الى كل اللي بيكرهوني... ربنا بعت احمد عبد الفتاح ينتقم

مصحيني النهاردة الصبح عشان اشوف ده:

قومي قومي... انت لسة نايمة، شوفي الجمهورية...آه، وعلى فكرة انا نشرت البوم الصور كله على المدونة

ضربة مزدوجة

على فكرة، ما ينفعش كده، ما ينفعش كده خالص

اولا: ما ينفعش ناس تقول حاجة نرد على حاجة تانية:

ما ينفعش الراجل يقول كان فيه من ضمن الناس اللي بتعدي الحدود عشان تقدم مساعدات واحد من حزب الله وبصراحة هو عتال

نقوم نرد عليه ونقول اعترف بوجود خلية ارهابية بتأجر شقق وفيلات وعمارات سكنية

عمارات سكنية؟ عماااااااارررررررررراااااااااااات سكنية؟ ما كانتش في عريضة الاتهام الاولانية دي، تم اضافتها امتى؟

ثم اجروا عمارات سكنية وللا حتى اشتروا مصانع، ما انتوا بتبيعوا اراضي وبتخصخصوا مصانع بتبيعوها لاسرائيليين ولغير اسرائيليين

ثم هم نفوا انهم بيأجروا اي نيلة عندنا، هم قالوا احنا كنا بنعدي واحد من عندنا على الحدود لغزة، اه قالوا كده، قالوا كده، رد بقى على اللي قالوه، بترد على حاجة ماقالوهاش وتقول اعترفوا ليه؟

ثانيا: ما ينفعش واحد يتريق على غباءنا نقوم نأكد له اننا اغبيا بجد

ويبقى غباء بصباع رجلنا الصغير، كده الوضع محرج فعلا، انا باتكلم بجد

يعني اللي عايز فعلا يتخانق معاه، يتخانق بدعوى: انت ليه بتعدي ناس من حدودنا؟

ساعتها بقى هو يرد ويقول اي حاجة، مثلا: يعني انتوا سبتوا دول كل اللي بيعدوا من الحدود ومسكتوا في ده؟

يعني انتوا بتدخلوا اسرائيليين من غير فيزا ولا حتى ختم وماسكين في اللي خارج من عندكوا مش في اللي داخل؟

طب احنا بنقول احنا بنودي لغزة ايه؟ انتوا عارفين الاسرائيليين اللي داخلين داخلين بايه؟

طب ما انا مضطر عشان مافيش الا الحدود دي؟ ح ابعت لهم اعانات ازاي؟

طب شوفوا ايه اللي يرضيكوا وانا اعمله... طب اولعوا بجاز وسخ واتفلقوا.... طب سيادة ايه اللي بتتكلموا عليها؟ هم كانوا يهود الفلاشا دول عدوا منين؟ طب الهجرة غير الشرعية الافريقية لاسرائيل بتعدي منين؟ ما تتنيلوا على الكاميرات الامريكاني اللي متكلفة خمسة وتلاتين مليون دولار بتصور اللي داخل واللي خارج... طب ما تتنيلوا على حدودكوا ومجالكوا الجوي اللي فضلوا يخترقوا لمدة تلات اسابيع... طب خلاص هاتوا الواد واحنا ح نخلي اسرائيليين عندهم انسانية اكتر منكوا يعدوا لنا الحاجة...طب هو مش انتوا قلتوا الحدود دي مشتركة اللي بيدخل باخطر اسرائيل واللي بيخرج باخطر اسرائيل؟ طب انتوا مالكوا بقى ماهي حدود دولية احنا مش بنعدي من حدودكوا

يقوموا مثلا يردوا عليه ويقولوا له: لا ما انت لما تعدي من حدودنا ممكن اسرائيل تضربنا واحنا خايفين

يقوم هو يرد ويقول: ماهي ضربت الحدود كده كده يعني... وانتوا خايفين على طول هي دي حاجة جديدة؟

يقوموا يردوا عليه ويقولوا له: لا ما احنا بقى عايزين نمنع اي حد يعدي عشان اسرائيل ما تضربش حدودنا تاني

يقوم يرد ويقول: والله؟ يعني انتوا كنتوا زعلانين قوي ان حدودكوا بتنضرب؟ انا ما شفتش يعني ان الموضوع فرق معاكوا ولا حاجة

كده يعني

اهم حاجة بس ان خط الحوار يبقى رايح جاي في سكة واحدة، ما يبقاش الحوار: سالخير يامّا

- طابخين بامية بامية يا حبيبي.. اقوم اغرف لك

باقول لك يا ما سالخير-

- وايه اللي خلاك تتغدى برة؟ ما انا طابخة

يوووووو تصبحي على خير ياما-

- على رأيك البامية لما بتبات بتبقى اطعم

كفاية اننا ايام حرب غزة كنا زي الولية القصيرة اللي كانت دايما تطلع في الافلام القديمة طرشا: انت ايه اللي رجعك؟

الجزمة بتوجعك؟-

- افتحوا المعبر

طب ليه ايران ما تحاربش؟

- بنقول لكوا افتحوا المعبررررر

ايوة يعني ما الجولان محتلة ليه سوريا ما تحاربش

- حد اتنيل جاب سيرة الحرب؟ بنقول افتحوا المعبر

وحزب الله كمان سايبهم وعامل عبيط

- يييييييييييييييييييييييي شوفوا الاكل فيه ايه يا جدعان دول بياكلوا لحمة حمير بجد

ماشي احنا بنعمل كده مع بعض... بلاش فضايح بقى، ما ينفعش الناس تفضل تضرب كف على كف وتضحك علينا...

لا وماهر الجندي طالع في صوت الامة يقول كان فيه تنظيم سنة خمسة وسبعين اسمه حزب الله واتقبض على صاحبه - اللي هو كان المؤسس والعضو الوحيد وجنسيته مصري واسمه السيد عبده- سنة تمانين

طب سنة خمسة وسبعين كل بتوع حزب الله اللي موجودين دلوقت كانوا بالشورت وفيه منهم كان في اللفة وفيه كان امه وابوه لسة ما شافوش بعض

على فكرة بقى

انا حقيقي مش مهتمة بخناقة النظام مع حزب الله

بجد بقى بالامانة

انا متضايقة من حالة الضحك الهيستيري اللي النظام المصري - وعلى فكرة بقى والجمهور المصري كمان - بقى يثيرها كل ما يتكلم

ابتديت اتضايق بجد

انا عارفة انهم بيعملوا كده عشان اسباب كتير، منها انه مثلا بيساعد حماس وحماس دي اخوان والاخوان دول يع يع يع يع، بديول وقرون وطراطير وعندهم عين واحدة في قفاهم

بس هم على فكرة مش بيساعدوا الاخوان بتوع مصر

ومش بيساعدوا حماس عشان اخوان بيساعدوها عشان هم محتاجين يزنقوا اسرائيل في النص، هم ح يعوزوا ايه من النظام المصري؟

بالعقل كده، اتخانقوا بس قولوا كلام يعقل، يعني مثلا اقعدوا مع جنبلاط والحريري وجعجع (يا زين ما خلفتي يا زينب) واسألوهم الناس تقول ايه، يكتبوا لكوا في ورقة كده النقط

لا بلاش النقط احسن ما تفهموهاش

السيدة في ضهرك يا حاج جعجع، تكتب لهم بالظبط يقولوا ايه، وتقرا لهم الكلام تلات مرات بصوت عالي، وتخليهم يقروا قدامك مرتين، واياك ثم اياك حد فيهم يرتجل احب على يدك... اخوكوا مزنوق والناس لبعضيها، اقول لك على خطة احسن

اتكلم انت... اه، حل كويس اهو يا جدعان، النظام المصري يقول: احنا مترفعين عن الرد على حزب الله

وانت بقى تتكلم وتقول: مصر صحيح ترفعت عن الرد بس انا احب اقول... واتكلم انت الله يخليك

وبعد كده احنا ح نخيط لهم بقهم بابرة تنجيد

وكمان شراشيح؟ يعني اغبيا وشراشيح؟