هما مين يعني ؟

مشروعين متضادين في بلد واحدة مينفعش

لازم واحد اللي يمشي

فكرتيني بمواسل ملنار بغزة بيقول الشعب الفلسطيني يصلي اليوم من أجل الوحدة

قلت لماما صح ... انا ما بنام قبل ما أدعي من قراقيح قلبي يا رب وحدنا !
لا انا بدعي يا رب خد عباس و فياض و من شابههم

عودا لموضوع التبادل ... طول عمرهم اليهود هيك

بآخر تبادل مع حزب الله كان الاتفاق على اللبنانيين و 400 فلسطيني

طلعوا اللبنانيين .. ال400 طلعوهم اليهود باطار بادرة حسن نية تجاه عباس
و طبعا كلنا منعرف شو يعني واحد يطلع ببادرة حسن نية تجاه السلطة !!

ملحوقة ... باذن الله ملحوقة

اكتر شيء بيخلي الواحد يتفاءل مشهد ايادي الاسرى اللي كانت طالعة من الزنازين زقت تحرير 2000

غصب عن الدنيا كلها هيطلعوا

شوية صبر بس ... بقالنا ستين سنة منتهان و منتقتل و كللللللل انواع الذل مندوقه

عجزنا دلوقت اخر كم سنة ... معادي فينا نفس نفرح

:(

tuhamy said...

فيديو شاليط وهو يلبس بزة عسكرية وامامه جريدة فلسطين الصادرة من غزة

http://www.youtube.com/watch?v=McisBKfU02Q&feature=player_embedded

tuhamy said...

روحك ما يهمها اعتقال ..انشودة فرقة الوعد


http://www.youtube.com/watch?v=iuyd1ZGjyEE&feature=player_embedded

خيرالدين said...

أنا جالى نفس الاحساس فعلا
حتى اسيرة غزه قالت كلمات قليله وكان واضح انها حزينه
بى بى سى كمان عملت تقرير فيه كلمه لأسيره تانيه فبتقول انها مش هتفرح الا بتحرير باقى الاسرى وتحرير فلسطين كلها
ليت المذيعه قعدت تضحك على الكلام

Dr Nemo said...

بمناسبة العياط..... شوفى المجنونة لارا فابيان
http://www.youtube.com/watch?v=286lPn4KekI&feature=rec-HM-r2

بس جنان شاعرى بصراحه

مواطن مصري said...

عصفور في اليد خير من 100 جوة

و بعدين دي بشرة خير و دي نتيجة لمجهود المخبرات المصرية عن المحادثات الاخيرة الي حصلت في القاهرة

المفروض بقى يشكرو عمر سليمان على المجهود الي بيعملو الراجل يشكر

مواطن مصري said...

الناس فاكرة ان شاليط لسة محتجز في غزة مع العلم انة محتجز في القاهرة امال يعني الراجل الي ادى كتاب الغريب العجيب لرئيس معناة ية غير انة محتجز عندنا

نور الدين (محمد الجيزاوى) said...

نسأل اله أن فك اسر العقول والنفوس وساعتها ستتحرر الاسيرات والاسرى جميعا
هدى الله امتنا للخير
وبالمناسبة بقى معلش انا بعشق جميل عاذر وطريقته فى تقديم النشرات وصوته الاجش
اختلاف قطعا لا يفسد للود قضية
اعمق تحياتى

fathi abouelezz said...
This comment has been removed by the author.
آه وكفى said...

لا متعيطيش نصيبهم هنعمل ايه

mido said...

لسه الصفقة الكبيرة اللى حيطلع فيها المئات فى الطريق

mido said...

مواطن مصرى بيقولك
شليط

فى مصر

:D :D :D

mido said...

بيان الاسرائيلي يقول: إن الوسطاء المصريين والألمان اقترحوا هذه الصفقة التبادلية بشاليط "كإجراء لبناء الثقة". وتطالب حركة حماس باطلاق سراح مئات من السجناء المحتجزين في إسرائيل والذين قضى كثيرون منهم فترات طويلة في السجن بسبب أنشطة مناوئة لاسرائيل

مي ثابت said...

ليه تعيطى
!!

اللى حصل النهاردة مهواش الصفقة

إنما مجرد ثمن دفعه الصهاينة فى مقابل شريط الدقيقتين و
42
ثانية الخاص بشليط



طبعاً الأسيرة المحررة كان نفسها
زي الكثير مننا
إن يتم الإفراج عن كل الأسيرات و القُصر

على الأقل

و يمكن ده اللى كان مزعلها

أكيد عندها حق

لكن فى المقابل لما نشوف إن شاليط فى قبضة المقاومة بقاله
ثلاث سنوات و تلاتة أشهر

لم يفلح خلالها الصهيونى و أعوانه من الحصول على أية معلومات عنه

و كمان لما نشوف إن الصهيونى رضخ رغم أنفه بالقبول بالوساطة الألمانية
بعد ما صورله البعض
إن الأمر بالنسبة للوسيط المصرى حيبقى نزهة

و فى النهاية حيركعوا المقاومين و يرمولهم أى فتات و يرجع شليط
ببلاش كده
و ده اللى خلاه ماشى مع عوكل

و بعدين لما لقى مفيش فايدة
وافق على شرط حماس بدخول الألمان طرفاً فى التفاوض


كمان لما نعرف إن حماس طالبت بالإفراج عن

450
أسير من أصحاب المحكوميات العالية
ده طبعاً غير عددالأسرى العاديين


فى البداية وافق الصهاينة على
70
فقط

ثم على

150
ف
250

النهاردة وافقوا ومش معترضين سوى على أربعة فقط

يعنى الصهيونى رضخ لشروط المقاومين


يعنى منعطيش علشان الصفقة




إنما اللى يستحق العياط بجد

هو موقف سلطة عباس اليوم بسحب مشروع القرار المقدم الى المجلس الدولي لحقوق الانسان
الذي يتبنى تقرير ريتشارد غولدستون
ويتهم إسرائيل بارتكاب جرائم حرب

☼♫♪ عمــاد الدين يــوسف ☼♫♪ said...

عارفه امتى الفصائل تتوحد ؟؟؟؟

لما بتوع حماس يحلقوا دقونهم وبتوع فتح يربوها ....
وطول ما في دوله فلسطينيه منزوعة الكرامه قبل السلاح يبقى سلملي على التوحد

خيرالدين said...

فعلا يا نواره زى مى ما بتقول
تاجيل القرار واستجابه عباس لضغوط اسرائيل وامريكا خيانه كبيره للقضيه ولدم شهداء غزه
وللأسف أخبار الصفقه غطت عليها تمام

مواطن مصري said...

هيهيهيهي قال الفصائل الفلسطينية تتوحد دة لما الزمالك ياخد الدوري

حماس طول عمرها رافضة الصلح و الوحدة و هي من اسباب الانقسا الفلسطيني الله يرحمك يا ياسر عرفات

أحمد عتمان - Ahmed Etman said...

تعليقات مواطن مصري النهاردة حكاية:
1- خروج الأسيرات نتيجة مجهود عمر سليمان
2- شاليط أكيد في مصر و إلا يعني مبارك حيوصله الكتاب ازاي؟؟؟
3- حماس طول عمرها رافضة الوحدة و الله يرحم عرفات

متشكر جداً يا مواطن، حسستني ان أنا غبي جداً

Ehab Fayez said...

يا سلام على دى صفقة

تسعتاشر فتاة فلسطينيه فى مقابل شريط فيديو يطمن الاسرائيليين على اسيرهم

للدرجة دى وصلت قيمة المواطن العربى

على كده السى دى يفك كام راس عربية