Sunday, 26 April 2009

جدة اوباما وشوية حاجات

تحديث:
انا اسفة خطأ شائع... المقصودة هي جدة اوباما مش عمته، عمته اتقفشت في هجرة غير شرعية، ده غير اخوه اللي اتقفش بهروين... العيلة دي ضايعة باين عليها
المهم، مش لاقية اللنك لانه كان منشور في الاهرام وانتوا عارفين الاهرام مانع الارشيف الا بفلوس
لا وبيقول انه مفلس

الحاجة جدة اوباما حبت تزور ابن اخوها وتنزل عليه في البيض الابيض تباركهوله وتنام في اودة المسافرين وتلاعب البت ميليا والبت ساشا وتجيب لهم سكر نبات وتحكي لهم حكاية ست الحسن وامنا الغولة
فيه حاجة مش عادية؟
وبعد شوية راحت الكنيسة تتنصر
فيه حاجة غريبة؟
وبعدين اهلها قالوا لها ح نولع في امك لو عملتي العملة دي
في اي حاجة خارجة عن المألوف؟
راحت الولية قالت خلاص خلاص مش ح اتنصر
كل ده لحد كده شغال وعادي وبيحصل كل يوم 
قوووووووووووووووووووم الولية تعليقا تقول ايه؟
تقول: في الحقيقة انا مسلمة ومؤمنة بالاسلام لكن انا كنت عايزة ازور باراك وما رضيتش احرجه لو رحت له وانا مسلمة
!!!!!!!!!!!!!!!!!!!!
هو فيه فرع للمنوفية في كينيا؟
---------------
في عشر ايام خليتين تجسس لصالح اسرائيل اتظبطوا في لبنان، لا سمعناهم بيقولوا على اسرائيل ليبرمان قرد، ولا شفناهم عملوا هيصة وهوليلة، مع ان دي ايه؟ اسرائيل
وايه؟
بتتجسس على المقاومة مش بتساعد المقاومة
وايه؟
مجندة ناس من الجيش اللبناني
ومع ذلك لا شتموا ولا شرشحوا ولا هللوا ولا زغردوا ولا وقفوا لاسرائيل تحت الشباك بالقبقاب.... ولاد الناس حاجة تانية برضه
---------------
كنا ناقصين انفلوانزا الخنازير اللي اوحش من انفلونزا الطيور وبيقولوا لا يمكن السيطرة عليها
ماحدش يقول لي مش بناكل خنزير... احنا ناس نحس، ممكن تنط لنا من البحر المتوسط ونصاب بيها واحنا مش بناكلها
زمان الهندوس شمتانين فينا وبيقولوا ان ربنا بينتقم مننا عشان عمالين ناكل في الحيوانات وسلط علينا الغضب الحيواني: جنون البقر، انفلوانزا الطيور واخرها والاكثر فتكا وهي انفلونزا الخنازير
ربنا يستر على السمك
على رأي سنبل: ماله الفول، ماله الفول

25 comments:

mido said...

اقرى المقال ده ضرورى : شعبية حزب الله فى قناة العربية لابراهيم عيسى

هندسة وصفية said...

تحرجه عشان مسلمة ازاي يعني؟

اه
علي فكرة الهندوس بياكلو كل الحيوانات ما عدا البقر بس

يعني لو دعو علينا هيجيلنا انفلونزا البقر

م/ الحسيني لزومي said...

قالت مصادر أمنية لـ«المصرى اليوم»: إن أجهزة الأمن ألقت القبض فجر أمس الأول، على ٣ فلسطينيين ومصريين فى منطقة العريش، للاشتباه فى تورطهم بالانضمام إلى تنظيم حزب الله فى مصر،.وأكدت المصادر أن أجهزة الأمن عثرت بحوزة اثنين من المشتبه بهم على أسلحة آلية وقصاصات من مقالات نشرت عن حزب الله، وشرائط فيديو يتحدث فيها حسن نصر الله، عن المقاومة .
الحقي يانواره خبي صورة حسن نصر الله وكلامك عن حزب الله لحسن انا خايف بعد يومين نسمع عن خبر القبض عليك وتكوني اول عنصر نسائي في خلية حزب الله

Anonymous said...

إقرئى التقرير التالى
علشان تشوفى قائمة مختصرة للقضايا التى تم إتهام إسرائيلين فيها

http://www.islamonline.net/servlet/Satellite?c=ArticleA_C&cid=1239888248637&pagename=Zone-Arabic-News/NWALayout

عدد قضايا المخدرات فى مصر المتهم فيها إسرائيلين خلال 10 سنوات فقط 4457 قضية

86% من قضايا جرائم التهريب وتزوير العملات فى مصر يرتكبها اسرائليين

طبقاً لصحيفة معاريف 5000 طفل يعيشون فى اسرائيل تم خطفهم من مصر والاردن ليتم تهويدهم

والقائمة طويله وما خفى كان أعظم

كل ده ولسه فى ناس مصدقه إن فيه سلام بينا وبين إسرائيل وإن حزب الله وإيران خطر على مصر

Anonymous said...

حكاية الغيرة علي السيادة من جزب الله و إيران و حماس و تكسير الرجلين للفلسطينيين بينما الأمريكان و الصهاينه مننا و علينا يعملوا اللي همة عايزينه يتفكرني بحكاية ظريفة
كان فيه واحد بيغير علي مراته قوي
لو جار قال لها صباح الخير تبقي مشكلة
عيب إنتي متجوزة راجل
لو أخوها كلمها
يتعارك معاه
أختك في ذمة راجل ما يصحش تكلمها و أنا مش موجود
لو حد قريبها سلم عليها في مناسبه
تبقي قضية
مين دة
عايز إيه
تعرفيه منين
المهم
مديره في الشغل ساكن قريب منه
قال لمراته
روحي له يمكن محتاج حاجة
ده راجل وحداني
قالت له ده عايش لوحده
قالها يعني هاياكلك ده راجل محترم
قالت له الناس تقول إيه
قالها إحنا مالنا بالناس
راحت
و بعد شويه رجعت
متبهدله
هدومها مقطعة
و متعورة
واضح إن البيه المدير إغتصبها
بص الزوج الحمش لمراته و إبتسم
و قلها
ها قالك تروحي له تاني إمتي

مهندس مصري said...

هاتي لينك موضوع عمة أوباما ده
دا ايه الخيبة القوية دي

على فكرة الجزيرة بتقول إن لبنان أكتشفت النهاردة شبكة تجسس إسرائيلية تالتة
:)
و ابقى إقرأي آخر بوست عندي

مصــــري said...

http://masrywaftkher.blogspot.com/2009/04/blog-post_26.html

مروان said...

ازيك يانوارة على فكرة البوست بتاع عمة اوباما جامد جداً وعلى العموم مش حتفرق انها مسلمة ولا غير مسلمة كلة محصل بعضة يعنى اوباما زية زى غيرة وحكاية انفلونزا الخنزير فى احتمال كبير اننا نكون بناكل لحم الخنزير فى بعض محلات الوجبات السريعة مثل ماكدونالد على أنها بيف برجر وربنا يسترها معانا هى بلدنا دلوقتى بقت كلها وباء ما فيهاش حاجة تفرح القلب دى حاجة تطفش

جبهة التهييس الشعبية said...

لا لو سمحت

احنا بناكل لحم حمير

ولسة ما ظهرش انفلونزا الحمير

مواطن مصري said...

اتقفش بهروين... العيلة دي ضايعة باين عليها



العيلة صاحبة كيف



الكيف حق لكل مواطن

جبهة التهييس الشعبية said...

لا بس هو امور الصراحة

والله وباضت لك في القفص يا اوسا

تخيل العيلة الواقعة دي فجأتن ابنهم يبقى رئيس اكبر دولة في العالم

ده ولا الحواديت

مواطن مصري said...

هههههههههههههههههههههههههههه


اوبما عامل زي فلم slum dog

Anonymous said...

بيقولوا مفيش استئناف في الحكم اللي حيصدر ضد الخلية

هندسة وصفية said...

http://www.alraimedia.com/Alrai/Article.aspx?id=126955
ادي لنك للموضوع

Anonymous said...

طمئنينا عنك يانوارتنا، ان شاء الله افضل اليوم؟ عم تنتبهي لحالك ؟ على فكرة مؤذي جداً للدماغ ان يعمل الانسان وهو مريض.
وانصحك بالاكتفاء بمالايدعو للتفكير حتى تقومي بالسلامة

Anonymous said...

بهيج
انتظر زيارة لن تسرك ... لانك ممن يضر بهم العفو
ولا تفهم الا لغة العصا

Anonymous said...

برغم اني لا بحب نوارة ولا اطيق عبس لكن يا بهيج انت انسان حقير
وبجد يا صبرك يا نوارة انا لو منك كنت قدمت بلاغ و يجيبوه بالاي بي
بهيج انت انسان مريض

بجد حاول تتعالج من الهوس الي عندك
والا تنتهي نهاية ايد جين
ED GEIN
عشان تبقي تدور عليه

جبهة التهييس الشعبية said...

يوووووووو

انا اسفة يا شباب

جيت اعمل له ريجيكت عملت بابليش بالخطأ

ح امسحه حالا

فتاه من الصعيد said...

استاذه نواره
ايه فيلم حين ميسره اللى عاملاه العيله دى....مخدرات وهجره غير شرعيه....
اما بالنسبه للشتيمه فى اسرائيل ده مش ادب...انتى نسيتى انها محرمه زى النبالم والقنابل الفسفوريه والعنقوديه....يعنى تستخدم ضد العرب بس
دمتى بخير ....تقبلى مرورى

Anonymous said...

ايه يا حاجة ! هو مفيش اخبار عن اكسلنت ناوناو ؟؟؟
هههههههههه

مواطن مصري said...

شوفي دة الراجل العبيط و تولي الوحدة العربية دة اكبر دليل ان العرب بيكرهو المصرين

http://www.alarabiya.net/views/2009/04/26/71439.html

mido said...

@مواطن مصرى

العرب بيكرهوا المصريين؟
!!

مش قادر استحمل الشوفينية دى كلها

mido said...

@نوارة


الرسالة وصلتك على الميل ؟

Anonymous said...

أول رئيس أمريكي يتصدر غلاف مجلة بصدر عاري.

وستظهر صورة أوباما "الساخنة" على غلاف مجلة "واشنطنتونيان"، في عددها الذي سيطرح في الأسواق الأربعاء، تحت عنوان "26 سبباً يدعوك لحب الإقامة هنا."

http://www.akherkhabar.net/أوباما_بصدر_عاري_على_غلاف_مجلة_أمريكية.html

محمد عادل said...

معلوماتك متأخره وغير كامله
انا واحد صاحبي بعتلي ايميل انهم بيجيبولنا سمك متوحش (مش نباتي يعني) ومسرطن وشكله بالظبط شبه السمك البلطي بس ليه انياب انا الصور كانت عندي على الايميل بس طبعا مش هعرف ارفعها هنا