يعني احنا دلوقت ح نعرف اخبارنا من الاعلام الاسرائيلي؟

طب ده الاعلام الاسرائيلي ما بيبطلش فشر ولا ابو لمعة، ح نعرف منين بقى؟

يعني اذاعة اسرائيل قالت ان مصر بتعد مذكرة لملاحقة سماحة السيد دوليا

وبعدين فيه كام حاجة اسرائيل قالتها ومصر نفتها

والاتنين اكدب من بعض والواحد بقى ح يبقى زي الكلب الحيران باناتهم

بالنوسبة لكتائب شهداء الاقصى مجموعة ايمن جودة (دول يقربوا لابو جودة؟) ههههههههه احسن، شوفوا مين ح يعبرهم ببمب العيد حتى، يعني هم اتركنوا على مصر؟ ح تديهم سلاح يعني؟ انا مش عارفة هي الناس كلها جايبة العشم فينا ده منين؟ مين ابن الكلب اللي تآمر على تحسين صورتنا بالطريقة المريبة دي؟

بيفكروني بسنية لما افتكرت عرفة الشواف دكتور عيون ويقول لها: لا

ما تقولش لا

بس

ما تقولش بس

مش

ما تقولش مش ما تقولش مش ما تقولش مششششششششش ده انت اللي ح ترجع النور لعينيا

كنت رجعته لنفسي يا ماما

حماس وحزب الله يقولوا: ما كانش والله العشم تعمل كده يا حسين، مش ده اللي متوقعينه من مصر

وكتائب شهداء الاقصى تراهن علينا على اساس ح نديهم ايه؟ شم النسيم جاي ح نديهم فسيخ ورنجا.... وبيض ملون ياااااااااللا شالله ماحد حوش

الا اذا كانوا هم اصلا ما بيعملوش حاجة خالص من الاساس، ماهو مش ممكن فصيل مقاوم بجد بيعمل اي حاجة ليها لازمة في حياته ويراهن علينا الا اذا كان اعضاءه كلهم شموا تلوث، دول باعتين جواب لمحمود عباس بيطمنوه يعني

ايه اللخبطة دي؟ محمود عباس؟ ومبارك؟ ومقاومة؟ بيقاوموا مين دول؟

على رأي طفاطيفو: ابعتي لي حد يلطم وانا اصوت او اصوت وهو يلطم بس نتعاون

ما يهدوا بقى... الموضوع كده باخ منهم قوي واتظفلط ومش عارفين يتحكموا فيه، هو حصل ايه؟ ايه الظيطة والظمبليطة في الصالون اللي هم عاملينها دي؟ عايزين ايه دلوقت حاليا؟

ماحد يشوفوهم عايزين ايه عشان يسكتوا، ايه الفركيشة اللي عاملينها دي

هو النظام المصري ماله بقاله فترة هادم اللذات ومفرق الجماعات كده؟

يفركشوا القمم العربية (ويطلعوا يقولوا لنا كده وفرحانين: هيييه هيييه)، ويفركشوا مجلس التعاون الخليجي، ودلوقت بيفركشوا فصائل المقاومة

هم مالهم بقوا فسية شيطان كده؟ عاملين زي الراجل العاطل الفاشل اللي مالوش لازمة في الحياة وكل يوم يقرف مراته وينكد على عياله عشان يحسسهم بوجوده