Monday, 6 April 2009

مش عايزين لا نلمز المطوعين ولا نعيش في الوهم برضه

ما انكرش ان البوست بتاع ساندمنكي ضحكني امبارح وسبت له تعليق بثيت فيه كل غضبي وغيظي، وانا لما بافش غلي باهدا وبعدين ضميري بيأنبني
اه انا ضميري انبني واتوجعت النهاردة من بوست ساندمنكي - ردود افعالي بطيئة شوية - مش عشان هو كتب كلام غلط، بس عشان كلام قاسي
اولا ان مجموعة شباب 1- متضايقين 2- قرفانين 3- بيحبوا البد 4- خايفين زي ما تلاتربع البلد..تلاتربع ايه؟ البلد كلها خايفة، ده قانون طوارئ يابا مش هزار 5- صغيرين وخبرتهم السياسية صفر 6- وده الاهم، مافيش حد معبر قرعتهم ولا سائل فيهم ولا بيحاول يرشدهم ولا يكسب ثقتهم
ومع ذلك بيحاولوا يعملوا حاجة، يبقى كتر خيرهم، حتى لو فيهم ناس شووي وبيحبوا يظهروا في الاعلام، كتر خيره انه عايز يظهر في حاجة زي دي، مش احسن ما يظهر في ستارميكر سمعنا صوتك؟
لما يبقى مافيش وضوح رؤيا ولا فيه تصور كامل ما تبقاش دي غلطتهم، ده يبقى افضالهم ان مافيش اي تصور وطني ولا فيه رؤيا واضحة ومع ذلك مش يائسين ولا بيقولوا ياللا نفسي
فيهم واحدة قالت كلمة حكمة لواحد كان عمال يتنطط عليها بالكتب اللي قراها: ما تقعدش تقول لي نظريات، قول لي انزلي اعملي كذا وانا انزل
ولما مافيش حد بيقولهم ينزلوا يعملوا ايه بيعملوا جهدهم، كتر خيرهم
ده بالنسبة للمز المطوعين، واذا كنت شاركت فيه ولو حتى بيني وبين نفسي ربنا يسامحني وهم كمان يسامحوني
بالنسبة للوهم
مافيش حاجة اسمها كده، اللي بيحصل ده مش حاجة، ولا حاجة يعني، انت مش عايز التلفزيون يصورك وحركات المعارضة اللي اكبر حركة فيهم اعضاءها خمسة والساعي اللي في المكتب ينضموا لك ويدعموك
انت عايز توصل للناس، وعشان توصل للناس لازم تحسس الناس انك مهتم بيهم وباللي بيشغلهم
زي ما حصل في اضراب ستة ابريل السنة اللي فاتت، الاضراب جه تضامنا مع العمال، وفيه ناس بتقول ركب على كتاف العمال ودفعهم التمن، معلش، هم العمال كده كده كانوا عاملين انتفاضة، وانتفاضة العمال ليها دايما صدى لان ليها دايما مطالب محددة واهداف واضحة وواقعية وبتمس البني ادم في حياته اليومية، يبقى من حيث المبدأ ما جراش حاجة لما ناس تضامنت معاهم او ركبت على كتافهم سميها زي ما تسميها
التبعات هي اللي جرا فيها حاجة
العمال اللي اتسحلوا واتقتلوا وعينيهم طارت واترفدوا من شغلهم هم اللي ليهم فضل في نجاح اضراب ستة ابريل، حتى هم اللي ليهم فضل في ان الحكومة تملا الشارع بالامن، وبغبائها، تحذر الناس من النزول مع ان هو الاضراب كان هدفه ان الناس ما تنزلش
بس الحكومة مش غبية قوي، تداركت خطأها وجات في اربعة مايو ضربت الطرشا
السنة دي بقى
زي ما قلت امبارح: اعلنت دار الافتاء عن جائزة الف جنيه لمن يشاهد هلال رمضان، راح واحد وقال لهم شفته راحوا ادوله الف جنيه، بعد ربع ساعة رجع وقال لهم: انا شفت واحد كمان
بما اني بادرس عند رأفت الميهي، فانا مشكلتي اللي بتسقطني في الامتحان الاتي: اني ما باطورش الحدث، باعمل حدث، وبعديه حدث وبعديه حدث، وكل محاضرة يزعق لي على الموضوع ده
والظاهر انها مش مشكلتي لوحدي
الغلطة اللي حصلت النهاردة ان الشباب ما طوروش الحدث
ايوة يوم ستة ابريل ما يعديش كده، بس لازم يتم تطوير الحدث، يعني ممكن يتعمل اليوم ده هو يوم المحلة، نطلع في رحلة ونروح المحلة في زيارة عادية خالص، لا وقفات احتجاجية ولا حاجة عشان ما نجيبش للناس مصايب اكتر من اللي هم فيها
زيارة عادية، انشالله يبقى زي يوم القرصاية كده، ناخد لهم فرقة اسكندريللا، وقفص فاكهة وجوز عتاقي ونروح، ونكلم وسائل الاعلام تيجي تصور بحيث اننا نفكر الناس بتضحيات عمال المحلة ومافيش مانع نصور مع اللي اترفد واللي طلع تلاتينه
اهي حاجة سلمية وهادية وفي نفس الوقت تطوير للحدث
وبيني وبينكوا، يبقى عندنا شوية اصل، ده الناس اتخرب بيتها وناس تانية هي اللي نسب ليها الفضل
وما كانش يبقى اسمه اضراب ولا يوم الغضب ولا الكلام العام ده
ومش كل شوية ح تقولوا للناس انتخ في البيت النهاردة، خصوصا لما تبقى مطالبك ما تهموش في حاجة
ايه قائمة المطالب دي؟ يعني نسيوا يدرجوا مطلب كمان: وبعد ما نموت ندخل الجنة
---
مش وحش، ما جراش حاجة لما نتعلم من اخطائنا، واللي حصل النهاردة مهم، مهم عشان نحط ايدينا على مشاكلنا صح
احنا مشكلتنا تتركز في الاتي: يعيش اهل بلدي وبينهم مافيش تعارف يخلي التحالف يعيش تعيش كل طايفة من التانية خايفة وتنزل ستاير بداير وشيش
وهو ده اللي مسبب ان مافيش رؤيا واضحة، مافيش خطة ما تخرش المية، مافيش مطالب واضحة، الناس متضايقة بس مش عارفة تحدد، وكل واحد مش حاسس بالتاني، وعاملين زي بني اسرائيل في التيه
يا شباب
مش فيه عشوائيات في البلد دي؟
مش فيه اطفال شوارع؟
بلاش ده ولا ده
مش فيه سواقين بيوتهم مخروبة من قانون المرور الجديد؟
يعني مثلا، زي ما كان عنوان الاضراب السنة اللي فاتت: رغيف العيش
السنة دي كان ممكن يبقى عنوانه قانون المرور، اللي فيه ضرايب بالهبل، ونمر جديدة بمية وعشرين جنيه من غير سبب حاطين عليها حروف من ضمنها الاحرف الاتية:
أ ح أ | 250
ع ر ص| 373
و ط أ | 432
إلخ
ده غير المخالفات، لما تعمل مخالفة، ياخدوا منك 3 الاف جنيه، ويحبسوك وعلى رأي واحد صاحبي: ويطلقوك من مراتك ويحطوا عيالك في الاحداث ويغتصبوا خالتك ويخلوا جوز خالتك يتفرج
طيب اهي دي حاجة متصلة بالناس وبحياتهم اليومية، ممكن مثلا الناشطين على النت ان كل واحد منهم يركب تاكسي وللا ميكروباص: ايه رأيك في قانون المرور الجديد يا اسطى
- ده ولود.... خربوا بيتنا
طب ياسطى، دول عاملين يوم كذا اضراب عشان يغيروا القانون، مافيش لا تاكسي ولا ميكروباص ولا توك توك ح يشتغل يوميها
مثلا مثلا
وقد يكون كلامي غلط، مش عارفة
على اي حال، منهم لله اللي في بالي
يا جدعان حد يعبرنا يا جدعان، يا جدعان ما البلد دي فيها نخب سياسية واقتصادية وثقافية، معقولة ماحدش فيهم زعلان على البلد؟
ما تحطوا لنا خطة تنمية ما تخرش المية وطنية
وطنية
وطنية
مافيهاش معونة ولا استثمارات اجنبية، خللي الشباب يفيد بلده، ح يبيضوا عشان يعملوا حاجة للبلد حرام عليكوا

40 comments:

esraa said...

تصدقي موضوع قانون المرور ده كان هيعمل شغل جامد
خصوصا ان في ناس كتير بعد العمل بالقانون راحو يجددو رخص العربيات وطبعا مش طايقين القانون ولا اللي حطه

حد بس يقولنا ال60 واحد اللي اتقبض عليهم في عين شمس بجد ولا ايه؟

مواطن مصري said...

ههههههههههههه و النبي انتي شفتي ع ر ص دي فين مصورتيهاش لية
انا شفت ا ح
:)))


الاضراب السنادي هو مجرد للظهور ل الاعلا شو اعلامي مش اكتر


عندك حق متعلموش من خايا الاضراب او مخترعوش حاجة جديدة غير كدة لو اتشال س و جة ص ص هيكون زي س لان فية فساد في الشعب حكومة و معارضة

التغير الحقيقي لما المواطن نفسة يتغير و بعدين المفروض الاضراب ميتعملش كل سنة في نفس اليوم اكنة عيد انا شايف ان تحديد المعاد غلط المفروض كانو يغيرو و يحددو مطالب واضحة

اية هيا مطالب الاضراب السنادي مفيش حاجة محددة

اول امبارح كانت ذكرى مارتن لوثر كينج الله يرحمة

مواطن مصري said...

و بعدين انا شايف ان البلد في الفترة ي مش ناقصة اضراب عشان الازمة المالية المرادي البلد عاوزة شغل و فية شركات بدأت تعين ناس نظام بتمضي على استقالتك او اجازة مفتوحة لو مجتش

البلد دي محتاجة شغل في الازمة المالية

ولا انتي رائيك اية؟

mido said...

@esraa

60
معتقلاً وعشرات المصابين بجامعة عين شمس

mido said...

@مواطن مصرى

حتى لو الناس اشتغلت برده نفس المشاكل حتفضل موجودة

لأن حنفية الفساد مفتوحة

أخدت بالك ؟

الفكرة مش فى الشغل بس

مواطن مصري said...

النهاردة عندي في الكلية ولا حد عارف ان فية اضراب ولا حتى المعيدين و الامتحنات شغالة

جبهة التهييس الشعبية said...

صح يا ميدو

مدام ما عندناش حد يعمل لنا مشروع قومي اهلي يخلينا نحارب الفساد بالمشروع الموازي الاهلي

يبقى

ننزل للناس بقى ونحس بيهم

نمسك الحاجات اللي تهمهم وتأثر عليهم بشكل مباشر

صحيح ان قانون الطوارئ وتصدير الغاز لاسرائيل واتفاقية كامب ديفيد كلهم مأثرين بشكل مباشر على الناس ومجوعينهم

بس الانسان العادي مش ح يعمل اضراب عشان الحاجات دي

يعمل اضراب عشان العيش غالي

عشان ضريبة جديدة اتفرضت عليه

عشان قانون مأثر على اكل عيشه بشكل مباشر

ده في الاول بس

عشان كده اضراب السنة اللي فاتت كان انجح من السنة دي
لانه كان بيخاطب حاجة تهم الناس في حياتها اليومية

Rania said...

كان نفسى يا نوراه تكتبى الكلام دة قبل الاضراب مش بعده
انا تابعتك كتير علشان الاقى كلمه واحدة عنه و ملقتش
و بما انى زيك و زى 80 مليون بنى ادم هنا
بعشق تراب مصر و نفسى تبقى احسن بلد فى الدنيا و اشتركت فى اضراب 6 ابريل اللى فات و كنت عارفه و فهمة انا نازله اعمل ايه اضراب عن العمل و اشتراك فى وقفات و اعتصمات و تغطيه احداث
انما السنه دى فعلا ملقتش اهداف واضحة و ملقتش حماس لاقيت الاخوان منزلين بيان قال يعنى المرة دى مش عايزين يطلع شكلهم وحش زى المرة اللى فاتت
لقيت كذا واحد من المعارضه عايز يعمل منظر و بس
مفيش حد بجد بيتسحل غير الشباب اللى على رايك معندوش اى خبره و عايز يقول لا و بس
مينفعش اضراب من غير تنظيم و قطع لراس الافعى اللى هى كل معارض و كل بنى ادم عايز مصلحته و بيفضلها على مصلحة البلد و على على حساب كمان الشباب

تحياتى

مواطن مصري said...

اتفق معاكي يا نوارة

لية مثلا ممثلا وجية عزيز و نغم و اسكندريلا ميعملوش مثلا حفلة خيرية في الهجانة او منطقة عشوائية القريبين في القاهرة

Founoon said...

طيب مين؟
اقصد مين اللي ممكن يحط خطة او يوجه الطاقات ويلم الناس حواليه على هدف مفيد او على الاقل يرشد

مين بقى ؟

وهل لو وجد هيتساب ؟

جزء من فشل الاضراب النهاردة غير الاسباب المعروفة ان الناس خايفيين

ايوا خايفيين
دا قانون طوارئ مش هزار يعني

انا شايفه ان الحل بدل ما يبقى في حزب او حركة او اي اتجاه سياسي يبقى في اتجاه اجتماعي

البلد دي محتاجة توعية قبل اي حاجة تانية

وعلى الاقل دا السيف سايد

Founoon said...

انا حاسة ان الحكومة فرحانه
عشان كدا الواحد ماكانش عايز اضراب السنة دي
صحيح كتر خير الشباب ربنا يجعل اللي بيعملوه خالص لوجه ربنا وحده ويتقبل منهم

بس بجد بجد

الموضوع دا لوما افادش فهو ضر

وهو للاسف مافادش

جبهة التهييس الشعبية said...

والله يا رانيا انا ح اكون صريحة معاكي بنسبة عشرين مليون في المية

اولا: انا واحدة غلبانة زيي زي اللي عملوا الاضراب

صحيح اول ما سمعت الخبر قلت: ايه ده؟ ايه الهبل ده؟

بس ما كانش عندي تصور واضح
الكلام ده ما جاش في بالي الا دلوقت

لما لقيت ناس كتير بتتريق على بتوع ستة ابريل
وانا بصراحة قلبي وجعني

مش كتر خيرهم انهم بيحبوا بلد لا علمتهم ولا شغلتهم ولا عملت لهم كرامة ولا معبراهم اصلا؟

ثانيا: هم كمان ما شاروش حد
يمكن لو كانوا طلبوا المشورة وعملنا عصف ذهني على النت كنا عرفنا نوصل لحاجة

لكن هم اخدوا القرار وخلاص
ح تتناقشي في ايه؟

ثالثا: انا ما رضيتش اتكلم في موضوع ان الاضراب مش ح ينجح عشان ما اكسرش مقاديف حد
يعني انا قبل الاضراب ما كانش عندي اي تصور وما كانش فيه وقت للي عنده تصور انه يصلح بسرعة

كنت ح اكتب الكلام ده
بس اكسر مقاديفهم وايأسهم في عيشتهم؟

ح ابقى انا والزمن عليهم؟

ولو كتبت قبل الاضراب اهاجمه اشيل ذنب انشالله واحد بس كان بيشاور عقله وانا اثنيته عن المشاركة

فاخدت قرار اني اشارك بنفسي
لكن ما اقدرش ادعو لحاجة انا حاسة انها مش مظبوطة مية في المية

Anonymous said...

انت عماله تقولي حد يعملنا , وهم يعملولنا ....... ومش عارف ايه
هم مين ...... واحنا ولا الناس التانين
والاضراب ..... وقلبي وجعني
والحدث ...... وتطوير الحدث
انا حاسس ان في عيل تايه في المدونه دي
وربنا يستر وما يتوهش في الاضراب

كلاكيت تانى وتانى said...

نوارة عزيزتى يمكن رأاى انا مختلف عنكم فموضوع الاضراب دة السنة اللى فاتت الاضراب نجح جزئيا بس مش المتوقع منة كان المفروض ميحصلش تانى نفس الخطأ والمفترض كان الشباب يفكر فوسيلة جديدة للتعبير عت الغضب
انا مقدرش احدد اية لكن اللى اعرفة ان السنة دى معظم الناس الى سألتهم فالشرقية ميعرفوش شئ عن الاضراب ولا مطالبه غير السنة اللى فاتت وعربيات الامن المركزى واقفة طبيعى بدون مشاكل وبيقولوا طب ماهى واقفة على طول مش قصة اضراب
انا اعتقد ان الشباب دة واحنا معاهم لازم نفكر [اسلوب عقلانى افضل نحاول نعمل شئ صح نعمل روابط حملات مساندة ومساعدة فعلية نفكر فأنجاز حقيقى نقاوم بية بنفس الاسلوب السلمى احنا مش ضرورى دايما نكون مثارين وبنحار بالكلام او الفعل عمرو خالد انتشر بطريقتة وجمعيتة رسالة دخل فيها معظم شباب مصر عاوزين حد تانى كدة حد يجمع الشباب يستفيد من قدراتهم فى الانجاز مش الغضب حد منهم وبيهم حد يفهم ان الشباب عاطل وتعبان جمعية تضم شباب عاوز يعمل شئ لنفسة ولبلدة ونغير البيئة من حوالينا بدون ما يتعرض حد للخطر
الهتافات مش هتجيب نتيجة والذكاء دايما بيكون فى محاولة فهم طبيعة عدوك والتعامل معاة وصعب نفضل نتعامل بطريقة شباب 6 ابريل ونسمح للناس تتأذى اكثر من كدة والاهالى تجرى ورا ولادها فالمعتقلات والشباب جواهم يسوء اكتر وتنتشر الجريمة والحقد والصراع الطبقى
الرسول صلى الله علية وسلم حارب لما قدر وسالم لما قدر برضة والحرب خدعة وان كنا مش عارفين نخدعهم بصوتنا العالى واضراباتنا فخلينا نخدعهم بعملنا لبلدنا بشئ ينفع مش يدمرها ويدمرنا
الحكومة لا يهمها حد يلبس ابيض ولا لبس اسود ولا الهتافات تفرق معاها السجن هيلم بس خيرة من افضل الشباب واهاليهم يتعبوا
المهاتما غاندى قدر يلم كتير من الهنود وجبر بريطانيا على التسلم بمطالبة بالسلم والاعتصام السلمى بصور عاقلة ومنظمة
احنا بنقول سلمى ونهتف ونكسر ونعتدى ومتوقعين ان فية شئ هيتغير
اعتقد ان قدراتنا جميعا مهدة فى الحديث فقط ولا شئ سواة والتغيير مش هيجى بالشكل دة
ومتنسيش الحكمة الخالدة الصوت العالى مبيجيبش حقوق ولا الواطى فالزمن دة
محتاجين فكر وتنظيم وعقل وثقة وخدمة مجتمعية ونضال جاد بشعار انا بخدم بلدى وانتم بتدمروها اعتقد دة افضل من اى شئ
تحاتى وبرغم كل دة انا قعدة فالبيت تضامنا مع الشباب اللى تعب برغ عدم اقتناعى بالفعل نفسة وحوافزى هتطير الشهر دة وهيبقى عندى تحقيق شئون قانونية عن اسباب الغياب
هههههههه
تحياتى

جبهة التهييس الشعبية said...

انونيمس

والنبي ماحد تايه غيرك
ربنا يرجعك بالسلامة


كلاكيت

انا مش عارفة طيب ايه اللي انا قلته مختلف عن رأيك؟

ما هو ده اللي قلته في تطوير الحدث
حاجة نجحت ما نقدش نكرر فيها بنفس البنطلون بنفس الفانلة
لازم نستغل نجاحها ونطورها بشكل مفيد

انا قلت حاجة تانية؟
انا بس مختلفة معاكي في موضوع عمرو خالد زي ما انت عارفة طبعا
اولا لان جمعية رسالة مش بتاعته
ثانيا لان مافيش حد اتسبب في تسطيح الامور وتوهان الناس وتضخيم الاعمال التافهة غيره

جبهة التهييس الشعبية said...

انا حاسة بقى ان اضراب السنة دي عامل زي شغل عمرو خالد

جبهة التهييس الشعبية said...

واعذروني ما قدرتش امسك نفسي
اتنين ما بقدرش امسك نفسي عن شتيمتهم
السادات وعمرو خالد

اللي يجيب لي سيرتهم بقى هو اللي ذنبه على جنبه

Anonymous said...

شباب 6 ابريل اثمون اثمون__هكذا قال بعض من شيوخ الأزهر

مواطن مصري said...

هو فين طفاطيفو مختفي لية؟

Appy said...

عارفه العشوائيات هكتب عن انطباعي عنها يمكن تقدم حل بما انى تعايشت شويه فى الموضوع وجمعت معلومات من اللى ماسكين الحاجات دي واعتقد على الرغم انها هتكون صدمه بالنسبه للناس بس اعتقد ممكن تفيدنا فى التعامل
انا الاضراب انا قولت راي فيه بكل صراحه لان اللى يهمنى مصلحتهم ومصلحتنا اولا واخيرا

Anonymous said...

أولا:أنا موافقة على موضوع الذهاب إلى المحلة نعمل لهم دعم حتى لو نفسي دي خطوة عملية حتى لو من غير اسكندريلا ناخد تبرعات و هدايا للأطفال نشاركهم في أي شئ حتى لو كان ماتش كورة
ثانيا: المرور و قوانينه لما يبقوا حقانيين و فيه نظام منصف يبقى يطبقوا عقوبات لما يبقى فيه يفط و علامات في الشوارع يبقوا يطبقوا القانون طيب احنا نعمل ايه أنا كنت هارفع قضية علشان المخالفات طيب ليه متكونش قضية جماعية و نطالب بحقوقنا المخالفات مثلا لازم تتعرف مكان ووقت حدوثها تاخدها يعني وانت واقف و كمان المعاملة الغير آدمية في المرور و لو سواق راح يبقى نهاره اسود إلا لو قدم رشاوي وقصة تلزيق مخالفات المحاسيب على حساب الناس اللي ملهاش ضهر كل ده وغيره كتير و أفظع لازم نعترض عليه
ثالثا:العشوائيات و أطفال الشوارع مرتبطين ببعض ليه منعملش مشروع قومي نستخدمهم فيه و نخدمهم و الله دول ييجي منهم أحسن من أي حد و نحط الخطة اللي متخرش الميه نستخدم الفقراء لأن دول اللي هيتعمل بيهم نهضة

Anonymous said...

ما حدش شاف راجل كفيف ماشي من هنا ومعاه بنت اسمها جهاد
والراجل اسمه سلامه

انت فين يا سلااااااااااااااااااامه

Ahmad said...

مفيش حاجة اسمها بلد تضرب
و عن طريق الفيسبوك كمان
بس زي مقلتي منقدرشي نقطم حد لان اولا و اخيرا هما كانو عايزين حاجة كويسة
بصي يا نوارة انا متفق معاكي تماما في كل حرف
بس بلاش لغة عدائية ضدهم
ايه رايك نخلينا في الخط الي بتتكلمي فيه
الي هو المفروض نعمل كذا

Ahmad said...

اصلا انا لما قريت الاهداف علي الفيسبوك لقيته برنامج انتخابي مش اضراب

مواطن مصري said...

خدي الخبرين دولللل


أكد الدكتور عبد الله النجار عضو مجمع البحوث الإسلامية، أن الإضراب حرام شرعا، وأن القائمين عليه من شباب 6 أبريل "مخربون وآثمون" ووصف الإضراب بأنه أشبه بحادثة الاغتصاب التى يرتكبها الأفراد بحق الدولة.

وأضاف النجار لليوم السابع، أنه لا يجوز إحداث الفوضى والتخريب بحجة محاولة الحصول على الحق، لأن الحقوق فى الإسلام لا تنتزع بالقوة، وإنما تؤخذ بالتقاضى أو بالتراضى، موجها النصيحة لشباب 6 أبريل باللجوء إلى الرئيس للمطالبة بحقوقهم عبر طرق شرعية.

http://www.youm7.com/News.asp?NewsID=86353

الكنائس الثلاث ترفض الإضراب وتصفه بالتخريبى

لأول مرة تجمع الكنائس الثلاث على رأى واحد، وهو "رفض إضراب 6 أبريل"، بل اعتبروا هذا الإضراب لا قيمة ولا هدف له، وطالبوا جميع المسيحيين عدم المشاركة فى هذا الإضراب، الذى يضر بكيان مصر، بل ناشدوا الشباب المسيحى الجامعيين بألا يذهبوا إلى جامعاتهم حتى لا تحدث أى مشاكل تضرهم.

قال القمص صليب متى ساويرس كاهن كنيسة مارجرجس وعضو المجلس الملى فى تصريح خاص لليوم السابع إن الإضراب مرفوض مرفوض، وأضاف أن ما يفعله هؤلاء ليس له أى قيمة، وأشار إلى أن هذه المظاهرات تهدد أمن الوطن والمواطنين وتؤدى إلى التدمير والتخريب، وهؤلاء لابد أن نطلق عليهم "المخربون فى الأرض"، لأنهم يخربون مصر ككل بأفعال لا قيمة لها، وأوضح أننا نطالب أبناءنا المسيحيين بعدم فعل هذه الأمور التى تضر البلد، فنحن نحب مصر.

قال القس رفعت فكرى راعى الكنيسة الإنجيلية بأرض شريف وعضو سندوس النيل، إن هؤلاء الذين ينظمون هذا الإضراب هدفهم الفرقعة والشارع المصرى يعلم ذلك، وستكون فرقعة "فاضية"، وأشار إلى أن هؤلاء اختاروا وقتاً غير مناسب.
http://www.youm7.com/News.asp?NewsID=86368

عشان بس تصدقي لما نقول لازم نفصل الدين عن السياسة

مواطن مصري said...

مصطفى بكري كمان طلع افاق ابن ستين تيت شوفي قايل اية

رفض مصطفى بكرى الانسحاب، وقال لليوم السابع لماذا أنسحب هل تشاور أحد معى فى قرار الانسحاب؟ وهل مطلوب منى أن أمشى وراء شوية عيال؟،
http://www.youm7.com/News.asp?NewsID=86364

م/ الحسيني لزومي said...

اولا: انا شايف ان الشباب اللي دعو للاضراب حتي لو كان بعضهم عايز يظهر هم ابطال فوق العادة يكفيهم شرفا انهم يحركون الماء الراكد الأسن.
ثانيا:- اتفق معك في انه يجب علي كل المهمومين بقضايا هذا الوطن الوصول الي الشارع الحديث معهم تبصيرهم بعواقب الصمت اللي مازال يجر في المصائب والويلات عليهم ...الأف وكام اللي ماتو فطيس في عبارة ممدوح اسماعيل لو ماتوت نصفهم في اضراب زي ده كانوا سقطوا النظام ..والعشرات اللي بيغرقوا في البحر المتوسط بعد ما هجوا من ضيق الرزق والبطالة...ليه نضحي فطيس ليه نضحي من اجل الفساد والمفسدين ليه ما نضحيش عشان حياة كريمه.
ثالثا:- النخبه هم سبب كل بلاء راي فيهم زي ما قال الشاعر الكبيرل نجم عاطيين وشهم للسلطة وظهرهم للشعب والنخبوية بالنسبه لهم سبوبه

مصر 30 said...

لأسف عدم نجاح الإضراب كان متوقع لعدة اسباب ...
1- ماينفعش يبقى العنصر الأساسى فى الفكرة هو الميعاد !! كأنه مهرجان ( ولا ثقافة المهرجانات سيطرت حتى على العمل السياسى ؟ )
2- مافيش دعاية كافية .. طبعا مش المقصود إعلانات و لكن المقصود التحضير قبلها بوقت طويل و عملية الشحن العاطفى للناس و ده مهم جدا و خصوصا عندنا فى مصر
3- زى ما قلتى الأهداف مش واضحة .. إستغربت لما لقيت فى الجزيرة التعليق على الإضراب على أساس إنه بسبب تدنى الجور و بيطالب برفعها !!! يمكن ده كان عنصر أساسى من إضراب السنة اللى فاتت بس لا اعتقد إنه من الأسباب الأساسية السنة دى !!
4- إسلوب الإضراب مش محدد و ده عمل تشتيت كبير و كمان الناس مش ناقصة مواجهة مع أكبر قوة أمنية فى التاريخ تم تحضيرها لمواجهة شعب ( بما فيها الجيش الإسرائيلى بغض النظر عن نوع التسليح )

5- السنة اللى فاتت فعلا الإضراب كان كل الناس أصحابه .. صحيح فيه ناس إبتدت الدعوة لكن مكانوش معروفين بالضرورة فكل اللى إشتركوا فى الإضراب بكل أشكاله كانوا حاسين إنهم أصحاب العمل ده ... و أعتقد إن ده إحساس مفتقد عند الناس محدش حاسس إن فيه حاجة بتحصل فى البلد دى هو مسئول عنها
6- أكيد الحكومة كانت ذكية و عرفت تتجاهل الإضراب إزاى و بالطريقة دى أجهضته
7- موقف الإعلام غريب جدا .. السنة اللى فاتت كان فيه تجاهل غريب للإضراب من أغلب وسائل الإعلام المهمة ( الجزيرة , bbc , القنوات الفضائية على إختلافها )
و السنة دى نفس الحكاية يا دوب نبذات صغيرة قوى و فى المقابل بعض جرائد المعارضة ضخمت من حجم الإضراب السنة اللى فاتت و السنة دى كمان !!!!


فى النهاية مجرد إن فيه يوم بيحمل قدر من التهديد دى حاجة إيجابية و بتمثل كارت يمكن الإستفادة منه بشكل اكبر فى الأعوام المقبلة و يمكن ثقافة المهرجانات و إن يبقى فيه يوم سنوى للإضراب تساعد فى ترسيخ ثقافة الإحتجاج على مر السنين و تبقى اشبه بتمرينات للإحتجاج و التغيير

مصر 30 said...

http://www.elbadeel.net/index.php?option=com_content&task=view&id=51356&Itemid=74
كشف حساب مبارك من البديل

حـنــّا السكران said...

ما أستغربه فعلاً . أنّ غالبية الشعب المصري ( كما يظهر لنا نحن خارج مصر ) هم معارضون للنظام , و مع ذلك ليس هناك أي تأثير حقيقي للمعارضة على الأرض ,أي ليس هناك برامج يتم تطبيقها بفاعلية في الواقع للوصول خطوة بخطوة لهدف منشود و معروف , المعارضة أو ( المعارضات ) المصرية يبدو أنها لا تشبه أي معارضة معروفة لدينا في العصر الحديث , مع أنها متقدمّة لو بالشكل أو علوّ الصوت على معارضات أخرى في البلاد العربية كتونس و سوريا مثلاً , لكن هذا كله لا يفيد من دون برامج يتم العمل على تطبيقها لا قرائتها فقط على الشاشات أو في تجمّع ينفرط بعد دقائق,( تطبيقها مهما كانت الظروف ), لأن المعارضة لا تنتظر الظروف الجيدة التي تناسبها مائة بالمئة, الأنظمة لا تترك مجالاً لظروف جيدة , يجب على المعارضة أن تخلق الظرف من لا شيء حين يكون لديها هدف حقيقي تعمل لأجله .
المحزن في الأمر , و المفرح في اّن معاً ,هو هؤلاء الشباب الذين يـُحرّكون أنفسهم بأنفسهم بعد أن سئموا أحزاب و شخصيات المعارضة الفاشلة و الفاشلين , لكن للأسف هذا لا يوصل إلى نتجية , يعني الطلبة و الشباب و العمال , لا يستطيعون تغيير نظام حكم دون وجود قيادة و تنظيم ,و ممكن أن يقوم النظام باستغلال هذه التحركات لصالحه ( فهي لن تتعدى المظاهرات القليلة ) بأن يقول للعالم : تفضلوا شوفوا , نحن لدينا حرية و حراك سياسي , لأنه يعلم أن هذه التحركات و هذا الغضب , مرسوم لاّخر النهار فقط , و كلّ واحد يرجع على بيته , أو تحديد يوم في السنة من أجل إضراب لا يجرؤ الكثيرون على القيام به لأنهم لا يثقون بقدرة المعارضة و بذلك يخافون من سطوة رجال أمن السلطة . فلاشيء واضح أمام هذا المواطن الغاضب الفقير سوى غضبه فقط . المواطن يرى أن لا سند له .ليس هناك قوة معارضة تحميه , و هؤلاء الشباب شجعان جدا لأنهم يقومون بما يقومون به و هم مدركون أن لا سند لهم .
الواضح أن مصر هي البلد العربي الوحيد ( إلى جانب لبنان ) الذي لا زال فيه أمل في جامعاته و طلاّبه , لكن في لبنان مثلاً هناك قوى معارضة فاعلة و قوية على الأرض و لديها قدرتها على التحرك ( قدرة مادية و خطاب سياسي واضح و مفهوم و خطط منهجية للوصول لمكان ما مرسوم بدقة ) و تستطيع تلك القوى أن تقول للشباب : اذهبوا و عسكروا في خيام على باب السرايا الحكومي و نغـّصوا على رئيس الحكومة حياته , ( السنيورة وصل إلى مرحلة لم يعد يستطيع فتح شبابيك مكتبه ,و لولا الضغط الأمريكي عليه للبقاء كان قد جهّز استقالته أكثر من مرة ) و تقول لهم بأن لا يخافوا . لأنها ( تلك القوى ) تكفل لهم أكلهم و شربهم و لبسهم و معيشتهم . أي يشعروا و يعلموا أنهم ليسوا وحدهم بل هم جزء من مجموع كبير متفاهم و متوافق . هذه الأمور غير موجودة في مصر . هناك معارضون كثر في مصر , لكن ليس هناك معارضة .
هناك ورق كثير و كلام كثير و ليس هناك فعل , هذا من جهة , و هناك فعل حقيقي لشباب و شابات غاضبون و غاضبات و مستعدون للقيام بأي شيء بكل شجاعة في سبيل التغيير , لكن ليس لديهم ( ورق ) و لا برامج و لا تنظيم و لا قيادة .. و هذا كله ( في شقـّيه ) لن يوصل إلى مكان .
سيبقى عوكل خالداً أبد الدهر , و على المتضرر , اللجوء إلى الله سبحانه و تعالى , لأن أحزاب المعارضة المصرية تعتمد أسلوب ( الشكوى لغير الله مذلـّة ) و هي مذلة فعلاً . لكن الله لا يغير بقوم حتى يغيروا ما بأنفسهم . و اّخرون يتبعون قول السيد المسيح : ( لا تـُلقي بلاّلئك تحت أقدام الخنازير ) . و كلّ معارض هنا , لا يريد إلقاء لاّلئه قرب لاّلئ معارض اّخر . لتعمل كنزاً كبيرا مجتمعا..
ـ كنت أريد أن أقول أنه يحسب للمعارضة المصرية أنها ليست مرتبطة لا ماديّاً و لا برامجيّاً بأي طرف خارجي , لكن في الحقيقة , يجب القول أن الحديث عن أي معارضة مصرية حقيقية على الأرض , يجب أن يكون عن أولئك الطلبة و العمال و الشباب , لا عن أحزاب و تنظيمات فهؤلاء يبدو أن وجودهم و عدم وجودهم سواء , أما أولئك الشباب , فهم مرتبطون بأرضهم و وطنهم و أمانيهم و اّمالهم النبيلة فقط , لكن للأسف , هم وحيدون حتى بين بعضهم البعض .و العالم من حولهم لم يعد يقبل و لا يسمح و لا يحتمل الغايات النبيلة الصرفة .

مواطن مصري said...

اهو الاضراب فشل مفيش اي خبر عن عمال المحلة

و مفيش فايدة

و الاخوان مشفناش منهم واح في الشارع لية


و فين الاحزاب ولا لما تظهر كميرة يطلعو و خلاص

دي مسرحية انا زهقت من كل الاحزاب المعارضة و الحكومة

انا هشجع الزمالك و بس

كلاكيت تانى وتانى said...

فعلا يانوارة وانا مقلتش اكتر من انى موافقة على رأيك بس مختلفة مع انك مش عاوزة فعلا تقوليلهم او تجرحيهم او تلمزيهم لانهم برغم الرغبة الثورية بداخلهم ونية فعل الخير لبلادهم الا انهم محاولوش ياخدوا اراء حد ولا يستفيدوا من اللى فاتهم وبددوا فرصة جيدة لتجميع الناس حواليهم وادوا الحكومة فرصة للشماتة فينا وفأفكارنا لازم من المواجهة معاهم لأنهم بيعملوا رد فعل سئ فى حالة فشلهم وبيأخروا جداااا اى تقدم او محاولات للنجاح التالى من اى جهة
اقرى دة اعتقد ان احمد الصباغ اصاب كبد الحقيقة فمقالة
اما عمرو خالد فالله فقط اعلم بنواياة الان وسابقا
http://ahmedelsabbagh.blogspot.com/
تحياتى

حلمبوحة أخت فتكات رمش العين said...

مالك يا معلمة نوارة؟

فيه ايه؟

جرى إيه؟

أنا لسة قاعدة من النوم ويادوب بافتح عنيه لقيتكم تتكلموا عن ستة ابريل

بصيت للتقويم اللي على الكوميدينو لقيت التاريخ بقى سبعة ابريل

يــــــــاه شايفة يا أوختشي الايام بتركض إزاي؟

يعني بعد بكرة حيبقى تمانية ابريل, السنوية بتاعة طنط عنيات

دنيا


لما اروح ادور بالدولاب على بلوزة وجيبة يكون لونهم إسود عشان السنوية

جبهة التهييس الشعبية said...

هي حلمبوحة دي من المنوفية؟

Anonymous said...

متغلطيش فى المنوفية ومتنسيش انها خرجت احسن نااااااس

ابراهيم عيسى
مثلا

AhmeD 3llaM said...

مفيش حاجه في البلد تخلي الشعب
كله يعمل اضراب
الا في حاله واحده
انهم يمنعو السجاير
هههههه
*

ايه ده المنوفيه مجبتش الا ابراهيم عيسي
هوه مين ابراهيم عيسي دا اصلا
خخخخ

فهلاو said...

مع إنى ما باطيقش تعليقات أهله يا نواره، وتعاليه العيالى ومغازلته للخواجات، وشغل التلت ورقات اللى ساعات بيعمله فى تدويناته، بس المرة دى جاب جون حقيقى، الحق جرى على لسانه، صحيح إضراب إيه ولاد الجزمة اللى على رأى جيمى بيقوده شوية عيال أكبر حاجه عملوها إنهم اترمو فى بوكس ساعتين، أنا مش ضد الإضراب كفعل احتجاجى، محتاجينه والله، بس مش بالطريقة المسخرة دى، وبالجهل ده، ده إضراب لصالح الحكومة، والنعمة أنا لو مكان العادلى لأديهم مكافأة،

السنة اللى فاتت كان الأمر مختلف، فاكره، كنتى مختلفه مع فكرة الإضراب، ومعظمنا ما كانش فاهم ليه بلوجرية القاهرة راكبين قطر المحلة، وعمالين يتكلمو كأنهم هما قادة الثورة، بس أيدناه، قلنا لعل وعسى، فنيخ نسبيا، قلنا وماله محاولة أولى، مش عيب، لكن لما دعوا لاضراب خولاتى يوم اربعة مايو بمناسبة عيد ميلاد خامد الذكر ريسنا، شتمناهم وقلنا إيه الخره ده بلا معيلة بلا مظاهرات الكيبورد اللى بيبثوها من سيلانترو وكوستا وستار بكس فى حين دم ناس ماتو هدر ما بردش ومعتقلين ماطلعوش، فاكره، (راجعى بوستاتك السنة اللى فاتت)

السنة دى ظاطت بقى، وفيه عيال قابلتهم ع الزهرة منهم الزعيم قاعدين مستحميين وضاربين جيل ولابسين لبس جديد ومستنيين معد برامج يجى ياخدهم عشان يناضلو قدام الكاميرا، النضال الجميل من النوع ده على رأى واحد عبثى صاحبى فعلا إحنا محتاجينه، عشان ينكتب فى أنصع صفحات دولة الخولات اللى هاننشئها على أنقاض دولة المعرصين الحاكمة

فهلاو said...

سؤال سألهولى واحد بتاع تاكسى زمان وأنا باهوبص عليه فى كلام فى السياسة ونقد الحكم، قاللى حيثية حضرتك إيه، قلتله مش فاهم سؤالك ياعم، قاللك تتكلم فى حق الحكومة ليه، قلتله الله ماهى الحكومة اللى بتحكمنى ومطلعه دينى، قاللى مفهوم، بس عشان تتكلم وتقعد تنتع فيها نقد وشتيمه لازم يكونلك حيثية، طبعا قلبت وشى وقلت ده راجل جاهل، لما روحت سألت أبويا، وهو أحد حكماء الحزب الوطنى الشعبيين، قتله أنا لما أنتقد الحكومة وأقول عن حق إنها حكومة حرامية الناس بتزعل ليه، قللى عشان إنت ما عملتش اكتشاف يا حلو لوا حاجه، إنت بس بتقلب المواجع اللى انت لساك مدركها وهمه يا عينى مسلوخين بنارها، حيثيتك إنك تنوجع، ساعتها قلت الراجل ده حزب وطنى، قابلت صديق من الناس اللى اندهسو فى كفاية، سألته نفس السؤال، قاللى الحيثية دى هى المعادل الموضوعى لكلمة القيادة الطبيعية، لازم تكون من أهل الوجع عشان الناس تقولك سلامتك، وتؤازرك وتقف وراك، لازم تثبت إنك عانيت، لازم يكون نضالك متتالى، اللى حصل مع إخوانا الشباب هو نضال أقرب للنضال الطلابى، حلو جوه الجامعة، تصورى كل اللى عملوه مناسب للجامعة، حلو للطلبة، معبر عنهم، كلن إخراجه للعموم كان عاوز حيثية تانيه وهما ماعندهمش الحيثية دى، فاقدين ليها، مش عارفين هما بيتكلمو عن إيه ومش حاسينه عشان كده تعالو على معاناة الآخرين ونضالهم نسيو انهم ركبو العمال فى المحلة اللى انقتل مواصيب وانحبس لحد النهاردة منهم ناس كتير، اتنسو، ومشيوا ورا الاعلام اللى بيبيع الكومكس النضالى الجديد ده. أنا ماليش حيثية زيهم، أنا هارجع تانى استنى البطل يا نواره، هو الوحيد اللى هايقدر يطور الحدث

جبهة التهييس الشعبية said...

يا جدعان حرام عليكوا يا جدعان

يا جدعان بالراحة شوية

بالراحة شوية

انتوا مفتريين قوي

Anonymous said...

إقرئى مقال فهمى الهويدى

http://www.aljazeera.net/NR/exeres/064D699C-2718-4778-83AB-58AB6897573E.htm