ازاي الواحد يتعلم من غيره وهو محترم في نفسيته

هو عيب ان الواحد يتعلم من غيره في الحاجة الكويسة؟ مش عيب، بس يبقى محترم في نفسيته، يعني مثلا مثلا يعني عندك المانيا القمح، كانت كوريا الجنوبية بتلعب ماشت في المانيا وكسبوا، قاموا قعدوا يحتفلوا في الاستاد ويهيصوا ويقولوا جوهرييييييي جوهري او او، بس بالكوري

وخلصوا الاحتفال بتاعهم ومشيوا

جم طبعا عمال النضافة عشان ينضفوا مكان الكوريين ما لقوش حاجة، خالص، ولا عقب سجارة على الارض، ولا كرسي مقلوب، ولا واحد تافف

الجدعان قبل ما يمشوا نضفوا مكانهم وخلوا الاستاد قشطة

قوووووووووووم عملوا ايه؟ الحكومة في المانيا بعتت للحكومة في كوريا تقول لهم: اكتبوا لنا البرنامج التربوي اللي الامهات الكوريات بتمشي عليه بالظبط عشان تربي ولادها

لا قالوا لهم افتحوا لنا مدرسة عندنا وعلمونا التاريخ الكوري، ولا قالوا لهم ياريت تبعتوا لنا العلم الكوري عشان اصله مبروك

عجبهم ان جمهور الكورة (وهو عادة بيبقى من اصيع الناس في اي شعب) متربي الى هذه الدرجة واستنتجوا منه ان الناس دي متربية ولازم عندهم عادات في التربية بتطلعهم مؤدبين قوي كده

وبالفعل عملوا في كوريا دراسة عن الام الكورية وعادتها واساليبها وحتى تون صوتها وهي بتتكلم مع اولادها وبعتوه لالمانيا والبرنامج قيد الدراسة عشان يتم تعميمه على الامهات في المانيا بما يناسب المجتمع الالماني

طبعا ييجي واحد مصري كل كلكيعة وكلكيعة فيه قد كده وعنده عقدة الخواجة يقول: اهو احنا كده بقى نبعت للالمان نقول لهم ييجوا يربوا لنا عيالنا، او نبعت عيالنا لاسر بديلة الماني تتبناهم

عشان احنا مش عايزين نتعب وندور ونشوف الناس بتعمل ايه عشان تحسن من نفسها ونحاول نعمل زيهم من غير ما نبقى قرد بصديري ولا نبقى مسوخ، يعني هم الالمان لما ح يتعلموا معاملة الاطفال من الكوريين ح يضيقوا عينيهم؟ وللا ح يقلبوا بوذيين؟ وللا ح يتكلموا كوري ويلوؤوا لسانهم؟

انا لسة مصممة اننا عندنا ازمة كرامة، كل يوم بيتأكد لي الموضوع ده، ما عندناش احساس اننا نستاهل احسن من اللي احنا فيه، وما عندناش احساس اصلا اننا ناس كويسة

مع اننا ناس كويسة، وفينا حاجات كتير كويسة جدا وخصال كتير ممتازة، بس احنا عمالين نهد في نفسنا ونكسر في معناوياتنا

وعايزني اكسبها؟

يا خي... دي الكلمة اللي محمود المليجي نسي يقولها، او الرقابة شالتها بقى، لانها مش معقولة تفوت على يوسف شاهين

مافيش حد ح يعمل لك قيمة ولا يحترمك الا اذا انت تعرف قيمة نفسك وتحترمها، وطول ما انت بتوحي لنفسك انك وحش وكل ما هو له صلة بيك وحش ح تقتنع وتتصرف على انك فاشل، وترمي بلاك على الناس في ابسط الامور من اول رغيف العيش اللي بتاكله لحد الجامعة اللي بتدخلها، خلي عندك كرامة، ماحدش احسن منك عشان تبقى ماشي في ضله كده وحاسب نفسك المنادي في جراج العالم: كل سنة وانت طيب يا باشا، مش كل حاجة تشحتها حتى العلم وانت ربنا مديك من خيراته ومن وسع، لك فلوس بتدفعها ضرايب ولك حقوق تطالب بيها وطول بالك، الشحاتة اسهل من الشغل، بس الشغل ح يعملك بني ادم، وانت لما تسعى في التعليم بتاعك وتتمسك بحقك في انك بتدفع ضرايب عشان التعليم ده ما يقلش عن اي دولة في العالم انت بتشتغل، ولما تستسهل وعايز تاخد شقا الناس على الجاهز تبقى شحات حتى لو بتدفع الاف

احنا بنشحت العلم من الناس، ودي ناس تعبت عشان توصل للمستوى ده، ومش ح يدونا تعبهم كده بلا مقابل

ما نتعبش احنا كمان ليه؟ ناقصين ايد وللا رجل وللا مخ؟ عيب يعني

ده احنا الحريفة العريفة غيرش الايام المدعوقة

انا ما اقدرش اضحك على نفسي واقول اننا ناجحين، احنا لحد دلوقت فشلة، بس عشان مصممين على الفشل، احنا عندنا كل عناصر النجاح واننا نبقى ناس كويسة بس لو معتزين بنفسنا بس