هي الساعة اتناشر فجرا دي تبقى امتى؟

دخل لي بدراوي الله يحظه وساب لي الفيديو ده

انا اول مرة اشوفه على فكرة، بس ايه العسل ده؟ مش ده البرنامج اللي قال فيه احنا ما رضيناش نقول اننا عارفين بضرب السودان عشان ما نحرجهاش اكمن ياختي يوميها اكلت بعيد عنك اكلت بطيخ كتير وكل شوية ع الحمام كل شوية ع الحمام، لحد ما القنبلة نزلت وهم في الوضع المحرج ده خصوصا ان الولية كانت واقفة ع الباب وعمالة تقول له للسودان: اطلع يا راجل بقى، الواد ابنك ح يعملها على روحه

بس الحتة دي مش ظاهر في الفيديو، ظاهر حاجات لطيفة برضه

زي كده

يعني بيتوعد من اساء للكبرياء المصري بعقاب رادع يخلي كل انسان يفكر الف مرة حيث انه هدد بانه لما يشوف ليبرمان ح يحط ايديه في جيوبه، وانا اكاد اجزم ان ليبرمان دلوقت بيترعش كل ما يتخيل منظر ابو الغيط المرعب الشرز المرعش وهو حاطط ايديه في جيوبه

يا مااااااااامييييييييييييييييييييي

وهنا بقى بقى بيرسخ لقواعد الدبلوماسية صح الصح، ركز بقى عشان لما تروح امتحان الخارجية تعرف ح تقول ايه

عرفت بقى ح تقول ايه؟ ح تقول ممكن جدا

ازيك؟

ممكن جدا

اسمك ايه؟

ممكن جدا

عندك كام سنة؟

ممكن جدا

انت خريئ ايه؟

ممكن جدا

وعايزين لا ننسى اطلاقا يوم عشرين يناير يوم ما دخل اوباما البيت الابيض قال هاتولي حبيبي على التليفون الساعة حداشر مساء، فالرئيس قال، ياللا نسهر شوية ما جاتش من يوم، قاموا طلبوه في المعاد بالظبط اللي هو اتناشر وعشرة فجر يوم 21 يناير

ييجي واحد جاهل يقول لي اسم الله على مقامك، اتناشر وعشرة دي اسمها بعد نص الليل، اقول له: ممكن جدا، بس ممكن جدا تبقى فجرا برضه، وده في الدبلوماسية المصرية، لان من صفات الدبلوماسي اختيار الكلمات بدقة

فهمت يا غبي؟

ولك ان تفتخر ايها المواطن المصري الاصيل، بان اول مكالمة تليفونية دولية، وشوف بقى المكالمة الدولية في امريكا بكام؟ كفاية انها بتدفع بالدورار، كانت للرئيس مبارك، اول ما تارانك دق من البيت الابيض كان لمصر ام الدنيا، اي انه راغب الراجل انه يبني علاقة، وقال للرئيس، وانا مش ح اذيع سر، وهي قالت لي، وانا مش ح اذيع سر، وانا قلته قبل كده، وانا مش ح اذيع سر، وانا ح اقول لكوا اهو، ح اقول ح اقول، ومش ح اذيع سر: احنا نرغب في اقامة علاقة مصرية امريكية حيوية مثلما كانت دوما

ييجي واحد غبي، ما يفهمش في دقة تعبيرات الدبلوماسية، يقول لي ماهي كانت دوما، بيبنوها تاني ليه، اقول له يا غبي، مش فيه حاجة اسمها صيانة؟ مش فيه حاجة اسمها وش بياض؟ مش فيه حاجة اسمها تغيير جلدة خلاط الدوش؟ وبعدين دي حيوية وقوية وكلها حنية

اغبيا

والعلاقة دي مثلما كانت دائما مبنية على الحب والتفاهم والاحترام لكنها مبنية على الحوار الاستراتيجي ما بين قوة عالمية تمسك باي مشكلة عالمية من شواشيها ما تسيبهاش الا لمن تخلص عليها، وطرف اقليمي قادر على التأثير على العالم برضه مع انه اقليمي

عرف ح تقول ايه في امتحان الخارجية؟

ياللا احفظ بقى