مش عايزين لا نلمز المطوعين ولا نعيش في الوهم برضه

ما انكرش ان البوست بتاع ساندمنكي ضحكني امبارح وسبت له تعليق بثيت فيه كل غضبي وغيظي، وانا لما بافش غلي باهدا وبعدين ضميري بيأنبني

اه انا ضميري انبني واتوجعت النهاردة من بوست ساندمنكي - ردود افعالي بطيئة شوية - مش عشان هو كتب كلام غلط، بس عشان كلام قاسي

اولا ان مجموعة شباب 1- متضايقين 2- قرفانين 3- بيحبوا البد 4- خايفين زي ما تلاتربع البلد..تلاتربع ايه؟ البلد كلها خايفة، ده قانون طوارئ يابا مش هزار 5- صغيرين وخبرتهم السياسية صفر 6- وده الاهم، مافيش حد معبر قرعتهم ولا سائل فيهم ولا بيحاول يرشدهم ولا يكسب ثقتهم

ومع ذلك بيحاولوا يعملوا حاجة، يبقى كتر خيرهم، حتى لو فيهم ناس شووي وبيحبوا يظهروا في الاعلام، كتر خيره انه عايز يظهر في حاجة زي دي، مش احسن ما يظهر في ستارميكر سمعنا صوتك؟

لما يبقى مافيش وضوح رؤيا ولا فيه تصور كامل ما تبقاش دي غلطتهم، ده يبقى افضالهم ان مافيش اي تصور وطني ولا فيه رؤيا واضحة ومع ذلك مش يائسين ولا بيقولوا ياللا نفسي

فيهم واحدة قالت كلمة حكمة لواحد كان عمال يتنطط عليها بالكتب اللي قراها: ما تقعدش تقول لي نظريات، قول لي انزلي اعملي كذا وانا انزل

ولما مافيش حد بيقولهم ينزلوا يعملوا ايه بيعملوا جهدهم، كتر خيرهم

ده بالنسبة للمز المطوعين، واذا كنت شاركت فيه ولو حتى بيني وبين نفسي ربنا يسامحني وهم كمان يسامحوني

بالنسبة للوهم

مافيش حاجة اسمها كده، اللي بيحصل ده مش حاجة، ولا حاجة يعني، انت مش عايز التلفزيون يصورك وحركات المعارضة اللي اكبر حركة فيهم اعضاءها خمسة والساعي اللي في المكتب ينضموا لك ويدعموك

انت عايز توصل للناس، وعشان توصل للناس لازم تحسس الناس انك مهتم بيهم وباللي بيشغلهم

زي ما حصل في اضراب ستة ابريل السنة اللي فاتت، الاضراب جه تضامنا مع العمال، وفيه ناس بتقول ركب على كتاف العمال ودفعهم التمن، معلش، هم العمال كده كده كانوا عاملين انتفاضة، وانتفاضة العمال ليها دايما صدى لان ليها دايما مطالب محددة واهداف واضحة وواقعية وبتمس البني ادم في حياته اليومية، يبقى من حيث المبدأ ما جراش حاجة لما ناس تضامنت معاهم او ركبت على كتافهم سميها زي ما تسميها

التبعات هي اللي جرا فيها حاجة

العمال اللي اتسحلوا واتقتلوا وعينيهم طارت واترفدوا من شغلهم هم اللي ليهم فضل في نجاح اضراب ستة ابريل، حتى هم اللي ليهم فضل في ان الحكومة تملا الشارع بالامن، وبغبائها، تحذر الناس من النزول مع ان هو الاضراب كان هدفه ان الناس ما تنزلش

بس الحكومة مش غبية قوي، تداركت خطأها وجات في اربعة مايو ضربت الطرشا

السنة دي بقى

زي ما قلت امبارح: اعلنت دار الافتاء عن جائزة الف جنيه لمن يشاهد هلال رمضان، راح واحد وقال لهم شفته راحوا ادوله الف جنيه، بعد ربع ساعة رجع وقال لهم: انا شفت واحد كمان

بما اني بادرس عند رأفت الميهي، فانا مشكلتي اللي بتسقطني في الامتحان الاتي: اني ما باطورش الحدث، باعمل حدث، وبعديه حدث وبعديه حدث، وكل محاضرة يزعق لي على الموضوع ده

والظاهر انها مش مشكلتي لوحدي

الغلطة اللي حصلت النهاردة ان الشباب ما طوروش الحدث

ايوة يوم ستة ابريل ما يعديش كده، بس لازم يتم تطوير الحدث، يعني ممكن يتعمل اليوم ده هو يوم المحلة، نطلع في رحلة ونروح المحلة في زيارة عادية خالص، لا وقفات احتجاجية ولا حاجة عشان ما نجيبش للناس مصايب اكتر من اللي هم فيها

زيارة عادية، انشالله يبقى زي يوم القرصاية كده، ناخد لهم فرقة اسكندريللا، وقفص فاكهة وجوز عتاقي ونروح، ونكلم وسائل الاعلام تيجي تصور بحيث اننا نفكر الناس بتضحيات عمال المحلة ومافيش مانع نصور مع اللي اترفد واللي طلع تلاتينه

اهي حاجة سلمية وهادية وفي نفس الوقت تطوير للحدث

وبيني وبينكوا، يبقى عندنا شوية اصل، ده الناس اتخرب بيتها وناس تانية هي اللي نسب ليها الفضل

وما كانش يبقى اسمه اضراب ولا يوم الغضب ولا الكلام العام ده

ومش كل شوية ح تقولوا للناس انتخ في البيت النهاردة، خصوصا لما تبقى مطالبك ما تهموش في حاجة

ايه قائمة المطالب دي؟ يعني نسيوا يدرجوا مطلب كمان: وبعد ما نموت ندخل الجنة

---

مش وحش، ما جراش حاجة لما نتعلم من اخطائنا، واللي حصل النهاردة مهم، مهم عشان نحط ايدينا على مشاكلنا صح

احنا مشكلتنا تتركز في الاتي: يعيش اهل بلدي وبينهم مافيش تعارف يخلي التحالف يعيش تعيش كل طايفة من التانية خايفة وتنزل ستاير بداير وشيش

وهو ده اللي مسبب ان مافيش رؤيا واضحة، مافيش خطة ما تخرش المية، مافيش مطالب واضحة، الناس متضايقة بس مش عارفة تحدد، وكل واحد مش حاسس بالتاني، وعاملين زي بني اسرائيل في التيه

يا شباب

مش فيه عشوائيات في البلد دي؟

مش فيه اطفال شوارع؟

بلاش ده ولا ده

مش فيه سواقين بيوتهم مخروبة من قانون المرور الجديد؟

يعني مثلا، زي ما كان عنوان الاضراب السنة اللي فاتت: رغيف العيش

السنة دي كان ممكن يبقى عنوانه قانون المرور، اللي فيه ضرايب بالهبل، ونمر جديدة بمية وعشرين جنيه من غير سبب حاطين عليها حروف من ضمنها الاحرف الاتية:

أ ح أ | 250

ع ر ص| 373

و ط أ | 432

إلخ

ده غير المخالفات، لما تعمل مخالفة، ياخدوا منك 3 الاف جنيه، ويحبسوك وعلى رأي واحد صاحبي: ويطلقوك من مراتك ويحطوا عيالك في الاحداث ويغتصبوا خالتك ويخلوا جوز خالتك يتفرج

طيب اهي دي حاجة متصلة بالناس وبحياتهم اليومية، ممكن مثلا الناشطين على النت ان كل واحد منهم يركب تاكسي وللا ميكروباص: ايه رأيك في قانون المرور الجديد يا اسطى

- ده ولود.... خربوا بيتنا

طب ياسطى، دول عاملين يوم كذا اضراب عشان يغيروا القانون، مافيش لا تاكسي ولا ميكروباص ولا توك توك ح يشتغل يوميها

مثلا مثلا

وقد يكون كلامي غلط، مش عارفة

على اي حال، منهم لله اللي في بالي

يا جدعان حد يعبرنا يا جدعان، يا جدعان ما البلد دي فيها نخب سياسية واقتصادية وثقافية، معقولة ماحدش فيهم زعلان على البلد؟

ما تحطوا لنا خطة تنمية ما تخرش المية وطنية

وطنية

وطنية

مافيهاش معونة ولا استثمارات اجنبية، خللي الشباب يفيد بلده، ح يبيضوا عشان يعملوا حاجة للبلد حرام عليكوا