احلى نكتة سمعتها بخصوص انفلونزا الخنازير

تحديث: لقيت تقرير تاني اهو بيقول ان انفلوانزا الخنازير اتعملت في معمل

في العاشرة مساء اتنين ضيوف مش عارفة اساميهم واحد قال: عندنا ميتين الف خنزير في مصر وانا باقترح اننا نعدمهم فورا لاننا ما عندناش الاستعدادات اللي تخلينا نعرف نسيطر على العدوى

الضيف التاني: لا ده ممكن يعمل مشاكل طائفية

تم ترارارام تم تم

--------------

قريت تقرير اتشال بعد ما قريته بساعتين بيقول ان فيه احتمال يبقى سلاح بيولوجي او ان شركة دوا امريكية هي اللي صنعته عشان تعمل له مصل وتبيع وتكسب

سلاح بيولوجي في المكسيك؟ هم المكسيك كانوا عملوا لهم ايه؟ ما اعتقدش انه سلاح بيولوجي

سواء بقى اتصنع في شركة دوا، وللا سلاح بيولوجي، وللا ربنا نزله علينا

ادي اخرة الظلم والطمع

ربنا يستر، واسرائيل لقوا فيها حالة وبيقولوا في احتمال يكون عدا الناس اللي معاه في الطيارة والناس اللي كانوا في المستشفى

يااااااااااااااااا دي النيلة

ح يقعدوا يعطسوا لنا بقى وينشروا مصايبهم احنا كنا ناقصين

بعد كده ح يضربوا غزة كده: هااااااتشششششش هااااااااااااااااتششششششششش

----------

على فكرة، اعدام الخنازير مش ح يعمل فتنة طائفية ولا حاجة، انا ما اعرفش حد بياكل خنزير الا واحد مسيحي واتنين مسلمين عشان عاملين خواجات، معظم المسيحيين اللي اعرفهم بيقرفوا منه

واللي بياكلوه اكيد مش عايزين يموتوا، ده اكل عادي، زي الفراخ يعني، هو فيه اكل له دين؟ هو الخنزير مسيحي والفراخ مسلمة؟ طب لما اتخرب بيوت الفرارجية في انفلوانزا الطيور ما اشتكوش ليه من الاسلاموفوبيا؟

فتنة طائفية؟ لما ح يعدموا الخنازير قوم المسيحيين ح يسموا للمسلمين البهايم مثلا؟ والله ماحد بيعمل فتنة طائفية غير الامخاخ دي اللي متصورين ان المسيحيين دول كائنات فضائية قاعدين ما بيعملوش حاجة في حياتهم غير يفطروا ويتغدوا ويتعشوا خنزير حتى لو ح يموتهم تضحية في سبيل الله ويسكروا ويطوحوا ويضحكوا زي زوزو نبيل لما تمثل انها اتجننت: ممههووواااهاهاهاهاهاااااااااع هاهاهاهاهااااااااااااااع