احنا محتاجين توضيحات من السادة المسئولين

اولا احب ابشر السادة القراء اني جات لي تهديدات من كذا ناس، ومن ضمنهم بهيج على فكرة، باني لو ما سكتش مش ح يحصل لي كويس وح يفبركوا لي القضية ويضموني معاها، والاحراز بقى ح تبقى صور السيد حسن، اه والله، قالوا لي ما تنسيش انك حاطة صورة حسن نصر الله في اودتك، لا وبيعرفوني يعني انهم عارفين ايه اللي في اودتي

يا دهوتي، ده صوره في كل حتة، وبالبس عقد خشب عليه صورته، وباحط دلوقت في الطرحة دبوس عليه صورته

ويا ترى الصور دي بقى ح تتحرز على انها متفجرات وللا على انها اسلحة حيث ان اللي بيكرهوا السيد حسن ح يشوفوني لابسة صورته يقوم يجيلهم ازمة قلبية ويموتوا من الغيط وبكده ابقى قتلتهم؟

وح ابقى احط صورته بقى كمان على العربية اللي بالقسط الجديدة، ماهو انا بعت العربية القديمة، وصدق او لا تصدق لقيت مغفل يشتريها وحطيت تمنها في مقدم وجبت عربية تانية بالقسط سبع سنين، فهل يا ترى المرتب اللي بيتحول من الحكومة مدعوم من السيد حسن؟ ده سؤال بيطرح نفسيته

وعلى اي حال، انا حبيت اقول لكوا يا شباب على التهديدات اللي وصلت واقول للي بعت التهديدات على الميل وعلى المدونة بانونيمس ومن ميلات مالهاش اسم اننون اذا كان مالهمش اسامي، فانا ليا اسم وكل الناس عارفاه

انا مش ح اسكت

ومطلوب من الحكومة المصرية اللي انا بادفع لها ضرايب شوية توضيحات

دلوقت المعروف ان مصر عاملة اتفاقية سلام مع اسرائيل

جميل؟ جميل

ومعروف ان مصر عليها التزامات امنية وخلافه

جميل

بس معروف كمان ان مصر دايما تقول احنا داعمين للقضية الفلسطينية ولسنا ضد المقاومة ومع حق الشعب الفلسطيني

طيب

الوضع كده فعلا محرئ محرئ محرئ

ما ينفعش مصر تبقى محايدة فيما يخص الصراع الفلسطيني الاسرائيلي

لان مصر مش الصين ومش استراليا، دي لها حدود مع بؤرة الصراع، وكونها ليها حدود ده يحتم عليها توضيح موقفها بشكل واضح وبين وجلي

يعني

للاسف ما بين الفلسطينيين والكيان الصهيوني صراع

فاما ان مصر داعمة للحق الفلسطيني، والحق مدام حق يبقى يتاخد باي وسيلة وبكل وسيلة

وفي الحالة دي، وحيث ان مصر عاملة اتفاقية سلام مع اسرائيل، يبقى مصر ما تقدرش تبعت سلاح لحماس، ما تقدرش تبعت سلاح للبنان، هي وضعها مش زي سوريا

لكن تقدر تعمل عبيطة

ما اعرفش...ماحدش عدى من عندي... مين؟ لا والله ما شفتش...فين؟ ابدا انا واقفة على الحدود اهو... لا اللي عدى ده مش من عندي والله، واحنا بقى نشتمهم ونقول لهم يا بتوع اسرائيل، وهم يقولوا نستمع لصوت العقل

لكن فيه انفاق بتتحفر وهم عاملين مش واخدين بالهم، فيه سلاح بيعدي و: هاه؟ ابدا، ايه ده عدى؟ لا لا لا لا، والله لامسكهم امسح بيهم البلاط ما تقلقوش

واحنا بقى نتخانق من التصريحات المقرفة دي، وكدهون يعني

اذا كان ده الوضع (واظن ان ده كان الوضع على مدى السنين اللي فاتت) يبقى ليه مصر قبضت على الناس اللي هي فضلت عاملة عليهم عبيطة كل السنين اللي فاتت؟

ما تخليها عاملة عبيطة

اذا كانت الاجابة اصل الموساد كشفهم

يبقى السؤال اللي ينطرح مش ايه اللي دخل بتوع المقاومة عندنا، السؤال الاهم: ايه اللي دخل بتوع الموساد عندنا؟

وليه ماحدش اتكلم عن السيادة لما الموساد اعلن ان هو اللي كشف شبكة دعم المقاومة؟

ده سؤال

لو السؤال ده برضه محرئ محرئ محرئ (يااااه هي بقت كده؟) يبقى خلاص، مصر اتزنقت ولقت نفسها مضطرة تقبض عليهم

ما خلصتش الموضوع في السكرتة ليه؟

"يا عم الكتكوت الجيران طابقين على مرواحي لم تعابينك"

ايه لزوم الحملة الشعواء دي؟ ايه الهلولة اللي هم عاملينها دي؟ وليه الغدر المفاجئ ده؟

الاحتمال التاني:

لا مصر مش داعمة للقضية الفلسطينية ولا حاجة، مصر متبنية خط امريكا

بقول اخر واوضح وابين: مصر داعمة لاسرائيل وموالية ليها، ومؤمنة، زي امريكا، ان "على الفلسطينيين الاقرار بحق اسرائيل في الوجود" وعليهم انهم يرضوا بالضفة وغزة، وزي امريكا برضه، مصر ملتزمة بامن اسرائيل، وعشان كده ساعدتها في ضربة السودان على سبيل المثال لا الحصر

اه

بس احنا ما نعرفش الكلام ده,.. يعني ماحدش ادانا خبر بيه، انا ماليش دعوة باي حد، انا باتكلم عن المصريين، احنا عايشين معاكوا في البلد، كلمونا زي ما بنكلمكوا

اذا كان الوضع كده يبقى حزب الله غلطان فعلا، وحماس كمان غلطانة، والاتنين بتوع فتح غلطانين، غلطانين اولا: انهم اتقفشوا، كان لازم يبقوا احرص من كده

وثانيا: انهم اعترفوا

ما تقوليش شرف بقى انت على ارض معادية، يعني كأنك اتقبض عليك في اسرائيل او امريكا، لو اتقبض عليك في امريكا ح تقول لهم ده شرف؟ ح تقول لهم والله ما كلمته والله ما جيت جنبه

صح؟

بس الكلام ده ما حصلش، اقصد ما حصلش ان النظام المصري اعلن بشكل واضح وبين انه قوة موالية لاسرائيل، والا كنا احنا الشعب المصري عرفنا الحكاية دي، والله ما حد قال لنا حاجة من دي

طب كده النظام المصري بيلخبطنا

هو ما كانش واضح معاهم ومع الشعب المصري من الاول، ما قلناش انه قوة ملتزمة بامن اسرائيل في المنطقة

هممممم

هو كلام جديد ويفسر ليه بنبعت لهم الغاز حاجة ببلاش كده، والبترول، دي تبقى بقى معونة مصرية رايحة لهم مع المعونة الامريكية

الله

طب مش تقولوا؟

كونه تفسير لا يعفي النظام المصري من مسئولية انه ضحك علينا وقال لنا انه داعم للحق الفلسطيني، انا اللي اعرفه ان لحد هذه اللحظة عيالنا في الحربية بياخدوا في المناهج: اسرائيل هي العدو

وان دي عقيدة الجيش لحد النهاردة

وللا هاه؟

ايه اللخبطة دي؟

ما تكلمونا احنا مش معترضين: آه آه... لا لا

بس نبقى عارفين، لان فيه حالة لبس ادت للموقف البايخ اللي كل الناس فيه

وبلاش كلام عن السيادة والنبي عشان ده كلام يضحك

بس مسئول مصري واحد يبقى عنده الشجاعة انه يطلع علينا ويقول لنا: يا جماعة احنا غيرنا هدومنا، اسرائيل بتاعتنا واحنا بتوعها

ودي مش اسمها جمهورية مصر العربية

والمادة الاولى من الدستور اتغيرت

واسم مصر اتغير

وعلمها

وتاريخها... خلاص

نقوم نعرف ونستبين ونبقى على مية بيضا ولا المشاكل ووجع الدماغ

صح؟