Wednesday, 1 April 2009

ازاي الواحد يتعلم من غيره وهو محترم في نفسيته

هو عيب ان الواحد يتعلم من غيره في الحاجة الكويسة؟ مش عيب، بس يبقى محترم في نفسيته، يعني مثلا مثلا يعني عندك المانيا القمح، كانت كوريا الجنوبية بتلعب ماشت في المانيا وكسبوا، قاموا قعدوا يحتفلوا في الاستاد ويهيصوا ويقولوا جوهرييييييي جوهري او او، بس بالكوري
وخلصوا الاحتفال بتاعهم ومشيوا
جم طبعا عمال النضافة عشان ينضفوا مكان الكوريين ما لقوش حاجة، خالص، ولا عقب سجارة على الارض، ولا كرسي مقلوب، ولا واحد تافف
الجدعان قبل ما يمشوا نضفوا مكانهم وخلوا الاستاد قشطة
قوووووووووووم عملوا ايه؟ الحكومة في المانيا بعتت للحكومة في كوريا تقول لهم: اكتبوا لنا البرنامج التربوي اللي الامهات الكوريات بتمشي عليه بالظبط عشان تربي ولادها
لا قالوا لهم افتحوا لنا مدرسة عندنا وعلمونا التاريخ الكوري، ولا قالوا لهم ياريت تبعتوا لنا العلم الكوري عشان اصله مبروك
عجبهم ان جمهور الكورة (وهو عادة بيبقى من اصيع الناس في اي شعب) متربي الى هذه الدرجة واستنتجوا منه ان الناس دي متربية ولازم عندهم عادات في التربية بتطلعهم مؤدبين قوي كده
وبالفعل عملوا في كوريا دراسة عن الام الكورية وعادتها واساليبها وحتى تون صوتها وهي بتتكلم مع اولادها وبعتوه لالمانيا والبرنامج قيد الدراسة عشان يتم تعميمه على الامهات في المانيا بما يناسب المجتمع الالماني
طبعا ييجي واحد مصري كل كلكيعة وكلكيعة فيه قد كده وعنده عقدة الخواجة يقول: اهو احنا كده بقى نبعت للالمان نقول لهم ييجوا يربوا لنا عيالنا، او نبعت عيالنا لاسر بديلة الماني تتبناهم
عشان احنا مش عايزين نتعب وندور ونشوف الناس بتعمل ايه عشان تحسن من نفسها ونحاول نعمل زيهم من غير ما نبقى قرد بصديري ولا نبقى مسوخ، يعني هم الالمان لما ح يتعلموا معاملة الاطفال من الكوريين ح يضيقوا عينيهم؟ وللا ح يقلبوا بوذيين؟ وللا ح يتكلموا كوري ويلوؤوا لسانهم؟
انا لسة مصممة اننا عندنا ازمة كرامة، كل يوم بيتأكد لي الموضوع ده، ما عندناش احساس اننا نستاهل احسن من اللي احنا فيه، وما عندناش احساس اصلا اننا ناس كويسة
مع اننا ناس كويسة، وفينا حاجات كتير كويسة جدا وخصال كتير ممتازة، بس احنا عمالين نهد في نفسنا ونكسر في معناوياتنا
وعايزني اكسبها؟
يا خي... دي الكلمة اللي محمود المليجي نسي يقولها، او الرقابة شالتها بقى، لانها مش معقولة تفوت على يوسف شاهين
مافيش حد ح يعمل لك قيمة ولا يحترمك الا اذا انت تعرف قيمة نفسك وتحترمها، وطول ما انت بتوحي لنفسك انك وحش وكل ما هو له صلة بيك وحش ح تقتنع وتتصرف على انك فاشل، وترمي بلاك على الناس في ابسط الامور من اول رغيف العيش اللي بتاكله لحد الجامعة اللي بتدخلها، خلي عندك كرامة، ماحدش احسن منك عشان تبقى ماشي في ضله كده وحاسب نفسك المنادي في جراج العالم: كل سنة وانت طيب يا باشا، مش كل حاجة تشحتها حتى العلم وانت ربنا مديك من خيراته ومن وسع، لك فلوس بتدفعها ضرايب ولك حقوق تطالب بيها وطول بالك، الشحاتة اسهل من الشغل، بس الشغل ح يعملك بني ادم، وانت لما تسعى في التعليم بتاعك وتتمسك بحقك في انك بتدفع ضرايب عشان التعليم ده ما يقلش عن اي دولة في العالم انت بتشتغل، ولما تستسهل وعايز تاخد شقا الناس على الجاهز تبقى شحات حتى لو بتدفع الاف
احنا بنشحت العلم من الناس، ودي ناس تعبت عشان توصل للمستوى ده، ومش ح يدونا تعبهم كده بلا مقابل
ما نتعبش احنا كمان ليه؟ ناقصين ايد وللا رجل وللا مخ؟ عيب يعني
ده احنا الحريفة العريفة غيرش الايام المدعوقة
انا ما اقدرش اضحك على نفسي واقول اننا ناجحين، احنا لحد دلوقت فشلة، بس عشان مصممين على الفشل، احنا عندنا كل عناصر النجاح واننا نبقى ناس كويسة بس لو معتزين بنفسنا بس

39 comments:

مواطن مصري said...

لية المصري لما بيطلع برة بينجح و جوة بيفشل و يحبط و يلعب سلسفيل الدنيا


لية برة المواطن بيقف الاشارة الساعة 1 بليل
بليل و الاشارة فاضية و بيلتزم و مفيش ظابط مرور ؟

و احنا لية عشان برة ناس بتحترم القانون و دولة تحترم المواطن و المواطن عندة حس وطني و الدولة تحترمة من غير لا تميز ولا تعاملة اكنة مواطن درجة تانية

الي احنا فية يا نوارة ناتج الانقلاب و الحكم الناصري الي شقلب الدنيا من
غير ما يكون في دراسة


تحياتي

جبهة التهييس الشعبية said...

ايه ده يا مواطن؟ انت نسيت الظلاميين والاسلاميين المتطرفين والاخوان المسلمين؟

مواطن مصري said...

كلة نتاج هذا الحكم

جبهة التهييس الشعبية said...

لا لا لا لا يا مواطن

انا ملاحظة انك ابتديت تغير اتجاهاتك وابتديت تدور على مبررات للظلاميين والمتطرفين الدينيين

mido said...

دايما ظالمة القرود و مهزئاهم و تقولى قرد بصديرى , حتى القرود عندها كرامة و مبتقبلش بالذل و بطلوا يلبسوا صديرى-حتى شوفى كده :)

صوت من مصر said...

انا معتز بان مصرى ابن مصرى بس متقولش مصر ادتنا ايه دى اكتر كدبه سمعتها فى حياتى لانى اديت كتير لمصر ومخدتش غير طربوش لونه اسود لو قلب حبابيك يا مصر
بجد استحاله حد مصرى يقول انه ناجح غير سويرس

مواطن مصري said...

ههههههههههه بصي يا نوارة انا عمري ما هتفق مع الظلامين سواء كانو الاسلامين او المسيحين او الصهاينة

جبهة التهييس الشعبية said...

ياروحى على القرد العسل ده

صوت من مصر

انا عايزة اعرف

ازاي ناس تحت الاحتلال والدبابات الانجليزي ماشية في الشارع والاحتلال بيحاربهم ويحطمهم ويقفل لهم مشاريعهم بدل المرة عشرة وعرفت تعمل تعليم وطني واقتصاد وطني وجمعيات اهليه وطنية

واحنا اللي ما عندناش احتلال عايشين عوالة على الناس؟

عايزة افهم

ازاي؟

ايه الفرق ما بينا وما بينهم غير انهم كانوا ناس عندهم كرامة ومعتزين بنفسهم واحنا ناس مش حاسين بقيمة نفسنا غير في ماتشات المنتخب؟

الحب مش بالكلام

جبهة التهييس الشعبية said...

وعلى فكرة ما كانوش بيتحاربوا من الاحتلال بس

وكانوا بيتحاربوا من الحكومة المصرية اللي كانت متواطئة مع الاحتلال عليهم

وكانوا بيتحاربوا من ناس كتير عملاء للاحتلال

وكان فيه ناس بتحطمهم وتقول لهم انتوا ناس فشلة انتوا عايزين تساووا نفسكوا بالانجليز؟

ده نبوية موسى بتحكي في مذكراتها ازاي انها عملت خطة ما تخرش المية عشان تثبت للمدرسات المصريات ان الناظرة الانجليزية بتكدب وان ممكن واحدة انجليزية تكدب وممكن واحدة مصرية تقول الحق

شوف كنا واصلين لحد فين؟

وعدنا من حيث بدأنا وعدنا من حيث بدأنا

صوت من مصر said...

اقولك شكرا على كلمه قرد
انا قرد بس بخاف على بلدى
عارف ان الناس عندها لا مباله بس ده بسبب ايه
القهر والخوف نتيجه انهم خايفين يبقوا ورا الشمس زى ما بيسمعوا فى حكاوى اخر الليل
للاسف القرد بيتكلم

جبهة التهييس الشعبية said...

صوت من مصر

انا ما قلتش عليك قرد

انا كنت باكلم ميدو

ادخل على اللنك اللي هو سايبه وانت تعرف

صوت من مصر said...

اقول اسف على عدم الفم وسؤ الظن بجد بس فعلا القرد بيتكلم وبيطلعوا صوت وكفايه انه مبيخافش ومهتم ببيته ووطنه ولا ايه
حاله الا مباله نتيجه للخوف وانا بكره الخوف ممكن تعرفى ده بالتعرف على البلوج بتاعى صوت من مصر
بجد بشكرك اولا لانك بتحبى مصر بجد ثانيا لخوفك عليها

جبهة التهييس الشعبية said...

اصلا شفت القرد قاعد مهموم وبيفكر ازاي؟
ههههههههههه
مش عارفة شايل هم ايه ده؟

جبهة التهييس الشعبية said...

احنا ناس كويسين يا صوت من مصر

احنا مش ناقصنا غير اننا نعرف بجد اننا ناس كويسين واننا مش اقل من حد واننا نستاهل احسن من كده بكتير

صوت من مصر said...

نواره
شكلك عازه تعملى حمله وتسميها انتا احسن من غيرك بكتير
صح ولا انا غلطان مع انى مصرى مش بيغلط وواثق من نفسه لانى مصرى
تحياتى

muslimHuman said...

Achhhh liebe Nauara.... es wäre schön wenn das war ist :)))))

marwan said...

ازيك يا نوارة انا بقى حقولك من وجهة نظرى أن المصرى فية حاجة غريبة قوى أول ما تيجى تعلمى حد حاجة مفيدة أول ما يعلا يعلو على معلمة مابيحبش ابداً يفتكر ان فى حد علمة فى يوم من الايام وكمان المصرى اما بيسافر برة بتخصصة المميز بيعامل معاملة محترمة وبيلاقى نفسة وكل هدفة يتعلم أكثر وأكثر ولا يتعالا على معلمية مثل أحمد زويل وأن كان يفرض علية قيوض وكمان فى نقطة تانية عايز أكلمك عنها وهى ان دائماً المصرى بيقلل من نفسة اما يسافر برة يوافق على أى شغلانة ويتنازل عن مؤهلة تماماً وكلامى عن العمل فى الدول العربية ودة ايلى خلاهم يبصلنا نظرة ليست سليمة لأ وكمان بيصدروا ضدنا احكام مثل الجلد واشياء اخرى دة رأى الشخصى ومش عارف صح ولا غلط

جبهة التهييس الشعبية said...

صوت من مصر

طب والله فكرة

لا انا بصراحة ما اضحكش عليك

بس ليه لا؟
انا كانت واحدة صاحبتي بتكلمني

الحقيقة هم اتنين
وكانوا عايزين يعملوا مشروعات تنمية بشرية براسمال وطني للهدف ده

ان الناس تحس بقيمة نفسها وتعرف انها كويسة

خلاص نعمل الحملة دي

وفيه ناس قطعت شوط بالفعل
محتاجين بس ننظم جهودنا

جبهة التهييس الشعبية said...

حرب ايه يا اخ مسلم هيومان
ما تقولش كده احسن مواطن مصري بيتخض من الكلام ده

مواطن مصري said...

نوارة انا مبحبش حد يتكلم لغة انا مفهمهاش ترجميلي و النبي قال اية
:)

صوت من مصر said...

طب بجد الفكره جميله
لو تعرفى حنان كمال الصحفيه افتكريها كده ممكن تتواصلى معايا عن طريقها انا موافق على مشروع اننا نعمل حمله
اسمها انا مصرى اذا انا مميز
بجد وهتبقى حلوه جدا

الكلمة نور said...

سؤال جميل ازاى الواحد يتعلم من غيره وهو محترم فى نفسيته؟
ينفع يجى فى الثانوية الغامقة
انتى بتسالى اساله تتجاوب فى كتب
والواحد ميعرفش يبدا منين؟
هو اصلا الانسان لازم يكون متربى كويس عشان يعرف يشوف الكويس فى غيره اصلا ناهيك عن ان يتعلم منه
وبعدين يشوف الكويس فى غيره لما يبقى متربى وعنده ثقه فى نفسه
وثقه بالتالى فى مجتمعه
وطبعا لما يبقى الواحد مننا مش اهله بس اللى بيربوه الشارع بتاعه واصحابه والتلفزيون والحكومة(المجتمع يعنى)
ولاننا بقينا مجتمع فللى زى العسل فطبعا التربية بقت زباله ولما كل الاجيال اللى طالعة مش متربية تقريبا ومنظومة القيم اللى بتنزرع وتتربى جواهم بقت مخلوله واولوياتها مش متظبطه صح فالعادى ان الناتج من كل الهم ده انسان مشوه
انا باتكلم فى الاجمال مش كل واحد يبص فى المرايه بقه ويقول انا فل واصحابى فل بطل هجص
نجى للثقه فى النفس
لما كان الشخص بيطلع والقيم اللى جواه مش مؤسسه كويس ناتج (خيبه المجتمع) وان الاهل اصلا عندهم نفس المشكله
فيصبح قياسه لقيمته بالنسبة للمجتمع هى المادة وبالتالى تصبح هدفه دون النظر لاى اعتبارات وربما يصل لهدفه او لا كل انسان وحالته
وطبعا لانه مقياس مختل فرضته ظروف مختله فيصبح الفقر والعوز مع القيم المحترمة عيب ومياكلش عيش
وبالتالى يفقد الشخص ثقته فىمقاييس مجتمع فرض عليه ثمن لايقدر على دفعه او لا يقدر مقابل قيمه يبحث عنها
وفقد الثقه شئ يحدث بمنتهى السهولة واكتسابها امر بالغ الصعوبة
فقد الثقة ناتج ظلم اجتماعى وفساد و فوضى عامه فى ترتيب اولويات الشخص
وضياع التقدير للقيم الجيده
وهذا حدث فى سنوات طويله اجيال واجيال تم افسادها
فاصبح نواتج كل هذا يورث للاجيال الجديده
وكسب الثقه يحدث عندما ترى ان هناك عدل فى توزيع ثروات المجتمع
مساواة امام القانون - ترتيب جيد ومتوزان لاولويات الشخص
وتقدير عام ممتاز لكل القيم النبيله
لما يخرج المصرى لبلد غربى يلاقى الدنيا زى الفل حوله ولان عنده اصلا موروث حضارى (طبعا دا غير الموروث العائلى الاجتماعى القريب)
فيعجبه الوضع يحب النضافة والعدل والمساواة والعداله فى توزيع الثروات فيتماشى مع النظام عن حب
ويتعلم
نقوم احنا نختصر الحالة ونقول ان المصرى فى الغرب بقى كويس لان الفقر اخرج اسوأ مافيه فى بلده
انما لا الفقر وعدم الرباية وكل اللى فات كان سبب
والحضارة اللى جواه خرجت احلى مافيه لانه وجد نظام يستطيع ان يفهمه
نهاية كل القلق اللى قاعد اقوله ده
ان احنا كويسين فى ظروف وحشة وبقينا وحشين قوى لما الظروف بقت اوحش
والموضع ده عامل زى الدائرة المغلقه اللى بتتكون من فقر -مرض-جهل
محدش يعرف ايه اللى بيدأ اول بس التلاه بيعملوا كوكتيل تخلف احلى من عصير المانجة

اسف تانى لطول التعليق
وعايز اقول ان الدين عنصر كبير فى الموضوع بس دا محتاج موضوع لوحده انا مش قد التعليق عليه

جبهة التهييس الشعبية said...

وانت شايفني انا اللي باعرف الماني؟

لقيته كاتب
war
قلت يبقى اكيد حرب زي اللي بالعنجليزي

بالفكاكة كده

ربنا يستر وما يكونش بيشتمني

جبهة التهييس الشعبية said...

لا انا مش شايفة ان التربية زبالة ولا حاجة

والله فيه ناس من بتوع الطاقة والحاجات دهين اللي انا مش باكل منها قوي بس بتقول انت لو جواك متوقع من الناس خير ح تلاقي خير لو متوقع منهم شر ح تلاقي شر

على فكرة انا اليوم اللي بابقى خارجة فيه دماغي رايق وحاسة اني باحب الناس كلهم بالاقي كل الناس لطيفة معايا لدرجة ان ممكن الناس توقفني في الشارع وتهزر معايا

ولما بابقى خارجة راكبني ستين عفريت الاقي كل الناس بترخم عليا وبتضايقني وكل حاجة معقربة

مش صحيح ان الناس تربيتها كلها وحشة

مش ح اقول لك ان التربية كلها واو ما حصلتش

بس فيه حاجات كويسة وفيه حاجات وحشة وفيه ضغوط

بالنوسبة للضغوط

نساع بعضينا يا حورية

وبالنوسبة للحاجات الكويسة لازم نبروزها عشان الناس ما يجيلهاش يأس في حياتها

وبالنوسبة للحاجات الوحشة

لازم طبعا نتكلم عنها ونحاول نصلحها وما نزعلش بقى

واهم حاجة الواحد يحاول

باقول يحاول

يحاول

يقيم نفسه

دي صعبة قوي على فكرة

انا شخصيا مش بادعي اني انا عندي تقييم لنفسي خالص

لا صح ولا غلط

اصلا لو سألتني ايه رأيك في نفسك يبقى بتحرجني فعلا عشان انا ممكن اقول لك رأيي في القطة اللي ماشية تحت الشباك وما اقدرش اعرف يبقى لي رأي في نفسي

بس ناخد نفسنا بالهينة

احنا جلدنا نفسنا كتير قوي

والظاهر الحكاية دي مش نافعة

بتيأسنا زيادة

يعني مش معقول مافيناش ولا اي حاجة كويسة خالص كده؟
مش ممكن
طول النهار نشتم في نفسنا بالطريقة دي؟

ماحدش في الدنيا بيشتم في نفسه كده على فكرة

ولا الكونغو
احنا كشعب مش ناس وحشة

احنا وحاشتنا كلها متركزة في اننا مقتنعين اننا وحشين وابتدينا نتصرف على هذا الاساس

وعلى فكرة الشتيمة مش بتتسمع

يعني احنا لو فضلنا ننتقد في نفسنا بالعنف ده مش ح نسمع بعض

انا باقول لك الكلام ده وانا عنيفة في نفسي يعني باستخدم اساليب عنيفة وبافقد اعصابي كتير

لاني باتغاظ لما بالاقي حاجات المفروض انها مسلمات والناس بتناقشها

بس فيه معادلة صعبة الظاهر اننا لازم نعملها

اننا لا نوهم نفسنا باننا بنعمل حاجات فظيعة وواو بحيث ضميرنا بقى يرتاح ونهدا وما نعملش حاجة زي ما عمرو خالد كان بيوهم الناس انهم بيعملوا نهضة وهم اصلا كانوا بيزرعوا السطوح

ولا نيأس نفسنا بتحطيم الذات قوي والاحساس بالدونية

انا لسة بافكر في الموضوع يعني

احنا مع بعضينا
مش عارفة لسة الصح ايه

بس انا فعلا مش حاسة اننا ناس وحشة للدرجة دي
عادي يعني
ناس، زي اي ناس
لا اخلاقنا اقل من اخلاق بقية الناس ما الدنيا كلها ماشية بالمقلوب
ولا احنا اغبى من اي حد ولا حاجة
مافيش حاجة جوهرية تخلينا نبقى اقل من اي دولة تانية

يعني هم الامريكان اللي عندهم اخلاق بروح خالتهم؟ هم مش بيسرقوا عشان مش محتاجين للسرقة بس هم ما عندهمش ضمير ولا حاجة
ولا متفانين ولا نيلة، دول صباح الخير بفلوس

وانا ليا صديقة بتدرس في الجامعة الامريكية وبتقول لي انها درست كل الجنسيات وان كلهم بلا استثناء (حتى الطلبة الصينيين والله اللي كنت فاكراهم ناس امرا وكمل) اول ما بييجو مصر ويلاقوا الفوضى والسبهللة وغياب القانون لا بيعملوا واجب ولا بيذاكروا ولا اصلا مخهم انضف مننا ولا حاجة وبتحلف لي انها مش تحيز والله العرب انضف امخاخ في كل الناس

طب ايه بقى؟

يعني احنا كل مشكلتنا غياب القانون والسبهللة

طب ما نحط لنفسنا احنا قانون ونتعامل على ان البلد دي مافيهاش حكومة خالص

ينفع الحكاية دي وللا ايه؟

هرطقة said...

لأ مش بيشتم
دا.. احم .. بيتغزل

جبهة التهييس الشعبية said...

بيتغزل
هههههههههههه
طب والله ربنا يجبر بخاطره

عشان تعرفوا اني مدونة انترناشونال حتى يوم ما يتغزلوا فيا يتكلموا كلام انا مش فاهماه

جبهة التهييس الشعبية said...

مروان
هههههههه
بص هو احنا لما بنسافر بنشتغل كذا شغلانة مالهمش علاقة ببعض

ويشاركنا في هذا المنحى السوريين واللبنانيين

يعني تلاقي الواحد من دول الصبح بيدرس كيميا وللا طب وبعد الضهر بيشتغل على تاكسي وللا ليموزين وللا حتى بياخد شيفت في حراسة العمارة اللي هو فيها عشان صاحبة البيت تخفض له الايجار وبالليل بيطبل في نايت كلب وللا بيغني

ههههههههههههههه

بس والله انا مش شايفة ان دي حاجة وحشة

بس طب ليه مش بنعمل كده في بلدنا؟

الكلمة نور said...

لا طبعا نعيش من غير حكومة؟
يا نهار ابيض مينفعش
من غير امناء شرطة ومخبرين؟
بقانون عرفى يعنى؟
نحلها سوا؟
جربى بقى ساعتها هتعرفى الشعب المصرى كيف يبدو من الداخل
وتقولى حقى برقبتى
وتعملى فيها فانتوم وتطيرى من البلدى
انا والله زعلان على مصر مش عشان الكلام الكبير ولا النيل ولا اى نيله تانيه
انا بس ليا مصلحة فى مصر وليا مع المصريين مصلحة
بلدى وهادفن فيها ان شاء الله فى ترب اهلى
ولو خلفت احب ان عيالى يتربوا فى الشارع مع صحابهم وانا مطمن عليهم
مش عايز اهربهم يتربوا بره مصر ولا يتربوا فى كامبات جوا مصر بس مش مصر(مدارس من بتاعت مقال بلال فضل)
والله هيا دى مصلحتى فى مصر
وبحبها مش عشان ناسها كويسين بس عشان هى المكان اللى الوحيد اللى اعرفه و باطمنله فى الدنيا
بيتى وسريرى يعنى
ويعز عليا والله اشوفها كدا
ويااااااااااااه قلبى والله بيتقطع لما اشوف حاجه وحشه منها او فيها
بس اعمل ايه
كل اللى باشوفه بيقول اننا لو هنتحسن هناخد وقت
مش هاشوفها بعينى وهيا كويسه
مش هالحق -مش هاشوفها واحنا احرار وبناخد حقنا وبنقول راينا وبيتاخد بيه
مش هالحق اشوفنا واحنا اى واحد مننا بياخد ظابط او موظف كبير ويدخل بيه القسم ويعمله محضر وياخد حقه
مش هالحق اشوفها وانا مأمن فيها على نفسى ومش خايف اقول كلمة الحق
واخاف اشوفها واشوف الناس وهى بتدفع تمن الحرية قلبى ميستحملش
اصل الحرية وكل الحاجات الحلوة ليها تمن
فرنسا دفعت التمن
امريكا دفعت التمن
اليابان دفع
حتى لبنان دفعت
هندفع التمن وهنبقى كويسين بس هيبقى غالى
اوى اوى
دم وموت وخوف فى الشوارع عن حق
وهيجى الوقت
اللى هنضطر ندفعه ولما نحس انه غالى هناحفظ على نفسنا
هنربى عيالنا كويس
ومش هنخلى اى حد ينط على ضهرنا ويركنا ويركب عياله
لما هندفع التمن لا هيبقى فينا ناصر ولا سادات ولا مبارك
لا صفوت ولا هيكل ولا عامر
هنبقى عارفين التمن اللى هندفعه لو حد كتم نفسنا وسكتنا وقلنا اهو احسن من غيره
هنتربى بس هندفع وياهنا من يعيش ويستحمل

عبقرينو said...

نوارة السلام عليكم

حابب تقرى آخر بوست عندى وتقوليلى رأيك

شكرا ليكى

Anonymous said...

Achhhh liebe Nauara....

انا بحبك نوارة

Ahmad said...

غريبة
انا اشتغلت مع كوريين
معفنين و ريحة بقهم عاملة زي القبر
و بياكلو كلاب
و اخر همهم النضافة
:)

Ahmad said...

و النبي حد يجاوبني علي السؤال ده
هو صلاح عيسي كان بيعمل ايه في العاشرة مساءا امبارح؟؟
ده ايه التعزيز ده

Rania said...

احنا لحد دلوقت مدناش لمصر حاجة اساسا
عايزين ناخد منها و بس
اى حد يقولى انا اديت لمصر يعرفنا اداها ايه
بتخرج براها تدى كل حاجة بتيجى لحد عندها و بتستخسر فيها كل حاجة

كلامك حلو اوى يا نوراه بجد و اكيد هيخلينا نراجع نفسنا فى حاجاات كتير اوى
تحياتى

جبهة التهييس الشعبية said...

ايوة يا احمد

انا شفت كوريين معفنين في نفسهم وبياكلوا بصوت عالي ويعملوا الصوت ده وهم بياكلوا: تكتكتكتكتكتكتكتك
ومش بيغيروا هدوهم كتير ده ان غيروها اصلا
انا برضه اتعاملت مع ناس منهم

بس مش بيوسخوا مكانهم عادة

يعني ما يقلبوش المكان اللي قاعدين فيه

راجى said...

يا نوارة المصريين بالعكس واخدين قلم جامد فى نفسهم وفاكرين انهم يا ما هنا يا ما هناك
واخر قياس للرأى العام كشف ان معظم المصريين راضيين جدا عن نفسهم وفخورين وانه ليس فى الابداع اروع مما كان وانهم ميت فل واربعتاشر
ويادى الكسوف لما يسافروا بره ويعملوا معلمين على الهنود والفلبينيين والاخر ميعرفوش يعملوا الشغل ويرضوا بمرتبات اقل من الهنود
احنا يا نوارة تحت الصفر فعلا الا قليلا

رامز عباس--- هايله يا أستاذة said...

مش هقول حاجه سعدتني وخلتني مندهش ومتابع

اكتر من العادة الجميله بتعليقات الموضوع ده وكتره تواصلك مع العديد من المعلقين مهما قالوا

واهتمامك بالترجمه قدر استطاعتك لمواطن مصري ربنا يخليكي لاصدقائك واحبائك

وكل الناس اللي بتحرترمك

needsofabeautiful said...

Greetings to Ms
And ask you to read this important book
And its wide dissemination

مهندس مصري said...

بخصوص التعليم يا نوارة
عايز أعرف رأيك في البوست ده
http://roppama.blogspot.com/2009/03/blog-post_27.html
و تعليقك على تصنيف جامعاتنا و تصنيفنا كدولة بالنسبة للتعليم العالي على مستوى العالم

Anonymous said...

يا بنت نجم من اختار اسمك اهو اباك
الذي عانيت عمري بكلماته ولا لوم عليه
حيث ان الشعراء يتبعهم الغاوون ويتهمهم الأخرون بالجنون
يابنت نجم حنانيك اسمعي
محدثك قضي طفولته صديق لإلحادى أهدله كتاب
كتاب عنبري اسمه من بطن حوت يونس العنبرة
أعلم طبعك فلست انت بوزيرة الشئون الإجتماعية ولا انت مسئولة عن حمو السكران
حنانيك اقرأي
تعبت من الفكر كل من حولى يتهمنى بالجنون وانت لسان حالى لذا اكتب لك
هل اقطع لسانى كى يرتاح الجميع ام اقتص يداى مهنتى نقل الكلم
اعشق نقل الكلم ودخول روح الآخرين لكن من حولى يتهموننى بالجنون ويطالبون بلقة العيش والقرش وكل ما هنالك من هموم
لست اشكو فقرا في عهد صار فيه جميع من رباهم اباك يتساوون
في نفس الشجون
بنت نجم تحياتى لك ولمن رباك اين الرجل حقا اوحشنى عقلى عطش لكلماته ولكنك عساك تكونى سلوى تغذي جنون اربعينى

حزين
gaafareg@gmail.com