احمدي نجاد في مؤتمر دربن

والله شرفنا، هو صحيح قلب الدنيا وكانت خطبة صاخبة وشوية عيال صهاينة قعدوا يهللوا له، بس بيقول كلام جريء قوي، جدع والله العظيم وواقف كده حاجة تشرف، وكلامه متستف ومترتب وهادي، صحيح لابس الجاكتة اياها اللي ما غيرهاش من ساعة ما انتخب رئيس، بس نضيفة، مغسولة ومكوية، لا مش دراي كلين، شكلها مغسول في الغسالة، نص اتوماتيك كمان، بس مكوية، وناس كتير بيصقفوا له في كل جملة، وفيه ناس تانية مشيت وهو بيتكلم عشان يربكوه (ولاد الخايبة ما عندهمش اي طريقة جديدة هي هي نفس طريقتهم في كل حتة) بس كويس هو ما اتلخبطش وتلات عيال قعدوا يصرخوا فراح ضاحك بصوت، وقعد يشتم في الليبرالية والرأسمالية وقال انها انتهت م العالم

وبان كي مون قال الاسلامو فوبيا زي معاداة السامية

يا مسهل ياااااااا رررررررررررربببببب

كويس ان الصهاينة الاغبيا عملوا مظاهرة ضد مشاركة نجاد في مؤتمر دوربن، ليه؟ لان الهلولة اللي هم عاملينها دي ح تخلي ناس كتير تقعد تسمعه وهو بيتكلم

الله يعينه ويقويه ويخليه يعرف يجيب لنا حاجة عدلة في المؤتمر ده، تشريع يحمينا او تشريع يجرم الاسلامو فوبيا او اي حاجة، او حتى اعتبار ان الصهيونية شكل من اشكال العنصرية، طبعا مافيش حد ح يعرف يجيب حاجة ضد معاداة العرب، ليه؟ لان مافيش موكوس واحد راح يمثلنا ويشرفنا، الا اذا بقى نجاد جاب للعرب تشريع، يا لهوتييييييييييييي، دي تبقى كسرة عين مالهاش مثيل

على الله يعمل كده، احسن، احسن يا اتنين وعشرين جثة محنطة، يارب يجيب حاجة للعرب بالذات عشان يقلع الاتنين وعشرين قرد مالط، لا والنكتة بقى لما يجيب لنا تشريع يحمينا واحنا اللي نقول له مش عايزين احنا بنحب العنصرية انت مالك يا بايخ 

يارب ينصفنا يارب

مش مهم التشريع يتطبق وللا لا، المهم ان يبقى فيه تشريع يحمينا، ونقعد زي الباز افندي ونقدم بلاغات، ناس كده تتفرغ لتقديم بلاغات وشكاوى، مش ح يحصل حاجة في الاول بس مع تراكم الشكاوى ح يحصل حاجة، هو طلب بالغاء النظام الاقتصادي العالمي الحالي المعتمد على الاستغلال، والغاء حق الفيتو...  هو فين شافيز؟ مش كان ييجي يونس صاحبه؟

ييجي واحد، زي مالك مصطفى مثلا، يقول لي نجاد وشافيز بلا بلا بلا، اقول له اتوكس، تعرف تتوكس؟ ربنا يبقى يوعدنا بدكتاتوريات منتخبة تعمل لنا كرامة وتشرفنا زي الاتنين دول بدل اللي ماسكين في خناق حزب وحركة وقناة فضائية وبكرة يمسكوا في خناق فرقة موسيقية وللا فريق اشبال كرة القدم، ده ايه ميلة البخت دي ياربي؟

عموما الناس صقفت تصقيف لنجاد جامد قوي بعد ما خلص لحد ما خرج وبعد ما خرج، بالذات من الافارقة واللاتينو

مش لو كنت فالح يا عوكل كان زمانك انت اللي في المكان ده يا وكسة؟ يا وكسة، يا وكسة، حسبي الله ونعم الوكيل فيك، خليك قاعد كده تتقزم وتقزم فينا، خلينا كده نتفرج على اردوغان شوية ونجاد شوية ونقرقض في ضوافرنا

ياللا ماشاء الله لا قوة الا بالله، ربنا يوفقه ويحميه لبعدين انشه عين وانا عاملة زي اللي ابنها خايب وقاعدة تنبر على ابن الجيران الفالح كده، طب ابن الجيران وامه عرفت تربيه، وانا ما عرفتش اربي، بانبر ليه بقى؟

كل واحد بياخد اللي يستاهله، اللي بيحترم نفسه بياخد اللي بيستاهله واللي بيهزأ نفسه بياخد اللي بيستاهله