بخصوص السيادة والشعب الشديد

شديد شديد يعني.... اي حد ح يقرب من حدوده، فيما عدا القوات الاوروبية، والقوات الامريكية، والطيران الاسرائيلي، والقنابل الاسرائيلي، والكاميرات الامريكية الاسرائيلية، والسياح الاسرائيليين اللي بيعدوا من غير فيزا ولا ختم ولا بطاقة ولا تفتيش

اي حد غير دول ح يقرب من الحدود
(وخصوصا الجعانين واللي بيساعدوا الجعانين)

ح نقطططططععععععععععععععه

لا ده احنا جامدين قوي وقال على رأي عيل قريبي عنده عشر سنين: ما تشتمش لو سمحت، انا ماحدش يشتمني ولا يضربني ولا يهزأني غير مامتي بس
اللنك اللي فات ده بتاع الاتفاقية اللي بين اسرائيل وامريكا واللي ابو الغيط قال احنا مش ملتزمين بيها
طبعا احنا مش ملتزمين
احنا رجلنا فوق رقبتنا
--
انا مش مبسوطة من كام حاجة: 
1- ضعف الخط الدرامي والاعتماد على المصادفة زي الافلام الهندي
2- تشتيت المشاهد بادخال خطوط ثانوية لما يحتاسوا ويلاقوا الاحداث في الخط الاساسي مش منطقية
3- غموض غير محبب ينم عن غباوة، يعني ايه مات بطريق الخطأ من سلاح واحد زميله؟ هو اكيد واحد زميله او فوق زميله بشوية
4- الكومبارسات كتير قوي ومش بيضيفوا للفيلم حاجة وكلهم بيكرروا نفس الكلام
5- فيه لخبطة في الفورم، يعني احنا مش عارفين ده فارس (هزلي يعني) وللا
لايت كوميدي
وللا اكشن
باينه افلام مقاولات
ما ييجوا دوغري ويخلوهم محترمين...يعني فيه حد في البلد دي عايز يقنعني ان دي اول مرة في حياة حزب الله يبعت مساعدات لحماس؟ فيه حد عايز يقنعني في البلد دي ان حزب الله بس هو اللي بيبعت مساعدات لحماس؟
وفيه حد عايز يقنعني ان كل السلاح اللي بيدخل بقاله سنين ده كان بيدخل من حتة تانية غير الحدود؟ من البحر زي ما قال ابو الغيط: دي سوريا هي اللي بتبعت لهم السلاح من البحر... بالتعاون مع مين بقى؟ مع اسرائيل؟ ماهي اسرائيل اللي مسيطرة على البحر
حد عايز يقنعني ان كل اللي دخل من الحدود ده ما كانش بطناش من النظام المصري؟
واتزنقوا
اتزنقوا
اسرائيل وامريكا وقعوا اتفاقية ما فكروش يستعنوا النظام المصري ويتصلوا بيه في التليفون عشان يبلغوه بنص الاتفاقية وللا حتى ياخدوا رأيه وامريكا لمت عزالها وجات وقفت على الحدود
لو النظام المصري قال بصريح العبارة: ادي الله وادي حكمته، انا مش عارف اتصرف، اتزنقت، وجنبي قوة نووية، وعندي اتفاقية بتقول اني لو هرشت اسرائيل ح تعتبرها اعلان حرب، وانا خايف وما اقدرش ادخل في حرب، آسف.... مش ح ينفع اطنش زي ما كنت باطنش بمزاجي تاني 
كانت الناس احترمته اكتر من الفيلم الهندي الساقط اللي هم عاملينه جتهم نيلة
ملحوظة مالهاش اي علاقة بالموضوع (او لها علاقة الله اعلم): فيه واحد بعت لي على الموبايل بيقول لي انت منتصر الزيات مترشح لانتخابات النقابة